شـــوق.... حصري على الواتباد فقط

٥١

#شوق
بارت ٥١
أسماء عبد الهادي
__
استيقظت شوق من نومها باكرا ونهضت من فراشها لتتوجه للمطبخ لتعد طعام الافطار لها ولإخوتها قبل ذهابهم للعمل
لتجد آيات تجلس إلى منضدة السفرة وحولها كتبها واوراقها فابتسمت لها قائلة
_يا صباح الخير على الناس العسل
ابتسمت لها أيات
_صباح النور يا أبلة.
جلست جوارها تمسد على ظهرها بحنان
_عاملة ايه في المذاكرة يا قلبي
_الحمد لله ماشي الحال
_صاحية من بدري ولا ايه
_اه يعني تقدري تقولي منمتش من الساعة ٢
_واه يا آيات ليه اكده يا بنتي طب منمتيش الليل بطوله وصحيتي الفجر ذاكرتي ليه
_مش عارفة قلقت الساعة ٢ ومعرفتش انام فقلت أذاكر
_مالك يا قلبي ايه اللي شاغل بالك أحوالك مش عاجباني الأيام دي الواد أمير الأمرا مزعلك وأنا أقرقضلك ودانه

_بالعكس أمير أنا مشفتش في حنيته ولا طيبة قلبه زيك كدا بالظبط يا أبلة وكأن ربنا عوضني بجفاء أهلي وغلاظة أبوي في معاملتي بيكم أنتم

_طب إيه اللي تابعك يا حبابة .. افتحيلي قلبك
هنا كادت أعين أيات أن تدمع وهي تقول
_وحشوني اوي، رغم اللي شوفته هناك بس قلبي بيحن ليهم هم أهلي وعيلتي بردك يا أبلة .. صعبان عليا نفسي ان أبوي مسألش فيا من يومها ولا حدش طل عليا يطمن من وقتها.. مفيش غير البت ريهام اللي بتكلمني يوماتي وتبلغني سلام أمي ليا وساعات أمي بتكلمني وتوصيني على حالي بردك بس أني كان نفسي يشقروا عليا اهنه يا أبلة.. نفسي احس باللهفة والاشتياق في صوت أمي زي ما اني مشتقالها

وضعت شوق يدها على كتفها
_يا آيات يا قلبي انتي عارفة اللي حصل كان مأثر على ابوكي ولسه الوقت معداش كفاية علشان ينساه... وابوكي مش من النوع اللي بيروح هو لحد وانتي عارفاه... كم شهر كمان وتأخدي أجازتك ويأخدك أمير وتنزلوا تسلموا عليهم أنتوا ومعاكم هدايا ليهم كمان... هوني عليكي يا حبابة انتي.. هما خلاص اتعودوا على انك بتسافري لتعليمك فعلشان اكده صابرين وساكتين.. انما هما أكيد اتوحشوكي ونفسهم يشوفوكي ويأخدوكي في حضنهم كمان... متفكريش كتير في الموضوع ديه ومتسمحيش لحاجة تزعلك.. افرحي يا بت انك معانا اهنه.. واتجوزتي الحمد لله اللي قلبك مال ليه.. اعترفي يا بت مال ولا لسه ممالش

ابتسمت ايات وأخفضت رأسها بحرج
لتضحك شوق
_يبقى مال وانكفا على وشه كمان، هو حد يعرف أمير الأمرا ولا يحبوش.. ديه عسل مكرر ينحط على الجرح يطيب وانتي عسلين يا قلبي، ربنا يسعد قلوبكم ويفرحكم ببعض.. بحلم باليوم اللي اشوفك وياه في الكوشة واطمن عليكم زي فداء اكده، بس لسه غريب ابوه معرفش وخايفة يقف للواد في الجوازة وفي نفس الوقت مش هقبل ليكي بأقل من فرح كبير يليق بعروستنا الحلوة

_أني معيزاشي المشاكل لأمير، إن كان أبوه هيعمل مشكلة .. أني موافقة بأقل حاجة يا أبلة .. بس مش دلوك عايزة أخلص السنة دي على خير علشان أرتاح
_ماشي يا نن عين شوق من جوة ربنا يوفقك ويريح قلبك.. ومين عالم يمكن ربنا يحنن قلب غريب على ولاده.. ربنا كبير