تجارة مع الله

البارت الثاني والثلاثون

#تجارة_مع_الله

#بارت_الثاني_والثلاثون

#بقلم_Yassah_Yassah

براء👇👇

جنها اليلة أخيره وباجر افراگ
الحب مو گوه بس الفرگه گوه
بعد ياهو يگلي شبيك زعلان
ويشاقيني ويگلي دموعي تسوه
وبعد ياهو اليگلي شبيك مهموم
ويحسسني حتى أحزاني حلوة
ياهو من الرسائل يدري مخنوگ
المن أتعب ضحكته اصير تجوه
ياهو يحل مشاكل دنيتي وياي
ياهو التضحياته يروح فدوة
اليسندني ويقويني على الاحلام
ودرب أحزاني يمه يصير خطوة
اليهتم بيه حتى وهو تعبان
مريض وخاف لا تلمسني أذيه
مو بس گلبه إحس بكلشي وياي
جان يشيل خوف أمي عليه

🌿🌿🌿🌿🌿🌿🌿🌿🌿🌿🌿

سمعت كلام الوالد واني احس گلبي وگف اريد استوعب الموضوع ما أگدر

بقيت بس خالة التليفون بأذني وأصيح لك رائد لا تسويها لا تكسرني لا انت والدنياا عليه أموت بعدك أمووت

أجو عمتي وماهر يركضون عليه ماهر أخذ التليفون من إيدي واني وطعت بالگاع وأضرب بوجهي واعيط

مااات وعافني راح وعافني ياكلووني من بعده ياكلووني لكم مات واني شالعه گلبه
مات وهو يتمنى كلمه حلوة مني يتمنى اگله احبك

ماهر طلع برا يخابر وعمتي گعدت يمي لازمه إديه
لان ملخت وجهي بالضرب

_ولج عمه اليوم أبوي مات من جديد  ولج عمه صارلي أب واخ وگفلي وگفه إخواني ما وگفوها شلون بيه فهميني شلون

ساهرة : گولي يا الله عمه ان شاءالله ماكو شي

_ يحجي وياي وانگطع نفسه عمه صديقه بأذني
سمعته يگله لا رائد لا تموت

دخل ماهر علينا بيده تليفونه
گمت عليه ارگض

_ أحجي گول ما بيه شي أحجي گول ما يعوفج ما يكسرج

_ بس أهدي جاوبني صديقه جاي يسعفونه
ان شاءالله ماكو شي

_ شبيه وين مضروب فهمنننني

_ما ادري فصل الخط وياه ومجاي احصلهم 
گولي يا الله وان شاءالله ماكو شي

ليش خليته يروح ليش شچاني شچاني ما عطلته
اخخخخ ياربي ما اگدر صدمات بعد ما اتحمل
الوقت اللي انظرب بيه رائد جان من أصعب الأوقات اللي يمر بيها العراق جانت فتره ظهور دع11 ما جان يمر علينه يوم اذا ما ننطي بيه شهداء فقدنا بهاي الفتره شباب بعمر الورد شباب الگاع تخاف منهم زلم تاكل الأخضر واليابس  راحت غدر

كل بيد أنزف منه شهيد هذا الخاطب وهذا العريس وهذا المنتظر طفله الاول وهذا المنتظر يرجع الاطفاله ويشوف لعبهم ترملة بناتنا وتثكلت أمهاتنا وتيتمت أطفالنا بسبب مله قذره أتخذت الدين ستر وغطا الها

مر على الخبر ساعات الدنيا كلها عرفت بالموضوع إعمامه ولد إعمامه راحو يشوفونه بس الوضع خطر وما يگدرون يعبرون

أني وعمتي رحنه البيت أهله
أمه حالتها تبجي الصخر اخواته وضعهن مو احسن من وضعي كل وحده بينا ماخذتلها زاويه وتبجي بيها
تأخرون علينه واي خبر منه ماكو الاتصال انقطع ويا أصدقاء جانو محاصرين وبينهم وبين الدواع11 مواجهه صعبه

هناا اني انهاريت انتهت كل حلولي ما أكدر اتقبل انو هو يصير بيه شي مستحيل اتحمل فگره يروح ويعوفني اخذت المفتاح من أمه ورحت البيتا
فتحت البيت ودخلت بقيت اعيط بكل صوتي

_ لا رائد لا تكسرني من جديد مو گلت إني أبوج واخوج مو گلت اني بظهرج والله أموت بدونك والله

فتت للغرفه مالته وهاي اول مره ادخل الها جان  تشيرته باقي على الجربايه جريته وبقيت حاظنته وابجي الهسه عطره بيه بقيت احجي ويا التشيريت وكنما احجي ويا هو

_ صح ما اعترفتلك بس والله إني أحبك تدري ليش أعاندك والاسنك لان ادري بيك ما راح تأذيني ادري بيك تحبني ما يهون عليك تكسر خاطري ولك أحبك إني أحبك أنت أبوي واخوي وصديقي أنت حبيبي الما شبعت منه لا تعوفني لا تعوووفني

بقيت وقت كلش طويل حاضنه فانيلته وابجي
احس طاقتي خلصت عيوني تشلعت من گد ما بجيت اذكرته من يگول لا تبچين لو تشوفين جنازتي گدامج رجعت انهاريت من جديد وبقيت أعيط من كل گلبي وأصيح أسم الله على طولك حبيبي
بيومها تأكدت إني مو بس أحبه لا إني أموت عليه
وأموت بدونه

أسمعهم يدگون بالباب بس ما اگدر اگوم افتح جسمي نحل من كد ما بجيت طاقتي صفرت وضغطي هبط خليت راسي على الجربايه والتشيرت بيدي ودموعي تنزل شويه شويه كمت احس رجفه وتنمل صار بكل جسمي حاولت اگوم ما اگدريت 
لحد ما فقدت الوعي

دنيا :  وصل النا الخبر والدنيا كلها نگلبت علينا يوسف وأسامه وعمومتهم راحو بلكي يگدرون يجيبونه بس الوضع خطر وما گدرو يعبرون بقينه من لليل الثاني يوم العصر ننتظر وندعي وگلوبنا نار براء تخبلت صارت وحده ثانية عمتي والبنات حالهن يبچي الغريب قبل القريب أجت براء أخذت مفتاح البيت وراحت انتظرتها ترجع ماكو طولت ساعه ساعتين ماكو ما رجعت رحت وراها دگيت دگيت محد يفتح هنا تخبلت گلت صار بيها شي اكيد حشمت الجيران اجه واحد من ولد الجيران طفر على البيت فتحلي الباب

طبيت اركض وام ماهر والبنات يركضن وراي وصلنه للغرفه مال النوم لگيناها طايحه ولا حس ولا نفس
تعاونه عليها وشلناها طلعنها والولد نفسه اخذنا للمستشفى سعفوها لگوه ضغطها مصفر  علگولها مغذي وانطوها ابر

وإني كاعده كبالها وابجي سودة بوجهي يا عمه عليمن ابجي على حظج وحظ بنيتج لو على رائد وبنيته بقيت ساعه انتظرها لحد ما صحت باوعت عليه واول شي سألته

_ ها عمه ماتت موو

_ گولي يا الله عمه والله گلبي بارد ما بيه شي
ان شاءالله

_ولج عمه إني گلبي نار عليه  طلعت أحبه وما ادري بنفسي  عمه بنتي تعلقت بيه هم ترجع تنحرم من الأب مره ثانيه ليششش

_ أسم الله عليه لا تفاولين على الرجال

_ طلعيني منا طلعيني ما اريد ابقى

_هسه بس يجي الدكتور نطلع

شويه وأجه الدكتور قاس الضفط وشاف دگات گلبي گال تگدرون اطلعون وضعها تمام

طلعنا للبيت لگينا الولد جيرانهم واگف بالباب ينتظرنا ما رايح عمتي بقت تشكر منه وهو يرجع يگلها صدگ جذب علويه ما مسوي شي هذا واجبي ابو مسره مغرگنه بأفضاله

دنيا : يطيك العافيه مشكور ورحم الله والديك أدعي وياك الابو مسره يرجع بسلامه

_ ان شاءالله مابيه غير العافيه هسه جنت أحجي ويا أسامه يگول گدرو يحصلون واحد من أصدقاء

_ اي يا الله وشگالك رائد زين

_  جماعته نصهم مستشهدين وهو حالته خطرة جايتهم امدادات وگادرين يسعفونهم للمستشفى

_عمت عيني عليهم شحال گلبهم بهذيج الساعه

_عمه سمعتي يگلج حالته خطرة

_مابيه شي و روح  أبوج مابيه شي گلبي بارد عليه
هسه عايني ساعه ساعتين ويگولون صار زين

وصلنه للبيت  الدنيا مگلوبه عدهم مابقي أحد ما جاي إني رحت بحظن عمتي ساهرة وأبجي
بعدني بحظن عمتي وأسمع صوت وحده تگول

_ موتيه الفگر يالطوطه بقيتي وراه لحد ما اخذتيه
وهجمتي بيته وهسه چسحتيه

رفعت راسي شفتها تبارك طليقته سكتت ما جاوبتها ما اگدر ارد شي صدگ اني فگر وما مكتوبلي ارتاح وشكو واحد يوگف وياي ويساعدني يمووت ويعوفني .. عمتي دنيا ردت عليها بمكاني

_ محد فگر وططوه غيرج شعدج جايه هم الج
عين وتجين هنا صدگ ما تستحين

حجايه من عمتي وحجايه من تبارك گبت بيناتهن هوسه كلش چبيره گدام العالم الگاعده
اخر شي عمتي أم ماهر گومتني هي وتغريد بغير غرفه وتبارك امها أخذتها وطلعت من البيت
والغريب بالموضوع عافت مسرة تبجي وراها وراحت
أجت عمتي دنيا ورانه للغرفه لازمه مسره تبجي
أشرت الها تجيني لان حتى حجي ما اگدر احجي
هي اجت تركض شبگنتي وگالت

_ بلاء صدد بابا مات

حظنتها بأثنين إديه وبقيت أعيط هي ما تعرف
شنو الموضوع بس تسمع الناس تكول مات

_أسم الله عليه أسم الله لا تحجين هيج أدعيله
مسره ادعي الابوج يرجع بسلامه

اجتني ريحانه تزحف رجعت شلتها بحظني
يم مسره وبقيت أبجي على حالي وحالهن

_ لج ريحانه أدعيله يم ربج انتِ نظيفه ربج ما يرجع إيدح فارغه ريحانه هو يحبج أكثر من أبوج أدعيله يرجعلج سالم

هنه يشوفني أبجي ويبجن وياي ما يعرفن شنو الموضوع تغريد اخذتهن من حظني وانطتهن الزمرد طلعتهن بره

ساهرة: گولي يالله ولج سودنتي الابنيات

_ فدوة عمه أدعيله منو الي من بعده والله بس يطلع
بسلامه بعد ما أعانده ولا اتعبه والله بعد ما اضوجه

_ الله يرجعه بالسلامه ان شاءالله يارب يرجع
سالم غانم الج والأبنيته

بقينا على هذا الحال لليل ننتظر اخر شي الساعه بالسبعه أتصل أسامه
گال رائد مصوب وأصابته بجتفه وكلش خطره وهسه گدرو ينقلونه المدينة الطب واحنه كلنه موجودين يمه أدعوله يعدي مرحلة الخطر
أني سمعت بيه جايبينه المدينة الطب واني تخبلت اريد اروح عمتي دنيا ما قبلت
گالت لو تموتين هنا ما أخليح ترحين الزلمه بين الحياة والموت وبس يسمع بيح جايه بنص جماعته يتخبل خلي يصحه ونشوفه يرضا ترحين لو لا

_ عمه صدگ تحجين هوو بيا حال عوفيني اروح اشوفه

_ ماكو روحه كافي براء

اخواته  وأمه كلهن راحن للمستشفى وحتى عمتي ساهرة راحت وياهن بس إني وعمتي دنيا بقينه بالبيت ساعه اتعارك وياها شلون ما خلتني أروح وساعه أحظنها وأبجي

الساعه بــ 12 رجعو من المستشفى بس عمتي ساهرة ما رجعت وياهم رايحه للبيت مناك هي وماهر
گالو خلصت العملية بسلامة وهسه
هو بالعنايه المركزه ادعوله يعدي هاي الساعات بخير
بقيت الليل بطوله گاعده وفارشه سجادتي وأدعي
واقرأ قرآن لحد ما أذن الصبح صليت وخليت راسي على السجادة ما أعرف شلون غفيت بدون لا فراش ولا غطا من گد ما تعبت من البجي وقبلها بيوم ما نايمه سهرانه شويه واجت عمتي گعدتني انام بمكاني گمت من السجادة نزعت المحرم واتمددت بفراشي

ثاني يوم من الصبح ماهر أجه عليه ما قبل أبقى يگول عيب تگعدين عدهم الناس شتگول علينا
إني هم غراضي وغراض ريحانه ما جايبتهم وياي لبست ورجعت ويا اول ما وصلت للبيت دقايق واندگ الباب راح ماهر فتحه شويه واجه بيده چيس زغير بيه چكليت وچيس ثاني بيه حنه معجون

ساهرة : شني هاي

ماهر : ما ادري أبن رزاق جابهن يگول أمي توزع ناذره

عمتي سكت ما جاوبت شي إني هناا متت إحس عيوني گامت تذب نار من القهر

_ تسمعين عممممه تسمعييين توزع چكليت فرحانه بموته ولج عمه ناذره تحني العالم اذا صار بيه شي

_ خلِ تولي هي وحده چلبه شتتوقعين منها

_ چلبه على روحها مو عليه والله اليوم اموتها والله

كمت منهم جريت الچياس من ماهر وطلعت على بيت إخوني بقيت ادگ بالباب بكل قوته طلعن أثنينهن يركضن على صوت الباب اول ما شفت علياء طلعت جيتت عليها وجريتها من شعرها ودفرتها بطنها

هي بقت اضرب بيه خرمشتني بخدي نبأ تفرغ بينا واحنه وحده أگلت الثانية لحم ماهر وعمتي أجو وراي  يركضون ماهر سحبني منها ونبـأ سحبت علياء

ماهر:  شجاجن فضحتنا كدام الناس ما تستحن

علياء : أني لو هي ما تشوفها طايحه الحظ والله اليوم اخلِ يموتج أصبريلي

براء : لو هو زلمه خلِ يجي ويتقرب مني والله اخليه يدفنه وهو عدل والله  توزعين چكليت فرحانه بوجع گلبه من كون الوجع بيه وبأمج وإخوج يا چلبه

_هذا الچكليت بسيط ناذره طلي للعباس اذا فطس ومات

_ماتت روحج عسا الموت يلفج ويلف عشيرتج

ماهر سد حلگي بيده وطلعني منهم
دخلني للبيت وبقى يحجي عليه شلون هيج سويت

_ما تشوفها شتحجي سمعتها شلون شمتانه بيه
ادعي عليه بالموت

_تحبينه براء

_اي أحبه مو بس أحبه أموت بدونه ماعندي غيره بالدنيا هو إخوي وابوي وصديقي وحبيبي

سكت ما رد  رجعت اجت عمتي ونفس الشي بقت تحجي عليه شلون هيج سويت والناس كلها سمعت
ما جاوبتها عفتها ورحت للغرفه دفنت راسي بين رجليه وبقيت ابجي

مرت عليه يومين واني لا اكل ولا نوم من الصبح لليل تبجي حتى عيوني  يبست من گد ما بجيت
و اليوم صار  اله اربع أيام على الحادث خابرني عمو يوسف الساعه بالتسعه الصبح اول ما گلت الو أجاني صوته  مو صوت عمو يوسف

رائد : يروحي شلونج

_رائد ؟

_ اي رائد شلونج حبيبتي

كمت ابجي واني أسمع صوته

_ليش البجي يروحي انتِ لا تبجين

_ شلون هيج أهون عليك ليش هيج أسوي بيه متت إني متت

_ يا بعد گلبي گلبج اروحلج فدوة شگد مشتاقلج

_ إني مشتاقتلك إني ومحد يقبل يجيبني الك

_ وين تجين لا حبي ماكو جيه

_ راح أموت اريد أشوفك

_اووف ربي صرت عزيز هسه

_ما تعرف شصار بحالي بهذيج الايام

_ سودة عليه

_ زين انتَ هسه

_عار ما يصيرلي شي أطمني

_ لا تحجي هيج أنتَ شيخ الشباب

_ ههههههه ايباااه شنو هذا التطور

_ مشتاقتلك

_مو بگدي ان شاءالله باجر الصبح اطلع من المستشفى هسه انتِ بطلي بجي وصيري قويه
احتاج مساعدتج بــ الايام الجايه

_ بعيوني اخليك

_ اروح الهن فدوة إني ويوسف

أسمع عمو يوسف يگله إني شعليه تريد تروح روح وحدك

_عيب عمو يمك كافي

_ أحترگ عمج شگد أحبنج

يوسف : تجيب التليفون جيبه هو صوجي فوگ ما يخابر بتليفوني يگعد يسب بيه الخاطر أم الاسلامية

_ههههههههه ها عمو حتى انتَ

_ ولج سجلته شيحجي من طلع من العمليات والبنج بعده بيه

_هههههه شيحجي

رائد : حظك اطيحه والله أمسحه

_ ولا امسح وروح أبوي ضامه اشوفه البراء

براء:  شيحجي عمو الله عليك

_ لا اريدج تشوفين صوره وصوت

رائد:  لا تتلطط مو شفتني ما اگدر اگوم ترى
اسحلك والله

_والله لو اعرف تموتني ما امسحه

_انطيك ورقه

_ابداً

_ ورقه ونص

_سويهن ورقتين

_يله روح اخذ من الكنتور وجيب التليفون أمسح المقطع

براء:  ها عموو والله ازعل اريد اشوف

_زيدي عليه

_ماعندي بس فلوس النيشان

_شگد فلوس النيشان

_واحد ونص

_ حلو خوش مبلغ

رائد : انجبي انتِ الثانية

بقيت لازمه التليفون استمع عليهم وميته من الضحك لحد ما سديته وگمت للبيت نظفته كله وسبحت وسويت ريوگ گعدت ريحانه هي وعمتي بدلت الريحانه وتريگنه كلنه اليوم اول يوم هيج اگوم واتحرك هذيج الايام مخلصتها بجي ولو اني حياتي كلها خلصت بجي

بيومها ماهر جان  بكربلاء خلص اليوم عليه واني احسب ساعه ساعه حتى يجي الصبح ويطلع واشوفه لليل واجه ماهر عمتي حجتله باجر يطلع رائد گـال الصبح اخذكم ان شاءالله هسه اريد انام تعبان ثاني يوم من الصبح كعدت بالسبعه سبحت وحظرت غراضي وغراض ريحانه بين ما گعدو تريگو وطلعنه البيت عمتي

لكيناه هسه واصل والدنيا مگلوبه بيته
ما قابل يگعد بيت اهله يگول بــ بيتي ارتاح اكثر

دخلت إني ويا البنات جوه وهم بــ الاستقبال ما باقي بشر ما جاي گمنا على البيت والطبخ والترتيب لحد المغرب الناس تجي وتروح عمو يوسف ذب،،،ح اثنين طليان دفع بلاء الوجه الله تعالى
واحنه كل وحده بينا ماخذتلها صفحه تشتغل بيها
لحد ما أجه أسامه صاح

_ قيطان

تغريد :  يا هههههه

_ والله موتني لو بيده يطرد العالم على مود نيطانه

_ راحو الناس

_اي راحو يريدج روحيله

غسلت اديه لان جنت اثرم طماطه ورحت لگيته متمدده على جربايه خشب ام النفر بـالاستقبال
اول ما شافتي دخلت أبتسم وفتحلي ايده
شكله كلش تعبان مبين عليه التعب والوجع
رحت ركض عليه حظنته بــ أثنين إديه وخليت
راسي بركبته وگمت ابجي

_ اهسسس كافي يروحي كافي بجي

_ والله موتتني  ما تخيلت هيج راح اتأذه عليك بيوم

_ اروحلج فدوة

_ ليش هيج سويت بيه مو تدري ماعندي غيرك مو تدري ياكلوني لو رحت

_ الخاطرج والخاطر بناتي رحت اذا اني ما اروح وغيري ما يروح ياخذونجن گدام عيونه

_ بعد ما ترجع أموتك والله

_هههههه هسه تعاي هنا نامي وبعدين عود نقرر

أبتعد شويه وسوالي مكان يمه

_ وين تكفينا أثنينه

_ على اساس وزنج ميه وما تكفيج هو انتِ
عصفور مهلس

_  رجعنا

_ هههههه مشتاقلج يبعد اخوالي وعمامي

_ اني هم مشتاقتلك

_اخخخ ربي لو ادري من زمان مخلي الدو11 الگ** مصوبيني على هذا الحجي الجاي أسمعه

تمددت بصفه وهو جر الحجاب من شعري وگال

_ نزعي ترى  إني مثل رجلج

_ هههههه لا يجي أحد عيب

_اليطب هنا اكسره شو انطيني بوسه

_ ترى اضربك بجرحك والله صير حباب

_ ما يصير لازم أتاكد من سلامة ممتلكاتي  جوز عطلت عاد اتلاحك روحي قبل العرس

_ شنو يعني

بدون ما يجاوبني  كبل باسني من شفتي
من ابتعد مني گال

_ الحمدلله بعدني بكامل صحتي

_ شنو يعني

_ هههههههه تعاي اضمج بين ضلوعي حيل تعبان وموجوع

_ سودة عليه

حظني حيل ماكو ثواني وصدگ نام
لان هو ياخذ علاج بيه نسبه مسكنات قويه فـ طول اليوم  نايم بقيت اني صافنه على وجهه و وزع أبتسامات ليش ما ادري ياربي هيج وتكمل وياي وارتاح واخلص من كلشي سيء مريت بيه

يربي شو هذا حلو واني ما منتبهه عليه
اول مره اركز على عليه ملامحه من صدگ حلو
ما ناقصه  شي بقيت اتأمل بملامحه لحد ما غفيت واني بحظنه ما اعرف شكد مر وقت بس ما اعتقد هواي حسينا على أسامه واكف فوگ راسنه ويكعد بينا

أسامه :  قيس قيس ليلى ليلى
عنتر عبله  الوادم واگفه بالباب تريد اطب گعدو

رائد: گولهم مو هنا رائد سافر

_ راح احسب لحد الخمس اذا ما كامت قيطان افتح الباب واطببهم عليكم وتصير فضيحتك بجلاجل  سيادة القيادي

هنا هم يتناكرون واني كمت من مكان من اول ما شفت أسامه عدلت حجابي وطلعت وگفت  ويا البنات على الشغل والترتيب لحد الساعه بــ 11 ونص بــ الليل ماهر دز علينه نروح گلت العمتي اني ابات روحو انتم راحت هي ثواني  ورجعت گالت ماهر مايقبل يگول عيب خلِ تجي بعد اني ما گدريت أعترض أنحرجت وعمتي هم أيدت ماهر لازم اروح ميصير ابات

لبست وطلعنا ما أگدريت ادز خبر الرائد اني رايحه لان تليفونه ضاع  منه هناك بيوم الحادث
والولد كلهم بــ الاستقبال والاستقبال مليانه ناس
بس وصيت التغريد اذا سأل عليه تگوله راحت
ودعت البنات وطلعنا لكيت ماهر وعمو أبراهيم ينتظرونا بالباب ماهر جان جاي بسيارة فارس لان ما عنده سيارة هنا بالعراق اول شي وصلنا عمو البيتا وراها رجعنا البيتنا ماهر ما فتح اي موضوع اول ما وصلنه فرش النفسه بدون ما يحجي شي وتغطا ونام

ساهرة : شبيك شو ضايج

ماهر :  مابيه شي راسي يوجعني

_اسويلك جاي

_ لا يطيج العافيه بس اريد انام شويه

عمتي سكتت واني شلت ريحانه وگمت للغرفه الثانية نومتها بمكانها وبقيت اكلب بالفيس ما جايني نوم
مر ساعه ودگ عليه رقم غريب تفاجأت منو هذا يدگ هيج وقت ما جاوبته خفت بس خلصت المكالمه أجتني رساله مكتوب بيها  هذا إني يروحي ردي
عرفته هو بسرعه رديت عليه

_ها حبيبتي

_هلو

_ هلا بيج عمري  ليش رحتي

_ ميصير ابقى عيب ابات بيتك باجر عود اجي

_ الله كريم انتظرج

_ان شاءالله

_ يلا حبي روحي نامي خابرت بس حتى أشوفج

_تمام تصبح على خير

_وانتِ بخير

سديته منه وگمت خليت التليفون على الشحن وطلعت من الغرفه اريد اروح للحمام
اول ما طلعت فزيت مخروعه واني اشوف ماهر گاعد باب الغرفه ويدخن

_ بسم الله شتسوي هناا خوفتني

_ هيج بس شويه راسي يوجعني

_عبالي نمت

_ لا گـاعد

_أسويلك جاي

_ لا شكراً

عفته ورجعت للغرفه حتى للحمام ما دخلت نسيت من الخرعه الخترعتها ثاني يوم من گعدت ما لگيته سألت عمتي عليه گالت راح يحجز يريد يسافر
تريگنا اني وعمتي وريحانه ورحنه البيت رائد نفس الوضع ونفس الروتين الناس والهوسه وره الغده اجه عمو يوسف گال براء هاج هاي هديه الج رفعت راسي لكيته لازم تليفونه ويضحك عرفته يقصد على المقطع گمت بسرعه واني اضحك اخذت التليفون منه شغلت المقطع رائد نايم على السديه وبعده بلبس العمليات رافع أيده ويكتب بالهواء

يوسف :  شني هذا شتكتب

_ نيطان گلبي

_ بعد النقطه مال الان نسيت تحطها

_ لا حطيتها

_ماكو هاي شوف بدون نقطه

هو بسرعه  حرك ايده يمنى يسرى عود يمسح بالكلمه

رائد :   هاي مسحتها راح اكتبها من جديد

عمه يرجع يسأله

_ هي منو نيطان ما عرفتنا عليها

_هاي رويحتي أبنيتي الخوثه

أسامه : اكو واحد يحب وحده خوثه عوفها خل تولي

_اكل وحل حيوان تروح الها فدوة انت وهذا عمك

كلهم ضحكو بصوت عالي دمعت عيوني واني اشوفه شلون يحجي بعدني  لازمه التليفون واگفه اجه هو يمشي جايبه أسامه گوه يتحرك ضحك من شاف التليفون بيدي وگال

_ شفتي خطي شلون حلو

_ انداريت عليه خانكتني العبرة
أبتسم واجه عليه باسني براسي كدامهم كلهم
أسامه بقى يصوفر ويصيح

حي الله السادة من ينسحلوون ياابه حي الله القائد ياابه

كلهم ضحكو عليه رجع يمشي بيه أسامه للحمام
واحنه التهينا كل وحده بشغلها نفس الوضع الليل هيج احنه لحد ما ماهر دز على عمتي گال يله نروح
لبسنا جاي نطلع اجه رائد عليه گوه يمشي

_ راح ترحين

_ اي

_ باتي هنا

_ لا ميصير

_براحتج بس مو ما تجين باجر

_  الله كريم

ودعناهم وطلعنه ماهر بقى يحجي گال عيب يوميه ترحين باجر لا ترحين ابقي عگب باجر و روحي

ساهرة : شوكت ترجع انت

_  الخميس

_  الله يسهل عليك

وصلنا للبيت وكل واحد نام بمكانه ثاني يوم ما رحت
رائد خابرني گتله محد موجود يجيبني وعمتي اليوم ما ببها حيل ما گتله ماهر ما يقبل بس اگوله هيج يتخبل گال ادزلج أسامه يجيبج
ما قبلت تحججت تعبانه اليوم على باجر اجيكم

عاد هو هم ما الح وياي عافني بس بقى كل شويه يراسل لو يخابر لحد ثاني يوم وگفت على عمتي تاخذني گالت نتغده ونروح عيب يوميه نروح نتغده ونتعشا عدهم سويت غده على السريع تغدينا وبدلنه
ورحنه

اول ما وصلنه جان الباب مسدود عكس يوميه مفتوح من نروح نلگاه مفتوح وندخل گبل دگينا البابرشويه وانفتح انصدمت واني اشوف تبارك هي التفتحلي سألتها متفاجأة

_   شتسوين هنا ؟؟

_ ههههه بيتي هذا خاف نسيتي

_ جان بيتج

_ لا حبي جان وما زلال هو بيتي

_ شنو قصدج

_ شوفي يا ست براء رائد رجلي وأبو بنتي
وحبيبي يعني هسه انتِ  كل عقلج اعوفه الج

يتبع،،،،

ياسة 🌿

توقعاتكم وتصويتكم الحلوو لان ما بقى شي ونختم
ان شاء الله  ❤️