قناص بغداد ( مهمة وطن )

المُـهمة الثـامنة عشرة

#قناص_بغداد(مُهمة_وطن)

البارت الثامن عشر

بـقلـم: زيــنب عــلي

حبايبي لا تنسون التصويت + متابعة الحساب zainab_ali1 + تعليق بين الفقرات ♥️

Instagram: zainab__.ali1
TikTok: zeinab_.ali1

بڪثر ما لميتي روحي
صرت احسچ مو مرة ، بعدال ديرة !
" انتِ بغدادي الزغيرَة "

ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ

گمت مفزوعة من الفراش
واسمعها تصرخ وتلطم

-الـجـازي: شنهي يمه بس فهميني شنهي الغصة شلون نفقد شنهي بشغله يم صحبانه عاشور يمه عاشور وين أكيد يعرف بي

تصرخ وتحچي مافهم كل حچي منها

-كـحِيلـة: صار إنفجار بالدرب هو ملتحق من الصبح ندور عليه ماهو منيله رفيج ماعنده ومو بشغله لان بس ردني من المستشفى وطلع للشغل خابروا و بالدرب صاير انفجار ومفقوده السيارة كلها گالوا الخالج خزعل لحكيني الجازي تعاليلي يمهه ماظلي حيل خلافكم لا تروحين مني

لشتي كلها رجفت من الخوف ماعرفت شسوي گمت لبست حجابي على السريع واخذت تليفوني ونزلت جوه

شفت ديوان دش ودش ورا ميكائيل من شاف حالتي اجه يمي يحچي بخوف

-ديـوان: شبيچ عمري شصاير ليش هيچ حالتچ وجهچ مخطوف لونه

ماعَرف شنو صابني ماگدر احچي بس اشهك
حضني ويحچي على كيف

-ديـوان: بس گليلي شبيچ حبيبي اهدي اهدي جري نفس صلي على محمد ياعيني شبيچ مو قلقتيني واحد حاچي وياچ

وخرت رأسي منا واشرت على سيارته حچيت باحرف متقاطعة
-الـجـازي: أهلي أهلي صياد  ماكو مفقود اخوي مفقود ديوان وما جاي يعرفون بي وين من الصبح

أشر الميكائيل وگله
-ديـوان: الغرفتك وما تطلع واذا طلعت راح يصير غير حچي

اخذني بسرعة طلعني وفتحلي باب السيارة و انه ابچي واشهك بقوة شفت رقم هاشم گبالي صار اتصلت عليه ركب ديوان وشخط السيارة

دك التليفون يرن بس مايرد شوي ورد

-الـجـازي: هاشم وينك الحك صياد ماكو تعرف مو

حجه صوته قلق أكثر مني
-هـاشـم: شبسرعة وصلچ الخبر اهدي الجازي ان شاء الله نلگاه قابل طفل ويضيع

-الـجـازي: أنتَ وين منو گلك هالفترة ماشفته حچيت ويا

-هـاشـم: خابرتني سُمانه هسه چنت ماعرف انه بالنجف اليوم اجازتي جنت يم المزن ماعرف ايَّ شي صار يومين ماشفته ولا حچيت ويا

لطمت على رجلي حيل كض ايدي ديوان وانه صحت
-الـجـازي: ولك اخونا ماهو شلون بينا صخام الصخم وجهچ يا الجازي

-هـاشـم: اهدي طولي بالچ هاي انه رايح المقر شغله اشوفن السالفة شني بس اهدي شلون يگلولچ وأنتِ بهالحال

-الـجـازي: هاشم اذا صياد صار عليه شي اموت روحي اموتن ورا

-هـاشـم: مابي شي أن شاء الله نخيت ابو الحسنين علي ما يمسه شي روحي يم عمتي وان شاء الله نطيح بخبره مابي شي وسالم

سديت الخط منه وكل بالي أكيد عاشور يعرفه وين بس حتى رقمه مو عندي وماگدر اتصل عليه ولا احچي ويا

طول الدرب ابچي وديوان يهدي بيه ويتصل بشكو واحد يعرفه عنده معارف بهاي الجهات الأمنية ينطيهم إسمه الكامل

-ديـوان: صياد النشمي ملازم لا لا مو أول اي القوات الخاصة مكافحة إرهاب يصير أخو المدام زوجتي نعم

ظل يحچي هواي بالمكالمة الأخيرة هذاك يسأل وهو يجاوبه سد التليفون وطبطب على أيدي وگال يطمني

-ديـوان: لا تخافين ماكو شي أن شاء الله هسه يجيبون الي خبر عنه لا تخافين حبيبي

هزيت براسي والخوف ماكل روحي اكل على أخوي
وصلنا نزلت گبل لكيت الباب مفتوح وأمي جاعده تصرخ ودك وتلطم وسُمانه موته روحها رحت ركضت يمها

حچيت وانه بچي
-الـجـازي: شنهي يمه أخوي وينه شلون عرفتي فهميني يمه حجيتي ويا عاشور وينه

تبجي وتنوح
-كـحِيلـة: ماكو عاشور ماهو مايرد نازل من شغله اليوم وهم مايرد واخوچ تليفونه مابي تغطية والانفجار صاير على طريقة ولچ خلص گلبييي عليكم

شبكتني تصرخ
-كـحِيلـة: ظلي حذاي لا ترحين بعيد عني ولَك النشمي حملك ثگيل تعبني تعبني حملك مابيه بعد

كعدنا نبچي وديوان مخبوص يخابر شوي وطب هاشم ونفس الحالة لليل كلش وسمعنا حس سيارة عاينت سُمانه من الشباچ وگالت

-سُـمانه: هاي سيارة عاشور

شويه و ندفر الباب دش عاشور
من شافنا كلنا متجمعين وحالتنا بالضيم عقچ حواجبه وماهتم گال

-عـاشور: سلام عليكم

وراح على ديوان سلم عليه
بهالحاله وركزت على ايديهم والله حسيت اصابعهم تكسرت من گد ما واحد شاد على ايد الثاني بحيث اطرافهم بيض من كثر الضغط تنهدت بضيج

صعد الغرفته بسرعة صعدت ورا أمي وصعدت انه وفاتن وراها

طبت لگيت أمي تبجي وكاضة أيده تهز بيها

-كـحِيلـة: أخوك ماكو ولَك عاشور صياد ماكو

عاين ليها ببرود وخر ايده بهدوء
-عـاشور: مايخصني ماخذه خطوة ونسيبچ جوه

نصدمنا من ردة فعله حچت فاتن وهي تعيط بي

-فـاتـن: تأدب عاشور واحچي عدل ويا عمتك شنو هاي تخبلتتت أخوك وين اذا تعرف شي عنه لا تبقى ساكت وتخوفناااا

اعاين ورفع اجتافه بما أعرف وگال
-عـاشور: شي يخصني !
قابل صياد جاهل بعدين مو عدها نسيب وعدها هاشم وعدها خزعل انه مافيدكم وماعرف صياد وينه

تگربت أمي يمه ولزمت وجهه بيديها وتحچي بكسرة

-كـحِيلـة: طول عمرك سند وعون الي والاولادي أذا انه أذيتك طبني طوب بس النشمي النشمي هذول ويلاده حبوبة يمه أذا تعرف شي برد افادي واطني خبر عنه وگول

وخر وجهه بكل برود وگال
-عـاشور: ماعرف شي عنه أم صياد طلعوا دوروا عليه

وعافنه رجع حط اهدوم بالجنطة وذب هدومه القديمة وسدها بلا مايعاين علينا

نزل وأمي بس عيونها تنگط دموع مستحيل هذا عاشور الحنين مستحيل نفسه مو هو مو هو ابد هذا البرود مو مال عاشور مستحيل ما حچت شي ولا حطيت ببالي عليه الكسرة الاخذها منا موش هينة

نزلت أمي ورا شفته بالباب واگف وفاتح السيارة بكل برود كلشي راح من بالي ظلت بس افكر شلون عاشور هيچ ما مهتم الصياد لازم اكو شي

بهاي الأثناء طب ديوان عاقچ حاجبه وهو يعاين لـ تليفونه راح العاشور گله

-ديـوان: عاشور شنو يعني معلومات صياد سرية ومايصير ينحچي بيها

گالها وهو يرفع التليفون العاشور ابتسم عاشور تك خد وگال

-عـاشور: شمعرفني حالي حالكم

-ديـوان: أذا تعرف شي احچي الي دازه اني مو قليل حتى مايگلوله صياد وين ؟

-عـاشور: گلتلك ماعرف شي رايح ادور عليه حالي حالكم

وصعد سد الباب دك هورن ومشه ؟؟؟....

ضلينا محتارين وديوان يروح ويجي مايعرف وين يتصل بعد بس ظل يحاول دخل هاشم هم بس خالي وسطام بعدهم مارادين كل شويه يتصلون يسألونا مامش خبر فجأة ايَه اتصال الديوان طلع برا يحچي شوي واجه

-ديـوان: السيارة ما مفقودة السيارة الطالع بيها صياد سالكة غير طريق مو يم الإنفجار اصلًا !

حچت أمي بلهفة
-كـحِيلـة: يعني شلون غير درب وليدي وين راح

مسح على شعره وگال بحيرة
-ديـوان: ما أعرف اكو لغز متسترين على إسم صياد حيل حيل

طلع شويه وطلع ورا هاشم بالطرمة رحت وراهم اسمع شيحچون

-ديـوان: يا خوفي خاطفي حزبية لو على شغلة طائفية يمكن إرهابية والي خاطفي جماعة عدهم عرف وهيچ متستر على الموضوع

گلبي نخمش وحيل خفت

گامت أمي گمت وياها گضيتها امشيها رادت للحمام
دخلت وطلعت بعدني بالممر امشيها ماحسيت الا أمي طاحت من طولها گمت اصرخ رحتلها

-الـجـازي: يمه يمه حاچينييي

صحت بكل صوتي
-الـجـازي: الحگوليييي أمي راح تروح منيي

دشت فاتن تركض ووراها ديوان لطمت فاتن على خدودها وگالت
-فـاتـن: ياااا ياا شبيها ولچ شلون وگعت

بعدني ما مجاوبتها ايَه ديوان وشال أمي شيل طلع بيها يحچي

-ديـوان: خلي شي على راسج والحگيني بسرعة

اطتني عمه فاتن عباية وهي هم لبست وطلعنا وراهم لگيته مصعدها بالسيارة طلعنا وعفتا سُمانه وهاشم بالبيت

بنص الدرب صحت وظلت بس تون نمرد چبدي على أمي وبچيت بالزايد من شفتها بهذا الحال، وصلنا للمستشفى گالوا ضغطها مرتفع ظلينا جاعدين يمها تقريب ساعة ورديناها من المستشفى گوه ضغطها استقر شويه مددتها على القنفة وغطيتها وعمه فاتن احذاها تفرك بأديها وتقرأ آيات وادعية، عاينت حوالينا ماشفت سُمانه ماهي بس من ردينا فجتلنا الباب وسألت على أمي واختفت

شفت أمي غفت مدري غمضت عيونها من التعب عفتهن وگمت ادور على سُمانه شفتها بالمطبخ مامش ولا بغرفتها صعدت فوگ ادورها شفت باب غرفة صياد مفتوح رحت ليها ما لگيتها موجودة عاينت باب السطح هم مفتوح شويه

أول ما طلعت للسطح شفتها گاعدة وحاطه قميص صياد بحضنها وحاطه رأسه عليه بين اركبها وتناشغ وتشهگ من البچي رحت جعدت گبالها طبطبت على رأسها گبل فزت بخوف كضيت اديها وگلت

-الـجـازي: هاي انه لا تخافين

كضت اديني كلها ترجف گالت وهي غاصة بعبرتها

-سُـمانه: الجازي اذا صار لـ صياد شي اموت والله ماعيش بعد

-الـجـازي: اششش لا تفاولين وادعيله من غير شي افادي مجمر والف فكرة براسي

رفعت راسها للسما تجت رأسها على الحايط اعاين على ويها هالگد ما لاطمة عليه اكو اماكن صايرات ندب زرگ

-الـجـازي: شعاملة بروحچ ولچ هاي من طلعنا استفردتي بالبيت ولطمتي على راحتچ

گالت بدموع
-سُـمانه: مو بيدي الجازي مو بيدي احبه والله راح اتخبل عليه شلون بيه لو صياد مارجع

حضنتها حيل احجي
-الـجـازي: تفي من حلگج لا تفاولين يالمصگوعة راح اموتن من الخوف

-سُـمانه: كلشي ماريد من الدنيا بعد بس شوفه طولة وهو گبالي حتى ماريد احچي ويا ولا اريد كلشي بس اريده عايش ويشم الهوا

ميلتها من حضني وهي تحچي وتشهك تشهك مثل الفاقدة هزيتها احچي اقويها وانه محتاجة القوة

-الـجـازي: راح يرد صياد ويملي البيت بصياحه وعصبيتة وتگولين ياريته مارد

-سُـمانه: اكص لساني لو گلتها والله اخخخ ربي فدوه الاسمك رجعه النا سالم

-الـجـازي: يارب يارب

گومتها گوه خليتها تغسل وجها ونزلنا جوه أول ماعاينت ليها فاتن عرفت حالتها تنهدت بضيق عفتهن من شفت ديوان مامش طلعت للحوش لگيته موجف على صفحة يدخن گربت يمه حطيت رأسي على ظهره بتعب رفع رأسه وگال

-ديـوان: غزالتي

ماحچيت شي بس الشهگة طلعت مني سحبني من ايدي وحطني حدر ذراعه وحضني يحچي

-ديـوان: ها غزالة ليش تضعفين

ضميت رأسي بي وگلت بـ إنهيار
-الـجـازي: تعبت والله تعبت راح أنهار ديوان شلون بيه اريدن أخوي

مسح على خدودي بأبهامة يحچي
-ديـوان: شوفي كلهم منهارين وامچ متخربطة وأنتِ هم تضعفين وهاي بعدنا يالله مانعرف ايّ خليچ قوية وقوي اهلچ داتشوفين بعينچ على الأقل واحد منكم يتمالك نفسه وتعصابه على ما نوصل الفد خبر يقين

ماحچيت ظليت بس ابچي حس دموعي ورد حضني

للفجر احنا مانمنه وأمي ثلاث مرات طاحت وضغطها ما نزل وعيونها ما گامت تشوف بيهن لأن ضغطها يضرب على عيونها ومنا تلطم على عينها راحن طفن

ندفر الباب حيل نزينا لان هدوء ونهطر الباب
دخل عاشور بهدوء بيده أكل صواني وگال

-عـاشور: أكيد ما ماكلين وعيب عروستنا وابو النسيب أول مره يجونا بعد زواجهم بدون ضيافة رتبوا النا الأكل

وضرب على ظهر ديوان بحيث ديوان عقچ ويهة مستغرب من قوة الضربه

-عـاشور: شتگول أبو النسب

رد ديوان ضربه نفس الضربه وبقوتها

-ديـوان: خلي نعرف خبر عن صياد والباقي سهلة مابينا احنا أهل ان شاء الله

وخر ايد ديوان وگال وهو يكعد ويمسح بسطاله

-عـاشور: لا تطمنوا صياد بخير مابي شي

گلنا فزينا راحت امي بلهفه اله
-كـحِيلـة: عليك بصلاة النبي عرفت عنه شي وينه شبي ليش هيچ اختفه

-عـاشور: تطمني أم صياد كلشي مابي وماگدر احچي اكثر من هيچ بس هو بخير كلشي مابي صاغ سليم جرح مابي

صاحت بي أمه
-فـاتـن: لعد ليش متحچي من الصبح شبيك أنتَ ليش هيچ عايفنا

-هـاشـم: خب صدگ چذب بشرفك عفتنا على النار طول هاي المده عمتي ثلاث مرات نقلناها ضغطها مفول الله لا يسامحك على هالعملة 

-عـاشور: ماچنت اعرف هسه طحت بخبره وگلتلكم

-فـاتـن: الظاهر أنتَ متمادي فد مره

كضتها أمي وگالت
-كـحِيلـة: دام صياد بخير ويتنفس هاي هي خلصت السالفة عوفي عاشور بضيمه

عافتنا ودشت بحجرة سُمانه
الموضوع غريب وتصرفات عاشور بعد اغرب لچن المهم طلع اخوي مابي شي ارتاحينا الحمد لله طالما الموضوع صار يم عاشور
عاينت للساعة تقريبًا بـ 4 الفجر واحنا على گعدتنا فزيت على صوت عاشور وگف بالباب وگال

-عـاشور: رايح التحق رايدين شي 

بعده ما طلع دش خالي وسطام سلموا على ديوان وگعدوا ظلوا شوي يسولفون وعاشور رد گعد اعاين لـ ديوان اخذ باكيت جگايرة وجداحته وطلع للسيارة يريد يدخن ويستحي يدخن جدام وخالي

انتبهت الخالي يحچي ويا عاشور
-خـزعـل: يعني شلون عاشور ما نشوفك ايَّ مو هسه نزلت شنهي سالفتك أنتَ

-عـاشور: شني بويه ماتشوف الوضع گايم گاعد البلد بحالة خرب هسه

-خـزعـل: حتى لو البلد بحالة حرب لچن موش هيچ يابني حرام الي تسوي ما يصير احنا هم اهلك النا حق عليك

-عـاشور: ليش حرام شمسوي جاي تشوفوني ماگاطع منكم چا كافي شنهي تردون ترسموني
زائد ما ناقصكم شي بعد شنهي هاي هي بويه عندي شغل من رخصتكم

وعافنا وگام وهاشم گام يروح ويا حط فلوس بيد سُمانه وباس رأسها وگال
-عـاشور: من تحتاجون شي بس دزيلي مسج يصير عندكم تمام

هزت رأسها رد حب رأسها وگال
-عـاشور: ماتحتاجين شي طول ما انه موجود

نزلت دموعي جان يگول هيچ الي صعب من تشوفين اخوج يقسى عليچ وخاصة الأخ الحنين مثل عاشور

تنهدت وطبيت تطمنت على أمي ونطيتها علاجها وتمددت بفراشها وسلمت على خالي وفاتن وسُمانه و وصيتهم عليها وطلعت الديوان بالباب صعدت يمه 

-ديـوان: ها شو اجيتي ابقي حبيبي خاف امچ تريد شي تحتاجچ خطية

-الـجـازي: لاله عيب أول يوم بعدني ومابقى بالبيت موش حلوة بحگك

-ديـوان: ترى أنتِ المهم والأهم يا ناس يا دنيا اهم شي راحتچ غزالتي

حطيت ايدي على خده امسد عليها الى كيف وبتسم ميل خده على ايدي وباسها

حسيت بهورن طويل وگلوب السيارة صار بعيونا
نطفه عاينت شفتها هاي سيارة عاشور عيونه حمر وويا هاشم مد رأسه وگال

-عـاشور: بس حرك سيارتك شويه اريدن اطلع

اشرله ديوان بحركة اعتذار وميل السيارة من دربه دك هورن وشخط سيارته بقوة

تنهدت وديوان گال
-ديـوان: شكد خابص روحه وشايفها إبن خالچ بويه خشمه مايصكه السيف

عاينتله بطرف عيني
-الـجـازي: حيد وچبير أهله شتريده چا يصير

-ديـوان: دفاعچ عن اخوانچ مستميت اني هم هيچ تدافعينلي لو حچوا عليه

-الـجـازي: اكيد كلشي ولا أحد يحچي على اهلي لو واحد من عزازي

مال عليه وگال ببتسامة
-ديـوان: اني من اعزازچ

-الـجـازي: أكيد هم اخواني وأنتَ زوجي

شابك أصابعه بين اصابيعي حب ايدي هواي وگال
-ديـوان: أن شاء الله اكون حبيبچ وزوجچ وابو بيتچ وكلشي تردين

ردي اله ابتسامة خجولة حرك السيارة وطلعنا للبيت  الدرب يجنن بغداد تخبل الفجريه دنيت روحي اله وحطيت راسي على زنده بتعب على نعس حاوط جتافي وخلا راسي بحضنه همس

-ديـوان: ارتاحي حبيبي تعبتي

وفعلا غفيت ماحسيت بعد غير من شالني ونزلني من السيارة

𔓕𔓕𔓕

هـاشـم..

طلع بيه عاشور گبل للنجف اخذ الدرب كله ساكت ويحش بهالجگاير ويمشي سرعة الطريق ماينشاف حاولت احچي ويا باله مو وياي بس وصلني للبيت الجاعد بي ومارضه ينزل وياي راح دشيت سبحت بعد التعب العشته والحمد لله طلع صياد زين لچن ظل بالي ويا عمتي كلش موزينة صحتها بدلت وطلعت للإمام زرت وصليت صلاة الزيارة وطلعت رايح للمقبرة

تگربت يم گبرها وفرشت فراشي وجعدت يمها گلت انه اغسل بي

-هـاشـم: ها حبيبة گلبي اشتاقيتلچ عذريني تاخرت عليچ بس صارت سالفة وصياد احتفى رحت البغداد على ما نحلت وجيتچ خو ما خفتي يبعد أهلي

حبيت گبرها وحطيت رأسي اطبطب على الكبر على كيف أخافن عليها تفز

هسيت بحركة گبالي رفعت رأسي اعاين هذا  عاشور جاعد من فزيت ضحج

-عـاشور: آسف گطعت خلوتك الشرعية

ضحجت عليه وگلت
-هـاشـم: شنهي الردك هسه موش نزلتني ورحت الدوامك

-عـاشور: ولا شي شفت روحي قريب استحيفت اردن كلت ازور وراها اطلع الشغلي

مديتله الفراش گعد ونزع بسطاله طعت ترمز جاي صبيتله ونطيته

عاين لـ سفري الچاي وضحچ وگال
-عـاشور: مضبط وضعك ومجهز كلشي

-هـاشـم: ايّ چا وين اروحن بهالهيمة اظلن لا اچل ولا شرب معناها اجيب چولاتي وايَي اتسامر وياها

هز راسه وجر حسره
-هـاشـم: چا أنتَ ظل هيچ بس تشتغل

-عـاشور: بعد شعندي غير الشغل

-هـاشـم: وراح تظل طول عمرك هيچ بس بشغلك لاهي

-عـاشور: عيل شلون غير مثلك

-هـاشـم: أنتَ صگد بعد ما تحبها ولا الك شغل بعمتي كحِيلة

-عـاشور: مستحيل وكلشي تحتاجه اخلي سمسم تگلي بي واجيبه وراتب يمشي لـ الجازي حتى ما تحتاج تاخذ من أحد فلوس وصياد مثل ظله مرافجه ومراقب مرعي وغازي حتى بغرفهم بس الي نكسر عمره مايتصلح ولا راح يتصلح يهاشم

-هـاشـم: سهلة وتهون عمتي تعبانة عليك هواي خطية لا تقسى عليها هي تودك أكثر من ويلادها

هز رأسه ورفعه صفن على گبر النشمي تحسر وگال
-عـاشور: مبري الذمة عمي ودينك طايح وماطلبك دين محلل وموهوب اليوم الدين

عرفت گصده حلل و واهب النشمي من دينه المنطي اله وهو صغير

گام وكف وعدل قميصه عاين عليه وگال
-عـاشور: لايگلي الأسود مو

-هـاشـم: چا ماتلوگ المكافحة بس عليك وروح عزيزة گلبي

ضحچ حضني طبطب على جتافي وگال
-عـاشور: يالله في امان الله ايَّ شي تحتاجه خابرني تلگاني يمك خلال ثواني

سلمت عليه وصعد سيارته وراح

شكثر مايكون ظاهره ثلج وبارد لچن هو من داخله حنين وادمي مامش احن منه اتمنى الله يبرد گلبه

گمت اروحن الشغلي راح يبدي الشفت مالتي عاينت شفت ظرف فتحته لگيت بي فلوس عرفته اجه حطلي هذن الفلوس وحطهن هيچ حتى ما يحسسني بشي

ضميتهن ورديت الشغلي غادي بالعتبة ...

𔓕𔓕𔓕

الـجـازي ..

ماحسيت غير للظهر صوت ديوان بالصالة الغرفة هو وميكائيل يحچون وصوته عالي يرزل بي

عاينت الباب مردودة ظال منها شويه وگبالي صاير ديوان يحچي ويا اخو وصوته طالع مبين الموضوع كلش مهم وحساس

-ديـوان: شوف أنتَ مو صغير واني احترمك لان أنتَ رجال وعليك الإعتماد حچيت وياك مرة ومرتين وهاي الثالثه ماريدها تكون مثل الراحن المرة الرابعة راح يصير غير كلام

صاح بي
-ميكائيل: على ايَّ اساس تمنعني من شي اريده طلعت وسافرت ودرست واشتغلت ويا الأمريكان وهسه جاي تريد تصير الأخ المسؤول الكبير الماكو منك

-ديـوان: مو أصير اني اصلًا هيچ وغصبًا ما على رأسك فهمت لو لا وراسك اكسره اذا ماتحترم نفسك اسوي بيك سوايه ماتتسولف واريد اشوف شلون تطلع بالشارع بعد

گام وصاح
-ميكائيل: تريد تحبسني

أشر بصبعه وخزره يحچي بهدوء غاضب
-ديـوان: اگعد، من احچي اني تنثبر بمكانك مو اصغر جهالك طايح الحظ

رد گعد شمر روحه شمر على القنفة
-ديـوان: اسمع هاي الشله الجاي تمشي وياها ما وراهم غير طايح الحظ تمام اطلع مانگلك شي بس ليش تشرب سم بگلبك ؟
على اي ساس شنو البي حلو وتشرب عليك هموم عاشگ ومفلس گلي عندك شي واگع بي عندك سالفة ماتنحل فهمني !

-ميكائيل: ماعندي شي اني احبة واشربه هيج ماگدر اترك

-ديـوان: تمام نگول يعني مدمن اسفرك اعالجك من هذا السم وترجع إنسان ادمي طبيعي ولك الله يلعنك من رحمتة بسبب هذا السم تظل نكس حرام علينا نگعدك ببيتنا وناكل وياك أنتَ الجاي تسوي من الكبائر ولك أنتَ كافر بعمرك ماقاري شي من دينك ؟

-ميكائيل: اهووو ولا يستقر الچان عايش بأمريكا

گام ديوان جره من ياخته وعاط بي بعصبية
-ديـوان: اسمع لَك مو تحسب سافرت برا يعني اصير مدري شلوني حچيت وياك بحترام ثلاث مرات بس الظاهر أنتَ ماتفتهم بالعيني واغاتي سهلهه اني الك

جره من ياخته يريد يطلعة برا الغرفة تفاجأت من تعامل ويا هيچ جريت حجابي وعباتي والبشت مالتي ظال على الچرباية لبسته بسرعة اريد الحك اشوف

لگيته يم الباب يعت بي وهذا يصيح
-ميكائيل: وخر مالَك علاقة بيه وخر عنيييي منو أنتَ وهيچ تسوي منو سمحلك

نزله ديوان جوه وكل البيت انجمع مصدومين ومحد تدخل ظليت اعاين من فوگ انصدمت شبي ويا أخو طلع تليفونه وفلوسه وسويج السيارة وشكو وسليه للتواصل عنده

فتح باب حجرته ودفعه للداخل حيل قفل وصاح بصوت عالي

-ديـوان: يالله رجال أنتَ اطلع من الغرفة واذا شفتك معتب بابها اكسرت رأسك يا طايح الحظ صوجي اني احترمتك من البداية عبالي آدمي

تفاجأت ديوان هيچ أول مره اشوفنه بهاي الحالة عاين ليهم وصاح برعيد عبالك مو ديوان المتفهم وأحد ثاني

-ديـوان: جروا عدل لا افني حظكم شنو هذا التسيب مالكم لا صداد ولا راداد دخلي اشوف وأحد يتصرف بكيفه بعد مالكم چبير هيته هي احترموا نفسكم عاد لا تطلعوني من طوري

گالته أمه
-ابـابـيل: حيل بي أدبه لهذا الادب سز

لچن گصايب مارضت وظلت تحچي عليه عافهم وصعد شفته جاي بتجاه حجرتنا گبل طبيت ونزعت البشت وحجابي وگعدت عاقلة

هطر الباب حيل وانه مسويه روحي فقيرة دش يرعد

-ديـوان: تجي وياهم بالمسايس يحسبونك ماتعرف ولا تگدرلهم تصيح وتضرب اطلع مو خوش آدمي وهم اگول اوادم مايصير ينضربون بس هذا اذا ما ينسحل مايحترم روحه

هو يحچي وانه ساكته اعاين عليه دار عليّ ومن شافني شلون گاعده وساكته صفن عليه شويه وبتسم تگرب يمي يحچي

-ديـوان: شو مسويه روحچ عاقلة خير

-الـجـازي: چا نوب يروح يلوحني طشار من رعيدك انه بت فقيرة مالي شغل بيهم

رفع حواجبه بدهشة وهو يضحك تگرب شوي مني رفع رأسي وباسني فتحت عيوني حيل نصدمت شسوي ماعرف

وخر مني وگال
-ديـوان: شلون بنت فقيرة وتجنن هاي

رفعت رأسي احچي
-الـجـازي: اليشوفك هسه مسرسح ولا يگول جنت گبل شويه ترعد علينا

-ديـوان: يمچ اعصابي تهدأ وارتاح

گالها وحضني وكل شوي يسحبني اله وصار يتجرأ ماعرفت شسوي ردت شي أفلت بي منه وخرت منه وانه ادفعنه حيل اخترع لأن طفرت طفر

-الـجـازي: يبوي يا ضيم الولاني ماولى أحد

-ديـوان: شبيچ تعالي

-الـجـازي: أمي أمي نسيت اخابرها اشوفنها شلونها مالونها

عفته ورحت اخذت تليفوني وانه متوترة أكل بأظافيري ضحك وگام طلع من ثلاجة بسكت وصب حاط ترمز يمه بالغرفة گعد ياكل وشغل التلفزيون ارتاحيت من هدني

دگيت على امي ادك هواي مامش محد يرد علي لا امي ولا سُمانه ولا فاتن ولا خالي گلبي لعب وخفت رحتله

-الـجـازي: ديوان كوم نروح الأهلي محد يرد گلبي ما مطمن على أمي

عاين ويهة مستفسر گال
-ديـوان: خاف جاي ياكلون شي ترا دنيا الظهر

-الـجـازي: لاله موش وكت اكلهم هسه كوم كوم فدوة أمي خاف بيها شي 

گام سحب هدومه يبدل ويحچي
-ديـوان: يالله تحضري هسه نروح ميخالف

گمت على سريع بدلت ونزلنا هو طلع قبلي وانه ورا
شافتني عمته مبدله اريدن اطلع عوجت حلجها وگالت

-تنسيم: وين شو ماگعدتي بالبيت صارلچ يومين من تزوجتي الهسه أنتِ وزوجج ساعة بالبيت ماگعدتوا هي هاي الأصول يبنت الشيوخ

تحچي وما شافته من طلع گبلي عبالها بس انه موجودة رد عليها گال

-ديـوان: عمتي العزيزة رجلها وياها محد اله علاقة اتوقع وبراحتي ويا زوجتي بعدنا بشهر العسل اوديها اجيبها شي يخصنا فدوة اروحلچ

-تنسيم: تطلعون تطبون ماگلنا شي بي مو بيوم صباحية عرسها تاخذها البيت أهلها

-ديـوان: ترى متزوجها عمخ مماخذها عبده لو سجينة اهلها وشوكت ما تريد تشوفهم لحد يدخل رجاءً

راح العمته حب رأسه وطيب خاطرها ورد كض أيدي وطلع كلتله وانه اعاين عليه

-الـجـازي: بعد طوايفي

گرص خدي وفتحلي باب السيارة طلعنا گبل البيت أهلي هواي دگينا الجرس
هواي ظلينا موجفين متت الف موته ليما طلعلنا سطام النوم بعيونه سلم على ديوان وانه نشدته

-الـجـازي: سطام وينهم ولا واحد يرد عليه

مسح على ويهه بحيرة وگال
-سُـطام: خذوا عمتي للمستشفى عيونها كلش ماتشوف بيهن

فزيت احچي
-الـجـازي: ليشش شبيهن عيون أمي

-سُـطام: ماكو شي بس شويه تعبت منهن عمتي بس لا تخافين جوزه ماكو شي خطير

-ديـوان: زين تعرف وين نقلوها انطينا العنوان

دش جابلنا العنوان كاتبة بورقة انطاه الديوان اخذنا وطلعنا گبل للسمتشفى الي همَ بيها أول ما صعدنا لگيت خالي وفاتن جاعدين من شافتني فاتن دشيت استغربت گامت واجتني كضيتها احچي بدموع

-الـجـازي: وينها أمي عمه فدوة گليلي شبيها

-فـاتـن: إسم الله يوم شبيچ والله ما بيها شي كشف علمود عيونها وخالچ جوه وياها هسه يطلعون

لطمت وگلت بحرجة
-الـجـازي: أمي راح يروحن عيونها وانه السبب شلون بيه

گبل عاينت على ديوان انه هم عاينتله شفت وجه استفسر ابتسمت فاتن وگالت

-فـاتـن: لا أمي أنتِ شعليچ قابل شلون متتزوجين تبقين طول العمر يمها

سكتت وهو حچه
-ديـوان: وهسه أم صياد وين

-فـاتـن: يسوولها كشف على عيونها خزعل وياها يمكن يحولونها عملية

شهگت بخوف ظلوا يطمنون بيه الحدما طلعت أمي خالي گايدها گوه عيونها مفتوحات ماتشوف كلش رحت ليها گبل شبكتها حضنت رأسي وگالت

-كـحِيلـة: هاي الجازي ولچ يمه شمالچ ماگعدتي بگاعچ من أمس لليوم تشوعطين

حبيتها وگلت
-الـجـازي: شلون تريدين اگعد وصحتچ ماهي طويبة يمه

-خـزعـل: لا تخافين خالي انه وياها ماعايفها مايصير معذبه روحج ومعذبه النسيب وياج بعدنا اول يوم يالله راح يشرد

-ديـوان: لا هم شي صحة عمتي والجازي مرتاحة اني مرتاح معناها

ظلوا يسولفون هو وخالي وأمي حچلي گايللها الدكتور لازم عملية يلا ترجع تشوف بيهن وعمليتها أسبوع الجاي

اخذناها وردينا للبيت نزلت اتطمنت عليها ووصيت سمسم تنطيها دواها على الموعد وطلعت اريدن اروح الديوان مارضه ينزل ظل بالسيارة استوقفني كلام سطام بالحوش يحچي بالتليفون ويگول

-سُـطام: عاشور ليش ماتحچي العمتي الحقيقة مال صياد ترى كلش حالتها منتكسه على الاقل من تحجيلها ترتاح يمكن

دار ويهة من شافني گبل نهى الحديث وسده تگربت يمه احچي
-الـجـازي: جنت تحچي ويا عاشور

-سُـطام: ايّ

-الـجـازي: وشنهي هي حقيقة صياد

-سُـطام: ماكو شي ماكو شي زوجج ينتظرچ بره اطلعيله عين

ضيگت عيوني اعاين عليه گلت
-الـجـازي: ماراح اعتبرها طرده والضامينه الا اعرفه بطريقتي

ابتسم وگال
-سُـطام: هو أنتِ ينظم عليچ شي

-الـجـازي: همزين تعرف

سلمت عليه وطلعت الديوان أول ماصعدت بالسيارة يمه گال
-ديـوان: ها غزالة طمنتي گليبچ

-الـجـازي: شوي

-ديـوان: المهم ارتاحيتي وهذا المهم عندي

هزيت رأسي الشارع سنطه ظهاري وكلها ببيوتها اتگرب عليه باس دكة حنچي وصعد شويه فوگها طبع ٣ بوسات ممتالية وميل درت ويهي منه اخجل اعاين عليه شغل السيارة وشابك اصابعة بصابيعي وساق هيچ ظلينا ساكتين الحدما وصلنا البيت باس ايدي وگال

-ديـوان: انزلي حبيبي اني اروح اشتري جگاير وامر للبانزينخانات وللمصنع اجيك الشغل وارجع فد ساعة

-الـجـازي: لا تتأخر وتعوفني وحدي

ضحك وگال
-ديـوان: لا تخافين أهلي ماياكلون بشر

ضحكت ونزلت خلاني ادش للبيت يلا راح أول مافتت شفت مشاعل وابابيل گدامي سلمت ردن عليه من غير طيب خاطر ومشاعل عاينتلي زهزت أيدها بحركة معاجبها

ردت اصعد گالت عمه ابابيل بضوجة
-ابـابـيل: الجازي الناس هواي اجت حتى تباركلكم وانتو مموجودين لعد اذا تردون هالگد تطلعون ليش مسافرتوا شهر عسل على الاقل نگول للناس مسافرين

تگربت يمها احچي
-الـجـازي: حقچ عمه ما الومچ صگد ماجعدنا بالبيت من أمس لليوم لچن أمي كلش مريضة البارحة ٣ مرات نقلناها للمستشفى

گامت وحچت
-ابـابـيل: ياا لچ دادة خطية شبيها وهسه شلونها

-الـجـازي: صارت سالفة بشغل أخوي وشغله خطر ماتحملت الخبر وطاحت هسه أسبوع الجاي ينرادلها عملية لعويناتها

گالت مشاعل
-مشاعل: الجازي اسمها عيون مو عويناتها

طنشتها ماحچيت وامها خزرتها وگالت
-ابـابـيل: مسكينة متستاهل امچ وردة مال الله باچر اروح اشوفها متستاهل أم صياد

-الـجـازي: تسلمين

صعدت الدرج صارت بوجهي هَمم اجت حضنتني وگالت
-هَـمم: هلا والله بعروستنا الي ماشفناها ولا گدت بالبيت هي ورجلها

طبطبت على ظهرها وگلت
-الـجـازي: حقچ

-هَـمم: اشاقة وياچ اطلعي وتونسي شعندچ باقية بقصر الأشباح هذا

ابتسمت صدگ جنه قصر أشباح گلتها انتظريني ابدل وانزل يمچ صعدت الغرفتي بدلت ونزلت يم هَمم گعدنا الصالة صالتهم تطارد بيها خيول عاينت الها وگلت

-الـجـازي: هاي صالتكم شلون تتنظف

گالت بدون اهتمام
-هَـمم: لا تخافين اكو من ينظفها

-الـجـازي: كلكم جاعدين بهذا البيت حتى عمامچ

-هَـمم: لا عمامي بيوتهم بصفنا جيرانا منا ومنا هذا البيت گاعدين بي بي أهلي وجدو والحجية كصايب تصير زوجة جدو وعمه تنسيم اخت بابا بس من الأب زوجها متوفي وعندها بس مون يعني مون تصير بنت عمتي

ظلت تشوفني البيت مالتهم شگد وشكبره يمكن اذا امشي بي الوحدي اتيهن وبعد ماندل غرفتي وين واهم شي ركزت على غرفة گصايب بالطابق الارضي گبال الباب

-الـجـازي: هي گصايب وين مالها حس

-هَـمم: ليش هي تگعد طالعة شوف وين

-الـجـازي: وبيتكم هدوء هيچ طول الوكت

گالت بستهزاء
-هَـمم: ايّ اذا ماكو مشاكل وهاي زوجة يامن عفاف متنزل ابد بس وقت الأكل ولا تنزل بنتها بعدها طفلة عمرها أربع سنوات ديوان هواي متعلق بيها

ظلينا نحچي شويه ودگ تليفونها من عاينت عليه عيونها لمعن وابتسمت گامت وگالت

-هَـمم: حصعد ارد على الاتصال شويه وانزلچ

صعدت ركض حتى مالحگت اسألها انه هم گمت ردت اصعد الغرفتي صارت گبالي غرفة گصايب مفتوحة عاينت البيت هدوء ومحد موجود ترددت اروح للغرفة لچن شجعت نفسي ورحت

رجليه رجفن بخوف حطيت ايدي على گلبي ودعيت ربي يوگف وياي بهاي المحنه الانه بيها اخذت نفس ودشيت للغرفة سديتها ورحت گبل للكنتور فتحته هستوني ادور بي وما هيست غير صوت ديوان يگلي

-ديـوان: غزالة شسوين هنا

للحكاية بقية...

ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ

بـقلـم: زيــنب عــلي

شنو رأيكم بالبارت 🌚♥️

برأيكم الجازي راح تگدر تخلص نفسها ؟

قلبوشات لا تنسون التصويت ومتابعة الحساب

متابعة ممتعة 🦋