#قناص_بغداد(مُهمة_وطن)
البارت السادس
بـقلـم: زيــنب عــلي
حبايبي لا تنسون التصويت + متابعة الحساب zainab_ali1 + تعليق بين الفقرات ♥️
Instagram: zainab__.ali1
TikTok: zeinab_.ali1
توادعنة..
ونسيت بوجهك عيوني
شثگل هجرك..!
سما و طاحت على متوني .
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
الـجـازي…
اثنينا عاينا على أمي فاتحة عيونها بغضب گمت على حيلي لشتي كلها صارت تريف من الخوف تگربت
-كـحِيلـة: منهو اليحبحب شنهي هذا الحچي ولچ
-الـجـازي: شنهي يمه ياهو هاذ (هذا) يحبحب شنهي
-كـحِيلـة: انه هالجاي انشدچ اضن سمعتچ هيچ تگولين
عاينت على المزن مدنجه رأسها وماتخلي عينها بعين أمي صاحت بيه نززتني
-كـحِيلـة: ماتحچن شمَالچن نصچيتن شمَالچ ويا اخيتچ تسوحلين بيها
-الـجـازي: عتيجة يمه متناجرة وياها وايت اتبچبچ وانه صحت عليها حتى انهرها تروح للغصر بعد
خذت العباة من ورا الباب وگالت من غير طيبة خاطر
-كـحِيلـة: چم مرة نهرتها ما ترضي تهد يدچ تحب تداري وأمي مكيفة اجتها وحده عطية من الله
حمحمت وگلت
-الـجـازي: وأنتِ يمه وين ماشية
-كـحِيلـة: عدي خياط اودي للناس واردن عينچ على البيت صياد وعاشور طلعوا يتصيدون بالبر
من الفرحة الجواي ردت اهزن جتف كوه گضيت روحي
-الـجـازي: بعيوني البيت يمه لا تشيلين هم
دنجت على المزن وحبتها وحضنتها ليها تحچي
-كـحِيلـة: اروحن واردن اطيحلچ حظ عتيجة لا تتضايگين يبعد رويحتي
حضنت أمي وصارت تنوح الغبرة ماگدرت تكض روحها وماسديت السالفة الا بطلاع الروح وخليت أمي گلبها ايتطمن وتطلع صكيت الباب وراها ورديت مهرفة خذيت حجابي خليته على رأسي وانه احچي
-الـجـازي: گومي وياي
-الـمـزن: شنهي وين ؟!
-الـجـازي: اخذ حگچ من هويشم الخايس وأمه أم السحورة
گالت بخوف
-الـمـزن: لاله خله ويولي ماروحن للغصر بعد فدوة اغديلچ
-الـجـازي: شنهي يسوي هيچ بأخيتي وترديني اضل ساكتة انطن واموتن وأبو فاضل گومي جدامي
-الـمـزن: لا تخليني اتندم يوم العلمتچ بالسالفة خلي يولي فدوة اغديلچ
غميتها وحچيت
-الـجـازي: ضلي ضلي بهاي فهاوتچ بس تعوين وتريفين ضلي هنا وانه اروح الوحدي الا اهد غصرهم فوگ رؤوسهم
عفتها تصيح وراي وطلعت للچول شفت هويشم منتچي على سيارة أبو مصفوفة بباب الغصر ويعاين البيتنا ويفر بسويچه ومترهي فرد نوب نزعت من ريلي ومشتله بكل سرعتي وانه اصيح
-الـجـازي: إبن الچلب انعل أبوك يابو عشيرتك الحمير
أشر على روحه وگال
-هـاشـم: هذا انه
-الـجـازي: لا على مطاية البر الي أنتَ منهم
گلتها وشمرت النعال عليه دنچ وعبره ايَه عليه حامي يريد يطجني ماشفت جدامي غير صلبوخ چبير بالگاع شلته ونومته برأسه حيل انطرح بگاعه وصار يصرخ مثل النسوان وايده كلها دم نزعت نعالي الثاني واستغليت طيحته وحمسته حمس وين التويعك
-الـجـازي: هاي حتى نوبة الأخرى من تعاين على أختي اتذكر هاي الچتلة ويو طلع نفس منك افضحك فضيحة أبو عين النجسة المخنث
التمت الزلام محد يگدر يتگرب اليما انفچ باب الغصر تفلت عليه ورديت ركض البيتنا
غفلت الباب وانه اسحب النفس بالگوات من التعب فوخت گلبي بي دشت ولگيتها هاي الفاهية باچية ليما طايحة صفح مفرفحة تفرفح
-الـمـزن: صوجي انه احچيلچ شي وعلي بعد شيصير ولا احچي ولا اگول
-الـجـازي: حتى اطيح حضچ أم دميعة وعلي انوب يو ريلچ خطت باب الغصر الا اكسرها الچ
-الـمـزن: وهسه شراح يصير مرعي مايسكت ولا عتيجة تسكت
جعدت احچي بتعب
-الـجـازي: يبيلي ماي ابلن ريجي بي حلچي يبس من الچتل والصايح
بعدنا نحچي ولن الباب تفلش علينا من الدگ وصوت عتيجة تصيح
-عـتيقـة: برابچ بنات الحرام الـ ***** اطلعن اذا ولدي صاير بي شي اهجم بيوتكم على رؤوسكم ولد الحرام اطلعوا
صارت المزن تلطم على ويها وتبچي وتحچي
-الـمـزن: شيفكنا منهم هسه شيفكنا هساع تيي وأمي وتعرف السالفة كلها وساعتها اچتل روحي ولا أمي تعرف الصار
-الـجـازي: خايبة صچيچة الهالحلگ اليعوي هي عتيجة هم حرمة وتخافين منها
انه احچي وهي چسرت الباب علينا تچسر هميت ردت اطلعلها ولن اسمع صوت أمي تحچي وياها
-كـحِيلـة: خير خير اللهم اجعله خير شعدها كوجة الشر ببابي اليوم
اسمعها صاحت بأمي
-عـتيقـة: طلعي بناتچ البرابچ فشخن رأس وليديييي مدري شعملن بحالة طلعيهن الـ****** بنات الـ ****
ماتحملت من سبتنا ويا فجه الباب ولن أشوف أمي هجمت عليها گاضتها من حلجها وتفرك حيل وتحچي بعصبية
-كـحِيلـة: هالنوبة سويتيها ويبتي طاري تاج رأسچ ورأس عشيرتچ بالبطال نوبة الثانية اترس حلجچ حصو وانعل أبو اليطلع وراچ
تعجبيت أول نوبة اشوفن أمي هيچ عصبية ومنفعلة طاحت اعتيجة بالگاع تملخ بروحها وتصيح فوگ من العرب
-عـتيقـة: ييييببببوووو چتلنااااااييييي فشخن أبني وجتلناااييي
سرفنت ارداناتي وگلت
-الـجـازي: چا من كونچ جاي تگولين چتلني خليها تصير صگد حتى ما تكتلني الهضيمة تتبلين علينا ومانسوي شي على تالي عمري السميلة (القديمة) اتبلى علينا
يبتها من رأسها وصرت اطج بيها حيل وهي تصرخ
شلت نعالي ورفعت رأسها ليه وضربتها على حلكها بكل غوتي وأمي تعاوني
ليما حلجها صار يصب دم
-الـجـازي: هاي حتى مرة الأخرى من تيبين طاري تاج راسچ وتاج رأس إبنچ العار تذكرين دم إبنچ الي خليته بطوله
اعاين ليها شفتها مثل الداخت رفستها بكليتها نفس رفسه مرعي الصياد أول ما دشينا هنا
-كـحِيلـة: ايّ فوخي گلبي عفية بتي والنعم من بت النشمي
تبسمت أمي بفخر
كضيت أيدها وهاي منسدحة على الگاع
-الـجـازي: اچسر ظهره اليجيب طاري تاچ رأسهم بالباطل والي يگرب صوبچ أنتِ وخوتي أشعل أهله كلهم وخلي يسوي سحر وخلي السحر يفيده
دششت أمي وسديت الباب وهي استلمتنا
-كـحِيلـة: شصايررر ولچن ليش جتلتي هاشم شمسوي احچن لا تعلن گلبي والمزن شمالها راح تطيح من الخوف
-الـجـازي: الموضوع ومابي من چانت المزن بالغصر وطالعة هذا هويشم ساب أبوي وحاچي عليچ ومن گالتلي المزن وما تحملت ورحت فلجت رأسه المخنث هاي أمها وهاي أبوها شنهي يمه ما أضم عليچ انه
جعدت وهي تحچي
-كـحِيلـة: ايا نجس يا طايح الحظ دخلي يجون اخوتچ واشوفه الزلم شلون تحچي هينن روحي جربيلي التليفون الأرضي بساعچ ومدي الي مابيه اتحرك ريلية الويع ماكلهن فرد نوب
راحت المزن تفرچ ريول امي وهي تبچي وتناشغ وأمي ضلت تسولف وياها وانه طشيت للهول وهي چانت بغرفتنا شفته بي حرارة سحبته وديته الها گامت تدك بالارغام عرفتها ويا خالي من سلمت عليه وبعدها گالت
-كـحِيلـة: خزعل هذا هويشم ساب النشمي وغالط عليه
وحچتله السالفه واشوفنها شوي وضحجت
-كـحِيلـة: شطلع عينها غيرك هسه أنتَ فرحان على فلجة هويشم عود خابريتك تفزع طلعت متونس على الغضية يجي عاشور وصياد واخلهم يكضونه ينعنعون ظلوعة ما أطلع حرمة النشمي
سكتت تسمع اله مدري شگاللها
-كـحِيلـة: خوش خوش يالله حياك الله هلا بيك يمتى ماتجي هلا بيك خويه
راحت لين المزن وشبكتها وخلت رأسها على صدرها وطبطب على ظهرها ورأسها تحبحب بيها
-كـحِيلـة: وسفه من حنية النشمي تبچي يابعد گلبي لاتبچين اختيچ اخَذت حگ أبوچ وهسه ايون (يجون) اخَوتچ هم ياخذون اضعاف حگه مربع يبعد افادي دموعچ يغسلني عساني ما عشت وحنينتي تبچبچ
شواي وسمعنا طگة الباب صوت ضحچ عاشور وصياد
-صـيـاد: ولَك شنهي هاي شمَالها الزلم صايره مدري شلونها
-عـاشور: راحت رجال حامض السماكي ضلت بس الرجال الي بالعصا تنساكي
فجيت الباب وأمي والمزن ورأي من شافوا المزن تبچي ركضوا عليها ثنينهم يتساءلون
-صـيـاد: شمَالج ياهو وياچ ليش عيويناتچ وارمه شنهي
-عـاشور: ماتحچون عمه شصار
-الـجـازي: هويشم الخايس ساب أبوي وحاچي بشرف أمي ورحت وفلجت رأسه بصلبوخ وجتلته بالنعال وايت عتيجة تحچي علينا وأمي فرجت حلجها وانه چتلتها وطجيتها بالنعال على حلجها ليما خليته يخر دم وأمي كضتها ليه
-صـيـاد: وچبي (اوكفي) هو ياهو عايل بياهو هسه
-الـجـازي: هم العالوا بينا واحنه رديناهم
-صـيـاد: والله ومكفووو من اخيتي بويه هاي النسوان
-عـاشور: هويشم العار
گالها ورد طلع مهرف (مسرع) طلعنا ورا وهويشم ستوهم جايبينه الزلام من المستوصف صاح عاشور
-عـاشور: اييت والله يابك يا الخايس
طفر عليه گبل صاح صهْيب وميلهم عن هاشم وخلا عاشور يطج هاشم براحته سواه مثل الطوبة بين اديه صاح وهو يضرب بوكسيات على وجهه
-عـاشور: النجسس تييب طاري النشمي على السانك الغذر لوما أمك تشربك بول بعران حتى يمض بيك السحر يا الخايس
تولا رفس ما رفس بحيِث سواه ينازة (جنازة) بدخله مرعَي ايَه يصرخ
-مَـرعـي: ها يالنذلللل اتكاوه عليه وهو مريض
عاشور شال هاشم الدايخ من الچتل وهو منا هامته مطرورة صار خيوط شاله من ياتخته وذبه حيل على مرعي
-عـاشور: هذا الخنيثة اذا شفته مگرب من صوب ويلاد النشمي لو يايب طاري تاج رأسكم ورأس عتيجة وعشيرتها وعشيرتكم على السانه احطنه بتابوت وادزه الغصرك فهمت يالله يو تخليها من انفذ تفهم أكثر
ضلوا يتلاغون هو وصياد ويا مرعَي بعدها عافوهم ايَه لينا عبرنا وراح للمزن حس دموعها وگال
-عـاشور: ما تنزل دمعة ومايحزن گلب منكم طول ما انه وياكم يالله دشوا واطره طر اليگرب صوبكم
من گد ما فرحت دشيت گبل سويت چاي مهيل وحطيت نعناع وماي بارد وحطيتهن اله بصينية ورحت ليه اركض
-الـجـازي: هاك سم الحسن بعد أيدي إيدك
ضحج وگال
-عـاشور: لچنها دعاوي بس على گلبي عافية
ما هيست غير البكره اجت ترس رأسي
-كـحِيلـة: العرمة بطلي سم الحسن بطليها سم الحسن الأكل افادچ شطالبه الولد ولچ
-الـجـازي: يا ضيم الولاني ماولى أحد يمه الغاضي راضي المدعي شله غرض شلچ غرض يو هو مكيف
ضلوا يضحچون وصياد يستلمني تصنيف هو وعاشور
صار العصر وأمي راحت تخيط عد الودام وعاشور وصياد دشوا ناموا شوي وغفلت أچل لني هيست المزن ماهي طلعت اتسحب واشوفنها ورا الغصر وهاشم جاعد يمها مستند على الحايط مديت رأسي واريدن اشوفنه شيحچي وياها وشيريد من اخيتي
-هـاشـم: شنهو الگلتي للـ الجازي
-الـمـزن: السويته أنتَ مايصير تكضني هيچ و احنا موش متزوجين ولا مالچين ولا ابد شلون هيچ تكضني أمي تگول يو سوينه هيچ أبوي يزعل منا وبعد ماييني بالحلم
ارتاچ على الحايط يهمس بألم
-هـاشـم: اخخ ولچ مابيه ضلع صاحي موش أيد حديدة نهد حيله كون لچن عادي الصار بينا أبوي يسويها ويكل النساوين شكو بيها
-الـمـزن: اسم الله على حيله هذا عضيدي وتجايتي لو ما انك متعدي على اخيته ما چان طجك
-هـاشـم: نجبي موش اخته بت عمته مثله مثلي أنتِ حرمتي انه ماخليچ الغيري احبنچ وحگ القرآن بس ماعرف اتصرف هيچ أهلي معلميني
-الـمـزن: المعلمينه الَك غلط مايصير عاشور برغم كلنا ندري ونعرف بي يزوج الجازي بس تلبس منه حجاب ومايجعد وياها وحدهم الا انه يو صياد يو خالي خزعل يو أمي ترى أمي خوش مره والله وأبوي شهم وينحلف برأسه
-هـاشـم: اتذكر عليّ وجان دوم يگلي لا تمشي وراهم بذرتك بذرة خير عاين الروحك من جوه مالك شغل بالحواليك
-الـمـزن: صگد الله تذكر على أبوي انه موش هواي عمني جنت صقيره بس اتذكر جتلته وشلون نجتل گبالنا واذكر وصيته عدل يوم حچى ويا أمي
-هـاشـم: احبنچ يالمزن علميني شلون يحبون ماعرف العايش وياهم حواوين علميني شلون يصير الحب أحسن روحي متعلكة بروحچ بس ماعرف أبوي من يريد يحب أمي ينام وياها وهيچ ماخذ فكرة عن الحب
-الـمـزن: لا موش هيچ الحب أمي دوم تحچيلنا انه واخيتي تگول الحب تحسسني بالأمان والوذ بسدك وما اخافن منك حتى يو چنت وحدي وياك أن أعرف تحاربها كلها وتاخذني وماتخلي شي يأذيني وتخاف الله بيه وبعد هواي أمور بس الي بالك موش حب امي تسميي شهوة وعلمتي اليتعامل وياي هيچ اطره بحصوة وفلچ رأسه
-هـاشـم: هساع شنهي يعني البين أمي وأبوي شهوة !
-الـمـزن: هيچ أمي تگول ماعرفها شنهي هاي
-هـاشـم: زين أنتِ شتحسبين حذاي أنه احس بشي أبيض ونظيف وحلو وجنه شطب ريحان
-الـمـزن: هم شي حلو لچنك تخوفني وما ادري شلون تسوي حركات موش زوينة لچن احسنك تحميني بس موش دايما ماعرف احساسي شنهو
-هـاشـم: شنهو الگاله عاشور مال أمي تشربني مدري شنهي
-الـمـزن: جدك يسوي سحورة والسحورة تصير بنجاسة وأمك حتى تسيطر لازم كلكم تاخذون هذا سحر أكيد تشربون وتاجلون نجاسة
-هـاشـم: چا وين اچل واشرب اذا هي ما تسويلي اچل انوبه هسه ماريدن اچل شي بي نجاسة بعد
-الـمـزن: چا خوش انه اييبلك اچل من عدنا
اشوفنها عاينت شواي وگالت
-الـمـزن: خلي اروح خاف يفگدوني ومثل ما گلتلك أشرب هذا العشب وحط هذا المرهم وتصير زوين
ونطته شطب ريحان
-الـمـزن: هاك هاي كل ما تشمها تذكرني احبن ريحتها
ايت ومن شافتني نزت بخوف
-الـمـزن: ياعلي يا أبو الحسن شمالچ ردت اموتن من الخوف والجفله هو هيچ يخيه
غلست على جعدتها ويا هاشم ومشيت الموضوع عادي بعدها ضليت اراقبهم وهمَ يجعدون ورا الغصر شفتها وهي تعلمه شلون يتوضى وشلون يتطهر ومن تجيب الاچل وتحطه گباله تبوگ من المطبخ اچل وتوديله وفعلا هاشم تَغير حتى ويهه تَغير وصار حليو وجسمه كبر ضل يشتغل بالحقول ويا صهْيب واسمعنه نوبات يشكي الها من أهله وأمه وأبو ومشاكلهم وغرفهم وهي تضل تواسي بي وتنصحه
وبيوم صباح شفتها جعدت من وكت وطجت البيض وحطت جبن العرب والچاي بمجمع واخذته تسحب طلعت وراها شفته ينتظرها گال وهو يضحج
-هـاشـم: يابعد روحي هالطول صباحي أنتِ يابعد أهلي
اشوفنها تبسمت ليه بخجل وحطت اله صينية الريوگ وگالت
-الـمـزن: سويتلك ريوگ اعرفنك ماتحب تطلع على لحم بطنك وماتاجل مناك شلون احوالك
-هـاشـم: بخير من شفت حسنچ عايني مثل ما گلتي الي سبحت وغسلت الهدوم وشريتن وبعدين حطيتهن جوه المندر ونمت عليهن حتى يصيرن عدلات وما اخذ فلوس من أبوي انا اشتغل واخذ فلوس حلال وجمعهن المهرج وكل خميس أروح الكربلاء ونجف وازور أبو الحسنين والتزمت بالصلاة بعد الچ يمي شي
-الـمـزن: ياهو گال أمي ترضى اتزوجك
-هـاشـم: چا شلون انه استحي احچي وياها بس وأبو الحسنين ماچنت بوعيي وجانوا يزنون برأسي عليها
اعاين للـ المزن اشوفنها تسويله لفات صغار وتحطها بيده بدون ماطخه
-الـمـزن: أمي حبيبة بس تحجي وياها هي راح تسامحك وتحس بيك لجلها تَعرف لوعة العاشگ بس بعدني صغيرونة خلي أكبر بعد فد حبه ونتزوج ونسويلنا بيت يم بيت أمي صغيروني ودافي مثل بيتنا گبل بيت أبوي
-هـاشـم: عيوني ترخصلچ مزنه بس تصيرين ليه ما عشت الحلال والحنية اله وياچ بعد طوايفي
ضحچت وحطت طرف ثوبها على خدودها
-الـمـزن: چا انه گايمة هسه أمي تجعد وتشوفني مامش وتضل تحچي عليه ألف عافية بعد رويحتي أنتَ أچل وانه گايمة وتوكل على الله وصلي على محمد وقرأ سورة الفاتحة الأم البنين تسهلك أمر خوش
وگفيت بالباب وايت ردت هم نزت من شافتني طگتني على رأسي تحچي
-الـمـزن: يبويي راح تگطعين خلفتي بهاي وگفاتچ شمَالچ چنچ سليمة المسودنة ما شوفچ الا بويهي
-الـجـازي: نسيتي هذا نفسه الي چان بييب النا الأچل مخيس ونفسه السممچ ونفسه الچان يچتل صياد لين يطلع دمه وچان كل ما شافني يطجني بسعف النخله لين يخليني ادش للبيت ويسب النشمي بطالعة ونازلة ويحچي بشرف أمنا وهَو نفسه الي بسبته أبوي وأمي شردوا هذا كله نسيتي مزنه هان عليچ دم النشمي التطشر بويهج ولچ مزنه ويلاد النشمي يحرم عليهم الحب والفرح غير لما ناخذ ثأر أبونا بعد اخيتچ لاتكسرينا عوفي مايفيدچ زين گليلي شلون من ينچل أبو واحنا چاتلين أبو وماخذين ثأر ابونا منه شلون يتقبلچ بعد ؟
اعاين عليها بچت حيل
-الـمـزن: راح اعوفنه خلص والله راح اعوفنه راح ادوس على گلبي كلشي ولا دم أبوي يروح هدر
-الـجـازي: عفية بعد اخيتچ امشي نسوي ريوگ امشي حريجة حرجت الغصر والبطنه
-الـمـزن: ماعدا جدي أحبته
عوجت حلگي
-الـجـازي: خوشش
رحنا نزهب الريوگ وهي مدري وين غطت جوه ورا شوي ايت گعد بالهول رديت باب المطبخ وصرت احضر على راحتي عاشور بي طبيعة مايفتح الباب بيده الاله يرفس الباب رفس
وانه سارحة واريدن افغس البيض ولنه رفس باب المطبخ حيل گبل البيدي شمرتها عليه من النزة ايت البيضة ترس ويهه صاح بيه
-عـاشور: ايا دوابة شسويتي حيوانة هسه سابح
گالت بتلعثم وانه اجر نفس كوه حطيت ايدي على صدري
-الـجـازي: خايب وكبر ومرض خرعتنييي گطعت نياط گلبي شمَالك ألف مره گلنالك أفتح الباب بيدك شنهي لعب هوَ
-عـاشور: چا بلا جاعده وماخذه راحتچ شلون بيچ يو شفت المضموم على اغلها من تنزين تعدلين روحچ بسع
رفعت رأسي وگلت
-الـجـازي: محمود مشكور ربي لا اعتراض على أمرك انطيتنا هذا المهبول يو أنتَ هيچ متدين طگ الباب حمحم
-عـاشور: لاله انه احبن هاي الطريقة واسترحم ادشن عليچ غفل
-الـجـازي: سيد عاشور دخيل بخت يدك ما تنطيني خيط من ثوبتك نتبارك بيه
تكرب ليه يحچي ببتسامة
-عـاشور: تتباركين بيه يو تشمشمينه بالليل وتحطينه حدر راسچ وتحلمين بيه
-الـجـازي: هاي ياهييي انه عمري لا طال يو اسوي هيچ خايب أنتَ شايف روحك بالمرايا يو لاله چنك فحل دواب ادبس مخنزر
-عـاشور: والدوابة ياهي
-الـجـازي: خالتي
-عـاشور: ماعندچ خاله گولي انه وفضينا
صحت
-الـجـازي: يبوووييي عمر لا طال يو فكرت بيك يوممم امششيي منااا امشييي اريدن اخلص الريوگ هسه أمي تحچي عليّ امشييي
گلتها وانه ادفع بي
-عـاشور: وداحي الباب اخذنچ يو أدري اخذنج نهوة حتى اذا مو نهوة اخذنچ فصليه
-الـجـازي: ياا
-عـاشور: عيل شلون
تخوصرت وانه احچي
-الـجـازي: ليش يمه تاخذني فصلية على يا مال
-عـاشور: بكيفي
-الـجـازي: ياضيم الولاني ماولى أحد ماريدنك عمي موش بالكوة
-عـاشور: غصب عليچ
مديت رأسي وانه أصيح الأمي تيي تخلصني من شره كل چلمة يگولها يخليني اشيطن بيها وهو يتمضحك
طلع وانه رديت ازهب بالريوك المشكلة موش بعاشور لچن انه ماشوفنه غير مثل صياد ويمكن هو اگرب من صياد ليه ماگدر اتخيله غير شي مثل ما أمي تريده ليه زهبت الريوگ وجعدنا تريگنا وعلى نفس رنه التصنيف والضحچ بس المزن صافنه بعالم ثاني موش يمنا
مشت الأيام وهي ماتطلع أبد واشوفنها يا صافنة يا تلوب
لحد مايوم من الأيام أمي راحت البيت أم عمار عدهم عرس راحت تسوي جهاز العروس وبدلتها أمي شغلها صار يعجب وكلها تحمد بي وكل العرايس يسون جهازهن يمها فاتن من تيينا كله تيبلها فصالات من بغداد وتگعد اتعلم عليهم شغلها يعجب
وصياد وعاشور يشتغلون ايَّ شغله كبالهم فلاليح حماميل اي شي المهم يعينون أمي
انتبهت للمزن خذت سطل تريد تييب ماي طلعت هي وانه طلعيت وراها من تروح تييب ماي لازم تروح من ورا الغصر وترد
هي طلعت وهَو واجف بس حس بيها دار ويهه تگربت اعاين عليهن عن كثب ولني اشوف ويهه عبارة عن دموع ويمسح بدموعه بطرف تشيرته ويعاين الها ويحچي بحرجة گلب
-هـاشـم: شمَالچ مزنه وين عايفتني صارلچ أربع أيام شلون بيه بلياچ ليش هيچ سويتي بيه مزنة روحي
-الـمـزن: حگ النشمي حگ أبوي اخون العهد العفنا انه واخوتي بالنجف ناخذ ثأر وتحرم علينا الحياة ولذتها لين نبدل التراب الي حطته أمي على وجهنا بدم چتاله وابوك مشترك بچتل أبوي
-هـاشـم: اذبحلچ مرعَي واحطه جوه رجليچ مزنه احزه حز بس ماتعوفيني اتبرأ منهم كلهم وتصيرين أنتِ أهلي انعل يوم مرعَي لا عتيجة لا ابو منين من طلعت عشريتي كلها المهم أنتِ مزنه لا تعوفيني اغديلچ فدوة والله ماحسيت بروحي بشر غير من خلالچ مزنة لا تعملين بحالي مثل ما عملوا أهلي سنين ناسيني ولا يدرون بحالي وين واسمع بس مشاكلهم وطلايبهم انه بس وياج حسيت روحي عشت بهاي الدنيا
-الـمـزن: وان چنت ما تحبه لچن دمه بيك هو أبوك وأنتَ من صلبه يهاشم
-هـاشـم: چا أمج شنهي دمها مو نفس دمه لو هي وليه
شفته مد ايده بجيبه طلع خرجه (قطعة قماش) بيها نغش
-هـاشـم: عايني مزن روحي ومطرها هاي الوصله سويت عليها اسمچ وكت فراغي اسويها لجل عينچ عبن اريدن الوكت كله لعيونج مزنه لا تخاذيني بذنب غيري فدوه اغديلچ
-الـمـزن: أمي گالت ينوخذ الثأر من الكل
-هـاشـم: مزنه شسوي ايَّ شي أسوي لجل لا تعوفيني أنتِ ايَّ شي اسوي بس ضلي ليه
حست دموعها
-الـمـزن: شسوي أهلي مايعرفون غير لغة الثأر صياد بركان هادي انطر جم سنه ويثور الجازي تتنفس ثأر بايّ لحظة تكضي التوبه بيهم عاشور ومسؤوليتنه البرگبته مستحيل يتغبل تتگرب من عدنا حتى خطوة أمي كل يوم اتنطر فاتحة النشمي الي ماتم الا بموت غازي چتال أبوي وموت مرعي شسوي انه موش گدهم وهم ما اگدر اجعد ومافرح باخذ ثأر الحيد أبوي
ميل رأسه وگال وشگهته سابگته بالترجي
-هـاشـم: بدونچ ما اعيشن انه خليها ببالچ واخذچ يو عاشور وصياد يحزون نحري هم اخذنچ أموت قربان العينچ يا بعد عيني أنتِ حسي بيه مزنه وگليلي شعمل بلياچ ووين اروحن وهيم بدنياي من دونچ تعلگت بيچ مثل طفل وتعلگ بأمة
بهاليوم شفتها زتت البيدها وراحت ليه وشبكته وتغثبت حيل
-الـمـزن: هاشم الروح فتحت عيني على چلماتك وسوالفك نسيت الثأر ونسيت الشنهو ناذرين حياتنه لجل عينك نسيت أنتَ إبن عدوي وچتال أبوي نسيت أنتَ الفضحت أمي نسيت كلشي هاشم نسيت كلشي احبنك وأبو الفاضل واريدنك بالدنيا والآخرة عزيز روحي احبنك هواي يابعد حيلي دير بالك على رويحتك ومثل ما معلمتك تسوي وانه احبنك اليوم وباچر ولين اصير بالتراب أبو الحسنين
عافته وشالت سطلة الماي ودشت ردت الحكها وما شفت الا عتيجة ايت على هاشم مهرفة تلوبج
-عـتيقـة: ولَك هويشم عاشگ بت كحِيلة ولَك عاشگ بت المامعروف أصله منين بت اليردون يچتلون أبوك ويمثلون بجثته وجاعد تشبك وتحضن بيها يا طايح الحظ
تعجبت من شفته حط ايده على حلجها وسده يحچي بعصبية
-هـاشـم: يماااا اگص السان الييب طاري عمتي والنشمي أشرف من الشرف مو مثلچ أنتِ وريلچ تخسون تلحگونهم والشفتيها حرمتي غصبًا على الي يرضا والما يرضا وماعجبچ اتبرى منج وانتم هم تبروا مني ولا خير ولا جنه با أم عايشه على النجاسه
عت ايده وشال غترته وراح صارت تتلفت مثل المسودنه عفتها ودشيت گلبي يغلي على اخيتي
طبيت لجيتها جاي تسبح شوي وطلعت
-عـاشور: احنا لحد ظهر ونرجع ما نضل ماعدنا شغل هواي اليوم
صياد: ايّ غريب الـ ١١ نرد من يمه
حجت أمي وهي تصب الچاي
-كـحِيلـة: چا اطلع من هسه وارد الظهر ويا جيتكم والجازي تزهب الغده
وكملنا ريوگ وگمنا اعاين الها مدت سجادتها وفتحت القرآن وراحت ظفرت شعرها وگصيبتها طويله وجعدت تصلي وتقرأ قرآن وتسوي تسبيحات وكل شويه تسجد وتضل تسبح
وانه عفتها على راحتها گمت نظفت البيت وحطيت الدجاج على النار ينسلك وصارت تقريبًا بـ١٠ وسمعت صوت زلام هواي وصوت مرعي يرعد بينهم ونهطر الباب حيل خفت وماعرف شسوي ومحد بالبيت
ضليت جاعدة لحد ما نرفس الباب ودش مرعي
بيده الحزام ويصيح
-مَـرعـي: ولچ المزن بت العار تصاحبين من ورانا وجاعدة تشبكين ورا الغصر يا عار يالـ*****
وما اشوفه الا يرها من گصيبتها وطجها بالحزام وهي حتى صرخة ماصرخت شدت على شفايفها حيل رحت ليه لچن غازي چتفني ماخلاني اوصلها ضليت اصرخ بكل حسي
-الـجـازي: نذلللل خسيسسس هد أختييي
هو يطج بيها ويسب بـ أبوي صاحت وهي تشاكف بديها
-الـمـزن: والله ما مسويه شي وروح أبوي ما حاچية ويا أحد
رجع طجها حيل بالحزام صرخت بكل حسها
-الـمـزن: يا بويهه الحجنيي
-الـجـازي: نذذذذلل عوفهااا لا تطجهااا
فقدت بيد غازي من شفته جرها وجر المگص مال أمي وسحلها من گصيبتها وطلعها برا وانه يعت بيه غازي وراهم
مشاها وكعدها بنص البستان وصاح
-مَـرعـي: بشهود الأربعة الشافوها وانه شايفها بعيني ويا وأحد وتسوي المحرمات ويا ورا البيت اليوم راح اغسل عاري بيدييي
نصدمت وجمد بيه الدم راح يذبحون المزن !
ولكم راح يذبحونها صرخت حيل بكل صوتي احس صوتي مكتوم وگلبي دكاته تتباعد تريد توكف حسيت الظلام حاط عيوني اريدن اهيم الاخيتي اريدن اخذها منهم واضمنها بروحي
-الـجـازي: يا النشميييي الحگ بنيتك راح يذبحونها بويهه الحگ الينااااا
عاينتلي وتبسمت
المزن: احبكم هواي ديري بالج على نفسج حيدتي وأمي وصياد وكونوا بخير راح اروح يم أبوي يعرف شنو نيتي هو وأكيد هسه يناطرني يتلگاني احبنكم وروحي تبقى ترفرف عليكم اوصيچ بهاشم من تشوفين هاشم يعني شفتي اخيتچ عينچ على هاشم ديروا بالكم علي وحبوا ماله علاقه بيهم وبنجاستهم
-مَـرعـي: شفقه مني اخليج تشاهدين
رفعت رأسها للسماء وهو گص گصيبتها وشمرها
-الـمـزن: اشهد أن لا إله إلا الله واشهد أن محمد رسول الله وأشهد أن علي ولي الله
دارت علي واخير شي كالته قبل لا تنذبح
-الـمـزن: گلي الهاشم احبنه هواي
ونذبحت ! ..
ماتت اخيتي وحنينتي ماتت طيبة ورحمة النشمي ماتت حمامة السلام الي ترفرف حوالينا اجاني صوت صياد وعاشور وأمي يصرخون ويركضون ليها
أجه وشالها عاشور حطها بحظنه ومرعَي وغازي گبل ركبوا سياراتهم وطلعوا طحت يمها اشيل بالتربان واهيل فوگ رأسي ماعرف شسوي تگربت أمي يم عاشور ويرتها من ايدها حيل تهز بيها وهي بس الدم يفور برگبتها وتنكث من حلاوة روحها
-كـحِيلـة: يمه إسم الله يم بنيتي إسم الله عليچ ولچ ها يالحنينة شمالچ وين نايمة وعايفتني
تحجي وحس بالدم من ويها وصياد مصدوم مايعرف شيسوي فاتح عيونه الحمرا وبس يعاين
-كـحِيلـة: المزن گومي يمه گومي حبيبتي اعرفنچ حنينة مايهون عليچ تلوعين گلب أمچ عليچ يلا حبيبتي مابيچ شي گومي
لحد ماشهگت شهگه موتها وسكنت
صرخت امي حيل ورفعت رأسها للسماء
-كـحِيلـة: تلگاهااا يالنشمييي تلگاهااا ايَتك حنينتك النشميي اويلي علييي ماعرفت اديرن بالي عليهاا النشمي
كض ريولها صياد يحبحب بيهن ويحچي
صياد: يابعد روحي وين رايحةة ولچ ما شبعت منچ يابعد حيلي ولچ مزنههه وين مغربة
حسيت على أمي هدتها وشالت كصيبتها من الگاع شمتها حيل خلت ايديها بالگاع وگامت بكل حيلها وراحت ركض بتجاة الغصر
شفت هاشم ايَه من شافنه متجمعين ونتصارخ استغرب تگرب لينه ومن شافها نصدم وجحضت عيونه وسعهن حيل دفع صياد وشالها وحطها بحضنه وشبكها حيل وحط رأسه على رأسها
-هـاشـم: شلون ماتت ياهو الكتلها وليش كتلها
-عـاشور: غسل عار مرعي كتلها يگول شايفها ويا زلمة تسوي علاقة محرمة ورا الغصر وجايب شهود أربعة وكتلها غسل عار
حجاها كلمة كلمة ومصدوم وعيونه مفتوحة وبس دموعهن تنگط وكانهم بغير عالم ويباوع على دمها المنجع الگاع
حضنها حيل وضل ينحب
-هـاشـم: حرمتي اشرف من الشرف حرمتي العفة كلها شطب الريحان عمرها ما تطلع منها الشينه چانت وياي چانت تعلمني شلون اعيش وشلون اصير إنسان رفع رأسه ويمسح بويهه
-هـاشـم: ها حبيبتي شنو نمتي اييتچ فرحان من شفتچ شبكتيني گلت راح نتزوچ والطريچ كله أبني أحلام وياچ يا طير السعد
طلع من جيبه كلاده ذهب مكتوب بيها حرف ال(م)
-هـاشـم: عايني يابعد گلبي الي مجمعه رحت لصايغ وجبت منه هاي حتى اصالحچ بيها
حب رأسها على كيف يخاف يأذيها وحب خدودها وطول بالحبه ويشم بنحرها المذبوح فغد واحنا هم فاغدين ماندري بروحنا شسوينا بوكتها
-هـاشـم: المزن والله ماجاي استوعب جعدي ليه
يصيح ويهز بيها حيل
-هـاشـم: جعدي جعدي يالمزن جعدي أبوس ريولچ جعدي كومي ولچ مزنه جعدييي روحي راح تروح مزنههه والله حيلي باد يالمزننن
ردت أمي ويا طلعتها سمعت صرخة خزامة هزت ارجاء الغضر والصراخ صار ماله والي
-خـزامـة: ولك شمخيي
عرفت شمخي مات ماهتميت وجعدت يم المزن تگربت صوب اختي ولزمت أيدها
جثه لا حمامة الرحمة الي جانت تزرع الرحمة والطيبة بگلبنا اليوم ماتت هاشم كحيله صياد عاشور كلنا حواليها ونبچي حيل لحد ما اجه صهيب وشلناها حتى نبدي باجراء الدفن وطريق كله هي بحضن صياد وأمي بس صافنه ودموعها تهل
لحد ما وصلنا لنجف وغسلناها انه وأمي وأمي تبوس بوجهه وبيديها وبريولها
-كـحِيلـة: زفيتچ عروس المگبره
تجفنت وبس طلعوها واشوف هاشم بس شافها فقد من نحطت بتابوت
-هـاشـم: بويه حرمتي طاحت وچتالها أبوي ولكم الله أكبر ولكم حيلي راح ولج المزن شحط بروحي ويترس مچانچ وين أودي روحي وترد وحشة فراكچ عني
شالوها ووصلنا للمگبرة واجه خالي خزعل گبل ما ندفنها نزل صياد وهو النزلها للكبر ونام يمها وشبكها حيل وجان يهمس بذانها شي لحد الان محد يعرفه كشف ويهه وصرخ وشبكها حبها برأسها
-صـيـاد: زفيتچ عروس بس ردت ازفنج البيتچ موش للگبر يبعد رويحتي
-كـحِيلـة: ماتت بنيتي ومات حيلي وياها شلون اطب لدار وما الكاها
-الـجـازي: ماتت اختي ومات گلبي وياها ماريد فراگها والله صعب شال عني الفرح وهلال السعد يجوي بضلوعي جوي فراگها
-صـيـاد: نشالت وحده من عيوني يا الدنيا حرمتيني من حلوه الدار
دفنوها واندفن كلشي وياها ومن هاللحظة تغيرت حياتنا كلينا بيوم وليلة…
للحكاية بقية…
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
بـقلـم: زيـنـب علـي
البارت صعب أدري بس شنسوي هذا المكتوب انا لله وانا اليه راجعون 💔