العُسبَرة

البارت الثامن

وانتَ الذي تَعرفُني اكثرَ مِنْ نفسي
لِماذا صَدقتني عندما قُلتُ لكَ اكُرهك.....

العُسبرَة

*********

شوفو البنت تعشگ وانتو ماتدرون التمت العالم علينا وصارت سيرتنا على كُل
اللسان أوسيد وكف بوجهم وماقبل على حچيهم وواجهم

الكُل چان موجود الجوارين وعمامي كُل من يحچي بكيفه وبدون علم بشيء بكيفهم يحچون لحد ما مرة عمي كالت هاي كُلش حبابة وهي الي دارتني ورعتني احبها كأنها امي

ريتاان شدتسوين

رديت عليها بخوف بس شجعت نفسي بأوسيد الواكف بصفي وماعافني ابد : عمة والله مامسوية شي چنت كاعد دا اسولف وياه مثل كُل يوم

سهام ( ام ريتان ) : هلا هلاااا اسمع يا سليييم بنت اخوك يومية تختلي بيه الله اعلم شيسوون

صاح بيها أوسيد :احتتتتترمي نفسسسچ

سهار : انجبببب لللك ابن الحرام هاي امك ال....... بس جابت وولت ماندري عنها شي شمرتك مثل الچلب هنا وتريد تكمل عملتهااااا

اباوع عليه صار نار يرجف من العصبية ومشدد على قبضته بكُل قوة تقدمت عليها وكلت بعصبية حتى ارد شوية من كرامته : اسُكتي انتِ معللليچ شعندچ جاية وشتسوييين هنااا روحي رجعي منين ما اجيتي لا تلعبين دور الام هسة وجاية تحاسبيني يلااا

سهام : اني امممچ وغصب عنچ احاسبچ واطيح حظچ هممممم

خزرتها وكلت : ما الچ اي حققققق من اليوم الخليتي ابوية يجيني هنا ويشمرني وانتِ هناك حتى سؤال ماتسألين كبرت وربييت ومادريتي عني على اييييي اسااااااس جاية تحاسبببببين قابل انتِ ربيتني وجاية تحاسبييييني

سليم : صميي حلگچ وانجبي امشي فوتي جوة خلي اعرف اتعامل ويا هذا ال....... واشوفه شلون يباوع لعرضي

وكفت كدام أوسيد وصار ظهري عليه ورفعت ايدي بوجهه : على چثتي تتقرب منه هذا الماعاجبكم علمني ماعرفتو تعلموني عليه خلاني امشي بالطريق الصح مو مثلكم چنتو ملتهين بحياتكم ومحد كلف نفسه وسأل علية

حسيت بأيده على كتفي يبعدني من طريق ووكف بصفي : اني مامسوي غلط والي عنده شي يجي يتفضل

سهام : عووود يعرف يسولف المشوه امشي منا لا اطيح حظك وبعد اكسر رجلك اذا تتقرب منها

ريتان : مو هي بكيففففچ أوسيد صديقييي وغصب عنكم كُلكم اظل وياه

ولحظة ماحسيت غير وعمي واكف بوجهي ولسعة نار على خدي من الراشدي الاكلته بسرعة جرني أوسيد رجعني وراه ودفع عمي عني وصاح بيه بغضب : اييييدك لا اكسرها الك

عمي من سمع كلامه جن جنونه وهجم عليه وأوسيد كذلك واحد صار يضرب بالثاني وعركة صارت كُلش چبير چنت ابچي واصيح على أوسيد اريده يعوفه اخاف عليه لا يتأذة واحاول افاكك بينهم

انجرت ايدي وبعدتني عنهم باوعت شفت امي واكفة أشرتلي بعيونها وكالت : هسة اخليه يعوفه بس ترجعين وياي للبيت

نترت ايدي منها وكلت : مستحيييل اعوفه وارجع وياچ

سهام : انتِ تخسريني صدكيني ترى عمچ متحمل عليه وعلى لحظة يكتله خلاص وبعد بححح ماكو أوسيد

ريتان : جذابة

سهام : وداعة عيوني وما احلف بيهن جذب صدكي اخليه يكتله ويشمره للچلاب امشي وياي هسة واخليه يعوفه

صفنت واني افكر بكلامها بخوف العركة كُلش حمت ناس دخلت بناس وناس تكتل بناس باوعتله بخوف وبلعت ريكي وكتله : موافقة كُليله خلي يعوفه

سهام : هسة تجين

ريتان : لا مو هسة بعدين

سهام : هسة تجين وماعندي غير كلام

باوعتلهم ناس مدمية ناس كلتلها والغصة ببلعومي : اجي بس فاگگيهم

هزتلي راسها راحت لرجلها وكالت كلام بأذنه مكدرت اسمعه وجرته من ايديه حتى يعوف أوسيد بعدتهم عن بعض وخلت الناس كُلها تروح مابقى احد بس عائلتي

على الرغم من ضخامة أسيد وقوته بالمقابل عمي هم چان ضخم لذلك أثنينهن اتأذو بالعركة

چان أوسيد كاعد بالكاع منتچي على ايده ويمسح الدم من حلگه بالايد الثاني رحت عليه ركض اطمأن عليه واني اباوع بوجهه

ريتان : أوسيد انتَ زين خوما بيك شي شو باوعلي

وخرني عنه وهو يطمئني : مابية شي امشي فوتي للبيت يلا

باوعتله بحزن وأسف على السويته كتله : أوسيد

أوسيد : امشي طبي للبيت بعدين نسولف

ريتان : رح ارجع ويا اهلي

باوعلي بصدمة وكالي : شنووو

هزيت راسي بنفي ودموعي اخذت مجراها : رح ارجع علمودك اني كُلش احبك وما اريد اخسرك سامحني أوسيد

كمت حتى اعوفه ودموعي تتسابق منو توكع قبل وكفت ووكف وياي وجر ايدي أوسيد : ريتااان اوكفي شتحچين انتتِ ولچ باوعلي

ماكدرت اباوع بعيونه خفت لا اضعف ماكدرت انطق غير هل كلمات : أوسيد اترجاك سامحني لاتعروفني رح اظل انتظرك

كلت كلماتي وجريت ايدي ورحت اركب السيارة چانت سهام فاتحة الباب السيارة وتنتظرني اصعد صعدت بيها وهي سدت الباب وباوعتله بشماتة وهي تضحك حسيت گلبي انفطر من القهر عليه

صعدت بالصدر وانطلقت السيارة التفتت اباوع عليه بعد واكف بمكانه ويباوع على السيارة شلون تمشي وترحل من كدامه

توبة : ياعينييي وشسوة بعدين

ريتان : هو كُل الي سواه ما استحقه اني كُلش حقيرة أذيته هواي

توبة : شلون

من بعد مارجعت ويا اهلي اول ما وصلت جرني عمي من ايدي وشمرني بالغرفة وقفل علية الباب وحبسني چانت اسوء ايام حياتي وحيدة بين اربع حياطين الاكل مثل ماييجيبوه يرجع ما المس مالي نفس

چان كُل ما يتعارك ويا مرته يجي يطلع حرگته بية وهي كذلك من تعصب تجي تطلع حرگتها اسوء ايام بچي وقهر وحزن ايام ما انساها

طول اليوم دمعتي ماتنشف ما اريد ابقى يمهم دا اختنگ اني ما اكدر اتنفس عبالك البيت مهدوم على راسي الهوا بالكوة اجره

مشت الايام ويومية توبة حرفيا يوميييية چان يجي يتعارك وياعمي يريدني ارجع وياه وعمي يصيح عليه ويطرده من البيت يبقى كاعد من الجهة الصايرة بيها غرفتي اسمعه يضرب حجار صغير عليها حتى اطلع ويشوفني

بكُل مرة چنت انتهي من البجي ما اكدر اطلع واشوفه وهو بهل حال گلبي يتكطع عليه ما اكدر ما اكدر وهو ماچان يفقد الامل كُل يوم يكعُد يم الشبك ينتظرني واني اخيب امله وما اطلع

لحد ما اجة اليوم المنحوس اصنف هذاك اليوم من اسوء ايام حياتي واسوء المواقف الي خليت نفسي بيها بيومها أوسيد هم اجة على عمي وتعارك وياه اسمع عمي يكُله

سليم : انجب واطلع براااا يلاا دا نكُلك البنت ماتريدك شهل ملحة

أوسيد : خلي اشوفها واسمع بأذني وينها ليش ماتطلعلييي

سليم : اي هاي الناقصة اخليها تتطلعلك ابن ال...... امشي اطلع يلا يلااااا

أوسيد : خوووش ماتطلع انتظرني

الجو هدأ وحس أوسيد اختفى كُل ظني رح لكن بعد نص ساعة صفارات الشرطة دوت المكان

رحت اركض على الشباك اشوف سيارتين شرطة وأوسيد واكف وياهم ويدكون ببابنا عمي بسرعة طلع وولده وياه من شافوهم بلعو لسانهم ما اسمع شيحچون بس اشوف عمي يهز براسه بتفهم شوية ودخل للبيت اسمع صوته يرعد وصوت امي تريد؟تفهم شكو
شوية وصار صوت دبچ على الدرج وبسرعة انفتح قفل الباب ودخل علية گلبي انهب

اباوعله بخوف وهو يتقرب مني لزم شعري وعته بقوة وصاح بية : اسمععععي للچ هذا ال..... مالتچ جايب الصصصخام ويكُللهم حابسيها جوة ويمخلوهااا تططلع تنزليين هسسة وتكُليلها يروح وتكولين للشرطة ما محبوسة وهذول اهلي سمعتتتيي

صحت بألم وروح موجوعةة : لوووووو تموووت ما اكُللهم اذا طلعت منا اصيح اكُللهم خطفوني ودا يعذبوني والله واللللله

ضربني راشدي حسيت خدي ولع نار وهد شعر ودفعني بقوة على الارض انركعت بقوة حسيت عظامي تكسرت رفعت راسي اباوع لامي واكفة علی جهة وتباوعلي بملامح جامدة وماتسوي شي

رفع ايده بوجهي بتهديد وصاح بية : قسسسسم باللله احط طلقة براسچ وراسه سمعتتتتتتي كدام عينچ اكتتتتله اخلي دمه بطووووله

اهز راسي برفض ماقابلة على حجيه : لا لا مستحيل تسوي هيييچ

ضحكت بخبث : اسويهاا واسوي الاكبرررر منهاا تمشين هسة تنزلين بهدوء وتحچي الكتلچ علللليه واذا ماتسوين هيچ حبيبچ يموت كدام عينججج

باوعتله بخوف تهديد چان بمثابة سيف اعدام مطوق رقبتي كلامه اخترق گلبي خفت انو اخاطر واروح احچي الهم وينفذ تهديده وُيكتله وخفت اذا سويت مثل مايريد أوسيد يكرهني

چنت واكفة على خيط ومن جهتين النار تحاوطني وما اعرف لأي اتجاه اروح بس ماكدرت افكر اكثر چان لازم اقرر بسرعة واكيد قراري رح يكون حماية أوسيد مو بس انحبس لو ياخذون روحي هم افديه

اتخذت قراري وبهذا القرار عرفت اني جنيت على نفسي چانت نهايتي بس نهايتي مقابل حياته اني موافقة

نزلت وياه گلبي يخفق بقوة ويصيح بكُل دگة لاتسوين هيچ خطواتي ورجفة ايدي جسمي كُله يختض من الخوف والالم دگات گلبي جن جنونها وصلنا للباب چان موجود الكثير من الشرطة واكفة وهو واكف بنصهم من شافني انتفض بلهفة وعيونه لمعن بحب وابتسملي بطمأن يريد يطمئني انو رح يساعدني

نزلت راسي والدموع اخذت مجراها مسحتهن قبل لا احد ينتبه ورفعت راسي واني ادعي الثبات والكسرة الي بداخلي احسها هدمت روحي

أوسيد : هاي البنية سيدي شوف

الضابط : اختي هذا الاخ انطى بلاغ انتِ محجوزة هنا بالاجبار صح هذا الكلام

باوعت لأوسيد وهو يهزلي راسه يحثني على الكلام باوعت للضابط وهزيت راسي بنفي وبلعت غصتي وكلت : لا اني باقية بأرادتي

ماكدرت التفت عليه واشوف ملامح الصدمة بس حيست بيه غمضت عيوني خفت لا اضعف والتفت عليه واركض اختل بحضنه چنت اقاوم بكل ما اوتيت من قوة وادعي الثبات

صاح أوسيد : ريتااان ......سيدي جذابة هذا عمها يجبرها تحچي هيچ

سليم : سيدي هذا واحد دايح يومية هاد على البيت يريد ياخذها هذا مخبل عقله بي شي خلي يفحصوه

أوسيد عصب كُلش خصوصا من سكوتي وكاله : لاااتجذذذذب كُل الناس تشهد عليك جريتها من ايديها واخذتها غصب

سليم : ماجبرت احد هي اجت امها حچت وياها واجت

أوسيد : ريتااان احچي لاتظلين ساكتة لاتخافين احچي اني بظهرچ حبيبتي لاتخافين احچيلهم كُليلهم انتِ مجبورة تبقين هنا

اجة عليه واحد من ذول الشرطة الواكفين وحط ايده على كتفه وكاله : أوسيد كافي لاتضغط على البنية دا تكول باقية بأرداتها

وخر ايده عنه بعصبية وكاله : جذذذب هي خايفة هذا عمها مهددها اني ادري

كاله : أوسيد كااافي تعال امشي خلي نروح

دفعه عنه وصح بيه بغضب : وخرر وخرر عني انتَ ماتعرف شي

چنت ضاغطة على اسناني وعاضة لساني حتى لا ابچي بس بعد كلامه ماكدرت اتحمل

ريتان : اوسيد روح ما اريد اجي وياك

تقرب مني وباوع بعيوني بتركيز واني بقدر الامكان احاول اشتت نظري من عيونه

أوسيد : باوعلي لاتتتهربين باوعيليي

رفعت عيوني اله مستحيل ماكدر يقرة الحزن والالم الي بيهن هو حافظني اكثر من نفسي

أوسيد : بس احچي انطيني اشارة كُليلي احچي اي شييييي لاتظلييين ساااكتة ريتاااان

وخرت ايديه مني وكتله : روح أوسيد كافي لاتوجع گلبي روووووح

أوسيد : هددچ حاجاچ شي جابرچ بس احچيلي كولي

دفعته من صدره وصحت بيه بروح متألم احس رح اوكع ما اكدر اتحمل هل ألم اكثر دا يصير فوك طاقتي تعبت : كااااافي عااادي روح لخاااطر الله رووووح كاففففي والله بعد ما اتحمل لخاطري روح رووح ما اريييدك افههههم ما ارييدك ما اريد اروح وياك اريد ابقى يم اهلي شنو كوة

هزت راسه بنفي ماكادر يصدك : ريتان شنو هذا الحچي شنو ماتريديني والوعد وحبنا وين راح

كلت بغصة وحسرة شكت گلبي قبل بلعومي : چنت اضحك عليك اني ما احبك اكرهك

ضحك بألم وهو بعده يهز راسه بنفي ماقابل يصدك الي دا اكوله : لا تجذبين انتِ تحبيني وتريدين بس هذا عمچ ال..... مهددچ وجابرچ تحچين هيچ

صحت بيه بروح مكسورة مخذولة مجبورة مسلوبة الحرية والامانة والحب مسلوبة الحنية مسوقة الحياة خالية : محد مهددني اني چنت اضحك عليك بعدين

هنا كلت كلام اتمنى لو مكصوص لساني لو ميتة قبل ما اكُله كلت كلام جرحني اكثر ماجرحه كلام خذلني قبل لايخذله كسرني ميتقطعة قبل لايسكره

وبعدين اني مستحيل ابقى ويا واحد ابن حرام اهله جايبيه بالحرام شلون تريد أمن نفسي يمه اهله مارادوه وشمروه اني شعندي باقية يمه

ما اكدر اوصف ملامح الخذلان ولا الصدمة ولا الالم والوجع الحس بيه بعد مانطقت كلامي حركت شفايفي بدون صوت ما اعرف اذا شافني او لا كدر يشوفني واني انطق الاسف بين شفايفي كتله بشعور حقيقي خالي من اي زيف او كذب اسفة بحس مخنوك مسلوب محروم وركضت لداخل البيت وصعدت للغرفة وانهارت كُل حصوني بذيچ اللحظة

انهاريت كسرت ملخت روحي اضرب بنفسي واحاسبها على الكلام الكلته شلون انطاني گلبي شللللون اتجرأت وكلت هذا الكلااام شلون سمحلي لساني انططططقه انهاريت تماما وكفت بالكاع فاقدة ما اكدر اتحرك بس احس بالاشياء يمي ما اسمع شي غير صوت امي تصيح لعمي حتی يشوف شبية بعدها فقدت وماحسيت بشي بعد

توبة : ريتان وين صفنتي شكلتي من اجت الشرطة

كلت واني صافنة بالفراغ اتذكر الموقف بالحرف : عيرته. ..... عيرته بماضيه كدامهم

من الصدمة حطت ايديها على حلگها بتفاجأ هزيت راسي : شفتي انتِ انصدمتي هيچ هو شنو چان موقفه اني لو بمكانه مستحيل اسامح نفسي على السويته بيه السويته بيه كُلش جبير وماينغفر بس هو على العكس

بعد فترة طلبت منه المساعدة وساعدني بكُل رحابة صدر وماكالي انتِ سويتي هيچ ولا كالي اني اكرهچ ولا سد بابه بوجهي بالعكس تماما چان موقفه شهم فتحلي بابه واستقبلني

وبالاضافة كالي حاولي وياي وخليني اسامحچ
تخيلي توبة على رغم كُل السويته بعده يكُلي احبچ ورجع طلب الزواج مني

توبة : ليش ماتكُليله اهلچ مهدديچ

ريتان : لان رح يتهور ويروح يتعارك وياهم واخاف يتأذة ويروح كُل السويته هباء

توبة : بس هيچ مو حل لا انتو سوة ولا انتو مفترقين

ريتان : اكثر شي حارك گلبي تدرين عباله من ارفضه استعير منه او شي مايدري اني خايفة عليه واريد احميه بروح

توبة : تريدين نصيحتي

ريتان : اكون ممنونة

توبة : صارحيه وكُليله على اهلچ حبكم حلو حرامات يضيع بسبب اهلكم

كالت هذا الكلام وجرت حسرة حسيت صوته بيه كسرة وغصة وهي وتحچي ظليت ساكتة واني صافنة وهي هم ساكتة وتتلمس بطنها بشرود

التفتت من سمعت صوت الولد بالبيت كمت اني وياها سلمنا عليهم هي دخلت لغرفتها وعافتنا انتبهت لنظرات هادي عليها اتبعها بنظراته لحد ما دخلت للغرفة اتنهد وراح طلع

دورت على أوسيد لكيته كاعد بالاستقبال وكفت افكر بنصيحة توبة اكُله لو لا ظليت افكر ماكو حل غيره وضعنا حرج لا احنا سوة ولا احنا بعاد اعتقد صار لازم اكُله حتى ننهي الموضوع

اتبعت خطوات ورحتله للاستقبال چان كاعد ودا يسولف بالتلفون كعدت بصف انتظره يخلص من خلص المكالمة وكف حتى يروح حتی ماكلف نفسه يباوعلي وكفت وياه ولزمت ايديه وكتله : اوكف أوسيد اريد اكُلك شي

*************

حاطة العباية على راسي وافتر بالبستان احوش بالخضرة وادندن بيني وبين نفسي يانبعة الريحان فرحانة اغني بفرح هذا الاسبوع رح اسجل بالجامعة واداوم

هجست بحركة شخص وراية التفت وعاينته جاي بأتجاههي عبست وجهي يبووه هم اجة رجعت اكمل شغلي وما اهتميلته لحد ما وكف يمي كَلي

هيثم : هاا سلمى شعلومچ

سلسال :هلاا واسمي سلسال

هيثم : هسة اكو وحدة اسمها سلسال اسمچ صعب سلمى اسهل

سلسال : وانه مايعجبني تندهلي سلمى

ضحكت وكَلي : هههه تتدلين سلسال.. جاي تسوين

وكفت كدامه وتخصرت : جاي اسوي مثل متشوف احوشن

هيثم : امم سمعت جم حچاية رح ترحين للجامعة

رجعت اكمل شغلي وكتله : ايي

هيثم : خووش بس تراني عيوني عليچ خافه عبالچ تعلبين منا ومنا

التفتت عليه واني رافعة حاجبي بتفاجأ : شني شني شكلت

هيثم : عيوني عليچ حتى لا تلعبين منا ومنا

سلسال : هيثثثثم خليك بحالك ولا تحشر خشمك بالما يعنيك عبن تعرف سلسال مني لاتندك بيها احسلك

هيثم : شمالچ خفتي

سلسال : انه ما اخاف بس ما احبن احد يظل مراقني ويحسسني مسوية شي وبعدين هاي الدروب مو الي وانه بنت يعكوب وانتَ تعرف شنو يعني بنت يعكوب هيلك تندك بيها عبن تعرف شيجرالك اذا سويت شي غلط

هيثم : تهدديني

سلسال : ما اهدد جاي احذرك لا تلعب بالنار تعرف ابوي كِل شي ولا بنواته اذا مسيتهن بشعرة ينهيك من الوجود خوووش

ضحك تك خد ومارد علية اخذت سلتي ومشيت من يمه ويع شكد مقرف مسوي نفسه الكِل بالكِل وهو خلگ جربوع محد بحاله

رجعت للبيت وغسل الخضرة وساعدت بالبيت ونظف وكملت ورجعت طلعت للحيوانات اوكلهن خلصت من شغل اليوم ورجعت للبيت دخلت وچانو عمامي وابوية مجتمعين بالاستقبال وباب مفتوح شوية وچانو يتحچون بموضوع زين

وكفت على جهة اسمع كلامهم حجة عمي هزاع وچان باين الانزعاج على صوته : شني هذولي مالهم ردادد يومية مسوين مكسورة شني رح نظل ساكتين هيچ

منذر : كلام ابو ميثاق صح ابو يوسف لازم نحطلهم حد يوكفهم عند حدهم

يعقوب : اخوان شفتوني شكد حچيت وياهم ومايفيد الشيخ بنفسه حچيت وياه بس بعدهم شادين بس يريدون يخربون

جهاد : ابو يوسف هذا مو حچي لازم نلكة حل مرة حارگين المحصود مرة هاجمين على الحرس وهذيچ النوب رامين عليهم مو حالة هاي لمتی نظل ساكتين

يعقوب : رح اروحن لشيخهم باجر وهاي اخر مرة اذا ماوكفهم عند حدهم رح يصير غير كلام

أيدوه بحچيهم ورجعو يتناقشون بغير شغلات خليت ورجعت للمطبخ اعينهم وبالي ظل مشغزل بكلام هيثم ماخايفة منه بس هذا اكيد عنده لعبة

مشت الايام وصار يوم روحتنا حتى نروح نقدم على الجامعة اخذت جم غرض وياي عبن مارح ابقى ارجع وياهم وبعدين ارجع اجي لملمت غراضي وانتظرت مصيري المجهول

**********

صبيت اخر كلاص عصير وشلت الصينية وديتها للصالة وين چانو مجتمعين قدمته الهم وهم ينظرولي بتكبر اتنهدت وما اهتميت للموضوع اخذت كلاصي وكعدت

حچت شيماء وهاي اختي لكن من غير ام : ايع توبة شنو هذا عصير لو مي بيه شكر ماتعرفين تسوين ايع ايع

توبة : حرام تكولين هيچ على النعمة وبعدين العصير طبيعي مو اني مسويته هم جايبيه

حچت مرام اختنا الثانية : عوفي هاي الدروب توبة ماتفيديچ حيري بعشگچ احسن

درت وجهي عنها وما اتهتميت كامن يتغامزن ويتلامزن بيناتهن وحدة تأشر للخ

شيماء : اكووول توبة

توبة : نعم

شيماء. : نعامة ترفسچ ان شاء الله كولي امين اي المهم هذا حبيبچ ليش يريدچ وهيچ ميت عليچ شمسويلته

توبة : الحب فطرة يهبها الله النا ويزرعها بگلوبنها مو شي نسوي بأيدنا

مرام : يعني تقنعينا انتِ مامسوي شي

توبة : مامضطرة اقنعچ هذا الشي راجعلچ

شيماء : ترى انتِ كُلش متكبرة

وكفت وحطيت الكلاص بالصينية وكتلها بأبتسامة : حاشا ان نتكبر فهو رداء الله ولو تكبرنا فخير لنا من الحقد والنميمة

عفتهن ومشيت واسمعهن يتسبسبن ويحچن علية عادي تعودت عليهن كلامهم صار ميأثر بية بطريقي دا اصعد الدرج صاحتلي مرة ابوية امينة

توبة : هااا خالة

امينة : تعاااالي شنو هذا الوصخ ليش مامنظفته

رحت عليها شفتها واكفة بالممر كتلها : شنو خالة الصبح نظفت البيت كُله

امينة : وهذاااااا

باوعت على الكاع كُلها تمن ومرك وصخ وتراب مبين مال واحد مسويه عن قصد اتنهدت وكتلها : خالة والله الصبح نظفته يجوز هاي البنات موكعاته

باوعتلي بغضب وكالت : تذبيها براس بناتتتتي ام الوصخ طايحة الحظ الفگررر

توبة : خالةة

امينة : خلخالة تخلخل عظامچ اممممشي جيبي الصوني غسليه لا اغسل شراعچ هسة الجايفة

عبرت من يمي ودفعتني عن قصد وراحت باوعت للمكان بقهر الصبح نظفت كُل البيت ماخليت ركن يعتب علية وصبيت الغدا وغسلت المواعين والهدوم وهن ماحرگن ساكن كاعدات وكُل شي يجيهن علی الحاضر كلت ارتاح العصرية رجعن وصخنه يخبثن علية

جريت حسرة بقهر ورحت جبت الصونة وكمت اغسله اغسل بيه ودمعتي توكع وتختلط بالمي اشتغل واني ساكتة بس الكلام بداخلي مشكل صراع

يجول في خاطري الالف من الكلمات يتخللها الكثير من الحروف ولم يجرأ لساني على بوحها

كملت تنظيف رجعت الغراض مكانهن ورحت لغرفتي طبيت سبحت حتى انتعش وطاقتي تتجدد طلعت من الحمام ورحت امشط شعري واني مشغلة اشعار واستمع الهن احب الشعر روحي تهواه

ومن بين استماعي وانشغال بالي رن التلفون بصوت رسالة شلته حتى اشوفه وچانت من العزيز الغالي رجفت ايدي وگلبي خفق بلهفة فتحتها وقريت محتواها

( روحي يم الشباك )

كمت ورحت للشباك حتى اشوف بس قبلها حطيت الشال على راسي فتحت الشباك شوية حتی اباوع منه وانصدمت من شفت جواد واكف ليجوة ويأشرلي بأيده وهو يضحك

ضحكت عليه واني بعدني متفاجأة ورحت للتلفون من سمعت يدُك چان اسمه منور الشاشة رديت عليه بدون ما احچي واني اباوع من الشباك

انتچى علی سيارته وكال : اهلا ياحلوتي كيف حالكِ

رديت عليه بنبرة رقيقة يتخللها الخجل : بأحسن حال يامجنوني ما الذي اتى بك

لزم گلبه وكال بتمثيل : قلبي قلبي المجنون اتى بي الى هنا لعندكِ لكي يراكِ وتعود الحياة فيه

توبة : اممم اقولت قلبكَ اذا دعني اقول لكَ تبا لك ولقلبكَ الصغير ايها المخادع

جواد : يا اللهي لماذا تقولين هذا انتِ تعلمين ان قلبي لم يدق لمخلوق غيركِ حين يراكِ يتنفض ويصرخ قائلا انه يريدك

توبة : اريدني ؟؟ لكني احب رجل ولا استطيع ان اهوى غيره

جواد : ومن هذا الرجل بحق السماء

ابتمسته : امم اعتقد انكَ تعرفه

جواد : انعل والديه منو هذا ولچ توبتي

ضحكت بقوة ورديت عليه : احبه ويحبني گلبه هاوي گلبي عاشگته عشگ مسودن ما مسولفة بيه العربان

ضحك على ضحكتي وكال : هنياله بيچ عسى يتهنا بيچ

توبة : ادعيلي اصير قريبة منه ويصير قريب مني والية وحدي

جواد : الله يجمعكم

توبة : الله يجمعنا

جر حسرة واتنهد بتعب : مشتاقلچ

ظليت ساكتة ومنزلة راسي شوية ورفعت نظراتي اله چان يباوع بتركز على الجامة : لو كانت كلمة شوق تعبر عن الحال لقلتها طول الوقت

جواد. : كوليها حتى لو متعبر الها معنى بگلبي

توبة : جواد

جواد : شهگتي ودموعي هاا

توبة : اني ....

عبققق

سديت الدفتر وكمت طلعت من الغرفة وكلت : هااا هادي

چان واكف بالباب ويصيحني. : تعاالي

رحتله وكلت : شكوو

اخذني وراح للحديقة وكف بوسطها كالي : اريد ابني غرفة هنا شتكولين

عبق : هسة وكت غرفة ياهادي

هادي : مو شنو شكلها كعدتنا مطولة هنا فا كلت انوسع المكان حتى البنات ياخذن راحتهن

عبق : امم ما ادري احس حرامات الحديقة حلوة

هادي : ولچ ياحديقة دشوفيها شكبرها تبني بعد عشر بيوت مثل هذا

عبق : صح كلامك بس ابنيها بصف البيت مو معزولة وحد وياها صحيات تطلع توب

هادي : اي هو هيچ وارمم البيت هم حتى يطلع جديد

كتله بشقة واني اغمزله : دا ترتب وكذا شنو ناوي تتزوج

ضحكت بهدوء وكال : فاتني القطر بعد كبرت

عبق : اممم علينا هادي علينا

اتنهد وكال بنبرة يكسوها الحزن : عبق گلبي وطن محتل

باوعتلي بشفقة وكتله : هادي مو كتلك انساها

هادي : كلتي الي ماكلتي لگلبي گلبي حقير مايقتنع

بعدني دا احچي وياه ولمحت سيارة من بعيد دا تجي علينا عكدت حواجبي بأستغراب والخوف بدة يتسلل لگلبي صحت بهادي

عبق : هادي اكو سيارة جاية لهنا

اجة بصفي حتى يشوف منو بس ماكدر يميزها لانها چانت بعيدة لحد ماقتربت وفتحت عيوني بصدمة وصحت

هووود

*************

ولنا في الخيال حياة

*************

اتمنى يكون البارت نال اعجابكم انتظروني بالبارت القادم مليان احداث مشوقة كانت وياكم اختكم الماس K.T

لاتنسون التصويت فضلا وليس امرا ⭐⭐⭐⭐⭐⭐⭐

قناة التلي https://t.me/tasow25724

*********
الى اللقاء.....