بقايا شغف

خلاف عائلي

مسرة:
اول من رفض زياد كانت امي والشغلة عكس ما توقعت تماما ..انقهرت حيل بيوم ضربتني وسحبت مني التلفون وشفتها تبجي وتلوب ورايه صح غلطت من خنت ثقتها بس هي مرت بظرف مشابه وكانت تتمنى احد يساعدها ليش صارت ضدي ...عاذرتها يمكن خوفها عليه ومقارنتها للاحداث بس نست اني ما الي ذنب بمشاعري

مر يوم والثاني واني وياها متزاعلات وانعكس هذا سلبا على علاقتها بعمو معد رجع صوتهم عالي مرات ومن يشوفوني يسكتون واضح متوترة علاقتهم كلش اني اغلس واطلع من البيت يحتاجون مساحتهم الخاصة يمكن ...

رحت يم جدتي من شافتني ابتسمت وحجت ويايه
-يسورة غابت ضحكتها !! وما ترضى تحجيلي
-ماكو شي جدة وين البنات لعد سألتها بملل ما اريد احجي ونرجع لنفس النقطة

-دعيوة بالسطح تلكيها بس ينراد نشتريلها طيور ونسویلها گولب ..هو صار العصر كعدت بالطلعة الفوك
-جدة حلوة الكعدة مرتبتها حيل كعدة وسنادين تخبل عاشت ايدهة اصلا.. وهم وين تروح خطيه خلوها من بطلت من شغلها هاي ونستها
-خليها شلنا بالشغل اليجيب حبوس ومصايب اول وتالي من تتزوج تكمش بيت رجلها وتكعد ومجيد ديريد ياخذها على نهاية هالسنة ما تطول
-هااا يعني محددين موعد بس قريب حيل هالوكت
-اي امه تكول ما ننتظر بيته كامل مكمل وهو هم يريد بساع ياخذها

بين كلامنا جفتت هي بالنص
دعاء:المن ياخذون بيبي مو حجينا
الجدة:اي حجينا لا تصيرين زعطوطة وتطيرين القسمة من ايدج شبي مجيد؟؟

دعاء:شبي جدة كولي شنو الما بي اشو عبالك ما تعرفوه انتو ..بابا وانت حتى امي هم طبكت وياكم

-هسه شرايده
-ما اريده لابن اخوج فهمي هالسالفة بس

-عاب هالحلك ولج صار ابن اخويه ... لو ما اخويه وولده الله اليعلم شنووحالج وحالنا وبعدين انت ليش ناكرة نسيتي من كابل باب السجن وكعد المن لسواد عيونج

بجت بقلة حيلة وكعدت
-جدة ما نتوالم اني وياه
- اذا على سوالفه قبل يبطل صدكي هاي لان ما مزوج واني راح اخلي ابوج يتكفله وياخذ عهد على نفسه
-هو وين ينكفل هذا جده ؟؟

تدخلت اني بينهن
-انت احجي وياه وجه لوجه وفضيها مره ثانية
دعاء:ما اريد اشوفه بعد
الجدة:ليش شوكت شفتيه انت؟؟
سألت بفضول ودعاء صوفرت وكطعت نفسها وكامت تمتمت جاوبتها بعد ما تداركت الموقف اني
-من اجتي يمنا قبل يومين جان موجود هو وعمو معد وحجت وياه كدامنا

الجدة:هااا اي لا ترحين اله دير بالج منا لما تتزوجون
كمزت دعاء من يمها

-ما اتزوجه بيبي شدنحجي؟؟
الجدة:وگرص شكو هالفزة امه تريد تجيب نيشانج هالجمعه شنكول الهم بطلنا لعب جهال هو ركصتونا انت وياه يوم اريد يوم بطلت

كامت تبجي وجدة تقنع بيها بهدوء وتسولف وياها على خصاله الحميدة مجيد ابو النسوان!! واني اباوع عليها واتحسر ريته كان نيشان حبيبي جايبه وجاي ...بين كلامي اندارت الي جدةوسألتني

-وانت امج ردت خبر للعالم
دنكت بحزن وجاوبته اي ردت
-شبيج تلطمين يمه هذا ما يصير الج محد يقبل ...وانت اللخ لا تخزيني ويه بيت اخويه لا تفشلين ابوج وتصغريه

كمت من عدهن عفتها هي ودعاء متعاركات على عمو مجيد ...

طلعت لبره كعدت بالحديقة اسمع من بيتنا صوت عياط ماما وعمو معد تفاقمت ازمتهم انفتحت الباب وطلع ركع الباب وراه بكل قوته ...ما شافني بس من طلع يسب بروحه ووجهه يريد يطك دم حمار ما شايفة عمي عصبي هيج هو طبعه هادئ دائما وقليل كلام ويمكن احد اسباب تقربه لامي هي هم تسكت فترات طويلة جدا وتكتفي بالاستماع بس هسه اثنينهم مشتعلين نار...

ذاك الوقت يلا رجعت دخلت بيتنا لكيتها كاعدة بالهول تبجي من شافتني صاحتني انقهرت عليها سالتني ببجيها
-زعلانة مني انت ليش هيج دتسوين بيه فوك همي
-ماما شعندي بهالدنيا غيرج وازعل منج اني لا وعيت على اب ولا على احد غيرج انت كل شي بحياتي
-لعد مضوجتج اني اخاف اضغط عليج ؟وتريدين تنزوجين ؟؟؟تقربت يمي
-يعني هو حرام لو عيب
-لا بس عمرج صغير وبعدج وينج وين هالمصيبة ...عبالج الزواج حلو؟؟الزواج يعني تدفنين نفسج وانت عايشة تجيبين ثكل تخليه فوك نفسج لما يكطعه
-ماما ليش تجربتج تعمميها
-دشوفي سنين جنت خلصانة لا رجال ولا ضيم ولا احد يحجي ويتأمر هاي ما صار سنة من رجع وهاي حالي اني جنت خلصانة
-ما اكدر اناقشج بشي اني مو فاهمته اصلا ..مشاكل بينكم قديمة مو ذنبي اني ولا ذنب عمو حتى من تصير اقل سالفة تنقلبين علينا ..ضربتيني وانت ما مسويتها قبل رغم اني ما كذبت عليج وحجيت كل حرف وانطيتج المجال تفكرين ..بجيت ما كدرت اكمل وهي كامت حضنتني
-تكبرين وتعرفين ليش هيج سويت هسه شنو راح اكول تحسبيه ضدج اني مو ضد حياتج بس هالشخص مو مناسب ابدا
-خلص مثل ما تحبون

فرحت من هيج جاوبتها وحضنتني بقوة
-يعني عرفتي هسه مصلحتج شفتي شلون بس فكرتي شويه شفتي صحة موقفي
سكتت ما جاوبتها لان ما اريد ادخل وياها بحرب وادري بفرحه من تشد على شغلة ما ترضيها وانتظرت اشوف كلامه البارحة
....

قبل بيوم بس وصلت للكلية من اخذت امي التلفون لكيته منتظرني هناك وحجيت اله الصار كله
زياد:يعني ضربتج كالها متعجب وضابج
-اي وهي ابد ما مسويتها بحياتي ما ضاربتني باذية لو بقصد غير التربية

-وهسه هم مسراتي هسه هم هاي امج قصدها دائما تحافظ عليج يجي ببالها غير شغلات حقها ...اني ما اقبل اذا هي مو راضية اني رايدج راضية وراضين اهلج
- ما راح يرضون زياد
ابتسم بوجهي واثق من نفسه وجاوبني
-لا راح يوافقون واني كلت الج البداية تكون صعبة حيل لا تنسين اهلج هسه جفلانين ويجفلون اكثر بالتفاصيل

-بس همه ما يهتمون للفوارق
-منو يكول ...مره من سولفتي عن عمج رفضوا خطوبته الاولى وهو رجال
-ذاك يختلف العائلة كلها كان عدهم اعتراض عليها
-وراح يرفضون يا مسرة ...لا تضلين تبجين اني هم كلبي ما ينطيني اشوفج من ورايه متأذيه اني اعرف نفسي تميمة لحظ سئ لا تعززين شعوري اكثر...انت راضيها لامج هسه واني اتصرف
-شراح تسوي
-رايح لعمج تحجي وياه

انهبطت وخفت اكثر
-يا عم؟؟
-ضرغام يكول اخوه الجبير صديق احد عمامج
-اي صح عمو محمد
-هو راح نقصده ونروح لجدج هم

بهت وجهي وسكتت خفت من كال جدي
-زياد جدو عصبي وعمو مجيد مثله اخاف يصير شي
-شيصير يعني
-ما ادري ؟؟
خفت اوضح اله مقصدي جدي عنده تعصب تجاه مسألة المذهب وعمو مجيد من يجيب طاري
مناطقهم يحجي بشي من الاشمئزاز وما يحب الساكنين بيها .......

موبايل ضليت ما عندي امي ضامته ودوامي رجعوا يوصلوني يوميه امي طلبت من عمي معد يخليهم يوصلوني بحجة

ما صار اي شي بالايام البعده واني بديت افقد املي وحتى بطلت اسأل زياد اكيد يبطل منو يتورط ويه هيج زواج !

.....
كاعدين اني وامي بالبيت وراها بايام معدودة اندكت الباب بالليل كمت فتحتها وانصدم بعمو معد يفوتهم اهله كلهم وجدي تقدمهم ...

جدو كان متوتر وساكت وجهه اميزه زين بعصبيته ولحظات غضبه ..اخذت جانب الغرفة وفاتوا خوالي الظاهر متصلين بيهم خالو ابو دعاء جاي بتراك البيت ومبين تعبان جاي من شغله توه وبيبي اجتي وراهم..الكل التم بظرف دقايق ...

جدي كعد توسطهم وصاح الي اروح اكعد يمهم..اول ما كعدت حط ايده على ضهري وبهدوء كام يحاجيني
-اني جاي اليوم بشلغة يمج واريد موافقتج

ارتبكت وسألته بصوت ناصي
-تؤمرني جدو
-كل بنية بهالدنيا مصيرها زواج وبيت واستقرار ...بردت واني اسمعه وارتاحيت شويه لهدوء نبرته وما حسيت ابد بشي مو طبيعي لازم جاي يبلغهم بخطبتي او يفتح الموضوع كمل كلامه بكل هدوء
-اني شاورت عمامج وقررنا المن ننطيج ...ابتسمت عبالي حيكول اسمه وانقلب وضعي ١٨٠ درجة من كال ..راشد!!!!

-اني اجيت ابلغكم انت وراشد عرسكم ويه عرس مجيد ودعاء...راشد وكف لحيله واني عبالك وكعت بوادي

نطق بصعوبة راشد يمنع قرارهم بضعف
-جدو مسرة اختي
الجد:استغفر ربك يابه هذا الحجي مو زين ابوك معد وابوها مضر وامك وحد عن امها منين الاخوة بعد
اني حجيت بعد دقايق الصدمة
-جدو ما اريد اتزوج هسه
-لا هاي سنة الحياة وانت صغيرة اليوم باجر تشكريني
-جدو اني ادرس
-ومنو اليمنعج من دراستج انعلج والدينه اليكول ما تدرسين والقسط على حسابي منا للتخرج واذا بعدها اكو دراسة هم ادرسي

باوعت بعيونه بخوف والدمع ترس عيني وهو يباوع الي بنظرة ميزت بيها هواي حجي مبطنة بتهديد يكولي انسي اللي ببالج ما يصير باوعت للبقية عمو مجيد واكف متكتف يم الباب وخازرني عمو معد ساكت استنجدت بيهم محد يكدر يحجي كلمة بعد هالكلمة ...شجعت نفسي وجاوبته

-جدو اني ما اتزوج كلتها بعناد وهو ضحك متجاهل كلامي وصاح على جدة ام مجيد جايبين وياهم كردانة ذهب هدية من عنده حطها كبالي واني دنكت بغضب كوه يفوت النفس بريتي وراشد اللي مثل البنية المغلوب على امرها ديقنعون بي ياخذني محتج بصوت ناصي يم ابوه وامه يخاف يوصل صوته يمنا

....وكفت وعفتهم رحت بغرفتي شبعت بجي امي تبعتني من باوعت بوجهها تمنيتها لو مقهورة او عالاقل معترضة كانت ابتسامتها شكبرها وهي تبارك الي
-مبروك يمه راح تكعدين ويايه نفس البيت عمج معد كال يبني الكم طابق كامل ببيتنا هناك وتبقين ويايه

باوعت بوجهها بغضب واحتد كلامي وياها
-هاي خططج مووو؟؟انت السويتيها ؟؟والله والله بكسر الهاء يا ام مسرة ما راح تكونين امي لحد ما تنهين هالمهزلة كلها لو اطلع هسه اخليج تبجين عليه طول عمرج
-شبي راشد شاب حليو ومرتب وشاغول ...لعد تريدين هذا الصايع احسن؟؟
-ليش صايع لان صدق  ؟؟لان جاي من الباب وما كذب لو لان فقير اي الاخيرة يمكن ..عدكم ربكم الفلس انت تريدين اعيش تعيسة طول عمري تدرين براشد وين هوته ليش تضلمونا كلنا

ضربتني مرة ثانية ..فرحة يمكن نست هي ليش توحشت وصار معد عدوها الاول والوحيد يمكن نست الغصب والضرب شسواها نست ايامها

دخلت جدتي لكتنا اني وياها متعاركات طلعتها ووكفت يم الباب بعد ما قفلتها ....
-اعقلي كل شي ينحل بالتفاهم ...جدج يعرف شيسوي والصح الج منين هذا ومنو هو وشنو ابن عمج اولى واحسن

-لا تحجون شي ما تعرفوه اني ما اريد اتزوج بطلت عوفوني بحالي
-محد يعوفج جدج شافه مرتين تدرين من سمع بي من ....شصار بي تكولين كفرو ما كالوا اسم المنطقة من ذكروها ...اكسري الشر مسرة

-ما اريد اتزوج اذا صدك تحبيني تروحين تنهين هالمسرحية اذا ما موافقين مو اشكال بس لا تموتوني واني بالحياة بعدني ...
-ليش يمه جلبتي بذاك خل نحسبها حساب عرب ما راح نكول وضعه المادي ...بس ارمل وعنده ولد ساكن بال.....اتعس مكان وعوفج من كلهن هو .....يعني حتى مذهبج لازم تغيريه

-منو كال الكم هالحجي ليش اغير مذهبي يعني كل من تزوجت من غير مذهبها غيرته ؟؟بعدين من راح اتزوج رش راح اكضيها صوم وصلاة تره راشد مو امام سلام الله عليه خلونا ساكتين

-غيب تحجين على اهلج ..ذا مو هو اكو غيره مو بس هو ابن عمج عندج غيره هواي بس جدج تختاره عنده سبب ..مو هيج ترفضين حتى لو رافضته خلي الوقت يمر
-اي مثل دعاء ابر تخدير تالي هالجمعه يشبجها

بقت تحجي وياي ساعات والبيت سكت الظاهر الكل راح طلعت لكيت امي كاعدة بصف عمي محاوطها باهتمامه صارت هسه ربع وياه من شافوني سكتوا اثنينهم ..تركت بيتنا وجلبت ويه جدة اخذتني لبيت خالي ونمت عدها بغرفتها مو اني اللي انكسرت روحي اباوع حوراء عيونها دم كلمة ما حاجتني ..دعاء سحلت فراش ونامت يمي تسولف ولا سمعت كلمة منها تفكيري وين عنهم ليش هيج يسوون اذا عالفلوس بالعافية عليهم واذا حبا بالسيطرة والتسلط على حياتي فاني حرة بطبعي وتربيتي شاهينة حرة ما انقاد لاحد رباني جدي وبعده امي على شي هسه يريدون يخالفوه

بديت اضرابي اول يوم واول ساعه كلمة ما احجي لكمة ما اكل وغمضت عيوني بعد ما فتحتها وانطيت ضهري للدنيا كلها مو مثل ما يتصورون سهلة وانجبر بشي ما احبه

.....
دعاء:
اسبوع واني مكابلة مسرة وكاعده بغرفة جدتي امها م
تخبلت من شافتها صدك مغذي وابر وكعت البارحة بالليل من عنادها راشد خنس سكتوه اهله وكله الفلوس عمت على حياتهم كلهم... هي اضربت اضراب تام حتى عيونها ما تديرهن لاحد ....انقهرت على حالها مسرة اللي جانت تضحك للنسمة صارت مثل بيت مهجور بيوم شتا باردة ملامح وطبع

حوراء مو احسن من حالها اختي هم مالت لراشد واني جنت اغلس قبل بس هسه واضحه بينهم شي تبجي لما تمل ...كارهة مسرة وادري بيها تخطط لشي اختى واني اعرفها نن تفكر بشغلة مضوجتها تضل تفتر حوالين نفسها لما تطلع بحل

داطلع من بيتنا اريد اروح لبيت مشتاق اوصل جهالهم بعد ما خلصت الهم قرايتهم جلبت بيه حوري اريد اجي وياج اني ما اوديهم دائما ابوهم لو امهم يجون بس اليوم طالعين كالو رجعيهم لبيت جدهم

-وصلت بابهم دكيتها ومنو فتحها الي مو اعرف حظي اني ...لابس فانيلا تعلاكة وبيجاما الجو يگص من البرودة شهر الثاني وهو نازع من شافني ابتسم
-يا هلا واني اكول نورت بابنا
-هذوله جهال اخوك دفعتهم عليه وهو سوالهم مكان يفوتون ويعلق
-اي والله مو جهالي جهال اخوي ما داعي تدفعين تره جفلت من اتهامه
-اني دفعتهم شوكت هاي
-حتى اني دفعتيني باوع على حوري وجر ايدي ..تعالي عندي حجاية وياج ...اني من جفلتي ما اعرف شسوي مثل طلي وساحبينه من كرونه كمت اعت بروحي وهو شكد قويه ايده ...كال لحوري فوتي الجهال للبيت وجرني وراه تجاه الحديقة

-وين موديني
-كلمتين والله
ما اروح وياك شبيه تخبلت
طلع راشد وابتسم لعمه هااا عمي خير
خزرني مجيد ناهرني
-امشي فضحتينا شنو زعطوطة انت حوراء فوتي يم امي انت

رحت وياه للمكان اللي راد يشوفه الي بعد اقناع وامنت حديقة بيته الجانبية شوفني شلون مرتبها ورد وشغلات حلوة
-هاي الج المكان سويته
-ليش منو كال الك اني موافقة
-هااا
-والله مو موافقة
-كلت ارحم حالج احسن ما تضلين مكابلتني من سطحكم عليش.. عاجبج وانت هم عاجبتني نتزوج ونفضها شكو مراقبتني
-اني مراقبتك وين هاي يمه
-لا ابد حشاج يومية تره اشوفج ..دعاء !!
-متوهم اني مرتبة جلسة فوك اقضي بيها وقت وحتى الجهال ادرسهم فوك ..
-صدك ؟؟زين ما تعزميني اجي يمج
-نعم؟
-خطيبج
-هم رجعنا اكولك خل نحجي بهالموضوع اني ما افيدك عفيه مو الا نتعارك خل نتفق كول لاهلنا بطلت
-ما ابطل منج اني؟؟
-مجيد مشكور عاللي سويته لاجلي واني كلش ممنونة والله منك خلينا اصدقاء وولد عم واني احترمك واعزك بس مال زواج اني ما اكدر اعيش وياك
-اكدر اعرف ليش
-كومه اسباب شنو ليش اصلا اني مدري وين عقلي
-دعاء اذا عالبنية ذاك اليوم
-ما اريد اسمع ولا تحجي وياي اصلا عنها ذكرني بالموقف استفزني بديت اغرد عليه اشكال انت ما تخاف ربك وحرام وانت شلون ما تستنكس منهن فقدت اعصابي عليه
تقرب من جهتي واني اسولف منفعلة اشر بايديه مد ايده فجأة ناحية وجهي واني ارتديت عن مكاني  بخوف 
-شبيج؟؟
-شتريد؟؟
-ما ابوسج لا تخافين هههه

ضحكته اامستفزة خلتني امشي واعوفه وهو يمشي ورايه ويسولف
-شوكت هسه المهر ؟؟
انداريت اله ورزلته وطلعت بيا حال وهذا يدور عرس اباوع لجهته وكف واني امشي والتفت اله مخنزرة يدز الي بوسات بالهوا ويغمزلي بعيونه شكد مستفز السا.....

لكيت حوراء ماكو استحيت افوت ادورها جوه تركت بيتهم ورجعت لبيتنا يم مسرة ولكيت عمتي فرح مكابلتها وكاعدة وجدتي تحجي علينا عود اجنا مدللات واهلنا مطلعين عيونا لان دنرفض عرسانا ...

نسيت حوراء وامي ملتهية باخواني الصغار وبالبيت وهي متعودين تطلع دائما لبيت جدو ساري وترجع محد يكول الها لا تروحين ... وره مده فاتت للبيت وجهه ما بي لون مخطوف ما انتبهت لوجودي صعدت بغرفتنا ركض ..لحكتها اشوف شبيها حاولت افتح الباب ما انفتحت دكيتها كالت انتظري ...انتظرت فتحت الباب لون ماكو بوجها وكامشة بطنها

اختي واني اعرفها مثل ما اعرف نفسي سالتها خفت مريضة لو بيها شي متأذية
-شبيج؟؟
-ما بيه شي
-وجهج اصفر حيل
-هاي يمكن اجتي
-هاا دشربي بونستان ومددي لا تضلين تركضين
-اي هو هم هيج

كملت اليوم يم مسرة اسولف وياها وهي ساكتة حالتها تحسنت بس زعلانة من امها وجدة ...

صعدت الدرج امشي واسمع حوراء تحجي ويه احد
-بالقرأن افضح روحي وافضحك شنو تضحك عليه انت عرضك
--
فتحت الباب وهي ارتبكت دموعها تجري على خدها سدت الاتصال اني انهبطت من شفتها
-شكو حوراء
-الجلب ضحك عليه
-منو ولج يمصخمه منو؟؟
-راشد
بس كالت اسمه اني ما كدرت اسكت بعد جريتها من شعرها واهز بيها واضرب بضهرها بكل قوتي
-ولج اني عرفت والله عرفتج جلبة شنو البينكم
-دعاء ساعديني
-صخام وجهج ..كعدت وكمت الطم من كل عقلي ادك على صدري ..صخام براسنا كون ابويه يموت لج شمسويه احجي
-والله هو قشمرني
-يقشمرج ؟؟ليش صغيرة لو فقيرة حوراء احجي نام وياج اليوم
-اي مو بس اليوم
كمت ولطمتها بغمه على وجهه وكعتها وكتل وين يوجعهة بيست بيها كتل وهي تبجي حتى ما تدفعني لو تخلص روحها ارجع اكعد الطم
-ولج خطب يمصخمه ولج ما وكف بعينج احد ربج ...ابوج اهلج كلهم ما وكفوا بعينج
-احجي وياه عفيه دعاء
-اصخمه واصخمج اليوم لا احرك .....اوكفوا جلاب الله لا يوفقكم

كمت مسحت دموعي ونزلت من الدرج بسكوت ما اريد احد يحس بالبيت على كيف اتحرك وراسي بي ثورة .....لبست حجابي والعباية بالحديقة ورحت لمجيد ركض يشوف النا حل

وصلت باب بيته دكيتها بهدوء ما اريد احد يحس الوقت تأخر حيل فتح الباب واني مأيسة كلت يجوز يم اهله بس هو يحب يبات ببيته متاكده بي هنا ....فتح الباب دفعته وعبرت يكمش بيه واني ابجي
تعاي شبيج
-الله لا يوفقكم انت وابن اخوك دز على راشد هسه
-يولي شبيج
هو يوكفني اني رجليه اخذتني جوه للبيت مرتبك ويجرني واني اريد بس مكان اكعد رجليه غدت خيوط من الهبطة فتن للهول ادعي على راشد وابجي وانصدم بوحده شبه مصلخه بهول بيته انداريت عليه عيوني دمت ما بيه اعاتب ولا احجي كعدت وانهت من التعب وهو صاح بيها تروح للغرفة كتله بأمر
-صيح راشد خل نخلص اولي
-شتردين منه
-صيح ابن اخوك مجيد..ابن اخوك مقشمر اختي ومصخمها وهسه خاطب يجي هنا ويحجي رجال هذا رجال ؟؟
-شمسوي؟؟سالني مستغرب
-يعني شنسوي بعد مو كلت الك
-قصدج نايم وياها
-اتصل بي الله لا يوفقكم بيش طالبينا انتو ؟؟؟
اباوع للغرفة وابجي من كل خاطري تقرب كعد بصفي كشت نفسي منه كمت لحيلي ...انتظر راشد الجلب كعدت على غير قنفة وحطيت راسي بين كفوفي وبجيت بخنيك ما حسيته الا بصفي ويسولف
-اطيح حظه ولا يهمج ياخذها هو اصلا يريدها بس صارت هالشغلة كال فترة وابطل
-ليش بنات الناس لعبة عدكم ؟؟
-انت شتريدين هسه ؟؟
-اريدك تموت كون الله ياخذك!!

فنح عيونه وسكت يباوعلي مدري شلون عود زعل هم عنده احساس ويزعل