العُسبَرة

البارت الثالث عشر

أغمضتُ اجفاني عَسى أَنّ يَكون اِللقاء في الحُلم ......

العُسبَرة

**********

من شدة البكاء والتعب الي تعرضتله بلا شعور غفت عيني واني على نفس وضعيتي منتچية على الباب وراسي مستند عليه

احلام وكوابيس اصوات عالية صراخ على اثرهن فزيت بفزع كُل ظني هذا چان مجرد كابوس لكن الصوت ما اختفى وظل موجود التفتت حولي بأستفهام اريد اركز وين الصوت

كمت وكفت واني استمع اله الصوت جاي من جوة تقربت على الباب ولزكت اذني عليه ابتعدت بفزع واني اسمع صوت عبق تصيح بأسم أوسيد وصوت سهام هم فتحت عيوني على وسعهن بفرح اجة اجة علمودي

ظليت اضرب على الباب واصيح عليهم اريدهم يسمعوني : أوسيييييييد أوسييييد اني هناااا تعاااال أوسيييييد تعال طلعني أوسييييد ما اريد ابقى اريد اروح وياك أوسييييد ساعدني تعاااال

اضرب بالباب واصيح بكُل صوتي حتى يسمعني فجأة صارت صوت اقدام على الدرج فرحت كلت اكيد هذا أوسيد اجة ينقذني

ضربت بالباب واني اصيحله : أوسييد هناا هنااا اني هناا تعااال

حسيته صار كدام الباب وانحط القفل بالباب ابتعدت حتى يفتح الباب والابتسامة شاكة حلگي واني انتظره بفارغ الصبر يفتح الباب

انفتح الباب تدريجيا وابتسامتي وياه اختفت تدريجيا واني اشوفه واكف كدامي انصدمت وصحت بصوت ضعيف : هيثمم

باوعلي بشر وتقرب مني جرني من ايدي يريد يطلعني من الغرفة جريت ايدي منه واني اعيط بيه : عوفنيييييي

رجع جرني حيل من زندي وسحلني وهو كاتم صوتي بأيده اضرب بيه اريد يوخر بس ماكو چنه بعير مايتزحزح ظل يجر بية ويسحل واسمع اصواتهم بالاستقبال يتعاركون وهذا يجر بية يريد يطلعني من الباب الخلفي واني اذب نفسي بالكاع واريد بس يوخر ايده حتى اصيح

يريد يطلعني من باب المطبخ حتى نروح من ورا ونطلع مدري شلون كدرت اسيطر وعضيته من ايديه بكُل قوتي بحيث حسيت بطعم الدم هو رأسا عافني تفلت الدم بالكاع وصحت بكُل صوتي

ريتان : أوسيييييييييييييد. ساع...

بعدني ما مكملة كلمتي ورجع علية وجرني بسرعة طلعني من المطبخ وهو يسحل بية وصلني للباب الخلفي هستوه يريد يطلع بس ابتعد عني وخرت منه وباوعت عليه وهو لازم كتفه بألم التفتت ليورة شفت أوسيد شايل طابوكة وراكعه بيها ابتسمت بفرح وعيوني غركانات بالدمع

ركضت عليه بس رجع جرني هيثم وجلب بية أوسيد عاط بيه وركض عليه وجره وركعه ببوكس بطحه بالكاع وكعد فوكاه شبعه كتل اجت عبق تركض عليه تريد تبعده عنه واني واكفة وياها واصيح عليه حتى يعوفه وماكو عبالك متحمل عليهم

اجة عمي وجهه كُله دم وعينه مزوركة ركض على أوسيد ودفعه من ابنه بس أوسيد ما اتزحزح وظل مجلب بهيثم بألف يا الله وخرناه من هيثم وكف وهو يلهث بعصبية وعيونه براسه اجة علية وجرني من ايدي ورفع اصبعه بتهديد وصوت نفسه عالي

اوسيد : قسم باللله الي بعد يتقرب يمها مايلوم بس نفسه طلقة براسه انهيه من الوجود سمعتوووو

سليم : البنت بنتنا ومانريدها يمك شنووو عرفة ولفة باقية وياك حتى مو كرابتنا شهل استهتار

راد أوسيد يحچي بس عبق اشرتله يسكُت وندارت على عمي وكالت : هي باقية وياه بصفتها زوجته

الصدمة احتلت ملامح الكُل ضمنها ملامحي وملامح أوسيد احنا صح مقررين نتزوج لكن بعدنا مامتزوجين وزين هي شمدريها عبق ما اهتمت النا ورجعت كملت كلامها

عبق : هم متزوجين سيد والاسبوع الجاي رح يعقدون محكمة تحب تحضر ؟

سليم : انتِ شتحچين يازواج هذاااا شوكت تزوجو

عبق : مو مهم شوكت المهم هسة هو زوجها ومالك حق تمنعها منه صح لو خطا لو تريد القانون يدخل

صاح عمي بعصبية : انتو شتمضرطوووون شهل تمسلتتتت يازواج ياصخاااام باطل هذا الزواج باطل بكيفكم هي اني ماقابل

انتفضت سهام بعد ماچانت محاوطة ابنها وتمسح بوجهه من الدم وعاطت بية : شبيييچ تخبلتي تزوجتي هذا المهتلف حتى اهل ماعنده اصله مامعروف ابن زنااا تزوجتي هذا وعفتي حازم كبر لهل خلقة حتى كبررررر فكرة مثل ابوچ عمرچ كُله مابيچ حظظظظ

وخرت من أوسيد وتقربت منه واني اصيح بوجها : لاتتدخليييين أوسيد تاج راسهم كُلهممم يرحون فدوة لنعاله مايجون ربع من اخلاقه

بعدني دا احچي وافتر راسي من الراشدي الكلته من عمي بسرعة سحبني أوسيد وجرني وراه ودفع عمي راد يهجم عليه بس عبق وكفت بوجهه ومنعته هو ماتحمل عاط بصوت عالي

اوسيد : ايييييييييدك لا اكسرها اللللك ......

عبق : كااافي شهل مهزلة هاااي دانكول البنية مرته ومالكم كلمة بعد وهسة ترجع ويانة واليفتح حلگة يجيني للمحكمة اشوف طوله سمعتوووو

سليم : ماتطلع منا اكسر رجلها

راحت عبق ووكفت بوجها : تطلع وغصب عن اكبر شارب واشوفك

حچة هيثم الچان كاعد بالكاع بألم ووكف على حيله : زواجها باطل اني ابن عمها وناهي عليها

وكفت عبق وكتفت ايديها ورفعت حاجبها بأستهزاء : نعم نعم شتفضلت حضرتك

هيثم : اني ناهي عليها

عبق : وحضرتك منو

هيثم : ابن عمها

عبق : انتَ وين عايش بيا عصر بيا زمن منو بقى يسولف بالنهاوي يامتخلف

هيثم : عايش بعصري والبنية ناهي عليها وزوااجها باطل

عبق : محد باطل غيرك ترى على هذا حچيك تدخل السجن ثمن كلامك عدل

سهام : انتتتتتتتِ منووو وجاية هادة عليناااا بكيفچ تصخمين وتحچين امور عائلية لاتتدخلين بيها

عبق : ادخل وغصب عنكم لانكم ظلام واني ويا الحق وهاي البنت مظلومة وخطيتها بركبتكم وحوبتها ماتتعداكم لاتكولين ماكالت

سهام : عساها لاتعدي يلا اطلعو برا لميتي الجوارين وفضحتونا

عبق : صح طولنا هواي بمكان قذر مثل هذا يلا اوسيد ريتان امشو

سهام جرت عبق من ايدها وعتها حيل : ريتااااان ماتطلع تطلعيين وحدددچ

عبق باوعت على ايد سهام وشلون جرتها ورجعت باوعت بوجهاا ورجعت نظرها على ايدها وانوب على وجهاا تربك الواحد رفعت حاجبها وكالت

عبق : جريتي ايدي ؟ منو سمحلچ تلمسيني ؟ اكسر ايدچ هسة واعلكها بركبتچ امشي عدل لا اهينچ هنا كدام الكُل

.
نترت ايدها من سهام وعاط : وكافي عاااد طولتولها كُلش قسم بالله اذا ما سكتو هسة اخابر الشرطة اخليها تجي تطيح حظكم وتنعل والديكم سمعتوووو

سليم : خوش مو هي متزوجته تبقى هنا ويرجع يخطبها من جديد وحفلة ويسويلها عرس

فتحت عيوني بصدمة مامصدكة كلامه وكُلنا احتلت الصدمة ملامحنا سهام باوعتله وهي تخزر بيه

سهام : سليييييم شتحچي انتتتتَ ياعررررس البنية ماتطلع وهسة يطلگها

سليم عاط بيها حتى تسكُت وهي تصيح تقربت من اوسيد وهمست بأذنه : يلا طلگني

قرب وجهه مني وهمس : انتِ طالك بالثلاث

ضحكت ورأسا حطيت ايدي على حلگي اكتم الضحكة بالله هسة وكت ضحك بهل زلك عبق چانت صافنة عليهم وهم يتعاركون باوعتلهم بقرف وكالت

عبق : دكاااافي عاد بالقران همج شبيييكم خلي نحچي انتَ تريد تسوي عرس لريتان

سليم : اييي البنية من حقها نسويلها عرس ونفرح بيها وهي بنت اخوية ويتيمة

حسيت رح تطب ذبانة بحلگي هلكد مافتحته من الصدمة يفرح بية انييي !!! باوعت لاوسيد نفس الصدمة على ملامحه

عبق : خوش نشوف رأي ريتان

التفتت علية وكالت : هاا ريتان شنو رأيچ

ريتان : ما اريد كُل شي ما اريد لا عرس ولا اي شي

سليم : مو بكيفچ احنا عدنا كرايب عمامچ وخوالچ كرايبنة شيكولون شكو منطيها بسكتة قابل بيچ شي

عبق خزرته والتفتت علية كالت : هاا ريتان

باوعت لاوسيد ونظرتله بمعنى بكيفك اوسيد هزلي راسه وكال : خوش اجي اخطبها واسويلها عرس الدنيا كُلها تسمع بيه بس شوف قسم باللله والي خلق الكون اذا ريتان انمست بشعرة تعرف شنو يعني تمسها بشعرة احرك البيت عليك

سليم : لاتهدد البنية بنتنا وما نأذيها شنو انتَ احرص عليها منا

اوسيد : هسة اني كلت وشوف اذا شفتها متأذية

عبق : خلص اتفقنا بعد يومين نجيب ناس ونجي نخطب وتنتهي السالفة متفقين

سليم هز راسه موافق وسهام تريد تاكلهم من العصبية وهيثم كذلك واكف على جهة وعيونه ناطة بس ميكدر يسوي شي لان ابوه انطى كلمة

عبق واوسيد طلعو من بعد كلام طويل ويا سليم وتهديد صريح من اوسيد لسليم بعدم اذيتي وهو وافق مدري شكو بعقله اكيد عنده لعبة مو خالي اكو ان بالموضوع بس ما اهتميت لان وافق على اوسيد واني طايرة من الفرح

سهام بس تخزر بية وهيثم طلع وركع الباب وراه بعد ماتعارك ويا ابوه شلون قبل بأوسيد واني عفتهم ورجعت للغرفة وسديت الباب وراية

*************

طلعنا من يمهم واحنا بحالة ذهول صعدنا كُل واحد بسيارته وطلعنا من المنطقة دكيت على اوسيد وفتحت خط

عبق : الو اوسيد

اوسيد : هاا عبق

عبق : اكُلك هذا خاف شخط من الكتل مالتك

اوسيد : شمدريني بس اكو سالفة بالموضوع

عبق : اكيد بعقله شي ويريد يسويه لان مستحيل يوافق بعد كُل الي سواه تتوقع شنو يريد يسوي

اوسيد : ما ادري بس هل مرة اذا اذاها محد يخلصه من ايدي

عبق : اهددددي بالقران اني اموتك ولك ليش تضربهم تدري هسة لو راحو واشتكو عليك يبذوبك بالسجن شفت شسويت بوجوهم

اوسيد : دسكُتيي گلبي محترك منهم مابرد دمي

عبق : عيني يبرد گلبك من تستفزهم اتعلم الاسلوب البارد وشوف شلون يموتون على البطيئ

اوسيد : چنت اسوي هيچ بس ذول مو وجه واحد يحترمهم اذا ما تنعلين سلف سلفاهم ماينعدلون

عبق : هسة عوفك منهم منو رح تجيب

اوسيد : اجيب شيوخ من كُل مكان ضباط منهدسين دكاترة الا افشله بينهم

عبق : كبيررر يالمعلم بس صدُك صدُك جيب كومة عالم حتى يفشل وشوفهم من هسة لان بعد يومين الخطوبة يادوب تلحك

اوسيد : اي ان شاء الله

عبق : باوع

اوسيد : هاا

عبق : شوف هود هم وخليه يجي

اوسيد : خلي يولي هل دايح اتصل عليه واحچي وياه مايرد يتعزز

عبق : لا أوسيد ترى خطية دا يمر بفترة صعبة اكو مشكلة صايرة وياه وكسرت ظهره خطية

اوسيد : شبيه شصاير

عبق : ما اكدر احچي بس ترى هو كُلش مكسور اوكف وياه واسنده اوسيد انتَ صديقه وعزيز عليه ويحبك لاتعوفه ولح عليه حتى يجي بخطوبتك

اوسيد : ان شاء الله اسحله واجيبه للخطوبة

عبق : هههه يلا خوش رح اسده

اوسيد : الله وياچ

سديته منه وانطلق لبيتنا وصلت ونزلت من السيارة متكسرة الطريق طويل دخلت للبيت وشفت هود كاعد بالصالة وامي وبيبي يمه كاعدات يسولفن

عبق. : الله بالخير مجتمعين الحبايب

خديجة : اي يمة وين چنتي

عبق : چان عندي شغل سويته وجيت

شهيناز : شو تأخرتي

عبق : اي المكان الي رحلته بعيد بأطراف المحافظة

وكف هود واجة بأتجاهي وكالي : تعالي اريد احچي وياچ

عبق : شكو صاير شي

هود : امشي وياي

رحت وراه يمة شبيه معصب شصاير رحنا للاستقبال وظل واكف ماكعد وكفت يمه وكتله

عبق : شكو هود شبيك معصب

عاكد النونة ويخزر بية : اني شكتلچ

عبق : شنوو

هود : مو كتلچ لاتطلعين اذا مو احد وياچ

عبق : واني هم ماطلعت وحدي

رفع حواجبه وكالي : تضحكين علية؟؟ راجعة وحدچ وخابرت هادي انتِ مو ويا

كتفت ايدية وكتله : اول شي اني چنت بالمزرعة وهادي چان هناك ثاني شي طلعت لان اوسيد رادني بشغلة ورحت وياه كضينا الشغلة ورجعنا

هود : اوسييد ؟ وشنو الشغلة بلا زحمة

عبق : مو چنك كاعد تتدخل زايد ؟

هود : عبق لاتخبليني دا احچي وياچ جاوبي

عبق : لا اله الا الله اوسيد چان عنده شغلة سويناها وجينا تريد تعرف احچي وياه وهو يكُلك لان مو من حقي احچي

هود : هيچ صارت

عبق : ليش شلون چانت حتى صارت

هود : عبق وخري لا الزكيچ بالحايط

عبق : هلو هلوووو ولك هووود شو صاير مدري شلونك

هود : انجبي عزيزتي

عبق : شكرا عزيزي

هز ايده وعافني وطلع من الاستقبال راحلهم للصالة رحت وراها شفته دا يطلع صحت وراها : بوسلي امينةةةة

هود : دولي انتِ وياها

ضحكت وراه ورحت كعدت يمهن بيبي كالتلي : عبق بيبي شو تعالي

كعدت بصفها وبستها بخدها قوي وكلت : هااا عيني

خديجة : ليش توبة ماترجع مو هاي صار شهور اهلها ساكتين عنها

عبق : بيبي مصدكة انتِ هذول يعوفوها بحالها بس دا يدورون عليها بس يلكوها يروحون يبتلون بيها

خديجة : لعد خوما تظل هيچ العمر كُله عايشة هناك بعيدة عنا

عبق : خليها بيبي بعيدة ومرتاحة احسن الها

شهيناز : والله هل بنت خطية حياتها كُلها معذبة عمت عين ابوها

عبق : مو كُل واحد يتسمى اب الاب الي يحب اطفاله يعتني بيهم يحن عليهم يهتم يعطف يسوي اي شي في سبيل يفرحون وهو ولا شي سوة من هذا كُله ملتهي بأمينة وولدها وعايف هل مسكينة وهود لوما ولد چان حاله من حالها

اتنهدت بيبي بحسرة وضربت ايدي بأيد بقهر : اخخخ على قسمتها لا من اهل لا من رجال شهل عيشة ياربي والله البنية نملة ماتأذي عمت عيني عليها

عبق : الله يعوضها ان شاء الله بيبي الله كريم ماينسى احد

خديجة : ايي والله ربچ كريم يابيبي حاشا ينسى احد

وكفت وكتلهم : رح اصعد انام لحد يكعدني تعبانة

رحت لفوك وشمرت نفسي ورحت بنوم عميق لثاني يوم يلا كعدت كمت غسلت وبدلت ونزلت جوة اسوي ريوك وفاتحة اتصال ويا هود يرن ويفصل يرجع يرن ويفصل ظليت ادُك عليه ادري بيه مايكعُد بهيچ يوم عطلته يظل نايم واني عناد بيه ادُك عليه

ظليت ادُك لحد ما رد كال بصوت كله نعاس وضايج : هاا شكو من صباحيات الله

عبق : ياصباح الخير عليك عيني اريد اروح تسمحلي لو لا

هود : وين تروحين من الصبح

عبق : وين اولي يعني غير للمكتب

هود : خوش هسة جايچ

عبق : يمعود شكو جاي اني اروح وحدي لا عبالك اني اخاف وهاي ورقيقة هو اني صح حلوة وجميلة وانثى بس بعشر زلم شايف اذا الزمهم امرعدهم تمرعد

هود : دخيلك ربي السكف انفطر

عبق : ههههههه لا صدُك لاتجي اروح وحدي

هود : لا هسة عشر دقايق اني يمچ لا تروحين

عبق : خوش انتَ تريد شلعان الگلب بكيفك

سديته منه ورحت اتريك علما خلصت سمعت صوت الهورن كمت شالت جنطتي والكوت لبسته وطلعت لكيته واكف صعدت وياه وصبحت عليه

رد علية : هلاا صباح الانوار

شغل السيارة ومشى بيها كتله : هوووود

هود : هاا

عبق : اوسيد حچة وياك البارحة

باوعلي بطرف عينه وكالي : شعندچ انتِ وياه

عبق : هسة دحچي خابرك لو لا

هود : لاا

عبق : صدُك

هود : وداعتچ

عبق : هاا خوش خوش

هود : احچيها احسن ماتظل تحوص بحلكچ

عبق : لا هو يكُلك

هود : خوش بيها خير

ظليت ساكتة بس احوص لان فرحانة لاوسيد رح يتزوج ريتان والابتسامة شاكة حلگي وصلني للمكتب وكُل شوية يوصيني ديري بالچ لاتحتكين بيهم اذا تحسين بشي غريب رأسا كُليلي وسطر راسي سطر نزلت من عنده ورحت للمكتب وبديت اشتغل قضية ورا قضية

باوعت للساعة يبوووه اتأخرت عندي جلسة بالمحكمة اخذت غراضي طلعت بسرعة اني وامشي اتصل على هود بسرعة رد علية

هود : هاا عبق

عبق : ها هود اكُلك شوف عندي جلسة بالمحكمة كُلش مهمة رح اروح

هود : انتظريني هسة اجيچ اوصلچ

عبق : يمعود اتأخرت بعد شوية تبلش ما اكدر انتظرك

هود : عبق لاتنعادين هسة اجيچ ما اتأخر

عبق : ما اكدر صدكني هسة اخذ تكسي واروح

هود : عبقق لاتخبليني

عبق : شبييك هود دا اكُلك تأخرت لاتظل تلح عبالك طفلة

هود : للچ عبق اسمعييي الكلام

عبق : بس هل مرة صدكني يلا لازم اروح

هود : ولچ عبق

عبق : اسفة اسفة يلا باي

سديته منه قبل لايكمل واخذت تكسي ومباشرا للمحكمة يمة تاخرت كمت اركض ركض بس اريد اوصل الحمدلله وصلت ودخلت للجلسة وتمت على خير بعد فترة طلعت من القاعة وموكلتي تشكرتني هواي ابتسمتله ورحت

اتمشى صار فترة طويلة على ذاك الموضوع بس هود بعده يوسوس ما اعرف حقه او لا بس اني مو صغيرة حتى يخاف علية اني صار سنين بهاي المهنة ورسائل التهديد مثل المي صارت عندي مايمر يوم اذا ماتجيني بس ما اهتم لان اني على حق

ومن بعد اخر مشكلة الصراحة رسائلهم كثرت على التلفون وبالمكتب وحتى للبيت يدزولي رسالة تهديد بس هم ماچنت اهتم لان اني اعيش بهل حياة مرة وحدة واعيش العمر الكاتبه الله مارح اخاف من الموت لان اذا مامتت على ايدهم رح اموت بغير طريقة تعددت الاسباب والموت واحد

بس هود مايقتنع هيچ وماينطي مجال واحد يفهمه صاير خبل تمشيت لحد ماطلعت من المحكمة وكفت اريد اوكف تكسي مر من يمي طفل صغير ووكف كدامي ابتسمتله بس هو باوعلي علية بنظرات خالية ومدلي ايده وبداخلها ظرف باوعتله بأستغراب وكتله

عبق : هاا عيني محتاج شي

ظل ماد ايده وجر ايدي خلة الظرف بأيدي وراح يركض مبتعد عن المكان عگدت حواجي بأستغراب شديد وگلبي نبض بقلق واني اتحسس الظرف بأيدي بلعت ريكي واني افتح الظرف ببطئ

شوية شوية لحد ماظهرت كدامي الما چنت متوقعته رصاصة ..

رسالة تهديد ثانية بس هاي بشكل صريح بالقتل التفتت بعيوني بالمكان احاول الكة شي او شي يثير الشك شخص سيارة اي شي لكن بأت بالفشل

طلعت تلفوني واتصلت على هود وكتله اريد ارجع للبيت كالي شوية ويجيني سديته منه ورحت كعدت على احد المسطبات واني صافنة بالصار قبل شوية هذول مارح يجوزون مني ورح يصير شي جبير لازم اتخلص منهم بس شلون

ظليت افكر هواي بس مالكيت حل اما الزم القضية وهذا من سابع المستحيلات او اموت ماكو غير حل هذول التهديدات الدا تجيني ما اكدر ارفع بدعوة بيهن لان ماكو دليل قوي ولا احد يعرف منو هذول الدعوة القمتها بحقهم انسدت لان محد عرفهم وسجلهم نظيف بالدولة بس ابنه لهذا الرجال چان سجله وصخ

طلعت من صفنتي من شفته واكف كدامي ويلوح بأيده يم وجهي يريدني انتبه اله رفعت راسي وباوعتله

عبق : هاا هاي شوكت اجيت

هود : صار ساعة دكيت هورن اصيحچ ماكو رايحة بغير عالم شبيچ

كمت وكفت وكتله : لا هيچ ماكو شي يلا نروح

باوعلي بأستغراب ومشى وياي وركبنا السيارة وشغلها ووصلني للبيت الطريق كُله اني صافنة على الجامة وافكر وهو احس بيه كُل شوية يلتفت علية بأستغراب استغرب لان ساكتة مو من عوايدي دائما اضحك واداهره

وصلني للبيت ونزلت ودعته ودخلت للبيت وبوجهي صعدت لغرفتي رحت سبحت طلعت وكعدت كدام المراية واني امشط بشعري وصافنة افكر بالجاي شنو رح يصير ووين رح تصفى

وظيفتي كُلش احبها لكن شغلي بالعراق جدا خطر اني شهدت على قتل الكثير من المحاميين بسبب دفاعهم عن الحق اني ماخايفة من الموت كُلنا نموت بالنهاية محد يبقى لكن هذول عصابة خطرة والموت اخر شي يفكرون يسوونه بعدوهم

يجوز يخطفون يجوز يسلبون يكُتلون ناس عزيزة عليك يأذوك بالشي العزيز مايأذوك انتَ

فزيت من صفنتي على دكة التلفون شلته لكيت المتصل ليلى رديت عليها وفتحت مايك واني امشط شعري

ليلى : هااا عبووقة شلونچ

عبق : هلاا بأم رهف بخير انتِ شلونچ

ليلى : اني زينة انتِ وينچ مختفية

عبق : الشغل لفوك راسي نفسي ما اندلها

ليلى : الله يساعدچ ولچ خايفة رح اجيب عمت عينچ

عبق : وسم عيني شكو انتِ تجيبين

ليلى : غيرر اختچ لازم تخافين وياي

عبق : احد ضربچ على ايدچ وكالچ خلفي بنتچ بعدها كُلها سنتين شعندچ مخلفة فوكاها

ليلى : اهووو لاتبدين بسوالف النسوان الكبار عوفيني بضيمي

عبق : ليش شبيچ شعندچ من ضيم

ليلى : هذا نسيبچ خبلني بس يضحك علية وعلى كرشي

عبق : هههههه عزيز يسوي هيچ

ليلى : ايي ولچ يگهرني يگهرنيي

عبق : تستاهلين

ليلى : اكول شبييچ شو اجر الكلمة جر منچ شكو شصاير

عبق : ماكو شي

ليلى : سولفيهن للدبة احچي شبيچ

تنهدت وجريت حسرة قوية وكتلها : ليلى

ليلى. : هاا يمعودة ترى وكعتي گلبي شبيچ

عبق : ليلى دا تجيني تهديدات

ليلى : شلون يعني منو يهددچ

عبق. : ما ادري بس الاعرفه هاي عصابة صارلهم فترة طويلة يهددون بية وراها خنسو وبعد ماسمعت عنهم شي واليوم هم رجعو هددوني

ليلى : شلوون شلون يعني هددوچ اذوچ سوولچ شي احچي

عبق : لا ما سوو شي بس دزولي ظرف بأيد طفل وحاطين بيه طلقة يعني تهديد صريح

شهكت بفزع وصاحت : انتتتتتِ خبببلة دا توصلچ تهديدات ولحد هسة ساكتة شبيييچ عبق شبييچ

عبق : لاتصيحين شنو ساكتة ترى اعرف شغلي وادري بيهم فارغين حالهم حال غيرهم بس الطلقة خوفتني شوية مو علمودي بس اخاف يأذوني بيكم اني ماخايفة على نفسي تدرين بية

ليلى : عبببق لانخبليني شنو ماتخافين على نفسچ لچ انتِ تكولين عصابة يعني مجرمين يعني خطر على حياتچ شتحچييين انتتتِ لازم تشتكين عليهم حتى يلزمووهم

عبق : عبالچ ما اشكتيت قدمت دعوة عليهم بس محد عرفهم وسدو القضية

ليلى : عبق يمعودة دعوفي هاي الشغلة مو والله متنا كُل يوم جايچ تهديد شنو هل عيشة هاي

عبق : تريدين اعوف حلمي ووظيفتي علمود شوية جرذان شبيچ بابا ترى ميخوفون جلبي

ليلى : عبق لاتتخبلين شنو ماتخافين غصب عنچ تخافين هاي حياة مو لعبة

عبق : ليلى دا اكلچ اني خايفة بس مو علية عليكم ادري بيهم هم هسة دا يراقبوني ويدرون بكُل تحركاتي وين اروح وين اجي ويعرفون بيكم اخاف يأذوكم حتى يخلوني اتنازل واخذ القضية

ليلى : اوووف عبق بالقران موتيني قهر وخوفتيني دا احس الطفل رح يطلع

عبق : لاتخافين ان شاء الله ماكو شي بس كولي لاعزيز حتى ينتبه عليچ وعلى نفسه تمام

ليلى : عبق شتحچين انتِ مردتي گلبي صدُك تحچين

عبق : شسوي يا ليلى هذا هو بعد امر الله شيصير خلي يصير

ليلى : ونعمة بالله يلا مع السلام رهوفة دا تبچي

عبق : الله وياچ

سديته منها ورحت نمت مرت يومين واليوم خطوبة اوسيد خابرته قبل لا يروح الهم وحچيت وياه حتى لا يسوي مشكلة ويكون هادئ ان شاء الله يسمع مني ظليت قلقة لان تاخرو هواي اتصل عليه ميرد گلبي خشمني عليه ليش ميرد

كمت وكفت واخذت التلفون وظليت ادُك وادُك عليه لحيت بالاتصال لحد مارد صوته رايح وبالكوة ينطق بسبب العصبية

عبق : شكو شصاير

اوسيد : باعها ال...... ولچ باعهااااااا باع ريتان

************

ولنا في الخيال حياة

************

عذرا عن التأخير اتمنى يكون البارت نال اعجابكم كانت وياكم اختكم الماس K.T

لاتنسون التصويت فضلا وليس امرا ⭐⭐⭐⭐⭐⭐

*******
الى اللقاء ...