العُسبَرة

البارت التاسع عشر

بعيني حچاية جيب اليفتهمها
دمعتي بلا سبب توكع والمها
اكو بذاكرتي ناس تموت وتعيش
ناس اعرفها ناس ما اعرف شسمها

العُسبَرة

*******

الم قوي ينهش بروحي فراغ بداخلي جبير كِلش ماچنت بيوم اتصور رح يصير بداخلي اهجس فقدت كطعة من گلبي  لا مو كطعة فقدت گلبي كِله برحيلهم

وين انه وليش عايشة هم جوة التراب وانه اتنفس ليش عمت عيني التشوف الضوة وعيونهم غمضت عمت عين الوكت الخلاني اشوف هذا اليوم 

ما جاي اصدك صدِك هذا الشي لو حلم معقولة بين ليلة وضحاها اخسر اعزاز گلبي برمشة عين كلِهم يروحون من ايدي فد روحة
مني السبب لو منهم

عصرت گلبي بأيدي ودموعي تتساقطة وحدة تلو الاخرى اريد شي يسكت هذا الالم الم براسي الم بگلبي وبروحي وجسمي  بشني يكدر يهجس الانسان بهيچ موقف غير الوجع والالم والحزن

القهر والهضيمة شعور اليتم يأذي حيلل  روحي مهضومة  حزنانة بكد الفاگدة اولادها كِلهم وانه فاگدة اهلي كِلهم شبقى منهم اربعة راحو  فجأة بدون مقدمات بدون وداع بدون اي شي

كان شعوري حِيناها كورقة شجر يَابسة في فصل الخريف والرياحُ تهُشّم فيها وكُل ثانية تفقد جزءٍ من ورقتها  وما كان لها غير الصمت من لها ليسمعها سوى ربها الذي خلقها وبالشجرة وضعها وتحت امره فعلت الرياح فعلتها فما كان للورقة المسكينة سوى صمتها فلو تكلمت افصحت  وكُل اصم بصراخها اسمعت ومن حالها كُل ضرير ابكت فما حالها اذاً؟ سوى ان تشكو لرب البشر  عن فعل الرياح التي مزقت ورقتها وتشكو ضعف حالها

عندي يقين تام رغم الاذية البداخلي انو الله اخذهم بحكمة اكيد اكو حكمة عقلي دائما چان يكِلي في كِل شر خير وفي كِل خير شر بس گلبي چان يعترض حزنه وقهر چان اكبر من انو يسمع صوت عقلي

بكِل مرة چان يفصح عن فكرته يصرخ بيه گلبي ويسكته ويكِلي الراحو امي واخوية وابن اخوي واختي وين الحكمة ليش الزين راح والشين عدل ويشم الهوى 

افكار تتراطم والحزان تتراكم هموم تتكاثر وتنتشر بروحي شيء فشيء

انگلبت ونمت على ظهري وعيني بالسگف حبيت اعرفكم على عائلتي  نبتدي بأبوي

زلمة من خيرة الزلم ينشد بيه الظهر اله سمعته الطيبة بين الاوادم معروف بحكمته وعقله الزين وطيبة گلبه بس  يعرف وين ويمتی يستخدم هاي الطيب

امي وما ادراك ما امي كنز من كنوز الجنة على الارض امي شخص ماكو منه حنونة قوية ماتسكِت عن الظلم جميلة وبالحسن معروفة  اخلاق وادب جمال ونظافة ورتابة بكِل شي متفوقة امي حافظة القرأن على غيبها وتحب كِل شي تتعلم من خياطة وحياكة  طبخ وكِل شي تشوفه تحب تتعلمه

عني 3 اخوان يوسف الجبير متزوج وعنده اربع اطفال لكن خسر احد اطفاله وهو ادهم   كاظم عمت عيني عليه بعده شاب وراح لديار حقه متزوج بس ماعنده اطفال واخير شي ساهر وهذا اكبر مني بسنة وچننا ندرس سوة

عندي خمس اخوات سميرة الجبيرة متزوجة وعدها خمس اطفال عبير اصغر منها وعدها بس اثنين ابنها الراح الله يرحمه وبعد بنية  وجميلة اصغر من عبير متزوجة بغير محافظة وقليل تجينا وعدها اربع اطفال   وهناء  هم متزوجة بس بديرتنا وعدها 3 اطفال واخر شي رحاب ماصار هواي من تزوجت وهسة هي حامل

اعرف عائلتنا كِلش جبيرة وافرادها هواي بس الراحو هواي الي راحو اربعة مو قليلين رجعت التفتت على جهتي وتكورت على نفسي بوضع الجنين واني لابسة كلادة امي وابوس بيها

هجست على الباب ينفتح ودخل واحد ورد الباب وراه هجست بيه كعد على السرير ومسح على كتفي وهمس بحس ناصي : سلسال كومي

اتركيني سميرة

سميرة : كومي عاد لاتسوين بنفسچ هيچ

رجعت كتلها : اتركيني سميرة 

مسدت على كتفي وكالت بحنية مخنوگة بدمع : كومي سلسال امي لو شافتچ هيچ صدكيني رح تزعل ورح تضوج 

غطيت وجهي وبجيت بقهر : شسسسوي سميرة شسوي شلون تردين اكومن وارجع لحياتي وكأن شي لم يكن  شلون اعيشن ولا عبالك الفاگدتها امي واخوية وابن اخوي واختي

سميرة : تعايشي سلسال لازم تتعايشين ما اكِلچ انسي واضحكي وتونسي بس لازم تطلعين من هل قوقعة العازلة نفسچ بيها كِلنا خسرنا عزازنا وكسرو ظهرنا وحيل متأذين على بعدهم بس لازم نكف على حيلنا ونستمر بالحياة  الراح مايرجع كومي ادعي وصلي الهم حتى تنسين 

سلسال : ما اكدر سميرة ما اكدر اتركيني

سميرة : زين كومي لخاطر ابوچ هو بعازتچ هسة 

سلسال : ابوي مايسمعني نايم وعايف بنته تعيش هل الم كِلها 

سميرة : سلسال ابوي بعازتچ هسة وبعازتنا كِلنا لازم نكف على حيلنا حتى نكدر نسانده  ونعدي هل محنة سوة  

سلسال : ما اريد هم يروح مثل امي وميرجع 

سميرة : لاتحچين هيچ كومي توضي وادعيله حتى الله يشافيه ولاتنگهرين على امي هسة هي شهيدة بالجنة

كعدت على حيلي والدموع تتساقط من عيني بالتدريج : اخاف اخسر الاحبهم بعد

سميرة : لاتخافين محد يموت ناگص عمر كِل واحد ويومه صدكي الله يحبهم واخذهم يمه  كومي هسة وغسلي وجهچ احنا لازم نساند بعض ونكف لبعض يلا حبيبتي

هزيت راسي بقبول وكمت وياها رحت للحمام غسلت وجهي وطلعت للصالة وچان السواد مخيم على المكان اخواتي كِلهم كاعدات  مرة عمي وبناتها  الكِل كاعد وصافن بفكره  وكِلهم فد لون حتى الاطفال كأنهم حسو بالحزن وخانسين بزوية وكاعدين بدون صوت 

بلعت ريگي بصعوبة من فات اخوية يوسف من الباب باوعتله وعيوني مدمعة وهو باوعلي واشرلي اروحله مشيتله وشمرت نفسي بحضنه وصرت اشهگ بالبچي دافنة راسي بحضنه وابچي واسمع صوته هو هم يبچي وعلى بچينا بچة الكِل

سلسال : راحو العزاززز ياخوية راحووو

يوسف : راحو لمكان احسن الله يحبهم الله يحبهمم

ظليت مچلبة بهدومه وابچي وهو يمسح على راسي ورا شوية ابتعدت عنه واني امسح بدموعي   ورحت كعدت بصف اختي عبير چانت ملخة روحها تبچي وتضرب على صدرها  ووجها  وبنتها العمرها 15 كاعدة بصفها بثوبها الاسود بدموعها تحاول تمنع امها عن اذية نفسها 

حضنتها واني ابچي وياها وهي حضنتني وتصيح ببچيها  حچة بوسف وياها.  : كافي خوية موتي نفسچ مايصير هيچ جاي تعذبيهم

لطمت عبير على رجليها وصاحت : المن باقية  ولك خويييية ابني وحيدي گرة عيني راح بشربة مي ولك يمة وليدي بعده شايف من حياته شبسرعة خذاه الموت اووف ولچ يمة عليمن ابچي على اخوية على امي على ابني  اخخخ يانار گلبيي اخخخ

يوسف : اني هم خسرت ابني بس الصبر من الله هو هسة طير من طيور الجنة

عبير  : ياخوية ريت الله اخذ من عمري وحط على عمره شلون عيني تغى وابني جوة التراب شلوون

يوسف : ادعيله اختي ادعيله ابنچ شاب ماكو منه والله چي يحبه ومايريدله الشر چان ما خذاه كومي غسلي وجهچ واقريله قرأن ينور كبره

كال كلامه واتجه للدرج صاعد لغرفته وانه حچيت ويا عبير بالكوة قنعوها تكوم كومتها واخذتها للغرفة ونموتها على السرير وغطيتها عسى تمر هل ايام بأقل الالم

**********

نطق هود بصدمة وكأنه ينطق عن لسانا كُلنا للحظات دامت دهشته لكن سرعان ماتحولت لغضب حاد  هجم هود عليه والحراس سرعان ما اتجهو عليه لكن حسين اشرلهم انو يبتعدون وسمح لهود ان يتهجم عليه 

لزمه هود من ياخته وجره بقوة وزمجر بغضب : لك .....  شلون تمد ايدك عليها عااااااااار 

ضحك بأستفزاز ورد عليه : ههههه هاي شنو ابن نعمان  طلعت تحب 

لزمه هود وبطحه بالكاع وضربه على وجهه رادو يتدخلون لكن صاح بيهم حسين : لحد يتقرب

هود : شعندك وياهااااا شتريد منها احچيييي 

حسين : منو يكول اريد منها يجوز منكم اريد 

هود : منو تقصد 

حسين : امم يجوز من نعمان لان محمود بعد ميفيد صار جوة التراب 

هود :  لا تخليني اكسر  سنونك بحلگك دا اكُلك احچي شترييييد 

حسين : وخر عني وخلينا نتفاهم 

هده هود وارتطم جسم حسين بالارض ووخر عنه وهو يلهث بالعصبية  كام حسين وهو يمسح بحلگ من الدم ووكف  كدام هود وجر كرسي وكعد عليه واشرله  يكعُد على واحد من الكراسي هود ما اسمعله وظل يخزر بيه 

حسين : خوش ماطول ماتريد تكعُد خلي اكُلك شأريد 

هود : احچي 

مال حسين براسه وباوعلي وكال : هاي شنو مو بس ابن نعمان هنا حتى ابن ثائر 

هود : لاتخليني انعل ابوك لابو ثائر اكُل..... واحچي 

حسين : خوش اسمع ابوك المحروس اخذ شي مني اذا رجعته ترجع تاخذ حبيبتك 

هود : لاتمضرط شنو ها الشي واني شمدريني ماتطلع تجذب 

حسين : عيب عليك ابن نعمان مو اني الاجذب 

هود : شنو هذا الشي 

حسين : معليك شنو هو بس كول لابوك عليه وهو يعرفه 

هود : خوش رجع عبق وارجعه الك 

طگها بضحكة قوية وكاله : والله ضحكتني شنو شايفني جاهل تضحك علية. شبيك ابن نعمان تعلم شوية من دهاء ابوك 

هود :  رح اجيبه الك بس صدكتي اذا مسيت شعرة منها محد يسلمك من ايدي 

حسين : لا تخاف ميحتاج توصي ماخذة حقها وزايد جسرة مثل شهيناز 

هود : انجب ولاتحچي عليها لا اكص لسانك واشمره للجلاب 

حسين.  : ياسبحان الله شلون تعرف الله يجمع اثنين لان نفس الشي لاتخاف حبيبتك بالحفظ والصون ابن نعمان 

سكت وهود التفتت وردنا نطلع بس وكفنا صوت حسين : هذا منو لاااا اوسيد 

التفتنا عليه وهو وكف وتقدم وهو يبتسم  وكف كدام اوسيد وكاله : صار شكد ماشايفك

باوعله اوسيد بأستغراب وهو يتلفت النا : واني وين اعرفك ؟

ضحك ورد عليه : هههه انتَ ماتعرفني بس اني اعرفك

اوسيد : منين تعرفني

هز راسه وكاله : مو هسة بعدين تعرف رح تعرف كُل شي

كُلنا باوعناله بأستغراب بس درنا وجهنا وطلعنا من هود طلع من المكان صعدنا بالسيارة وشغلها هود وانطلق بأتجاه بيتهم وصل بعد مدة نزل من السيارة  وراح لبيتهم فتح الباب ودخل اوسيد ظل واكف برا وماقبل يفوت

دخلت ورا هود ولكيته واكف بالصالة ومحمد وداوود موجودين ومرة ابوه واخواته هم هو چان شايل تلفونه ويتصل ما اعرف عليمن  سلمت عليهم وردولي السلام  

امينة : هادي شصاير شبيه عصبي

هادي : هسة هو يحچيلكم

هود : هاا يابة وينك. ...... تعال للبيت. .... هو شنو الماصاير تعال للبيت بسرعة يابة

سد التلفون وظل رايح جاي وعيونه حمر دم نص ساعة وانفتح الباب وفات عمي نعمان وهو يسأل : شصاير

هود : فوت يابة فوووت

نعمان : شبيك ليش خابرتني

باوعله هود وكاله بدون مقدمات : حسسين شعنده يمك

للحظة بينت معالم الدهشة على ملامح عمي نعمان لكن سرعان ما اختفت وحل محلها البرود وكاله : منو حسين

صاح هود : يابببببة لاتغشم نفسسسك حسسسين حسسين الصارلك قرن تشتغل وياه هسة صرت ماتعرفه

نعمان : ابو جابر ؟

هود : ابيييي هو شعنده يمك شماخذ منه

نعمان : شأخذ منه قابل كُل شي ماله يمي

فجأة هدأ هود وكاله بهدوء : يابة اخر مرة اكُلك حسين شعنده يمك

نعمان : تهدد حضرتك كتلك ماعنده شي وسد الموضوع وبعدين وين شفته وشعليك بيه

فجأة تحول الهدوء الى غضب حاد ممزوج بصرخة قوية : لان عبق عندددددددده اخذ عبق لان حضرتك ماخذ شي اله وهو دا يساومني لهذا الشي حتى يرجع عبقققق

بهاي اللحظة احتل الصدمة وجوه الكُل واولهم عمي نعمان بس الي تأثر اكثر شي هي عمتي امينة صاحت بفزع

امينة : صخاااام بعينك ولللك عبق ويين اخذها هذا الحقير شلون تخلوه ياخذها

داوود : هود شتحچي انتَ وين شاف عبق واخذها

هود : البنية صارلها 3 ايام مختفية ومحد بيكم يدري كُلمن حاير بنفسه محد بيكم اجة وسألها عن حالها حسين ال...... من باب بيتهم اخذها

نعمان : منو كالك حسين اخذها

هود : اتصل علية وكالي  كول لابوك الشي العنده خلي يرجعه اله لو يأذي عبق

كال عمي نعمان بعدم اهتمام : شيريد يسوي خلي يسوي وعلوا لو يُكتلها نخلص منها ومن عارها

هود عيونه صارن براسه من العصبية : انتَ واعيييييي تعرف شتحجيييي لك هاي عرررررررضك بنت اخووووك الي يمسها يمسك شنو من گلب عندك البنية مخطوفة وانتَ تحچي هييييييچ

نعمان : مو بنت اخوية لاتلزكها بينا الله اعلم امها منين جايبتها

هود : انتَ شنوووو من يا مللللللة حتى لو چانت غريبة هم تنقهر عليها انتَ شنووووو

نعمان : لاتصيييح وخلص اني ماعندي شي انطيه الك

هود : تنطيني الي يريده حسين

نعمان : ما انطي اي شي خصوصا علمود بنت شهيناز

هود : تنطيني

نعمان : ما انطيك

هود هز راسه بوعيد وكاله : نشوف شلون ماتنطي

كال كلامه وعافه وطلع طلعت وراه ولكينا اوسيد واكف بالباب من شافنا باوعلي بأستفسار وهزيتله راسي برفض هو افتهم هود عافنة وراح للسيارة ردت اروح وياه بس صاح بينا محد يلحگه

ركب سيارته وشخطها وطلع باوعنا لاثره وتنهدت سألني اوسيد : ليش ما انطاه

هادي : من ورا حقدهم  ادري ابوها وامها هيچ البنية شنو ذنبها

اوسيد : دائما  الابناء يوكعون بذنب اهلهم

هزيتله راسي وطلعنا من المكان

***********

فتحت عيوني على الم فضيع اسفل رأسي كان سببه ضربة السلاح صدُك ضربتين على الراس توجع حاولت احط ايدي على مكان الالم لكن كانت ايدية مقيدة

نزلتهن بيأس وفتحت عيوني واني اجول بنظري بالمكان غرفة صغيرة فارغة الا من فراش على الكاع وكرسي  هذا كُل الي تحتويه

ظليت كاعدة بمكاني بدون حراك 3 ايام بدون اكل ففط عايشة على المي واجتني ضربتين على راسي هدت حيلي ما اكدر ارفع ايدي احس قواي كُلها خارت 

رجعت راسي ليورا اسنده على الحايط الرطب الوراية والارضية القاسية الكاعدة عليها  حتى مابية حيل اصيح او انادي احد ظليت كاعد بدون ما اسوي شي

مرت دقائق او ساعات ماجنت اعرف الوقت غير انو الدنيا نهار بسبب اشعة الشمس الداخلة للغرفة عن طريق الشباك الصغير الموجود في احد اضلع الغرفة

رجعت غمضت عيوني والالم محتل جسمي وراسي وحتى روحي شعور العجز صعب من انتَ مقيد وماتكدر تسوي شي شعور سيء الى ابعد حد ابد ما احب اكون مسيرة وغصب عني امشي بطاعة احد او احد يمشيني على هواه

وهذا الي دا يصير اني اسيرة لشخص ما اعرف منو وشنو هو واني متأكدة انو هو ماجايبني وحابسني هنا علمود الزم قضية ابنه لان اكو غيري هواي محاميين شاطرين والهم خبرتهم الواسعة لكن شنو السبب الي خلاه يجبني هنا وشنو غايته لابد ان تكون عنه غاية ثانية  بس شنو هي الله اعلم

فتحت عيوني ببطئ من سمعت صوت خطوات قريبة من الغرفة وصوت شخص يحچي  : هاا ابن نعمان جبتهن لو لا. ...... بنت محمود بالحفظ والصون لاتخاف عليها جيب الاوراق ومعليك 

انفتح الباب وصريره المزعج اخترق مسامعي باوعت للشخص الي دخل واابتسامة حقيرة مرسومة على محياه خلتني اشمئز من نفسي كاعدة بنفس الغرفة وياه

اجة سحب الكرسي وكعد عليه كدامي وهو يكُلي :  هاا كعدت المحامية عبق صباح الخير

باوعتله بكره ومارديت عليه رجع كالي : ايي تدرين البارحة شفت ابن عمچ حبيب الگلب

عكدت حواجبي بأستغراب :  منو ؟

حسين : منو يعني معقولة ماتعرفين حبيب الگلب هود

عبق : وشتريد منه

حسين : اريد منه هواي

عبق : شوف حسين لا يكون عبالك صدكت لعبة انو انتَ جايبني هنا حتى الزم قضية ابنك وماعندك شي ثاني هاي السوالف ماتعبر علية احچي شعندك

ضحك ورد علية : ادري مارح تعبر عليچ حضرة المحامية ذكائچ يعجبني

عبق : احچي

حسين : ياسبحان الله حتى نفس الاسلوب هي وحبيب الگلب

باوعتله للحظات ورجعت كتله : مشكلتك مو وياي او ويا هود عندك عداوة ويا نعمان ومحمود بس ليش

حسين : لا باعي هي مو عداوة وانما الحق لازم يرجع لاصحابه

عبق : ياحق هذا

حسين : حقي

عبق : وحقك شجابه لعمي وابوية

حسين : هم اخذو حقي

عبق : ممكن تكُلي شنو اليجمعك وياهم حتى اخذو حقك

حسين : اممم خوش سؤال اسمعي ابوچ وعمچ المصون چنا نشتغل سوة

اتفاجأت بس رديت عليه بعدم تصديق : ليش تجذب ابوية وعمي چان شركاء وعدهم معرض سيارات

حسين : انتِ نايمة ورجلچ بالشمس

عبق : شتقصد

حسين : هو صح الي رح احچيه رح يضرني بس ميخالف لازم تعرفين الحقيقة

عبق : احچي

حسين: اني وابوچ وعمچ جنا نشتغل سوة بس هم بالوجه واني الخفي

عبق : انتَ  شتحجي   انتَ تشتغل بأشياء مو قانونية وعمي وابوية چان عدهم معرض سيارات شجابك عليهم

حسين : لا شوفي ياحلوة احنا جنا نتاجر بالاسلحة اني اوفرهن واستوردهن من خارج العراق ومرات بالعراق ينصنعن واجيبهن لابوچ وعمچ يخلوهن بالمعرض ويبعيوهن من جوة لجوة

اني چنت اشُك بعمي اكو سالفة وراه بس ابوية ابد ماچانت تخطر ببالي لان اغلب وكته خارج العراق ويرجع ايام قليلة كُلش  ممكن توصل يظل شهر او شهرين بالخارج ويجي بس 3 ايام بالزايد اسبوع ويرجع

عبق : اوووكف عمي ممكن يسوي هيچ شي بس ابوية مستحيل ابوية قليل چان تواجده بالعراق

طگها بضحكة قوية ورجع راسه ليورة وعينه دمعت من الضحك مسحه دمعته واني اباوعله شرز وبكره  سكت من الضحك وهو يكول

حسين : والله ضحكتيني واني عبالي محامية وبالك عنك وماتفوتچ فايتة طلع المي يمشي من جواچ وانتِ ماتدرين

عبق : احچي العندك لاتظل تماطل

حسين : خوش اسمعي كُلنا جنا شركاء اني اجيبلهم وهم يبيعون والربح يتقسم على 3  بس اني غدرت بيهم وجبت اوراق تثبت انو هم يشتغلون بالسلاح وهاي الاوراق توديهم ورا الشمس وجبرتهم تكون الحصة الاكثر الية اثنينهم سكتو لان مايكدرون يسوون شي ولا بأيدهم شي علية لهيچ ظليت امشيهم بكيفي

بس عمچ المصون راح بحوش ودز زلم وما اعرف شلون لزم اوراق علية وهاي الوراق هم توديني لورا الشمس وصار واحد يهدد بالثاني بس تردين الصراحة ابوچ ابد ماچان يهمه شي كل الي يهمه انو يسافر ويروح مدري وين ومن يرجع يكول بكيفكم الي تردوه سووه ابد ماچان يعترض

عبق : ليش

ابتسم ابتسامة مكر وكالي : مو هسة تعرفين بعدين بالوقت المناسب ايي فا الچان واكف بطريقي هو عمچ  بس بذيچ الفترة ما اعرف شنو الصار بس فجأة سمعنا خبر وفاة ابوچ كالو انو راجع من السفر ومات بالطريق محد يعرف ليش  اني ماسكتت والفضول كتلني شلون مات وليش مات ظليت ابحوش وراه لحد ما عرفت انو ابوچ انقتل

فتحت عيوني بصدمة والدم بدة يتجمد بأطرافي والشفايفي ارتعشت واني احاول اسأله

عبق : ش شلون نقتل هو مات بحادث

حسين : مع الاسف هذا الي انتشر وهذا الي الكُل يعرفه بس الي محد يعرفه انو عمچ المصون هو الي كتل اخوه وهو الي دبر الحادث

بكُل كلمة چنت اجذب نفسي والي دا اسمعه اعرف عمي خبيث وحاقد علينا بس ابد ما اتوقع انو توصل بيه لقتل اخوه وعلمود شنووو حقد كره فللوس هذا كُلهن مايسون انو الشخص يُكتل اخوه  فار دمي والعصبية طغت علية ما اكول انقهرت على ابوية ولا ضجت بس القهرني والي اذاني هو انو عمي  الي كتل ابوية  عار علية اذا ما اخذت حقه حتى لو بعمره ما اهتم بينا ولا حسسنا بوجوده بس يظل ابوية والي يمسه يمسني

كزيت على اسناني وكتله :  متأكد من حچيك

حسين : امم اذا مامتأكد منه مو اجي احچيلچ

عبق : عندك دليل

حسين : عندي ادلة

عبق : كمل سالفتك وبعدين شصار

حسين :  ورا ما عرفت بالسالفة واجهته لنعمان وكتله انطيني العندك وانطيك العندي وينتهي كُل شي بس هو رفض وكالي الي تريده سويه وما اهتم لأي شي

عبق : وهسة انتَ خطفتني حتى تهدده بية علمود يرجع الاوراق الي تخصك

حسين : عفيية 

عبق : وانتَ من كُل عقلك عمي رح ينطيك الاوراق علمودي

حسين : هو عمج نذل ادري بيه بس مو يتخلى عنچ علمود اوراق

ضحكت بستهزاء وكتله :  مو بس علمود اوراق يتخلى عند علمود مي شنو تترجی من شخص كتل اخوه  اصلا انتَ سويتله فضل انو اخذتني هو يشوف دم نسونه ومايشوفني

رفع حواجبه بأندهاش :  توصل الحقارة بيه لهيچ مرحلة

عبق : واكثر صدكني  لا عبالك انتَ خطفتني علمود يرجعلك الاوراق بالعكس انتَ ريحته مني هسة چنت واكفتله عظم بالبلعوم

ظل ساكت وهو يباوعلي سكتت للحظات ورجعت كتله

عبق : خلي نتفق اني وياك

حسين : على شنو ؟

عبق : تفك ايدية وتخليني ارجع واجيبلك الاوراق الي تخصك بالمقابل انتَ تنطيني الادلة الي تبثت عمي هو الي كتل ابوي

حسين : وشنو الي يضمن ماتغدرين بية

عبق : انتَ شخص ذكي ومو بسهولة الواحد يضحك عليك وادري بيك  تعرف الصغيرة قبل الجبيرة ومارح يعبر عليك اذا غدرت بيك وبعدين رح تكون مصلحة متبادلة انطيك وتنطيني

ظل ساكت للحظات وكأن يفكر بالعرض

عبق : اوعدك رح اكون كد كلامي الاوراق ترجعلك بس اريدك توعدني انتَ هم تنطيني الادلة

هز راسه بقبول وكالي : خوش رح اثق بيچ بس صدكي اذا فكرتي تلعبين بذيلچ هيچ او هيچ  انفيچ انتِ وعائلتچ ومحد يدري عنكم

عبق : لاتخاف اني كد الوعد

هز راسه بقبول واني اباوعله بدة اللعب على اوصوله خلص كُل شخص لازم ياخذه جزائه هواي من المجرمين عايشين حياتهم بحرية والكثير من الابرياء داخل القضبان مذلولين صار الوقت الي لازم الكُل يتحاسب وحسابهم على ايدي .........

***********

ولنا في الخيال حياة

***********

اتمنى يكون البارت نال اعحابكم وعذرا عن التأخير كانت وياكم اختكم الماس   K.T

-******
الى اللقاء.....