تجارة مع الله
احداث حصرية
ياسة Yassah Yassah
🌿🍃🌿🍃🌿🍃
بيت دافئ حظن حنين بناتي وأبوهم گدام عيني بخير وسلامة ألف الحمد للَّه ما جنت أحلم بهاي العيشه بيوم من الأيام
مسرة -- مااماااا والله راح أضربها تعالي الها
براء -- ياربي دخيلك راح أنجلط ولج مودة كافي كافيييي حرام عليج راح أموت رحميني
مودة -- هي تچذب أني ما مسوية شيء عاقلة
-- اي عاقلة أنتِ وين أكو منج دُرة نازلة من السماء
شوفي ولج إذا سمعت صوتج أجيج أطيح حظج
-- ما أحچي بعد سكتت
-- عفية بـ الحبابة
شلت سلة الخضرة إللي جنت أنظف بيها وگمت منهن للمطبخ أريد أغسلها ما حسيت غير العيطه رجعت أركض لگيت مودة لازمة مسرة من شعرها بكُل قوتها جارة الگصيبة وهاي الفاهية نايمة جواها
وبس تبچي وتصيح ماما الحگي إلي رگضت عليهن وخرت إيدها من شعر أختها وجريتها من إذنها
براء -- وتالي وياج وتالي أطگج وأموتج ولج موتيني
وين أهج منج
مودة -- أي أذني والله أله أگول البابا
-- هو منو خبلج غير بابا اليوم يجي يسويلي حل
وياج لو أني لو أنتِ بعد ما أتحمل
وأنتِ الفاهية من تمد إيدها عليج عضيها
مسرة -- ما أگدرلها ماما جنها چلب شوفي أسنانها
مودة -- والله اله أگول البابا عليكم بس أنتظروا أنتظروا
وگفت تأشر بيدها بسيطة تهددنا بـ أبوها وراحت للغرفة وسدت الباب وراها بكُل قوتها
مسرة -- ماما يمكن مخبلة
براء -- والله محد راح يتخبل غيري روحي جيبي الكتاب وتعالي وين وصلتي أريد أشوف ، راحت تجيب كتابها وحوراء أجت خلت رأسها بحظني لزمتها مصخنة
يمه أسم الله شبيج تفورين
جبت المحرار درجة حرارتها ٣٩ عزه بعيني شجاج
يا ماما هسة ما جان بيج شيء شـ بسرعة هيج أرتفعت حرارتج
شلتها غسلت ألها وأنطيتها بندول
بقيت أسوي ألها كمادات وهي نفس الوضع ما تبرد
طلعت مودة من الغرفه و أجت يمنا من سمعت بينا مخبوصين بــ أختها
لزمت حوراء من گصتها وباوعت عليه وأشرت بيدها
مودة -- هاي مصخنة ماما
-- أي ماما مصخنة أبوس إيدج گعدي عاقلة أختج مريضة حبابة الـخاطر أبوج مو الـخاطر أحد ثاني
-- لبسيها النعال نروح للمستشفى
-- أخذيها أنتِ أني مابيه حيل
-- لا ميصير لازم ويانا أمنا
--ههههه روحي لعبي ويا ريحانة ومعليج بهاي السوالف
