#قناص_بغداد(مُهمة_وطن)
البارت السادس والعشرين
بـقلـم: زيــنب عــلي
حبايبي لا تنسون التصويت + متابعة الحساب zainab_ali1 + تعليق بين الفقرات ♥️
Instagram: zainab__.ali1
TikTok: zeinab_.ali1
الحزن لايگ يگلبي عليك
جرح شفه الضحك ياذيك
وانه اگدر يگلبي اچويك
لاجنك شمع ويريدك الشراي ماباچي
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
الـجـازي...
رجفت من كلامها كل آمالي تبددت هيست بحرارة خدي أثر دموعي
حچيت اله بصوت يرجف
-الـجـازي: لا أكيد أكو غلط انه انه اجيب اطفال مستحيل ما اجيب ولا أصير أم
-وسن: صدگيني محچيت هيچ ومستحيل احچي قبل ما اتأكد مئه بالمئة من كلامي ما تشوفين خليتچ تسوين كل هاي التحاليل بس حتى اتأكد أنتِ عندچ ضمور بالمبايض نسبة ٩٠٪ أكثر مراح يكون عندچ طفل الا أذا صارت فد معجزة
-كـحِيلـة: خاف غلط بالتشخيص دكتورة فدوة اغديلچ گولي غيرها
-وسن: تگدر تعرض نفسها على غير دكتورة براحتها اني متأكدة من كلامي حجية
هي تحچي وانه إسهام وتنغرز بصدري من كلامها وأمي تباوعلي ودموعها تصب وانه ما كدامي غير حب ديوان للجهال اتذكر من دوم يگلي يريد غزالة صغيرونة شلون بيه ؟
گومتني أمي وطلعنا من العيادة شافنا صياد تقدم بخوف يحچي
-صـيـاد: هاا يمه شبيها الجازي ليش حالتها هيچ وأنتِ تبچين
گالت أمي واحسها بالگوة ساندتني
-كـحِيلـة: شگلك بالبيت افهمنك يمه بس اخذنه منا
صعدني وبسرعة مشه بالسيارة وانه دموعي ماوگفت ما گبالي غير صورة ديوان والتقارير بيدي وحچاية ما تگدرين تنجبين أطفال ترن بـ اذاني شگول الديوان وشنو ذنبه يرتبط بوحدة ما تخلف ...
بس وصلت للبيت صاح صياد
-صـيـاد: هسه غير يفهموني ظال مثل الاطرش بالزفة شني شبيها أختي يمه شلعتي گلبي احچي
طحت بنص البيت وانهاريت صرخت بألم
-الـجـازي: أختك عاجر ما تجيب اطفاللل صياد اختك عاجررر
لطمت على وجهي حيل وخترقت مسامعي شهگاتهم المصدومة
-الـجـازي: صياد شلون بيه وانه محرومة من كلمة يمه ولَك خويه ماتصير خال ماراح تصير خال يا بعد أختك انه انتهيت تحطمت والله
لطمت على زروري حيل حسيت ايدين صياد حاوطتني شبكني گيد حركتي وگال وهو مصدوم
-صـيـاد: أكيد اكو غلط الجازي نشوف غير دكتورة هاي يمكن ما تفهم نروح الغير وحده اسفرج برا كلشي اسويلچ والله بس لا تتعبين روحچ
هزيت رأسي بيأس ولا
-الـجـازي: لاله خلتني اسوي أكثر من تحليل وأكثر من سونار بس حتى تتأكد وتأكدت
گلتها وغصيت بگلمتي وبچيت بقوة أكثر
-الـجـازي: اخخ بويه لضيم جبتني من اجيت لليوم مارتاحيت يا بويه شلون بيه تعبت والله ربي لا اعتراض على حكمك ماريد اجزع عيني إلهي
شبكني ودموعه تصب يحچي
-صـيـاد: انه ابنچ شني الطفل ويبچيچ عسى لا مر على گلبي فرح وعيونچ حزينة انه ابنچ الجازي أنتِ مو بس اختي أنتِ أمي
صرخت بوجع روحي المتألمة
-الـجـازي: اخخ صياد شگول الديوان اكله تعيش حياتك ويا مره ماتگدر تقدم الك ابسط حقوقك وهو طفل من دمك
رفعت عيوني عاينتلهم احچي بصدمة كل جسمي يرجف
-الـجـازي: كلشي سوالي وكلشي قدملي واكف بوجهه الناس كلها الخاطري والأخير ماگدر أقدم له طفل ماگدر أصير أم بحياتي محد يگلي كلمة يمه
طبطبت على ظهري فاتن تحچي
-فـاتـن: حبيبتي گولي يالله كلشي بالدنيا نصيب وقدر كولي الحمد لله مهما كان نصيبچ صح رب العالمين ما نطاج طفل يمكن اكو حكمة يمكن لو تخلفين راح تولدين طفل مشوه أو معاق لو يطلع مو خوش كولي يالله يا ماما وارضي بقضاء رب العالمين
بقت دموعي تصب ماعرف شلون أتصرف ظليت حاضنه صياد بكل قوتي بالصاله وانحب وكلها تبچي وياي
انطگ الباب رفعت رأسي من حضن صياد اعاين ليه أخاف أخاف انجبر اكله يعوفني ؟
فتح الباب سُطام رجع دش ورا ديوان من شافنا بهذا الوضع نخطف لونه لان وجوهنه سيطر عليها الحزن
-ديـوان: السلام عليكم
-كـحِيلـة: وعليكم السلام تفضل يمه تفضل عزيزي
گبل حضنت صياد وضميت وجهي حتى مايشوفني هو من شافني هيچ تقرب بسرعة يمي وگال الصياد بخوف
-ديـوان: شبيها ليش هيچ حالتها شصار
ميلني صياد من حضنه يمسح على رأسي ويحچي
-صـيـاد: هي تفهمك راح اتركم على راحتكم
راد يگوم چلبت بي أكثر وگلت بصوت ضعيف
-الـجـازي: لا صياد لا تعوفني بروح النشمي لا تعوفني خليني هيچ بحضنك
راد سحبني من ايدي بس انه قويت حضنتي الصياد اكثر
-ديـوان: الجازي شبيچ شصاير حبيبي ليش هيچ متمسكة بصياد بس باوعيلي على الأقل خليني أشوف عيونچ
گلت وانه ابچي
-الـجـازي: ماگدر ديوان حباب ماگدر عوفني
عتني حيل نجريت بحضنه حاوطني أشر الصياد يطلع و فعلًا عافنا وطلع سد الباب وقفله وذب المفتاح من جوه الباب
لميت روحي وگعدت ابچي أكثر وانحب نحيب واضرب على رأسي ضربات خفيفة كعد على ركبه گبالي عيونه كلها خوف كض أيدي
-ديـوان: بس خلني أفهم شبيچ كلشي ينحل الجازي والله كلشي ينحل بس أفهم شبيچ ليش هيچ حالتچ دم الغزال احچي لا تموتين گلبي
ماگدرت احچي حچاياتي خنگني والكلام خاني
كل السويته حضنته على كيفي چعد وگعدت بين رجليه ورأسي على صدره ماگدر احجي شهكتي ماتخليني انطق
حسيت لحظتها خليت من كل المشاعر والتعب ترسني وفاض من عيوني ، دموعي ينزلن جمر من شدة الحرگة والألم الجواي
مسح على رأسي يحچي بهدوء
-ديـوان: شبيچ يروحي شنو الوصلچ لـ هيچ مرحلة لا امچ بيها شي لا أهلچ لا عاشور شصاير يا عيني بس فهميني مو روحي طلعت
همست
-الـجـازي: شي يخصنا انه وياك
گلتها ونزلت دمعة من عيوني بأس دموعي بهدوء تنفس براحة وگال
-ديـوان: سهلة اذا تخصنا اني وياچ سهلة كلشي نجتازه سوه
گلت بدموع مختنگة بعبرتي
-الـجـازي: صعبة ديوان صعبة
رد باس دموعي يحچي
-ديـوان: ليش هيچ مهضومات وليش عيونچ الاحبهن هذا الدمع ماليهن ليش ذبلانه يا روح ديوان أنتِ ؟
صفنت بعينه وگلت بجمود
-الـجـازي: انه ما اجيب أطفال عاجر بين قوسين
بسرعة ملامحة تغيرت أريد الكه شي احچي وافسره ماعرف ضاع الكلام گال بتلعثم
-ديـوان: شنو يعني ما تجيبين أطفال ما فهمت ؟
نزلت رأسي احچي
-الـجـازي: يعني ما راح اگدر اجيبلك طفل يشيل أسمك ديوان اذا تظل وياي راح تنحرم من كلمة بويه راح تنحرم من مشاعر ابوه وبنوه راح تگضي عمرك تعاين على الأطفال وتتحسر لا تظل وياي وتظلم روحك
كض رأسي حيل يهز بي ويحچي
-ديـوان: شتحچين أنتِ الجازي شتحچين يعنى شلون لا تظل وياي شنو ماتجيبين أطفال فهميني وحدة وحدة مو راح اتخبل
سولفتله كلشي صار وشنو الدكتورة گالت ... ابتعد مني يعاين بالاوراق وتحاليل وهو مضطرب وبس يردد بكلمة
-ديـوان: لا حول ولا قوة إلا بالله
همست
-الـجـازي: ماگدر اجيبلك طفل يشيل أسمك عوفني
شمر الاوراق يعاين عليّ رد يمي حضني يحچي بهدوء ويحاول يهديني
-ديـوان: شنو طفل منو گلچ اريد اني كلشي ماريد غيرچ أنتِ طفلتي
-الـجـازي: بس هسه هيچ تحچي بعد جم سنة راح نشوف الأطفال وراح تحس بالنقص
-ديـوان: ماحس بالنقص وياچ أنتِ مكملتني ومكفيتني عن الدنيا والبيها
عاينتله كضيته من تيشيرته حيل ماريد يعوفني واحچي بقهر
-الـجـازي: أذا مو أنتَ تحچي أهلك اهلي الناس الدنيا
-ديـوان: ولچ يا ناس يا دنيا كلشي ماريد اريدچ بس أنتِ
يمسح بدموعي ووجهي ويحچي بشهگة مكتومة
-ديـوان: الجازي دجلتي وفراتي باوعي عليه شوفيني دام اني وياچ لا تهتمين بالعالم كله يمكن اكو غلط يمكن التشخيص مو مضبوط وان طلع كلشي صح مثل ماتگولين هواي اكو اشياء هسه والعلم تطور نتعالچ اسفرچ وين ما يگولون اكو علاجچ افر بيچ الدنيا كلها وأن ما صار عدنا طفل هاي هي اني أومن بحكم رب العالمين مكتفي بيچ الآخر لحظة الي بهاي الدنيا وأن كان على أهلي مراح نجيب سيرة للموضوع أبد
-الـجـازي: لا لا لا مستحيل ما راح ارضه اظلمك وياي ديوان انه عاجر أنتَ شني ذنبك ليش حتى تنحرم
-ديـوان: واذا تحرميني منچ شتتوقعين اني ممكن اعيش الجازي ؟ ولچ تموتيني تحكمين عليه بالموت اذا ابتعدتي
صحت بي بانهيار ما اعَرف شحصلي
-الـجـازي: گلتلك انه مافيدك بعددد مافيد جسد خاوي بلا روح من حبي الك مستحيل اظلمك ويايييي عوفني عوفني
حضني اله أكثر حط رأسي على صدرة وصرت أسمع دگات گلبه الغير منتظمة يهمس
-ديـوان: اشششش اهدي حبيبي اعصابچ تعبانة اهدي
ظليت ابچي بحضنه وهو يقرأ آيات قرآنية ويمسح على رأسي الحدما هدأت أعصابي گال
-ديـوان: لازم نروح نعيد كل الفحوصات ونسوي فحص عام الكلشي
-الـجـازي: ماريد اروح عوفني لا تجيبلي طاري مستشفى بعد ماريدن أروح
-ديـوان: لازم نتأكد الجازي
-الـجـازي: ماريد ماريد خايفة ماريددد
رد سحبني اله يحچي
-ديـوان: اششش ميخالف ارتاحي هاي الفترة حبيبي ولا تفكرين بشي يروحي كلش ماريدچ تفكرين بشي واني يمچ بكل وقت
ظل حاضني يواسي بيه فجأة اختنگت ولعبت روحي حسيت اريدن استفرغ گمت ركضت للباب گام وراي يحچي
-ديـوان: شبيچ الجازي شبيچ شنو صار
ماگدرت احچي حاطة ايدي على حلگي خذيت المفتاح من الگاع فتحت الباب وركضت للحمام قفلته عليه وصرت استفرغ اهيس واسمع صوتهم كلهم يم الباب يدگونه عليه وهو صوته مميز من بينهم يحچي
-ديـوان: الجازي افتحي الباب
-صـيـاد: الجازي احسبلچ دقيقة اذا ماطلعتي اكسر الباب والله لا تشلعين گلبي
اسمع ديوان يگله
-ديـوان: مو هيچ صياد راح تعاند لا تعاملونها بهاي الطريقة
صاح
-صـيـاد: لان اعرف بيها تعاند لازم نكسر الباب
سكتهم گوة شويه صار هدوء دگ الباب على كيفه يحچي
-ديـوان: حبيبي من تشوفين نفسچ زينة افتحي الباب لا تخوفينا عليچ
غسلت وجهي وطلعت بعدني بالباب حسيت البيت افتر بيه ردت اطيح صاحت سُمانه
-سُـمانه: داخت داخت لزموها
بسرعة طفروا ثنينهم كضوني وأمي موتت روحها من البچي خالي گوة كاضها
مددوني على القنفة وسُطام قاس ضغطي طلع مصفر لا اكل ولا شرب وتعب الصوم والمشاكل وحده فوگ وحده احتاروا بيه مدري شيسوون وياي
وكلوني گوة جبروني جبر ولو ما حالة أمي وعيونها الورمن ماكليت لچن الخاطرها كليت شويه وگلت السُمانه تصعدني فوگ الحجرة أمي سندني هي وعمة فاتن وخذني وهو ماتحرك حسيته مايريد يضغط عليه أكثر
صعدت گبل توضيت ولبست ازار صلاة أمي وفرشت مصلايتها ماريد افكر بشي صليت ركعتين وگعدت اقرأ قرآن ردت أحس بالاطمئنان والأمان بداخل نفسي ويا ربي صعدت أمي وراي گعدت يمي بدون ما تحچي
شوي واندگت الباب صاحت أمي
-كـحِيلـة: تفضل
مدت رأسها سُمانه وهي تعاينلي بقلق گالت
-سُـمانه: ديوان يريد الجازي يگول تحضر روحها ترجع وياي
عاينت على أمي ودموعي ردت تنزل گلت برفض
-الـجـازي: يمه ماريد خلي يعوفني اريد اتطلك منه لو أموت لو أعرف اكتل روحي ما ارد الديوان شني ذنبه ينظلم وياي ؟
هزت رأسها بـ آسف
-كـحِيلـة: لا حول ولا وقوة إلا بالله گومي يمه احچي ويا رجلچ وفهمي التردينه والله يعقلچ ويهديچ
عفتها ونزلت بسرعة بعد ما نزعت ثوب الصلاة
لگيته گاعد بالاستقبال وصافن بس شافني ابتسم بتعب وگال
-ديـوان: تعالي يا نظر عيون ديوان
كلمتة صياخ حارة بنص گلبي من اشوف معاملته هيچ أصر على أن اطلگ منه هيچ إنسان يستحق يكون أب بكل معنى الكلمة
-الـجـازي: ديوان انه وياك مستحيل اكمل أنتَ تستحق انسانة تقدملك ابسط حقوقك وهو الطفل انه مافيدك اتركني وعيش حياتك فدوة اروحلك
تگرب يمي حاوطني بيديه حط رأسه على رأسي بتعب ومن يحچي يعت الحچايه عت
-ديـوان: والحياة المابيها أنتِ شنو قيمتها وفايدتها شنو تتوقعين غزالتي يعني راح اطلگچ واروح اتزوج واخلف وهاي هي وكان شي ما صاير ؟
-الـجـازي: على الأقل ما أحس بتأنيب ضمير تجاهك ما اظلمك
حاوط وجهي بيديه
-ديـوان: تظلميني من تعوفيني وحدي اعيش بدونچ يأنبچ ضميرچ من تقررين تنهين حياتي ببعدچ عني بدون ذنب مني اني اريدچ أنتِ وشنو يعني هذا أمر الله نكتب علي وعليچ نعترض الحمد لله كلشي يجي من رب العالمين خير وبركة
صحت بعصبية وانه ابتعد عنه
-الـجـازي: لا الله ما كتبها عليك الله نطاك قدرة تخلف جهال مابيك شي الله حلل الك ثنين وثلاثه واربعه الله انطاك فلوس وبيت تگدر تجيب فيلق تعيشهم بي الله ناعم عليك بثقافة ودين يخليك تربي اطفالك تربية صالحة مستحيل ديوان مستحيل أرجع وياك انه وياك راح نطلك
نزلت دمعه من عينه بساع مسحها وگال بصوت قوي
-ديـوان: وهيچ أهون عليچ تعوفيني وترحين ولا على بالچ؟ علمود سبب أقل ما يقال عنه تافه والله طفل انعل أبو الطفل لا ابو حتى الي يخلفه اريدچ أنتِ احبچ أنتِ ماريد بطفل ماريد اطفال اريدچ أنتِ راح اخليچ كم يوم ترتاحين بس ترجعين وياي بالنهاية ونروح نفحص ونتعالج وكلمة زايدة ماريد أسمع
گلت بضعف
-الـجـازي: طلگني ديوان لا تحاول
گال بهدوء
-ديـوان: ما اطلگ سمعتي ما اطلگ وترجعين وياي باجر ارتاحي اليوم وفكري بعقل عوفي سوادينچ
تقدم باسني بهدوء وگال بهمس خافت
-ديـوان: لا تحرميني منچ انتهي بدونچ والله
ابتعد راد يطلع وانه على كعدتي ماگدر يطلع رد عليه يحچي
-ديـوان: الجازي مجاي اكدر اعوفچ حبابة امشي وياي ماريد اعوفچ وحدچ خليچ وياي حبيبي
همست وعيوني مليانه دموع
-الـجـازي: لا ديوان روح
راد يطلع عاين ليه وگال
-ديـوان: على الأقل من أتصل عليچ جاوبي فدوة لا تخلين گلبي نار عليچ والله رايح وروحي كلها يمچ متفقين حبيبي ؟
هزيت رأسي بـ ايّ
وهو طلع وعيونه ما فارگتني حسيت بنفسي نعست كلش صعدت للحجرة نمت بكل هدوء ومحد حجه وياي اصلًا
𔓕𔓕𔓕
هَـمم ...
فاتح كام وياي وگاعد يلعب بلي هو هيچ دائمًا يفتح كام ومايقبل اني افتح ولا يقبل نحچي كلام يعني بامور عيب أبد أبد وحتى صور مايطلب ومايقبل ادز يگلي شايفچ بالحقيقة الصور شسوي بيهن بعد مخليه ايدي على خدي وصافنة بجماله وهو يلعب دار التليفون على الشاشة وگال
-ثـائـر: جميلتي شوفي هذا ترى لاعب فاشل لاعبالچ بس شنو انا احطه والعب بفريقه بس حتى اخلي يلعب بطريقة تعجبني لان بالواقع ينرفزني يخليني اشيل روحي وارگعها
مندمج ويحچي عبالك گاعدة بصفه والضحكه ماليه وجهة تنهدت واني أردد بداخلي فدوة
-هَـمم: اوي ما اعرف شنو تحبون بهالطوبة شبيهم الرياجيل كل واحد شگده شكبره يركض ورا دائرة فشلونا
باوعلي بتك عين
-ثـائـر: استلم باع العقل تدرين هاي المعاجبتج وراها كرف فلوس يعني الي يلعبها ينتقل من الثرى للثرية
بقينا نحچي وكالعادة استمعت التفاصيل يومه بكل تفاصليها شلون أكل وين راح ويا صديق جاي يمشي ويا وشنو سوه بشغله شنو الي يحبه والماعجبه المهم عنده يظل يحچي وياي
اباوع للساعة راح تصير بالعشرة واني نعست كُلش بس مايهون علي اعوفه وانام من النعاس مافهم منه شنو يگول آخر شي سمعته وهو يگول
-ثـائـر: بس انا عفته يروح علمود هي هاي السالفة البارحة گلتلچ عليها
حچيت بهمس
-هَـمم: ممم عفية حبيبي
صوته نصه وتنفسه اضطرب
-ثـائـر: شبيچ يمعودة ويگلك صير آدمي واحترم نفسك ولچ عدلي صوتچ لا تموتين من الكتل هسه
بين نايمة والصاحية قليل افهم شيحجي همست
-هَـمم: اشش نام حبيبي
سكت شويه بعدها گال
-ثـائـر: لا تعوفيني وتنامين هسه أنام وياچ لا تغفين قبلي ولا سدين الخط خليني يمچ
بقى طول اليل يسولفلي صح قليل يسولف عن طفولته بس
يعني مواقف ويا بيت خاله اكثر شي كلش يحبهم
لحد ما نام وبقت المكالمة مفتوحة بعد ما كال
-ثـائـر: أسبوع الجاي ارجع ادز أبوي وشلته الكم ونشوف تاليها ويا استاذ ديوان مرجان الدين
جريت حسرة بأسف
-هَـمم: ماتوقع ديوان يقبل واكيد راح يشك بيه أنتَ هيج مصر عليه
-ثـائـر: چا اخليچ تروحين مني هَمم سدي الموضوع لان مابي نقاش لا تخليني افقد اعصابي هسه
سكتت لان ماكو فايده اعرفه وهم من يصير عصبي كلش يتأذى واخاف منه يتغير الغير إنسان گلت اسكت واشوف تاليها وين تصفه ماچنت اعرف شنو ضامتلي الدنيا ...
ووضع البيت هاي الأيام ماعرف شدايصير الجازي صارلها أسبوعين ببيت اهلها وديوان ميرجع للبيت بس قليل ومن نسأله عليها يگول أمها مريضة وهي يمها
𔓕𔓕𔓕
الـجـازي ...
مر أسبوعين ديوان ماعافني أبد يروح ويرد من غير الإتصالات تليفوني مايطيح من آذاني وعايفني على راحتي مايضغط عليه ابد حتى أهلي وأمي مايحجون وياي ومسوين الوضع طبيعي
وبيوم الصبح فزيت من النوم تقريبًا بـ ٩ عاينت لگيته گاعد وصافن عليّ غمضت عيوني ورديت فتحتهن استغرب ديوان شني جابه بحجرة أمي بيت أهلي شلون دش
ابتسم من شافني گعدت تگرب بهدوء مبتسم باس رأسي وأيدي وتمدد يمي خلا ايده جوه رأسي وگال
-ديـوان: شلون صرتي غزالتي احسن مو ؟
هزيت راسي بـ ايّ بتسم گام وگومني ويا
-ديـوان: يالله تعالي غسلي حتى اريگچ يروحي گلولي بدون أكل ليش حبيبي يعني أنتِ اذا تعبتي وين اروح اني ها
-الـجـازي: ديوان صدگني ...
ما خلاني كملت جملتي لان سحبني ويا يحچي
-ديـوان: كلشي اجلي فراتي كلشي يتاجل المهم هسه أنتِ كافي صارلچ هواي منغلقة وعفتچ براحتچ كافي دلال بعد
طببني للحمام وغسل ايدي وجهي وطلع يجيب منشفه حطها برا فرجت اسناني وغسلت گملت وطلعت لگيته لازم المنشفه واكف متجي روحه على باب
باوعلي وعلى وجهة ابتسامة تريح النفس وتسر العين قبلي وگال
-ديـوان: صباحچ يا عمر ديوان أنتِ
ضحكت وردت اخذ المنشفة من ايده سحبها وگال
-ديـوان: لا لا ماعدنا أميرات يتبعن روحهن
تگرب همس يم أذني وهو ينشف وجهي
-ديـوان: عدنا الأميرة تدلل وتنحط بنص الگلب وينقفل عليها صاحبة السمو
حضني ومشاني للحجرة اول ما دشينا شفت أمي ضحكت من شافتنا
-كـحِيلـة: صباح الخير يمه هاي صبيت الكم الچاي وسويت لـ جوزاية حليب جاموس يفيدها شربه الها حتى اذا گوة
بوستني من خدودي تعاين عليّ بقلق وحنية
-كـحِيلـة: صيري قوية بعد امچ أنتِ بت النشمي موش ثوبچ الضعف بعد عيون أمچ
طبطبت على ظهري اشرت لها بمعنى اي وطلعت وسدت الباب
عاين ديوان للباب وگال يرطن
-ديـوان: Amazing, I like that it gives you strength
(مذهل يعجبني انها تمنحك القوة )
عاينتله بتك عين عاينلي وضحك
-ديـوان: قصدي أن حلو تنطيچ قوة هيچ تحسين كلامها يغير من نفسيتچ ومنتبه الهاي النقطة
-الـجـازي: هاي كحيلة النشمي شلون ما تنطي القوة وهي احس مخلوقة منها
گعدني بحضنه ماقبل حتى اگعد بصفه وظل يوكل بيه بهدوء ويسوي حركات عبالك يوكل طفلة
-ديـوان: يالله اجتي الطيارة اجتي الطيارة فتحي حلگچ خلي تدخل بالمطار بسرعة بسرعةة راح تمطر عم عم
فتحت حلكي وضحكت من گلبي على سوالفه وهو يضحك الضحكتي
بس كلش نفسي مسدودة لگمتين وميلت رأسي عصرني حيل مكزكز
-ديـوان: باع حركاتها يا محمد هسه احطچ بالخبزه واكلچ هسه شلون هيچ تجمعين القوة والترافة الحنية والقسوة الأدب والوكاحة شلون بيچ شنو أنتِ من شنو مخلوقة يادجلة من گيمر لو من عسل
ملت برأسي على ايده عاين الي بنضرات وكحة وعيونه على جسمي همس
-ديـوان: ولو اكو أشياء أحلى من الگيمر والعسل
ماحسيت غير باسني بهدوء بوسات متتالية
وخر مني وحط رأسي على صدره وتجه روحه للحايط حچه واصابيعة تغلغل بشعري
-ديـوان: النبي زكريا عليه السلام بلغ من العمر عتيا وزوجته هم لكن شاء رب العالمين ان ما يرزقه الاولاد ما اعتراض على حكم الله لكن ما يأس وظل يدعي رب العالمين ويلح بالدعاء الى أن رب العالمين استجاب اله من بعد هاي سنين كلها بعد ما كبروا وصاروا عجايز وهم ما قطعوا الأمل رغم كبر سنهم رب العالمين رزقهم بـ يحيى نبي من انبياء الله مو ولد عادي
رفع رأسي ونضراته ترسل الي قوة غريبة
-ديـوان: ( وَلَا تَيْأَسُوا مِن رَّوْحِ اللَّهِ ۖ إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ ) أنتِ مؤمنة وصابرة وتعرفين ان رب العالمين مستحيل يظلمنا وهذا أمر الله علينا الحمد لله على كل حال مو مشكلة أكو علاج دام رب الأمل موجود يعني الأمل باقي رب المعجزات موجود يعني لو يعجز الكون عن أن يصير عندچ طفل اذا شاء ربچ يرزقنا بطفل وهو الرزاق العليم
طاحن دموعي جر نفس مسحهن وابتسم
-ديـوان: الحمد لله هذا اختبار كوني و مهما كان الإختبار صعب رب العالمين ينطي أصعب الاختبارات الاقوة الجنود وما بعد العسر الا يسر وراح يكون العوض معجزة وكان ما حسينا بألم بيوم صح الطريق طويل وممكن نتعب وممكن نيأس وممكن نگول مستحيل يتغير شي بس لابد بيوم من الأيام راح يتغير كلشي تمام الجازي عمري ما شفتچ ضعيفة ولا راح اقبل اشوفچ ضعيفة حبيتچ لان أنتِ قوية وراح تبقين هيچ
-الـجـازي: بس صعبة عليه فكرة ما اكون أم ولا اگدر اصير ام صعبة صعبة الشخص الي احبه وزوجي وكلشي بحياتي ماگدر افرحه حتى بطفل وأنتَ ليش تحطم نفسك وياي
-ديـوان: خلينا نفكر شويه بالنطق الجازي لو نفرض اني ما اخلف جهال هم راح تركيني هم تقبلين اتركچ واكلچ مو ذنبچ روحي شوفي حياتچ ؟
شهگت وگلتله بسرعة بدون تردد
-الـجـازي: لا طبعًا مستحيل ابقى وياك وما اتركك انه أحبك وما اخسرك علمود ايَّ شي
گال بحزن
-ديـوان: اهاا لعد ليش تردين هيچ تسوين بيه وتحرميني منچ ؟ شنو إحساسي وشلون مرن عليّ اليالي الفاتن وأنتِ ماترديني بعد !
-الـجـازي: وشنو ذنبك
-ديـوان: أحبچ هذا ذنبي أحبچ أموت عليچ مكتفي بيچ اريدچ بس أنتِ واريد بس أنتِ بحياتي وبروحي وبكل تفاصيلي تركت كلشي الخاطرچ لا تكسرين بيه غزالتي
-الـجـازي: بعد خليني ارتاح ديوان خليني أفكر انه هم مايهون عليه ولا اگدر اعوفنك
بتسم بأس رأسي
-ديـوان: كل الوقت الچ يروحي حتى اذا تحبين تسافرين ايّ مكان بس گليلي نحجز ونسافر تمام
هزيت راسي هيست ايده فتحت شعري
عدل گعدتي صار ظهري گباله
بده يظفر بشعري مثل ظفيرة أيام زمان الي تصير راخيه ومو كاملة وكل ما يشد حلقه من الظفيرة يهمس
-ديـوان: متمردة .... مثيرة ... طفلة ... عنيدة ... ناعمة ... حادة ... جميلة ... جامحة ...
حط الـ لاستكيه بنهاية الكصيبة باسمها وشمها برقة
-ديـوان: عشقتها بكل جوارحي دجلة والفرات هي
كام باوع للميز مالتي جاب كحل عرب وحمرتي
باوع العيوني يحچي
-ديـوان: عينها تزينت بـ ليالي عاتمة ورمشيها سلاسل قيدت قلبي بالجام من الحب
حط كحل بعيني بهدوء حتى لا يأذيني
فتحت عيوني شفتهن تكحلن
تلمس شفايفي بطرف أصابعه
-ديـوان: تمتلك ثغرًا عند النظر اليه اثمل دون خمر
گالها وهو يحط حمرتي على شفايفي حسيت تنفسه اضطرب بعدها تلمس دگتي
-ديـوان: هنا شاب رأسي وراح گلبي اسير بين عامود وثلاث نقاط أول وحدة اخذت الروح والثانية الگلب وثالثة العقل
طوخهن مثل ما أسوي حافظ حركاتي
-ديـوان: راضي عبد مملوك خليني عندچ
سويت حركة زعل بشفتي وحضنته قوي احچي
-الـجـازي: يديمك الي يروح الجازي وعمرها أنتَ أحبك حيل يا گلبي
بادلني الحضن
-ديـوان: الدنيا رضى الله والوالدين وحضنچ
ظل حاضني شوي بعدها راح للشغل طلع بعد ما وصاني على نفسي وانه هم شوي تغيرت نفسيتي گمت طلعت يم سمسم
نزلت ما لگيتها بالبيت طلعت وشفتها تروح وترد بالحديقة ومرتبكة رحت يمها احچي
-الـجـازي: خير شو خايفة شمفينه ولچ
-سُـمانه: الجازي طلع الحكم خابر عاشور ويا صياد گالوا طلع الحكم مال الورث وما اعرف شنو مفهمت منهم شي راح أموت من الخوف خاف يسون شي الهم شلون
احتاريت نفس حيرتها معقولة يطلع حكم الورث والتعويض ضدنا ؟ ماعرف ماعرف حتاريت گعدت يمها بالحديقة
فكرنا تودينا وعشرة تردنا وكلها أفكار اكشن صار الغداء دشينا جوه صلينا وتغدينا ماخليناهم يحسون بشي لان عاشور منبه على سُمانه ما تحچي صارت بـ ٢ الظهر شوي ونجر سركي الباب البرا وندفر باب صاله من الخرعة والصرخة مالتنا انجفه الچاي على سُطام گبل لا يحچي دش عاشور شايل بيده أوراق وجنطة ودش ورا صياد وضحكتهم ماليه وجهم
گام خالي وصاح عليه بعصبية
-خـزعـل: انعل أبوك إبن الكل*ب بطل هاي سالفة كل يوم مزوعنا العافية
اثنينا صحنا انه وسُمانه : اااييييععع
ضحك عاشور وحط ايده على رأسه يحچي
-عـاشور: على رأسي سيد خزعل الشمخي
-خـزعـل: رأسك ماريده يشيلني خلي هم ياله شايل عقلك المحجر وكلي شعدكم تزهون بالنصر
-صـيـاد: افا عليك خالي دومنا احنا نزهوا بالنصر
-عـاشور: والفرح والسرور
-فـاتـن: خير يمه عساك دوم فرحان ومنتصر شنهي تحرر العراق
گال صياد وهو يكعد على ايد القنفة يم عاشور
-صـيـاد: نحرره وندوسهم دوس إحنا ويلاد الملحة
-كـحِيلـة: چا شبيكم يمه وجوهكم تشع فرح شنهي الصاير انحايل عليكم شنهييي
رادت سُمانه تحچي ماخليتها گال خالي
-خـزعـل: تحچون لو اخلي الحزام يهلهل على ظهوركم مو تحسبون حاطيلي جم نجمة وتعال يخزعل احترمنا احجوا ياله
أشر عاشور السمانه حركة الخاشوكة من يخوطون بيها
-عـاشور: تاجهن چاي چاي
راحت سمسم تصبله چاي وصياد فتح جنطة چبيرة وحطها گدام أمي مليانه فلوس وكلها بالدولار وأوراق بيوت وقطع أراضي وحلال خير من الله كومه كومه كلهم با اسم أمي
-صـيـاد: الورث مالتچ أنتِ وخالي كله رجع الكم وتعويض بصفتچ أنتِ أرملة وصاحبة أطفال أيتام تعويضچ شوي ثجيل وخالي يعتبر متضرر بسبب أن عاشور چذب وكلهم طلع من مدينته وراح المدينة ثانية بسبب غازي ومرعَي ودك اليتيمه جدام الغاضي بس عوزه يبچي وطلع خالي مجدي فـ هم صار التعويض ثگيل كلش
-عـاشور: وهسه مرعَي وغازي يدكون على رؤوسهم لان هذا شغلهم مال سنين اجينا بلحظة سونالهم بحح واخذناه نص وتعويض
انتبهت على أمي نزل دموعها خلت حجابها على وجها وگالت
-كـحِيلـة: لو فلوس الدنيا كلها مايبرد نار گلبي على النشمي غير دم غازي اتحنه بي
گعد صياد يم رجلينها باس ايدها وهي دموعها تنزل
-صـيـاد: وقعي يمه على الأوراق وهاي هي يرجع حگچ كله يمه بعد ويلادچ ما ينامون جواعة ما تنجبرين ما تاكلين حتى احنا ناكل ونشبع ما راح ينكسر ظهرچ علمود الخياط حتى بس تجيبين فلوس وناكل بيهن ما راح تحتاجين تگعدين بترك الخدم لان ماعندچ بيت يحميچ أنتِ وويلادچ من عگب عين النشمي ما راح تحتاجين ايّ شي يمه
طلع قلم من جيبه
كلها وهو يبوس ادينها
-صـيـاد: وقعي يابعد روحي عسى دموعچ تغسلني كحل عيني لا تعتقدين لهنا وبس دربنا طويل ويا بيت شمخي اخذ حگ أبوي من بين عيونهم مربع وداعة دموعچ وليالي العوز
حبت رأسه وگالت
-كـحِيلـة: النشمي شكثر فخور بيك هسه
انرسمت على عيونه فرحة ونملت بدموع
وقعت أمي على كل الأوراق شال الجنطة وگللها
-صـيـاد: هاچ يمه هاي فلوسچ بعد حلالج حرة بي وين تردين تودينا گليلي وانه اتصرف
جابت سُمانه الچاي عاط عاشور واحنا كلنا متأثرين ومندمجين نبچي على كلام أمي وصياد بحيث كلنا كلنا نزينا من صيحته
-عـاشور: لك تاجهن انلام من اگول تاجهن يابعد گلب اخوها تعاي بحظني مشتاقلچ تعاي
گعدت يمه ونطته الچاي حضنها وبوسها
-عـاشور: محضرلچ حويجة حلوة
-سُـمانه: اموت على حويجاتك شنو جايبلي هالمرة
-عـاشور: مو هسه خلي سيد خزعل يوقع على الأوراق بعد صار عنده حلال بگد الدنيا
گام سُطام جر ورقة ومدري شيكتب وتگرب كعد يم خالي اخذ الأوراق سوه روحه على اساس يقرأ بيهن جرهن عاشور منه
-عـاشور: وطاعون شمَالك خلي ابوي يوقع
-سُـطام: شبيك خلي اقرأ شتردون تسوون
-عـاشور: هو أنتَ وين تفتهم هذن شنهي
حطهن گبال خالي ونطاه قلم
-عـاشور: وقع وقع بعد إبنك وطگ الثانية صار عندك فلوس بعد شيحملك
ضحك خالي وفاتن شمرت عليه الكوشاية
-فـاتـن: ادب سز هاي امجازاتي وياك
كلنا التمينا يم خالي گاعد يوقع وصل الأخير ورقة وعقد حواجبه شالها يحچي
-خـزعـل: شنهي ولكم هم اوقها وابصم
تگرب عاشور اخذها وقراها بصوت عالي
-عـاشور: أنا المدعو خزعل شمخي اتنازل الى أبني سُطام خزعل شمخي بجميع املاكي وثروتي
گام سُطام وصاح
-سَـطام: ظهر الحق ظهر الحق يحي خزعل الشمخي واخيرًا راح ادخل كلية طب الأسنان
-عـاشور: خاب ***** گمم وينك وين هاي السوالف
-سُـطام: مشكور الأخلاقك العالية
-عـاشور: تدلل سطامنا الورد
-خـزعـل: موو بنات گاعدات شلون تفشر لو العسكرية بدل ما تعلمك الانضباط نزعت أخلاقك
ضحك عاشور من كل گلبه
-عـاشور: جا سواية إبنك ما ينلبس عليها ثوب
-صـيـاد: وقع خالي وقع لا ينطيهن للمسودنة العدكم
ضحكت اعرفه يقصد سُمانه طگه عاشور وگال
-عـاشور: انت المسودن لا تكگول عنها مسودنة
حضن سُمانه وهي تهز بحواجبها الصياد
-عـاشور: تاجهن هاي وين أكو منها حبيبة أخوها
وقع خالي وهو يحچي
-خـزعـل: غير نفهم شلون صارت هاي الحادثه كلها يمتى مشيتوا بالقضية المحامي شلون شنو صار ما صار
-صـيـاد: بعد ما رفعنا دعوة وكل الدلائل عدنا نحصروا مرعَي وغازي من جميع الجهات بزاوية مابيها مخرج وخاصة بعد الإضافات مال أمي شنو الضرر الي صار الها بعد ما بخسوا حقها وكلوا وانتَ هم خالي الضرر الحصلته مو هين صارت قضية وقسام شرعي توزع الورث حسب الشرع ولان أنتم منطينا وكاله تسهلت الأمور وخاصة بوجود اذن تسمعنا وعيون تشوفنا
گالها وهو يمسد على نجماته
-عـاشور: دورية طلعت عليهم جابتهم من ياختهم سحل والضابط ما قصر بيهم لان توصية خاصة ، طلعنا هاي الفروقات طبعًا بعد صياح وتهديد وهوبزة فارغة منهم حصلنا الورث والتعويض العمتي والك
عاينلهم وگال
-خـزعـل: جا تعويضي وين
ضحك صياد ونصه رأسه
رفع عاشور رأسه يحچي ويا سُمانه يسوي روحه ما منتبه صاحت فاتن
-فـاتـن: يا عاشور وين تعويض أبوك ؟
گال عاشور بنصر
-عـاشور: برا بالگراج
گام خالي وهو يحچي
-خـزعـل: ثول أكو وأحد يخلي فلوس بالگراج
طلع وهو يدردم اعاين على عاشور يحسب
-عـاشور: وأحد ثنين ثلاثه
بس گال ثلاثة عاط خالي
-خـزعـل: إبن الاوادم هاي شني هاي شجايب فلوسي وين
طلعنا وراهم گال عاشور برود
-عـاشور: شمَالك بويه شني شجايب غير سيارة دودج رام ٢٠١٣ آخر موديل بين قوسين حبيبتي تعرف شنو حبيبتي وحلم حياتي هاي رامي وحلمي وحققته
-خـزعـل: چا بفلوسي
گال وهو يأشر سُمانه على الستكان يعني صبيلي بعد
عاشور: چا انه أركض والهط وطول القضية ودي وجيب واكتل بمرعَي وغازي حتى اديه تشنجن من الكتل وأنتَ على الحاضر تاخذهن لا والف لا هذا حقي أبو عاشور
حمحمت سُمانه وگالت
-سُـمانه: احم احم واني بابا انتظر وادعي وقلق وأنتَ وعدتني بليفون جديد والسنه التجي إني سادس مثل متعرف مبقى شي للدوام
-سِـطام: وابنك الشاطر المتفوق لو يموت مايطلعله بالحكومي طب أسنان بحبحهن للكلية الأهلية خزعولي
ضرب خالي ايد بيد يحچي
-خـزعـل: راح حلالك يخزعل
متنه من ضحك خالي يريد يسوي بيت بيهن وهو راح وشتره اله بيهن سيارة بس حيل فرحت وانه اشوفن ضحكته تارسة وجهة
-عـاشور: وهسه باعوا عيني اكو قطعة أرض مرتبه بمنطقه راقية تمام ومساحتها حيل چبيرة راح نحط فلوس كحيلة على فلوس خزعل وفلوسي وفلوس صياد ونبني بيها بيت النا ويكون چبير وكل واحد بينه اله إسم بهذا البيت ويصير البيت جوه وفوگ مثل السويت كامل الكل وأحد حتى هاشم إسمه موجود ويانه
-خـزعـل: خوش فكرهة شتكولين خيتي أم صياد
-كـحِيلـة: الي تشوفنه حبيبي اي شي تسوونه اكيد المصلحتنا
-صـيـاد: بس هاشم اله حصتين لا ننسى المزن هي صح متوفية بس تشوفنا وننطي الهاشم حصتين تكريم الروحها
-فـاتـن: عين العقل يوم عفية عليكم
ظلوا يسولفون شوي ونزل سُطام يركض ويصيح
-سُـطام: ولكم طلع قبولي طلععع قبولي لك طلعت طب أسنان انقبلت يماااا
اشتغلت هلاهل أمي وعمه فاتن اخذ عاشور منه التليفون يحچي
-عـاشور: چذب أنتَ ابو خيسة تصير دكتور امده الوكت الخلاك دكتور
ضحك وحضن عاشور بكل قوته
-سَـطام: مو من گلبك ادري ادري
بيومها كلنا فراحنين ونسيت سالفة الطفل بفرحة أهلي بسطام وبحگهم الرد من بعد سنين إنتظار
قرر عاشور يسجل سُمانه وينقلها بمدرسة أهلية صدمها من گال
-عـاشور: صياد هو يوصلچ واذا يلتحق أبوي
عاين العمة فاتن وحچه
-عـاشور: يمه لو سُمانه تطلب لبن العصفور ينجاب الها خوش عيني فاتن گلبي
-فـاتـن: ابقى انفخ بيها وهي بروحها صايرة متنجرع
تغيرت ملامح وجهة وگبل عاين عليه هاي الحچايه چانت أمي تگولها اله من يدللني
عاينتله شكثر اتمنى يرد مثل گبل عاشور مو بس أخ عاشور أب بالنسبة الي ومستحيل انسى فضله عليه بيوم من الأيام
-عـاشور: تستاهل تاجهن
سمعت الباب اندگ صياد فتحه أول ما سمعت صوت ديوان گبل گمت عاين على عاشور عاگد حاجبه باستفسار عفتهم ورحت ركض صعدت فوگ ...
𔓕𔓕𔓕
سُـمانه ...
اجه ديوان دخلت للمطبخ اسويلهم چاي جديد تليفوني بيدي شفت وصلني مسج من صياد كاتب
" ثوبچ غيري مخصر هواي عليچ "
تنهدت بضيق ورحت بدلت لبست شي واسع من طلعت صار بوجهي عاشور اشرلي امشي ورا للمطبخ وراح گبلي دخلت لگيته منتظرني
-سُـمانه: محتاج شي حبيبي
-عـاشور: شبيها الجازي جنها زعلانه ويا رجلها
باوعتله وسكتت ماعرف شلون اگله بلع ريگه بخوف وگال
-عـاشور: احچي بابا شبيها الجازي لا تخوفيني
-سُـمانه: عاشور يمكن الجازي عاقر ومتگدرين تنجب أطفال
بهت وجهة وبقى صافن عليه جر الكرسي وگعد اباوع على ايده وهو يورث بالجگارة ترجف گال بصوت مخنوگ
-عـاشور: متأكدين يعني
-سُـمانه: نسبة ٩٠٪ ومتقبل تروح تسوي كشف بعد ولا تقبل تركع ويا ديوان هاي صارلها أسبوعين من أول يوم العيد لليوم
مسح على وجهة يستغفر ويردد د
-عـاشور: لا إله إلا الله وهسه شتريد هي
-سُـمانه: تطلگ
-عـاشور: وهو شني وضعه
بقيت اسولفله شلون صار حال ديوان عليها وشنو سوه علمودها سولفتله كلشي من البداية للنهاية
بقى ساكت يدخن وهو صافن انطيته الچاي شربه مرة وحدة وهو حار وگام رجع يمهم
وخطية ديوان رادها بس تنزل ماكو مانزلت وماحب يضغط عليها وحتى ما گللهم صيحوها شويه وگام سلم وراح شفت عاشور صعد راحلها
𔓕𔓕𔓕
الـجـازي ...
اعاين من الشباچ شفته طلع ركب سيارته وراح بعدها بدقايق مو أكثر اندگ الباب وصوت عاشور يحچي
-عـاشور: البسي حجابچ راح ادشن
گمت بساع لبست إزار الصلاة وفتحت الباب دش وصاح عليه بعصبية
-عـاشور: انت اليمته تظلين هيج تتصرفين وماتعرفين تفكرين دخيل ربچ أريد افتهم هذا عقلچ شلون يفكر مو الولد شاريچ ومتزوهر علموودچ جاي يگلج ماريد فروخ چا شنهي التردينه بعد تريدن تطلگين گوة ؟ لو صارت عادچ تكسرين گلوب ؟
بچيت أخاف منه ماگدر احچي
-عـاشور: شنو ذنبة ؟ شوفي ولچ اسمعيني عدل طلاگ ماكو رجال محترمچ وعازچ ورازچ ولا ضاربچ ونگول ايّ والله ولا هاينچ ونگول الحگ وياها ولا مقلل منچ ونگول شسوين ظاله ويا شو متحملچ وما فد يوم گلچ على عينچ حاجب ترحين تطلكين منه على ايّ أساس اذا انه غلطان گليلي لا تضمين عليّ صححيلي
همست
-الـجـازي: لاله ما غلطان
نتر بيه حيل نزيت
-عـاشور: أذا سمعت سيرة طلاگ مرة ثانية تعرفين شسوي هسه راح اخليچ ترتاحين وترتاح نفسيتچ وراها ترجعين البيت رجلچ فهمتي وماكو شي هسه ماله علاج اكو خير على خير ماكو هاي هي رب العالمين وقسمها عليكم شنو نهاية العالم قابل
-الـجـازي: بس حرام علي أصير انانية ويا واعوفنه يظل هيچ بدون أطفال
عاشور ماگدر هيچ أسوي بي واتجاهل مشاعره ماتعرف بي شكثر يحب الأطفال هو
-عـاشور: ولچ بابا القاضي راضي شلچ علاقة أنتِ الجازي تأدبي لا وروح المارتاح بگبره اطيح حظچ الولد صارله ساعة يوصي بالباب وهاي تگلي اطلگ شوفي لا عبالچ عفتچ ودرت ظهري يعني تسوين اليحلالچ ماكو هذا الشي تشيلينه من راسچ ماريد أكثر كلام لان أنتِ تعبانة هسه ارتاحي وفكري عدل
گعدت على الچرباية ابچي گعد گبالي وگال
-عـاشور: عايني عليّ الجازي
ميلت اديني وعاينت لـ عيونه بيهن قوة غريبة گال
-عـاشور: هيچ ربيتچ انه ؟
حركت راسي برفض
-عـاشور: ربيتچ على الضعف لو على القوة
-الـجـازي: كل قوة مزروعة بروحي أنتَ شتلتها بيه
-عـاشور: چا شلون تضعفين هيچ وانه اعرفچ تربيتي لا أنتِ ضعيفة ولا قليلة إيمان تردينهم يحچون عليه ويگولون دللها بس ماعرف يربيها
زدت بالبچي اكثر گام وگال
-عـاشور: لو تردينهم يحچون عليه ويجيبون طاري تربيتي بالشين سوي البراسچ وخذليني للمرة الثانية
مالحگت احچي عافني وطلع ظليت ابچي لچن بكلامه عادلي روحي گمت خذيت موبايلي واتصلت على ديوان بس دگ اجاني صوته التعبان يحچي
-ديـوان: ها حبيبي
همست
-الـجـازي: ديوان احجزلي يم الدكتور الگلت عليه لازم نكشف واتعالج
تنفس براحة وگال مامصدگ
-ديـوان: شنو غزالة شنو هذا الخبر الحلو شلون اقتنعتي هيچ
-الـجـازي: ما لازم مستسلم
-ديـوان: لچ يسعدني ربي الي انطاچ الي ايّ هاي حبيبتي الاعرفها هسه احجز كلها أسبوع بالهواي ويوصل موعدنا تمام حبيبي
-الـجـازي: بس اظلن هنا ديوان مالي خلگ اهلك وماريدهم يعرفون
تنهد بتعب
-ديـوان: ميخالف حبيبي مايكون خاطرچ الا طيب
تمددت وظلينا نحچي الحدما غفيت وراها ثاني يوم عاشور وصياد خلصوا ثاني يوم نايمين بعدها التحقوا المكان كلش خطر ومانعرف شراح يصير مايصير وياهم
وانه حجزت يم الدكتورة حتى نروح اعيد فحوصاتي كلها من جديد ...
𔓕𔓕𔓕
(في مكان آخر)
روڤــان ...
وقفت بباب الكنيسة نبضات قلبي تزداد مع وقع طرق الاجراس غلقت عيوني وانا استمع على صوت الأجراس تملئ أركانها مشيت للداخل أحمل شمعة دموعي تتقطر مني مثل حبات مطر تعبت وتعبت روحي قصدت يسوع وامنا العذراء داعية الرب يخلصني من الي اعيشة
هدأ خوفي وانا اشوف جدرانها العالية صار مقابيلي صليب يسوع المسيح والشموع المتناثرة حولة ثبتت شمعتي وغلقت عيوني اطلب من الرب الخلاص مع صوت كل طرقة جرس اردد
-روڤـان: انقذني ايها الرب خلصني يا يسوع
وانا على هذا الحال اخترقت مسامعي صوت طرقات أقدام تعلن عن دخول أحد الأشخاص الى الكنيسة لان جانت فارغة بس انا بيها خاصة هسه احنا بفترة داعش ماكو هواي يترددون الهيچ أماكن
ماهتميت بقيت مغمضة عيوني وادعي الرب لكن احس بالحركات حواليه حسيت الشخص ثبت شمعة وهو يهمس بكلمة ابد ما توقعتها وخاصة بمثل هيچ كلام
- اللهم صل على محمد وآل محمد يا علي يا أبو الحسن دخيلك
فتحت عيوني مستغربة لكن ما لقيت احد يمي التفتت انظر خلفي شفت ظهر شخص لابس عسكري يخرج الخارج الكنيسة
للحكاية بقية ...
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
بـقلـم: زيــنب عــلي
شنو رأيكم بالبارت 🌚♥️ ؟
ياترى روفان منو 🥲 ؟
قلبوشات لا تنسون التصويت ومتابعة الحساب ♥️
متابعة ممتعة 🦋