ياشاغل العينين كيف سلبتني؟
ووقعت في محظورِ ما أتحذرُ
يا سارق الانفاس كيف عبثتَ بي؟
وانا الكتوم الحاذق المتحذرُ
جد لي جوابًا للسؤالِ لكي ترى
إني أُحبك فوق ماتتصورُ
آمنت أن الحب فيك نبوءتي
وهواك شبه الموت لايكررُ
منفايَ أنتَ ومن سواك يُعيدُ لي
روحي، ومن ذا عن جفاكَ يصبرُ ؟.
بقلمي انا ايڤين ❤️
لاتنسون التصويت وتنطوني رائيكم بالتعليقات 🥹❤️
___________________________
دخل و عيونه متركزه بس عليه وكفت امه بالنص تهوس اله
- اسمر ويخبل و كُل القوط تلوك عليه
لطيفه - اليوم اردح ردح واكسر الكاشيه اني اخت الولد موش اخت البنيه
- كلللووووشش يابعد امك مهنى يايمه شايف الكل الخير و خدها طماطه ولا تكول محمره
شهرزاد - شنو عيني كُلها الهوسات لابنكم لعد اختي شنو محد تهوس الها
لطيفه - افا عليج يمي .. وهاي الرادها وهاي التمناها
رزان - بنت الشيخ لابن شيخ جبناها كللوووووششش
لطيفه - عريسنا جُكليته حامض حلو بباكيته
رزان - منين دورها ولكاها فصوص روبه ويا كفاها
شهرزاد - لكاها بالمخبز
زمرد - جانت كاعده يمي درت عليها خزرتها .. طايحه حظ لو تسمعج امي شبيج
شهرزاد - هسه قابل مجذبه مو شافج بالمخبز وكالج شهل العيون الحلوات مدري شون
زمرد - كال مو جنها عيونج حلوات
شهرزاد - ما شاء الله متذكرتها مناسيه ابد
زمرد - اووف ولج شون انسى وشنسى بالضبط
شهرزاد - مو جنتي مرايدته ها ولج
زمرد - احبه شهرزاد عابتلج وخري منا دشوفي شون حلو طالع
شهرزاد - وانتِ طالعه گمر احلى منه ام الاحمر
زمرد - تدرين ليش لبست احمر
شهرزاد - ليش عيني
زمرد - لان من عرستي انتِ جنت لابسه احمر وشافني ومن عدها اجه وخطبني
شهرزاد - اي طلع الاحمر يفيد بس وي حضي ماكعد الاحمر
زمرد - اصلا انتِ ..
لطيفه - شويه عيني اخت العروسه اخويه يريد يكعد يم الحلوه يحجي وياها
شهرزاد - خوش اخذوا راحتكم دااده
باوعت عليه وهو ردلي النظره بتحدي .. اووي شنو شايف نفسه هذا .. كعد بصف زمُرده الي دنكت راسها تبتسم
رزان - ياا هم طلعت تستحي
شهرزاد - عبالي ماتستحي اني
رزان - تهي بهي هيه غير من كالها ابوي يخطبج رأسًا وافقت
شهرزاد - ههههههه مفضوحه
سميدع - زمُردتي
زمرد - اممم
رفعت راسي عليه خليت عيوني بـ عيونه العسليه ميلت راسي سوه مثل حركتي وهو يبتسم بهدوء
سميدع - سبحان من زين بكِ كُل مَوّاصَفاتِ الجَمِالَ
كال هل كلمات و تقرب من اذني همس بهدوء يداعب مسامعي:
اعشكج زمُردتي
انرسمت ابتسامه تزين وجناتي بكُل خجل ..
سميدع - حتى بسكوتج اكدر اسمع الكلام الي يتراقص بداخلج زمُردتي
زمرد - كلامك حلو
سميدع - انتِ الوحيده الي تستحقي
زمرد - ليش اني
سميدع - لأني وَجِدتُ في حُبكِ تَفاصَيل الأمان وَ مَعِانَي العُشقِ و الهّيامَ
زمرد - هنيالي ..
- يلا يمه هاك لبسها الحلقه شمنتضرين
اخذ الحلقه بعد ماسحب ايدي المحبس بايده عيونه تركزت عليه ماكدرت ابعد نظري عنه ولو ثانيه وحده بس
لبسني الحلقه اخذ ايدي قبلها بهدوء وهوَ يكول
سميدع - زمُردتي
سويت نفس الشي اخذت الحلقه و خليتها بايده ابتسامتي جانت فاضحتني كُلشي جان واضح عليها نضراتي الي مفارقته أبد جنت مستمتعه وعايشه هاي اللحضات بكُل حواسي
رشا - أبني إذًا تريد تكعدون وحدكم وتحجون ماكو مشكله
سميدع - لا خالتي أخذوا راحتكم هسه بعدين نحجي
رشا - على راحتك ابني
شهرزاد - شعجب طلع وماحجى وياج
زمرد - لازم يطلع يسلم على العالم لعد منو يستقبلهم
شهرزاد - صرتي من هسه تدافعين عليه
زمرد - طبعا ادافع عليه
شهرزاد - عابت شبسرعه گلبتي علينا
زمرد - ماكلبت بس ماقبل تحجين على رجلي
رزان - هههههههههه هااا زمرده شبسرعه
زمرد - ههههه اسرع من البرق
شهرزاد - هسه احطج واكتلج اعلمج شون ماتقبلين .. الف مبروك زمرده ماتتخيلين شكد فرحانه على فرحتج شكد سعيده لان داشوف هاي الضحكه تملي وجناتج
زمرد - تدرين شكد كلامه معبر شكد ماتشوفوه هادئ و رزن والا اكو جزء بداخله بس اني الي كاعده اشوفه
رزان - وهذا الزين حبيبتي زمرده
شهرزاد - اختي نخطبت هسه
زمرد - هسه صرت اختج لعد منو من جنا صغار رادت تخلي امي تنطيني للجيران وينطونا ابنهم
شهرزاد - هاي شبيج زمرده مو اني
زمرد - اي اي واضح مو انتِ
رزان - راح تتمالخن
زمرد - لعد ماتشوفيها
شهرزاد - شوفيها انتِ
رزان - داشوفجن كُلجن مو وحده وحده وهسه يلا حبيبتي خلصت الخطوبه كومن ننظف
زمرد - يلا كوومن
شهرزاد - شعجب ماكلتي لا ومابيه حيل
زمرد - كُل الحيل بيه أصلًا
رزان - اوي ادري هيج اني رحت كلت اله تعال اخطبها
زمرد - وين المسجل ويين
رشا - شسوين بي
شهرزاد - تريد تركص
زمرد - يمه اريده حتى نغير جو شويه
رزان - لعد هذا كُله وممغيره جو لعد شتردين بعد
زمرد - اووي معليج بكيفيي
رزان - عابت لهل وجه اختج الجبيره تكليلي معليج
شهرزاد - يحتاج نحطها ونكتلها
زمرد - انتِ روحي شوفي ابنج ماتسمعي يبجي
شهرزاد - يمه وليدي ديبجي وينه حبيب امه
زمرد - خلصنا الوقت ننضف كُله ضحك و سوالف فرحانه بلمتنا سويه حسيت الايام رضت عليه على كد الفرحه الي انترست بداخلي ماجنت اعرف شون اعبر عنها اكتفيت اضحك واحضن شهرزاد
شهرزاد - اووف زمرده شكد فرحانه لان انتِ فرحانه
رزان - اي هسه محد تذكرني مو أصلًا..
حجي سعد - ادخل ادددخل ارريد اشووف تاليتك وين تريد توصل
صادق - ممسوي شي بويه
حجي سعد - ولككك يااا ممسوييي شيي فهمنيي شنوو تسوي اكثر من هذا فهمني
رشا - خير خير ان شاء الله شبيكم .. شكو يمه صادق
صادق - سالفه ماتسوه
حجي سعد - ولك بس فهمني لشوكت تبقى بهل الاهمال مو مرمرت گليبي من وراك لك بويه احسب حساب لكلاكم
شهرزاد - أهدى بابا فهمونا شكو
حجي سعد - حاجي على ريس والكلام واصل للمدير مالته اني تالي عمري يجيني واحد يكلي خلي ابنك يعتذر ويحسب كلامه لان يطيحون حضه واني لان احبك واعز اجيت واكُلك لان ادري ماعندك بس هو الجبير
رشا - عزاا العزاااني صخاام الصخمني ولك شحااجي شحاااجي صخاام
صادق - يمه شبيج طز بيهم وإذا حجيت
زمرد - اول مره بحياتي اشوف ابوي هيج معصب ومحروك دمه وكف كدام صادق جره عليه ويصيح بكل قوته
حجي سعد - ولكككك يطيحووووووننن حضككككك ولكككك انتَ لشوووكت تبقى هيييج ولك ماتتكووول عندي اهللل متزوووج وعندي اطفااال وتاليييي ويااكككك
ولكك ناوي تموتني وتجلطني انتَ اسحب كلااامك صااادق و تروح تعتذرررر عن الحجي الي طلع من حلكك
صادق - اخخ لو الزم الي وصل الحجي فلا رجال هذا صاير مثل النساوين ينقل بالحجي
رشا - عزاا عزاا ولك يمه ماتكلي ليش هيج مسوي
صادق - يمعودددين شمسوووويي يعني راجعين من تركيا وره ماودينا المساعدات مرينا بجسر كالوا جسر ذاك الـ **** كتلهم اهووو هم هذا من ن*** عليه
رزان - عزااا بعيني صدُك تحجي صادق
صادق - والعباس ابو فاضل اني حجيت هيج وكلامي مارجع عنه لان ماحجيت الا الصحيح وارجع واكول ن*** عليه
حجي سعد - ولكككك اششششش اشششششش هل حيااطين الهاااا اذااااان اذااااااان تسمع كلامك ولك ليش تسوي بيه هيج بكبرتي ولك ليش تشلعلي گلبي
صادق - سلامتك بويه من وجع الگلب والشلعان بس اعتذر منك ماكدر اعتذر من هيج شكولات مثلهم أبد وماكلت الا الصحيح
حجي سعد - ولك بويه بيش طالبنا ليش تفزع گلوبنا عليك عايزين احنا هل شي
رشا - يمه فدوه اروحلك أعتذر فدوه لعمرك والله إذًا صار بيك شي اموت واننتهي من هل الحياة
صادق - ابوس ايدج يمه لا تحاجيني هيج لان مستحيل اعتذر من عنده لهل
حجي سعد - لااا تحجي حرف بعدددد صااادق وتعتذرررر فهمت لوووو لاااا تراا مديرك منتضر اعتذارك على الموضوع شكد ماتحاول تعتذر وتخلصنا من هل سالفه وتبطل تحجي شي على ريس بعد
شهرزاد - يعني شنو
حجي سعد - يروح وره الشمس
صادق - لا اروح ولا شي بويه لا تخافون وكلامي ماتراجع عنه
حجي سعد - لك أنت ألا تجلطنني تموووتني بمكاني يالله تتوب من هاي حركاااتك شكبرررك تصير بعدد فهمني
صادق - مابيك الا كل العافيه مايصير بيك شي بويه بس كلامي ماتراجع عنه شنو بس لا مو رجال اني و زعطوط احجي وراها اسحب كلمتي من شوكت ربيتني هيج أنتَ ها بويه
حجي سعد - من خرب بهيج تربيه تخليك تروح من ايدي ولك أنتَ ماكو شي يخوفك يردعك لا اله الا الله شوف صوديق تسحب كلامك لو شون
صادق - ماسحب كلامي
رشا - ولك يمه ماتفكر بجهالك بمرتك شنو ذنبهم يعيشون يتامه ولك يمه گلبي شنو الي يصبره إذًا يصير بيك شي والله اموت يايمه ليش هيج تاذيني و توجع گلبي عليك
صادق - يمه جهالي مايرحون بمكان ومايصير عليهم شي ادري بيكم انتوا تخلوهم بنص عيونكم وهااا ترا محد مات وره احد صدكيني يمه مايصير بيج شي بس ماكدر اتراجع
رشا - ولك شهل العناااد الي شايله بس فهمني شهل العناااد
صادق - احبج يمه لا تخافين مايصير الا الي كاتبه ربج وأنتَ بويه لا تضل ضايج مني ترا ماسوه شي بدونك
حجي سعد - الي كاعد تسوي خطااا خطاااا صادق
صادق - مارجع بكلمتي
رزان - كافي حبابين وانتَ يابويه أهدى لا يصعد ضغطك لا تعصب تعال للغرفه وانتِ هم يمه كومي وياي
حجي سعد - هذا يراد اعيد تربيته من جديد صاير يعاند هواي
رشا - هذا الي علمته عليه يا سعد هذا هو
زمرد - اخذتهم رزان لغرفتهم الوضع صار كُلش متكهرب صادق الي تركنا وصعد لغرفته بدون مايحجي ولا كلمه
شهرزاد - دخيلك ربي ادعي زمرده محد يفتن عليه ويكول حجه على الريس
زمرد - ياارب ياارب بحق امير المؤمنين مايصير على اخويه شي ياارب
شهرزاد - اوووف نغصت فرحتج سوده عليه
زمرد - عادي يمعوده المهم صادق مابي شي غير هو سندي بهل الدنيا
شهرزاد - تدرين ماصدك يصير بي شي رغم مرته شكد بذاته بس شايفه شكد يموت على مالك
زمرد - اي والله اكثر من مره اشوفهم شون يلعبون سويه ويحجون
شهرزاد - إن شاء الله مايصير بي شي
زمرد - إن شاء الله
شهرزاد - اكول عيني زمرده شنو جنتوا تحجون انتِ والـ ..
زمرد - الباب تندك
شهرزاد - عزاا العزاني بس لا أجوا ياخذون صادق
زمرد - على جثتي ياخذوه مو بكيفهم همه رايحه اطلع اني
شهرزاد - خلينا شال على راسنا وطلعنا مسويات نفسنا ماكو منا واحنا نتراجف من الخوف فتحت زمرده الباب بس شفنا الشي الي كدامنا جرينا نفس براحه
سميدع - شبيجن جنجن عصابه
شهرزاد - عابت إن شاء الله طيحت كلوووبنا
سميدع - على سالفه صادق مو
زمرد - أنتَ تعرف بالموضوع
سميدع - طبعا أعرف لأن قبل لا يجون لهنا جانوا يمنا
شهرزاد - يعني يكدرون مايحبسوه مو
سميدع - ألا إذًا اعتذر و رجع بكلامه وهو معاند مايقبل
زمرد - حباب حاول تقنعه يتراجع بكلامه
سميدع - عبالج ماحجينا عجزنا واحنا نصيح ونستريح حتى بس يغير قراره مايقبل وهم حقه
شهرزاد - بشنووو حقه بشنووو
سميدع - يرجع بكلامه ترا الرجال صعبه يرجع بكلمته
شهرزاد بهمس - لعد ماتجي تشوف المصخم الي عندي كلام الليل يمحوه الصباح
زمرد - اشش شبيج
شهرزاد - هسه شبيج ماسمع
سميدع - لحكت اسمع بس المصخم بعد مادري شحجيتي
شهرزاد - بالله أنتَ من يوم يومك مخلي إذنك وياي شون عالم ماتستحي اروح اشوف ابني احسلي
زمرد - دخلت للبيت وهيه تدردم عليه ضليت اضحك على نكرتهم سويه لحد ماستوقفني كلامه
سميدع - ها زمردتي ما ناويه تدخلينا حتى لو بس مي نشرب من هل الأدين
زمرد - العفو ادخل تعال
سميدع - خلي بالحديقه شويه و رايح ما أتاخر
زمرد - خوش يلا فوت
كعدت على مرجوحه جانت موجوده بالحديقه سويت مجال وخليت ايدي بمعنى هنا اكعد
بدون مايحجي إي شي اكتفه بس بأبتسامه داعبت قلبي بهدوء
صار الهدوء هو سيد الموقف بذيج اللحضه لحد ما قطع صمته وهو يكول كلماته العذبه
سميدع - احسج مثل بستان مال ورد
زمرد - ههههه ليش بالله
سميدع - تطارديني براحئتك العذبه أينما أكون و يعيدني أليك دائمًا مُكبلاً مثل الأسير
زمرد - شكد حلو هل كلام
سميدع - غزل العالم كُله قليل بحقج
زمرد - اووي كافي
سميدع - شعركِ الطويل الذي تجعليه مُترسلاً فرق كتفيكِ تزدادين في الجمال جمالًا كأنكِ فتاةٌ من السماءٍ
زمرد - من وين تعرف هذا الغزل
سميدع - جنت ادخل للمكتبه الي بالجامعه وأقره كُتب الغزل وأحاول الم جم كلمايه اسويهن الج غزل يلوكلج ههههه
زمرد - وأنتَ هيج يعني تخلص نص وقتك تقره وتسوي جمل
سميدع - اتعلم من عدهن ومن اشوف عيونج وحده الكلام يطلع بدون أي ترتيب
زمرد - جنت حيل حابه اجي واكُلك الحمدلله على سلامة اخوك بس مصار مجال وانتَ بعد ماجيت وشفتك
سميدع - الله يسلمج بس تعرفين بعد التهيت وي الخطار والدراسه ما جنت الحك اجيج وأتمنى تعذريني
زمرد - على شنو أعذرك
سميدع - المُحِب لازم يخصص وقت حتى ولو هو بعز انشغالاته حتى يحضى بكلام كأنه جرعه من الأمل تخلي يعيش لليوم الثاني
زمرد - الله شكد حلو هيج يعني هسه أنتَ ضايج لان ماحجيت وياي هل فتره
سميدع - إي
زمرد - تعرف تغني
سميدع - هههههه للأسف هذا شي الوحيد الي ماعرفه
زمرد - سميدع
سميدع - ها يا سكينة گلبي
زمرد - عيونك تحجي بشيء غير الي تنطقه بلسانك
سميدع - ههه كدرتي تلاحظين
زمرد - كدرت وحسيت بي هنا بگلبي
سميدع - زمُردتي يا سكينة گلبي متأكده من أختيارج ألي ماتندمين بيوم
زمرد - لحد أخر نفس اتنفسه اوعدك مارح اندم بيوم من الايام لإن تعرفت عليك وأبقى وياك بالمره قبل الحلوه
سميدع - اوعدج ماخيب ضنج بيه
زمرد - وين رايح
سميدع - تأخر الوقت صار لازم أروح ومبين عليج التعب نامي ولا تفكرين هواي بسالفة صادق
زمرد - تصبح على خير
سميدع - وأنتِ من اهلي
بقيت واكفه بمكاني بدون ماتحرك ابتسم وتوجه للباب يريد يطلع بس أكو سبب خلاه يرجع الي ..
بدون سابق أنذار تقرب من عندي حضني وهو يردد :
- اخ يا زمُردتي
سميدع - رايح ديري بالج على نفسج
زمرد - هزيت راسي مستحيه من الموقف الي صار بس طلع من الباب صرت افتر بالحديقه والضحكه تارسه وجناتي أحبه إي أحبه
______________________
حجي سعد - لك صادق لا تشلع گلبي روح اعتذر لو تنهزم
صادق - اشرد شنو بويه
حجي سعد - ولك اشرد لا تبقى هنا راح يجون الأمن ياخذوك الف مرررره بمررره كتلك انهززم
صادق - ماانهزم
رشا - صخااام الصخمني ولك تريد تضيع روووحك وتضيعنااا ويااااك ولككك يمه صااادق هاي صدُك تحجي امشي يمه بسرعه لم غراضك وانهززززم مناااا
صادق - يمه شنو اني مو ..
رزان - الباب تندك
رشا - عزاا العزااني صخام الصخمني يمه وليدي
حجي سعد - فووووتي جوه يااا مره اخذن امجن
رشا - راااح وحيدي راااح يبوووو على حضج يرشا يبووو
زمرد - مالحكنا حتى ندخل وطبوا علينا الأمن جتفوا صادق كدامنا ابوي لزم امي وهو مخلي ايدها على حلكها مايكدرون يحجون شي كدامهم
طلع صادق من البيت تحت انظارنا و دموعنا عليه بس نسد الباب طاحت امي تدك وتلطم عليه تصيح ابني مات وبعد مايرجعلي مره شهر على اليوم الي اخذوا بي صادق ماجان ببيدنا شي نسوي الا ندعي اله يطلع بخير وسلامه
اليوم جانت المحاكمه مالته الخوف الي جان بعيون امي وحتى ابوي كسرتهم تاذي گلبي وتاخذ من حيلنا كلنا
وقت المحاكمه دخل صادق شكله متغير وأثار التعذيب واضحه جان اكو واحد كاعد بين الموجودين ندري بي هذا صديقه المقرب الروح بروح وياه اول ماخلى عينه صادق عليه صاح
صادق - لك راضي أنتَ الي فتنت عليه موو ولك مو اني معتبرك اخويه وصاحبي تغدر بيه ولك مو بس ماطلعلك اطلع وشوف شسوي بي
- أنتَ كاعد تهدد عنصر أمني كدامي
الموقف الي سواه صادق هو الي خلى القاضي يغير الحكم الى حكم ثاني وهو الإعدام...
رشا - عزااا العزاااني صخام الصخمني ابني لااا عليك الله ابوس ايدك غير الحكم فدوه ابني مايموت ماسوووه شييي كُلشي ماااسوووه يمه وليدي يمه ابني نمله مامأذي وتجون تعدموووه
عنده جهال حرام عليكم ماشايفين شي من ابوهم صار شكد والله حرام عليكم تيتموووهم ولك وأنتَ من صديقه ليش هيج تغدر بي هو هيج الصديق يسوي
سميدع - تعاي وياي امي انتِ لا تحجين شي تراا صادق يتاذى اكثر
رشا - ولكم بس اشمه لإخر مره كُلشي ماريد ريحه وليدي وحرمتووني منها الله أكبر عليكم ماشبعت منه ليش تاخذوا مني
حجي سعد - مانكدر نغير شي امشي
رشا - ليش ماتحجي شي ليش ساكت فهمني لييش ليييش
حجي سعد - شكددررر اغيرررر احجي حتى بناتي يطيحن بيها بعدين هااا جاوبيني شسوي المفروض جان لازم
رشا - ابني سعد جيبلي ابني راح اموت عليه فدوه ابني ليش ينعدم شنو شاف من شبابه وينعدم خلصها بالحرب فدوه سعد ابني جيبه زين زين بس اشمه
حجي سعد - امشي رشا لا توجعين گلبي ازيد من هيج كافي عليه الحمل الي شايله
رشا - ابني ماشميته وراح يموتوه اخذوه غصب من حضني سوده بفكرج رشا راح ابنج بالرجلين لا حضيتي بجهاله ولا حضيتي بوليدج اخذوا منج
سميدع - علكيفج يمه لا يصير بيج شي
رشا - هسه اني ابني مات مات من هل لحضه مو
سميدع - اني ابنج
رشا - ولك يمه ماخلوني اشمه ولا خلوني اتطمن عليه شفت وجهه شون تعبان اني ادري بي من يتعب تتغير لون عيونه شفته للتعب بهاي عيني
حجي سعد - كافي رشا نكطع گلبي
رشا - سعد حبلت بي تسع اشهر ورضعته وسهرت وداريت وربيت تالي ياخذوه مني وهو ممسوي شي عمت عيني يايمه حتى ماكدر اسويلك عزا ماكدر اسويلك شي يايمه ماكدر
حجي سعد - رشا
رشا - ابني ماكدر اسويله فاتحه و الطم عليه صخام الصخمج يا رشا ابنج ماتكدرين تحزنين عليه .. سعد هو شنو جان يريد بس يخلص من هل سالفه جان يجي يكلي يمه بس تخلص الحرب اعوفهم واجي يمكم اعين ابوي تعب من الشغل يمه يمه من يوم يومك حنين واخذوك من عندي
حجي سعد - اششش مايموت بعددده عايش ابني عااايش ويتنفس هوى مامات
رشا - شون يعدموه سعد جاوبني كُلي شون هم يحس بالوجع عساه هذا الوجع بيه يايمه عساه بيه ولا تحس بي شكاعد تفكر هسه اكيد تفكر بجهالك .. سعد همه ليش ماخلوني اشمه.
زمرد - دخلت امي للبيت تمشي وتحاجي نفسها وتبجي ابوي دموع بعينه اول مادخل كعد بالكاع يبجي نسئلهم محد يجاوبنا
رزان - واحد بيكم يحجي مو بعد حتى حيل ماعندي والله
زمرد - سميدع الله عليك شبي صادق عليك الله بس احجي كول شبي
شهرزاد - احجي لااا تسكت اخويه شبي
سميدع - نحكم إعدام ..
كلمتين خلتنا نتصلب بمكانا بدون حركه يعني شنو صادق راح يموت واحنا مشايفي .. صادق يموت وحتى ماشبعنا من عنده ماكعدنا يمه هواي ليش يموت شنو سوه
اخوي ماسوه شي ليش ينحكم ماسوه شي بس حجه الي بداخله عبر عن الي بداخله ليش يموت بس فهموني شنو ذنبه
سميدع - ذنبه ماسكت
زمرد - وهيج عادي لان حجه الي بداخله ينحكم أعدام ويموت هيج عادي
شهرزاد - ولك أنتَ أكبر جذاب اني حجيت وياه على حميد وكالي بس اخلص أجي اطيح حضه وماخلي يسويلج شي بعد شنو ينعدم شنو يموت شو روح منا بس تجذب ... يمه مابي شي صادق
رشا - اخخخ يايمه راح من ايدي وماكدر اسوي شي ولج يمه ماشميته ضلت بروحي معلكه اشوفه والزم وجهه ولج شهر صادق من يوم يومه معدل هديماته وشحلاته اليوم طلعلي مو نفسه مو نفس ابني الي ربيته وتعبت عليه مو نفسه اني شفت عيونه تكلي تعالي يمه خل احضنج لا ترحين اني شفت بعيونه
شهرزاد - مايمووت يمه مايمووت
رشا - اخذوه مني يا شهر راح يموت واني بعدني ماميته لعد غير اموت اني ورآها أنتَ ليش هيج يمه شذنبك أنتَ
زمرد - يمه شون حاله
رشا - دموع بعيونه يايمه والله اعرفهن ذني العيون ولجن اني قريت عيونه اعرف بيهن اعرفهن يكللي ديري بالج على خياتي اعرفهن ذني النضرات والله
شهرزاد - يمه ليش ينعدم ماسوه شي والله
رشا - اوووف ولجن يمه راح اموت نهد حيلي يايمه هو هل وحيد والجبير مالتي وتاخذوا مني ليش شنو ذنبه
ضلينا على هل حاله لحد مابيوم اجه اتصال لابوي يكول ..
رشا - شبيك سعد احجي ليش هيج ترجف
رزان - بابا صاير شي شنو يكولون الك
زمرد - ابوي كام يرجف ويحرك شفايفه على كيف كوه طلعت من الحجايه الي خلت امي تنهار علينا
حجي سعد - يكولون تعال استلم جثه ابنك ..
رشا - يمه ابني مات من صدُك راح وحيدي راح
شهرزاد - الصدمه الي عشناها بوقتها ماجنى نتمناها حتى للعدو بعد ماعرفنا طريقه الي مات بيها
زمرد - شوون مااات واحد يكُلنا اخوونا شون مات
سميدع - أهدئ زمرده
زمرد - اخوي شون مات احجي حباب
سميدع - جان اكو كطن على ركبته ونقطه دم
شهرزاد - يعني شنو مافتهمت وضح النا اكثر فدوه
سميدع - نقتل بأبره مسمومه
الحزن خيم علينا والاصعب من هذا كُله ماكدرنا نسوي اله فاتحه ونحزن عليه مثل بقيه العالم ظلت بداخل امي حسره على ابنها الي مات مسموم بدون اي ذنب .. امي صارت تطلع تشوف أي مكان بي عزا تروح اله تدك وتنوح على صادق حتى بس تعبر عن حزنها الي حتى هو حرموها منه...
... يتبع
__________________________
ومن هل البارت تنتهي قصة صادق الي جان رمز الحقيقي للأخوه وأكيد ماحبيت أطول عليكم مشاهد الحزن وبنفس الوقت ماكدروا يعبرون بحزنهم بشي كافي
التنزيل راح احاول اخلي بين كل يومين بارت وماتأخر عليكم وصدكوني التأخير مو من عندي يم الابطال 🩷.
انتضروا الأحداث القادمه على نار 🔥
حساب الانستگرام