#وحق_عيونج🤎.
Sheehana_11
شيهانه🦅!
———————-
فردوس/
مر على هذيچ الليلة ، ايام واسابيع واني كل لحظة وكل كلمة ترن بأذني كأنها هسه...
حاولت اتجاوز هذيج الليلة واستمر بحياتي، مو هذا الجنت اريده؟!
بس خسارتي جانت اكبر من ان أتجاوز الموضوع وامشي وكأن شي لم يكن...
فـ صگر صار كل شي بيه... صورته مـ لا تفارگ خيالي؛ صوته مـ دا يطلع من اذني؛ همساته، لمساته...
كل شي صار بهذه الفترة القصيرة، جان دا يعيش بيه وياكل بيه!
هل تسرعت بقرار ابتعادي عنه...
لعد وكل الاسباب، شلون احل كل وحده منهم بسهولة؟ واگدر اعيش وياه بسعادة...
قسيت وياه وي نفسي بس هذا الشي من اجلنا... كانت هذه افكاري، ولكني اعترف انني اكبر من هزم بتلك اللحظة!
اشتياقي له يفوق الحدود! فـ شنو اسوي م دا اعرف...
يوميه انام على صورتنا والمنديل مالته؛
عسى ولعل يخفف من وجعي بس جان يزيد مـ يقل!
مرات انهار وايسلبني شوقي اله بحيث اتصل بيه بكثره وادز رسائل بضعف تظهر كمية حبي اله، وندمي على تلك الكلمات البائسة الطلعت مني...
بس جان يقابلي بتجاهل، ولا مره رد علي ولا مره شاف رسائلي ولا مره حسسني انو بعد اكو امل..
وهذا شي افقدني عقلي بزايد، صرت مضطربه بأكلي، رياضتي، شغلي وبكل حياتي بمعنى الكلمة!
جانت الاحداث حوالي تمر واني بمكاني،
دوام الجامعات انتهى واحنا كـ دكاتره بعد اعلان النتائج توقف عملنا، وصارت عطلة الصيف؛
الاهل مستمرين بحياتهم من حيث توقفت مع وجود قلق دائم حولي...
ضنيت اني ضميته بداخلي وضميت الى اخر قوة بيه!
جانت نونه الوحيدة التعرف كلشي من هذيچ الليلة المشؤومه!
الوالد وفادي ضلوا مستمرين بتعاون وي الشرطه، يحاولون يقبضون على العصابة بالكامل ويخلصون ناس هوايه منهم!
جانوا ماما وبابا مسافرين، يستمتعون بعطلة الصيف وبس اني وفادي باقين لان فادي عنده شغل مستمر، واني رفضت اسافر هذه السنة، عكس العادة،
تستمر الحياة بس بقلوبنا اشياء متوقفة!
گاعده على المرجوحه بالحديقة بهدوء وافكر كالعادة الا ان اتصلت علي حرير تبشرني بأنتهاء امتحاناتها لسادس اعدادي ومع توقعاتها بالدرجات العالية، فرحتلها لان تعبت بهذه الفترة، وهي تريد تجيب معدل دكتورة مثلما يتمنى صگر تكون!
فردوس: يا روحي، ان شاء الله احلى دكتورة، ونفتخر بيج!
حرير: حبيبة گلبي، تسلميلي...
بس هسه تفرغتلچ يا حلوه، واريد اعرف كلشي صار بهذه الفترة...
فردوس، وجدياً روحي راحت وانا اشوفكم هيج!
فردوس بخنگه: حبابه سدي الموضوع، لا بيدي شي ولا بأيدج بعد!
حرير: ماشي، بس فضفضيلي، احجيلي الاسباب...
ممكن يكون سوء فهم! يا عمري ترا دا تضلمون نفسكم وحبكم بهذا الكبرياء الطاغي على شخصياتكم، انتم الاثنين!
اخذت نفس وحسيت جدياً اريد احجي لأحد حالياً وارتاح؛
- شوفي حرير، حـ احچيلج بس ابد مـ اريد يطلع منج الموضوع، بينا كلش بينا!
لان بعد فات الاوان ومـ اريد ترجع تنفتح السالفة، رجاءاً!
حرير: ولا يهمج، اختي انتي صدگي، م يطلع مني...
الا اذا حسيت الشي جدياً سوء تفاهم وممكن يتصلح!
- لعد مـ احچي!
حرير: لا، خلص احجي، خيطت حلگي!
- احم، هو مو سبب واحد...
اول شي اني نفس مـ گتلج سابقاً الي صار بينا بسرعة بحيث مـ فكرنا وبكلشي استعجلنا...
فأني من جهتي، جانت معرفتي بيه قليلة..
وهواية اشياء جان لازم نحجي بيها!
مع انو احبه واموت عليه واثق بيه... بس اني بنية اميل للعقلانية اكثر وهذا الشي خلاني بهذه حالتي حالياً.
فـ اني بأول شي صار مهتميت، وگلت مستحيل اوقف حياتي وسعادتي وي صگر لأجل هذا الشي، الي يكون بماضيه... ومو حقيقي يمكن! واساله واشوف واثق بيه...
والي هو انو مره اتصلت بيه وحده بكل صلافه تگلي، اني زوجة صگر، وحامل بأبنه... واذا تردين ادزلچ صورنا سوا...
وكملت بتهديد انو ابتعد عنه، حتى لا اتاذى...وهذه سوالف تعبانه!
حرير: لحظة ولو اقاطعج ، هذا الشي عرفتي صدگ لو يعني جذابة طلعت؟
- مـ سألته او بالاصح مـ لحگت أساله...
واصلاً هي مـ اعرف من وين جابت رقمي او حتى شلون عرفت بينا؛ واحنا حتى الاقرب لقلبنا مـ گايلين!
بس هو الشي صحيح، بس حسب ما وضح الي، انو ماضي!
لان اخوچ ما شاء الله ممخلي وحده تعتب عليه! صور الهم سوا ...وخليني ساكته لان سوالف ماضي اخوج تموتني!
حرير: بس بالنهاية، صدگيني ما حب غيرج... بس لو تشوفين شصاير بيه هسه!
قاطعتها واني احاول ابعد سيرته عن قلبي قبل لا تبدي المناحة اليومية: اي عيني، مع كل هذا... اني گلت حبه الي فوق كل ماضيه!
وگعدت وسولفت كأن ماكو شي ولا شفت ولا سمعت من هذه *** شي! صح حرگتني حرگ بس جنت اقوى من ان انهار!
حرير: هذا السبب وتجاوزناه مع انو صعب، لعد بعدين شصار يا روحي؟!
- الي صار انو غفله سمعت اخوج، يفكر يمنعني من شغلي...
الي هو كل حياتي' بعد زواجنا واصير عشتو مرة شيخ!
مـ فكر بيه، فكر بكلام العالم! وهذا الشي خلاني أيأس من جديد،
واني افكر بحياتي وحريتي وشغلي '
واني عندي اهم شي حريتي بالاختيار وبكلشي...
وبهذا الوقت ضلت تجي ببالي اشياء تخليني أيأس من علاقتي بيه...
شلون اترك بغداد واعيش بغير مكان؟
شلون اترك شغلي ودراساتي؟
شلون اتفاهم وياه؟
شلون امحي الماضي الي عاشه وي الكثيرات؟
وشلون وشلون ضلت تدور براسي الي خبلتني...
وخلت گلبي ينزف دم...
بس بأتصال واحد وبنظره وحده من اخوج خلتني اگول كلشي يهون لهذا العشق، اگعد وياه واحجيله كلشي ونتفاهم... هيج جنت اكول لنفسي...
فردوس انتِ تحبينه وهو يحبج، ونصيبچ من الحياة...
لا تخسرينه علمود اشياء تتعوض وممكن يتفهمني اذا حجيت واقنعته!
بنهاية قنعت نفسي وقويتها واتخذت قراري، كلشي لعيون صگر يهون والي شجعني اكثر حب اهلي اله!
بس تجري الرياح بما لا تشتهي السفن يا عمري، وبوكت قليل قبل رفضي القاطع الاخوج،
يجيني اتصال من رقم غريب،
قاطعتني حرير: عزززززه، هسه منو من جديد؟! بس لا وحده لخ؟
كملت بأستهزاء: لا عمري مو **** هالمره، مع الاسف!
حرير: يااا، لعد شنو، يمعودة متتت؟!
- اتصلت علي اخت سيرين الصغيره، سرى...
وبدت تحجي ويايه اشياء واني اسمع صوت يمها يحاول يسكتها ببكاء، سيرين تحاول تسكتها وتسد الحظ!
الحوار الي صار:
———-
فردوس: الووو، منو ويايه؟
- الو، اني سرى... اريد بس اگلج اشياء واروح!
ترا اختي تحبه من الصغر، وخلوه ببالها وهي صغيره...
وهسه يروح لغيرها ترا تنتهي اختي!
اسمع يمها صرت - فدوه اروحلج سدي، لا تحجين وياها... اريد سعادته اني!
- تسمعينها شنو تكول، شلون الج گلب تاخذين حب من بنية طاهره تتمنى حياتها وياه!
فردوس، الله يخليج لاهلج... انتِ عندج حياة ببغداد وشغل وناس ينسوج صگر!
بس اختي...
وقبل لا تكمل كلامها؛ نسد الخط
———
فردوس لحرير: اني كل الكلام الي مر واني صدمتي ورجفة جسمي تفوق كل كلام ممكن اگوله، بس تخيلي موقفي...
واني حسيت بـ سيرين اول ما شفتها انها گلبها ابيض وما تتمنى الشر لاحد...
تخيلي روحج بمكاني... تخيلي ممكن تنقذين سعادة شخص بكلمة منج حتى وان كانت على حساب سعادتج...
بس اني مـ فكرت انو هو حتى لو رفضت اني، ممكن يتزوجها او لا؟!
جان كل فكري انو هذه البنيه الي حبته من طفولة تستحق سعادتها وياه اكثر مني...
اكثر من بنية تعرف عليها من يومين واي تفاهم ما بينهم...
والحب ينسي،
بس ااااه يا حرير، شگد جنت غلطانه ببعدي عنه...
شكد غلطت من جرحت كبرياءه بكلماتي الي حاولت اقسيها حتى ابعده عني...
بس بعد ماكو خط رجعة، انتهينا...
وارجوج حرير، م تطلعين كلمه منا... وتنسين كل كلامنا!
ابتسمت بهدوء: وتفرحيني بنجاحج وزواجج القريب...
حسيت على بجي من جهتها فـ كملت: لا تخليني اندم حجيتلج...!
حرير بتنهيده: الله يجعلكم من نصيب بعض، لو تمر سنوات يا رب تكون نهايتكم البعض!
وخليني اروح فردوس لان اذا بقيت ممكن اذيج واتاذى!
ودعتها وراحت وادري بيها صعبة عليها تسمع هذا الكلام، سمعت صوت الباب يعلن عن وصول فادي،
.....
وكالعادة تمر الايام، وماما وبابا رجعوا من السفر ورجعوا يحاولون يحتووني ويرجعوني فردوس القديمة... بس لا روح لمن تنادي!
گعدت الصبح وفتحت موبايلي شفت الاخبار، اليوم نزول نتائج السادس...
عزه حرير، بسرعة اتصلت بيها ورا ثواني طويلة جاوبتني واول م فتحت الخط صوت الفرحة باين...
حرير بفرحة: فردوووووس، نجحتتتتتت! معدلي 97,7...
فردووووس مـ دا اصدگ!
- عمررري، الف مبروك يا احلى دكتورة!
تستاهلين هذه ثمرة تعبچ!!
حرير: بعد گلبي، نصت صوتها" فردوس مـ تصدگين الشي الثاني الي مفرحني شنو؟"
- لا تگولينها، بهذه السرعة؟!
حرير بلهفة: ايييي، جان ويانه من طلعنا الخبر، وبعد الفرحة والمباركات...
حجى وي صگر... طايره فردوس طايره من الفرحة!
يا رب يوم الالج!
- حبيبتي فرحتي من تنوصف بيكم، دكتورتنا العروسه، فدووووه!
حرير بحماس: ايييي، اريدج ويايه بكلشي فردوس! اتمناج هسه يمي واحضنج ونحچي بكلشي من اصغرها لاكبرها
بلعت ريگي بأختناق و....
يتبع...
————————
# وحق عيونچ
هاي♥️.
اعتذر عن الاخطاء الاملائية!