#قناص_بغداد(مُهمة_وطن)
البارت الواحد والاربعين
بـقلـم: زيــنب عــلي
حبايبي لا تنسون التصويت + متابعة الحساب zainab_ali1 + تعليق بين الفقرات ♥️
Instagram: zainab__.ali1
TikTok: zeinab_.ali1
من أشوفك
يبرد بگلبي
العتاب
ويطگ
بآرض الله السلام
ومن أشوفك
تنثر عيوني
سوالف
والسما
تغيم حمام..!
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
الـجـازي ...
گاعدين الصلاة الفجر انه وديوان مسوين ختمة وگاعدة اقرأ وهو حاط ايده على بطني و يقرأ وانه هَم حاطة ايدي فوگ ايده وأقرأ حسيت بعطش عاينتله احچي
-الـجـازي: حبيبي اجيبن ماي اشرب صابني العطش اركد هسه اجيبن واردن
رفع رأسه گال بـ أستغراب
-ديـوان: ليش ماكو مي بثلاجتنا ؟
-الـجـازي: لاله خلص من المغربية هسه اجيبن من جوه واردن بالعجل لا تقرأ وتغش تراني سابگتك
ضحك وهز برأسه أيّ نزلت بثوب الصلاة وصلت الطابق الجوه بألف يا علي بطني واصله الحلگي طبيت يا دوب أول يوم بالتاسع وموش غزيلة غضب أسود
ردت ادشن للمطبخ سمعت گصايب وتنسيم يحچن
-گـصايب: هاي ثاني مرة ينفذ منها هالعاشور مو هين رجعتي اتفقتي وياهم لو بعد
-تنسيم: أيّ يوم أتفقت ويا خالد هاي المره نفذ المرة الثانية أن شاء الله ثابته هذا عاشور بسبع أرواح و أكيد بس يلتحق هم ندز ناس تطمني
-گـصايب: ما وصيچ بعد كون تبچي دم عليه هالحية هاي
تعديت من غرفتها والحقد مله گلبي توعدت الها بسالفة بس افكر بيها اطلع بتها نهائي من البيت وهي هم تنطرد
وصلت يم الباب مال المطبخ لگيت سهيلة تگول للمساعدة
-سهيلة: ذبي هاي الأعشاب بالزبال لأن هذول مو زين على الحامل والست الجازي حامل خاف تخربط او يحطوا الها اني رايحة للغرفة ذبي وتعالي وراي ماما
شفتها ذبته بـ الزبالة وطلعت ورا سهيلة
بسرعة دشيت للمطبخ ، الزبالة تصير يم السنك رحت طلعت الي بطل ماي أكيد الكامرات تسجل فكرت اطلعه بدون محد ينتبه عليه سويت نفسي دخت ولزمت السنك وطيحت الماي بالزبالة ظليت فترة واگفة حتى ماتبين الچذبة طلعت الماي وچانت العلبة صغيرة من طلعت الماي طلعتها وياه الحمد لله الزبالة جديدة مابيها وصخ جان ثوبي چبير گدرت اخفيها بالثوب وصعدت فوگ وانه اتذكر كلام الدكتورة
من رحنا قبل أسبوع للمعاينة طلع ديوان يجيبلي علاج ظليت بس انه وياها نشدتها
-الـجـازي: يمتى تقريبًا اجيب وتصير عندي ولادة
-اسماء: مستحيل تطولين ٣ أيام بالتاسع مستحيل اذا كلش تأخرتي نجيبچ يوم ثالث لأن طفلتچ كلش نازلة موزين عليچ وعليها التأخير بس تدخلين بالتاسع نقرر
-الـجـازي: زين شلون أعرف ولادتي راح تصير
-اسماء: يصير عندچ ألم بظهرچ وبطنج قوي وممكن ينزل مي معناها أنتِ بطلق حقيقي بس لا تخافين مو مي الرأس هذا لا مجرد سوائل تسهل عملية ولادتچ مي الرأس يختلف
طلعت من أفكاري اتذكرت قبل شوي حسيت بالألم كلش قوي مثل اللويات تجي وتروح
درت وجهي من الكاميرات خطبت من الأعشاب ويا الماي بگلاص وصعدت فوك ذبيت العلبة بالزرعة اليم الباب وطبيت بيدي الگلاص وبطلين ماي
شفته ساجد من دشيت رفع رأسه
-الـجـازي: ها گليبوني كون ما سبگتني
ضحك
-ديـوان: لا ما سبقتچ چنت جاي اقرأ دعاء يالله تعالي حتى نكمل هذا الجزء وتنامين مو زين عليچ أنتِ وغزولة السهر
حطيت الگلاص وتعمدت الفت انتباهه عاينله وگال مستفسر
-ديـوان: هذا شنو الگلاص الجازي ؟
گلتله بفطراية
-الـجـازي: شدراني انطتني إياه حجية گصايب وشربته
گام يمي بسرعة وگال بقلق
-ديـوان: شلون تشربين شي منها بالله طلع شي مو زين
شبكته بهدوء
-الـجـازي: لاله ماكو شي الحجية يجوز ما مش قصدها ويجوز تغيرت بعد سالفة تنسيم أكيد ما تتجرأ تسوي شي لأن تعرف الشغلة تطيح برأسها حتى گلتلي قارية عليه ماكو شي لا تخاف انه ويا وغزولة بـ أمانة الله ورسولة امشي نكمل الجزء والنام
صار يحچي عليه گوة سكته ورحنا خلصنا الجزء بعدها خذاني الحضنه ايده على بطني يقرأ عليها ادعية وآيات من القرآن
نمت وانا أحس بالالم بطني وبظهري عرفت ولادتي قربت
ببداية الصبح حسيت صار عندي ألم قوي رحت تأكدت من دكتورتي راسلتها
-الـجـازي: دكتورة أنتِ موجودة بالمستشفى هسه ؟
مرت تقريبًا خمس دقايق دزت صوت
-اسماء: لا خلصت دوامي اني هسه راجعة للبيت ودكتورة هناء أستلمت بمكاني ليش صاير شي إذا عندچ ولادة ارجعلچ
-الـجـازي: مادري دكتورة عندي الام للظهر يجوز اجيب اذا هاي انا اروح هسه ومن تجين الظهر تكون الطلوكة الحاره
-اسماء: تمام وراح اظل وياچ على تواصل
خليت التليفون على صفحة اخذت نفس طبطبت على خدودي حتى يصيرن حمر وصحت بصوت عالي
-الـجـازي: ديووواننن الحك علي ديوان جايي اطلگ الحكلييي يبوووو الحگ غزولة
احاني بسرعة طلع للصالة وهو مخترع اجه يمي چنت متمددة على القنفة من الخوف مايدري بروحه شيسوي اجه گبل رفع ثوبي
وخرت ايده بسرعة
-الـجـازي: وين وين شجاي تسويييي گوم وديني للمستشفى
محتار شيسوي
-ديـوان: أيّ غير اشوفچ
-الـجـازي: يا ضيم الولاني ماولى أحد شنهي راح تجيبني لو تسويلي ولادة كوممم وديني للمستشفى وهاي هي
گومني ويا يمشيني للغرفة وهو يحچي بخوف
-ديـوان: جاي تتأذين غزالة فدوة لا تتأذين
هزيت رأسي بـ أيّ وفعلًا الوجع يزيد عليه يروح ويجي أقوى
گعدني على الچربايةوراح لبس هدومه على السريع وجر محفظته ورجع يلبسني عبايتي وحجابي وهو يحچي
-ديـوان: ابقي هنا حبيبي راح اروح اصيح أمي واجيچ
طلع وانه هم طلعت نزلت شوي شوي من الدرج ماگدرت من صدگ صار الألم يقوى عليّ خفت ماگدرت اتحرك شويه وصعدتلي خالة ابابيل تحچي
-ابـابـيل: لچ يوم ميصير تنزلين من الدرج
كضت ايدي ونزلتني بالمصعد موش مال درج وانا گلبي يخفك اخافن منه لگيت ديوان واكف برا اجه ويا خاله سندني
عاين لي بقلق
-ديـوان: ها ما صرتي أحسن
خفت حيل زروحي طالعة من الألم
-الـجـازي: ديوان ما يروح الألم لحد ما أجيب اريدن أمي
-ديـوان: خطية نقلقها هسه بس نوصل للمستشفى اخابرها
اجه ميكائيل يركض ويا سويچ سيارته گاله ديوان بصياح
-ديـوان: تحچي صدگ حامل حامللل ننقلها بسيارة رياضية امشي طب جيب غيرها ولا تجيب عالية ما تگدر
-ميكائيل: شبيك ديوان أسرع الرياضية أسرع
-ديـوان: وشلون تصعد
گلت بضوجة
-الـجـازي: يا ضيم الولاني ماولى أحد راح يتناقشون بالسيارات والفرخة راح تطلع من حلگي
گالت خاله بهدوء
-ابـابـيل: اهدأ ماما لا تصيح وتنخبص مبين الألم مو قوي بعده والجازي مداخلة بالطلق الحامي وراح نروح براحتنا ونلحگ بس على كيفكم ، روح ميكائيل طلع سيارة صغيرة حتى نگدر نصعد زوجة اخوك بيها يلا ماما لا تخافون
ركض بسرعة ميكائيل جوه وخطية بسرعة جاب سيارة ركبوني بيها على السريع ومشينا
أول ماصلنا للمستشفى حسيت الألم راح وهدأت صعدوني للغرفة وطبت الدكتورة بس مو دكتورتي حتى تفحصني
-علياء: بعدچ عيني للظهر يالله تولدين بعدها ما جاي الطلق الحار وحتى مي منازل عليچ هاي تقلصات طبيعية
كضيت ايدها وگلت بترجي
-الـجـازي: لا تگليلهم عدها ولادة
-علياء: ليش ماما
-الـجـازي: دكتورة فدوة اغديلچ رجلي وأمه ماريدهم يعرفون عندي ولادة لبين ما تجي أمي گليلهم عدها نزيف بس ماكو ولادة
عاينت بـ أستغراب وهمست
-علياء: إذا اكو شي يهددچ وخايفة منه گليلي
هزيت رأسي برفض وهمست
-الـجـازي: بس ساعديني بهاي الطريقة ومن تجي أمي هي تحچيلچ
-علياء: تمام راح انتظر الوالدة أول ما تجي خليها تمر عليه
-الـجـازي: أن شاء الله
عافتني وطلعت سمعتها تگللهم
-علياء: ما عندة ولادة بس المريضة داتنزف اتصلوا على أهلها راح نخليها تحت المراقبة منا لـ الظهر يالله لأن ميصير هسه تجيب ومو وقته وما عليها شر نحاول نسيطر على النزيف
سمعت ديوان شلون صار يحچي وياها بخوف تچيت رأسي ونزلت دموعي ما ردت هيچ صير بس بيوم الي نفقد عاشور يوم كامل محد يعرف خبره والقلق العشناه ما چنت اعرف گصايب ورا هاي السالفة كلها
اتذكرت بـ يومها چنت بالحديقة گاعدة و شلون خابرتني سُمانه تبچي منهارة وتگول
-سُـمانه: عاشور مفقود وماله أيَّ أثر وما جاي يلگونه من وقت استراحته وهو مختفي
لطمت حيل
-الـجـازي: شلون يعني شلون هيچ صار ياهو گللكم
-سُـمانه: صياد وهو مخابره قصي مساعد عاشور وگالوا له ولچ الجازي بس لا عاشور بي شي نموت ورا والله
گمت وانه احچي
-الـجـازي: إسم الله تفي من حلگچ خايبة لا أنوب تفاولين عليه
عاينت للباب شفت طلعت گصايب بس شافتني گالت
-گـصايب: ها وجهج أصفر گلتلچ راح ابجيچ دم على الشاده ظهرچ بيهم وبدأيت بعاشور والجاي أكثر
عاينت الها بحقد ما جاي استوعب معقولة تگدر تموت بشر على حساب ماضيها ؟
-الـجـازي: أنتِ السبب بـ أختفاء عاشور وين وديتي ؟
ضحكت بشماته
-گـصايب: تلگينه هسه كتلوا وراحت الدنيا بـ أهلها لبسي ثوب الأسود من هسه على إبن خالچ إذا ما صفيتكم وأحد وأحد ما اطلع انا گصايب
تگربت منها احچي بعصبية
-الـجـازي: لبسنا الأسود عليچ گولي آمين عايني ولچ عجوز اللبين إذا صار على اخوتي شي ما تطلعين منها أقسم بذات الله هنا وبنص بيتچ اخنگچ بهاي ايدي واموتچ بنص أهل بيتچ وما تهزيني ولا تهتز مني شعرة وحدة
عاينت لي من فوگ الجوه ووجها مرسوم عليه ابتسامة سامة ومستفزة
عافتني ودشت بسرعة خابرت صياد و گلتله كلشي وهو نخبص خبص ظليت ساكتة واتحلطم وكل شويه أتصل على اهلي ديوان ماكو عنده شغل كالعادة
وانه ظاله بناري وين النص الليل واحنا نلوب عليه شفنا الموت بعيونا دز صياد مقطع صوت بكروب العائلة يگول
-صـيـاد: مابي شي بس المنطقة الي جان بيها خارج نطاق التغطية وهسه هو بالواجب مالته وكلشي مابي تطمنوا
شويه ارتاحينا جرينا نفس وخاصة بعد ما متصل على أهلي ومطمنهم وعدت نفسي احرگ گلبها مثل ما حرگت گلوبنا على عاشور ...
فزيت على حس دشة ديوان وأمه حتى يطمئنون عليّ وجانوا حاطلي مغذي تقريبًا گعد يم رأسي حبني وگال
-ديـوان: لا تخافين هسه توصل دكتورتچ ونشوف سبب النزف يمكن غزولة مستعجلة تريد تطلع
اعاين الوجهة گوة مصبر على روحة ويحچي بدون ما يبين على ملامحة الخوف بس شفته بيضة ووجهة أصفر من القلق
حطيت رأسي على زند ايده وصرت ابچي انحرگ گلبي عليه وعلى خوفته عليه گلت بشهگة
-الـجـازي: ديوان فدوة لا تخاف عليه انه كلشي مابيه زينة
حضن رأسي يبوس بي ويهمس
-ديـوان: أن شاء الله زينة يعمري أن شاء الله يارب
خالة ابابيل فتحت قرآنها وگعد تقرأ بصوت هادئ تحاول تخفف من التوتر والقلق الي صار
مرت تقريبًا ثلاث ساعات أو أكثر بشوية
طبوا كلهم مخترعين گبل أمي اجت علي شبكتني بخوف تحچي
-كـحِيلـة: يمه بنيتي شمالچ ليش تنزفين بعدچ ببداية شهرچ
-الـجـازي: على كيفچ أمي ما بيه شي لا تخفون عليّ
شفت صياد يحچي ويا ديوان شويه وصاح صاح بعصبية
-صـيـاد: شنو تجيب يعني شلون تجيب
عاط بي ديوان بزهك
-ديـوان: يعني تجيب تولد حالها حال الاوادم قابل تبيض وتگعد على البيضات وننتظرهن يفقسن
گال صياد وهو ينتر بروحه
-صـيـاد: وهسه أختي حالتها مو زينة بلا صارلها شي
-ديـوان: لعد شسويلها احبل بمكانها
راحت أمي جرته وگعدته حتى يهدأ اجاني گعد يمي حط رأسي على صدره حاضني ظليت اهدي بي
كعدوا شويه وگالت خاله ابابيل
-ابـابـيل: لعد اني حروح اجيب جنطتها واجي من طلعنا نخبصنا وكلشي نسينا
ترخصت وگامت هي وميكائيل يوصلها
گال عاشور قبل ما يطلع وهو يأشر الديوان
-عـاشور: إذا صار على الجازي شي أنتَ تتحمل المسؤولية
-ديـوان: لا بالله خاف متقبل ترا مرتي مرتي والي بطنها بنتي تخاف عليها أكثر مني لو شنو
خزرة وعافنا وطلع من الغرفة طلع ديوان گال يجيب شي نشربه
أول ماطلع گعدت احچيلهم مابيه شي والصار اتفاق ويا الدكتورة لان ببالي خطة على گصايب
-سُـمانه: طرگاعة الفتچ يا مصومخة الولد راح تتراشك وأنتِ كلشي ما بيچ
غميتها وگلت بضوجة
-الـجـازي: عينچ بحافرچ والچلب يدافرچ أنوب اموتن وتظل بتي يتيمة خفه لهذا الحلچ لو تموتين ما ازوجچ أخوي
شفت صياد أبتسم ودار وجهة وهو يحمحم حسيت على جفصتي وسمسم شيسكتها بعد
-سُـمانه: لا وشنو اني ميته على اخوچ همزين صيدلانية وراح أدخل جامعة ومن هسه يخطبون بيه
گال صياد بصوت عالي
-صـيـاد: هوب هوب وين مودينچ تدرسين لو تحبين وتزوجين
ندستها عمه فاتن حتى تسكت گامت أمي راحت تتفاهم ويا الدكتورة وأنه عندي ألم خفيف كلش وكلوني گوه وخلوني اغفى كلها طلعت بس أمي وعمتي وصياد وسمسم وديوان ظلوا يمي
سُـمانه ...
غفت الجازي عدلت فراشها وغطيتها
رفعت رأسي شفته گلب وجهة من كلامي وجعة أمي ولا أهتميت عفته وانشغلت اسولف وياهم
گالت الدكتورة إحتمال يصير عدها طلق وصح بس صار الظهر والجازي الله نزل عليها صريخ صارت تلطگ
اجت دكتورتها اسماء وگبل دخلوها گالوا ما تحتاج عملية راح تجيب طبيعي أباوع وجوهم كلهم صفرت وحمرت ديوان گعد بالگاع وتجه ايده على ركبته
راحتله أمه
-ابـابـيل: گوم أمي على كيفك أن شاء الله يسيطرون على الوضع گول يا الله
گال وهو عيونه على الغرفة مال الولادة
-ديـوان: مابيه يمه حيلي ما يشيلني خايف عليها
اباوعله راد يموت شگد ما مبين قوي بس كله يرجف وشفايفة يتحركن مدري شيقرأ طول ما هي جوه
عمتي دخلت وياها واحنا باقين ننتظر والحمد لله ولادتها كلش سهلت ديوان گبل ركض للدكتورو علمود الجازي حتى بنته نساها ولا باوع عليها
-ديـوان: ها دكتورة بشريني بيها شي الجازي
-اسماء: لاا الحمد لله بخير راح ننقلها للغرفة مالتها ولادتها سهلة والبنت سليمة ووزنها طبيعي وكل الأمور تمام
شفت عاشور اجه رحتله وهو گال بخوف
-عـاشور: ها تاجهن شبيها عزيزة عيونا
مسحت دموعي وگالت
-سُـمانه: ولدت بنوته وثنينهم بخير
حضني وهمس براحة
-عـاشور: الحمد لله
طلعوا الطفلة عنونه كلش أباوع عليهم ولا وأحد موجود كلهم راحوا لـ الجازي وعافوا الطفلة بس إني وعاشور بقينا انطت الممرضة على أساس الطفلة الي خفت منها ماگدرت اشيلها گلت بخوف
-سُـمانه: لا عفية اني أخاف ماگدر اشيلها
گالت بضحكة
- ليش هاي القمر محد يريد يستلمها اذا متردوها اخذها واشرد بيها هالحلوة هاي
اتقرب عاشور أنطته الطفلة وگلتله
- سمعتك تگول أختي اختي خبصتنا يلا هاي بنت أختك شيلها يا خالو
اباوع عليه أبتسم شالها وعيونه كلها حب والضحكة ملت وجهة
ناغاها يحچي
-عـاشور: ها خالو عافوچ ما شالوچ يروحي خلص تعاي انه اهلچ انه اشيلچ
مشينه الغرفة الجازي وبعدها بحضنه التمينه عليها نباوع الها چانت حيل صغيرونة حطوها بچربايتها
اجه ديوان شالها وضمها الصدرة مدري شهمس بأذنها منظرهم يجنن
بعدها اجو أهل ديوان ونگلبت المستشفى على غزولة على ما طلعت الجازي بدلنا ملابسها ولبسناها حجاب وضبطت وجهه حتى ماتبين تعبانة مسويلها غرفة تجنن كلها زينة ونفاخ بلون وردي
جابولها بنتها أباوع عليها شلون لمتها الصدرها تشمشم بيها ودموعها تنزل قربتها على وجها وهمست بدموع
-الـجـازي: لو تدرين شكثر صارعت حتى تجين الهاي الدنيا لو تدرين الأيام والليالي الحلمت بيها بهاي اللحظة جان سويتيلي تمثال ولچ غزيلة
ضحكنا على كلامها گالت عمتي
-كـحِيلـة: شنهي مسويه منية على عزيزة جدتها جايبتها للدنيا
-الـجـازي: يا يمه بعتيني لجل فصمة ماصارلها ساعة من اجت
-فـاتـن: أيّ عيني أعز من الولد ولد الولد شعبالچ
شمة بنتها وگالت
-الـجـازي: لاله انه هسه يلا عرفت معزتنا عند أمي وشكثر هي تحبنا هسه يلا حسيت بيها
خلوها ترضعها وتطنوا من كل الأمور تمام شالتها عمتي ورجعتها الچربايتها
شويه وطبوا كلهم تحمدولها بالسلامة گعدوا
أباوع لـ الجازي گعد يم رأسها ديوان يحچي
-ديـوان: ها غزالتي الحمد لله على سلامتچ يروحي
أبتسمت الجازي وهي تحط رأسها على صدره
-الـجـازي: الله يسلمك بعد أفادي أنتَ وين غزولتنا سميتها لو بعدك
شالها من جربايتها وحطها بحضنه
-ديـوان: لا انتظرچ نسميها اني وياچ حبيبي
شالتها الجازي وديوان محاوطهم
-ديـوان: شنو ببالچ أسماء غزالتي
گالها وهو يعدل حجابها ويبتسم الها بكل حب
-الـجـازي: مادري كيفك أنتَ شني تحب تسميها بس موش لزانيا ومينوصه ومدري شنهي أسماء عربية أريد وهيچ حلوة
ضحك وباوع الها وهو يتبسم بهدو دار وجهه
-ديـوان: مساعدة شباب اقتراحاتكم
-صـيـاد: دام دلعها غزولة محد يصيح الها بأسمها أيَّ شي كيفك
-ميكائيل: فكتوريا نسميها
باوعتله الجازي مدت رأسها من جتف ديوان تحچي
-الـجـازي: وهاي إذا اريدن اصيحلها يمتى اخلص الإسم رايحة سالفة وانه بعدني أصيح بـ إسمها
-عـاشور: هي مو دلعها غزال ؟
هز راسه ديوان بموافقة
-عـاشور: سميها شادن معنى الغزال الصغير وهم دلعها مشتق من إسمها وإسم أمها
-ديـوان: حلو حيل حلو الإسم ونفس دلعها شتگولين غزالتي
ضحكت الجازي وهي عيونها بين عاشور وديوان
-الـجـازي: يجنن حلو دامه ذوق أخوي
رفعها ديوان وكبر بأذانها وسماها اخذتها الجازي وعوجت حلگها تحچي
-الـجـازي: شصار عليك گول أشهد أن علي ولي الله وأولاده المعصومين حجج الله شدعوة عليك
انطتها الأبوي تحچي
-الـجـازي: هاك خالي أنتَ هم كبر بأذنها ولا تنسى الگلت عليهن
گام بابا اخذتها وظل يكبر ويأذن بأذنها وهي تبتسم عمتي تگول يضحكها غزيل
ضحك ديوان وشبكها أكثر اله شويه دخلوا جده وأبو والغرفة صارت هوسة رغم چبيرة
أباوع على عاشور فتح تليفونه وملامحة نگلبت كلها غضب عافنا وطلع بسرعة لحگه صياد وطلعوا الولد كلها بقينا بس إحنا وأهل ديوان رجعوا البيتهم
أقل النص ساعة وطب صياد گال بـ أستعجال
-صـيـاد: يالله سُمانه گومي للبيت
گلتله بقهر
-سُـمانه: لا صياد حباب أريد ابقى يم غزولة وجوزة
گال بنترة
-صـيـاد: راح تروح البيت رجلها يطلعوها كلشي مابيها تردين اوديچ البيت يامن يعني اشدهن ستيل ياحجم تردين ؟
نفخت بقهر وبضوجة وانا اگوم واضرب رجلي عبرته
-سُـمانه: هسه اگول العاشور وسُطام وأريد اشوف منو يمنعني إذا وافقوا
طلع وراي وهو يدردم
-صـيـاد: ترى هو عاشور الگال وما انصحچ ترحين تحچين ويا هسه روحه بخشمه حتى انه لاحني طشار منه
-سُـمانه: لا تدخل
عفته وطلعت دمعت عيوني من شفت عاشور متجي روحه على السيارة وحواجبه معقودة وصلت يمه وهمست
-سُـمانه: عاشور صدگ ما تخليني أبقى ويا جوزه وغزولة بس اني احبهن وأريد ابقى اساعدها حباب خليني
أستغفر بقلة حيله ودار وجهة يمسح بي لزم أيدي بحنية
-عـاشور: ولچ تاجهن لو غيرچ يداهرني بهاي الضيجة الا اخلي أمه تنوح عليه لا تضوجيني فدوة اروحلچ لازم ترجعين للبيت أم صياد راح تروح ويا بنتها لبيتهم ما يصير ترحين أنتِ بنت حلوة وحبابة وتسمعين الكلام ميصير ترحين البيت ناس مو كلش نعرفهم وتبقين بي وأحد من ولدهم ما متزوج والثاني خاطبچ ما يصير ترحين وعد اخلي سُطام يوديج العصر الهم ويرجعچ بالليل الحدما تملين
طبطب على خدي بحنيه وأبتسم بتعب
-عـاشور: ها تاج البنات متفقين بابا ؟
هزيت رأسي بإيجاب نط صياد يحچي
-صـيـاد: وليش سُطام يوديها يعني سُطام عنده شغل انه اوديها انتظرها ساعة وارجعها
گله عاشور بعصبية
-عـاشور: أنتَ العصر تولي تلتحق وهي اليوم ما تروح باچر شنو رأيك نعوف الواجب ونگابل سُمانه أستاذ صياد ؟
أباوع عليهم كل وأحد ما طايق روحه لا عاشور ولا صياد
صعدت وصياد وراي وراي يمشي نفت وگلت
-سُـمانه: شبيك دخيل الله راح ياكلوني
-صـيـاد: اششش تمشين وأنتِ ساكته
خلت بوست الجازي وبوست غزولة الي تجننن متت بيها وهي بس نايمة وتنوص على كيف
ونزلنا راجعين صعدت بالسيارة ورا
وأمي گالت أبقى ويجوز تروح وياهم لان مايخلوها وحدها يخافون عليها
اختنگت ثنينهم يحشون بالجگاير گال صياد
-صـيـاد: بعدها حاطة بلوك !
ضرب عاشور الستيرن على كيف وگال بقهر
-عـاشور: كتلتني كتل بس لو أعرف شسويت ما سويت شي يشهد الله الفين مرة عدت كلامي كلمة كلمة خاف بوحدة منهن غثيتها ولك انه تگلي ازعجك واضوجك عايف أستراحتي بس حتى ما اكسر خاطرها تفكر زاعجتني ؟
-صـيـاد: چا شني قابل مسودنه منها والوحدها تحمض شوف شمسوي أنتَ بس إذا كروتها ٣٠٠ ألف رحمة الابوك ما تدخل واسطة وتخليني اشتغل عدها سايق
باوع عاشور عليه بعصبية وضربه حيل على صدره
-عـاشور: نجب هاي لـ ٣٠٠ العاجبتك حارگتني حرگ انه تالي عمري هي تنطيني فلوس كروة ؟ بس ارجع اشمرهن شمر وحگ أبو الحسنين سهلة سهلة بسيطة
سحب دخان صياد وهو يحچي بتعب
-صـيـاد: ودعاء شراح تسوي برسائل الدزتهن الَك
تجه عاشور ايده وگال بحيرة
-عـاشور: اندري هي هاي بقت برأسي عقل يفكر وگال الامر ورا الأربعين عدنا مهمة انه وياك وبعد چم وأحد
فتح تليفونه صياد وشوفه أوراق
-صـيـاد: شوف هاي البضاعة مال الاقمشه كلها تالفه بملاين جايبين بضاعة بعد الحرك وكلهن تلف وطلعت عليهم لجنة وكلهم صدروهن
باوعله عاشور بصدمة ممزوجة بضحكة
-عـاشور: خرب يومك فندتهم ما جاي تخليهم يشتغلون أبد ولَك عرب چول
گله بنبرة صوت لعوبة
-صـيـاد: بصوت ذاك الواحد عيل شلون
ضحكت باوعلي عاشور من الجامة مضيق عيونه
-عـاشور: ولَك تاجهن بيك خطة تعرف تنفذها ؟
باوعتله بصدمة وباوعت الصياد أشرت على نفسي
-سُـمانه: اني ؟
-عـاشور: أيّ جا صويد المصلبخ
-سُـمانه: شنو هي الخطة ؟
طلع رقم من تليفونه ونطانياه مكتوب على الرقم hot وايموجي النار
-عـاشور: حفظي هذا الرقم بتليفونچ نحتاجه بعدين خوش
حفظته
-سُـمانه: شكتب عليه
ضحك
-عـاشور: hot عرب چول وردة ڤيڤات ڤيڤي روڤان كيفچ
-سُـمانه: اممم ڤيڤات حلو
وصلنا للبيت هلكانين من التعب طريق النجف وهوسة المستشفى
دخلت وگبل للحمام سبحت وبعدها نظفت البيت وسويت غداء وهَم كل وأحد صعد الغرفته للعصر صار وقت التحاق صياد گمت حطيتله أكل بحافظة وحطيتهم بجيس وحده لأن تلعب نفسه يحطها ويا الهدوم
نزل مستعجل صحتله واني اركض ورا
-سُـمانه: صياد صياد لحظة
وكف بسرعة من سمع صوتي وضرب على رجله وصاح بقهر
-صـيـاد: هو أسمي انوثته زايدة مدري صوتها دخيلك يا علي
لتفت أبتسمت ونطيته العلاگه وگلت بدلع
-سُـمانه: لا تنسى اكلك مو تبقى بدون أكل مو زين عليك صياد
عيونه ذبلت وجر نفس أستغفر وگال
-صـيـاد: شيصير لو ماعندي ثار وماكو داعش وماكو وطن برگبتي
اخذهن من أيدي عافني وطلع بسرعة أستودعته الرحمن الرحيم يحمي ويرجعه النا سالم
بقينا انا وعاشور بالبيت سُطام راح الشغله وهاشم اصلًا ما اجه ويانه أيام محرم يصيرون العتبات مليانه وماينطونه اجازة أبد
𔓕𔓕𔓕
الـجـازي ...
طلعوني للبيت ولگيتهم محضرين عجل چبير مجرد ما وصلت ذبحوا وخلوني أدوس على دم وساندني ديوان وأمي شايله غزولة بس عبالك مو غزولة وليه العهد صارت من أيد الأيد وكلهم ملتمين عليها
طبينا حطها ديوان بحضن جده
-إبـراهـيم: هلا بغزولة من باب الحوش اللهم صل على محمد وعلى ال محمد شادن واسمها عليها غزال البيت نورتي بيتچ جدو
گصايب بس باوعتلها من بعيد ماتعرف ضامتلها ضميمة بس الله يعلم بيها انه تبچيني على عاشور ؟
بسيطة يا عجوز الشأم
دموعي نزلت ودنيت يم ديوان
-الـجـازي: ديوان لا تخلي گصايب تشيل غزولة أخاف عليها بسببها چانت بنتي راح تموت وصار عندي نزف وولادة
باوعلي متعجب ومتسغرب من كلامي
-ديـوان: ليش شعليها گصايب
حچيت وانا اسوي روحي مقهورة
-الـجـازي: من الأعشاب الي نطتني إياها طلعت مال تسقيط الطفل وانا على فطاريتي شربتها رغم حذرتني أنتَ وحتى الدكتورة كلتلي رادت الطفلة تموت من النزف وشكل خطر على حياتها بس انه ما خليتها تگلك حتى لا تخاف عليّ أكثر بس دام طلعنا بسلامة انه وغزولة لازم اگللك تتصرف وإذا ما نصرفت انه اخذ بنتي وامشي البيت أهلي ما أمن عليّ وعليها هنا گصايب تكرهني وكلشي تسوي وانه متأكدة سبب هذا الكرة اله علاقة بماضي ابوي
ملامحة كلها تشنجت وصار يضغط على فكه حيل بعصبية هز رأسه ساكت
مر الوكت وصعدنا انه وأمي وعمة فاتن نظفن الغرفة وغرفه غزولة سويتاها بداخل السويت مال الغرفة ما نأمن عليها وحدها اتفقنا انه وديوان هنا أأمن الها
كل هذا وهو يلوب ما تحمل نزل جوه نزلت ورا طب لزمته من ايده عاين لي
-ديـوان: توگف عند حدها وهاي المرة بشكل نهائي ؟
طبيت ويا لگيت گصايب وجده إبراهيم گاعدين صاح ديوان وهو يتوجه الگصايب
-ديـوان: بسببچ ردت أخسر بنتي ومرتي شلون تشربيها هيچ أعشاب ، رادت تموت هي وبنتي
يحچي ويرجف من العصبية صاح جده
-إبـراهـيم: گصايب ما توبين وتالي
ملامحها مصدومة وتعاين عليّ بحقد لبدت ورا ظهر ديوان واحچي بصوت هادئ
-الـجـازي: امشي ديوان خلص الله يسامحها بس عوفها
وسعت عيونها وگالت
-گـصايب: الله والقرآن عليه من كون مسويتلها لو مشربتها شي
-ديـوان: هاي مره لا جدي ولا أيّ واحد تنسيم ماتبقى بالبيت ثانية كل التخطيط منها إذا تبقى بالبيت انه طالع واضح جدي ، رادوا يكتلون بنتي مرتين ليش
نزل رأسه جده
-إبـراهـيم: الَك كل الصلاحيات الي تريده سوي أبني
حچت بأعتراض وعصبية
-گـصايب: عيدوا الكامرات وشوفوا والله ما سوينه شي عيدوا الكامرات
صاح بيها وهو يسحبها من ايدها
-إبـراهـيم: بالله ما كافي هذا الحچي ما كافي هاي المرة المليون تتهمون البنت وتصخمون وفتحوا الكاميرات ويطلع الغلط بيكم كاميرات ما تنفتح لو تنگلب الدنيا والي يگوله ديوان يصير
-ديـوان: لا جدي ميخالف نفتح الكاميرات
گال بـ أعتراض
-إبـراهـيم: لا إذا تفتحها اغضب عليك اليوم الدين كافي تفشلنا البنت هيچ مسوين بيها ويموتون بتها قبل ولادتها هاي هي
گام ديوان وهي صرخ وتلطم وتبچي وتصيح عليه الظالم طلعت تنسيم صاح بيها أبوها
-إبـراهـيم: تنسيم تاخذين هدومچ وترحين يم أختي وهاي هي أنتهى النقاش ومون ماتروح وياچ
استغل دوان انشغال جده ويا تنسيم وگال الگصايب بحذر
-ديـوان: لا عبالچ ناسيلچ سالفة المرأة الاجت من الريف وطلعت جزء من فضايحچ حجية جايچ الدور وجاري البحث بالماضي بس خلي افرغلچ شويه لو عبالچ مادري من گلتي القاسم يطرد سيد مهيوب اني الچ بس اخلص شغلي
ابتسمت وهي عيونها رادن ينطن من مكانهن ماخلاها تحچي
أنگلب البيت صريخ سحبني ديوان وسحب مون وصعدنا
-ديـوان: تعاي گعدي يم الجازي وصليها للغرفة اجيب مشاعل واجي
راح الغرفه مشاعل وطبت مون وملامح الحزن على وجهه من شافت أمي أبتسمت
-مـون: شلونچ باجي حبيبتي
شكبتها أمي وحنيتها شعت منها
-كـحِيلـة: بعد روحي يمه هلا بيچ زوينة من شفت هذا الوجهه الحلو حبيبتي
طب ديوان ورا مشاعل سلمت وگعدت على جهه شالت عمه فاتن غزولة وحطتها بحضنها باوعتلها بـ أستغراب وگالت بقلق
-مشاعل: لا باجي عفيه أخاف أأذيها ماعرف اشيلها
أبتسمت بوجهه
-فـاتـن: لا لتخافين حبيبتي مراح تأذيها أنتَ عمتها مثل أمها
شالتها وصارت تبوس ايديها على كيف وديوان نزل جوه ماعرف شصار بعد بس العرفته طلعت من البيت تنسيم وديوان مادري شنو حچه ويا گصايب وخلاها تسكت طول الوكت مافتحت حلگها وحچي
غافلتهم ونزلت لـ گصايب شفتها گاعدة ولونها مخطوف وتبچي بهدوء على بنتها
گعدت برهاوة وانه أبتسم بشماتة
-الـجـازي: هسه منو البچة أخوي خدش ما صابه وبنتج الي بچت دم على بنتها وبچيتچ دم على بنتچ
دنكت يمها وحطيت صبعي على رأسها
-الـجـازي: فهمي گصايب إحنا الثار عدنا يتضاعف تأذيني بواحد ارجعه مربع أضعاف انه الجازي بت النشمي اعتقد تتذكرين حچايتي عدل
دفعت ايدي ونترت بشر
-گـصايب: وخري لا بارك الله بيچ
كملت بقوة وأنا اعدل وگفتي
-الـجـازي: ما طحت ولا اطيح وامشي برهاوة وحصتي من حلك السبع اخذها خاوة
عفتها وصعدت الغرفتي ديوان نام بغير غرفة وأمي وعمة فاتن نامن يمي
𔓕𔓕𔓕
صـيـاد ...
بعد التحاق دام خمس أيام اجانه أمر فجأة بدون سابق انذار عمليات مشتركة دخل الأمر وگال
-ماجد: صياد راح ادزلك عاشور تاخذه وتوگفون على طريق راح يمر من عنده سيارات محملة بنات مختطفات من قبل داعش وضيفتكم تحررون البنات بدون أيَّ ضرر أو يمسهم شي وقتل جميع الدواعش الموجود بالعملية لا ترجعون شي وياكم
گمت اجهز بنفسي واحچي
-صـيـاد: حاضر سيدي
كملت تجهيز الجنود وطلعنا على الطريق الي المفروض نلتقي ويا الفوج الثاني وصلنا هناك لگيت عاشور واكف ومجهز نزلت اله
-صـيـاد: مو اجازاتك شعندك لافي
گال بضوجة وهو يحش جگاير
-عـاشور: گطعتها چا أخلي البنيات ينسبن بسبب هذول النجسين هسه اكر بيهم كر ولد النجس
ذب الجگارة وداس بيها حيل يفرها برجله بعصبية
-صـيـاد: راح تجرم بيهم
هز رأسه وصعد بالهمر صعدت ورا ، مشينا مسافة مو بعيدة بدينا نحاصر المنطقة مرت نص ساعة مو أكثر عرفنا تحركات سيارات داعش من طبوا تحاصر المكان وانغلق لا طبة ولا طلعة ولا رجعة
وجهم
-عـاشور: تقدم بسرعه قصي الزم الخط الورا مروان توجه لـ السيارات البيها بنات وتأكد مايوصلهم شي
بدت مواجهه بينا وجان لا يستهان بيهم مدربين عدل شفت عاشور يرمي ويتقدم صحت بزهگ
-صـيـاد: ولَك هوووو عاشور لا تتقدم لا تتقدم موش جهال وگاعد وياهم وتتقدم أرجع نعل الله بليسك من تركب رأسك
ما اهتم الحچي ورجع يتقدم صار داعش بظهره خفت عليه رحت لزگت ظهري بظهره
-صـيـاد: ولَك عاشور راح تجيب اجلنا وحك داحي الباب
صاح بصوت عالي يخلي هذول الدواعش ينثولون
-عـاشور: هاي الگاع بيها أسباع ما واحد وصل ليها من حيدر ماخذ هالسيرة ومن حسين دروس دروس
مجرد ما يظل يگول ويردد هيچ هو يربح المعركة لان يشتغل على العامل النفسي وياهم بحيث مجرد ما يردد هيچ حچي وهوسات يفقدون أعصابهم يتصرفون غلط
تقدموا الجنود مالته والدواعش قاوموا يرمون بكل قوة تصاوب وأحد من فوج عاشور أحتقن وجهه وتقدم بسرعة أمشي ورا ظهره وهو يتقدم ويرمي مباشر ويصيح
-عـاشور: جنود حسين وانصاره گولوا يا علي وتقدموا منصورين بإسم الواحد الأحد مأيدين بجنود من الله وباأهل البيت
كل ما يهتف أكثر كل ما تصير العزيمة أكبر صح أكو جرحة بس گدرنا نسيطر
شتد الرمي ونختمت بهزيمة الدواعش ..
نقلنا البنات بعد ما تأكدنا ولا وحده صابها شي بس أكو وحدة
- سيدييي اغجوك تصوبت اغوجك ساعدني
راح يركض الها عاشور شافها متصوبه شخط عميق بفخذ رجلها ساعدها حتى يكومها ما گدرت شالها بسرعو وصعدها بالهمر مال الفوج مالته
-عـاشور: صياد أنقل باقي البنات البغداد وراح اخذها هناك للمنطقه يعالجوها حتى مناك اطلعها للمستشفى
نسحبت القوات وتوجهنا البغداد وعاشور نقل البنت وتوجه للقرية
روڤـان ...
عرفت أن هو نزل خلص الواجب طلعت اتمشى حوالين البيت لبست فستان وردي وفي خطوط بيض ولبست سكارف وردي
طلعت اتمشى بهدوء سمعت صوت الهمرات صفت ما أهتميت مافي جديد تعودنا على هيك أصوات بس لفتني القصيدة الي مشغليها صارت صوت كثير قوي درت شفت عاشور فاتح باب الهمر واكف وهَم سوو مثل الدائرة يلطمون بيها الجنود نزل يمهم
صار بنصهم وصاح بصوت عالي وصوته كان مليان قوة وحنية
-عـاشور: يا عقيلة اليوم عندچ مو كفيل إحنا كوافل كلنا مدربين في مدرسة الغيرة أبو فاضل نرفع الراية جنود حمايه زينب الغاية
قالوا بصوت عالي
- اللهم صل على محمد وآل محمد وعجل فرج صاحب العصر والزمان
بسرعة عدت ادراجي ورجعت للبيت خمس دقايق وندك الباب حيل طلع بابا بسرعة وهو يحكي
-جـوزيـف: الرب يحمينا شنو صار برا
فتح الباب سمعت صوت عاشور وهو يقول
-عـاشور: بسرعة دكتور صيح روڤان تعالج البنية خطية أثر الهجوم تصوبت جرحها شويه عميق
-جـوزيـف: بس خاف روڤان مادبرها اني اجي وياك سيدي
-عـاشور: تعال أنتَ واشرف على روڤان البنية مسلمة وتستحرم رجاءً على سريع
دخل مستعجل اجاني قمت ويا كتير خفت على البنت وحطيت حالي محلها أكيد راح احتاج حدا يطمني ويسندني طلعت معه من باوعلي جر نفس وكان صارلو مش متنفس شهر
ما حكيت شي مشينا بسرعة خلفه للمقر طبيت مع بابا وبديت أشتغل بس بخاف كتير اديناتي ترجف بعدني بابا
-جـوزيـف: لا بابا راح تأذيها هيچ وخري هسه اسويها
بعدت عنها وقفت ورا وبلشت اعطي وهو يعالجها عاشور ظل برا على اساس بيستحرم بيشوف رجل البنات شو كذاب هالرجل وريائي
كملت والبنت نامت من الوجع والألم الله يعينها
-جـوزيـف: رجعي للبيت بابا اني أنتظرها أشوف حالتها وين تستقر وأرجع وراچ
بوست رأسه
-روڤـان: بس تحس حالك بحاجتي أتصل علييّ ماشي يروحي !
-جـوزيـف: تمام بنتي ديري بالچ على نفسچ ولا ترحين منا ومنا
طلعت شفته واقف بالباب
-عـاشور: ها شلون لونها الفريخة ؟
عقجت حاجبي لأن ما فهمت
-روڤـان: بيضة البنت شو لونها يعني ما شفتها وأنتَ جايبها
ضحك وتطلع فيني يتفحص ملامحي
-عـاشور: ولَك hot قصدي وضعها الصحي شلونه
حكيت وأنا اطلع قدامي ما بشوفوا
-روڤـان: منيحة البنت وإذا بدك معلومات أكثر شوف بابا هو بيعرف اكثر عن اذنك سيادة الضابط
مشيت مشى خلفي صاح بيه بس شوي بعدنا عن الكرفان
-عـاشور: وحگ أبو فاضل وحگ أبو رأس الحار اذا ما وكفتي مثل الأوادم وگلتي شمالچ متسودنه وشنهي السبب الي يخليچ هيچ متغيرة الخمچ على عينچ واطفيها لو مو روڤان تصيرين
وقفت بعصبية ودرت عليه بس بخاف منو ما بقدر اعلي صوتي او انتر بوشوا كان معصب وملامحة جدية
قلت بهدوء
-روڤـان: مافيني شي وأنا وضعي طبيعي أنتَ حاسس بشي غلط
باوعلي بصدمة وحط ايده بجيوبه ودنك يباوعلي بشك
-عـاشور: الي ما تنسد محادثتي انه وياها إلا واحد بينا نايم فجأة الكه روحي منطيني بلوك الي تجيني بلهفة وشحلاتها هي وضحكتها بس تصير أستراحتي أنتظرتها أسبوع ما طلعت من بيتهم الي مابيني وبينها سر صارت نافره مني هذا كله وتگولين طبيعية وماكو شي
نزلت دموعي وباوعتله بقهر
ضرب على رجله طرقات خفيفة وسوه حركة شلون الي تشوغ روحه متألم
-عـاشور: اويلي على المهضومة شبيچ يا بعد عيني
قلتله بصوت يرجف وعيوني بتتهرب مش قادرة اسيطر على دموعي
-روڤـان: ليش بتطلع مع بنات إذا بتستحرم لما بجي حدك بتظل تستغفر ومن وراي تطلع مع بنات شو هذا التناقض الي أنتَ فيه و على فكرة شفت رسالة بنت غازي وكيف أنتَ وياها على علاقة خاصة عاشور مش هبلة أنا
صفن فيني رفع حواجبه مستغرب بعدها أبتسم وتقرب شوي ونزل نفسه وقال ببتسامة لعوبة
-عـاشور: يعني هذا كله الي صار غيرة ولَك hot ؟
أحتاريت بروحي أمسح دموعي وابعد نظراتي عنه
-روڤـان: لا طبعًا شو خصني فيك رجاءً أتركني بحالي وأنا كنت اثق فيك ومأمنة على حالي هلا خلص راح الأمان و طابت النفس منك
-عـاشور: البنت تصير بنت عمي وبينا وبينهم ثأر بنت غازي الي كتلوا النشمي والمزن مابيني وبينها علاقة إسمها دعاء وحاجيلچ الموضوع من رحنا وثبتنا شرف المزن
تذكرت الكلام عضيت على شفتي وأستحقرت غبائي بس ما بنطي بحالي مستحيل صحت أعمل أنا صاحبة الحق بالغصب
-روڤـان: مش مبرر كمان لو مش شايفه منك شي ما راح تحكي هيك
تركتوا ومشيت بسرعة صاح
-عـاشور: راح ارجع أفتح تليفوني الگه كل الحظر مشيول من كل مكان غير هذا الحچي راح تشوفين شي ما يعجبچ وانه عاشور خزعل الحچاية ما اثنيها سمعتي
سرعت خطواتي رجعت بسرعة للبيت خفت منه بعرفو مجنون وكل شيء بيعمل فتحت الحظر شوي ودز
-عـاشور: هاي شنو السيارة يم البيت ومنو هاي البنت الي بالباب
رديت عليه
-روڤـان: هي بتكون سابين اختي الكبيرة وصلت وهي سيارة رجلها راح اروح عندها كم يوم ببغداد وأرجع
رجع كتب
-عـاشور: وليش ما گلتيلي سالمين يعني ردتي طلعين وما گايلتلي شو صايره كلش أنتِ ولچ هيو عرب چول ماعندچ وأحد تاخذين رأيه
بعتت ايموجي ضاحك وكتبت
-روڤـان: بدك تصير ولي أمري
-عـاشور: عيل شلون ! على العموم انه موافق على الروحة ومن التحق ترجعين لأن انه حاليًا عندي اجازه ونگطعت علمود نداء ، يمتى طلعون ؟
-روڤـان: شي ساعتين
أتصل فيني أحتاريت شو بعمل سكرت الباب ورديت
-روڤـان: على فكرة زعلانة وما تفكر ممكن أصالحك ماشي
قال مسترخي
-عـاشور: مو مشكلة عيني عرب چول وحقچ عليه احجيلچ عن المووضوع أكثر من نرجع وهاي السالفة هاي المره اعديها مره ثانية اتصرف غير تصرف مفهوم واريد شوف وحدة تعترض هسه !
حسيت بطگة الجگارة
-روڤـان: بتعرف حالك نرجسي ومتسلط
حسيت بنفخه الدخان
-عـاشور: واثق وليس نرجسي وأعرف قيمة نفسي وأخاف عليچ مو متسلط
-روڤـان: جايب حبيبتك معك
ضحك
-عـاشور: اكو أغلى من رامي هاي النفس اليصعد وينزل بس اباوعله ترتاح نفسيتي
ضلينا نحكي شوي دخلت عليه سابين
-سـابيـن: گومي ڤيڤي يالله نروح اجة بابا واليكسا يمه يومين ونرجع شبيچ حتموتين
-روڤـان: جايه وراكي روحي هلا
-عـاشور: عرب چول ياهو گال وافقت تطلعين
ضحكت من كل قلبي
-روڤـان: ما بحكي معك و متزاعلين
-عـاشور: يالله عيني خلي أشغل رامي وبعدين اهلچ كلها تحچي عراقي شمالچ أنتِ الله مغربلچ عاوجتلي الحلگ
گمت حضرت جنطتي وغيرت ملابسي لبست بجامة علشان مريحة طلعت
وقفنا يم السيارة وهو اجه وقف قدامنه بس طلع مجتبى رجل أختي هو مسلم وهي صارت مسلمة كمان
بس طلع نزل من سيارته وقصي ورا بكل احترام قال
-عـاشور: سلام عليكم عيني
صافحى مجتبى وقال
-مـجتبى: وعليكم السلام
باوعله عاشور يتفحص ملامحة قال بجمود
-عـاشور: هويتك واوراق السيارة ومنو الي وياك بالسيارة ؟
أستغرب زوج أختي بس سكت وطلع اله الهوية وأوراق السيارة باوع عاشور القصي وقال
-عـاشور: شو بالله طگهن حاسبة
-مـجتبى: مرتي واختها
-عـاشور: العقد مالتكم ؟
باوع السابين طلعته من جنطتها
-عـاشور: ممم شلون مسلمين وأخت زوجتك مسيحية
-مـجتبى: زوجتي عليه بس أهلها ما اسلموا
هز رأسه دار على قصي مدري شحجة ويا گال بثقة وهو يأشر بيده
-عـاشور: توكل
ودار وجهه وصعد بسيارته سرحت برجوليته وتحركاته والهيبة الي فارضها على الكل صعدت ولما مشيت من جنبو شفته حاط جگارته بيده وأيد لازم الأستيرن ولابس نظارته
من عبرت من يمه نزل المناظر وغمزلي
أبتسمت والسيارة مالته طول الطريق تمشي ورانا
تذمر زوج أختي وقال
-مـجتبى: شسالفة سيارته ما فارگت السيارة هسه اوراقنا سليمة بعد شكو
-سـابيـن: ممكن احترازات أمنية تعرف الوضع خطر وخطيه يخافون على العالم ميخالف
-روڤـان: لا تخاف ما لاحقك بس هو كمان بيتهم ببغداد
أول ما حكيت هيك اثنينهم تطلعوا فيني مستغربين ما اهتميت سويت حالي الاعب ولاد أختي واتكلم معهم
وصلنا للبيت ومر الوقت عادي هدوء ثاني يوم
تقريبًا الظهر بعث الي رسالة
-عـاشور: الساعة بـ ٧ أكو مجلس عزاء للنساء ببيتنا شنو رأيچ تجين وتطلعلچ تاجهن تستقبلچ على أساس صديقتها واضح ؟
اتطلعت بـ أستغراب للتليفون
-روڤـان: كيف بدي اجي شبك عاشور نسيت انا مسيحية والمجلس للمسلمين
-عـاشور: غلطانة الإمام الحسين مو فقط للمسلمين الكل إنسان هو شهيد الإنسانية على العموم تجين الساعة بـ السبعة اوصفلچ المكان وسابين گليلها صديقتي تعرفت عليها بالقرية وبيت جدها عدهم مجلس عزاء وعزمتني بس أنستري ولبسي حجاب وعباية مو تجين هيچ يالله خلي انام مع السلامة
ما انطاني فرصة احكي بسرعة غلقة وطلع آخر ظهور قلت بيني وبين نفسي وأنا اتمدد
-روڤـان: ولما أقول نرجسي ومتسلط بيقول لا لكن كل هي الأوامر شو معناها
نمت وقتت تليفوني بـ ٥ طحيت طلعت لـ سابين زوجها بشغل
-روڤـان: بـ ٧ أريد أروح البيت صديقتي
اتطلعت متفاجأة وهي توكل أبنها العنون رحت جنبها واخذته حطيته بحصني وصرت أوكل بي بدالها
-سـابيـن: ومنين عندچ صديقة بغداد من شوكت عندچ صديقات اصلًا طول عمرچ تضوجين من هيچ أمور
-روڤـان: شوبنا سابين عم كذب عليكِ تعرفت عليها من كنا بالقرية وعيب لازم روح كيف عازمتني
قالت وهي مستغربة
-سـابيـن: ok اني اوصلچ لعد
رحت طلعت الي فستان أسود مستور واخذت حجاب منها وبعرف بالمجالس ما بينحط ميكب وهل أمور ومافي صبغ أظافر مسحت صبغ اظافري وما حطيت ميكب ولبست جواريب سود
صارت بـ ٦ بعتلي رساله فيها عنوان
كتب له
-روڤـان: مين قال راح اجي ؟
رد
-عـاشور: نشوف بـ ٧ إذا ما اجيتي أويلي اركضچ ويا خيول الحمزة ومن يدك عليچ رقم غريب عرفي هاي تاج البنات سُمانه اتصلت عليچ
-روڤـان: تمام
-سـابيـن: حجاب والله شغلتچ مو خالية بعدين شلون مجلس مجاي أفهم روڤان ضامة عليه شي ؟
تلبكت وعملت حالي مشغولة البس حذائي
-روڤـان: شو بدوا يكون يعني مافي شي خلينا نروح بسرعة
مشت السيارة وقت مش قليل حرت بالعنوان راسلته
-روڤـان: عاشور وين العنوان بالضبط مش عم أعرف
-عـاشور: هسه تخابرج تاجهن
دقايق واتصل عليي رقم غريب رديت اجاني صوت بنت كثير ناعم
-سُـمانه: هلو عمري شخبارچ
أستغربت بتحكي كانوا بتعرفني
-روڤـان: اهلين بس ممكن العنوان بضبط
بدت تدليني بالمضبوط شفت بيتت ركن واكف عاشور وجنبوا هيدا الشب الكثير حلو وبالواقع لسه أحلى بكثير من الصور اخو الصغير
-روڤـان: هون هون
-سـابيـن: لما تكملين أتصلي عليه اجي عليچ اني راح افتر شوي اونس الأطفال وارجعلچ تمام
-روڤـان: تمام
مشيت حتى فوت نزل رأسه وأبتسم
أول ما دخلت شفت بنت بتجنن وناعمة هيك صغنونه بتحسها بس شافتني أبتسمت اجت بوستني وحضنتني من كل قلبها حسيت الحنية الفيها مش طبيعية
-سُـمانه: اني سُمانه أخت عاشور تعاي حبيبتي اهلا بيچ تفضلي اهلًا وسهلًا
بادلتها الحضن
-روڤـان: تؤبري قلبي كيفك شو اخبارك
-سُـمانه: الحمد لله تمام حبيبة
دخلت كثير نسوان مشان المجلس كثير تلبكت أول مره هيك بدخل جلستني جنب مرة وقالت
-سُـمانه: ماما گعدي روڤان يمچ
وشاورتها وضحكت طلعت فيني المره وشبكتي
-فـاتـن: يا فدوة يوم تعالي حبيبتي اني أم عاشور فاتن وأم سمانه تعالي حبيبتي گعدي هنا يمي
گعدت جنبها شوي واجت مره ملامحة حادة وجميلة قمت هيبتها من هيبة عاشور اجت وراها سُمانه شفتها وقفت يمي
باوعتلي مضيقه عيونها من فوك الجوه قالت سمانه
-سُـمانه: أم صياد عمتي كحِيلة
قربت مشان بوسها شبكتني بخفة بس كتير حنونة حضنتها
-كـحِيلـة: هلا بيچ يمه حبيبتي
جلست بينهم و سُمانه تروح وترجع توزع للنسوان
بدت الملا تقرأ كلهم بيلطموا بكل حزن وألم على الإمام وكان المقتول أحد منهم معقول في هيك شي الحزن لدرجة بيوزعوا أكل وبيضيفوا وبيفتحوا بيوتهم
-روڤـان: ليه هيك بتعملوا ؟
-سُـمانه: شرف خدمة ال البيت النبي حفيد الرسول محمد صلى الله عليه وآله وسلم الحسين عليه السلام أستشهد مظلوم دفاع عن الدين هو و أولاده وأهل بيته و اصاحبه بهاي الأيام نقيم المأتم ومجالس العزاء نواسي بهاي الفاجعة السيدة زينب والسيدة فاطمة الزهراء وأم البنين عليهن السلام
أشرت على الرايات الي محاوطة الحياطين
-سُـمانه: نلبس السواد ونحتد إحترام على ما حل بمولاتي زينب وكيف نقتلوا أهلها نواسي عقيلة الهاشميين وكل لطمة نلطمها ما تساوي لو ربع من الم السيدة زينب عليها السلام
-روڤـان: وشو الدافع بهذا الشي
أبتسمت ونزلت دموعها
-سُـمانه: نتسجل بدفتر خدام أبا عبد الله ونحصل الشرف نسير للجنة بالسير على نهج محمد وآل محمد وأحياء ذكراهم بكل سنة وكل عام
اتطلع كان مشهد يقشعر اله البدن خلص العزاء وأنا حايرة شو سر هذا الحب وشو سر هذا الولاء المطلق وقررت اسأل عاشور عن هي الأمور هو بيفهمني أحسن
خلص العزاء
بوست سمانه الي تجنن
-سُـمانه: مو تگطعين تعالي دائما حبيتچ ما گدرت اگعد واسولف وياچ بس عيديها خوش
أبتسمت الها بهدوء
-روڤـان: أيّ على عيني حبيبتي
سمعت النسوان شو بيحكوا وقلت مثلهم مشان ما بين
بوست خالة فاتن
-روڤـان: عظم الله أجركم حبيتي خالة الرب يعودكم
شفتها أستغربت بس بقت ابتسامتها وصلت لعمتوا
-روڤـان: مع السلامة خالة
قالت بهدوء وابتسامة حنونة
-كـحِيلـة: مع السلامة ماما
طلعت ركبت ويا سابين وعم دردش معها على الي شفته وكانت مش مستغربة لأنها تعرف هي المجالس
ندزتلي رسالة
-عـاشور: مأجورة ست روڤان
أبتسمت وكتبلته
-روڤـان: مأجورين سيدي
رجعت للبيت وأنا أفكر بالمشهد الي شفته وظليت اطلع بالقصائد الي بيسمعهم عاشور واركز بالكلام أكثر ...
𔓕𔓕𔓕
هَـمم ...
مرت فترة كل ما تجي الحالة أقفل الباب عليه وأهلي أبد محاچية وياهم ولا أعرف أيَّ خبر عنهم بس هو يگول اطمنهم عليچ وهاي هي
صار الليل صعدت اطمن عليه فتحت الباب على كيفي شفته ماد سجادته وجاي يصلي أبتسمت براحة معناها أول خطوة بالعلاج نجحت وهي العلاج الديني يعرف من يتضايق ويتعب وتجي هاي الحالات يكون الملاجئ الأول هو رب العالمين
توضيت وجبت سجادتي يمه فرشتها باوعلي بـ أبتسامة وجوه عيونه أسود وجهه تعبان حيل
-ثـائـر: انا آسف خوفتچ بس من ردت أأذيج گمت وصليت مثل ما گلتيلي واحس روحي احسن بهواي ما محتاج هيچ أمور
أبتسمت
-هَـمم: كلشي بقرب رب العالمين يكون بخير هاي الخطوات الأولى من العلاج راح تتحسن أكثر بالأيام الجاية وعد
هز رأسه وكملنا صلاة نام طلعت أدور شي اكله ميته جوع صايرة شگد ما أكل ما أشبع دورت أريد باستا وماكو
رحت كعدته وهو نايم شارد من حالته ويريد يبتعد عني
-هَـمم: گوم ثائر گوم جيبلي باستا راح أموت من الجوع
باوعلي بـ أستغراب
-ثـائـر: حاضر بس يعني ماعرف متأكدة تردين باستا صارلچ شهر بس باستا تأكلين شبيچ
حچيت واني اتلوه أريد اكلها نزلت دموعي بقهر
-هَـمم: گوم حموت أريد باستا يا ماما أحس راح تطلع روحي و الله واريد وياها صوص فطر
گام وهو يباوعلي بحسرة
-ثـائـر: انا عادي اجيب ماعندي مشكله بس انت بيچ شي
برطمت شفايفي وحسيت نفسي أريد احضنه شبكته
-هَـمم: لا بس أريد باستا
حاوطني وبادلني شبكني على كيفه
-ثـائـر: حاضر هسه اجيبلچ بس أرتاحي نفسيتچ تعبانة آسف
وخرت من حضنه وحسيت بنفسي اليوم حابته نمت على صدره
-هَـمم: كون بخير وتعالج ثائر أنتَ تستحق تكون إنسان طبيعي أنتَ تگدر تتعالج
بعدني وهز رأسه وطلع بسرعة نزلت دموعي عليه ماعرف شلون ارجعة للطريق الصحيح نزلت دموعي على حبنا الي طول أربع سنوات راح بمهب ريح بسبب مرض نفسي راح بلمحة بصر صفنت بالمشاعر المتلخبطة الصار فترة احس بيها صفنت بصدمة
-هَـمم: معقولة اني حامل ؟؟؟؟؟
طلعت اللابتوب وبحثت وفعلًا صارلي ثلاث شهور بدون دورة ما اجتني من يوم الي اجيت للمكسيك ابدًا ومن غير هرموناتي معقولة من أول مرة صار حمل لطمت على خدي عرفت بنفسي حامل
أول ما اجه سويت نفسي طبيعية وگعدت أكل وفكرة توديني وفكرة تجيبني هذا طفل شلون راح اتصرف بس حرام ينزل خلص اتحمل مسؤوليته ومسؤوليه نفسي
رفعت عيني أباوع الثائر شفت وجهه كله أختلف وبينت عليه ملامح الحالة انرسم الشر على جهه شمر الصحن من ايدي بقوة وهو يحچي
-ثـائـر: خلص هَـمم ما أگدر اتحمل أكثر من هيچ أنتِ مرتي ولازم تتحملين
-هَـمم: ثائر لا تسوي هيچ وتخرب كلشي بدينا بخطوة حلوة لا تخرب وتهدم كلشي بداعة أغلى شخص عندك خلصص خلصصص
-ثـائـر: ما اتحمل ما اتحمل هَـممي مو حديد انا
صرت ورا الميز احچي بقوة
-هَـمم: شوف اذا تقربت مني بطريقتك المقرفة راح اكتل نفسي
ما سمع مني اجه ناحيتي سحبني بقوة حاول يبوسني ما خليته وضربته راشدي على وجهه حاولت ارفسه و اتحرك قيد حركتي بس مستحيل استسلم وانزل دمعة وحدة كل الي بعقلي اني قوية اني اگدر مستحيل أكون بيوم إنسانة ضعيفة خاضعة اني القوة بذاتها ظليت أحاول لحد ما بعكس ايدي ضربته حيل بخشمه شتت انتباهه وبسرعة ركضت سحبت السچينه شفت الباب عايفه مفتوح توجهت للباب وطلعت أركض ويا طلعتي بدأت الدنيا بالرعد وظلمة
وصياحه الي مله البيت نزل يركض وراي شددت سرعتي و ماعندي تليفون وماعندي أيَّ سويلة اتواصل بيها أو استنجد بـ أحد حتى الحراس ما موجودين ركضت ركض وراي اتقرب مني وهو يلزم أيدي حضني عليه
لزمني بطريقة وصخة بشعة مقرفة وهمس بـ أذني كلام من الخوف حسيت گلبي راح يطلع واطرافي انشلت كلام مرعب مقرف ماكو بنت تتحمل تسمعه
ضربته بوكس بسرعة ودفرته من بين رجليه وشردت اركض بالحديقه كتمت نفسي ولبدت ورا الشجرة تصير گبال المسبح قرفصت ورجعت الي ورا واني أشوف رجليناته تروح وتجي وبيده الايت وبس تنهيداته تنسمع كتمت نفسي وخليت ايدي على حلگي
ماعرف شلون عرف مكاني فجأة رفع أغصان الاشجار وصار گبالي شهگت بخوف للأسف هنا شياطين الدنيا كلها ركبت رأس ثائر
للحكاية أسرار وخفايا ...
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
بـقلـم: زيــنب عــلي
شنو رأيكم بالبارت 🌚♥️ ؟
شنو تتوقعون ثائر يسوي بالبارت الجاي 💔 !!!
قلبوشات لا تنسون التصويت ومتابعة الحساب ♥️
متابعة ممتعة 🦋