تجارة مع الله

بارت التاسع والعشرون

#تجارة_مع_الله

#بارت_التاسع_والعشرن

#بقلم_Yassah_Yassah

رائد يگول 👇

خذيتك منهم وخليتهم دخان
شمحلات التحبه وتاخذه بهمه
ضواهم ما يهم الگمر بس بــ لليل
الشمس تفرش ضواها بين الف نجمه
ما مقسوملي مقسوملي متانيك
هو الرايدك شيقنعه بالقسمة
هو العاشگك مد روحه مدت غيم
نزلك ندى من أول سماء مغيمه
أحب الشغله من يصير بيها أعناد
وأجيبك أيد بيد وعينهم تعمه
وأنغر من صدگ غير أنت تمشي وياي
هو العنده مثله ياهو اليهمه

🌿🌿🌿🌿🌿🌿🌿🌿🌿🌿🌿

أني كلت موافقه وهو اخذ نفس طويل
ورجع راسه على الحايط مثل الواحد المرتاح

كامت أمه تهلهل والشيخ بارك النه وطلع
عمو أبراهيم باس راسي وتباركلي وراه عماتي
بوسني ويتباركن كومني للصاله وهو بقى گاعد بالغرفه حتى ما طلع يمهم بس گال العمتي سدي الباب وراج

طلعنه وسدينه الباب نزعني المحرم الجنت لابسته وبقت عمتي ترتب بشعري وبمكياجي
جانو أقاربهم كلهم جاين عازمتهن أم رائد
بنات اعمامهم واخوالهم والجيران والدنيا مكلوبه
وكل الناس شهدت الموقف الصار وسمعت صوت صياحه شغلت تغريد الدي جي وبقت تركص هي وباقي اخواتها ومرت أسامه وياهن

اجت رونق جايبه ريحانة لابسه بدلتها ومسويات الها تسريحه وعمتي حاطتلها حمره الخدودها گعدتها بحظني

يا بعد كل الدنيا يا ماما هم يجي يوم ونرتاح أني وياج ونخلص من الضيم هم يجي يوم و أنام وأني مرتاحي وما على گلبي هم
بقت بحظني وتصفك وياهم فرحانه ما تعرف شنو
الموضوع شويه وبدن النسوان يتهامسن بيناتهن

_ يا هاي بتها شني

ترجع الثانية تگول الها

_ اي جا غير هي مطلكه

_ خوش عمي النوب بعد يطلكن منا ويعرسن
منا بالعافيه عليهن بس بناتنا ضالات ماعدهن حظ

_ خيه حليوه جا ليش ما تعرس بسرعه
شوفيها تخبل الجسم ثلج والشعر جنه حرير
وعيونها مادري يا الون

_ اي صدك حلوة بس اضن لابسه عدسات ما جنهن عيونها

_ بعد اندري بيها

كاعدات يم القنفه ويحجن وكل كلامهن سمعته
بطرانات حاسداتني ما يدرن ما تمر عليه ساعه
اذا ما ترگعني الدنيه رگعه جديدة
شويه وتغريد صاحت سون مجال لابو مسرة
يريد يلبسها الذهب

اني حارت بيه الدنيه شنو يلبسني فستاني مدلع
صحت على عمتي اريد شي اغطي صدري وظهري اجت اخذت ريحانة من حظني ودارت وجهه مني تغلس اجه هو گعد بصفي هنا إحس گلبي وگف
شلون بيه ظهري كله طالع ياربي

كمت اجيب بشعري وارجع بيه اريد اغطي ظهري
هو مد ايده من وراي وخلاها علگ القنفه يعني ايده وراي مباشرتاً

أمه وأخواته يهوسن وهو مدنگ ما رفع راسه ابد
جابت تغريد الذهب وانطته اله

لزم ايدي لبسني الحقه وباسها
بدون ما يباوع عليه ولا يحجي كلمه
طلع المحبس لبسنياه ورجع باس ايدي مره ثانية
شال العقد ورفع راسه عليه وگال

_ يله وخري شعرج حتى تلبسين

حجه هيج و ضحك وياها غمزه

يعني صار ساعه اغطي وهو ما خذني على كد عقلي ويضحك عليه بگلبه لان اول واخر راح يلبسني الگلاده ومن ادنگ يشوفني

بقيت بس اباوع عليه ميته من الخجل
هو نزل راسه مني ميت من الضحك
من شافني ما سويت شي تقرب مني و بعد شعري
بيده ولبستي الگلاده من كمل همس بــ إذني

يصير أبوسها لو ما تقبلين

يقصد على ركبتي ما رديت احس كلبي راح يطلع من مكانه تغريد بقت تهوس حبها ولا تخاف من عماتها
وهنه يردن وراها ويصفكن
هو بعد اجته من الله تقرب مني باسني من ركبتي
بوسه من هاي أم الأثر

اني هنا طحت على الكرسي من الخجل
هو شافني رجعت على الكرسي حجه بـ إذني

_ شني هاي شو سريعه الذوبان انطينه مجال نتفاهم

ما اكدر ارفع راسي بقيت بس مدنگه
ادري بي ناصب عليه وادري بيه ميت من الضحك عليه بس ما اگدر ارد عليه
جانت وحده من أخواته تصور وثقت كل اللحظات
خلصنه تصوير ولبس وطلع

من طلع اني حاجيت عمتي
تجيبلي مي احس بلعومي نشف من وراه سوالفه فد واحد سرسري وكل الدورب حاويها شلون بيه ياربي
ساعه سيد ساعه شيخ ساعه كشاف ساعه عصابجي
ساعه رومانسي وفوگ هذا كله اللسانه ياكلك ويشربك

بقيت كاعده لحد المغرب وزعو عشاء علگ الناس
وراها كلمن راح البيته بقن بس بناتهم
اني كمت للغرفه بدلت فستاني ولبست الملابس الجنت لبستهم من اجيت للصالون وغسلت وجهي وتوضيت وصليت جبت ريحانه اريد ابدل ملابسها
ما تقبل تبدل تبجي تريد تبقهةى بالبدله شلون مسرة بعدهي لابسه بدلتها

هنا مسرة خلصت الحفله كلها تركص بالنص وتصيح

عرس بابا وبلاء دللولش

وهو كل شويه يجرها يبوسها من حلگها
دخلت عليه عمتي دنيا تريد تاخذ المصلاية

_ عمه حاجي عمه أم ماهر حتى نرجع للبيت

_ وين راجعات حتى عشا ما متعشيات بعدجن

_ ما انريد هناك نتعشى

_ يا شبيج هيج تحجين أصبري بعد وگت

_ عمه حبابه اريد ارجع البيتي قبل لا يرجع يجي

_ منو هذا اليجي

_ حماج والله ما جاي ارتاحله مبين عليه واحد سرسري

_ هههههههههه لا تخافين ما يجي الدنيا كلها يمه
مسويله حفله بالشارع

_ شنو قابل حنه هي خطبه

_ بعد جماعته من فرحتهم بيه كل شويه تجي مجموعه تاخذ الها هوسه هوستين وتگعد الشارع متروس ترس حتى لو أني خليتجن ترحن هو ما راح يخليجن

_ يعني بعد ما يجي هنا

_ لا ما يجي

اخذت المصلاية وراحت وإني بقيت بالغرفه گاعده صبو عشا من جديد لان أخواته وعماتي ما متعشيات بعدهن صاحوني أجي وياهم ما رحت ما اشتهي احس نفسي مزود وخلگي كلش ضيگ
شويه وأمه وخواته راحن من بيت عمو يوسف البيت أهلهن بقينه بس اني وعمتي

دخل عمو يوسف گتله وصلنه گال باتو شعدكم رايحين عمتي بس سمعته حجه هيج كام نامت بالغرفه گاعدة من الصبح والهوسه والتعب ما بيها حيل تروح بــ 12 خابر عليه

_ الو

_ هلا حبيبتي شلونج

_ زينه

_ شلون صرتي تحسين بشي يوجعج شي

_ لا ما كو شي زينه

_ نامو مو

_ عمتي أم ماهر نامت هي والجهال بس
بيت عمو يوسف كاعدين بغرفتهم

_ تعاليلي بالحديقة

_ اريد أنام أنعس

_ بس أشوفج ورجعي نامي

گمت للحديقه ويا طلعتي هو دخل اجه گبل عليه بدون ما يحجي شي جرني عليه بسرعه وحظني بأثنين أديه وخله وجه على راسي كل ما احاول أبتعد منه يشدد لزمته عليه

_ بس شويه وخر اختنگت

أبتعد مني وهمس

أني هسه يله تنفست ، حبيبتي أنتِ الف مبروك
والله يقدرني وأسعدج واعوضج عن كل التعب

_ مبروك عليك

_ ما اگدريت احجي شي مساعه اول شي
أنقهرت وثاني شي من سويتلج الادعية تعبت
الب** الله لا ينطيهن خربن أحلى يوم بعمري

_ منو هنه

_ ما ادري منو بالضبط بس هنه نسوان

_ شمسوياتلي

_ عمل ، هههه بس عافنها كلها واجن يسون الحبيبة رائد أعمال ما يدرن هاي السوالف عندي زلاطه

_ صدگ شلون هيج تعرف أنتَ سحار لو شنو

_ ههههههه تعاي هنا نكعد واحجيلج

رحنا كعدنا بالگاع واحد مقابيل الثاني

_ شوفي يا عيني هاي جدي الله يرحمه جان ملتزم
بشكل مو طبيعي

_ مثلك يعني

_ هههههههه لا اني ملتزم اكثر منه

_ هههههههههه

_ اروح فدوة ونذر الهاي الضحكة

دنكت راسي ما رديت رجع كمل كلامه

_ المهم جدي عنده كتب وعنده خبره بهذا الموضوع
جانت المنطقه كلها تعرفه لان يساعدهم في سبيل الله أني جنت كلش زغير وين مايروح ويا وين ما يگعد اگعد يمه بحيث كمت اسمع واحفظ واخزن المعلومات بدماغي لحد ما كبرت اني اجمع معلومات منه ، اخر شي بالمتوسطه علمني اقرأ الكف واخذ أستخاره بالقرآن

هو صح مو مضبوط وأني ما أمن بيه بس
مرات اكو شغلات تطلع صحيح يعني يا يصيب
يا يخيب مثل اليوم اول ما دخلتي گلبي بدأ يلعب منج حسيت اكو بيج شي بس ما اعرف شنو لحد ما جفصتي بالأمة هنا تأكدت ومن شفت جف أيدج طلع يمي عمل

منو مسويه ما اعرف بس مسوينه حتى لا تزوجين
ولا ترتاحين وتبقين خايفه من اي واحد يجيج

_ منو مسويلي هيج

_ الله أعلم بس أني شاك بهاي الب*

_ منو هاي

_ مرت أخوج

_ اذا هي او غيرها حسبي الله ونعم الوكيل بيهن
زين شنو كتبت بالاوراق

_ عوفي شكتبت وشحجيت بس اريدج الدعاء تخيطيه بعلگ وتبقين لابسته وما تنزعينه بس من ادخلين للحمام ممنوع تفوتين بيه للحمام فهمتي

_ يعني هسه السحر بطل

_ نوعاً ما اي بس بعد نحتاج علاج يعني
حسبه كم يوم كل شي يخلص

_ شنو هذا العلاج

_ أني أسويلج بعد ادعيه وأعلمج على آيات تقرينها تفك العمل هسه عوفي السحورة وأحجيلي هاي أنتِ صدگ هيج لو الهبطه الاكلتها منج خلتني ما اصدط عيوني

_ شنو شبيه

_ تموتين وربي ولج ما شايف هيج جمال من قبل
وعلي اخ گلبي شكد يحبج أنوب بيضه بت الاوادم ولابسه أسود فتيتي گلبي فت تعاي بحظني تعاي

جرني عليه ما قبلت اجي

_ بس حظن واحد

_ مو جنك مصختها

_ مرتي وبكيفي براء إني كلش فرحان لان گدرت أعقد عليج وهسه أنتِ حلالي شنو تردين وشنو تحتاجين أحجيلي لا تعتبريني زوجج اعتبريني صديقج فتحيلي گلبج خليني أشاركج بكلشي لا تبقين تتهربين مني

_ المريت بيه كلش صعب تعبت بحياتي هواي أنت هم أعذرني اذا ما گدريت اتقبلك ولو حجيت وياك كلام يضوجك بس والله مو بيدي فقدت الثقه بكل جنس أدم

_ حقج وما الومج وان شاءالله اني وياج راح نتجاوز كل شي صعب لا تتوقعين بس أنتِ تعبانه بحياتج أني هم تعبت وتأذيت هواي
صدگيني جانت تمر عليه أيام وليالي ما أدخل للبيت
ابات بره في سبيل لا ارجع للنگ والعرك

مثل ما أكو زلم مو أوادم هم أكو نسوان مو أدميات بالمقابل يعني الرجال شيريد غير كلمة حلوة ضحكه تفتح النفس لگمه طيبة بيت نظيف و أني كلهن جنت محروم منهن

هسه تكولين اي هو اي واحد يطلگ هيج يحجي على مرته بس لا والله شگد بقت فترة زواجنه ما يوم شكيت منها ولا يوم قبلت أحد يحجي عليها لو يدخل بيها تعرفين ليش احجيلج هذا الكلام هسه لان اريدج تعرفين أني من طلگت ما طلگت لان متعافي ولا طلگت لان لگيت غيرها
صح جنت افكر بيج وروحي تلوب عليج بس ما قصرت وياها ابد بقيت مثل ما إني وحتى احسن بس هي زادت وتفرعنت وكرهتني بعيشتي

كامت تعارك الجيران تضرب مسرة اخوتي من يجن ما تفتح الهن الباب تغلس شكو شي أگلها لا تسوينه تسوي ما أدري أعناد بيه ما أدري حظها لحد ما جزعت وطلكتها قابل ابقى وياها هيج طول عمري

هسه أني اللي أريده منج بس تريحيني ولا تنگين فوگ راسي شغلي صعب مرات ابقى بره البيت ايام وأسابيع ومرات اگعد بالبيت واسكت اعصابي مكروها اذا تعصبت أمي ما توكف بعيني حبيبتي صيري أمي وأبوي لا تخليني اعصب لان من اعصب ما اضمن نفسي بصراحه بعد ليش تزعلين مني من هسه خلينا نتفق

_ لا تخوفني عفيه أني گوه جاي اهدي بنفسي

_ بالعكس ما اريدج تخافين مني أريد احجيلج على كل شي يخصني أريدج تعرفيني وتعرفين طبعي

سكت شويه وبقى يباوع بعيوني طول بنظرته
نزلت راسي منه رفع وجهي من حنجي بأصبعه
ورجع يباوع عليه احس بوخت من الخجل
رجع گال

_ اخخخ گلبي شكد يحبج ولج شكد ما جنتي
حلوة بعيوني اليوم المنظر الشفته فتت روحي
طلعتي مو بس حلوة طلعتي تسطرين سطر

_ اريد انام نعست

_ هههه يله تعاي انام

لزم ايدي و، ام يريد يدخل للبيت

_ وين

_ أنام غير اني هم انعس الهبطه الأكلتها اليوم هدت
حيلي يله تعاي تأخر الوقت موزين علينه السهر

_ يعني وين تنام انت ما فهمت

_ يمج

_ لا والله

_ اي والله

_ من كل عقلك

_ ما اسوي شي بس انام وهذا هو

_ يا والله دروح روح

جريت ايدي منه ودخلت هو بقگ وا، ف باب المطبخ
فتت للفرفه النايمه بيها عمتي والجهال غطيتهم وسديت الباب عليهم

رجعت للغرفه الانام بيها لگيت مسرة وريحانة شامرات الغطا غطيتهن وتمددت بمكاني
بسرعه غفيت من صدگ تعبانه الهوسه كلها براسي
وصوت الناس يرن بأذني
بعدني هسه غفيت وحسيت على واحد حاظني
من ظهري وجهه برگبتي فزيت مرعبوبه الغرفه ظلمه ما اشوف شي هو فز وياي

_ شبيج عمري أسم الله

_ منو أنتَ منوووو

_ منو أني ولج رائد اني يعني منو

_ صدگ جذب وگعت گلبي بديه هيج هو

_ شمسوي

_ يعني بشر نايم يفز يلگه روحه محظون شتريده يسوي

_ يرجع يحظن الحاظنه

_ گوم منا صدگ ما تستحي

_ بت الاوادم شمسويلج اريد انام

_ اي روح نام بيتك

_ اريد يمج

_ البنات راح يطعدن والبيت مليان ناس والله عيب عليك

بدون ما يجاوبني جرني من ايدي وحظني بأثنين اديه ودفن وجهه بصدري وغمض عيونه
احس جسمي خشب حتى نفسي كطعته
هو ما سوى اي شي بس يتنفس سريع
بقيت مغمضه عيوني وارجف لحد ما حجه

_ ليش ترجفين حبيبتي لا تخافين والله
ما اسويلج شي بس اريد انام

_ الناس منا وخر عفيه

_ قافل الباب وحتى لو اجو انتِ مرتي ما مسوي شي غلط اهدي وبطلي خوف وحظنيني حيل اريد انام اليوم بحظنج

غمضت عيوني حيل و ضميت راسي بصدره هو بقى ياخذ نفس من شعري ويرجع يمسح عليه لحد ما غفيت واني بحظنه

بعد ما حسيت على شي لحد الصبح على ضربات مسرة گاعده يم راسنه وشبعتنا ضرب اثنينه فزينه جانت تبجي وتصيح

_ لا نامين يم بابا لا نامين دومي

وتضرب بيه وترجع تضرب بــ أبوها

وتكله لا لسبكها لا لسبكها ( لا تشبگها)

هو گعدلها جراها ونومها بنصنه

_ أسم الله باباتي شبيج

_ لا لسبكها اريد ادوم ( لا تشبكها اريدها تكوم )

_ ما شابگها حبيبتي بابا كافي بجي عيب تبجين أنتِ مو جبيرة هسه ريحانه تكعد وتشوفج تبجين وتبقى تضحك عليج

سكتت ورجعت باوعت عليه وتگلي

لوحي هذا بابا مو ابوك

بقيت كاعده وحاطه ايدي على خدي بله هذا صدگ يحجي اجه نام هنا شلون يطلع هسه الناس كلها تشوفه والله عيب باوعت عليه لكيته يباوع عليه ومبتسم

_ شكو

_ صباح الخير

_ صباح النور والله نسيت

_ هيج أنتِ حلوة من تگعدين من النوم لو لان
جاي أشوفج بدون حجاب وشعرج مفتوح

_ هسه شلون تطلع والله عيب

_ وليش أطلع ابقى هنا مرتي وبناتي يمي بعد شعندي طالع

_ هسه شيگولون علينه

_ شيگولون يعني قابل مسوين شي أحنه
سوينه شي ؟

_ لا والله كلشي ما مسوين

_ هههههههههه شكد فطيرة

جر ايده من مسرة وره ما رجعت نامت على ايده واجه عليه

_ اول مرة انام واني مرتاح

_ كوم اطلع كافي والله عيب

_ شثبرتيني بالعيب ما عيب العيب بالجيب حبيبتي أنتِ تعاي نامي

_ شنو أنام گوم روح قبل لا يگعدون

_ بعدني أنعس أني

_ لا تسوي هيج وياي والله أستحي

أبستم وباسني بگصتي وگام طلع اول ما فتح الباب تلاگه ويا عمو يوسف أسمعه يگول اله

_ شتسوي هناا

_ جنت نايم

_ وين نايم رائد صدگ تحجي

_ليش شمسوي

_كلش عيب هاي تصرفاتك رائد أنتظر لحد ما تعرس لا تسويلنه مشگلة

_شبيك شمسوي والله ما سويت شي جنت نايم

_ وهسه لازم اصدگ أني

_ولا تصدگ شسويلك قابل

_روح هسه لا تگعد أم ماهر وتبقى تحجي عيب منها

_ هاي حلوة يابه مرتي واذا كعدت أم ماهر

واگفه أسمعهم وميته من الخجل

_عزااا شكد عيب يابه أنفصحت بقيت گاعده بالغرفه ما طلعت أستحي من عمو يوسف أنتظرته راح يله طلعت غسلت وبدلت بدون ما أتريگ وگفت أنتظر عمتي حتى نرجع البيتنا

توسلن بيه بس حتى اَْگعد أگل ما قبلت أگعد
گتلهن ما أشتهي بين ما گملت عمتي وطلعنا
اَْخذنا تگسي البيتنا بعدنا هسه دخلنه للبيت دگ
عليه رائد

_الو

_ وين انتِ براء

_ بالبيت

_ أني گتلج رجعي

_لازم نرجع قابل نبقهى يم عمتي

_شوفي براء منا وجاي گلشي راح يتغير
يعني بعد ماگو لسان طويل ماگو عناد ماگو طلعه وطبه بدون علمي گلشي تسوينه اول شي لازم تنطيني خبر واذا رجعتي سويتي الگتلج عليهن راح تتحاسبين خلينه حبايب ما اريد اضوج ماشي حبيبتي

_بس أني ما سويت شي غلط حتى هيج تضوج انتَ اول وأخر لازم اَْرجع للبيت وانت تعرف أني راح أرجع

_لا ما ادري راح ترجعين وما گتيلي لو أدري ما أعوفج ترجعين وحدج

_ مو وحدي عمتي وياي

_ حتى لو عمتج وياج ما اقبل اطلعين بدون علمي

_ تمام فهمت أگو شي نسيت تگوله

_حظريلي ريحانة راح جي اخذها للمرگز

_يا مرگز ؟

_مركز علاج طبيعي قابل تبقهةى هيج

_ لا هسه ما اگدر اخذها عوفها هاي الفتره

_ ليش أعوفها الوقت جاي يمشي عليها والتأخير
مو زين عليها

_ مو المرگز يريد فلوس هواي واني ما عندي حالياً

_ هاي المره حجيتيها مره ثانية لا تعيدينها مفهووم

_ ميصير أنتَ تاخذها شذنبگ تصرف هيج مصاريف

_ ذنبي ريحانتي صارت بنتي وحالها من حال مسرة وغصباً عليه اعالجها واگومها على رجليها وهسه گافي حجي گومي حظريها

_ شنو بس هي تروح

_ أني وياها

_ اعرف بس أقصد اني ما اروح شنو

_ شتسوين رايحه غير اني وياها

_ حتى لو انتَ وياها ما اگدر گلبي يبقى يمها

_حظري نفسج وياها ما دام هيج بس ماگوو جبة
من هسه

_شنو ماگو جبة لعد شلبس

_عباية وجواريب غير هيج ماگو ما ترحين

_ ما اعرف البس عباة بعدين اني سافره لا تنسئ

_ وانتٍ لا تنسين صرتي مرتي جبة ماگو بعد ما اعيدها واستعجلي لان راح اوصل

حجه هيج وسده بوجهي
عود صدگ مستحيل شلون اگمل ويا هذا مو صاحي
مبين عقده وراح يتعبني

اللّه لا يوفقگم يارب يشل حالگم مثل ما ورطتوني
لو ما انتم ما انجبرت اوافق واَْگسر ظهري
گمت العمتي حجيت الها

گالت شگو بيها الستر حلو وهو من حبه الج
ماَ يريد احد يشوفج

_ اول شي اني ما عندي عباة وثاني شي ما اعرف
البسها اتبهذل

_تتعلمين شوية شوية ، وهسه لبسي عباتي روحي بيها ومن تجين عود اروحلج للسوگ اجيبلج عباية

ما رديت عليها عفتها وگمت واللّه ولا البس شنو بگيفه بعدنا ما بدينه واشتغلت رحمه الله وگام يتحگم ويتأمر

نص ساعه واَْجه باوع عليه بس ما حجه شي يمگن لان عمتي گاعده ما اَْعرف ضماها الي
شال ريحانه وطلع شغل السيارة وريحانة بحظنه
گاعده واني بصفه
ما حجه اي شي ابد خلص الطريق گله ساگت ما فتح اي موضوع بس مرگز بالطريق اباوع عليه ضايج مو بس ضايج طافره الدنيه من عينه

ردت اغير شويه من الموضوع گتله
انطينياها تعبتك اَْقصد على ريحانة لان طول الطريق بحظنه حجيت هيج لو ابتليت على عمري جان منتظرني بس أفتح موضوع ويِا
انهد بيه هده بحيث حار شنو بحجي وشنو يگول

_گتلج العناد بطليه لو ما گلت گلت صيري أدميه لو ما گلت وتالي وياج وتاللليييي براء راح اعيدها عليج للمره الاخير الشغله الگولج بطليها تبطلينها قسماً باللّه العلي العظيم اذا ما بطلتي هذا عنادج راسج اگسره

_ ليش تعيط ما عندي عباة وثاني شي أني ماأعرف البسها

_تتعالمين عليها شويه شويه تتعلمين وهسه اشتريلج براوي حبيبتي ما اريد شي منج يبين اغار عليج من روحي واللّه ما يهون عليه يشوفج احد
تردين تگولين معقد مخبل حقنه براحتج شتگولين گولي

_ بس هيج ميصير

_ يصير يصير بس لبسيها مره مرتين راح تتعودين عليها

سكتت ماجاوبته بقيت دايره وجهي على الشارع
اباوع احنه بالگاظمية

_ أنتَ مو گلت جاين للمرگز شو جبتنا للكاظمية

_ هو المرگز بالكاظمية خلينه نزور اول شي وراها نروح للمرگز يلا نزلي

نزلنا بالگراج وهو شايل ريحانة بيد والايد الثانية لازمني بيها وگل شويه يعصرها حسيت بيه خايف لا اضيع منه وصلنه للتفتيش الاول
گال فوتي منا تلكيني واگف انتظرج

دخلت للتفيش وهو وريحانة راحو من جهه الرجال
طلعت لگيته منتظرني باب التفيش تمشينه شويه وگف يم محل يبيع عبي اشترالي أثنين
ورجع سأل الولد عندك نقاب

رفعت راسي متفاجأه عود صدگ يحجي هذا
تقربت منه وحجيت على كيف

_ شتسوي بالنقاب

ما رد عليه اخذ النقاب والعبي وتحاسب
ويا الولد ولزم ايدي ومشى صرنا قريباً يم باب الدخول يعني اخر تفتيش وندخل للأمام

_ يلا حبي هاج هاي عباتج وبوشيتج لبسيهم وطلعي

_ تريد تبوشني شنو

سكت شويه وراها گال

_اي اريدج تلبسينهم هنا يم الأمام

_ من كل عقلك لا تخبلني وين تريد توصل بالضبط

_ الستر حلو ليش معترضه

_ ما معترضه على الستر اني بس مو هيج العباة وبيها مجال بس مال تجيب نقاب وتلبسنياا هيج هواي

_ ما اريد احد يشوفج غيري

_ ما اريد ما اگدر

_ شنو الما تگدرين عليه

_ ما اگدر البس النقاب ما اريده

_ مو بكيفج دخلي لبسي وطلعي يله تأخرنا

_ مو غصب هو ما البسه ما اريد

_ براء لا تشلعين گلبي والله اغار عليج والله تعبت ولج اخاف لا احد يشوفج غيري حبيبتي انتِ ما اتحمل واحد يشوفج انتِ حلوة والعيون عليج والزلم عيونهم مالحه والله اموت اذا واحد شاف عيونج وبياضج هذا براء اغار اغار ولج اغار عليج من روحي لا تعبيني مره و حده سمعي الكلام

يتبع ،،،،

ياسة 🌿

هذا البارت كله هدوء بمناسبة العام الجديد😁
كل عام وأنتم بالف خير سنة وبركة عليكم
ان شاءالله