قناص بغداد ( مهمة وطن )

المُـهمة الخـامـسـة

#قناص_بغداد(مُهمة_وطن)

البارت الخامس

بـقلـم: زيــنب عــلي

حبايبي لا تنسون التصويت + متابعة الحساب zainab_ali1 + تعليق بين الفقرات ♥️

Instagram: zainab__.ali1
TikTok: zeinab_.ali1

بفرگاك احس مخنوك
بيه الدرب مرعوب
ومن خيالي اجفل وفز
حطيت الك بلعين صورة عشك
واحساسك بنص روحي عايش حرز
من اسرح وانساك اسب الزمن
وصوتك احس بظلوعي كلش يبز
اسمي بغيابك هيبه مابيه بعد
اليندهلي عگبك منه روحي تنز

ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ

ركضيت ليها اشيلنها اشوفنها ماتحرج لا ايد ولا ريل صرخت حيل

-كـحِيلـة: يبويييي بنيتي ولچ مزنه جعدي ليه

وخراني خزعل من حضنها شالها وگال

-خـزعـل: حطي شي على رأسچ خلينا نوديها الاگرب مصتوصف بسرعة تحرچي

رحت دشيت للحجرة سحبت عباتي وطلعت لگيته مصعدها بالسيارة

-كـحِيلـة: عاشور عينك على خوانك يمه

عفته وطلعت ركبت بالسيارة وهي بحضني بالگوه تجر النفس

-كـحِيلـة: دخيلك ربي بجاهك يا موسى إبن جعفر دخيلك بأمنتك بامنتك بنيتي ياعلي بجاهه السيده فاطمه عندك بنتي مايصير عليها شي دخيلك ربي

تسودنت كلش ردت اموتن على بتي

-خـزعـل: هدي يكحله مايصلح هيچ مابيها شي أن شاء لله

وصلنا لين المصتوصف نزلنا ركاض ركضنا بيها دشيت

-كـحِيلـة: لحكولي بنيتي تروح مني اجاني دكتور خذوها مني

وبعد فحص گال

-الدكتور: البنية متسسمة شنو مأكله

حتاريت شگلله اگله بيبتها سسمتها

-كـحِيلـة: جوارينه جابوا النا اچل وچلته بس هي

-الدكتور: على العموم إحنا عملنا الازم وهذا العلاج تاخذوا حتى تنظف معدتها الحمد لله على سلامتها

ردت الروح ليه يمه حنينتي روحي بيها شوي ودشيت يمها تبجي من ألم معدتها مخليلها مغذي

-الـمـزن: يمه اريدن أبوي يمه بيه الم ماني حاملته

تگرب ليها خزعل وحبحبها

-خـزعـل: لا ما مرجية من بت النشمي هيچ شنهي ما محسبتني خالچ وابوچ

هزت براسها باي حسيت دموعها بيدي

-خـزعـل: چا هاي هي يلا صيري زينة يخلص المغذي وتردين للبيت تلعبين ويا خوانچ وباجر تطلعين بالبستان وتلعبين براحتچ عفية بنيتي

-الـمـزن: اخافن يچتلوني

-خـزعـل: مامش خوف بعد محد يگرب صوبچ عاشور يطلع وياكم

رحت يمها وشبكتها وضليت شابكتها واحس بويها وهي كل شوي تحب رأسي لين خلص المغذي ورديناها

لكيتهم واجفين باب البيت وعاشور لازم أيديهم أول ما شافوني هدوا ايديه وركضوا ليه

-الـجـازي: يمه شجرالها خيتي

-صـيـاد: يمه شمالها مزنه

نزلت من حضني وشبكتهم

-الـمـزن: لاتخافون علي ما بياش شي انه زوينة

اييت ادششهم جوه لچن انتبهت على هاشم واجف بالباب ودموع عشرة عشرة بعينه خفت علي مهما يكون انه احبنه اتذكر من جان يتسحب ليه من ورا أمه ويلعب وياي وحتاريت شماله يبجي كلت يجوز حتى هو مايدري شنهي سالفة الحلاوة ردت اهدن على الغصر لچن خزعل مارضى وگال باچر هو يتصرف

-خـزعـل: يلا دشوا دشوا بويه شنهي ما نام الليلة

طببتهم وبدلت الها ونطيت الها علاجها وفرشت الهم وخليت عاشور بيني وبين صياد ومن جهه صياد خواته

شوي وغفيت مطمنه خزعل وعاشور حذاي اول ليلة انامها بيها نزيزة راحة خلاف النشمي

فزيت نص ليل عطشت ردت اجيبن سراحية الماي لني اعاين الجازي جاعدة يم رأس عاشور وتخزر بي

اخترعت دزيتها وأنا احچي على كيفي
-كـحِيلـة: ولچ المصومخة شسوين يم رأس الولد

-الـجـازي: هذا شعده نايم يمنه مايروح البيت جده ما رتاحيت اله شنهو هذا وينام احذانا عيييع باع ويهة

تحچي وتأشر عليه تعغج بويها

-كـحِيلـة: ايّ موش أنتِ بحلاته وتگولين شنهو هذا وتعغجين ويهچ نطمري يالا گومي من رأس الولد مباويته جنچ جني

شفتها گامت وغمته

-كـحِيلـة: يا يعابيچ أبو فاضل خيبه ليش تغمينه

ماردت عليّ وراحت بفراشها تنام

-كـحِيلـة: وعليه عليك يعميمة هذا هم حظك هل مصموخة تغمغم بيك

گمت جبت اميه ورديت غفيت لحد ما طر الفجر جعدت گبلهم صليت وحضرت الچاي والحليب وجاي الي والخزعل وبيض بدهن الحر وگيمر وعسل وخبزت خبزات حاره خزعل بعدله شويه ويجيب لبن العصفور ترس بيتي ترس من البارحة لليوم حتى جهالي نشنشوا رحت ليهم

-كـحِيلـة: يالويلاد شنهي ماتجعدون اليوم تضلون نايمين للظهاري

كعدوا عاشور وصياد اجه عاشور حب رأسي

-عـاشور: صبحچ الله بالخير عميمة

-كـحِيلـة: بعد عمتك صباحك النور ينظر عيني

اجاني صياد حب رأسي وأيدي

-صـيـاد: صباحچ الخير يمه

-كـحِيلـة: بعد طوايفي صباحك نور

رحت لين خزعل اندها

-كـحِيلـة: خزعل بعد اخيتك شنهي ماتجعد كوم نتريك واطلع للغصر ما رحت ليهم

-خـزعـل: يبوي عمي شعدي رايح خلوني نايم

-كـحِيلـة: دگوم يا عيني گوم

رحت لين المزن أشوف حرارتها الحمد لله زوينة حبيتها

-كـحِيلـة: مزونه مزن يمه تگعدين لو بعدچ تعيبانة

-الـمـزن: لا يمه جعدت جعدت ماني تعيبانه

رحت على الجازي اباوع ليها النهاية الهول واصلة

شلت شعرها من ويهه
-كـحِيلـة: يمه الجازي ولچ جعدي يمه شمالچ جنچ وحدة ميته يا

-عـاشور: عوفيها نايمة عمه هسه اشيلنها ودهديها بالشط وهي نايمة

-الـجـازي: يبوييي ياضيم الولاني وماولى احد خلوني مخمودة

-كـحِيلـة: ولچ جعدي سويت ريوگ خوانچ كلها جعدت گومي

جعدت بس نايمه تمشي ترگع بالحيطاطين

راحت على عاشور طخت بي صاحت

-الـجـازي: ديلا باع الثول عاف البيت اجه يردم بيه

زبرت بيها
-كـحِيلـة: تأدبي من تحچين ويا ترى انت الدستي على ريوله وردمتي

-الـجـازي: يبوييي هسه شيفكنا خوششش يمه خوشش

شوي ولتموا كلهم على الريوك وجعدت الجازي بصف عاشور

-عـاشور: عمة ما اشرب الحليب شنيه اريدن چاي

حجت الجازي وهي زارفة ريله بعكسها وتشرب بحليبها

-الـجـازي: چا شماله الحليب موش نعمة الله ليش ماتشربه

حجت هيچ وفقست البيضه ومن جاي تاكلها طيحت الكمه على هدومه وهو يتخبل أحد يوصخ هدومه

عاط بيها
-عـاشور: الجازي شسويتي

وخرت منه وصاحت

-الـجـازي: شسويت طجيتك بسيف العباس هو بيض طاح عليك بدل هدومك شصار

حچه خزعل وهو يضحج متونس على سوالفها
-خـزعـل: ولك عاشور شمَالك وياها

-الـجـازي: شفت خالي يتحارش الحقنه

گالتها وغمته وگامت

-كـحِيلـة: يو ما اطيحيتلك حظها

-خـزعـل: شحدچ والله اكسر ايدچ كلشي ولا الجازي شحلاتها بعدين أبني العايل شدعوة عليه كلها صفار بيض طاح على هدومه

-عـاشور: عمي شبعت شبعت ماريدن

عافنا وگام

-كـحِيلـة: شمَالك ويا والولد بنيتي مچلوبه اعرفنها

-خـزعـل: شگلچ النشمي كلج لا تأذيني بالجازي بعد هل رطينه شنهي

-كـحِيلـة: أعز ماعندي عاشور سودة علي ماتريك

-خـزعـل: هو أصلا ما يتريك حتى بالبيت ما يجعد على الريوك لچن مايحب بس يشرب جاي ويطلع الدوامه

كملنا گمت غسلت الماعين ورتبت البيت على الخفايف وسبحت جهالي وبدلت الهم صارت ب٩

المزن راحت يم عاشور

-الـمـزن: عاشور خلي نطلع بس لاتخليهم يطجوني انه تعيبانه

-عـاشور: يابعد أخوچ محد يطجج روحي صيحي صياد والجازي وخلي نطلع تلعبون بالبستان

طلعوا كلهم بجوكتهم وانا عاين عليهم رحت كلت احط الجدر على النار وارجع غفلت عنهم ثواني

من اجيت لكيت هاشم جاعد يم المزن على الجرف ويلعب بكصيبتها ويضحچ الها وبتي خدودها حمر ومبتسمه كلت بالكي الله يهدي عليهم تأذوا فروخي حيل ما اشوفلكم الا صياد شيل الحصوة وشمره على هاشم صياد كبل صار ورا المزن حتى لا تجيها حصوايه

-هـاشـم: ايا زمال جايك اذا ما طيحت حظك

-صـيـاد: وخر من اختي ولَك حيوان

هاشم نزع نعاله بريد يطج صياد واجاله عاشور يركض دفع هاشم

-هـاشـم: عاشور شيابك (شنو جابك) هنا

-عـاشور: اييت حتى اطيح حظك الخايس تطج صياد موش دتعال

انطاه بوكس بنص ويهه ولزم ايديه وقيد حركته وعاط بصياد

-عـاشور: صياد شيل نعالك وطجه

-صـيـاد: بس عاشور

صاح بي
-عـاشور: سوي مثل ما گلتلك الي يطجك مره رجعها علي أضعاف يلا شيل نعالك طجه يلا

هاشم بس يريد يفلت من ايد عاشور

شفت صياد شال نعاله وگام يطج بهاشم حيل ، فرحت أبني ياخذ حقه بس هم انغهر على هاشم موش بديه أحبنه واتذكر من جان طفل شلون يركض ليه من ورا امه

لحد ما صاح صياد

-صـيـاد: تعبت كافي خيولي

اباوع المزن جاعده وتبجي على هاشم فك ايديه وكضه من زيك الغميص وجره لحد الغصر وعاط

-عـاشور: دنعل أبو الي يتگرب من ويلاد عمتي وجهال النشمي

طلع اله جابر واديان ما اشوف اله الجازي شالت نعالها وصاحت العاشور ولك لزمها خلي اجتلها بالنعال الزمها

وما اشوفلج الا عاشور وصياد والجازي لزموا جابر واديان وبنعال يكتلون بيهم مايهون علي يصير حغد لچن بودي ثار النشمي ينوخذ من الجبير لحد الصغير واحرج گلوبهم على فروخهم

لحد ما خبزوهم خبز العباس واجو وراهم الا المزن بعدها تبچي وما طجت أحد طبت الجازي تشومر بنعالها

-الـجـازي: جتلناهم يمه جتلناهم حتى هذا هويشم الخايس الطويل جتله صياد بالنعال وهذا عاشور لزمه

يحچون والفرحة ماليه صوتهم
-صـيـاد: يمه سوينا عليهم وليه وچتلناهم كلهم الجازي چتلت أديان وعاشور چتل جابر

-كـحِيلـة: عفيه بالسباع هيچ اريدنكم تولوهم وليه هالغمان لا تخلون احد يطجكم بعد

رحت لين المزن الي تمسح بدموعها هي كاضة بيد عاشور

-كـحِيلـة: شمَالچ تبچين

-الـمـزن: ليش يطجون هاشم ما سوالي شي كلي ما جنت اعرف حاطين بي شي شلون صرتي شكلچ مانچ طويبة

-صـيـاد: نجبي چا موش راد يطجني بالنعال

-الـمـزن: چيف أنتَ شمرت علي حصو هو موش بكرباك هو

صحت بيها

-عـاشور: المزن هذا إبن چتال أبوچ شمَالچ مسودنه مانحبهم ومانواطنهم ودم أبوچ مايروح هدر سمعتي

-الـمـزن: ناخذ ثار أبوي لچن موش مو هيچ

-الـجـازي: عوفها ولَك هاي التسمم مأثر على صماخها مجبوحها مايعرف شيذرم

-الـمـزن: موش مأثر علي يمه ماحب أحد يتوجع شسوي

حبيتها وشبكتها
-كـحِيلـة: ولچ يمه حنيتچ هاي ما توصلچ النتيجة توجع گلبچ وگلبي بعدين شلون بيچ

-الـمـزن: أبوي مايحب حد يتوجع وأخاف أحد يتوجع ويزعل مني

-كـحِيلـة: بالعكس أبوچ يحبكم ومايزعل منكم بس أبوچ ما رتاح بكبره ومتأذي لان ثاره ما نوخذ وهذول المقهورة عليهم هم چاتلينا لزوم يتأذون حتى يرتاح خوش يمه

-الـمـزن: خوش يمه هاي هي بعد ما ابچي على هاشم

-كـحِيلـة: عفيه يالله طبوا لبين مايجي خالكم من الغصر

شوي وسمعت صياح أمي وصوت خزعل ندكت الباب حيل وأمي تصيح

-خـزامـة: اطلعي يالعايقة الادب سز طلعي تكلبين أخوچ علينا ولچ يا عار اطلعي

فتحت الباب وشفت خزعل صار گبالي ويصيح على أمي

-خـزعـل: متبري منكم والباقي بيني وبينكم بس كحِيلة بري منكم ومن افعالكم

ايَه (اجه) ابوي يركض من بعيد

-شـمخي: لعنة الله على روحچ ولچ خزيمة سليمة البين

ايه يمي ودفعها مني وطجها راشدي گبل خزعل كضه من بين صدمتها وصدمتي صاح

-شـمخي: بالحسين الشهيد يو شفتچ مگربه صوبها الا انعنع ضلوعچ بالعصا احترمي حالچ موش يمكم البت ولا گرباكم ما كافيكم السويتوا بيها وبفروخها والله الا انعل ابهاتكم ، خزعل وراي وخلي عاشور يم عمته امشي

سحبها يسوحل بيها ويكفخ بيها وخزعل يستغفر لله وحاطها ورا يضل ابنها ومايهون علي امنا تنطج

-عـاشور: شنهي هالعائلة لا افني حظهم واحد واحد

-صـيـاد: واشعل بيوتهم نار واخلي سمهم يزيدها

اعاين عليهم يحچون بحغد وهما يعاينون على الغصر طلعت الجازي گابلتهم وتهز جتاف

-الـجـازي: ونچتلت عجوز البين ونچتلت عجوز البين

وتسوي شعر شعر جرها عاشور من كصيبتها

-عـاشور: ولج شلون تتمركصين بالشارع والزلام حوالين البيت دشي طايحة الحظ

رتبت شعرها ودفعته تحچي

-الـجـازي: جا انت شلك غرض بيه أبوي أخوي بكيفي من امداك

غمته ودشت وبنص الممر وردت تهز بروحه وتغني نچتلت عجوز البين

-كـحِيلـة: اعذرها عميمة جاهل ماتفهم

-عـاشور: عادي عمه تمون الجازي

ويعاين الاثرها ويضحچ

-صـيـاد: عاين عاشور هذا مرعي طب بجمالي الهوش ( حضيرة البقر )

جانوا مطلعين الهوش سارحين بي ماريد الا للعصر لچن هو مدري شعده دش عاشور ندس صياد وگاله

-عـاشور: روح دش ييب الي سويناه وتعال بساعك

راح أبني يركض حچيت

-كـحِيلـة: شنهي البالك عاشور يمه موش هسه ينوخذ الحك بهداي بعد يبني

-عـاشور: لا عمه حگ شعبان والنشمي موش هسه لچن مو معناها نخلهم مرتاحين الراح اعمله حگ طجة ويلاد النشمي ودموع عينچ وطلعت امي من غصر الارواح هذا

ايَه صياد بيده بطل بانزين وفتيله وجايبين عود الشخاط وراحوا ركض اليم الباركة شوي وما اشوفن الا النار شبت بالباركة واجوا عاشور وصياد ركض يركضون

-كـحِيلـة: ولكم شلون هيچ تعملون ماتخافون احد يشوفكم

-عـاشور: انطري عميمة وشوفي الفضايح الراح تطلع

ايَه صهيب عاين الهم وضحچ وايو الازلام تريد طفي نار

-صـهيـب: ردوا مامش أحد بالباركة لا طفونها

شوية وما اسمع الا طلع مرعي بدون هدوم يركض ونار مجلبه بي گبل غطيت عيونهم دششتهم وصوت حرمة طلعت ورا تصيح يبوييي احترجت

-عـاشور: اخ شنهي ماي بارد ونزل على فادي

وصياد ينجز (يقفز) ويضحچ

-عـاشور: الجازي اريد ماي گومي يبيلي ماي

گامت ومن شافته مايعاين عليها غمته وگالت

-الـجـازي: خوش هسه اجيب

-كـحِيلـة: أدب سز كسر بهالايد التغم وليدي اگوم اچسر ضلوعچ هسه

راحت وهي تدردم
-الـجـازي: بس يحشم بيه اليگول مامش غيري بهالبيت

راحت وردت وصلت للباب وشربت شوي من الماي واجت انطته اله

-الـجـازي: أشرب سم الحسن

طجيتها ببكرة الخياط چانت حذاي
-كـحِيلـة: ولچ توبي شني كل ما نطيتي ماي وگلتي سم الحسن راح يتمرض من وراچ

-الـجـازي: اخخ شنهي اتغشمر ويا شدعوة عليج يمه

سمعته إذن عفتهم دشيت صارت غترته گبالي حطيت رأسي عليها

-كـحِيلـة: ها يابعد روحي عساك مرتاح شويه اليوم فرحانة اليوم طلع مرعي بفضيحة جدام الزلام وراح طش سالفته بالسلف لونها سالفة تعيب العشيرة لچن مايهمني ياشيخ گلبي راح يطلع حكك شوي شوي يابعد روحي يا الي ما منك طلعت الشينه

سرح بالي وتذكريت موغف

-النـشمـي: كحلة تعاي غادي

اعاين عليه من ورا بيت الخدم مد رأسه رحت ليه ركاض

-كـحِيلـة: شنهي شمَالك جنك بايگ بوكه

-النـشمـي: ولچ دكني شوك وشتاغيت العيوناتچ المكحلة وللتفاحتين

حطيت عبايتي على خدي
-كـحِيلـة: شنهي خجلتني أحبنك وابو الحسنين
لچن گلي أنتَ موش چنت ويا مرعي

-النـشمـي: سكتي لعبت روحي من يمه شنهي كل ما رافجنه يروح للنسوان وهسه هو ببيت اعوذ بالله من ذنبه بويه ماناگصني انه رجال اخاف الله عفته وييت

-كـحِيلـة: ياع شماله هذا ومريته دوره حبله زلام مايجي بعينهم عينهم فارغه شيملي عيونهم بس لتراب

جانت بيده سبحه طجاني بيها على رأسي وگال

-النـشمـي: خفه لهالحلگ شنهي ما صير النا جاره چا هذا الكبالچ شنهو سراج هايشة

-كـحِيلـة: يا بعد طوايفي السموحة منك موش غصدي عليك على هذا اخوي مرعي

تنهدت روحت صليت وخلصت جاعدة اسبح وعيت على صوت خزعل يدش ويدردم

-خـزعـل: طشت السالفه بكل السلف شيلمها بعد

طلعت ليه هو محترج وهمَ جاعدين يتمضحجون
-كـحِيلـة: خيرك يا يخزعل شمَالك شنهي الطشت

-خـزعـل: هذا اخوچ الشيطان الرجيم مرعي جان اعوذ بالله ويا حرمه ببيت الهوش من محترج طالعين مثل ما جابته امه والسالفه طاشه نوب هسه ايده محترجه وأبوي عرف وصارلتك لخة بالديوان عفتهم وييت وامچ دگ وتلطم شحرك جمالي الهوش عاد صهيب يگول طايح الفانوس مال الجمالي وشابه بالعلف وصگد راحنا وشفنا الحريج مال فانوس

ربطت عندي صياد وعاشور وصهْيب مغطي عليهم

ضحجت
-كـحِيلـة: لا والله لا الاله ولا هم يحزنون صياد وعاشور سوو الفتليه وذبوها بيت الهوش وصهْيب غطه عليهم

عاين عليهم شافهم يضحجون ضحج من كل گلبه وراح حبحبهم

-خـزعـل: هذا العشم بولد النشمي وبولد خزعل خليتوا فضيحته بكل سلف بهل مناسبه نخلي كحيله سويلنا كليجة ونوزعلها على السلف

من بعد هاي الفضيحة الناس كلت ويه مرعي الي ضل فترة مو گليله مليطلع من الغصر وعتيجة عملت بيه العمايل الحدما السلف تناسى السالفة مرت الأيام وخزعل رد البغداد لچن عاشور ضل يمي بضلته تغيرت حياتي وحياة جهالي ردت اجيب مكينه خياطة واتعلم بيها ماردت انتكل على احد لچن خزعل تسودن ومن سمع گلي اجيبلج مكينه وطول قماش وتعلمي واملي فراغچ مثل ماتردين لچن ماتشتغلين وانه موجود واشم الهوا وحتى ابوي مارضى وصار كل أسبوع اطلع الگاه مخليلي فلوس حدر بساط الباب مارضيت اخذهن ليما گلي هاي الفلوس حگج من گاعچ وحلالچ الي تورثينه بعد ماموت وخزعل يروح ويرد محمل تحمل

عاشور وصياد والجازي والمزن مسويلهم عصابة وسايگين على فروخ السلف وفروخ الغصر واليعيل بيهم يومه أسود مصخم يكضة ويجتفه الهم عاشور ويلگهم اخذوا حگكم منه صاروا مشرانيين فرد نوب

ليما دشوا بالمدرسة

وصارت طلايب على دشت بناتي للمدرسة بس أبوي وخزعل هما راحوا بنفسهم وسجلوهن وهي موش كلش بعيدة عن الغصر يعني مسافة حبه وخزعل نقل عاشور من مدرسة بغداد لهنا أول يوم من راحوا خزعل اشترالهم كلهم ملابس للمدرسة وانه خيطت للبنيات جنط جنفاص گبل يسوون وطرزيتهن كل وحده رسم لعابة على علاجتها

وهيچ مرت الأيام ادرسهم بالليل لجل انه متعلمة ماني أمية ابوي مايحب وأحد مايعرف يغرا ويكتب إلا هذا مرعي وغازي ما راضين يكملون ما كملوا بس انه وخزعل مكملين وخزعل هساع مهندس نفط وانه ما كملت لحد السادس ابتدائي وبطليت كل رفيجاتي بطلن وانه هم وياهن
وهسه جهالي الحمد لله كلهم يستوعبون بسرعة وجان عاشور بالخامس لچنه ذكي وساعدني جان اغلب شي يدرس صياد لان هاي الجازي تبزع روحه وتكضيها تغمغم بي

سويتلهم اجلهم بعلاليج المونه وانطي الهم

-كـحِيلـة: ولج الجازي ما هيج يلبسون الغندرة تعاي

دنجت لين ريوها وحط رجليهم على زري وشد الهم الغيطان

اعاين عليها النوم بعيونها وبالف ياعلي گامت

-الـجـازي: ماريدن اتعلم شنهي اروحن المعلم يگلي دار ودور چا ماعرف البيت اسمه دار شنهي يو الحروف بزعوا رواحتنا ليما حفضناهن

-صـيـاد: نجبي اذا نتعلم نگدر ناخذ ثأر أبوي لا تنسين ويلاد النشمي عايشين بس حتى ناخذ ثأر ابوي

-الـجـازي: خوش چا أكمل دراستي واخذ ثار أبوي من عيونهم

-الـمـزن: يمه أنا اريدن اصيرن طبيبه لجل اداوي ناس وما يتوجعون خطية

كحيله نزلت رجل الجازي بعد ما كملت الها الغياطين وحبحبتهم طلع عاشور وبيده الاجل مالتهم ويدورهم ويحطه بجنطهم

-عـاشور: لا تخلون احد ياخذ اجلكم واغراضكم وبس واحد يأذيكم تعالولي انه تلگوني بالصف بي تيون وتگولون وانه اطيح الكم حظهم خوش

-صـيـاد: خوش

-الـجـازي: وعليمن ما أعرف أخذ حگي وجيك الله لا يعوزني

عافتهم وطلعت وگفت بالباب تگربت المزن ولزمت ايد عاشور وتضحك اله بخجل وتگله

-الـمـزن: هي شواي لسانها طويل لجنها حنينة وحبيبة لا تزعل بعد اخيتك

ضحج يكرض خدودها

-عـاشور: شيصير لو هي مثلچ شحلاتها وعاقله فدوة شلون خوات ياخذن الروح

اخذهم وطلعوا گلتلهم

-كـحِيلـة: لا اله الا الله باامانة موسى إبن جعفر يمه

كلهم ردوا محمد رسول الله مع السلامة

ومشوا يم باب الغضر شفت أديان وجابر وهاشم بس مايگدرون يسولهم شي عمن متوبيهم من ورا وكاحتهم بس احسن سودة عليّ أول ما اجوا كلبهم خلص من الطج والاذيه

دشيت جوه وفرغ البيت عليه طحت بالگاع ابچي واصيحن بكل حيلي

-كـحِيلـة: ولك النشمي والله كل يوم ادفنك بروحي النشمي والله صبر مابيه امثل جدامهم بعد والله حيلي رايح عليك يابعد طوايفي شحط بالبيت لو ما جاچ راعية خير والعزوبية ترس ثوبك ولك والله گلبي خلص ليش النشمي مروتك حيلي ركد شلون بيه على فراكك ما دارتت السنه وطلع بيه الشيب وانه بنت الـ ٢٠ وحگ حروف أسمك احركهم وما اطفي نارهم

وهاي هيچ اخلصها اضل الطم وانعي عليه لين يجون

شوي وسمعت حسهم

-الـجـازي: خايب ما تسمع هيچ

-عـاشور: عيل شلون

-الـجـازي: ه‍يچ هيچ طج الباب

ربدت الباب حيل

-عـاشور: ولچ دوابه لاتخترع عمتي

-الـجـازي: شلك غرض أمي يو أمك يمهه فچي الباب شنهي نسمطنه من الشمس

فچيت الباب وبيدها العلاكه

-الـجـازي: يمه كليت لفه عاشور يمه وكليت لفاتي وتفاحة وشربت الحليب واخذت الماي مال عاشور

وتنزل الحذاء حتى ماترجعه عكسهم كلهم يحطونه بصندوگ الحاطته الهم الا هي بنص البيت تنزعه وجنطه بدايه الهول هي الولد مو هما

جريتها من گصَيبتها

-كـحِيلـة: ولچ حيوانه ليش تاكلين لفته وتاخذين مايه لو ما انت اسويلچ لفتين غير عنهم ليش خطية يضل جوعان

-الـجـازي: يبوي يا ضيم الولاني وماولى أحد چا شسوي جعت ما شبعت لگيته فاتحها يريد ياچل شيسوي بيها واحنا نريد نرد للبيت اخذتها واچلتها

اجه عاشور وخر كصيبتها من ايدي

-عـاشور: شمَالچ عميمه وياها انه نطيته الها

دمغها على رأسها
-عـاشور: هسه انه ساكت وماحجيت شمَالچ شهرتي روحج بعد اذا كلتي العمتي اطيح حظچ والله

غمته وراحت

-صـيـاد: يمه هاي المزن كل ما اطلع للساحة الكاها جاعدة يم هاشم

رحت ليها وهي نزت تحچي وتبچي

-الـمـزن: يمه ما سويت شي بس جعدت وهو جعد يمي وگلي شلونچ گليتله زوينه كلي حلوة عليچ الشرايط كتله بعد روحي وهاي هي

ازمت اذانها

-كـحِيلـة: شنهي بعد روحج يا الثوله ولچ هذا إبن چتال ابوچ شلون بيه يا ضيم روحي شلون بيه نگول هو ماله غرض لچن لا تتگربين ليهم يالمزن

-الـمـزن: خلص يمه والعباس ما اعيدنها بس لا تزعلين وضوجين مني بداعة أبوي

تگربت صوبي وحببتني

-كـحِيلـة: خوش بس بعد لاتعيدنها

رحت للمطبخ صبيت الهم الاچل وتغدوا وأكيد ما تخلص من نكره الجازي وياهم حتى وياي تتناگر ماتنگدر عرمة وخاصة بوجود عاشور محد يتگرب ليها حتى انه ماگدر اطجنها كلش شاخت وتعبتني

-الـجـازي: جيب البصل

-كـحِيلـة: صواب هم بيدچ تاچلين وهم بصل موش هذا صياد وعاشور گبالچ ما ياكلونه شمَالچ أنتِ الله مغربلچ تردين بصل نوب باع حتى المرگ تاجلينه بيدچ

-الـجـازي: جا يمه أنتِ ما تملين شني صارلي ٦سنوات اچل هيچ وأنتِ كل ما تشوفيني اچل بيدي تكليلي هذول خوانچ ماياچلون بيدهم دعوفيني

وخرت عكسها من رجل عاشور الي بس وخرتها فرك مكان عكسها من گد ما مأذيته ومن رجعت لكت ايده حاطها بمكان الالم

-الـجـازي: شنهي شو حاط إيدك شيلها چا وين احطن ايدي على السده

شالت ايده وحطت عكسها

-كـحِيلـة: طلعتي الاچل زقوم على الولد

دارت علي وگالت

-الـجـازي: صج انه مسويه اكلك زقوم عاشور

-عـاشور: لا والله على گلبي احلى من العسل وأبو الحسنين

-الـجـازي: سمعتي بذيناتچ ماني مالومه شمالچ وياي بعد

وضلت هيچ تروح أيام وتيي أيام

صياد والجازي وعاشور كل ليلة يحجولي شلون راح ينتقمون وكل واحد يزيد من يمه

والمزن تحجيلي ان هاشم مو مثلهم وخايفه عليها وحاولت ابعدها بكلشي بس بالمدرسة يگول عاشور تضل تمشي حذاه وتسولف ويا وهو يضل لازم ايدها وحتى مشاكل المدرسة الكها صايحة الهاشم قبلي وهو ياخذ حكها ماينطيني عطوه افتهم شمسويلها

واكيد مرات يتعارك ويضرب ويشتكون المدرسة وتجيني عتيجة ترعد بس عاشور وهاشم ثنينهم يطلعون الها مايخلونها

لچن تضل تصرفاته ويا الباگين عدوانية ويا عاشور هواي يتعاركون وهاشم بس صير فرصه يسب النشمي ويحجي علي گبال صياد فاتت وعدت السنين

بداية ٢٠٠٢ شهر الثالث

انه الـجـازي بنت النشمي الطفلة اليتيمة عشت أول خمس سنين من عمري بدلال مايظاهي دلال وأمان كلشي من بعده خوف بالنسبة الي

بهاي السنة صار عمرنا 12 سنة وبعد مشاكل وطلايب بطلونا انه واختي من المدرسة بس خلصنا السادس وصياد راح للمتوسطة وعاشور تخرج من الإعدادية وتعارك ويا خالي خزعل يريد يدش للكلية العسكرية لچن ماخلا گله الوضع موش زين خلها على سنة الاخرى من بعد هاي الاحداث كلها جدي انشل بس المزن تروح ليه يوميا تداري وخزامة مكيفه للوضع الا انه مادشيت الغصر ولا شفت رگعة ويها اصلا جدي انشل من ورا سوالف مرعي وغازي خالي خزعل ماراد المشيخة تنازل عنها اخذها غازي بمجانه

طول هاي السنين خالي خزعل يروح ويرد علينا هو وحرمته فاتن وفروخه وكل شهرين ثلاث ياخذنا للنجف نزور الإمام ونزور گبر أبونا وعاشور مقيم عدنا مايروح أبد

گمت للمرايا وجفت گبالها اعدل بشعري صاير طويل النهاية ظهري وأمي كله تسوي النا ضفاير انه وأختي ودوم تگلي تشبهين ابوچ الله يرحمه والمزن تشبه أمي كلش لچن انه وهي عدنا مثل عيون أمي المكحلة وماخذين بياضها الا صياد ماخذ معاني وسمار أبوي ياهو اليشوفه يكول هذا النشمي رد حي حتى بالطبايع يشبها كبل سنتين أمي سوتلي دگة بحنچي شكثر حابتها لچن المزن مارضت تسوي عدلت گصيبتي وطلعت من الحجرة أمي مخليه مكينتها وتخيط بالهول بعد ما تعلمت خياطة صارن چثير نسوان يجن عدها يخيطن الهن ولفروخهن وخياطها يعجب يعجب

جعدت يمها سألتني

-كـحِيلـة: وينها اخيتچ ؟

-الـجـازي: ماتدرين بيها روحها بالغصر أكيد تداري جدي

-كـحِيلـة: وصياد وعاشور وين ؟

صحت
-الـجـازي: يباوو ياضيم الولاني ماوله أحد شنهي يمه سارحة بيهم

طجتني بالمكص
-كـحِيلـة: السانچ عرمة

فرجت زري من الضربة لسوعتني وهيست صوت عاشور گبل لا يدش حمحم وگال

-عـاشور: يالله دشينا

خليت حجابي على رأسي وانه اگللها
-الـجـازي: ها اها اياج المعغد هسه يخبصنا اغاني لا تسمعين شعرچ لا تطلعين ضيج لا تلبسين

خزرتني وصاحت
-كـحِيلـة: دش يبعد رويحتي مامش أحد

شال البردة ودخل سلم وعاين عليه يحچي
-عـاشور: الدوابه ياهو هذا المعغد چا غير ماريدنچ تشيلين ذنب

-الـجـازي: هاي انه دوابه چا أنتَ شنهو حصان شگداتك هاكبرك

غمزلي وگال يتكشمر وياي
-عـاشور: لاله موش حصان انه فحل الدوابه

-الـجـازي: يبوووو عسى عمري لا طال يو أنتَ تصير رجلي اكتل روحي

ضحچ صياد وردني
-صـيـاد: چا أنتِ دوابه وخذيتي على روحچ بساع

-عـاشور: خلها تعرف بروحها هي شنهو

گمت وانه احچي بعصبية
-الـجـازي: أكبر فارغين وبعدين أنتَ شعدك ضال يمنا ماتروح لاهلك اخوي وكبر بعد مانحتاجك تحامينا

ضل يضحج وأمي تحچي عليه وتگله

-كـحِيلـة: مالَك غرض بيها يبعد نياط گلبي تعال اجعد يمي خلها تولي هالمسودنة

عفتهم وگمت وهو صاح وراي
-عـاشور: چاي چاي

-الـجـازي: هسه اصبلك سم الحسن

-كـحِيلـة: ياجل مصرانچ العرمة

ضحجت ورحت صبيتله چاي ونطيته انفج الباب ودشت المزن مدنجه رأسها بس سلمت وراحت للحجرة گبل گلبي نغزني عرفت اخيتي مدري شبيها رحت وراها دشيت شفتها مجابله المرايا كاضه خدودها الصايرات حمر جمر وايدها تريف وعيونها مغورجه بالدموع ماحست بيه حطيت ايدي على چتافها گبل نزت بخوف

-الـجـازي: هاي انه شمَالچ ليش حالچ هيچ

بلعت رياگها وگالت بصوت تعتعت بي
-الـمـزن: ها لاله مامش شي

-الـجـازي: ويهچ مخطوف وخدودچ جمر شنهي مامش احچي انه اخيتچ ياهو وياچ اكسر ظهره واطر رأسه

جعدت وتفرك بصيبعاتها بخوف وگالت بدموع
-الـمـزن: خايفة أدري الصار عيب ومايصير ينحچي ولزوم مايصير لچن غصب عني مدري شلون

جعدت يمها
-الـجـازي: عليتي گلبي بهاي فهاوتچ شنهي احچي

-الـمـزن: رحت مثل كل يوم للغصر حتى اعاون حبوبتي على جدي هي ماتخليني اطلع تخاف عليه من نسوان الغصر بس اجعد يمها واعاونها

وهسه من طلعت من الغصر تلاجه وياي هاشم

-هـاشـم: هلا بمزنه وين رايحة بعد وكت ضلي عدنا

-الـمـزن: لاله هسه امي تضل تنشد عليه رايحة البيتنا

عاين حواليه مامش احد تكرب يمي كض ايدي وهاي موش أول نوبه يسويها دوم يكض أيدي ويگول

-هـاشـم: بس تكبرين شويه اخذچ تصيرين حرمتي

-الـمـزن: لا أمي ولا هلك يرضون

-هـاشـم: چا ابوچ وامچ موش تزوجوا بدون رضى وعلم أحد

وخريت أيدي منه
-الـمـزن: شنهي تريدنا نسوي هيچ

-هـاشـم: لاله لچن أنتِ حرمتي

سكتت وهو تگرب عليه يحچي بصوت واطي
-هـاشـم: تدرين الحرمة والرجال من يختلون ببعضهم شيسوون

-الـمـزن: لاله شيسوون

-هـاشـم: هيچ يسوون انه احبچ يالمزن احبچ حيل گلبي هواچ

گالها وتگرب يحبني بحلجي وبخدودي ويتلمس بيه وانه حيل خفت وگمت ابچي واطچن بي من شافاني هيچ سويت عافني وانه شردت للبيت

خرطت خدودي ويريتها عليه اجلب بيها واحچي بصوت عالي وغضب

-الـجـازي: منين كضچ هاشم ومنين حبچ ولججج واچييي منييننن

ثنينا فزينا من سمعنا صوت أمي وهي تصيح

-كـحِيلـة: شنهي هذا الحچي ولچن

عاينت عليها موجفه ورانا وفاتحة عيونها وصايرات نار من الغضب حمر ....

للحكاية بقية...

ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ

بـقلـم: زيــنب عــلي

حبايبي لا تنسون التصويت + متابعة الحساب zainab_ali1الفقرات ♥️

Instagram: zainab__.ali1
TikTok: zeinab_.ali1

خلص البارت الخامس شنو رأيكم ؟

شنو توقعاتكم للمستقبل 🌚♥️

متابعة ممتعة 🫂