في جحيمهم عالقة

البارت (9)

الكاتبة: - زينب الحربي
حساب الانستكرام:-zienab_alharbi

……………………………

ليتَني لم أحبك يوماً كنت اختصرت عمراً من الوجع.
………………………………
يوم الخميس ينزل بارت اخر ان شاء الله
……………………………
ريم: -
كاعدة ببيت خالتي مخلصتها بجي حتئ اكلي مو عدل خالتي كعدت يمي شافت عيوني يجرن رفعت ايدها وخلتها علئ راسي وكامت تقرا قران بصوت ناصي اني بجيت اكثر بخنكة بجيت ومتت بجي

_رب العالمين من يحب شخص يبدي يختبرة باعز ما يملك طفولتة شبابة اطفالة زواجة اي شي يعزة يختبرة بي حتئ يشوف مدئ صبر هذا الشخص مدئ مناجاتة ودعائه لله رب العالمين من يختبر مو يكره البشر لا بالعكس بس لان يحب يسمع دعائه ليل ونهار يدعي يحب يسمع مناجاة هذا الشخص يحب يشوف ايمانة وثقتة بي وانتي يا يمة متاكدة واثقة برب العالمين والدليل صارلج مثل ما تكولين سنتين ونص شبعتي اهاين وسمعتي اشكال الحجي وتحملتي اشكال ومنها الخيانة وهاي مو اي واحد يتحملها  في سبيل ابنج زين هاي كلها انتي نجحتي بيها وتعديتيها هاي شنو لان عقلج جبير ومؤمنة بالله تعالئ انو راح يجي يوم وينتهي كل هذا ويصير سوالف ما اكدر اكلج اتحملي واسكتي علمود ابنج لان اصير ضالمة اخلي نفسي بمكانج ولو ما يجي ولا اشوية من المج ولا اكدر احس بي لان ما عشتة فشنو يا يمة ابنج مريض ومحتاجج لا تخلينهم يستغلونة ضدج افتهمتي خلي نقطة قوة الج مو نقطة ضعف

_خالة تعبت والله تعبت اتخيلي من اتزوجت لليوم شفت ابشع انواع العذاب شفت الضرب والغلط والاهاين والخيانة والاغتصاب واشكال شفت مرتين مرتين ببيتي يخوني مرتين يفكر بس بشهواتة القذرة مرتين ما يذكر رب العالمين ابد زين هذا مو زنئ والزنئ من الكبائر هسة البكدي المفروض ثالث متوسط جاي تحضر للوزاري بس اني بالي وكلبي يم ابني روحي راح تروح عليه ابني بي توحد مو اي واحد يعرفلة والله كلبي جاي يتكطع عليه شسوي كليلي شسوي حتئ ارتاح

_تروحيلة وتلتجئين الة الوحيد اليتحملج خمس مرات باليوم بكل حالاتج حزينة فرحانة ضايجة مستبشرة كومي يمة اتوضي وافرشي مصلايتج وناجي هو صح يعرف شبيج بس يحب تناجينة كومي يبعد امج البجي ما يفيد شوفيي هاي امية اني مسوية عليها ختمة اشربي منها وهسة اعلمج ختمات تريح البال اني كاتبتها بدفتري لكل شي اني احب اسوي ختمات ها ومجربة والله مجربتها

_انطيني خالة انطيني بلكت يرتاح كلبي جاي اموت وعلي

_لا تكولين هيجي دكومي اتوضي ولج واني اعلمج علئ كلشي وبس ترتاحين اخذج ونروح لامج اذا تريدين

_اي والله مشتاقتلها موت بس خاف اشغل بالها اذا كلتلها

_لا ما نكللها نروح مسيرين يلا يمة توضي

_وفعلا توضيت وجبت القران والمصلاية خالتي علمتني علئ الختمة كعدت اول شي ركعتين صليت ودعيت الحمدلله والنوب بديت بختمات اللي علمتني خالتي وضليت اقرا قران لحد ما ارتاحيت ويومية ابجي لحد ما انام ابني ما متعودة افاركة هلكد امي متكدر تجي وحدها زوجها مشغول و عدها بنات بجيت لمن تعبت وهي تبجي وياي بالمبايل لان متكدر تجي بقيت تقريبا شهر يم خالتي يومية علئ نفس البجي باليل. بس اشوية ارتاحيت كمت اشتغل وي خالتي وما اتقيد ابد منها ولا من اهلها

_يمة ريم اليوم ديانا بنتي تجي دريتي مو

_اي خالة دريت هي بيا دولة وشتدرس

_هي بمصر والله ما ادري ييمة شتدرس بس تخصص مدري شسمتة

_خوش خالة محتاجة شي اسوي وياج

_لا يمة هنا فراشات اني راح اغسلهن اكعدي انتي

_لالا ابد اني وياج نغسلهن سوية صدك طلعنا الفراشات وغسلناهن سوية ورتبنا البيت سوية ابد ما كعدت وعافتني والله للعصر ودخلت بنتها طبت تسلم علينا واحد واحد

_ازيكو يكماعة دنتو واحشيني اوي

_اني سديت حلكي كوة وامها همينة تحجي مصري كوة تحجي عراقي

_باوعو اني مو منيح اتكلم عراقي اعزروني

_كلتلها مش مشكلة يفندم وضحكت هي باوعتلي بعتب النوب ضحكت كلتلها اني ريم بنت خالتج تقربت باستني وحضنتني ودخلنا جوة خالتي راحت تطبخ واني واني كعدت يم ديانا وابوها واهلها يمها ضلينا نضحك لان كوة تحجي عراقي وحيل تضحك ضلينا نضحك ونشاقة اشوية وخالتي حضرت الاكل وكعدنا ناكل ما خليتها تغسل مواعين كعدت اغسل مواعين وندك الباب لاول مرة اخاف من دكة الباب احس رجلية بادن وكلبي احسة كام يدك باذاني ونفسي بالكوة اجرة رفعت ايدي خليتها علئ كلبي وطلعت اشوف شكو وصلت للباب وكلت منو

_هاي اني ريم افتحي الباب

_سمعت صوتة ارتعبت خاف ابني بي شي فتحتت الباب شفت حسين شايل حمودي ابني. يباوعلي ويبجي سحلت ابني ضميتة بحضني وبجيت وهو يصيح ماما ماما ويضرب علئ وجهي ويبجي ضميتة الحضني وضلينا نبجي باوعت للباب شفت خالي ومرتة وحسين وامة وحماي وسميرة وبناتها باوعتلهم بغيض حتئ ما كلتلهم تفضلو وعفتهم ودخلت كلتلها خالة جايينج خطار ياريت لو تطردينهم هي فهمتني باوعتلي وضحكت وطلعتلهم كعدت بالصالة ودخل خالي اخو امي الجبير ولا كمتلة مادام ما سمع مني وجابهم واجة

_ولج خالي هي هيجي الاحترام ما تكومين تسلمين

_كمت كلت السلام عليكم

_لا مو هيجي لا بوسة لا حضنة مو خالج اني شنو عود كبرتي وتستحين ههههه

_تقرب مني باسني وحضني و ضل يشاقة وياية هم كعدو بالصالة كلهم اباوعلهم بحقد دفين كرهتهم كلهم حتئ علي حماي اللي ممسوي شي كرهتة حتئ خالتي كرهتها بس حمودي احبة حجة خالي

_خالو انتي يمكن ما تدرين اني انقلت هنا بالطابق الجوة بصفكم صارلي اتلث ايام واليوم اجتني خالتج ام حسين و ابنها يتوسلون يريدون يرجعوج طبعا اني كلتلهم ما دام زعلانة انتو ماذيها وما انطيكم كلمة الا اسمع منها

_خالي مو انت ما تدري بالسواه كرهني بي كرهني بعيشتي اشكال والوان شفت كلشي شفت محد شايف الشايفتة اني طفلة ما احترم ولا راعئ طفولتي واذا اني جذابة اسئل خالتي وحماي وكللهم هو كال

_اني وياج هو غلط وما اكلج سامحي خلي حالة من حال الباب يطبة مدري ياهو بس ارجعي خالي علمود ابنج لان من اجوني لهسة هو يبجي كسر خاطري وعلي مو ثكيلة عليه قابل ع كلبي اذا تريدين ابنج هسة ناخذة وتكعدين ببيتي بس يا بابا البنية ما الها غير بيتها وابنج حالتة مو تمام ارجعي وبالشروط اللي انتي تخلينها ولا تنسين امج بعيدة جاي تبجي عليج دم والله بس محد يجيبها خابرتني اني اروح اجيبها من الشمال بس كلتلها اني رايحلها احل المشكلة ارجعي بعد ابوج وبشروطج انتي شنو تامرين الركبة سدادة اذا ما سوو هم اسوي اني

_خوش راح ارجع وهاي مو الخاطر اي واحد لخاطر حمودي ابني وشروطي اول شي حسين يشتغل وما يكعد نهائيا لو اعرف يبيع كلنس واوراق بالتقاطع همين ما يكعد بالبيت بس بالليل اريد راحتي وراحة ابني الحليب والحفاظات والمسواك كلة من حسين كال خالي

_يجرالج كلهن سهلات وحق من حقوقج واذا ما اشتغل اني اطلكج منة واجيبج ببيتي حتئ يم امج ما اخليج بعد بوية شنو

_باوعت علئ سميرة وبناتها كتلة يطلعن من البيت ويقطعن العلاقة وي حسين حتئ اتصال بيناتهم ماكو ولا يجنة بالمناسبات ولا نروحلهم ولا اريد اشوفهم

_يجرالج بوية لان هم الغلطانين ولو واحد غيرنا خلاهم معفنين بالسجون يزنون وببيتج الجلاب

_كامت ام زهراء وكالت

_خالة ريم اني مستحية بيا وجه اشوفج وبيا وجه اعتذر منج وبيا وجه احاجيج ضلينا يمج تقريبا سنة اكرمتينا واكرمتي مثوانا ونعم الجنة ونعم البت التقدر الخطار احنا ما قدرناج رغم قدرتينا جاي اعتذر منج اني عبن ما عرفت اربي وهاي زهراء تكوم وتعتذر منج واعتبريها جوة نعالج

_خالة اني ما عندي شي وياج وخطاري اكرمة حتئ لو عدوي ببس انتي ما شفتي المنضر الاني شفتة ولا راح تشوفونة شي جدا مقرف كامت زهراء تحجي وفد وحدة غثيثة تحجي بدلع

_ريم اعذريني مدري شصار بية والله اكو واحد بالكافتريا انطاني حباية ومسيطرت علئ نفسي ما اعرف شنو جنت اسوي

_ردت اخلص من جذبها ومن حجيها الغثيث كلتلها مسامحتج بس اطلعي من حياتي ولتشوفيني خلقتج كتلة خالي بعد عندي شرط البيت يضل الي وحدي حتئ خالتي وعلي ما اريدهم لان طول ما هم هنا حسين مراح يصرف ولا راح يشتغل وراح يضل معتمد علئ غيرة من اتزوجنا لليوم معتمد ع امي وعلئ خالتي واجتنا فترة معتمد ع احمد ابن خالتة حسيت بانتصار واني اهينة هيجي لان مدري من. شنو الله خالقة لا فايدة ولا زايدة كالت خالتي ام حسين

_هاي هي يمة التريدينة يصير ونطلع اني وعلي وضلي انتي وحسين واني ما اقصر وياكم كل فترة امر عليكم واجيبلكم شمحتاجين وحسين غصبا عليه يشتغل ويصرف عليج ويحترمج

_حسيت بالذنب لان طردتهم بس هم لازم اعيش حياتي هم مماذيني بس حسين معتمد عليهم ودائما خالتي واكفة بصفها حضنتني وحضنتها وكلتلها شكرا جزيلا واعذريني بس هاي الطريقة الوحيدة حتئ ارتاح اعذريني

_لا يمة حتئ لو ما انتي شارطة جان احنا طلعنا من وحدنا هم لازم واحد يستقر هو ومرتة ويرتاح اخذي وليدج ولمي غراضج وارجعي ويانة واحنا باذن الله العصر نلم غراضنا ونطلع من يمكم نخليكم ترتاحون

_هزيت راسي وخليت ابني بحضن خالتي وهو تخبل عبالة راح اعوفة اخذتة وياي لميت جنطتي وطلعت ادور علئ عباتي لكيت حماي علي وبنت خالي يتغازلون. اجيت من ورة فززتهم كلتلهم ها يا سفلة غزل وكذا لو طاب عليكم خالي ان سواكم ثريد كال حماي

_ريم يعني جاية تتعاركين ولا جنج استوج طاردتني اطلعي خلينا نتعرف علئ سريع بربج

_يلا ولو وبلا هالسوالف لا يطب عليكم واحد يطيح حظكم اخذت عباتي وشلت ابني وجنطتي فرحانة لان شفت ابني  نزلت لبيتي لكيتة نضيف نوعا ما بس كم شغلة اسويها نضفت تنضيفات خفيفة وخالتي وعلي ما اجو كملت تنضيف ودخلت سبحت ابني وسبحت اني لبست برمودة وكيمونة الله شعور الحرية بس اني وحدي بالبيت البس براحتي وامشي براحتي  وطلعنة خليتة بالصالة وانطيتة ممية طبعا المحروس مدري وين ولة طبك طوب خفتا وراحة اشوية واندك الباب فتحتة لكيتها خالتي كلتلها تفضلي

_لا يمة هذا اكلكم مستعجلة اني اريد اروح عندي شغل وان شاء الله ما اقصر كل فترة امر عليكم ديربالج ع ابنج ورجلج وبيتج صيري نجرة خوش يمة يلا مع السلامة

_مع السلامة اخذت الكدورة وخليتهن بالمطبخ اني ماكلة وحمودي انطيتة ممية شغلت التلفزيون وشغلت فلم اشوية ونام حمودي كمت خليتة بفراشة ورجعت كعدت بالصالة مشغلة فلم ل12 اجة حسين جايب حلويات وكرزات ومدري شنو علاكة شكبرها واني لابستة ولا حجيت كمت طفيت التلفزيون وكتلة الاكل بالمطبخ اكل ومن تكمل اغسل المواعين

_ماشي

_بعدني مسامعة شكال عفتة ومشيت خليك يطبك مرض حتئ تتادب رحت يم حمودي جريتة لحضني وبستة وشميت ريحتة يا يمة اشلون فاركتك هلكد عبالك صار سنة ما شايفتة اخذتني الغفة بصفة شفت حلم اعوذ بالله من الشيطان الرجيم عبالك بالحلم مربوطة بشجرة سودة حيل تخوف واجة زلمة شكلة يخوف لزمني من وجهي شربني شي بكلاص مقرف ريحتة تكتل ما كدرت اقاوم وشربنياه عبالك بالحلم اذكرت اية الكرسي قريتها وركض فزيت من الحلم كعدت علئ صوت الاذان سبحان الله عبالك استوني نمت شبسرعة صار الاذان وكانما هذا الحلم منبه حتئ اكعد لصلاة الفجر كمت بس جسمي ثكيل وكانما ريحة الشي الشربتة بالحلم بخشمي  تعوذت الشيطان وتوضيت وصليت بس شنو كوة هيجي احس العالم كلة نايم علئ صدري جسمي حيل ثكيل مدري شبية رجعت نمت بصف حمودي لحد الصبح كعدت وكعدت حمودي سويتلة ريوك اشوفة صافن وميحجي اهواي اني عبالي عندة تاخر بالنطق بس متوقعت هذا الشي كملت ريوك غسلت المواعين وفتحت اللابتوب ادور عن حالة حمودي وعرفت عندة توحد شاطت روحي لله وردت حضنتة وكمت ابجي اني صار بية توحد انت اشلون ميصير بيك من ورة هيج عيشة ادري ببو جاهل ومفلس مو مال اعتماد طلعت كورسات ودروس للتوحد وكرست حياتي الة كمت يومية اسويلة درس معين حتئ اعلمة ع شي معين والحمدلله يستجيب الي ويتفاعل وياي طلعت اني لازم نطلع من البيت ومنبقة اهواي اجة حسين كتلة لازم انطلع حمودي ميصير يبقة بالبيت اهواي

_خوش اخذي وروحي يم امي وعلي هي امي تطلعج

_هزيت ايدي بس شنو فجاة رجعتلي حالات الحب لحسين بس اتجاهلها واتغاضئ عنها ليش فجاة احبك واريدك مر اسبوع وهو يحاول يتقرب مني واني اصدة ما اريد قربة واريدة احبة فجاة وابجي عليه بس جاي اعاند روحي حيل والله صدك اخذت حمودي ورحت يم خالتي وكاعدين واجة علي وجهة اصفر كمت علئ حيلي كتلة يا ستار شبيك شصاير خلة ايدة علئ راسة وكعد ويحجي بانفعال

_ريم ساعديني ريم مصيبة وطاحت علئ راسي مدري اشلون سويت هيجي مدري شصار بية واشلون خطيت هيجي خطوة بالحرام

_باوعتلة فاتحة عيني احجي شصاير شنو حرام شجاي تحجي شجاي تصخم علي احجي لتخبلني

_غادة غادة بنت خالج حامل مني والله مرة وحدة ومدري شصارلنا وعلي ما نريد هيجي علاقتنا شريفة مدري شصار ساعديني ريم

_لطمت علئ وجهي حيل صخام الصخمك وموت الخذاك وخذاها ولك اشلون اشلون بدون زواج ولك يذبحوك ويذبحوها الله ينتقم منك ومنها شوف متبقئ هيجي تروح تتقدملها فاتح امك بالموضوع واني افاتح خالتي وهي تقنع خالي  اكللها اريدها يمي يمة صخام الصخمني دخلت خالتي

_شكو شبيكم شو منفعلين

_كلتلها لا ماكو شي خلي علي يحجيلج

_شكو يمة علي شصاير

_يمة اجب غادة بنت خال ريم واريد اخطبها

_بس يمة كبار انت مو كدهم خاف يطلبون مهر جبير

_ميخالف يمة اني اريدها معجب بيها واحبها كلش

_علي ضل يقنع امة وهي. قافلة متقبل عليها خاف خالي يطلب مهر جبير لحد ما عاط علي

_يمة البنية حامل مني حامل تعرفين شنو

_خالتي لطمت علئ وجهة حيل وصار وجهة ازرك ورادت تنجلط ركضنا عليها اثنيناتنة غسلنالهة اشوية ارتاحت وكامت ضربت علي براشدي قوي حيل سطرتة سطر

_ولك شمسوية بحياتي شمخلفة اني شمخلفة كوا……… ذاك الخايس يومية وحدة وما يشبع وكاسر ركبة هاي البنية من وراه حتئ اني طحت بالحرام وانت تروح تنام وي حبيبتك وتحبلها ولك الله وين رايح الله ما يكلبها بيكم ويخلصني منكم الله وين رايح عنكم حوبة هاي البنية ما تتعداكم ان شاء الله

_تباوعلي وتاشر عليه كام علي باسها وحضنها وهي تبجي والله اخذت تلفونها خابرت خالتي كلتلها راح نجيكم ونجي باجر حظرو رواحكم كلتلها خالة علي غلط واحنا نحاول نسد هذا الغلط خليج قوية وربج يحلها وصليني البيتي باجر من الصبح تجوني دنروح لخالتي

_ان شاء الله يمة ان شاء الله

_لبست عباتي وشلت ابني التفتت علئ علي كتلة اعرف هذا مو طريقك وهاذي مو طبيعتك اعرفك ما عندك سوالف سيئة ادري بيك غلطت والغلط هذا من الكبائر ما اكدر ما الومك وما اكدر الومك لان ما اعرف شنو الصار واني اعرف طبعك التجئ لرب العالمين واطلب العفو والمغفرة الله غفور رحيم وهسة يلا تعال وصلني خطية هو وصلني لبيتنا ومستحي مني كلش عافني وراح كتلة يدخل مقبل كعدت بالليل حفيت لروحي ونضفت بيتي والله وحضرتلي فستان حلو وقاط لحمودي حلو وزوجي التحفة اجة  بالليل كتلة ع خطبة علي بس مكتلة علئ السالفة ثاني يوم العصر حضرنا رواحنا نصعد لخالتي واني فرحانة عود صرت مرة ورايحة اخطب صعدنا لخالتي رحبت بينا طبيت وحضنتها قوي شاورتني وكالت

_ها برب……… اليلكة احبابة ينسة اصحابة ولو ما اعتب عليج جلبة

_هههه ضحكت وكلتلها جايينج بطلب واتمنئ متردينة كعدنا بالصالة وخالتي طلبت ايدها لعلي وكالتلها

_اني جاييتج وياريت ما ترديني علي وليدي يحب غادة ورايدها زواج واني هم اريدنها لان شفت اخلاق ريمي وعرفتكم شنو انتو اريد اناسبكم واحنا جاهزين للي تردونا

_ان شاء الله ام حسين هم شنريد من الله وي بنيت عمتها بنفس البيت ان شاء الله احجي وي ابوها واردلكم الخبر انتضرونا

_اخذت مبايل خالتي اتصلت ع هاي الجلبة غادة وكلتلها تقنع امها وابوها فوك شينة كواة عينة النوب هي ام الراهي وهي الضايجة وتحجي بنتر والله يا الله طفيتة منها خالتي مقبلت نطلع عزمتنا الا نتعشئ يمها الا نطلع والله صدك كمت اساعدها بالعشئ صبينا وكعدنا نتعشئ وكملت هم مخليتها وحدها غسلت المواعين وياها وطلعنا خالتي وعلي راحو لبيتهم واني نزلت ببيتنا دخلت ولكيت علي مسوي عشة ومخلي بالصالة ومسوي الصالة حلوة مشتري نشرة جديدة ونفاخات كلت هذا ناوي نية كشرة وحتئ اذا ما انطي يذب الصوج بية خل اسايرة ضحكت بوجهة وهو كيف اخذت حمودي سبحتة ولازم نضل نحجي وياه لان ميصير نسكت اهواي ميحجي اهواي هو بس ماما بابا وعم بس رغم هو جبير المفروض يحجي باوعلي حسين

_شبيج هالايام تلحين وي الطفل تكعدينة من النوم تحاجينة وتحجين وياه النهار كلة وتسوين اشياء مجنتي تسوينها

_جريت حسرة ابني بيها داء التوحد منعزل تماما لازم نحاجي يومية وكل اشوية ونحجي اهواي حتئ يصير زين باوعلي بس ما حسيتة تاثر مثلي ابد هز راسة وسكت كمت نومت حمودي هو راح غسل المواعين فليت شعري و خليت عطر حتئ ما ينذب الصوج بية وماكو احد جان ينصحني لهذا امشي ورة كلبي ولا مرة شغلت عقلي باوعت لوجهي بالمراية وديت بوسة والله صايرة حلوة عاد تمددت وشغلت اللابتوب وفتحت المزوعة السعيدة جاي العب واجة سحلة من عندي عبالك اول مرة يشوف مرة نام فوكاي واني هم اتفاعلت وياه ادري غلطانة بس شسوي عاد كملنا وكمت سبحت اشوية واذن الاذان كمت توضيت وصليت كتلة حسين متصلي وياي

_استحي اصلي الله ميحبني ولا يريدني والدليل يخليني اوكع بالحرام بدون ما يمنعني.

_استغفر الله لتكول هيجي رب العالمين ميكره احد من عبادة احن علينا من امنا وابونا تتوقع يكرهنة اما الحرام هو يكدر يمنعك بس يريد يشوف مدئ اصرارك انت يريد يشوف نفسك تتغلب علئ شهواتها لو لا باوعلي وسكت عرفت كلامي ميفيد كتلة الله يهديك وسكتت

_ليش مخبل ويهديني

_لا حشاك المخبل يشافي ويعقلة بس اللي مثل حالتك يهدي عفتة وكملت صلاتي مر اسبوع حياتنا طبيعية نوعا ما كملنا الاجراءات وردولنا خبر رحنا نخطب لعلي كملنا وخطبنا وعقدولهم الحمدلله خالتي تريد تسد السالفة كالتلهم شهر بالهواي ويتزوجون ابوها مقبل شنو منطي فصلية ومن هالحجي بس خالتي قنعتة عاد وافقو كمنا طلعنا رجعنا لبيتنا خالتي كالت

_يمة ريم ادري ثكلنا عليج بس ما الحك ابنيلي بيت خلي علي ومرتة يمج تحمليهم جم شهر بس علما نبني بيت لان البنية بسرعة تكبر بطنها وخاف يذبحوها ماشي يمة

_هزيت راسي مو مشكلة خالة هاي هي اني هم خايفة عليهم وهي بنت خالي مو غريبة بس خالة البيت بي بس غرفة وحدة وين انيمهم ما تكليلي

_يمة فدوة نامي بالصالة انتي وحسين بس هالكم شهر. وهم بالغرفة لحد ما نكمل بنيان حسين صفن كللها

_زين ليش مستعجلين متخلينة لحد ما يكمل البناء شنو راح تطير البنية لو يطير علي

_خالتي جرت نفس حيل وكالتلة

_البنية حامل من اخوك المصخم ونريد نستعجل حتئ ما تكبر المشكلة

_باوعت لحسين صار ثور يصيح ويرجع ليورة اني طرطور واني رجل كرسي ومحد يكلي وحرام ومن هالسوالف ضحكت بكلبي هذا مثل اليعلم علئ الصلاة وهو ميصلي والله يالله اخير شي امة قنعتة وكالتلة بس كم شهر ماشي وسكت هو والله خالتي بدت يومية تجهز لكلشي ويومية تروح تشتري هي وغادة شي كاعدة انضف وتلفون حسين يمي دك وشفتها رقم سميرة اتنهدت شبي ما ماسح رقمهم صحتلة كتلة يدكون عليك بس بعتب

_باعي وداعت امي وداعتج وداعة حموديي ما مخابرهم من يوم الشرطتي شروطج لسة ولا هم مخابريني تريدين انتي ردي عليها وتاكدي

_والله صدك رديت طلعت صديقتي زينب بنتها الصغيرة ضلت صديقتي كلتلها ها لج بذاتة اشلونج

_هلا بيج عمري اشلونج انتي اتصلت حتئ اعزمكم علئ حنتي نهاية هذا الشهر لان العرس بغير محافظة ما تكدرون تجون سويت حنة هنا

_اني من الحماس كلتلها ياي حيصير عدنا عرسين يبووو والله ممصدكة باركتلها وسديت الاتصال خالتي كملت اجراءات العرس وجهزت العروس من ذهب وملابس ومكياج ومدري شنو وراح يتزوجون بغرفتي وباخشابي. اشترت خالتي فرشة بيضة جديدة اني فرشتها ورتبت الغرفة طلعت حلوة وهي اساسا ممكسرة محافظة عليها اني  ثاني يوم جانت الحنة لبست فستان اسود صلوخ وطويل جاي مفصل ع الجسم مو كلوش وكعب احمر وفيونكة حمرة برمت شعري وخليت مكياج سموكي اسود وحمرة حمرة وعلي طلعت اجنن بس العروس مدري شبيها شايلة روحها شيل وروحها بخشمها باوعتلها والله يا الله رجعنا لبيت خالتي الحنة صارت ببيتهم خلصناها ركص وونسة وكل البنات اجن ثاني يوم العرس اتفقنا اني وحسين نروح لبيت خالة سميرة ولو ما اطيقهم بس لازم اروحلهم وعلي ومرتة بالبيت يضلون بس نمنا بليلة العرس بالبيت بالصالة والله العروس بالصالون واحنا نعدل بالبيت اجتنا الناس اشوية ورحنا للزفة نجيب العروس من الصالون الزفة جانت تموت تمنيت عندي مبايل واصور انتبهت ع حسين يصور باوعلي وابتسم زفتهم تخبل لا تقل عن زفتي هم ذبو لحم بالشارع والله رجعنا للبيت كعدت اشوية بالصالة وزفيناهم للغرفة صبينا عشئ للناس وكملنا والاغلبية طشت ضلت بس امها وخالتي واني وخالتي ام حسين وخالتي سميرة وبناتها اشوية وعلي طلعلنا

_يمة ريم تعالولي اشوية شوفو غادة مدري شبيها

_ركضنا الها اثنيناتنة امها نايمة الحمدلله لكيناها تنزف اخذناها للمستشفئ لكينة الطفل نازل ومفطورة الجارة نضفوها ع كيف ورجعنا لكينة امها كاعدة ضحكت وباوعت لعلي عبالها اليوم ليلة دخلتهم باركتلهم ورجعت نامت اني مدري شبية كل اشوية ادوخ شكيت بنفسي حامل بس كلت بعدين اتاكد والله ثاني يوم كعدت نضفت وسوينا ريوك للعرسان ونضفنا البيت وغدة ومدري شنو اندك الباب فتحتة ونصدمت بالشخص. الواكف ……………
…………………………………
ختمنا بارت اخر من معاناة بطلتنا

تصويت بنات + تعليقاتكم كلش تفرحني

تحياتي: -زينب الحربي