وما نحن إلا جنائز مؤجلة
فاستقيمي أيتها النفس
عسى ان يكون الرحيل قريبا..
-*******
العُسبرَة
*******
خطين...... انتِ حامل
كلت بصدمة واحس الدم جمد بجسمي وكُل خلية انتفضت اباوعلها الوجه صار اصفر ليمونة وترجف رجيف عبالك شتا حسيتها رح توكع رأسا لزمتها واخذتها للغرفة كعدتها على السرير واني بعدني مصدومة
لا مستحيل ياربي اختبارك صعب شلون حامللل شلووون والله لو اهلها يدرون يكتلوها هي والطفل ظليت رايحة جاية بالغرفة جاحظة عيوني ما اعرف شسوي الحيرة اكلت گلبي شنو الحل شسوي المن احچي المن اكو
هي ظلت كاعدة بمكانها بعدها مامستوعبة صدمة ما لكيت غير حل ويمكن هذا انسب شي الها وللطفل
وكفت كدامها وكلت بحزم : لازم تسقطين الطفل
كلامي چان مثل الصاعقة عليها وكفت مسعوقة من كلامي هزت راسها برفض قاطع وصاحت بشراسة امومية : مستحيللللل
شتحچين انتتتتِ هذاا ابني مستحيل اضحييي بيهه
لزمتها من اكتافها وصحت بيها : اببببن حرااام هذاااا ابن حراااام اذا ما سقطتيه هسة رح يتعذب طوووووول حياااته والرايح والجاي يصيحله ابن حرااام وذنبه يصير بركبتتتچ افتهميي
وخرت ايدية منها وكالت بصوت عالي : حلاللل والله العظيم حلالللل ابني ابن حلاللللل اني متزوجة متزوجةةةة
وكفت مكاني بصدمة متزووجة!!! شلون وشوكت زين اذا متزوجة شلون كالت مغتصبني شديصير
رحت امشي بهدوء بأتجاههاا وكفت فوك راسها وهي كاعدة بالكاع وحاضنة رجليها وتبجي وتهز بنفسها بهستيرية
بلعت ريكي وكلت : توبة انتِ واعية دا تعرفين شنو تحچين
وكفت بغضب كدامي ودموعها تتجارة بألم صاحت بية : واااعية واعييية اني متزوجة اتزوجته على سنة الله ورسوله وكدام شهوود هذااا ابنييي بالحلاللل ومستحيل اخليكم تأذوه احميه بروحي
صحت بيها بأنفعال : انتتتتِ شتحچييين شوكت تزوجتي وشوكت صار هذا الطفلل توووووبة رح اتخبلللل شديصيررر
تشهگ بالبچي وتحچيلي الصار : بيوم بيوم النهزمت بيه چان ينتظرني اخذني ورحنا نعقد كالي حتى يحط اهلي كدام الامر الواقع تزوجتتته بأيدي وقعت بأيدييي بصمتتت بلساني هذااااا كلت موافقققققة على دماري بلساااااااني كلت اييي اريييده هذا رح يدمرني ويدمر حياتي ومستقبلي اني انيييي جنيت على نفسي انييي كسرت نفسييي انيييي أذيتها لنفسي اني
تحچي وتضرب وجهاا بخبال لزمت ايديها امنعها عن التسويه وهي متهسترة من الوضع كعدت بالكاع تضرب على الارض بقوة وتبچي وتصيح بصوت عالي
اخخخخخخ ياربييييي اخخخخخخخخخ. كااافي تعبتتتتتت كااااااافي ارحم بحاللللي ياربببب ارحمممم بحااااالي لا من اهلللل لا من رجالللل لا من اخوووو واللله تعبتتت تعبتتتتت شوكت ارتااااح
حضنتها اريدها تسكت واهمس بأذنها : اشش اسكتي عيب البنية برا رح تسمعنا
تهز براسها بونين وتصيح : اااااه يايمةةة ويننچ وينننچ ليش عفتيني ورحتيي ليشش عفتينييي عفتي بنتتتچ للضيمم عفتيني يم ذول الوحوووش ولججج يمةةة بنتچ مو كدهم تعالييي اخذينييي تعااال يمةة تعاااال مشتاقتلجج وللج يمةةة
تبجي بحركة وونين ابتعدت عندي وهي تشكيلي وتحچي الصار وتأشر بأيديها تحچيلي عن المها ووجعها : كالي كالللي بس نتزوج على ورق اوهم اهلچ اني اخذتچ غصب حتى ينجبرون يقبلون بية وثقت بيه امنت بيه سلمته نفسي وكتله امشي ويااك لللمووت
الحقير تزوجني واخذني لمكان هجم عليةة اغتصبنييي اخذذذ شرفيييي غصبب ضربني وعذبني ابشع ليلة شفتها بحياتييي شوفني المررر بجيت وتوسلت بيه كتله اني حبيبتك اني صديقتك انييي توببببة ما شفعت توسلاتي ولا دموعي ولا اهتممممم چان الحقد عامي عيونهه
ورا ما خلص عملته الشنيعة اجة ايباوعلي ويجبي يكُلي اسف غصب عني غصب عني شنووووووو غضب عنننننه اغتصبننننني عذبنيييي هتك ستري واخذنييي غصببب خسرت اخوية وكُل اهلي وناسيي بسببه يكُلييي غصب عني شلون غصب عنههه شلوووون الواحد يكدر يأذي حبيبه
لزمت ايدية وتحچي بدموعها وتهز راسها برفض ماتريد تصدك العاشته. : لچ لچ شالني شالنننني وحطني بالسيارة وذبني كدااام المستشفى حتى ما كلف نفسه يوديني لجوة حطني بباب المستشفىىىىىىى
عبق : اشش حبيبتي اشش لاتقهرين نفسچ هسة نلكة حل
توبة : ياااحللل هذااا ياحلللل ابنننننه ببطنييي ابنننه قطعه منههه بداااخلي شلون ينحل الموووضوعع شلون رح يعيش ابننني شلون من يعرف ابوه مسوي هيييچ كُليليي شلووون
عبق : توبة خلصص لاتصيحين البنية براا خاف تسمعنا وتفهم السالفة فدوة اروحلچ كافي
توبة : عبق دا اختنگ طابوكة نايمة على گلبي دا اموت على البطيئ انيييي دا امووووت مختنكةة النفس ما اكدر اجره عبق ساعديني ما اكدر اتنفس ساعديني
عبق : سودة علية الله لا يوفقك ان شاء الله ولچ عيني لاتصيحين هسة يجي هادي ويسمعنا..
بعدني دا احچي وياها وانفتح الباب ودخل هادي بفزع وملامح الخوف والقلق واضحة على وجهه
هادي : شكو ليش دا تصيح
ماكدرت اجاوبه التهيت بيها صارت زركة نيل اختنگت ماتكدر تتنفس اجة عليها بسرعة يشوفها جابلها مي ورش عليها وهي لا من ايد ولا من رجل مختنكة كُلش اتذكرت دواها رأسا صحت بيه : هااااادي دواهااا دوووواها
هادي : ويين بسرعة وين
عبق : هنااك بالمجر
راحله يركض وجابه واجة حطه بحلكها وكام يبخ بيه شوية شوية كامت تتنفس ورجع لونها طبيعي توبة مريضة بالربو وبسرعة تختنك ماتتحمل چانت كاعدة بالكاع وراسها بحضني وهادي كاعد كدامي على ركبه يراقبها بعيونه يريد يطمأن عليها
عبق : هادي روح يلا
هادي : وين اروح خلي اشوفها تروح تتخربط
عبق : هادي كوم روح اني يمها مايصير تبقى يمها هي ما لابسة حجاب كوم
من انتبه للوضعها حس بأحراج نزل راسه وكام طلع من الغرفة وسد الباب وراه ظليت كاعدة يمها لحد ماصحت سندتها ووديتها للفراش نموتها وغطيتها وهي چانت ساكتة لازمة بطنها وصافنة بالفراغ
تنهدت بحزن على حالها وعفتها وطلعت برا لكيت هادي واكف بالصالة ينتظرني من شافني اجة رأسا علية وسألني بلهفة عليها
هادي : هاا. شلون صارت
عبق : الحمدلله صحت كُل شي مابيها
رحت كعدت على القنفة واجة كعد يمي وسألني : عبق احچي ليش تخربطت وشبيها چانت تصيح
حطيت ايدية على وجهي بتعب ورفعت راسي اله وعيوني مدمعة هزيت راسي بيأس : هادي مشكلة مشكلةةة جبيرة مالها حل
ظهرت ملامح الخوف والقلق على وجهه بلع ريكه وسألني : شكو احچي
عبق : توبة متزوجة
چانت صدمته مثل صدمتي اذا مو اقوى ماحچة شي ماكدر اصلا يحچي وظل على كعدته رجعت كتله واني اضحك بستهزاء : لا مو بس هيججج تخيللل هي حامل
صدمة بعد صدمة كانت اشبه بدلو ماء بارد في عز الشتاء سقط عليه وكف مذهول من هول الصدمة ما عرف شيسوي رجع كعد وكأنه يريد يصدك الكلته
هادي : انتِ شتحچين شوكت لحكت تحمل لو تتزوج شبيچ عبق
عبق : نفس السؤال سألته شوكتتت بيوم المنهزمة تزوجتها حتى تحط اهلها كدام الامر الواقع والچلب غدر بيها واخذها غصب وحملت
هادي : انتتتتتِ شتحچييين شنو بهل سهولة زواج وحمللل
وكفت وياه وصرت مقابيله : المشكلةةة مووو هنااا المشكلة اذا اهلها دروو بالطفلل محد راح يصدك هي متزوجة وهذا ابن حلال الكل رح يتهمها انه ابن زنا
هادي : وشنو الحلللل
عبق. : كتلها سقطي الطفل ماقبلت وتخبلت علية ابنها من لحمها ودمها اكيد ماتقبل تقتله بأيدها محد يرضاها
هادي : وهسة شنسوي
رفعت اكتافي بعدم معرفة : ما ادررييي من المشاكل ماكمت اعرف راسي من رجلي كافي علية القضايا التجيني والمحكة عقلي احسه رح يوكف مادا يستقبل هل كم الهائل من المشاكل
هادي : لازم نلكة حل
عبق : ماكو غير حلين واثنينهن مستحيلات
هادي : شنو هن
عبق : اما ترجع توبة اله وهذا الشي مستحيل اما الطفل يسقط وهذا ايضا مستحيل
هادي : اثنهن لاا لازم نلكة غير حل
عبق : ماكو غيرهن صدكني چان اكو احتمال ثالث لو هود موجود بس هو اتخلى عن اخته لذلك هذا الاحتمال انلغة
هادي : اني اعقد عليها واسجل الطفل بأسمي
عبق : انتَ شبيك دا اكُللك متزوجة شلون تعقد عليها وهذا الحقير اني متأكدة هو عقد عليها حتى يلوي ذراعنا ومحد يكدر يحچي ولا احد يكدر يتزوجها لان هي متزوجة بس محد يدري لزمنا من الايدددد التوجعنااا
كال بغضب وعيونه التهبت بالحمار وعروك ركبته كُلهن برزن : غصب عنه يطلك واذا ماقبل الا اطيح حظه
كال كلامه وعافني يريد يطلع والغضب محتله ركضت عليه وكفت كدامه امنعه من مواصلة الطريق وكتله بعصبية : وييين راييح
كز على اسنانه وجاوبني بحدية : لهذا ..... اطيح حظه واشوفه شلون يريد يلوي ذراعنااا
دفعته من صدره ورفعت ايدي بوجهه : ارجعع مكااانك شنو بهل سهولة تروح تتهجم عليه على اي اساس شنو دليلك هو متزوجها اكيد رح ينكر ويبري نفسه من هل عملة ماكو لا وثيقة لا ورقة والشهود اكيد جماعته مارح ينطون بيه
چان اكو كرسي قريب عليه شاله بعصبية وركعه بالكاع وهو ينتفض من الغضب صاح بصوت عالي : لعدد اسكتتتتتتتتله وهو دا يلعب بكيفهههه ابن ...... شلون اسكتللله شلووون
كتله بهدوء عكس العاصفة البداخله : رح نسكت بس هل فترة ونوهمه انو احنا ماندري لحد مانلكة حل
باوعلي وهو عاكد حواجبه : بالله مالكينة نظل ساكتين
عبق : لاتخاف اكيد رح الكة حل بس خلي تمر هل فترة على خير وبعدين يحلها الحلال
هادي : هذا مو كلام عبق على حچيچ نظل ساكتين العمر كُله على عملته
عبق : لاتخاف رح الكة حل الي يرضيك ويرضي الكُل بس اصبر علية
هز راسه بدون مايحچي بس حمار عيونه يدل انه بعده عصبي رحت كعدت واني احاول الكة حل
مشى الوقت واني ماحاسة بيه باوعت للساعة صارت بال6 المغرب تأخرت كمت وكفت واخذت جنطتي ورحت هادي چان كاعد هو وأوسيد بالحديقة دا يسولفون هاي شوكت طلعو شوكت اجة أوسيد وكفت كدامهم وسلمت عليهم بعدين كلت
عبق : يلا اني رح اروح
هادي : ابقي فد شوية اوصلچ
عبق : لا لازم ارجع تأخرت باجر الصبح اجي ان شاء الله يلا مع السلامة
جاوبوني اثنهنم : الله وياچ
عفتهم وطلعت ركبت سيارتي وانطلقت متوجهة للبيتنا واني بالطريق اتصل تلفوني برقم غريب رديت عليه
عبق : الوو منو وياي
.......: اريد اشوفچ باجر الساعة بال4 العصر بال........ رح انتظرچ
عبق : دقيقة دقيقة منو انتَ وعلى اي اساس اجي اشوفك
......: ههههه تعرفيني تعرفيني حق المعرفة بس سؤال شلونها مرتي الحلوة
چان صوته مألوف سامعته بس على الرغم من وقاحته التمست بيه نبرة انكسار وحزن اصلا چان صوته مخنوك خصوصا من نطق اخر جملة
عبق. : احچي منو انتَ ومنو مرتك
......: شلونها توبة عبق
انصدمت من عرفته منو وكفت السيارة بسرعة كتله بغضب : لككك يانذللل ياخسيسسسس يافاسق ياعديم الرجولة من الله ماخفتتتت من سويت هيچ بالبنتتت بس فهمنيييي وين تروح من اللله لككك ليييش ليييش سويت هيچ بيها وكسرتها
احتقن صوته ورد علية بصرامة : شي ميعنيچ لاتتدخلين بيه باجر رح انتظرچ بالمكان الكتلچ عليه
كال كلامه وسد التلفون بوجهي شطتت من الغضب والعصبية دمي كام يفور لك شنو هل عين الصلفة شنو هل جرأة الله لا يوفقك ياحقير انوب يريدني اروحله
حركت السيارة واني اتحركن من العصبية بالكوة وصلت للبيت نزلت واني روحي واصلة لخشمي الي يطخني اعيط بيه شفت السيارات عرفت زاغو الحياية ملتم اليوم رح تصير عركة لا محال
دخلت للبيت ولكيت الحبايب كُلها ملتمة بالصالة وبيبي كاعدة بنصهن سلمت عليهم من بعيد وردت اصعد لغرفتي بس شلون يخلوني اصغد بدون تسميع كلام
حجت ام عمار وهاي مرة عمي : ايي حضرة المحامية داخلة البيت بالليل شعندچ لحد هسة براا
ردت عليها سعدية الحية الثانية : شتسوي خية غير تجمع حلوين وتضمن نفسها
رجعت كالت ام عمار : اكول صدُك هاي ..... ضامتها يمچ
عبق : ام عمار لزمي لسانچ ولاتتدخلين بشي ميخصچ
باوعتلي بيبي وأشرتلي اصعد حتى لا اتعارك وياهن استغفرت بسري حتى اهدئ واكمل طريقي بدون مشاكل بس ماكدرت بعد الي حچته سعيدة
سعاد : يعني صدُك هاي..... يمچ شتسوين مجمعة ال...... يمچ ماكافي عليچ انتِ وامچ انوب جبتو هاي وياچن
صحت بيها بغضب : سدي حلگچ ولاتتتجاوزين انتِ ببيتي احترمي نفسچ
سعاد : شبيچ عصبتي هاي الحقيقة ليش تضوجين من حقيقتچ
التفتت عليهن اثنهن وصحت بيهن : اسمعننن لجنن ترىىىى روحيي واصلة لراس خشمييي قسممم بالله التحچي حرففف اطلع حرگة گلبي كُلهااا بيهااااا سدننن حلگچنن واحترمنننن نفسجججن والشيبة البراسجننن احترمنها ولو ماكو شيب صابغاته احمر واخضر راجعات مراهقات حتى المراهقة تستحي تصبغ هيچ لون
وكفت سعدية مثل حية بوجهي وصاحت : انجبيييي لا اجييي افرررك حلگج بنت ال..... انعل امممچ على هيچ تربية سكططط طايحة الحظ راجعة بنص الليل وروحها بخشمهااا شنو زعلچ الافنديي ماقبل .............
غلطت وفشرت فشورة اكبر من راسها الدم صعد براسي وعيوني نطت على الحچي الحچته ركضت عليها وجريتها من شعرها اسحل بيها واعت بشعرها واصيح عليها
عبق : لجججججج انتتتتتتتِ الىىى متىىىىى تظليييييين هيبببچ ولللچ اني اشرف منچ ومن امثالللجج يا...... سمعتي لوووو لااا شعرة مننييي تسواچ وتسوة عشيرتچ كُلهااا راكضة وراية دورين وتبحوشين ومن ماتلكين شي تفترين عليييية
روحي لمي بناتتتتج روحييي شوفيهنننن شديلعببببن شيصخمننننن بدل ماكاعد تفتررررين علىىىى العالللم حقيرررة
احچي واجر بشعرها وهم لازميني يريدون يخلصوها مني بس وين اني عيد وجابه العباس منا محترك دمي من هذا الحقير وهاي الجلبة تجيب وتشمر تهايم علية عاد بردت گلبي بيها
بالموت يلا شلعوني منهاا اخذوني على جهة واني ادفع بيهم واصيح اريدهم يهدوني بس لازميني بكُل قوة وهي چانت كاعدة على القنفة ماتت الا شوية وجها كُله دم وعفشتها الصفرة مكفوشة وهدومها مكشوكة ورايحة روحها
رفعت اصبعي بوجهاا بتهديد وكلت بتحذير وشملت الكل : اسمعييي لچ هاي اخر مرة اسمحلچ بيها تحچين علية وعلى شرفي والحچي للكُل اكص اللسانه واشمره للجلاااااب الي يجيب اسمي واسم امييي على لساااااانه بالباااطل سمعتووووو
الكُل چان ساكت بس بيبي تباوعلي بعيونها وتهز براسها ماقابلة على تصرفي صرفت نظري عنها وابتعدت عنهم وصعدت فوك اريد ارتاح رح اموت من التعب
مليت منهم ومن مشاكلهم وكلامهم الما بيه معنى اني وين حايرة وذولة بيش يفكرون الف شغلة براسي اريد احلها والف شغلة عندي وهم وين تفكيرهم طبكم مرض شتفكرون فكرو محد يهمني
رحت سبحت مشطت شعراتي ورحت تمددت على السرير واخذني ملك النوم لرحلة طويللة
**************
چنت اركض بجنون من بين الاشجار واتختل بينهن ما اريد يشوفني حسيت بصوت اقدام متجهة بأتجاهي دكات گلبي الف نفسي عالي اتنفس بقوة احاول اهدي نفسي بس ماكدرت
صوت المشي صار كِلش قريب ماحسيت بنفسي وغير وانه اركض واركض مكملة طريقي مامهتمة للي وراية وبين ما انه واركض التفتت ليورة حتى اشوف اذا اكو احد وراية
من بين التفاتتي ارتطمت بشي مثل الجدار بشري سميك وكعت بالكاع من اثر الضربة حطيت ايدي على راسي ودحگت بغيظ هو من شافني ضحك على منظري وكالي
ساهر : كضيتتتتچ ههههههه
مدلي ايده حتى اكوم لزمتها وكمت وانه عاوجة حلگي بأنزعاج : وجعع كافي تضحچ المرة الجاية انه افوزن عليك
دفعني بأيده وهو رافع براسه بتعالي : كِل مرة تكولين نفس الشي وانه اهزمچ
مشيت وياه راجعين من حيث أتينا : انتَ غشاش بس تغش علي
ساهر : انه اغش لو انتِ
سلسال : انتَ
ساهر : امشي خلي نرد ماظل وكت حمدية رح تكتلنا
رجعنا للبيت وچان الكِل مجتمع كِل الحبايب احب هاي الجمعات كِلها ضحك وشقة ووناسة ناس طبية وعلى نياتها ماكو نفوس خبيثة بينا
شفت بابا متوسط الكعدة والكِل حوله رحت ادفع بيهم وكعدت بسده مثل كِل مرة وهو بالمقابل حاوط كتفي بأيده وباس راسي
يعقوب : شلونها بنيتي الحلوة
سلسال : الحمدلله بابا زينة
اجة ساهر وكعد بسد بابا بالجهة الثانية : يابة هم خسرتها اليوم
سلسال : باباااا هووو غشااااش يغش علية ويفوز
اندار بابا على ساهر وكاله : ولكك ليش تغش عليها
ضحك ساهر : هههه يابة ماغاش بس هي تخسر
يعقوب : بعد خسر نفسك وخليها تفوز
ساهر : ههههه حاضر يابة
ظلينا كاعدين نسولف ونضحك عمامي وخوالي كِلهم موجودين يومية بالليل نتعلل هيچ والكِل يتجمع ماكو تفرقة الحَب والكرزات والنمنيات نظل نتسلة بيهن لحد ما تصير ب12 وكِل واحد يروح لداره
رحت نمت بمكاني وانه كِلني امل بابا يقبل يخليني اروح للجامعة واكمل دراستي
هنا الحياة حلوة وبسيطة لكن عيبهم مايخلون البنت تكمل دراستها كِل تفكيرهم البنت مستقبلها يم رجلها هو يهتم بيها ويوفرلها كِل حاجاتها بس انه چنت اشوف هذا الشي خطأ ولازم البنت تكون معتمدة على نفسها ومتصير عال على احد حتى لو چان زوجها لازم تكون كد نفسها
من بعد ما خلصت دراسة الاعدادي بمعدل ممتاز صارلي فترة اقنع بأبوية حتى يقبل اروح للجامعة ويخليني اكمل بس هو قافل مايقبل خصوصا الجامعة الي اريد ادرس بيها بعيدة بغير محافظة وهذا الشي صعب الامر اكثر
نمت من بعد تفكير طويل وكعدت الصبح على ضوة الشمس وصوت العصافير كمت غسلت وصليت الصبح ونزلت جوة العائلة الكريمة كِلها كاعدة ابتسمت بأيجابية مثل كِل يوم ورحت صبحت عليهم
چان الكِل كاعد بالمطبخ كعدة عراقية اصلية القوري على النار وريحة البيض والخبز الحار هستوه طالع من التنور والوجوه الحلوة
سلسال : صبااااح الخيررررر
ابتسمولي وردو علية الصباح رحت جبت كلاصي واخذته وكعدت بسد ابوية هذا مكاني محد يكدر ياخذه
سلسال : صباح الخير والنور والجمال والسعادة على عيونك ياباشا
ضحك بهدوء وادرف : صباح الخير عليچ ام اللسان
سلسال : يابعد عيوني شعندي غير ادلل عليه خليني ادلل بجهاك ابو يوسف
مسح على شعري بحنان وكَلي : ادللي بوية ادللي
بعدني دا اسولف وياه وچان تدخل اختي العودة انتچيت على رجل ابوية وصحت : هلااا بالبكررة هلاا بالعودة عاش من شاف طولچ الحلو عيني وين غاطة
سميرة : انتِ العايشة عيني انه هيني انتِ ماكو لانشوفچ ولا ابد
اخذت كلاصي وشربت منه ورديت عليها : موجودة انه موجودة انتِ مامنچ خبر هذا صبيييح خذاچ منا
سميرة : هو وينه صبيح شايفته انه كاضيها بالزرع وويا صحبانه
يعقوب : ليش مايجي للبيت
كعدت ويانا على السفرة وردت على ابوية : لا يجي بس يابة مو مثل قبل يادوب نشوفه تي ويطلع حتى الاكل كام ماياكل يمنا
يعقوب : ميخالف ابوية انتِ غير عنده شغل
سميرة : يابة يا شغل هذا يجي العصر مخلص يبدل ويطلع ويا صحبانه يتونس ويتركني بالبيت مكابلة الحياطين
يعقوب : لا تكدرين خاطرچ اليوم احچي وياه
ابتسمت بفرح وكالت. : صدِك ياابة
هزلها راسه وردلها الابتسامة : اي ابوية انتِ چا شعندي غيركم
اجت وباست راسه وايده ودعتله بطولة العمر استغليت مزاجه الحسن وكلت هاي فرصتي خلي اطلب منه
سلسال : بابا
التفت علية وكالي : هااا بوية
سلسال : بابا انه مو بنتك حبيبتك الجميلة وماعندك غيري
يعقوب : والخمسة الباقيات وين شمرتيهن
سلسال : لا بابا شبيك هذن مو بناتك هذن تزوجن بعد خلي يولون
سميرة : شوف الحقيرة وانه كاعدة جدامها
يعقوب : شتردين احچيها من الاخير سلسالي
دحگته بعيون راجية وكِلها عطف وكتله : بابا اريد اكمل دراستي والله نفسي بيها شلون يعني
يعقوب : هم ردينا على نفس السالفة يا بوية جم مرة كِلنة ماكو دراسة ليش تعاندين
سلسال : بابا شبييك شنو ماكو شنو فرقي عن البنات مو دا يكملن دراستهن ويتوظفن ويتعينين بشهادتهن ويصرفن على نفسهن وما بحاجة احد
يعقوب : وانتِ هم مابحاجة احد كِل شي عندج وباجر عكبة تتزوجين ورجلچ يصرف عليچ
سلسال : ولييش يصرف علية ما اريدنه يصرف علي اريدن اصرف على نفسي بتعبي وعرك جبيني يابة ليش تخلي نفسي بيها وتحرمني منها وانه بنتك حبيبتك
يعقوب : سلسال سدي الموضوع
سلسال : بس بابا...
وكف حتى ينهي النقاش وكال : ام يوسف جيبي الچاي للديوان
برطمت شفايفي بزعل اوووف شيقنعه هسة بس بلحظة لمعت براسي فكرة وابتسمت بشر ههههه بسييط يا يعقوووب اتذكرت حيلة چنت اسويها من انه وبزر من اريدن شي وميقبلون بيه
ذبيت الاكل من ايدي وصعدت لغرفتي وشمرت نفسي على الفراش واتظاهرت بالمرض هاي چنت اسوي هيچ واكطع الاكل بس جذب جنت اكِل بالختلات واسوي نفسي رح اموت وهاي حتى يرضون
ظليت كاعدة للعصر اشو ولا واحد اجاني بس لا فشلت الخطة واني ودا افكر اندك الباب رأسا نمت وسويت نفسي ما اسمع انفتحت الباب ودخل ما اعرف منو بس من حط ايده على راسي عرفته
ساهر : سل هاي السوالف صارت قديمة
طگيت ايده وصحت : انچب وروح انده بابا كَله سلسال مريضة كِلش
ساهر : لا عيني انه ما اجذب
كعدت على حيلي وخزرته : ساااهر
ساهر. : وجعع ما اروحله
وكفت على ركبي واني اتوسل بيه برجاء : حباب حبااااب عليك الله روح اندهله وكَله سلسال مريضة مدري شبيها من الصبح لسة نايمة
ساهر : شني المقابل
سلسال : الي تريده
ساهر : افكرر
سلسال.: ساههههههر
ساهر : ههههه ماشي ماشي بعدين نتفاهم على الاريده
دفعته حتى يطلع : ميخالف بس روح
طلع وسد الباب وراه واني رجعت سويت نفسي مريضة ورا عشر دقايق رجع الباب اندك وانفتح بنفس الوقت ودخل من عطره عرفته
ولا تحركت سويت نفسي ميتة كعد يم راسي وهو يمسح عليه : بوية سلسالي
ماحچيت رجع كالي : سلسل ابوية انتِ شبيچ
ونيت بوجع وكتله : رح اموت مريضة انه
يعقوب : اسم الرحمان عليچ بنيتي كومي اخذچ للدكتور
هزيت راسي برفض وكتله : لاا ما اريد ما اريد اريد اموت وارتاح
يعقوب ،: ليش بنيتي شبيچ
سلسال : انتَ متحبني وتمرضت من وراك
يعقوب : افااا من وراية ليش
سلسال : تعرف ليش
ضحك بهدوء وكالي : يعني هسة انتِ مريضة عبن ماخليتچ تروحين جامعة
سلسال : ايي
يعقوب : واذا قبلت ترحين تصيرين زينة
سلسال : ايي
يعقوب : چاا خوش ظلي مريضة
وكفت مصدومة ودحگتله بأستياء : بابااااا
يعقوب : ماشاء الله بنتي صحيتي عين النبي عليچ
سلسال : بااااابا شبيك والله ازاعلك وبعد ما احچي وياك
يعقوب : بوية انتِ على شنو تزعلين جاينكلِچ مايصير ليش تعاندين
سلسال : بابا شنو لاا جاي اكلِك انروح انه وساهر وكِل اسبوع انه يمك هناا اكابلك واكعِد هن خمس ايام بس وهذا سهيررر يمي
يعقوب : هو سهير يرادله واحد يهتم بيه
ساهر : يابببة گلبت علية انوب
لزمت ايده برجاء : بابا حبابب هيچ كِلها اربع سنين وتخلص وبنتك تصير خريجة وترفع راسك والله والله اروح بدربي وارجع بدربي ماعلية بأحد ولا احچي ويا احد بس ويا ساهر واكعِد بس اقرة ما اسوي اي شي وكِل خميس اجي لهنا ما ارجع للسبت هاا بابا شكلت
يعقوب : بنتي مو هاي الشغلة انه اثق بيچ ماتسوين شي غلط بس اخافن عليچ شلون ترحين هناك ناس غربة لا احنا من ثوبهم ولا هم من ثوبنا
سلسال : بابا كِلنا عراقيين شني مو من ثوبنا وانه معلية بيهم كِل من حر بنفسه وانه رح اسوي الي علمتني عليه والربيتني عليه وما اكسرلك كلمة واذا صار شي رأسا اخابرك والله حباااب حباااب لاتكسرني حباااب
يعقوب : ولچ ابوية انتِ مايصير
سلسال : حباب لاتكِلي مايصير اقبل اقبللل
اتنهد وباوعلي وابتسم : شلون وياچ وتالي ويا بزر الكعدة ميخالف بس هااا اي خطأ ترجعين هنا وتسكتين
حضنته بفرح وكلت بضحكة : اي اييي والله ما اسوي شي يزعلك
كمت اكمز من الفرح طايرة ما اعرف شسوي وساهر يضحك علية چان احلى يوم بحياتي وچتن احلى شي صار من وافق بابا على دراستي بالجامعة فرحتي بهذا اليوم ماتنوصف احتفلت بيه وسويت وليم على شرفه
انتهى اليوم على مخدتي واني اخطط وارسم مستقبلي بأيدي بس مو كِل شي يحلم بيه الانسان يصير ولا كِل شي يخطط اله يتنفذ چان لازم اعرف انو مو كِل مرة لازم نعصي كلام الكبار واحيانا كلامهم وخوفهم علية صح وميصير نعترض عليه بس فات الاوام لهذا الحچي .......
***************
ولنا في الخيال حياة
***************
اتنمنى يكون البات نال اعجابكم انتظروني ببارت الجاي احداث جميلة ومشوقة. كانت وياكم تختكم الماس K.T
لاتنسون التصوين فضلا وليس امرا ⭐⭐⭐⭐
قناة التلي
https://t.me/tasow25724
**********
الى اللقاء....