السميدع

بارت 23

مدري شعايف بكلبي

ويغنيلك حتى بـ هوسة

احلامي افز من حلمي وامشيلك

عفتني اتجوی بلفرگه ورغم كل هذا اصليلك

گلي بيا عذر تقنع وانه بدمعاتي اشكيلك

وحدي تعلمت ماردت عون انسان

تلويني المصايب وارجع الويها

عزة نفس جندي من اعثر ارمي الروح

اكتلها ولا للآسر انطيها

بقلمي انا ايڤين

لاتنسون التصويت + تعليق بين الفقرات كُلش مُهم دااده سَومرياتي

___________________________

فتحت الباب واحس جمد الدم بيه بعد ما شفت الأمن متسطرين كلهم بابنا
حسن - تـ تـفضلوا شـ شنو محتاجين
الامن - انت السميدع

حسن - اي اني تفضلو شرايدين مني
الامن - تعال ويانا الامر رايدك و بلا صوت لا تخلينا نصرف غير تصرف

حسن - جاي وياكم جاي
سميدع - لك حسن اوكف وين رايح هايييي تحجيي صدُك يمعودين اخذوني اخذوني اني

الامن - ليش منو انت و ناخذ ماسمعت شنوو كلنا كلنا السميدع نريده
سميدع - اي اني السميدع

الامن - تعال نضيفك يمنا اليوم
سميدع - خوش نروح بس بلا هل مشاكل

حسن - ليش تاخذوه مامسوي شي هوو حتى تاخذوه يعني خلونا نفتهم شنو الي مسوي
الامن - جاي تعيق شُغلنا و احنا يلي يعيقنا نشيله نودي وره الشمس دير بالك ابتعد الف خطوه فهمت لو لا الف خطوه عنا

حسن - بس ..
سميدع - امشونا جاي وياكم

الامن - هيج من البدايه ولا تعبنه وياك
سميدع - حسن .. دير بالك على امي و زمُرده عينك عليها

حسن - يمعود ماتشوف شون هيج تذب روحك للموت
سميدع - خليني اروح و ان شاء الله خير

حسن - دير بالك على نفسك .. ترا هواي سوالف بعدنا مامكمليها و أصلًا عساس اليوم يجي سيد عباس و ..
سميدع - مع السلامه حسن

ماخليته يكمل الكلام كإن جنت ناسي السالفه و هو رجع ذكرني بيها .. امشي وي الأمن بدون ما احاول اقاوم او اسوي الي شي صعدت وياهم بالسياره .. الطريق كُله جنت مخلصها صافن على الفراغ و يدور ببالي زواج لطيفه يلي صار بالسر

الامن - انزل شنو ماتشوف وصلنا ترا القائد يريدك و حيل مستعجل عليك
سميدع - يالله نازل .. امشي بخطوات بطيئه اراقب نضرات العالم يلي جانت قريبه من المركز .. كُلها شك و ريبه نضرات محد يكدر يفسرها بطريقه الصحيحه ابد

دخلوني بغرفه تفوح منها ارقى العطور ، كعدت بمكاني اخذ نفس منتضر يدخل عليه القائد يلي يخصهم

الامن - شنو تحب نضيفك
سميدع - رحم الله والديك مي كُلش كافي

القائد - افاا افاا تجي النا لهنا و ماتضيف الا مي زحمه زحمه روووح عبوود جيب اله كهوه يعدل بيها مزاجه
سميدع - كمت على حيلي اتصافح وياه وسط نضراته يلي متغلغه عليه

القائد - تفضل
سميدع - كول سيدي

القائد - اني ماحب اطول بالمواضيع و ادخل بيها بشكُل مُباشر الي اريده شي بسيط كُلش
سميدع - شنو الموضوع شتريد مني

القائد - اريدك تشتغل ويانا
سميدع - عفوًا شنو

القائد - تشتغل ويانا .. يعني تصير من ضمن إلامن مالتي و اكدر اضمن الك اي شي تريده يوصل لجيبك بدون اي تعب بس اكتب الرقم يلي تريده من الفلوس و تحصل عليه

سميدع - جاي تساومني على مبادئي حضره القائد
القائد - غلطان اني اريد افيدك لا اكثر

سميدع - تفيدني و تخليني اخون شعبي لا سيدي تعذرني
القائد - فكرر بيها زيين هل فرصه ماتتكر مرتين بعد

سميدع - مفكر عدل بالموضوع مستحيل اقبل
القائد - اقدم الك الحمايه و الفلوس وحتى إذًا تريد ..

سميدع - إذًا اريد شنو
القائد - نسوان

ابتسمت اعدل كعدتي مخلي عيوني بنص عيونه .. رفعت شعري يلي نزل على عيوني و حجيت بكُل برود :- أني عندي حواء طباعها طباع الفروسيه .. عندي الحسب و النسب ماتتبدل بكنوز الدنيا

هز راسه متفهم كلامي .. حرك كرسيه يورث جكارته بحركه سريعه .. اخذ الباكيت خلاه كدامي .. حجه بهدوء :- دخن

سميدع - ما ادخن اني
القائد - هههههههه لهل درجه بحيث ماتدخن مخليتك

سميدع - كُلت الك بعد و هذا جان يلي عندي
القائد - تدري شنو نسوي بلي يعصون كلامنا

سميدع - تحرموه من الحياة
القائد - هههه صح بس هم مره غير .. اثبتت انتَ لا طماع ولا تحاول تبوك و تضمضم واحد غيرك جان قبل على عرضنا بسرعه

سميدع - مابيع احد علمود فلوس .. الي عنده و يلي ماعنده كُلهم يتلاكون بنفس المكان و اني الله رازقني ما احتاج للفلوس
القائد - مبين عليك مبين

قطع حديثنا دخول الجندي ضرب تحيه منتضر ينطي الاشاره حتى يكدر يحجي .. اخذ يطفي الجكاره بالنفاضه و اشر بايده اله يحجي

الجندي - استاذ ديغم راح يوصل بعد ربع ساعه وياه كُلشي مطلوب

نخبص القائد وهو يعدل بملفات .. ضليت بمكاني مركز نضرتي عليه احاول اجذب يلي سمعته باذني .. ديغم ديغم ماكو غيره

القائد - تكدر تروح هسه استاذ خلص شغلنا وياك
سميدع - الي جاي ديغم سعد مو

ترك كُلشي من ايدي يباوع عليه بنضرات غريبه .. حك ارنبة خشمه يحاول يقلل من توتره كدامي :- منين تعرفه

سميدع - شعندك وياه حضرة القائد
القائد - شي خاص لا تدخل بي احسن ما تندم تكدر تروح هسه خلص شغلنا وياك

سميدع - اكدر اعتبر تهربك من الموضوع ان ديغم سعد هو نفسه يلي حجي الك هسه وي معلوماته الخطيره
القائد - جندددددي ..

جندي - نعم سيدي
القائد - اخذ السميدع وياك اخذه وصله لباب المركز تشرفنا بمعرفتك استاذ

طلعت من الغرفه امشي مستعجل اريد اسوي يلي من زمان براسي ماتفلت من يمي هل مره ديغم .. حسيت بنفسي انركع بشخص لدرجه اغراضه تطيح بالكاع

نزل يجيب غراضه يلي طاحت وهو يدردم بخفوت منزعج من الموقف يلي صار  .. بقيت واكف اراقبه بعد ماعرفت منو هل شخص .. اكتفيت بالسكوت بدون لا احاول اطول وياه بالكلام

رفع راسه منزعج :- شبيك يمعود لخاطر ..

وكف عن الكلام مصدوم من وجودي كدامه عبرته بدون لا احجي اي شي طلعت من المركز ساكت

سميدع - بسيطه ديغم الايام هواي واني اعرف شون اخليك تحجي كُلشي ماخليك على هاي سوالف لو تموت .. اجيت وياك بكُل الطرق و ما اجيت انتَ دتجبرني انتَ

مشيت مالي نفس لشي التفكير اخذ حيز جبير حيل من حياتي صرت اطلع من دوامه و ادخل بثانيه اتعس من الأولى

حاولت اروح لاي مكان هادئ يخليني اتخلص من الكلام يلي يتزاحم بداخلي .. مالكيت الا مكان واحد حسيته يكون ملجأ الي

امشي بهدوء ابتسم للمكان يلي بي اني .. اخذت نضره مُطوله اتأمل البُستان يلي اخذت الزمُرد عليه باول يوم النا

كعدت على الحشيش اراقب الفراشات و الورد الاحمر و تجي على بالي ضحكتها .. دلعها و كُل تفصيل من تفاصيلها

اخذت اكطع الورد الاحمر اجمعه اسوي الها مجموعه اقدمه الها اول ما اروح لحتى ارجعها للبيت

اجمع بهدوء احاول الهي نفسي بس للاسف
ما فارقتني الافكار لحظه وحده تاخذني من قصة ديغم الي صارت لغز حيل صعب عليه وتوديني لقصة اختي الي ما اعرف شلون احلها

اخذت الورد طالع من البستان بعد ما حسيت الوقت خلاص تاخر .. الجو صار بارد و اصوات الرياح العاليه صارت تتزاحم مع قطرات المطر

صرت امشي بدون لا اهتم اذا تبللت ملابسي لو لا .. حسيت بالمطر يمسح على اكتافي يزيل عني التعب و التفكير المُستمر

ضليت امشي بدون لا استأجر اي سياره ترجعني للبيت خلصت الطريق لحد ما حسيت نفسي واكف بالباب

دنكت افتح الباب من الجوه لان ما اخذت مفاتيحي وياي دخلت للبيت مستغرب سبب الصوت الخافت يلي يجي من الديوان

جنت اريد احضر نفسي حتى اروح اجيب الزمُرد بس بعد يلي شفته ما حسيت براحه ابد

دفعت الباب عاكد حاجبي اراقب الموجودين بكُل حده .. بعد ما لكيت عمي سيد حازم وعمي سيد عباس وابنه نهاد كاعد بنصهم

سميدع - دخلت للديوانيه بهدوء وسلمت على عمي سيد عباس وعمي سيد حازم وكعدت
سيد عباس - جنك نسيت تسلم على ابن عمك

سميدع - لا ما نسيت بس داحاول اشوف مده الصلافه يلي موجوده عنده

نهاد - الضاهر عمي مالحك يربيك عدل
صاحو سيد حازم وسيد عباس بوجه نهاد بصوت واحد:
السميدع احنا مربيه

سيد حازم - اذا مو عاجبتك تربيتي للسميدع لعد شعندك كتلت نفسك على اخته مو اجيت تموت اريدها و اريدها
سيد عباس - هاي اول واخر مره تحجي على السميدع واذا اسمعك الطمك على حلكك ما اخلي بحلكك سن صاحي

نهاد - اسف يابه ماتنعاد العفو
سيد عباس - والله يا ابني ماعرف شون ابدي وافتح وياك الموضوع ادري جان غلط نزوجهم بدون علمك بس مثل ماتدري انتَ استعجلت و رحت للحرب و ماكدرنا بعد كلنا نزوجهم بالسر و وين ماتوصل خل توصل

سميدع - جيد ، افهم من كلامك إن إنتوا جنتوا حاسبيني اموت و صرتوا تصرفون بكيفكم

سيد عباس - والله يا ابني ماعرف شون ابدي وافتح وياك الموضوع ادري جان غلط نزوجهم بدون علمك بس مثل ماتدري انتَ استعجلت و رحت للحرب و ماكدرنا بعد كلنا نزوجهم بالسر و وين ماتوصل خل توصل

سميدع - جيد ، افهم من كلامك إن إنتوا جنتوا حاسبيني اموت و صرتوا تصرفون بكيفكم  على اساس راح و بعد مايجي

سيد عباس - لااا ابني لا تحجي هيج ابد ما قصدنا هل شي
سميدع - لعد شسميها مخليها تتزوج من وره ظهري صارلها كم سنه

سيد عباس - والله اني استحيت من عندك و ماكدرت احجي
سميدع - استحيت من عندي بس جان عادي عندك تزوج بنت اخوك لابنك بالسرر مووو

سيد حازم - هدوا النفوس هدوها لا تخلون هل سوالف توكع بينكم خلوكم طبابين خير
سميدع - عمي جنت تعرف و ساكت

سيد حازم - ابني ..
سميدع - ماكو داعي تكمل كُلشي صار واضح كدامي

سيد حازم - لا تفهمني غلط
سميدع - بعد كُل هذا و ماتريد افهم غلط ياعمي سنييين سنيييين حتى طفل مخلفه واني مادري وين لاكيها هاي

تروح تحجيها لمخبل لززعطوط بالشارع مايصدُك و يضحك عليه شون رهمتوها فهموني

نهاد - هييي لاا تحااجي عمي هييج
سيد حازم - انجب معليك

حسين - خليت ايدي على حلكي اكتم ضحكتي .. حسيت على سميدع يكرصني من ايدي حتى اسكت

لميت شفايفي داخل حلكي كاتم ضحكتي كوه .. اباوع على سرمد مخلي ايده بخشمه عاقج وجه ولا مهتم للكلام يلي يصير .. تحمحمت ارجع اركز وياهم بالموضوع

سميدع - شنو المطلوب مني هسه
سرمد - ناخذ ست الحسن و الجمال للصخيم و نسويلهم جبنالك ورده تشم بيها بس كون الورده تداريها

سيد حازم - اسكُت أنتَ بعدين حسابك بعدني ماكملت وياك اني هيج جبتك وياي عن الحلال و الحرام
سرمد - لعد جايبني لهنا شنو اهش ذبان رحمه لله

سيد عباس - كافي كاافي مو تتعاركون هيج كدامنا .. ابني كُلشي واكف على موافقتك كول راضي لو لا

سميدع - لا ما راضي ... ماموافقك هسه تطلكها

نهاد - شفتووووو شفتووو صاررر ساعه نافخ روووحه عليههه و انتوا تصيحون بيه اسكُت اسكُت دتشووفون شديسوي بيهه

سيد عباس - اكعُدددد لا بارك الله بيك خل نفهم من الرجاااال
سميدع - ماكو داعي يكعُد يفهم الي عندي حجيته يطلك اخُتي و ينتهي كُلشي

كمت على حيلي بعد ما ندفرت الباب و دخلت لطيفه وراها امي .. خليت ايدي بجيب البنطرون مركز نظرتي عليها

لطيفه - مو بكيفك تقرررر موو بكيفك
سميدع - بكيفي

لطيفه - داكول ماريد اتطلك ليش تسوووي بيه هيج
سميدع - بعدين حسابج ادخلي لجوه

لطيفه - مااا دخلللل مااا دخل
سميدع. لطييييفه

ركضت على سيد حازم اخذت السلاح يلي بخصره بحركه سريعه خلته براسها تعيط
لطيفه - اكتلها لروحي اكتلها

- يمههه ولك سوي شييي اختتك رااح تمووت نفسهاااا عزااا ولج عووفي لطيفو شدتسويين بنفسج يمه
سيد عباس - اتررركي اتركي بنتي و نتفاهم بهدوء اتررركي ولج

نهاد - سوي شي سميدع ليش هيج واكف ماتتحرررك ولك اختك راح تموتت
حسين بهمس - سميدع

سميدع - روح وراها بدون ما تلاحظك
حسين - شنووو

باوعت عليه بنضره حاده أشرت اله بعيوني وراها .. سمع الكلام بدون مايلتفت عليه صار يتسحب بهدوء حتى يوصل يمها

لطيفه - والله اذا تخلي يطلكني اموووتها لروووحي مااا اعيشششش ماا اعيششش حراام عليك يلي دتسوي بيههه حراام دتحرمني من سعادتي ليشش

سيد حازم - ولججج ذبي السلاااااح شدتسووون بنفسج مخبله مخبللله مو صاحيه هل البنيه
لطيفه - اي مخبله مو صاحيه و اذا خليتوا يطلكني اسوي الااتعسسس الااااتعس من هييج .. خلي يوافق على زواجي خليي

سحبت اقسام مقربه السلاح اكثر على راسها .. صارت امي تدك على راسها و تعيط باسمها و باسمي

ما انطيت اي رده فعل باقي على وكفتي مركز عيوني بنص عيونها يلي تحاول تبعدهن عني .. حسيت شخص يهز جتفي حيل

سرمد - لكككك اختتكككك راح تكتل نفسهاااا
سميدع - مارح تموت

سرمد - لككك لا تخبلنييي لاا تخبلني حتى اقساام سحبت هاي تريد تنتحر خلاص
سميدع - ماتموت

سرمد - شبيك ولككك اختككك لطيفه هاي
سميدع - يلااااا حسييين

عطت بكُل صوتي على حسين يلي لزمها من وره يسحب من عدها المسدس وسط عياطها .. اخذ السلاح بقوه من عدها لدرجه طاحت بالكاع تبجي

تقربت عليها رفعتها لمستواي .. قربت وجهي من اذنها اهمس ببرود :- الي فضلتي عليه راح يبجي عيونج دم

لحد هذا اليوم جنت مخليج ملكه بس بعد يلي سويتي روحي اله يا لطيفه روحي .. يجي يوم و اشوف ذني عيونج كاتلهن الندم

خليت عيوني بعيونها احجي ببرود ممزوج بقهر
" أنا الي چنت اسكيچ من مي عيوني

يجي الوقت و تعرفين ليش رفضته .. تفشليني كدام العالم و اني الي جنت مخليج قطعه من روحي افتخر بيها

لطيفه بهمس - لا تسوي هيج
سميدع - اسوي لطيفه اسوي .. ابتعدت عنها بدون ما اباوع عليها

شتردون تسون سوه بس بعيد عني  و إذًا ردتوا تخلوني كدام العالم و اجي ماعندي مشكله اي شي براسكم سوه بعد

من بعد يلي صار ماصرت ادخل بيهم ابد جانوا يجهزون بس اني بعيد عن كُلشي يخصهم .. الزمُرد خليتها بيت اهلها بدون ماتتقرب و تجي لهل مهزله يلي يسوها

صارت عرس بسيط على كد الاقارب والناس يلي نعرفهم .. شكد حاولوا وياي حتى اودعها بس ماهتميت و ضليت بمكاني بدون لا اغير اي شي بلي صار

زمرد - خلص العرس وراحو الناس بقيت وحدي الم بالهوسه يلي صارت طول الوقت اراقب السميدع من الجامه كاعد بالحديقه يفكر

حاولت اطلع اله اشوفه بس حسيت بايد تمنع حركتي :- لا تطلعين

زمرد - شدتحجين خاله على بختج ماشفتي حالته
- خلي زمرده هو يتعود بعدين

زمرد - مدا افهم ليش هيج تسوه بيه كُلشي بسرعه بسرعه ديصير
- اسكُت لا تحجين أنتِ حامل تحتاجين راحه

زمرد - هو شبقى بيه شي صاحي علمود الحمل
- لا تحجين هيج ربج موجوده

زمرد - لو جنت ادري حيصير هيج جان حجيت من البدايه
- مو صوجج بنيتي انتِ مالج علاقه الصوج بيه

سميدع - زمرد
زمرد - التفت عليه بحركه سريعه مخليه عيوني بعيونه .. جان يراقبني بنضرات بارده بدون اي حركه بوجهه .. التفت على خالتي يلي صارت تطبطب على كتفي تشجعني اصعد

اخذت نفس و صعدت للغرفه بدون ماحجي اي شي .. احسب خطوات للخطوه الاخطيها اول

دخلت للغرفه ضليت واكفه بمكاني فتره اراقبه شون جان كاعد منتظرني .. رفع شعره يلي نزل على عيونه يحرك راسه بمعنى اكعد هنا

قفلت الباب واني كلبي يلعب صرت احجي بيني وبين نفسي :- زمرده شسويتي ولج وهيج السميدع عصبي عزا

نطق اسمي لاول مره بدون لقب ولا كال زمردتي

سميدع - زمرد جنتي تعرفين بزواج لطيفه من زمان و سكتي تطمطمين الها مو يعني السالفه متفقات عليها بيناتكم
زمرد - لا مجنت اعرف بس جان بين فتره وفتره يجي ياخذها نهاد على الاساس تساعد عمها ما اعرف شكو بعد

سميدع - لعد ليييش مااحجيتي الييي شنو مو مهم اني بالبيت حتى انتي لج زمرد تضمضمين عليه شنو شفتوني لان حنين وياكم تاكلوني

زمرد - هاي شبيك ليش تصيح عليه شنو ذنبي اني
سميدع - مامصيح عليج زمرد

زمرد - لاا تكووول زمرد
سميدع - اسمج زمررد لووو لاا

حسيت عيوني تجمع بيهن الدموع رافضه تنزل اخذت نفس احجي بهدوء :- اي اسمي زمرد

سميدع - جنتي تعرفين و سكتي الهم
زمرد - ماجنت اعرف صدكني

سميدع - ماكدررر اصدُك احددد كُلكم خذلتوووني
زمرد - ماسوووييت شييي ماسويييت

سميدع - زمرد
زمرد - لا تحجي وياي هيج سيد

سميدع - زمرد لإخر مره
زمرد - اني راح انام خلصت المسرحيه هسه
سميدع - زمرد احجي وياج ممنوع تسوين اي حركه من حركاتج هاي اسألج تجاوبيني وخلص لا تتهربين من عندي

زمرد - سيد ترى والله مجنت ادري بكلشي صار الي اعرفه حجيته الك هسه وبس ليش تصيح عليه شنو بيدي اني وما اسوي تدري بيه ما اخاف من اكبر راس

سميدع - انتي كلتيها حجيتي اليييي هسسسه ليش ما حجيتي قبل شنو كدامكم اني مو مهم لو ما مسؤول على كل نفس تتنفسوه

لوما الله ستر وصارت سالفه بوقتها على اختي منو يتحمل المسؤولية انتو لو اني توكع براسي واني ياغافل الك الله
زمرد - صوج باختك مو بيه لعد
سميدع - زمرد

زمرد - الصوووج باختك موو بيه سميدع اني شعليه حتى اتدخل بيهم هااا شنو صلاحيتي تدخلت ماتدخلت مو من حقي
سميدع - لااا من حقج لان انتِ مرت اخووها

زمرد - مو معنااها اراقبها بطالعه والنازله لعد
سميدع - ماكلت هيج زمرد .. داكول المفروض كُلشي يصير تجين الي و تحجين مو بحجه عساس ادري و تسكتين على هل الموضوع

زمرد باجر تروحين لبيت اهلج بعد ما اريد اشوف وجهج ما اريد اشوفكم كلكم وها باجر اني طالع للاردن ما اعرف شوكت ارجع بعد شهر شهرين او يمكن ما ارجع واخلصكم منيي وترتاحون

زمرد - الله عليك لتحجي هيج وتلجم كلبي عليك والله مالي ذنب بكلشي والله راسي صااررر شكبره ماكدر اتحمل بطني توجعني لعبانه نفسي خليني انام لوو سمحت خلييني على الاقل انااام

سميدع - نامي زمرد نامي
زمرد - سميدع

سميدع - ها يا لوعة كلبه
زمرد - مالي دخل بالموضوع يلي صار صدكني

سميدع - مصدكج نامي
زمرد - راح تروح .. راح تعوفني مو

سميدع - الصباح رباح زمرد تصبحين على خير.

مالك - الحياة .. قوانينها صعبه بس تتطلب من عدنا نحارب حتى نعيش و نستمر بداخل ميدانها .. لازم نتحمل حتى نحصل على يلي بداخلنا بعد كُل الصعوبات

بعد ما جنت الم المصروف البسيط يلي يبقى من راتبي .. حاولت اقسم الفلوس بيني و بين ابوي يلي لحد هذهِ اللحضه مايدري ان اني اخذ نص من الفلوس و نص اله

بهاي الفلوس القليله كدرت اشتري بيها سياره على كدنا .. امشي بيها و حاسس نفسي طاير بالجو على كد الاحساس الحلو يلي يلامسني

ماكدرت اضم اكثر عن امي و ركضت الها ابشرها اضحك من كُل كلبي لاول مره :- يمه لو تعرفين شون احساسي هسه

شهرزاد - اهم شي انتَ فرحان لا تخاف من شيء شهرزاد بضهرك دائمًا
مالك - احلى شي بهاي الدنيا انتِ

شهرزاد - شراح تسوي بيها زين
مالك - اخذكم زياره لاول مره بيها

شهرزاد - يااا ولك خوش فكره هاي يمه والله طاك كلبي على الزياره خوش سويت
مالك - بس خالتي الزمُرد شوفيها تكدر تجي حتى اخذ الأذن من السيد

آريـا - واني يلي صارلي هنا ساعه كاعده محد حتى اهتم اليه
شهرزاد - تردين تجين لو لا بسرعه حتى نروح لزمرده

آريـا - راح اسوي كُلشي اكدر اسوي عليه حتى اتحرى عن الثانيه

حسيت بالباب تركع حيل .. دخلت الزمُرد عافسه وجها و تجرجر بالجهال وراها

آريـا - عمرها طويل شوفوا اجت
زمرد - سمعت اسمي خير شكو

مالك - لك هلا بخالتي الزمرد نور البيت بيج والله شنو يمعوده النور و السرور انتِ مشعشعه والله

آريا - لعد اني مو خالتك ليش مامنوره ليش ماتحجيلي هيج والله عجيب يعني اني احبه و احترمه مايحجي وياي حلو يركض على زمرده
مالك - انتي اخ منج لسانج شطوله بيكيسي مو لسان

زمرد - اي عيني تضوجين من عندي
آريا - لك لتحجي على خالتك لا والله اكول لابوي عليك ، بعدين عيني عيني ماضوج أصلًا عاد

مالك - هههه صار خالتي تتدللين
زمرد - ما تبطلين من المرادد لسانج شطوله ما تكومين تسلمين والله يالله شون كاعده

آريا - هلاووو زمرده شنو جبتي الي حلويات المهم تداريني مثل كُل مره
شهرزاد - صرتي بكد الفيل وبعدج تتدورين حلويات متبطلين ولج مو كبرتي يحضي

آريا - هسه شسويت اني هو تجيبولي بس عالوجه وزمرده تجيبلي حلويات اطيب من مالتكم قررت اعوفكم واجي يمها

زمرد - مو اني اجيب حبيبتي هذا سوسو يجيب وين ما يروح يجيب النا و هو اول وتالي اني وجهالي مطرودين
شهرزاد - زمرده شو وجهج احمر خير شكو شصاير بعدين ليش مطرودين

زمرد - اوووف شهر سالفه صارت لا على البال والا على الخاطر ورحت اني بالرجلين وهسه سميدع زعلان مني وراح للاردن ماعرف شوكت يجي

شهرزاد - ياااا عزاا عين وما صلت علو النبي بس لا من وره لطيفوا تعاركتواا
زمرد - يكول ليش ماحجيتي الي ، يعني شبيدي ماكدرت احجي اله غير خالتي وكفت بعيوني

شهرزاد - حقه لا تلومي الي صار مو شويه يعني اخته عدها طفل و متزوجه بالسر ومايدري صعبه

زمرد - ماريده يروح شسوي فهميني
شهرزاد - خلي يرتاح فتره و يرجع

زمرد - مستحيل اخلي يروووح شنو يبقى وحده
آريـا - حاولي تفهمي

زمرد - حاولت بس مايسمع من عندي
شهرزاد - تحتاجين شي يخلي يرجع لهنا

آريـا - كلتي اله حامل
زمرد - ها ماتذكر كلت اله جنا ملتهين

شهرزاد - ياربي باع شدتسوييي يااا اكو وحده تسوي سوايتج
زمرد - شمدريني شهرزاد شمدريني

مالك - ترحون زياره
آريـا - اهوو صارت عنده سياره راح ياكل راسنا

زمرد - صدُك نسيت ابارك الك الف مبروك مالك ان شاء الله الاحسن منها
مالك - على راسي خالتي بس ترحين لو لا

زمرد - اروح اروح هو طاكه روحي اريد بس ارتاح شويه وهناك علاجي
آريـا - لعد كووموا بسررعه

زمرد - كمت خليت العبايه على راسي وماخذه جهالي وياي جني بطه وكفت بالشارع مخليه ايدي على عيوني احجب الشمس

حسيت بـ أسيد يجر عبايتي يريد يحجي
زمرد - شبيك ماما

أسيد - ايدج حلو طالعه بابا مايقبل
ضِغاب - كال ديروا بالكم على امكم انتوا زلم جبيره ايدج نزليها

زمرد - لا لا لحضه هاي صدُك تحجون ههههههههه عزاا هاي عليه
أسيد - ماما حبابه لا تضحكين هيج و نزلي ايدج يلا

زمرد - تدلل استاذ أسيد شنو عندك اوامر ثانيه
ضِغاب - انتِ يلي تكولين النا ونخلي طلباتج اوامر لا تحجين هيج يا حلوه

زمرد - يعني عادي تكول لامك يا حلوه
أسيد - يااا عسله

آريـا - ياا عمت عين يلي بالي شون يسون هل سوالف يطمطمون على سالفتهم العوجه

أسيد - عمي وداعت ذاك الرجال إذًا تحجين حرف مانطيج من جبسي
ضِغاب - ترا اني دافعت الج وماخليت الجهال يصيحون الج ريه الخبله

زمرد - خليت ايدي على حلكي غاصه من الضحك على آريـا و عصبيتها عليهم .. عنفصت و ضلت تدردم عليهم بهدوء

ضِغاب - ريه صارت تحجي وي نفسها
أسيد - تخبلت

زمرد - يوولد عيب خالتكم
آريـا - همه أصلًا مايحترمون

مالك - عوفن العركات هسه و اصعدن خل اخذكم
زمرد - ماجذبت خبر اخذت الجهال و كعدت بصف الجامه بعد ما صرنا اني و آريـا وحده تملخ الثانيه عليها

بده يحرك السياره ويمشي بينا .. لزمت ايد نيار مبتسمه بوجها همست الها بهدوء :- اقري الفاتحه لام البنين

هزت راسها بموافقه و صاروا يسون مثلها أسيد و ضِغاب
آريـا - احسن شي جاي تعلميهم هيج

زمرد - ماريد بيوم يحسون مأيسين لازم يتذكرون اكو رب وياهم دائمًا
شهرزاد - زمرد ماخذتي رائي سيد تطلعين لو لا

زمرد - هو زعلان مارح يحاجيني وهم هو يقبل اطلع
شهرزاد - لعد اذا هيج زين

زمرد - ايي مالك شون يسوق حلو يلاا يلاا تعالوا صفكوا
آريـا - الله شنو راح تعرسين

زمرد - شكد سخيفه اسكتي خلي اغنيله
شهرزاد - شتغنين يااا

زمرد - يا سايقنا سووق سووق حتى نحصلك عروووس .. يلااا عيني مالك سوق بينا عدل حتى نعرسك

مالك - لعد ادعولي اخذ ام الورد
شهرزاد  - مالك مانسيتها

مالك - هههه شون ترديني انساها و هيه بوقتها اكثر شخص خفف عني همي من طلعت مو يمه

شهرزاد - ماعتقد راح تلكاها
زمرد - لا تشائمين هل الدنيا قصيره و يجي يوم يتلاكه بيها

مالك - ابتسمت و اني اتذكر ملامح وجهها من انطتني الورده بكُل هدوء .. من وقت هل موقف صرت اصلي كُل ليله و اطلبها من رب العالمين

حسيت اكو سياره تمشي وراي سريع .. صرت مركز عيوني عليها و احاول ابعد سيارتي عنها صرت افكر الموضوع متعمد لدرجه مو طبيعيه

شهرزاد - يمه خفف السرعه لا تسوي هيج بينا
مالك - هذا منو يلي ديلحكنا هسه

زمرد - كول غيرها يمعود منو هذا شيريد خاف يطلع مخربط
شهرزاد - ياا باعن شون يمشي سريع جاي علينا ماحسه واحد مخربط

صرخنا بصوت بعد ماصار تصادم بينا و بين سيارته للـ شخص المجهوله .. صرت امشي سريع ابتعد عنها بعد ما تاكدت الموضوع متقصد

مالك - صرت مركز نضرتي على السياره بكُل حذر امشي .. وكف الدم بعروكي حسيت بنار تشتعل بصدري بعد ما شفت حميد بالسياره

صار يروح بكل سرعته ويرجع يضرب سيارتنا بسيارته يريد يكلبها للسياره بينا ..صار صياح امي وخالاتي يزداد وزاد التوتر عندي

حاولت ابتعد و اسيطر على السياره حتى اكدر اتصرف وياي عدل .. صرت ابتعد عنه و اصير بالجهه يلي تكون بيها سيارات اكثر

بديت احسن نفسي اسيطر على الشارع :- اليوم انساك و انسى منو انتَ .. واحد عار حرام تكون ابويه

تقربت بحركه سريعه من الچكمچه اطلع مسدسي متحلف بـ حميد صارت امي تعيط عليه و تلزم ايدي تمنعني
شهرزاد - لااا لااا مالك عووف هل سلاح

دفعت ايدها مطلع ايدي من الجامه احاول ارمي عليه .. صار يتقرب من عدنا اكثر و يضحك باستفزاز

مالك - مو ابوي انتَ مو ابوي ..رميت على تايراته .. صار فاقد التوازن مايكدر يسيطر عليها وكفت سيارته على جهه و رجعت عليه

نزلت من السياره سحبت خشبه قويه جوه رجليه جانت اريد اهد عليه .. فتحت الباب امشي بندم بيوم من الايام قدرته و خليت اله قيمه عندي

ندمت خليته يكون جزء من حياتي و يتحكم بينا لو ما الله ساتر علينا جان صرنا كُلنا ميتين اليوم

اجيت يمه فتحت باب سيارته سحبته بكل ما اجتني من قوه .. صرت فاقد ماحس بشي بس اريد اسوي اي شغله اكدر اطفي النار يلي مشتعله بروحي

نومته بالشارع وصرت اضرب على اديه بكل قوتي بالخشبه بهستيريه .. ابجي واحجي بقهر ممزوج بعصبيه

مالك - ليييش ولكككك فهمنييي لييش تريددد تكتلنااا ابنككك ابنككك و ثنين من بناتك بهللل سياره شتريدددد منااا بعددد
حميد - تفوووو عليككك ياا عار تضرب ابووووك ... يااا يابه الحكني طلع روحي ابن الك** هذا

مالك - حرااماااتتت انتَ ابووووس حراامات
حميد - انتَ اجيت بالغلط .. غلطت عمري انتَ

حسيت بايد تسحبني بقوه الها .. صار صوتها يتغلغل بمسامعي تحاول تخفف من وجع كلبي :- موووو غلط مووو غلط ابني كُله صحححح موو غلط جيته

حميد - لو بيدي جان كتلته من اول مره شفته بيها
شهرزاد - لووو يضل اخر يوم بعمرك ماتوصل لابني

حميد - تفووو عليه حرامات خلفتك
شهرزاد - رووووح مناااا حميددددد كااافيي عاااد رووووح

زمرد - شهرزاد صوتج ترا هسه يتصلون على الامن
شهرزاد - شو وخري عني خلي اطيح حضه

زمرد - عووفي و شوفي حاله ابنج
شهرزاد - التفت على مالك يلي كعد على رصيف ايده على راسه ساكت

زمرد - مالك كوم لا تسوي بنفسك هيج
مالك - والله مادري شكول لربي اني كتلت ابويه

شهرزاد - يستاهل معليك امشي
مالك - خل ارجعكم للبيت

شهرزاد - مالك
مالك - خليني ارجع يمه ماكدر اتحمل

زمرد - اي نرجع بس انتَ اهدئ لا تاذي نفسك اكثر
شهرزاد - يمه علكيفك من تمشي لا تطيح مامتوازن

زمرد - صرت اراقبهم شون مقهورين .. شهرزاد يلي تطبطب على كتف مالك الي يحس نفسه سوه غلط جبير بهذا العالم و مايكدر يسامح نفسه عليه .. ومن جهه ثانيه سوايت حميد يلي جان بسببه خسرنه حياتنه اليوم

اخذت نيار و أسيد ضميتهم بحضني .. ضِغاب جان نايم بحضن آريـا .. شهرزاد يلي احتارت تسكت ببناتها يلي ماسكتن من البجي لحضه لو تحاول تخفف عن ابنها

اول ما وصلنا للبيت نزلت شهرزاد ركض لابويه .. اخذت بايد جهالي انزلهم مستعجله حتى اروح يم ابوي ادري بـ شهرزاد حاليًا معصبه تحجي اي شي يجي بلسانها

دخلت للديوان اباوع لـ شهرزاد يلي تحجي بحركه كدام ابوي .. مُلهم لازمته امي كوه حتى مايروح يهد على حميد .. مُتيم جان كاعد على صفحه مركز على كُل كلمه تكولها شهرزاد

آريـا - بابا
حجي سعد - احجن يلي صار

شهرزاد - يابه شحجي اكثر من هيج والله تعبت مليت روحي جاي تطلع من مكانها والله ظُلم بظُلم سكتت و تحملت مو علمود احد علمودكم و هم لان حضرته ابن عمي

حجي سعد - حقج عليه بكُلشي تحجي شنو تردين يصير
شهرزاد - بس يبتعد عنااا بس يبتعددد مليت ياابه والله تعبت من هل مشكله كل مره صار سنين من تطلكنا ولحد هسه يركض ورانا صار عنده جهال و بعده وراي

مُلهم - يمههه هدديني اروووح انعل الساعه يلي اجه بيها هووو منو ششايف نفسه يسوي هيج وي اخواتي والله ماخلي يعيش بهل الدنيا بعد عوفيني

حجي سعد - اهدئ مُلهم الحجي مو هيج
مالك - جدي ضربته لابوي اليوم

حجي سعد - لا تشيل بكلبك لا تخلي هل شي ياذيك سويت الصح
مالك - بس حرام

زمرد - لا مو حرام انتَ جنت صغير بس لسه اتذكر شون سحلك بالشارع و ركع راسك بالباب خلاك غركان بدمكم موو حراام هذا شخص حقيررر حرامات يتسمى ابن عمي

مُتيم - خل نطفر عليه بليل نطيح حضه
حجي سعد - لاااا محد يسوي هل سوالف خلي اشوف الموضوع شون احله

مُلهم - موو سوينه اتفاق مايوصل الهم شطلعت هاااي والله لعب نفسي من المجره هذا حميد عفيه رجال لا تمل ولا تكل غير سوالي مغص

مُتيم - جنه فزاعه خضره والله لو تخلوني اكتله احس بنفسي مرتاح
حجي سعد - عوفوا الكتل إنتوا اسكتواا .. زمُرده بويه

زمرد - تأمرني حبيبي
حجي سعد - روحي صيحي ديغم كولي اله ابوك يريدك هسه بسرعه

زمرد - أشرت لـ آريـا على الجهال تركتهم يمها و صعدت علكيفي حتى اصيح ديغم .. الشكوك بدت تتعالى براسي شعجب ما نزل رغم كُل هل الاصوات العاليه يلي جانت جوه

تقربت من غرفته اكتم انفاسي بعد ماحسيت بي يحجي بالتلفون يلي اشتراه بالجديد .. فتحت الباب بهدوء اتسمع لكلامه

عضيته شفتي احاول الزم نفسي من وره الشي يلي داسمعه .. ضحك بخبث وهو يحجي بهدوء :- انتضريني اليوم لا تنامين جاي الج

شهكت بصدمه من بعد كلامه رجعت لوره مخليه ايدي على حلكي .. حسيت بي يلتفت على الباب ابتعدت عن المكان انزل من الدرج گلبي تزداد نبضاته

ثواني جانت لزم ايدي بقوه يسحبني عليه .. ركز على عيوني يراقبني بنضرات بارده خله ايده على خصره يرجعني على الحايط

سحب السلاح بحركه سريعه مخلي براسي ..

...يتبع

__________________________

ان شاء الله راجعين بالتنزيل اليومي ، لاتنسون التصويت وتنطوني رائيكم بالتعليقات

قناة التليكرام يلي يحب ينضم
يوزرها evinoq

حساب الانستگرام