#قناص_بغداد(مُهمة_وطن)
البارت الواحد والخمسون
بـقلـم: زيــنب عــلي
حبايبي لا تنسون التصويت + متابعة الحساب zainab_ali1 + تعليق بين الفقرات ♥️
Instagram: zainab__.ali1
TikTok: zeinab_.ali1
عوف كل هاي الأذيه
أنتَ ماگلك ضميرك؟
انا ما استاهل السويته بيه!
تندمت لو ما مقربك
بده تعبي من گلتلك أنتَ مو مثل البقية
السواد الشفته منك
صار ع أيام طاغي
والاريده وياك صفقه
انا اطلع من حياتك وأنتَ اطلع من دماغي
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
صـيـاد ...
اشتعل الغضب برأسنا ثبت عاشور السلاحين گدامه ويرمي بيهم ثنينهم عمر وعلي لازمين الخط الخلفي قناص يرصد من فوك
-عـاشور: نصر من الله وفتح قريب يالله
ظلينا بهاي الحالة ما أعرف شگد من الوكت مر لحد ما هدأ الرمي فجأة وسكنت كل الحركات همَ برا واحنا متحاصرين جوه ما يگدرون يدخلون لأن ما يعرفون عددنا وما نگدر نقاوم آكثر إعدادهم صح قلت بس بعدهم آكثر من عدنا
صار وكت غروب بدت الدنيا تليل ما حسيت غير عمر شال القاذفة وطلع بسرعة وصاح بينا
-عـمـر: اااررجعوا ورا بسرعةةةة سيدي انسحب للخلللللففف
منظره وشجاعته ومقدامه ما يرحن من بالي طول عمري
طلع عاشور من الخندق ويرمي بـ أثنين أسلحة طلعت ويا احمي عاشور من وره
اسمع صوت علي صاح
-عـلـي: عمرر ولَك ارروجعععع لا تموت سيدي اسحبه سيييددييييي لا تخلي يتقدم
وين هو ما ينلزم صرت أشوف الدواعش و أحد ورا واحد يطيحون ومحد يگدر يرفع رأسه ديوان بالقناص خلاهم يندفنون بالگاع مثل الجرذان شد عليهم شدة وحدة
انسحبنا نركض وعلي ركض بتجاه عمر الي ضرب القاذفة عليهم وطاح لأن قريب من المدى صاح عاشور بقهر
-عـاشور: ولَك علي انسحب راح تموت
من قوة الضربة صار اكو صفير بـ اذاناتنا وهدوء نسبي عم المكان شفنا طلع من كومة الدخان يركض وعلى ظهره عمر كله دم
شايله ويركض بي رحت يمه و گلتله بسرعة واحنا نركض
-صـياد: عايش بس گلي عمر عايش
ما يجاوب عاشور بظهرنا يركض بشكل عكسي خاف يصير رمي هو يدافع وديوان من فوگ
يركض ويبچي ويشهك
-عـلـي: أيّ أيّ بي نفس بس لا يموت والله اموت وراه اخوي هذا سيدي أنقذة فدوة بس خليهم يجيبون دعم ينقذونه الله يخليك والله بعده بي نفس
شال عاشور جهاز المناداة وصاح
-عـاشور: راححح نموتتت محاصرين احناااا طلع قوة مروحية أيَّ شي اتحركككك
اجاه صوت يگله بكل برود
- قاوم حاليًا ممنوع أيَّ طائرة تطير تقصفها قوات التحالف
صاح بي
-عـاشور: طلع قوة برية شوكت ما يوصلون يوصلون ما عدنا طاقة بعد نقاوم أكثر هم بيهم عشرين أكثر واحنا بس خمسة واعدادهم بتزايد
آخر كلمة سمعناها من الجهاز
- قاوم على ما يجينا أمر بالتحرك
وانغلق بعدها صاروا ما يردون أبد نزع على غترته وصار شگگ بيها اذتها منه وصرنا نشد بجروح عمر
عاين عليه علي گال وهو يبچي
-عـلـي: سيدي نفسه صار قليل راح يموت
شديت على ايده وگلت بحزم أرفع من معنوياته
-صـيـاد: بطل مراح يستسلم بسهولة وإذا ما لحگنا نسعفه المفروض تفرح عضيدك راح شهيد هنياله طلبها ونالها
من گلت هيچ عمر حرك ايده بعلامة نصر حضنها علي وصار يبچي حيل ينحب شال بطل المي وصار يغسل بوجهة ، فزيت على صيحة عاشور
-عـاشور: صياااااددد گوممم ساعدني راح يخلص العتاد
گمت بسرعة وگفت من جهة الشباك الثاني وصرت ارمي عليهم وعلي تمدد وخلا عمر على رجله وصار يضرب من الباب الأمامي ، ما عدت غير ثواني ونزل ديوان من البرج دخل بسرعة من الباب الخلفي من التعب ياخذ النفس بصعوبة
التفتله عاشور يحچي بصوت عالي حتى يسمعة
-عـاشور: ليششش عفت موقعكككك
گال بـ آسف
-ديـوان: خلصت عتاد
سحب عاشور مسدس من حزامه وشمره عليه وهو يحچي
-عـاشور: على كيفك ويا ترى ما عدنا عتاد بس هذا
انبطح بص علي وصار يقاوم صارت ظلمة ومازلنا مقاومين الوضع يهدأ شويه ويسكت تصير سنطة ويرجع يشتد رغم قلتنا وقلة العتاد واقرب همر علينا مستحيل نوصلها واصلًا هم كل شوية يدكونها بمدفعية او قاذفة بس قاومنا
شوية وهدأ الوضع گعدنا نرتاح ماكو أقل الساعة ورجعنا تعرضنا للهجوم للمرة الخامسة
عاشور بس رمى مرتين خلص العتاد مالته واصلا بعد ما عدنا غير الي بدينا اباوع عليه گعد وتچه روحه على الحايط وصار يفصخ بسلاحه يشمر بي من الشباچ بأماكن متفرقة وهاي حركة يلجأ الها العسكري من يعرف بروحه راح يصير بالاسر او يستشهد حتى العدو ما يگدر يستفاد من سلاحه وياخذه
رفع جهاز المناداة وگال بغضب
-عـاشور: راح نستشهد بس شوفوا اگللكم كلمة وحدة استسهادنا راح يصير بصمة عار بگصصكم يا جبناء يا خونة خلي يكتب التاريخ أستشهد ٥ عناصر من القوات الأمنية الوحدهم بنص هيمة خاضوا معركة بطويلة من الساعة ٢ الظهر للـ ٨ بالليل وهم ما وياهم غير سلاح نوع واحد وعتاد قلقل وبطل مي أبو الخمسمية دينار فقط يا ****** يا سفله
شمر جهاز المناداة صحت بقهر
-صـيـاد: ماكو عتاد راح يخلص عاشور
غمض عيونه ساكت صاح بي ديوان
-ديـوان: شنو استسلمتتتت راح نبقى هنا گوموااا يلااا خلي نتحرك نطلع من هذا المكان
-عـاشور: الظاهر أنتَ ما تعرف إحنا بيا منطقة هسه ديوان إحنا بنص داعش بنص اسخن نقطة معارك بالعراق
-صـيـاد: وشنسوي لازم نتحرك
-عـاشور: وين تترك ويييننن ما تگدر تطلع الا تطير هم ضحوا بينا وخلص بعد
استغليت الهدوء الصار ورحت ساعدت على سحبنا عمرالي خسر دم هواي تجينا على الحايط ما نريد الأوكسجين يخلص بجسمه
مرت تقريبًا نص ساعة عتاد ماكو بعد خلصنا ما بقى موجود غير مسدس عاشور الي بيد ديوان وسلاحي ومسدسي انطيته العاشور يرمي بي
الباقي كله فصخنا وشمرنا سلمنا امرنا الرب العالمين وتوكلنا عليه ماعدنا غير حل بس الصار ما اعرف شلون صارت معجزة ووصل نداء بالجهاز ماجد يحچي
-ماجـد: اتجهزوا راح توصلكم مروحية عسكرية هسه سمحوا للطيران والطائرات تحلق بسرعة اتجهزوا
ابتسم عاشور بستهزاء ثواني وصارت طيارة فوكانه بس ما رمت طلقة وحده وحتى نار ما فتحت بسرعة طلعنا نزل منا الدرج صعدت وديوان شال عمر لأن بنيته أقوى وصعده ويا وصعد ورا علي وعاشور بعده جوه يرمي صحت بي
-صـيـاد: ولك أصعد راح نموت أريد ننفذ هسه أيَّ واحد يرمي علينا نطيح احنا وطايره اصعد
وهو فاصل يرمي صاح ديوان بضوجة
-ديـوان: دصعد وعوفه أصعد مادري يرمي عليمن هسه يسطرونه بقاذفة يسونه لحم مثروم أصعد
نزلت سحبته صار وهو يصعد بيد ويرمي بالايد الثانية صعدنا بالطيارة كلنا وصعدت تنفسنه بتعب تجيت راسي على زند عاشور وديوان يعالج بعمر يسويله اسعافات أولية ، اعاين على حالنا ما ننشاف من التراب حتى رموشنا تنكت
گال ضابط جان منتظرنا فوگ
-سـيـف: حي الله جنود المكافحة عشتوا أبطال سويتوهم طشار خمسة بس سويتوا شغل عن فوج كامل
-عـاشور: يحي اصلك يا بطل تسلم شلون وصلك النداء
-سـيـف: الأمر العام عرف أنتم الثلاثة بهاي المهمة وطلب بـ إنقاذهم بـ أسرع وقت ما تتخيل شلون گلبهم گلب حتى يسمحون للطيران بالتحرك لعب جولة واصلًا هذا المكان خطر جدًا وهاي من المناطق من ضمن التمشيط الي المفروض يجون تدريب وجيش كامل مو خمس نفرات هاي منطقة حجر الدواعش اصًلا أستغربت انتم هنا شجابكم
هز رأسه عاشور بتوعد
-عـاشور: موش عاشور صقر الجنوب الي يضحون بي سهلة أرجع ويصير خير إذا ما حصل عقوبة من وراي انه كلشي ما افهم
عاينتله وأفهمت كلشي ماجد مدفوع وراد يضحي بينا بس لحمنا مر والله ناصرنا ظلينا تقريبًا نص ساعة وصلنا المنطقة المركز نزلنا بيها جانت أمانة وبعيدة كلش عن مناطق التحرير عالجنا عمر واسعفنا بسرعة حالته چانت مستقرة بس الولد نزف دم هواي راد يموت من ورا النزف بس الحمد لله قدر ولطف بحالته
ظلينا گاعدين فترة راحة چنا ميتين من التعب ومخلصين طاقة مرت أكثر سبع أشهر واحنا هذا الحال وهسه تحررت الگاع بس خساراتنا چبيرة
-عـاشور: أريد تتمشط كل المنطقة الچنا بيها وتنقلون كل الشهداء الي شفنا جثثهم هناك بأسرع وكت
گله العسكري بـ آسف
- مستحيل نگدر نتحرك الا بأمر قائد العمليات
حچاها وعافنا وطلع گال ديوان بحزن وهو يدخن
-ديـوان: إذا رجعت الگاع شهدائنا منو يرجعهم إذا رجعت الأبطال لـ بيوتها أم الشهيد تتلگه منو وتحضن منو يا ترى ؟!
تجه رأسه عاشور وهو يلهث والعبرة خنكته
-عـاشور: ولدي نصهم تكتلوا كل جنودي الي اشرفت على تدريبهم بنفسي ضحوا بنفسهم نقتلوا بدم بارد كل ما يطيح وأحد منهم يطيح حيلي ويا شگول الامهاتهم شلون إسلامها جثته وهي كل فجرية هي تشهك الربها يرجع سالم وتقر عينها بي شلون ؟
باوعنه اله بحزن وقهر فقدنا هواي من اصدقائنا ومازلنا نفقد
علي ورا عمر نقلوا مستشفى لأن متعرضين الاصبات وهم صار ينزف
گام عاشور عيني عليه شفته طگ رگبته وسحب سلاحه وطلع ركضت ورا بخوف من الي بعقلة
-صـيـاد: عاشور وين رايح وشتريد تسوي
عافني ودخل على مسؤول القوات الي هنا وضربنا تحية
-عـاشور: احترامي سيدي
هز رأسه ياسين وگال بـ أبتسامة
-يـاسـين: اهلًا بصقر الجنوب مو المفروض ترتاح أبني طالعين من الموت أنتم
-عـاشور: أريد أنقل الجثث الي جانت بالموقع المحاصرين بي سيدي بي أكثر من عشر من أبطال من الحشد الشعبي وأريد انقلهم
عاين عاقد حاجبه
-يـاسـين: شلون المكان كله دواعش شلون تريد تروح عاشور هاي مخاطرة بنفسك وبالي وياك
-عـاشور: و انه أتحمل كافة المسؤولية ماريد أيَّ شي غير أنقل الجثث
هز رأسه وخابر طلع العاشور جنود وفعلًا راح عاشور و انقل كل جثث أبطال الحشد الشعبي وتسلمت الجثث لجهات المعنية
ورجعنا ناخذ مهمات عن التمشيط و ماكو أيَّ وقت للراحة والفراغ حتى نتأكد من المناطق بس أكيد العراق مايخلص من داعش
مر كذا يوم چنا گاعدين وقت إستراحة بس رمي فوگنا طبيعي گلت الديوان وانه أمسح أيدي
-صـيـاد: شلون طلعت من المهمة ؟؟
-ديـوان: سالفة طويلة
-صـيـاد: سولفلنا دام گاعدين وساكتين
ورث جگارة انتجه وبدأ يحچي
ديـوان ...
أطلقت صافرات الإنذار بداخل مقرر الدواعش معلنة عن وجود حالة هجوم
سحبت سلاحي وجنطتي وعلگتها بظهري وربطتها بخصري حتى ما تفلت طلعت وشفت الكل بحالة إنذار قصوا صرت أركض و أفتح بـ الزنازن
و اصيح
-ديـوان: بسرعة طلعوا منا بسرعة توجهوا للبوابة بسرعة
شافتني وحدة من انكس خلق الله رات تصرخ ركضت عليها ضربتها بالسلاح على رأسها
-ديـوان: موتي لعنة الله على روحچ الوصخة طلعت بيهم من زنزانه بـ أسرع وقت أطفال وبنات ولد ورجال كلهم
فرغت هاي الزنانة ركضت شافني وأحد منهم النگسين
-التحق بالمجاهدين جيش العراقي هجم على المقر
ركضت بسرعة وثبتت بگلبه خنجر وسحبته حيل وركضت لـ الزنزانة الثانية چانت مال ولد كلهم محبوسين ومتعذبين
صحت بيهم
-ديـوان: بسرعة الجيش العراقي صار قريب راح يقصفون المقرات لـ التحرير طلعوا ورحوا للبوابات بسرعة راح ينقذوكم هناك اتحرك اتحرك
ملامح الصدمة وهمَ شافوني لابس ملابس داعش
-ديـوان: بسرعة ماكو وقت لـ الصفنة بسرعة أطلع اتحرك اتحرك
لحد ما طلعوا سديتها وركضت على الأطفال ما اگدر اطلع اعوفهم وراي أشوف بيهم غزولة هم طلعتهم بصعوبة اني والولد ننقل بيهم لحد ما طلعناهم كلهم صاروا البنات گبالهم
-ديـوان: كل وحدة تلزم الها طفلين و اركضن بسرعة بسرعة طلعنا من المكان أباوع الهم كلهم اخذوا طريق الخلفي مو طريق المواجهة الحمد لله
ركضت وراهم و اصارع الوقت بس أقل ضربة عدنا وقت كلهم يموتون
صحت بصوت عالي
-ديـوان: اتحرك اتحرك أسرع
شفت طفلة وگعت روحي أحس وگعت وياها ركضت عليها شلتها واني اركض وهي تبچي والبنات يبچون ويسحبون بالجهال حالة فوضى عارمة احتلت المكان وهم النگسين مدري وين اختفوا مثل الجرذان بالجحور
طلعت روحي لحد ما طلعوا خابرت على المسؤول عن إنقاذهم
-ديـوان: سجاد أستلمهم كلهم طلعوا
-سجاد: هذول همَ يمي هاي هي صاروا بأمنتنا اطلع ديوان أنكشف كلشي بسرعة اطلع منهم
-ديـوان: طالع لحظات وارجع روح ودير بالك عليهم
بسرعة بسرعة رجعت أركض بسرعة لأن أعرف الطريق الي راح يهرب منه أبو قتادة أخذت ثلاثة من الضباط الموجودين بالداخل وتوجهنا بسيارتي شفت سيارته على الطريق
طلعنا اني من جة و ضابط ثاني من جة والهدف هي تايرات السيارة صار يرمي لحد ما ضربناها ونزلنا عليه سحبنا وهو يصرخ ويعيط صاح بي الضابط
- دكافي سطرته لـ رأسي بعدك ماشفت شي يا عيني دخلي نوصل راح اخليك تصرخ من صدك وكتها
طلعنا بالسيارة وصلنا النقطة الي سيطر بيها الجيش بالكامل وسلمنا أبو قتادة بعدها اجاني نداء من ماجد التحق بيكم واجيتكم
-صـيـاد: تدري أنتَ تستاهل ينگال عنك الشخص المناسب بالمكان المناسب
گام صب چاي وهو يحچي
-ديـوان: رحمة الله على والديكم خلصوني بعد لا شخص مناسب ولا مكان مناسب اني رجال مواطن حالي حال الناس مو عسكري
-صـيـاد: صدگ أنتَ شجابك بنصنا
-ديـوان: حظي المصخم غير
-صـيـاد: لا صدگ شلون أستلمت المهمة وأنتَ مو رجل عسكري
عدل شواربه وگال بضوجة
-ديـوان: اذا ما مقدر أكثر من 15 سنة تدريب بأمريكا قدر واحترم غيرتي على بلدي احترم شواربي على الأقل
ضحكت وحچيت
-صـيـاد: ها نسيت أنتَ أمريكي اعذرنا مستر داون
أخذ رشفة من گلاص الچاي گعد وهو يحچي
-ديـوان: بآخر فترة صاروا اكو جماعة من داعش يترددون عليه بحجة الشغل أول مرة بعدها صار أكو كلام ومخططات خفية وتلميح على ابو أنتَ بطل وحاربت الإحتلال واخذت مهمة سرية بين صفوفهم وهسه اجه دور تكمل مسيرتك وتحارب الطواغيت اني هنا فهمت الطبخة شنو وقررت اسايرهم
-صـيـاد: أكيد رحت بلغت
-ديـوان: أيّ وچلبتوا بيه يلا اجوك برجليهم أخذ المهمة لبستوها الي وخليتوني واني كلشي ما مفتهم
ظلينا گاعدين انه وديوان نسولف طب عاشور يحچي
-عـاشور: عمر وعلي طلعوا قبلنا نزلوا الاهلهم الحمد لله كلشي مابيهم سالمين
-صـيـاد: الحمد لله
-عـاشور: بس إحنا ظلينا و جاي نحضر راح نروح بالسيارة
تنهد براحة واخيرًا راح نرجع هاي الفترة كلها لا حچينا ويا أهلنا ولا فتحنا تليفونات أبد بسبب انشغالنا و اساسًا يادوب نلگه وكت تغمض عينه بي
خذيت تليفوني وطلعت گوة لگيت تغطية دگيت عليها بس فتحت خط تحچي بلهفة
-سُـمانه: حبيبي صيادي
-صـيـاد: طيوري ياروح صيادج ولچ مشتاقلچ
سمعت شهگتها گامت تبچي روحي تگوم تفرفر وتفرفح كلشي ولا دموعها
همست بصوت مخنوگ
-سُـمانه: والله راح أموت گلبي راح يطگ عليكم شوكت ترجعون
-صـيـاد: طيوري السائبة حضريلي حضنچ ميت من التعب واريد أرتاح بحضينچ
سكتت شويه تتنفس سريع بعدها گالت
-سُـمانه: صياد أنتم راجعين
شفت ديوان تعداني يمشي وتليفونه على أذنه
-صـيـاد: بس حضريلي حضينچ منا للعصر تفهمين
رادت تحچي ما لحگت تليفوني طفه شحن ونريد نطلع مو مال اشحنه هسه حطيته بجيبي
وطلعنا راجعين البغداد صعدنا بس ديوان جان يخابر بالسيارة انه أسوق لان عاشور رجله متصوبة كالعادة
تمدد ورا ويمسح على كشنات السيارة ويحچي
-عـاشور: حبيبي رامي شتاقيتلچ بنوتي
هزيت أيدي بحركة ما عاجبني گال بضوجة
-عـاشور: وين چنت ؟
عاينتله بالمرايا وگلت بخبث
-صـيـاد: چنت احچي ويا أختك
ضربني حيل رجعت حچيت
-صـيـاد: كلتلها حضريلي حضنچ يا بويه اريدن أذب التعب كله
صاح بيه بعصبية
-عـاشور: نچب حيوواننن والله ما اخليك تلمس شعراية وحده منها
هزيت رأسي احچي
-صـيـاد: أيّ نشوف
صعد ديوان وهو يسد تليفونه وسد الباب تحركت ضربه عاشور على جتافه حيل
صاح بألم
-ديـوان: اخخ مو متصوب بجتافي شگد همجي
-عـاشور: عطلتنا
التفت عليه سألته
-صـيـاد: وين چنت
-ديـوان: احچي ويا أختك
بعده هسه نطقها ما حسيت غير عاشور انفجر بالضحك
-عـاشور: حيييلللل شفت خايب كما تدين تدان
مسحت على وجهي وعاينت لـ ديوان يضحك بخبث ويحچي
-ديـوان: أنوب أختكم شلون صوت عليها يخلي روحي تطير مني أمشي بسرعة ولَك صياد خليني أوصل
اتوقعت عاشور يغار أو يغضب بس بالعكس چانت ردة فعله طبيعية ضحك بدون صوت وگال
-عـاشور: لا تعيدها مال أختكم لا و أبو رأس الحار اشمرك من السيارة شگد مقرفة من يصير صديقك رجل أختك يكرهنا باليوم الي نطيناه بي بنتنا
ضحكنا وظلينا نحچي عن مواضيع الحب
-صـيـاد: الحمد لله من تريد تتغزل بيه تگلي همجي عود يعني هي هيچ واصلة أعلى مراحل الحب لو تگلي هسه افگس عينك وهاي افگس عينك بمعنى متسرسحة عليّ
-ديـوان: زين لعد مرة اني بدلت وكشخت دزت ڤويز السمانه تگللها بي شسويله هسه اشمره من فوك الدرج لو ارگع رأسه بالحايط طالع يموت وتحچي بصوت ناصي عود تستحي تگولها گدامي
عاينت العاشور مبتسم ومدنك رأسه جريب حسرة طول عمره معلعل ومشلوع گلبه التفت عليه ديوان يحچي
-ديـوان: شو خانس لو رحت يم الشامية ؟
غضبت ملامحة بأسف وجر حسرة
-عـاشور: خليها سكته أحسن
عاين له ديوان عاقچ حواجبه رد عاين عليه وگال
-ديـوان: شكو شبيك شصاير عليمن سكتة وين تلگه أنتَ مثل روڤان لو تفر العراق كله
ضحك بـ استهزاء
-عـاشور: صح وين الاگي هيچ نثية تتعاون ويا إبن خالتها الداعشي حتى تنفذ بيه مهمة وتكتلني
ما حسيت غير ديوان شمر عليه بطل المي وصاح بي بعصبية
-ديـوان: شجاي تحچي ولَك عاشور يا روڤان الي تريد تقتلك هي نفسها الي طلعتها من نص داعش ؟
رد عاشور بضوجة ونترة
-عـاشور: ليش أكو غيرها مثلًا أيّ هي الي ضحت بيه بهاي أذني سمعت تسجيل كامل وهي تحچي شلون تريد تكتلني وتخلص عليه وهم شفتها وهي تصعد ويا ومن لحگتها و وراها من اجيتك حتى تنقذها وأنتَ بالطريق ندزتلي رسالة لأن أنتَ رحت الها سوو خطة ثانية وهي تطلع تكلتني وترجع بس خافت تنكشف
عاين له ديوان فاتح حلكه وعيونه بكل وسعهن وعاقچ حواجبة بغضب
-ديـوان: شجاي تمسلت ؟ روڤان هددها رومانيو يا تروح ويا يا تختار بين قتل أهلها يا تنقتل أنتَ بمكانهم وضحت بنفسها علمودك وراحت ويا علمود تحميك منه والتسجيل هو مفبرك ومابي ايَّ صحة ومن وصلت الها وياي شاركت بتخليصي من داعش لو ما هي وياي چان اني هسه بخبر كان عاشور شجاي تحچي ؟
گعد عاشور عدل واتقرب يمنا وجهه صار أصفر
-عـاشور: أنتَ وين تعرف شدراك بهذا كله وشنو الي يثبت هذا الكلام صح ؟
طلع ديوان تليفونه وصار يشوفه ويسمعه حچي رومانيو وياها لأن هي مسجلة حتى تهديده قبل ما ياخذها الداعش كلشي مصورة وموثقة ذكية !!
باوع عاشور الديوان بصدمة وگال بخنگة والعبرة خانگته
-عـاشور: يعني شنو چا ليش من طلعت اشرت عليها وگلتلي دير بالك على روحك كلش زين عبالي تعرف بيها وجاي تحذرني ؟؟
ضرب ديوان على رأس عاشور وگال بقهر
-ديـوان: ولك روڤان ضحت بـ أهلها في سبيل تحميك خلت رومانيو يروح الاهلها حتى يبعد عنك روڤان ضحت بكلشي الخاطرك عاشور
ضرب على گصته حيل ورد ضرب على رأسه وهو يأنب بروحة
-عـاشور: شسويت شسويت بيچ شسويت روڤانتي شسويت
جره ديوان من قميصة وگال بغضب
-ديـوان: روڤان وين عاشور لبنية ملاحقة من داعشي معقولة مخليها هيچ بدون حماية ولا شي ؟
گال و عيونه غورگت بس رفضت دموعه تنزل ومانزلت دمعة منه دمعة
-عـاشور: شلته الي المفروض يحميها وخليته الها شلته نقلته عافها من يوم الي رجعتها الي وانه خليته يعوفها وما اعرف عنها أيَّ شي ديوان شلون
نتره ديوان ورجع عدل گعدته وگال بحيرة
-ديـوان: لبنية وين عاشور گلتلك دير بالك على روحك وقصدتها بروحك توقعتك راح تفهم أن هي بخطر شلون عفتها من سلمتها الَك ولك رومانيو چان يلاحقها عقلك وين شلون عفتها ومن صلتها للبيت جان أمان لاحظت شي ؟
عض على شفته وهو يشهك بنفسة گال بصوت خافت نادم
-عـاشور: عفتها بنفس المكان الي وصلتها أنتَ بي عفتها ومشيت بسيارتي وخليتها وراي بدون أيَّ أحد بنص الچول وحدها خليتها
حط ايده ديوان على حلگه يدخن وصفن گلتله لأن حسيت حالته تدهورت فد مرة
-صـيـاد: لبنية رجعت البغداد مابيها شي سمسمه تعرف كل أخبارها هسه بس نوصل روحلها
-عـاشور: بس سوت حادث واضح هسه منو السبب حچيت وياهم من طلعت من المستشفى شنو صار بعدها صياد !
گلتله بتلعثم وحتاريت شگول
-صـيـاد: بعد ما سألت ما صار مجال ماعرف وضعها بس أخير شي گالوا الي وضعها خطر الضربه مأثرة على رأسها
باوعلي وفتح عيونه
-عـاشور: مو گلتلي حالتها مستقرة ومابيها شي وطلعت بنفس اليوم جرح ما بيها !
-صـيـاد: خفت عليك جان لا وضعك الصحي يسمح ولا النفسي اضطريت اچذب عليك بس الصدك لبنية سُطام گال فد مرة ويا تفقد جزء من بصرها أو ذاكرتها أو تتوقف أحد أطرافها
گال بهدوء وصوته شح بعد ما طلع
-عـاشور: وگف السيارة صياد ونزلني وگفها
بسرعة طبگت وگفتها فتح السيارة و نزل منها حنه ظهره ونزل رأسه يتنفس بصعوبة ويشهگ بالنفس
سندته احچي بخوف
-صـيـاد: شمَالك عاشور أنتَ زين
نزل ديوان انحنه بموازاته
-ديـوان: عاشور تغسل وجهك شبيك
فتح دگم القميص وگال
-عـاشور: احس اختنگت ضاگت بيه الوسيعة حتى الچول وهاي الصحراء والسعة حنگتني النفس شح من صدري شح
ظل يروح ويرجع مرت ساعة وهو على هل حالة يتگلب على نار عفنا على راحته لحد ما تعب كلش
باوع النه وگال بتعب
-عـاشور: خلي نرجع البغداد يالله بسرعة خلي الحگ
صعدنا وهو فتح تليفونه لأول مرة من رجعنا لليوم هو غالقه ، عاين بي وعقچ حواجبه عض على شفته وغمض عيونه بقهر وجهة صار أحمر وعيونه قطعة دم
گال بهمس
-عـاشور: احتركت روحك عاشور بهاي الساعة وبكل ساعة على عملتك المصخمة مثلك
اشوفة يهز برجله بتوتر وتليفون على اذنه مادري يدگ عليمن
گال ديوان وهو ياكل
-ديـوان: لا تحاول مستحيل ترد هاي إذا اصلًا لگيتها تعال عاتبني صقر الجنوب
-عـاشور: تعرف شي ؟
هز رأسه بمعنى لا
-ديـوان: بس شي بديهي يعني متوقع تگلك أو بيبي تعال بحضني بعد ما طيحت حضي شبيك عاشور شغل عقلك
اسرعت وهو ظل الطريق كله يلوم على نفسه ويحوس ما مرتاح و إحنا ساكتين و مقهورين على حالته الطريق كله يتصفن وعينه على الشارع و كأن يدور عليها بوجوه العالم وصلنا للمقر الي بغداد نزل ديوان ونزلنا ورا
شافنه الأمر مالتنا ضحك
-حسين: اهلًا بالسباع اهلًا بالحرروا گاعهم ورجعوا هيبتها هلا بولد علي الكرار وليس الفرار طبتم وطابت سواعدكم البطلة
ضحك ديوان وهو يتجي روحة على اليدة مال القفنفة حچه
-ديـوان: عيني اغاتي الله بالخير عليكم اولًا وثانيًا رحم الله والديكم لا تدزون عليّ بعد ادري تورطت گلتلكم اجوني داعش تورطت خبرت ردتكم عون طلعتوا فرعون گلتلكم يمعودين داعش يتردد علي بدال ما يحموني يگلولي أيّ قناص بغداد أخذ المهمة فرصة واجت بدون تعب وتخطيط منا
ضحكنا من كل كلبنا يحچي بضوجة ممزوجة بضحكة
-ديـوان: والله شبيكم تضحكون ترى لو أريد اطب كليه عسكريه واشتغل ضابط بس ماريد هسه كل ما صار شي تعال يا ديوان وشيل مالي علاقة يغزونه مدري منو مالي علاقة هسه شمستفاد اني عمي والله محتاج وأحد يحميني مو احمي الناس
-حسين: تدلل راح أروح أنا وياك بنفسي البيتكم لأن طشت سالفة على اساس أن أنتَ داعشي وهاي الأمور وياك فوج مرتب نوصلك الحد باب بيتك علمود سمعتك وأنتَ عزيز علينا قناص بغداد
ظلينا شويه نسولف بعدها تسالمنا وكل واحد صعد بسيارته إحنا رجعنا البيتنا بالطريق وهو راح ويا ضابط حسين والفوج لأن صارت علي شبه ولازم يطلعون ويا قوة كاملة
طبطبت على رجل عاشور وگلت
-صـيـاد: تنحل حبيبي تنحل سهلة لا تشيل هم
ذب حسرة من كل گلبه فتح تليفونه ونشر ما اعرف شني چان تليفوني على الشحن بالسيارة عفته يصفن واخذ تليفوني عاينت بي اريدن اشوفه شنهي النشره
أول ما طبيت صارت گبالي رسالة مگصوصة مكتوب بيها شعر وهو راد عايها بهاي
" هيچ جازيت
التحبه
هذا گلبي
وهذا حاله
القوي الما دنّگ
گبال الرصاص
عفته يبچي
إعله الرسالة "
وصلنا للبيت دكيت الباب وروحنا لاهث
سُـمانه ...
كلشي مفهمت من اتصاله لو اني غبية لو مثولة ومجاي اصدگ هم راجعين بس هو ما گال راجعين گال حضريلي حضنچ وراح وانغلق تليفونه ما فهمت شي
بقينا گاعدين محتارين أغلب الناس النعرفهم الضباط رجعوا الأهلهم وطلع بيان النصر بيومها الدنيا كلها فرحانة و احتفالات بس البيت البي شهيد ظل حزين على مافقد بس فرحان للوطن الخوف بدأ ياكل بينا ولا واحد منهم يرد أو أتصل اجهزتهم يا مغلقة يا خارج نطاق الخدمة
حتى هاشم اجانا من البارحة يسأل عن وضعهم بس نفس الحالة ماكو خبر
گاعدين كلنا عصريات واني عيني على الباب هسه يندگ ها اجو ها بعدهم كومة اشياء برأسي ما اريد اقلق أهلي وياي التزمت الصمت ، طلعت عمتي من غرفتها وبيدها تليفونها
-كـحِيلـة: خابرتني أم فهد أبنها راجع يگللها راح يرجع دوامنه واجبات ننزل ونصعد چا ولدنا وين يارب برد گلوبنا وطمنا
ضربت أمي على رجليها بخوف ومحتارة وحچت
-فـاتـن: إبن الاوادم گلتله لا تدخل عسكرية معدلك يدخلك طب عام هندسة شلك بالعسكرية وشلعان الگلب كتل روحة كتل وكتلني ويا يصيح عسكرية ميخالف بس لا تصير بالدفاع لا اله يصير بالمكافحة يالله وتاليها وياهم هاي انشلعت گلوبنا ربي طمنا ورجعهم سالمين غانمين يالله
غمضت عيوني مليت من هذا الكلام يوميًا ينعاد عيوني من گد البچي صايرات قطع حمر تعبت نفسيتي طبوا سُطام وهاشم و نفس الحچي هم جوارينا رجع وهمَ ماكو
-هـاشـم: اطمنوا وگولوا يارب أكيد مشغلوين عدهم فد شي مستحيل يختفون هيچ والدرب منا خطر ولا تنسون الإعتماد الأكثر عليهم
على نفس الكلام تناقشنا شويه واحنا گاعدين بعدنا بالاستقبال ما نسمع وندگ الباب فز گلبي هاي الدگه اعرفها أيّ اعرفها كلش زين طلع سُطام طلع سُطام يفتح واني گمت وگفت على حيلي
-سُـطام: ياهو ؟
هستوه فتح القفل يريد يسحب ويفتح الباب ندفر عليه حيل ودخل عاشور يضحك ويحچي
-عـاشور: افتح دارك اجاك صگارك
من سمعت صوته بدون شعور دموعي صارن ينزلن وحدة ورا وحدة ، طفر سُطام وشبكه حيل شاله رفعة من الگاع يضحك وعاشور بادله الحضن
-سُـطام: الحمد لله على سلامتك حبيبي اشتاقيتلك يابعد روح أخوك وگلبه
طبطب على ظهره وطلعنا كلنا على اصواتهم العالية
-عـاشور: الله يسلمك السبع
هلهلت أمي وركضت تشبكك بـ عاشور واني جامدة بس دموعي تنزل واحس حيلي باد واني اشوفهم ركضت عمتي الحضن صياد
-صـيـاد: هلا هلا بكحل عيني سند أبنها وگلبه اشتاقيتلچ يا حيلي اخ يمه ريحتچ عافية حبيبتي
سلمت أمي عليهم اجه يمي عاشور وتخطى عمتي حتى ما باوع الها شبكني ويشم بيه
-عـاشور: تاجهن تاج البنات سمستي روحي اشتاقتلچ روحي حيل يا بعد اخوچ
بادلتك الحضن حيل وامسح على شعره
-سُـمانه: ميته بدونك حبيبي عايشة بنفسك بالدنيا اني والله
ما حسيت غير جرني من حضن عاشور وشبكني حيل بدون ولا كلمة استحيت ابادله بالرغم ميته عليه بس هيچ حطيت ايدي على جتافه كلت بخفوت
-سُـمانه: الحمد لله على سلامتك حبيبي
شاورني
-صـيـاد: بس نصعد اريدچ بغرفتي تمام
وخر وعيونه تتنقل بين شفايفي وعيوني هزيت رأسي بموافقة شبكت عمتي عاشور الي كتفى بس ابتسم الها
-كـحِيلـة: يمه نگطعن نياط گلبي عليك حبيبي
طبطب على ظهرها بيد وحده وايده الثانية ما بادلها بيها الحضن
-عـاشور: الله يسلمچ أم صياد إسم الله عليچ
نزلت دموعها أكثر بعدت عنه مسحت على وجهه بحنية
طبطب على ايدها بعدين حضنوا هاشم ودخل بابا اجه من شغله وتفاجأ بيهم فوگ النص ساعة احنا برا شبعنا منهم سلام وكلام كلش يلا بعدها دخلنا كلنا جوه ، و كالعادة ختلت بحضن عاشور ونحشكت كلش بحيث هيچ حضنته بثنين ايديه وراسي على صدرة وصياد يخزر بيه گامت أمي تسويله چاي لان فرفح يريد چاي
-عـاشور: وفكس بعينك الخايس عليمن تخزر بيها شو أنتَ فرد نوب صاير و خابص روحك ترى هي مالتي بس إلي
ضحك صياد وغمزلي ودزلي بوسة بالهوى
-صـيـاد: خلي متونس أول وتالي أنتِ بغرفتي وعلى چربايتي هم
ضربه عاشور بالكوشايه بكل قوته
-عـاشور: دروح مالك مره يمي يالله تكسح بسرعة قبل لا اخنگك هنا ومحمد
غمزله يضحك يستفزه بهاي الحركة ظلينا شوي نضحك وراها راحو الغرفهم و أمي سوت أكل من جديد و كملت الطبخ وطلعت الشبزي علمود عاشور اكلته المفضلة ماظل شي ما طبخوا وخابرت كل خالاتي وبيت خالي عزمتهم على جيتهم بسلامة باچر والهلاهل مال خالاتي شتغلن يموتن على عاشور وهو مامقصر أبد بالعكس ايده مو اله والي يشتري ينطي الي فلوس تشري الهم مثلنا ..
طب عاشور الغرفته يسبح واني رحت اخذت دوش بسرعة وتعطرت وحطيت شوي مكياج ومشطت شعري وضليت كاعدة بغرفتي استحيت اروح وراه هسه شيگول عليه
صح اني خفيفة وساحلة نفسي عليه بس ما اريده يكتشف هذا الشي المتخلف
بعدني بين حيرتي اروح لو ما اروح اندزت الي رسالة باوعتلها من حبيبي الهمجي ابتسمت وفتحتها كاتب
-صـيـاد: " الصياد ينتظر الصيدة تمر حتى يصيدها لا تتأخر لأن صيادچ الفريسة الماتجي يمه بالطيب يجيبها بالغصب طيوري السائبة "
گمت ورحت مديت رأس اتأكد ماكو احد فتحت غرفة عاشور صوت الماي أكيد يسبح
رحت الغرفته فتحت الباب لگيته سابح ومتروش وباقي بس بالبجامة وجاي يفصخ بسلاحة
ضحك أول ما شافني فتحلي اثنين ايديه بكل وسعهن
-صـيـاد: تعاي صيدتي وحبيبتي
رجفت كل ذرة بيه على كلمة حبيبتي ركضت بلهفة شمرت نفسي عليه حضني ولمني لم رفعني من الگاع يشم بيه ويهمس
-صـيـاد: اوفف اوف ولچ يمه هسه ردت روحي من شميتها
گعد على الچرباية وگعدني بحضنه حضنته قوي بادلني الحضن صرت اشم بركبته وابچي بقوة ماتحملت
-سُـمانه: خفت عليك هواي صياد هواي خفت عليك كل ليلة أموت ألف موتة من التفكير والخوف والقلق ليش هيچ تسوي بيه ليش تدري من الخوف احس فقدت اللذة بكل الدنيا وماكو شعور مسيطر عليه غير شعور القلق والترقب اني متت صياد متت وأنتَ ماكو
تسسلت ايده مدها من جوة البدي وشفايفه على أذني أحس بـ انفاسه الحارقة تچوي بشرتي ودگات گلبه صرت أسمعها بوضوح همس بصوت ذايب
-صـيـاد: مممم وبعد حبيبة صياد وبعد شبيچ احچيلي
اتلمس بداية شعره من يم رگبته وخدي على خدة
-سُـمانه: بعد لا تعوفني هيچ و لا تخوفني عليك لـ هاي الدرجة صياد أموت بدونك أموت تعبت بيك مو بسهولة صرنا البعض حبيبي لا تسوي بگلبي هيچ
ايدية اخذت راحتها وقبلني بشغف واني من الشوق البيه ما اعترضت ولا تمنعت اصلًا ما حسيت شگد بقيت حاضنته وهو كل شوي يردد بصوت هامس خافت جدًا
-صـيـاد: احبچ
تعبت ابتعدت عنه بوست خدوده وهمست
-سُـمانه: أحبك صياد گلبي
تمدد وحط رأسي على ايده صرت امشي ايدي على صدرة
-سُـمانه: ليش ما توشم أسمي على صدرك وليش ما واشم مثل عاشور
مد ايده يلعب بشعري ضحك وگال
-صـيـاد: هو ملطلط انه ثگيل وهسه تأخرت ترقيته مرتين علمود الوشم وما يتوب هسه يريد يوشم إسم روڤان بعد
تذكرت روڤان سافرت باوعتله وگلت بـ تساؤل
-سُـمانه: لعد هسه شلون وڤيڤي سافرت ماما گالت بس يرجع نروح نخطبها اله مبينين يحبون بعض وكلش متفاهمين
وخرني من صدره گعد على حيله وگال بصدمة
-صـيـاد: شجاي تگولين سمسمه وين سافرت شلون ليش محد حچه ؟
باوعتلة بـ أستغراب
-سُـمانه: گالت أن عاشور يدري وأحنا متفقين على كلشي على ما يرجع وما حاجة تگلوله انطيته خبر واني اتصلت علي بيومها بس تليفون خارج نطاق التغطية شكو شصاير ؟
غمض عيونه وگال بـ آسف
-صـيـاد: عاشور تعارك ويا روڤان وتهمها ظلم وگطع علاقته بيها وهسه بطريقنا ديوان فهمه السالفة وعاشور گال أسبح و أروح الها احچي وياها عسى ولعل تقبل ترجع ويا بس وين سافرت وليش ؟
-سُـمانه: شنو صاير بينهم
حچالي كل الموضوع من بدايته شهگت وخليت أيدي على حلگي
-سُـمانه: عزا صياد شلون هيچ يسوي عاشور يعني صدگ لبنية فدته بروحها والحادث الي صار بسبب إبن خالتها حتى تحمي عاشور عرضت نفسها للخطر ولبنية فقدت جزء من نظرها بالحادث وسافرت تتعالج ويمكن ماترجع بعد ما ترجع
گام صياد جر ايدي گومني ويا وگال بـ أستعجال
-صـيـاد: گومي گومي خلي نروحله قبل مايطلع الحك عليه
طلعنا دگيت الباب صاح بخفوت
-عـاشور: دخلي بابا
دخلت ودخل وراي صياد ما نطاني مجال احچي وصياد همجي يعني ما شفت بهمجيته گبل صاح بي بضوجة
-صـيـاد: من ورا خبالك ورعونيتك روڤان سافرت ومراح ترجع أنتَ وين مبدل ومتعطر وين رايح
التفت علينا عاشور متفاجأ من كلامه عقد حواجبه وگال
-عـاشور: شجاي تحچي شنو سافرت وين راحت يعني
دغيت صياد وعقجت حواجبي بوجهة منزعجة وحچيت بهدوء
-سُـمانه: روڤان بعد الحادث الي تعرضت اله طلع بسبب إبن خالتها جان مدبر الها منتظرها يم بيتنا وبس طلعت دعمها على أثر الضربة الي صارت على راسها لبنية فقدت نسبة من نظرها يعني وسافرت تتعالج
مسح على وجهة وملامحة مذعورة افتر وهو مادري شيطلع راح يمه صياد
-صـيـاد: شنهي شجاي تنبش ؟
گال بسرعة وصوته رايح
-عـاشور: جوازي أسافر الها جوازي صياد حجزلي اريدها أروح الها
التفت عليه وگال
-عـاشور: وين سافرت
همست
-سُـمانه: للأردن
رجع يدور وصياد جر وجهة بأ يديه وهو مخنوك خانكته العبرة بس يكابر وما يبين بس ملامحة ونظرات عيونه مستحيل تچذب
-صـيـاد: شتسافر هو بكيفك أنتَ عسكري البلد وضعة ما مستقر مستحيل تگدر تسافر هسه وشتروح وين تدور هي الأردن منطقتكم بلد شكبرة شگده وين طيح بيها عاشور اهدأ وفكر بعقل شمَالك
عاط بي ودفعه ويحچي بحركة
-عـاشور: لأن ظلمت الي بعمرها ما گلتلي على عينك حاجب بحياتي محد ضحه بحياته علمودي يا اخي انه كلها تسترخص بيه العشرة وهي رخصت روحها علمودي الكل قدملته ونطيته حب و إهتمام وحياة والي يردوا كل واحد بحياتي قدمت اله كلشي بدون مقابل ويوم رب العالمين عوضني و انطاني الي تقدملي بدون مقابل رفست النعمة برجلي حيل وتكبرت صياد تكبرت على عوض رب العالمين چا الله شراح يسوي بيه بعد
سكت ويحاول يهدي وعاشور يفور يفور احسه صار نار
-صـيـاد: ميخالف اهدأ خلي تمر فترة تفكر بعقلها ترتاح نفسيتها وأنتَ هم وضع البلد يستقر هو وشغلك و أكيد تجي تجي لابد ترجع بيوم شبيك راح تموت يمعود
باوع عاشور بغضب وهو يأشر بيدة
-عـاشور: البيت إذا احترك وتعوفة بحجة الي يهدء من تطفى ناره يبقى رماد صياد رماد الي بيني وبينها أحترك وإذا بقى هيچ وما الحگت اطفي يصير رماد يطير عليه ويعمي عيوني
ولك صرختها بـ أسمي ترن برأسي رن ولك سمعتها بكل حيلي وما أهتميت وكملت طريقي عفتها يم داعشي نكس ضحت بروحها واهلها علمودي واني ودرت ظهري الها
-صـيـاد: ميخالف تشوفها ويتعوض كلشي يتعوض
باوعله بقهر
-عـاشور: بس ضوه عيونها ما يتعوض خسرت عيونها بسسبي شلون اعوضها بعد
سكتنه أول مرة أشوف أخوي هيچ مقهور شگد انقهر ونعزل من تزوجت الجازي بس مو هيچ هسه احسه مهضوم تگطع گلبي عليه راد يطلع لزمه صياد
-صـيـاد: عاشور اهجع رحمة الدينك وين رايح ولك هستونه راجعين ما تعبان نام ارتاح وراها فكر بعقل هادي شويه شمَالك انه اعلمك انوب
-عـاشور: عوفني أريد اطلع كلشي يخنگني النفس الي يدخل بريتي خانگني بس اطلع أجر نفس على الأقل عوفوني
جر سويچ سيارته طلع ورا صياد وهو يغلط عليه
-صـيـاد: لعنة على يومك ويوم الصرت بي أخوي دخيل السماء ما مخليني ارتاح ثانية وحدة يموت على الهضلة (الحركة الي يكون بيها تعب )
نزل شافته عمتي اخترعت من حالتة لطمت على صدرها و گالت مخروعة
-كـحِيلـة: شبيك ماما ليش هيچ حالتك
تخطاها وگال بضوجة
-عـاشور: لا تسوين نفسچ تحبيني ومهتمة لا تخليني اطلع حرگة گلبي بالماضي عوفيني عووفينييي ابتعدي عني كافييي
من گال هاي الكلمة عمتي رفعت رأسها ودارت وجهها منه شفت دموعها خطن بعيونها بس ما نزلن همزين صياد ما سمعه چان تعاركوا هسه
عافنا وطلع صياد طلع ورا باوعتلي عمتي و گالت بقوة مصطنعة
-كـحِيلـة: شبي اخوچ ليش هيچ مختنگ وهذا حاله ؟
-سُـمانه: عرف بروڤان مسافرة وصايره مشكلة بينهم وعاشور تاهمها ظلم وعرف بالحقيقة وكلش هسه صارت لتمت عليه من كل صوب عميمة فدوة اروحلچ لا تشيلين بخاطرچ منه
غيرت الموضوع و گالت
-كـحِيلـة: بس مو على أساس هو يعرف
-سُـمانه: أيّ طلع مايعرف ورايحة من ورا ومغثوثة منه وزعلانة لهذا هو جن جنونه
گعدنا انه وعمتي شوي واجت أمي هم عدنا الها سالفة وصياد خابرته گال شوي ونجي بس خلي يرتاح ....
𔓕𔓕𔓕
الـجـازي ...
جنت انضف بغرفتي وغزولة حاطتها بچربايتها هي والعابها وجاي تلعب بيهن وتكركر وحدها خابصتنا ببا دادا
وانه أنظف شويه ولاشيها شويه كل فكري وبالي يم عزيز گلبي وإخواني لليوم ما مش خبر عنهم
مندمجة أعزل بالكناتير وكل ما اشوفن شي اله اشمنه واحطة على گلبي روحي طلعت من الشوگ كملت تنظيف وتعزيل نومت غزولة وردت ادشن للحمام رديت اخذ هدومي سمعت صوت تليفوني رن
رحت بسرعة عبالي سمسمه طار گلبي رفرف من شفته رقم ديوان جاي يتصل عليه بسرعة جاوبت احچي
-الـجـازي: راحتي وعافية گلبي أبو بيتي
گال بصوت ذايب
-ديـوان: يا ويل گلبي الذايب يا ويللل حالي المعلعل عليچ وعلى دلالچ ها يا أم بيتي
يچيت احچي واشهگ حيل
-الـجـازي: ديوان وعلي بعد ما بيه أتحمل بعد وفراگ وخوف يمتى ناوي تردلي شلعت گلبي
-ديـوان: ابوس گلبچ فراتي راجعلچ غزالتي راجعلچ بالطريق اني
شهگت بكل حيلي وگلت
-الـجـازي: احلف أنتَ هسه بالدرب وراد للبيت
ضحك وگال
-ديـوان: وداعة عيون دجلة المستهترة راجع للبيت هسه طالعين اني واخوتچ وياي
لطمت على رجلي وگلت
-الـجـازي: يا ضيم الولاني ماولى أحد شنهي هاي الكبسة ديوان خابر من الصبح خابر من الليل هسه انه شلون الحگ اجهز روحي
ضحك بصوت عالي
-ديـوان: من اگول دجلتي مستهترة محد يصدگ
غزالي أحبك بكل حالاتك ابقي هيچ بكلشي قابل بيچ اني
-الـجـازي: يمه منك يمه من سويلفاتك الياخذن گلبي يا ضيمي روح خليني أجهز روحي
-ديـوان: لا تستعجلين غزالة العصر يلا أوصل
-الـجـازي: والبيت يدرون بيك راح ترد
-ديـوان: لا تشيلين هم اكو من يبلغهم راح تصير مفاجأة وصدمة للبعض
ظليت احچي ويا شويه وراح ركضت أعين على روحي بالمرايا تعبانة وصايرة خلقة خذيت كل غراضي الاحتاجهن ودخلت للحمام قسمت اليوم اسوي سواية الحية ابدل جلدي واطلعلي جلد جديد
رتبت روحي ورديت عزلت الغرفة من جديد وغيرت شويه بالديكور سبحت غزولة وبدلتلها وبدلت انه أهم وظليت ناطرة كلش للعصر ما نزلت
شويه وحسيت على اصوات البيت صارت عالية وحركة حسيت هواي ناس صارت ببيتنا وبرا اسمع اصوات زلم وسيارات ركضت للشباچ رفعت البردة اعاين من وراها ، شفت بيتنا مگلوب گلب بالسيارات ما ظاله لا شيوخ لا ناس كبار كلها كلها ملتمة وما اشوف بس عگل
شلت غزولة ورتبت روحي واخذت تليفوني وردت انزل جوة بعدني على الدرج وحسيت اجتني رسالة عاينت على الشاشة شفتها من مهيوب مبينه من الاشعارات گلبي رجف بخوف
كاتب بيها
" حظري نفسچ دقت ساعة الصفر ما اعتقد بعد عندچ عذر ديوان ورجع "
للحكاية بقية ...
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
بـقلـم: زيــنب عــلي
شنو رأيكم بالبارت 🌚♥️ ؟
شنو تتوقعون يصير البارت الجاي 😩💔
قلبوشات لا تنسون التصويت ومتابعة الحساب zainab_ali1 ♥️
متابعة ممتعة 🦋