تجارة مع الله

البارت الحادي عشر

#تجارة_مع_الله

#البارت_الحادي_عشر

#بقلم_Yassah_Yassah

مهما صعبت عليك الحياة أعلم
أن الله لا يكلف نفساً إلا وسعها

🌿🌿🌿🌿🌿🌿🌿🌿🌿🌿🌿

من بعد ما وافقت ارجع ويايه  خلينه شروط عليه
و هو جان موافق على كل الشروط الي خليناها واحد من الشروط بيت وحدي ما اگعد ويا اهله والشرط الثاني يطلگ مرته واخر شرط يتكفل بكل علاجات ومصاريف ريحانه بلاضافه لعقد المحكمه

بهاي الفتره هو بدأ يجهز ويرتب بالبيت طبعآ البيت جان نصف قطعه أيجار لان امكانيته ما تسمحله يشتري 

عشر ايام خلص كلشي من ترتيب وتحضير 
واني وابوي  بدينه نصفي بــ الشقة لان بعد ما راح يگعد بيها صار لازم يرجع البيته كافي الرجال متبهذل بسببي صار سنه ونص  بس صعده الدرج كافي عليه وهو بهذا العمر

وبيوم الاجيت اروح  حظرت غراضي وغراض ريحانه اجت يقين تسلم عليه وتدعيلي بالراحه والسعاده طبعاً ما حجيت الها على زوجها حرام عليه اهجم بيتها وهي عدها اثنين اطفال والثالث بــ الطريق شنو ذنبهم يتبهذول بسبب مراهقه ولطلطه ابوهم
وهي ما تستاهل احجيلها هيج موضوع واكسر خاطرها

للمغرب اجه زيد علينه ودعت والدي وطلعنا

جبار : امانه يمك أبنيتي

زيد : لا توصي حريص عمي بعيوني اشيلها

اجه ابوي  باسني براسي وگـال

_ صيري قويه اكثر من هاي قوتج اريدج  تبقين براء الما يهزها كل شي بعد ابوح الله انطاج اثنين اذانات وحده سمعي بيها والثاني طلعي  منها

بست ايده وراسه

براء : ادعيلي يابه

_ الله يجبر بخاطرج ويفرح گلبج ويكتب السعادة من نصيبج

طلعنا البيتنا وحياتنا الجديدة
إحس گلبي ما مرتاح وخايفه بس ارجع اغالط إحساسي واگول كلشي ماكو مجرد رده فعل لان جنت زعلانه فتره طويله

وصلنه للبيت جان عباره عن غرفه ومطبخ واستقبال وصحيات والطابق الثاني غرفه وصاله الاثاث جانت تجهيزات المطبخ من كاونتر وطباخ وسنك ومواعين
وثلاجه والغرفه مالتي القديمه ناصبها بــ الغرفه الفوگ لان اني ما ردتها بعد كشت روحي منها كتله بيعها گال لا حرامات راح اشمرها فوگ
عفته على راحته بعد .. غرفتي الجوه جان
بيها كنتور ومرايه وفراش مفروش بــ الگاع

زيد : نور البيت

_ منور بيك

_ مشتاقلج

نزلت راسي ما رديت لان بعدني مقهوره منه واصلآ ما مقتنعه برجعتي غصباً عليه رجعت الخاطر اطفالي
اخذ ريحانه من ايدي وداها بلاستقبال ورجع عليه