وحق عيونچ 🤎.

بارت 37

‎#وحق_عيونج🤎.
Sheehana_11
شيهانه🦅!

———————-

صگر/

ورا ما حچيت وي الاهل عن الموضوع؛ طلعلي شغل مهم وطلعت من البيت ما رجعت الا ورا العشى...
لگيتهم متعشين وگاعدين يسولفون وهي ما موجودة،

صحت على حرير تجهزلي العشى بين ما ابدل وانزل،
صعدت ردت اروح لغرفتها بالاول بس سمعت صوت احد يصعد من الدرج وتراجعت رحت لغرفتي...
اخذت دوش ولبست دشداشة مريحة واخذت السبحة؛
باوعت على روحي بالمرايه وانه ارش العطر،،
واتذكر نفسي شلون جنت ما افكر اتزوج ابد،
وشلون هي دخلت حياتي وغيرتني ١٨٠ درجة،

لليوم ولا تقربت على اي بنية بعدما عرفتها؛ احس روحي تلعب بس افكر بموضوع غيرها...
كل ما اغمض عيني تجي بالي وخيالها دائماً وياي...
شلون ممكن شخص يدخل حياتك ويصير حياتك كلها؛
حياتي جانت باهته وروتينية بس هسه هواي صارلها معنى...

اخير شي اخذت نفس عميق وقررت خلص افتح الموضوع وي ابوها ورا ما اتعشى لان بعد ما اتحمل بدونها...

طلعت من غرفتي وانه ناوي اشوفها واخليها على اطلاع بالامر؛ علمود لا تنصدم من تكون كاعده هناك جوا وتستحي وهيج،

اول ما طلعت؛ انفتحت باب غرفة هشام وطلع منها وهو يتثاوب..
هسه وكتك **** حطيت روحك وي روحتي الها!
استغفرالله يلا بلكت تكون نزلت !

هشام: عطرك خنگنا !
وهو يسد خشمه،

- احسن من ريحتك الخايسه! شعندك نايم بهالوكت!!

مشاني وياه للدرج واني عيني على غرفتها؛

هشام بمزح : ماما، مو جنت نعسان وتعبان من الشغل ونمت!

ضربته على راسه " امشي ولي من خلقتي"!

- واحد ما يتشاقى وياك!!

هز ايده وراح للصالون الگاعدين بي وانه رحت لصالة الطعام؛
شفت حرير دا تصب الاكل..

صگر بأبتسامة: عاشت ايدج بنيتي!

حرير: بالعافية حبيبي...

رادت تروح بس صحتلها؛ التفتت علي!

- گول خويه؟!

صگر: فردوس وينها؟! ما شفتها بالصالون؟!

حرير: والله خويه من العصر گالت رأسها يأذيها؛ وخلت ونامت من ذاك الوكت!

گلبي هضمني، خفت بيها شي صاير ولهسه نايمة..

صگر بعقدة حاجب: يمعودة روحي شوفيها، اخذها دكتور...
خاف بيها شي!
وتعالي گليلي بسرعة بعد اخوج!

هزت راسها حرير بأيجاب وراحت،
وانه نفسي انسدت من الاكل؛ شربت بس گلاص ماي بارد وضليت منتظرها تجي!