شـــوق.... حصري على الواتباد فقط

٣٣

#شوق
بارت٣٣
#أسماء_عبد_الهادي
__
استعد بترتيب حقيبته وأحكم غلقها لتأتي أمه وتقول
_ ها يا على خلصت شطنتك ولا اجي أساعدك يا حبيبي
_ لا يا ماما خلصت الحمد لله تسلمي حضرتك جاهزة علشان نرجع مصر
هتفت هي باشتياق
_ اكيد جاهزة مصر وحشتني اوي ،وحشني بيتي وكل ركن فيه

ليغمز لها على ويقول بمكر
_ البيت بس اللي وحشك ؟

ضحكت هي بخفوت
_ عايز ايه يا على اه البيت وحشني بكل ذكرياته اللي فيه، كل شبر فيه كان بيفكرني بباباك حسام اللي مش بيغيب عن بالي لحظة ، بس في البيت بحس ان روحه معايا في كل حتة فيه، بتونس وحشة قلبي من غيره، حسام كان حياتي يا علي، مشي وسابني بسرعة اوي ملحقتش اشبع منه

__
جلست شوق مع أخويها مهند وأمير وقالت بعد أن ابدلت ملابسها
_يا شباب أني عايزاكم  في حاجة مهمة
ليهتف مهند وهو يغمز لها
_لا استنى ايه الشياكة دي، ده كل طقم أحلى عليكي من اللي قبليه

ابتسمت شوق وقالت
_طبعا يا ولاه ديه أقل شىء عندي ايش عرفك انت

انفجر مهند وأمير في الضحك
لتهتف شوق بجدية
_المهم دلوك أني عايزة واحد فيكم يوصلني مشوار اكده
قال مهند بتهرب
_لا انا مليش مزاج أخرج ... عندك أمير وديها يالا المكان اللي تحبه

ليقول أمير
_لا أنا بقترح نجيبلك عربية خاصة بالسواق علشان وقت ما تحبي تخرجي تخرجي براحتك مترتبطيش بحد فينا

راقت لمهند الفكرة
_فكرة بردو
_لاه بقولك ايه عربية ايه وسواق ايه واني عندي ٣ شحوطة اللهم بارك يعني، قوم يالا انت وهو فزوا واحد منكم يوصلني انجزوا

هتف مهند بانزعاج
_شحوطة الملافظ سعد يا شوق
_سعد ديه صاحبك، قوم يالا وصلني يلا
_طب افهم بس رايحة فين
_ملاكش صالح ،اه من حق المحمول بتاعي لساته في داري هناك في البلد وكنت عايزاكم تشيعوا لحد يجيبوا علشان أعرف اطمن على البنات

قال أمير
_لا حتة الخردة ده انسيه انا هجيبلك  أيفون أحدث إصدار

_أعمبله ايه ديه يا أمير الأمرا انت، أني اللي كان معايا كان بيقضي الغرض ألو والسلام عليكم عايزاشي أني أكتر من كدا ايه

ضحك مهند
_لا انتي بجد مشكلة، يعني عايزة تفهميني انك ملكيش في المديا خالص

_عارفاها يا خويا جاتها البلا هي اللي جابت الناس لورا، بلا هم ، خدنا ايه من المديا غير تضيع الوقت يا ولا....قوم وصلني يا أمير الأمرا شكل أخوك مكفاهوش نوم طول الليل والنهار هينام كمان وهو قاعد

ضحك مهند
_والله فعلا عايز انام مش عارف ليه
_نام يا قلبي وارتاح ربنا يهدي سرك

_شوق بقولك مفيش أي أخبار عن ميار بالله عليكي طمنيني
_ما اني كنت رايحالها يا ولا

هنا نهض أمير فازا من مكانه
_ايه... بتهرجي يا شوق وكنتي عايزة تروحي عندها من غير ما تقوليلي، استني دقيقتين بالظبط هجهز وهاجي معاكي.

لوت شوق شفتيها وقالت
_شوف الواد اللي كان عاملي فيها منعوس، دلوك دب النشاط في عروقك، تعالى اهنه يا خويا وبلاش محن... انت عايز تاجي معايا ليه بقا ان شاء الله
_ايه يا شوق عايز أشوفها وحشتني

_اتلم يا واد انت بدل ما ازعلك، اساسا ميار يا حبة عيني اتنقلت المصحة تتعالج هناك ...و بعدين انت بالذات اخر واحد ميار ممكن تشوفه في الوقت الحالي فاهمد اكده ها

_عارف انها في المصحة عساف قالي، بس كان عندي أمل انتي تدخليني معاكي اشوفها

_أمل ماتت مفقوعة، انت عايز تجنني يا ولا بقولك انت اخر واحد ممكن تشوفه دلوك

_يا شوق ما انا هطلب منها تسامحني والبركة فيكي بقا

_مش دلوك خالص يا مهاند لما تقوم بالسلامة من اللي هي فيه، يكون انت كمان قمت بالسلامة من اللي انت فيه وفقت لنفسك ولحالك ومستقبلك

_يعني اعمل ايه
_تبطل الشرب واللي كنت بتعمله يا مهند

_صعب يا شوق انا اتعودت عليه
_كل حاجة بالتدريج واحدة واحدة وبالاصرار هتقدر انت بس حط الموضوع في دماغك واستعين بالله ديه لو عايز تتغير وميار تسامحك يا ولا

طالعها مهند بانزعاج فما تطلبه عسير عليه

لتهتف شوق بحنق

_ما تزقرليش أكده يا ولا... وقوم يلا وصلني

ليهتف مهمد مدعيا التعب
_اه ضهري يا شوق، اه يا دماغي هقوم انام يمكن يرتاح شوية

_ياولا شوف يا أمير السهتنة بتاعة أخوك شوف علشان يتهرب ،وساعة ما جبت سيرة ميار، قام وفز زي الرهوان

_صوريهالي يا شوق والنبي
_قول لا إله إلا الله يا ولا متقولش والبني تاني من حلف بغير الله فقد أشرك
_لا إله إلا الله هتصوريهالي!

_لا اني هصور قتيل دلوك، هي فين البلغة بتاعتي أهي.

وأمسكت بالحذاء في يدها واستعدت للتصويب تجاه مهند الذي نهض من مكانه مبتعدا عنها وهو يقول بتحذير
_شوق أنا بحذرك تيجي فيا
ألقتها شوق نحوه وهي تقول
_ليه كني هخاف منك يا ولا.. ده اني هزقلك فالفردة التانية دلوك قال صوريهالي قال
_اه صح انتي مش معاكي موبايل ،... خدي موبايلي اهو

_لاه انت الظاهر فعلا تستاهل الفردة التانية

_خلاص خلاص ، يا باي عليكي انا طالع انام
_اطلع يا خوي نوم الظالم عبادة
_شوق هزعلك
_تعالى لو كنت هتقدر
_ما هو المصيبة اني مبقتش اقدر ازعلك، عملتي ايه فيا يا مجنونة انتي

وأمسكها من عنقها بمزاح، لتهتف شوق مدعية انها تصرخ
_الحقوني يا خلق هناك تور هايج في الأجواء يحوم حولي يريد سحب الهواء من مجرى تنفسي و..

ليصيح مهند بها
_ايه افصلي ده انتي صداع... امير خدها وامشي من هنا يخربيها صدعتني

_هتخرب بيتي ليه يا ولاه أكتر ماهو مطربق على بعضه وكاتم نفسي كيف ما يكون غريب بيه أبوك حاشرني جواه وقاعد فوقيه ومرحرح أوي في القعدة
حرك مهند رأسه وصعد لغرفته والابتسامة على وجهه وهو يسمع شوق تقول
_هم بينا يا أمير، حاكم أخوك مهاند ديه لكاك اوي والدنيا هتليل عليا اكده
______
بقلمي أسماء عبد الهادي

طالعته هي بنظرات جامدة غير مناسبة لتلك النظرات الهائمة التي يطالعها بها وتحدثت بهدوء
_خالد من فضلك أنا جيت علشان عايزة اتكلم معاك في موضوع مهم، بس الأول أدخل اطمن على ميار بعد اذنك.

ارتاب من طريقة حديثها الجاف معه لكنه على أي حال أفسح لها المجال لتدلف لأخته
_أكيد طبعا اتفضلي
_الدكتور سمح بالزيارة مش كدا!
_ايوة ادخلي هتفرح بوجودك أوي زي ما انا فرحان كدا وأكتر كمان.

تنهدت فداء بهدوء

ثم طرقت الباب ودلفت
ما ان رأتها ميار حتى اتسعت ابتسامتها
_فداااء
عانقتها فداء باشتياق بالغ
_وحشتيني اوي يا ميار بجد، الف سلامة عليكي يا حبيبتي
_وانتي أكتر يا فداء
_عاملة ايه يا حبيبتي وازي صحتك
_كويسة، بس زهقت من هنا وعايزة اروح يا فداء
_معلش اتحملي هنا العلاج أفضل وهيكون بشكل مكثف واسرع علشان تخرجي لينا بالسلامة وتعيشي حياتك بقا
_يارب يا فداء يارب، ادعيلي علشان انا خايفة افقد أخر ذرة صبر عندي

_يا حبيبتي انا عارفة انك شوفتي كتير بس معلش، ربنا كبير اوي... تعرفي شوق دايما لما اكلمها تقولي
هون عليك فكل الأمر ينقطع وخل عنك ضباب الهم يندفع.. فكل هم له من بعـده فـرج.. وكل كرب إذا ضاق يتسـع ...إن البلاء وإن طال الزمان به الموت يقطعه أو سوف ينقطع.

ابتسمت ميار وقالت
_هي فين صحيح مختفية ومش سألت فيا
تنهدت فداء وقالت
_اعذريها ظروفها متلخبطة شوية

وبعدها ضحكت وقالت
_ استنى خليني احكيلك عملت فيها ايه ومتأكدة انها لو شافتني دلوقتي هتبهدلني

دلفت هي وهي تقول مدعية الشر
_من ناحية هبهدلك فأني فعلا هعمل اكده ومش هتوصى ابدا، تعاليلي اهنه يا حلوة احنا لسه متحاسبناش على اللي عملتيه فيا
هتفت الفتاتان باسم شوق فرحتنان بوجودها
_شووق حمدا لله على السلامه
ابتسمت لهما شوق وعانقتهما بحرارة
_وحشتوني اوي يا بنات وربنا.

__
بعد انقضاء الزيارة واطمئنان شوق وفداء أن ميار قد خلدت للنوم

خرجتا سويا خارج الغرفة لينهض خالد كم مقعده وهو يقول
_فداء تعالي اروحك بعربيتي

لتهتف شوق وهي تلوي شفتها بحنق
_كني هوا قدامك مش شايفها ماشية معاي

_انا اسف يا شوق، اصل ا...
_خلاص تقبلته انت هتحكيلي قصة حياتك

طالعها خالد باستغراب من اسلوبها
_لاه متبصليش اكده أني أصلا مستحلفالك على اللي عملته في البت فداء وضربك ليها ،  بس هقول ايه تور ومصاحب تيران فمش هلوم عليك....ديه غير اسلوبك مع أختك اللي كان كله غلط في غلط

فتح خالد فمه ليعترض لتقول شوق
_اهم شىء في العلاج النفسي ... هو الدعم النفسي... وانت قدمت لأختك كل شىء لعلاجها، الا الدعم النفسي ،لما خبيت عليها من الأساس طبيعة مرضها، ده غير بعدك عنها وانك مكنتش جنبها بالشكل الكافي كل ديه كانوا اسباب كافية في تأخر علاجها وتأزم حالتها، اختك ببساطة مكانتش محتاجة غير انها تلاقي اللي يعوضها عن سنين حبستها ، لكن جيت انت بجهل منك وحبستها زيادة وياريتك فهمتها سبب حبستها ايه، لاه ده انت اوهمتها وحملتها هم ذنب هي ملهاش أي يد فيه، ففضلت طول الوقت بتأنب  نفسها عليه

هتف خالد ليبرر ما فعله
_اا انا عملت كدا علشان امنعها من الخروج علشان حالتها

_عارفة انك غرضك خير لكن التنفيذ كان غلط، نفس الشىء اللي وقعت اني فيه لما أخدت ميار عندي وخبيت عنيك مكانها وكانت الضحية هي بهدلة فداء وضربها، وكانت العلاقة بينك وبين اصحابك هتتهدم، واني بعترف بغلطي، الاعتراف بالغلط مهواش عيب أبدا محدش فينا مبيغلطش

ضم خالد شفتيه بأسف وقال بندم
_معاكي حق يا شوق، أنا فعلا غلطت اوي في حق اختي وفي حق فداء انا أسف جدا يا فداء واسف ليكي كمان يا شوق

لتستغل فداء تلك اللحظة وتقول ما كانت تود اخباره به
_علشان كدا يا خالد انا كنت عايزاك تصلح غلطك وتطلقني

تفآجئ كل من شوق وخالد بما قالته فداء
لتهتف شوق بضيق
_يخيبك يا فداء بتقولي ايه يا بنتي بس

أما خالد فقال
_فداء انتي بتقولي ايه، انتي نسيتي اللي قولته ليكي

_لا منستش يا خالد بس انا فكرت كويس ف الموضوع ده وده كان أنسب حل انا شايفاه

صمتت شوق لتتركهم يحلون الأمر بأنفسهم وتنحت جانبا قليلا

ليقول خالد وهو يهتز بانفعال
_حل ايه ده، الحل انك تسبيني بعد ما حبيتك، بعد ما علقتينا بيكي عايزة تمشي وتبعدي كدا بكل بساطة

هتفت فداء بحنق
_محدش ضربك على ايدك وقالك حبني او اتعلق بيا

_ماهو مش بكيفي الحب مش بكيف حد يا فداء، الحب لما بيجي مش بيستأذن ومحدش بيعرف امتا وفين وازاي زي الموت بالظبط، وانا حبيتك ومعرفش امتا وازاي

_ودي مش مشكلتي يا خالد دي مشكلتك انت

اغتاظ من ردها ولا مبالاتها لذا هتف بعند
_طب ايه رايك يا فداء مش هسيبك  ومش هطلقك وان كان عاجبك بقا
_خالد انت بتقول ايه
_اللي سمعتيه وده آخر كلام عندي با فداء.

ابتسمت شوق لما تسمع وتأكدت أن خالد يكن حبا صادقا لفداء

أما فداء فقالت بغضب شديد
_يبقى بينا المحاكم يا خالد وانا مش هسكت

اتجه خالد لمقعده وقال بحنق
_اعملي اللي تعمليه مش هتخلصي مني بالساهل خليكي عارفة ده كويس

طالعه فداء بغيظ وهي تركل الأرض بقدمها

لتقترب منها شوق وتسحبها من يدها
_تعالي يا بنت المچانين انتي راخرة تعالي... استاذ خالد دير بالك على أختك ..السلام عليكم

سارت فداء قليلا ثم ابعدت يد شوق عنها وقالت غاضبة
_سيبيني يا شوق انا على أخري من اللي بيقوله.

قالت شوق بجدية  وهي تسحبها مرة أخرى ليسيروا لخارج المصحة
_ توقيتك كان غلط يا فداء .. اديكي شايفة الوضع اللي خالد فيه، جاية انتي كمان تزودي همه وضيقته، كنتي عايزاه يقولك ايه يعني، ديه بدل ما تأخدي بيده وتطبطبي عليه وتداوي جراحه وتطيبي خاطره بكلمتين، ديه شكله يا عيني ما بينامش الليل من قلقه على اخته شايفة وشه اتغير ازاي، مهمل شركته وماله وقاعد جارها ندمان على كل حاجة عملها بطيش منيه تقوم تيجي تشيليه هم كمان فوق شيلته !!

تنهدت فداء بضيق وصمتت ولم تستطع أن تعلق

لتضربها شوق وهي تقول بمزاح
_المهم تعالي اهنه لما نتحاسب دلوك، اني من النهاردة مش هأمنك على سر نهائي

ابتسمت فداء
_طب تنكري ان اللي عملته ده عين العقل؟
_بصراحة انتي عملتي فيا معروف اني عمري ما هنساه أبدا، مكنتش اتوقع يا بت رد فعل اخواتي وفرحتهم بيا دي أبدا
_هو انتي حد يعرفك وميحبكيش وبتعلق بيكي يا شوق

مطت شوق شفتيها وقالت بحنق
_اومال غريب ابوي حاطط غمامة عل عنيه علشان ميشوفش اكده ولا ايه،  ديه لما بيشوفتي كنه شاف عفريت يا بت

أرادت فداء أن تخرجها من ضيقها فقالت
_كبري، بس ايه الشياكة والجمال ده كله

_ايه رأيك يا بت يا فداء، ديه زوق اخواتي، اولاد الإيه طلعوا مش ساهلين أبدا ، عرفوا مقاسي بالظبط واللي يليق عليا من غير ما أقيس وادور

ضحكت فداء وقالت
_ربنا يسعدكم ويهنيكم ببعض يا شوق انتي طيبة وتستاهلي كل خير .
___
ظل خالد يشعر بالأختناق من كلمات فداء ولتكرار طلبها بالطلاق وكأنها بذلك تضع حبل المشنقة حول عنقه وتحاول شده رويدا رويدا حتى تتفنن في تعذيبه .. ظل يتنهد مرة تلو الأخرى ليخرج ما يختلج بصدره من غضب بكيف يتركها وهي مهجة فؤاده الذي أنارته بعد عتمة، وأيقظته بعد غفلة وهو يقول متوعدا بلهيب العشق
_مش هسيبك مهما قلتي ومهما عملتي يا فداء، ما هو انا لو سبتك هعيش ازاي حد بيعيش من غير قلبه

__
في السيارة وبينما كان أمير ينتظر شوق لحتى تعود كي يعيدها للفيلا مرة اخرى
اذ على رنين هاتفه
كانت تلك آيات التي كانت تحاول مهاتفة شوق كثيرا لتعلم منها سبب مغادرتها البلد فلقد أخبرتها أمها أن شوق ليست موجودة في دارها ، وعندما لم ترد شوق على اي من اتصالاتها قررت مهاتفة أمير وسؤاله عليها فلربما عادت اليهم فهي لا تعرف أقارب لها غيرهم
ما ان رأى أمير اسم المتصل على الشاشة حتى ابتسم تلقائيا ببسمة انفرجت لها أساريره وانشرح لها صدره وقال في نفسه
_آيات بتتصل
ظل على وضعه شاردا في الاسم ينظر للشاشة بابتسامة بلهاء وبعدة ثواني فاق من شروده واستجاب للاتصال وتكلم بحب وبشكل تلقائي
_أنا مش مصدق نفسي

لتتحدث آيات بحرج شديد فما كانت لتفعلها سوى انها كانت شديد القلق على شوق
_ اا استاذ أمير أنا أسفة للإزعاج
_ لا إزعاج ايه دي أحسن حاجة حصلتني النهاردة هو اتصالك

بعدها انتبه لحديثه وعلم أنها ستغضب منه فقال
_ احم قصدي يعني ازيك يا أنسة ايات

_ معلش يا أستاذ أمير أنا كنت بسأل عن أبلة شوق مجتشي عنديكم لانها اختفت فچأة من البلد ومحدش يعرف عنها حاچة ولا بترد على موبايلها

رد أمير بهدوء
_ اطمني شوق معانا وكويسة زي الفل
فرحت آيات واطمأنت نفسها
_ صحيح يا أستاذ أمير!!!، طب الحمد لله طمنت قلبي والله

_ احنا عرفنا الحقيقة خلاص وشوق بقت في بيتها
كادت آيات أن تقفز من السعادة
_ قول والله، ياربي ديه أحسن خبر سمعته في حياتي
_أنا اسف أنا مأخدتش بالي إني أقلك لو كنت أعرف انك هتكوني قلقانه عليها كدا مكنتش اترددت ثانية وكلمتك
_ أني متشكرة أوي يا استاذ أمير

_ مابلاش أستاذ دي هزعل منك كدا

تجاهلت قوله وقالت
_ طب ممكن أكلمها ولا حضرتك مش في الفيلا؟

هتف أمير بمكر فهو يود أن يراها
_ تعالي ليها أفضل ، خلاص البيت بيتها ومرحب بأصحابها في اي وقت

فكرت آيات قليلا ثم حسمت أمرها لأن تأتي إلى شوق لتطمأن عليها
_ ماشي ه‍جيلها
_ بجد ياااه انا مش مصدق انك جاية... قصدي شوق مش هتصدق انك جاية
ردت آيات باقتضاب
_السلام عليكم يا استاذ أمير.

أنهت الاتصال ليهتف أمير بتنهيدة
_ بس لو تفكيها شوية في الكلام معايا، علطول بتتكلمي بجدية اوي

لينتبه لتلك التي تطرق على زجاج النافذة
_ واد يا أمير الأمر.. سرحان في إيه ديه يا خواتي

اعتدل أمير في جلسته وطالع أخته
_ شوق انتي هنا من إمتا
لوت شوق فمها بتبرم
_ افتح يا خوي اللي أخد عقلك

نظر أمير حوله ليجد شوق تقف مع فداء ، فترجل من سيارته ورحب بفداء
_ اهلا يا مدام فداء ... هتركبوا اتفضلوا
_ معلش يا أمير يا حبيبي هنتعبك معانا
_ تعبك راحة يا شوق اركبوا، اتفضلي يا مدام فداء
ابتسمت له فداء
_ شكرا يا أمير
_ ها ناويين تروحوا فين
_ أنا هروح لاني كنت في الشغل وجيت على هنا وهقابلك بكرة ان شاء الله يا شوق

_ تيجيلي يا فداء أني لسه مشعتش كلام معاكي
ابتسمت لها فداء
_ ولا انتي صراحة يتشبع من القعدة معاكي اوك حاضر هجيلك.
__
بعد حوالي ساعة وصلت آيات لفيلا أولاد غريب في ذلك التوقيت كانت شوق قد وصلت هي وأمير الفيلا،ولم يخبر أمير شوق بأمر مجىء آيات أراد أن يفاجئها بالأمر.

صادف وقت مجىء آيات بعودة عساف من الخارج، فعندما شاهدها ترجل من سيارته وألقى بالمفاتيح للبواب
_دخل انت العربية

وتوجه هو تجاه آيات التي ما ان رأته حتى اكفهر وجهها وقالت في نفسها
_يا باي على الحظ ميجيش الا وألاقي أبو غضب ده في وشي.
ليهتف عساف وهو على نفس حدته المعهودة معها
_ انتي تاني

فتحت آيات فمها وهمت لتتحدث بانزعاج
_لو مش عايزني أدخل أني هرجع من مكان ما چيت
لكنها سبقها وقال مبتسما
_لا على فكرة أنا كنت بهزر معاكي، انتي تنورينا طبعا

رمقته بحدة وتخطه لتتقدم للأمام  دون أن ترد عليه

ليستوقفها عساف واقفا أمامها ومانعا اياها من العبور
_ استنى يا آيات، آيات مش كدا
نفخت آيات بحنق
_اللهم طولك يا روح، عايز ايه يا أخينا تاني

_ايه يا بنتي اقفي انا بكلمك
_وأني مش عايزة اتكلم معاك عديني يا اخينا انت
رفع شفته بانزعاج
_أخينا أنت؟ ماشي عامة هعديها
_تعديها ولا متعديهاشي ملاكش دعوة بيا.
_لا احنا اتجرأنا أوي، مكنش ده بيكون ردك ولا أسلوبك في الأول

هتفت هي بانزعاج
_انت عايز ايه يا جدع انت، من فضلك أني عايزة أقابل أبلة شوق علشان ألحق أروح
_لا انتي مش هتقابليها الا لما تشيلي التكشيرة اللي في وشك دي.

زادت تقاسيم وجهها انزعاجا وهي تطلع له
ليقول هو ببرود
_ أنا بقولك شيلي التكشيرة مش زوديها بس تعرفي انتي حلوة في كل حالاتك

اتسعت أعين آيات وهمت لتغادر المكان عازمة على ألا تعود إلى هنا مرة أخرى ولتقابل شوق في أي مكان آخر .
ليضحك عساف وهو يقول بتسلية
_ خلاص خلاص صعبتي عليا انا هدخلك لشوق تعالي اتفضلي

لم ترد عليه آيات وتابعت طريقها مبتعدة عن الفيلا
ليضحك أكثر وهو يقول
_ ايه يا بنتي انتي نسخة مصغرة من شوق ولا إيه وعلى فكرة ده عاجبني فيكي جدا عامة يا ستي، أنا اسف والله مش قصدي أضايقك انا بس حبيت اعتذرلك عن اسلوبي الوقح معاكي قبل كدا، لكن خلاص دلوقتي عرفت انك صاحبة أختي فأنا حقيقي بعتذر

لتقف هي وتهتف بحنق
_ ويعني علشان صاحبة اختك تعاملها باحترام انما بنات الناس التانية تكلمها بقلة ذوق

_ لا لا مش الفكرة خالص ، الحقيقة شوق كانت مجننانا هنا وطبعا كنا مستغربين تصرفاتها لاننا منعرفش مين هيا، علشان كدا مكنتش طايقها ولا طايق حد هي تعرفه، فمعلش جت فيكي انتي ، حقيقي بعتذر

تنهدت بهدوء
_ ماشي حصل خير يا استاذ
_ طب تعالي اتفضلي هوصلك ليها

_ طيب اتفضل قدامي
_ لا طبعا ليدز فيرست
_ لاه الصح الرجال تسبق الأول، اتفضل وأني ورا منك علشان أعرف الطريق

رآهم ذاك الذي كان يقف على نار منتظرا إياها على أحر من الجمر، يود لقياها فيروي ظمأ قلبه بطلتها التي تشبه البدر في ليلة اكتماله، ورغم فرحه برؤيتها إلا أن نار الغيرة قد نشبت في قلبه كما تمسك النيران في الهشيم فضيق أعينه بغضب بتوعد لها
_ والله عال واقفة كل ده بتحكي مع أخويا عساف، عساف اللي كل ما يشوفك يضايقك بكلامه، معقول دلوقتي عرف يعلقك، لا ده يبقى يومك مش فايت معايا.

اسرع في خطواته إلى أن اقترب منهم فما ان رآه عساف حتى قال
_ أمير فين شوق

طالع أمير آيات بانزعاج وقال
_ قاعدة ف الليفنج، تعالي اوصلك ليها

ليتكلم عساف
_ اتفضلي يا أنسة ايات ،البيت بيتك

قالها وانطلق هو ليصعد لغرفته

كانت شوق تجلس مع مهند
أمسك مهند يد شوق وهو يقول
_ يلا بقا يا شوق متبقيش رخمة وطمنيني عليها
ابعدت هي يدها وقالت
_ قلت لاه يعني لاه، قوم يالا من اهنه متبقاش زنان اكده، قلتلك هي كويسة عايزني اقولك ايه تاني أكتر من كدا

هتف بحنق
_ انا كدا مرتحتش يا شوق

دفشته في صدره بخفة وهي تقول مدعية الجدية
_ وبعدهالك يا مهند انت عايز ايه من البنت بالظبط
عاد مهند ظهره للخلف ورفع رأسه لأعلى وقال بهيام
_ مش عارف يا شوق أنا عايز ايه، بس اللي أعرفه ان ميار شغلت جزء كبير اوي من تفكيري، واحتلت مكان كبير في قلبي، ده اذا محتلتوش كله، انا الظاهر كدا حبيتها يا شوق ، أنا حبيتها اوي
نزعت شوق ما في قدمها وأشارت به
_ وايه كمان يا دنجوان عصرك وزمانك  ، اشجيني
اخفض مهند بصره لأخته ليجدها ترفع له فردة الحذاء ، فيعتدل مهند في جلسته ويهتف مدعيا الضيق
_ ايه بس يا شوق، بلاش تهور ونزلي اللي في ايدك ده ،الحق عليا اني بعترفلك بمشاعري .. طب انا غلطان يا ستي مش هحكيلك حاجة تاني

قالها ونهض من مكانه ، لتضع شوق يدها على كتفه
_طب خلاص متزعلش حقك عليا أني اسفة

_لا أنا زعلان ومش هحكيلك حاجة تاني على فكرة
_يا واد افهم، ميار داي اني بعتبرها زي بنتي الصغيرة وانت عمال تحكي وتتحاكى عنيها فأني كأي أم طبيعية غرت على بنتي
رفع مهند حاجبه وقال بانزعاج
_ايه هنشتغل شغل حموات من دلوقتي لا كدا هنزعل من بعض ثم ان انتي معايا ولا معاها

_لاه يا خوي معاها

_بقى كدا
_هكدب عليك يعني، بس بردك انت حبيبي يا ولا
ابتسم لها مهند وجلس ثانية

في تلك اللحظة وصل أمير وآيات
ليقول أمير
_شوق عملتلك مفآجئة هتعجبك

هتفت قبل أن تنظر لمن يقف جوار أمير
_تعالى يا أمير مفآجئة ايه داي.

وما إن رأت آيات حتى نهضت من مكانه
_بتي الرقيقة الحبابة ،يا أهلا وسهلا يا قلبي

ليهتف مهند باعجاب
_شوق مين الم....

وقبل أن يكمل مهند كلمته وجد من تلكزه في بطنه بكوعها
_اتلم يا زفت وطرقنا انت واخوك يلا.

هتف بانزعاج
_اااه يخربيت اللي يزعلك يا شيخة
_يلا طرقنا عايزة اعقد مع آيات حبيبتي شوية

_طب ما تبقا حبيبتنا كلنا ونقعد كلنا سوا
هتفت شوق بانزعاج
_وربي ما أعبد لو مخفتش من وشي دلوك ل...
ليسحب أمير أخيه من أمامها وهو يضحك
_تعالى يا ابني انت بتقول ايه انت كمان
ليهتف مهند بتبرم
_انتوا الخسرانين دي القعدة كانت هتبقى حلوة اوي

تفآجىء مهند بفردة الحذاء تعرف طريقها لظهره فقال بتألم
_اااه .. بقا كدا يا شوق وقدام صاحبتك العسل دي

ضربت شوق يدا بيد وقالت وهي تسحب أيات لتبتعد من المكان
_ مفيش فايدة أني هاخدها ونقعد في اوضتي

فيقول مهند
_ لا خلاص خلاص خدوا راحتكم، واطلع انا زي الحزين البائس اقعد لوحدي في اوضتي

_ وربي ما راچعة عنيك يا مهاند بس افضالك بس

ليسحبه أمير بانزعاج هو الاخر
_ امشي يا بني جبتلنا الكلام.. دلوقتي البنت تقول علينا ايه هي كمان

_ ايه يا بني مش فاهم انا قلت ايه بس ده انا عايز ارحب بالضيفة

_ متشكرين ياخويا لخدماتك يلا قدامي
_ طيب يلا لأحسن لو فضلت لحظة شوق هتولع فيا

ضحكت شوق واشارت لآيات
_ شايفة اخواتي واللي بيعملوه فيا

ضحكت آيات وقالت
_ شوفت يا ابلة شوفت
_تعالي يا بت اقعدي ده انتي نورتيني ايه المفآجئة الحلوة داي.. عرفتي كيف اني أني اهنه
_ أني رنيت عليكي كتير أول ما أمي قالتلي انك مش في البلد، قلبي اتوغوش  عليكي فكلمت أمير اخوكي وقالي انك هنا.
رفعت شوق حاجبها وقالت باستغراب
_وانتي عرفتي رقم أمير منين يا حلاوتهم انتي كمان
توترت آيات وقالت بخوف لكي تبرر الأمر
_والله يا أبلة شوق استاذ أمير لما انتي رجعتي البلد طلبه مني علشان لو عايز يوصلك حاجة معايا واني معاودة البلد

هتفت شوق بمكر وهي تتوعد لأخيها أمير وقالت في نفسها
_ اه يا حنين انت كمان يا أمير ،بس لما افضالك انت راخر، بقى بتحاول توقع البنية انت كمان عايزين ايه يا اولاد غريب

لاحظت ايات صمتها فظنت أنها غاضبة منها لذا قالت
_والله يا ابلة شوق هي دي كل الحكاية ومن يومها متكلمناش بس اني اللي كلمته اليوم علشان اسأله عنيكي لما اختفيتي والله يا أبلة والله مش هكررها تاني

ابتسمت لها شوق وعانقتها بحنان
_ خايفة عليا يا بت يا آيات ان شالله يخليكي ليا، انا اختفيت فجأة لإن اخواتي خطفوني من البلد على حين غرة اكده
فتحت آيات فمها وطالعت شوق بعدم فهم
ابتسمت شوق وقالت
_هحكيلك يا بت اسمعي....
__
وصلا أخيرا إلى أرض مصر الحبيبة
لتقول
_ ياااه يا على أخيرا نزلنا مصر .. كل الحبايب وحشوني، تعرف ان شوق هتفرح اوي دي منتظرة خبر رجوعنا على نار
_ تعرفي اني نفسي اشوفها اوي من كلامك عنها وكلام بابا الله يرحمه عنها
_ اه يا على بابا حسام كان بيعزها جدا وبيحبها كأنها بنته