♣️الجزء :1336
سحر هبطات عينيها نالبيبي لي كيتنخشش فيها حلات ليه رجليه وبتاسمات ومداتو حطاتو ليليان فوق صدرها
سحر :ههههه شدي ولدك كيقلب عليك
ليليان عنقاتو كتنهج راسو فوق صدرها
يوسف ضار فرحان : ولد تبارك الله
سحر : هههههه شرفتي ابا يووسف رجعي بابا
يوسف ضحك وضار كيشوف فليليان لي كتنهج وضامة فوقها البيبي
يوسف : الحمد لله على سلامتك احبي
ليليان شافت فيه عينيها ذابلين وبتاسمات
دانييل ضار مبتاسم :مبروك ختي
ليليان شافت فيه مستغربة ماعارفاش شكون هو ومامركزاش كااع اكتفت تحرك ليه .راسها بشكر
وصلو نلوبيطال لقاو الدنيا مقلوبة كلشي مجموع الكارد مأمنين المكان وحارسينو الطموبيلات دخلو حتى لوسط المستشفى عاد وقفو
نزل يوسف ودانيل لقاو الاطباء كيساينو بالباياص قدام الباب الداخلي شافوهم جاو كيجريو
سحر نزلات ويوسف دخل النص دجسمو جر ليليان وهزها بشوية هي والولد فوقها وحطها فوق الباياص غير حطها دخلو بيها كيجريو ويوسف ودانييل تابعينهم
نزل عصام شاد فعكازو سحر شافتو بتاسمات ومشات كتجري عندو عنقاتو وتنخششات فيه بحال شي طفلة . عصام لوا يديه على ضهرها كيضحك
عصام :هههههه باطمان بين يديا كترجع مشيشة
سحر بعدات راسها مبتاسمة وعينيها كيبريو : ههههه عرفتي ليليان ولداات وليد (ضمات كفوف يديها باش توريه ) صغيييييوة قد هاااكا وزويييييون
عصام ضمها ليه كيضحك وكيهضر فوذنيها وضار داخل كيعكز
عصام بهمس : حنا امتى غادي نعمرو الكريشة
سحر ضحكات بدلع : هههههههه دابا ادا بغيتي انا واجدة
عصام ضحك ولعب ليها فشعرها :ماكتعيايش البخوشة عاد كنتي محاربة
سحر خرجات لسانها كتضحك : نمشي نضربها بتدويشة يرجع فيا عشرة نشدك مانطلقك
عصام ضحك ولوا يديه على عنقها وهبطها لتحت وهي كتمووت بالضحك
عصام : اليوووم نطيب ممممك على هاد الفهامات
دخلو لداخل لقاو يوسف ودانييل واقفين كيساينوها
♣️الجزء :1337
عصام مشى عنق يوسف : خويا مبرووك عليه الحمد لله على سلامتها ويتربا فعزك
يوسف : اميين اخويا العزيز ربي يحفضك
عصام ضار وعنق حتى دانييل :هههه حتى نتا مبروك عليك رجعتي خال
يوسف خنزر :مازاال حتى نتأكدو
دانييل : وصيت الطبيبة تاخد منها العينة . وعطيتها حتى انا عينة مني. ساعة وغادي يخرجو التحاليل
يوسف خنززر قلب عينيه لقى ذكرى ومراد وبلقيس وياسين داخلين كيجريو
ذكرى قربات عندهم حالتها حااالة تحت عينيها كحالو بالبكا قربات كتجري حتى طاحت فالارض
يوسف وسحر بزربة تحناو شدوها
ذكرى ببكاء :بنتيييي بنتييي بيخييير قولو ليا راه مزياانة
يوسف :شووو الواليدة تهدني راها بيخير
ذكرى : علاش جبتوها لهنا مااالها؟؟
سحر : حيت ولدات اماما ليليان ولدات
ذكرى سمعاتها بتاسمات وهي كتبكي : بنتي الصغيورة ولدات
سحر بتاسمات :ولدات وليد صغر منها
ذكرى تنهدات بقوة وتحنات سجدات فالارض كتبكي
ذكرى :الحمد لله الحمد لله شكرا اربي ملي رضيتيها ليا ساالمة
مراد تحنى علاها من الارض وعنقها : رجعنا جدود اذكرى شرفنا
بلقيس وياسين عنقو يوسف كيباركو ليه على سلامتها من الخطف والولادة
فنفس اللحضة تحلات الباب دغرفة الولادة وخرجو ليليان جارينها بعدما قطعو ليها الحبل السري ونقاوها وغسلو نالبابي
ذكرى شافت الباياص خارج وقفات بالزرية ومشات تلاحت عليها عنقاتها كتبكي
ذكرى :مااامااا دياالي بنتي حبيبة
ليليان علات عينيها فيها عيااانة حاسة بالارهاق وتمتمات
ليليان : ماما
ذكرى شدات ليها وجهها كتبوسها من وجهها خدودها وجبهتها ودانييل غير كيشوف ومبتاسم
ذكرى ببكاء : رووح ماما قلب ماما كنت غادي نحماق ابنتي
ليليان بهمس :ماتخافيش انا بيخير
ذكرى حركات راسها باه كتقاد ليها فشعرها البرتقالي
ذكرى :اه نتي دابا بيخير وولدتي ليا بيبي
بلقيس قربات باستها :الحمد لله اخالتو على سلامتك تخلعنا عليك قلوبنا كانو غادي يوقفو
ليليان عينيها عمرو بالدموع
الممرضة : بلاتي غير ندخلها لغرفتها دخلو عندها
ذكرى تحنات وباستها من راسها
جراتها الممرضة ودخلاتها لغرفتها دخلو كلهم معاها قادوها فالفراش
ليليان :فين ولدي
بلقيس دخلات :الوليد بيخير صحتو مزيانة غير غادي يبقى فقاعة دلي بيبي باش يتطمنو على صحتو ونتي تنعسي وترتاحي غدا فالصباح يجيبوه ليك
سحر شافت فليليان عيانة : كنضن خاص نخرجو نخليوها ترتاح
كلهم خرجو بقى غير يوسف شد الباب وقرب عندها ونعس قدامها عنقها وحط راسها على صدرو . غير حط راسها على صدرو بدات كتبكي
ليليان :يوووسف
يوسف عنقها :شوووووو اعمري
♣️الجزء :1338
ليليان بدات كتشهق :شفتي شنو طرا ليا كان حساب ليا صافي غادي نمووت حساب ليا عمرني باقية نشوفكم
يوسف : نتي بلاصتك معايا اعمري وانا مستحيل نخليك هاد اليومين عقلي كان غادي يخرج
ليليان ببكاء :حتى انا تكرفصت بزاااف خفت بزاااف وكنت كنعيط ليك وفمي كان فيه غير سميتك
يوسف ضمها وباسها من راسها : كنت كنسمع صوتك . صوتك هو لي خلاني مانفشلش ونبقى واقف على رجليا
ليليان كتتنخصص :شكون هادوك وعلاش خطفوني
يوسف : ماعرفناش يمكن شي عصابة نتي صافي نساي هادشي كلو حنا غادي نتكلفو . نتي غير رتاحي خرجي من عقلك كلشي وفرحي بولدك نتي دابا معايا وفأمان ماكاينش لي غادي يقيصك
ليليان بقات كتتنخصص فوق صدرو وهو كيلعب ليها فشعرها حتى نتاضم نفسها ونعسات حيت يومين مانعسات
يوسف بقى شحال معنقها بعد راسها لقاها ناعسة ومرخية بحال شي طفلة عيااات ونعسات تحنى وخطف قبلة من فمها ومد يديه كيتلمس ليها خدها
يوسف :سمحيلي احبيبة ماقدرتش نحميك سمحيلي حيت خليتك تعيشي يومين فالعذاب كنواعدك هادي اخر مرة نغيب عليك من دابا لفوق حمايتك غادي تتضاعف وادا خرجتي غادي تخرجي بربعة دلي كارد
تحنى باسها وقادها بلاصتها وناض خرج لقى جوج دلي كارد واقفين
يوسف : ماتتحركوش من هناا
الكارد حركو ريوسهم :مفهوم سيدي
يوسف :غرفة البيبي فيها الحماية
دانييل :امم صيفطت رجال واقفين فالباب
يوسف حرك راسو شاف العائلة جالسين فالكراسا
دالكولوار جلسو قدامهم كيعاودو ليهم شنو طرا وقضية دانييل وليليان
ذكرى بصدمة :ك كيفاش دابا ليليان ختك
دانييل حرك راسو :امم متأكد منها نفس السلسلة دماما لي انا درتها ليها فعنقها ووراها صورتها لي فعنقو
دانييل :شوفي الشبه
بلقيس حطات يديها على فمها : والله حتى هي ليليان صغيرة
دانييل :سميتها هيلينا الواليدة لي سميتها ليليا
مراد :ولكن مافهمتش كيفاش حتى وصلات نالقرية لي عاشت فيها وهي كانت فأمريكا
دانييل :نهار حيدوها ليا البوليس حيت كنت متشرد وماعندي حد كنت عايش انا وياها غير فالزنقة . خداوها نالميتم وكل مرة كنت كنمشي نشوفها حتى لنهار لي مشيت قالو ليا تبناوها واحد العائلة ماكيولدوش مابغاوش يعطيوني عنوانهم حاولت نوصل ليها وماعرفتش
من بعدما كبرت و نضميت نالعصابة احم قلبت عليها لقيت الناس لي تبناوها ماتو وهي ماليهاش الاتر عيييت نقلب حتى لنهار لي عيط ليا خو السيد لي تبناها كان على فراش الموت
بغى يعتارف ليا وقال بلي هو عطاها لشي حد باش يبعدها حيت خوه كتب املاكو كلهم ليها وماخلا ليه هو حتى حاجة فالورت وقبل مايقول ليا اسم الراجل لي عطاها ليه روحو طلعات ومات
ذكرى : دابا شي حد جابها من امريكا حتى نالمغرب وخلاها فالقرية
دانييل حرك راسو : مية فالمية هادشي لي طرا ومازال غادي نتأكد
مازالين كيهضرو حتى وقفات عليهم الطبيبة شادة بريا فيديها
الطبيبة :تحاليل (الدي ان اي ) خرجو
دانييل سمع كلمة دي ان اي وقف بالزربة خطفها ليها وحلها غير شاف النتيجة جلس على الكرسي ودمعة نزلات من عينيه
دانييل بصوت مرجوف :هيلينا ختي
♣️الجزء :1339
يوسف خطف من يديه الورقة قراها لقى نسبة القرابة 99.99 % ، عض على فمو
ذكرى :امندرا شنو
يوسف تنهد ليليان خت دانييل
كلهم بقاو ساكتين مازالين مصدومين كيشوفو دانييل لي حاط يديه على وجهو
سحر هضرات فوذن عصام : ممكن نمشي نفرح معاه لفرحتو دانييل بحال خويا
عصام تزير ولكن بتاسم وحرك ليها راسو بواخا
سحر بتاسمات وقربات عند دانييل تحنات قدامو وبعدات يديه على وجهو شافت فيه وعينيها مدمعين وبتاسمات
سحر : دانييل
دانييل شاف فيها وعينيه مدمعين : سحر
سحر بتاسمات :لقيتي هيلينا لقيتي ختك الصغييرة
دانييل بتاسم شاد راسو بزز باش ماينزلوش دموعو
سحر :ختك كانت قدامك بعيدة خطوة عليك . ختك كانت عايشة معايا فدار وحدة
دانييل تنهد
سحر بتاسمات : نتا عاونتيني وحافضتي عليا وفنفس الوقت ربي جازاك ولوقت لي ضميتيني ليك عائلتي ضمو ختك
دانييل سرط ريقو ونزلات ليه دمعة من عينيه
سحر حتى هي نزلو دموعها وقربات عنقاتو . يالله عنقاتو تجرات من دراعها ضارت مفزوعة لقات عصام قارن حاجبو
عصام : تفاهمنا تفرحي معاه ماتفاهمناش تعنقيه
سحر ضحكات هزات يديها مسحات دموعها ووقفات وعصام لوا يديه على كتفها
عصام : نتي زعمة اي حاجة مدخلة راسك فيها من الزهر حتى دانييل لقى ختو بسبابك
سحر : هههههه
يالله جات تهضر وهو يبان ليهم فهد داخل وشاد فكتفو لي مضروب برصاصة
غير شافوه غوتو وناضو كيجريو : فاااااااااهد
فهد شافهم كيجريو مخلوعين وقفهم : شوووو ماتخافوش انا بيخير بيخير
♣️الجزء :1340
ذكرى : ولدييييي مااالك
فهد :تهدني الواليدة انا بيخير
عصام :واش تضربتي ؟؟
فهد حرك راسو : اممم ضربة خفيفة جاتني الضربة فوق صدري ماشي شي حاجة صعيبة
ذكرى بدات تبكي :ياااسيدي ربي شنو هادشي مكتاب علينا .
فهد عنقها بيد وحدة : ماتخافيش الواليدة انا بيخير غير حاجة خفيفة
مراد : متأكد ياك
فهد حرك راسو :ماتخافوش غادي نحيد الرصاصة من كتفي وهانا بيخير
مشى ودخل لغرفة الفحص وتبعاتو بلقيس جبدات الماطريال وقربات عندو متوترة وهو ماكيشوفش جيهتها
قطعات ليه التيشوت بالمقص شافت الرصاصة هزات ملقط وعقماتو عقمات ليه الجرحة ودارت ليه ابرة البنج ودخلات الملقط شدات الرصاصة وخرجاتها لاحتها فواحد البواطة وهزات الابرة و الخيط وبدات كتخيط ليه الجرح وكل مرة تعلي فيه راسها كتلقاه ماكيشوفش جيهتها
خيطات ليه الجرح وداواتو دارت ليه فاصمة فوق صدرو
فهد شافها سالات جا يوقف وهي تشدو من يديه ضار عندها لقا عينيها مدمعين
بلقيس : واش مقلق عليا ؟؟
فهد ماهضرش معاها
بلقيس :نتا عارف راك عزيز عليا
فهد شاف فيها وتمتم :ادا كنت بصح عزيز عليك ماكنتيش تفارقيني على الانسانة لي عارفاني كنعشقها
بلقيس : هاديك بنتي وشفتك كيف معذبها نتا مريض بالغيرة الهوسية وخاصك تتعالج
فهد بتاسم جنب :وهادي الطريقة لي لقيتي باش تعالجيني ادكتورة تفارقيني عليها وترفعي دعوة الطلاق
بلقيس نزلو دموعها
فهد : نهار لقيت بنتك انا عالجتها ووقفت فجنبها ونتي براسك وقفت فجنبك وسنييين وانا مضحي بحياتي ووقتي ومتغرب من اجلك درت المستحيل ونتاقمت ليك من لي خطفو بنتك ونهار لقيتها ورجعت مريض بيها نتي بسهوولة هزيتيها ومشيتي مافكرتيش فيا وفعذابي انا
بلقيس :خفت عليها افهد فهمني
فهد : ياك كنتي كتقولي ليا ولدي .وملي انا ولدك عالجيني وبيني ليا راه تصرفاتي غالطين ووقفي معايا حتى نتبدل ماشي تدمريني وتخليني
عايش فسواد غادي نتسطى
بلقيس ببكاء : فهد
فهد بتاسم جنب : كلكم وقفت معاكم نتي ضحيت بسنين من عمري باش ننتاقم ليك . وعصام ضحيت براسي و مشيت لجايحة لكحلة باش نعتقو . و دابا تضربت بقرطاسة وهادشي كلو مامسوقش ليه حيت مفروض عليا نديرو . لكن نهار غلطت انا لقيت كلشي ضدي كلشي عاش حياتو وبقيت انا غارق فبحر عمييق محتاج غير لي يعاوني باش نطلع ملقيتش الوحييدة لي لقيتها (بتاسم جنب )هي سحر حيت هاديك كتشبهني .
بلقيس غير كتبكي
فهد : تمنيتك كون عتابرتيني ولدك سلمان ولا اكرم لي متأكد ادا غلطو كنتي غادي توقفي جنبهم وتعاونيهم
تمنيتك كون صونيتي عليا و تقوليلي شنو هادشي لي كتدير مع مراتك اولدي هادشي ماعاجبنيش اجي نتشاوفو ونهضرو ونحلو هادشي وادا كنتي بصح شخصتيني بمرض الهوس عالجيني ووقفي معايا حيت انا ولدك ولكن لا نتي خديتيها وهربتي وبغيتي تطلقيها بلا خبارها حيت انا ماشي ولدك
كمل كلامو وخرج وخلاها جالسة كتبكي عرفات انها غلطات وماكانش عليها تحاول تطلقهم
♣️الجزء :1341
خرج لقى ذكرى دخلوها لوحدة من الغرف ترتاح وبقاو غير الدراري واقفين فالكولوار
عصام :بيخير ؟
فهد حرك راسو : بيخير ضربة خفيفة
دانييل : دوك القح.اب ودعو كلهم ؟
فهد : زيدو نخرجو لجردة ونهضرو
خرجو كلهم نالجردة. المستشفى كلها كارد مأمنة ماكاينش لي يقدر يدخل ليها
عصام : شنو طرا تما
فهد جبد كارو وشعلو : كلهم تقتلو بقاو جوج خداوهم الرجال لديبو
دانييل : بغيت انا نتكلف بيهم
فهد حرك راسو : تكلف نتا ، انا غادي نشوف مرتي ويوسف ماخصوش يفارق ليليان دابا
دانييل بغى يمشي وهو يوقفو يوسف
يوسف :بلاتي بعدا بغيت نهضر معاكم
دانييل وقف وكلهم شافو فيه
يوسف بتاسم :بغيت نشكركم واحد واحد على وقفتكم معايا ومع مرتي ماكينش شي حد فالدنيا غادي يدير داكشي لي درتو . كلكم ضحيتو براسكم ومافكرتوش دانييل لي غير سمع الخبر من سحر مافكرش وجا كيجري من امريكا هو ورجالو
دانييل بتاسم :والرب جازاني ملي لقيت ختي جيت كنقلب على مراتك لقيت راسي كنقلب على ختي
يوسف بتاسم وحرك راسو وشاف ففهد
يوسف : ونتا لي نسيتي مشاكلك وتلاحيتي معايا فالعافيا ماتسوقتيش لحياتك وهانتا تضربتي ومازال مامسوقش
فهد عنقو بيد وحدة :هاديك راها ختي راه عيوني نعطيهم ليها
يوسف ضرب ليه على كتفو : ربي يحفضك
يوسف شاف فعصام : وعصام لي غير برجل وحدة ماهمو حتى حاجة وغامر براسو ومشى معانا وكان عندو دور كبيير فانقادها
عصام بتاسم : هادا واجب هاديك راه بنتي
يوسف شاف فسحر وتنهد : واكتر وحدة فيكم بغيت نشكرها سحر المرأة الحديدية القوة والصلابة والذكاء سيدة التحديات الانسانة لي ماكاتخافش من الموت وفين ماجيتيها تلقاها وياريت غير تطلبها قبل ماتكمل كلامك تلقاها واقفة جنبك
عصام عنقها وخشاها فيه غاير عليها : ابعدوو ليا من المرااتي راه عيقتوووو
يوسف بتاسم : سعداتك بيها والله (شاف فسحر ) بغيت نشكرك حيت بسبابك تقلبات طموبيل لي كانت لاحقانا وبسبابك ولدي عايش
عصام قرن حاجبو :كيفاش بسبابها ولدك عايش
يوسف :سحر هي ولدات ليليان
فهد خرجات ليه الضحكة بلا مايحس شدها بزز وعصام شاف فسحر هاز حاجبو لقاها عاضة على شفايفها
عصام : هادشي لي بقى ليك ،بقات ليك غير الولادة هانتي ولدتيها القابلة
سحر ضحكات :ههههه وشنو غندير ربي كيحطني فهاد المواقف
عصام عنقها وضار خارج : زيدي ترتاحي قبل مانلقاك تشقلبتي ليا هنا تاني ولا نلقاك وسط غرفة العمليات كتديري العملية لشي حد
سحر :ههههههههه
عصام : ماعرفتكش انا كيفاش حتى كبرتي كنتي غير خوافة ادا غوت عليك تبولي فسروالك
سحر بزعل ودلع : عصاااااام ماتبقاش تقول ليا هاكا
عصام : كتحشمي ملي كنقول ليك كنتي كتبولي
سحر :عصااااام
عصام :بوااالة
#يتبع