شـــوق.... حصري على الواتباد فقط

٣١

#شوق
بارت٣١
#أسماء_عبد_الهادي
امتعض مهند مما سمعه من شوق
وقال بانزعاج
_شوق انتي مسمية ده بيت ها، ده شوية خشب متهالك هيقع عليكي في أي لحظة أنا مش فاهم مأمنة تعيشي فيه ازاي.

أجابته شوق بابتسامتها المرحة لتخفي ذاك الوجع الرابض في قلبها
_لو كنت لقيت غيره مكنتش سكنت فيه

هنا تألم أمير كثيرا من أجلها
ليقترب منها واضعا يده على كتفها ويضمها إليه بحنان وكأن الحال تبدل وأصبح هو الأخ الأكبر الذي يحنو ويخفف

ليهتف عساف بضيق
_ليه مقلتلناش يا شوق ليه سكتي

_مش هينفع كلام اكده ف الشارع والناس بتبص علينا ،كنت عايزة أقولكم اتفضلوا بس البيت مش قد المقام خلونا نتكلم عند المصطبة اهنه

ليرد مهند
_كلام ايه وبتاع ايه اتفضلي على العربية خلينا نرجع

_الصبر بس يا مهند، تعالي بس اكده اقعد
_شوق مهما عملتي احنا مش راجعين من غيرك
_طب اقعد تعالى اهنه

جلست على الكرسي الخشب أمام الباب وأشارت لإخوتها بالجلوس معها، أرادت أن تريهم الحال التي هي عليها لا ليشفقوا على حالها ويتأثروا بها ويأخذوها معهم فهي رأت ذلك جليا في أعينهم ما إن علموا بالأمر، إنما أرادا أن ترقق قلوبهم أن تريهم ذلك النعيم الذي هم يعيشون مرفهين فيه دون شكر لتلك النعم
_تعالوا بس اجعدوا جاري اهنه، متخافوش الدكة داي واللي قصادهم ياما ساعت من الحبايب ألف

ليتحدث أمير بضجر
_شوق احنا لسه هنقعد، نرجع الفيلا وهناك هنتكلم براحتنا

_معايزش تقعد مع أختك في بيتها يا أمير الأمرا، كنك هتستعر من أختك وبيتها انت راخر ؟

ليهتف عساف بجدية
_شوق اتكلمي ليه بابا بيتعامل معاكي بالشكل ده وليه أخفاكي عن الكل

_السؤال ديه توجهه لغريب بيه ذات نفسيه لإني هموت وأعرف الإجابة عليه

وجدت البؤس في أعينهم فنهضت باسمه وهي تقول
_هقوم أنادي أم السعد تبعتلنا كوباية شاي معتبرة، وهبقى أحاسبها بعدين لما ربنا يفرجها عليا

ليهتف عساف
_شوق اقعدي احنا مش جايين نشرب شاي.

_واه يعني مرحبش بضيوفي

_اتفضلي شوفي عايزة تأخدي معاكي ايه من جوا علشان نمشي

جلست شوق مكانها
_قلتلك أني هفضل في بيتي معززة مكرمة يا عساف، مش هستنى أبوك يطردني تاني مش هقبلها تاني.

ليتحدث مهند بانفعال
_بابا مش هيقدر يكلمك وانتي معانا متخافيش، واطمني احنا هنحط حد للي بيحصل ده

هنا اغرورقت أعين شوق بلآلىء غالية وقالت
_تعرفوا مجيتكم داي عندي بالدنيا كلها والله، أني مكنتش متوقعة انكم تتقبلوا وجودي بالسهولة دي لا وتيجوا هنا البلد علشاني، صدقوني وربي أني مبسوطة بيكم أوي