عشقهُ خنجر في خاصرتي

البارت الواحد والخمسون

_٥١_

#عشقه_خنجر_في_خاصرتي

#بقلم_أسماء_ديمير_مع_Roro_Rose

ايمان …

وكفت مستغربه هالصوت ، انداريت و نزعت الكمامه اركز بي ، هو ندار علي بهيئته ، وبقاطه ورباط ..

عرفت مجرد مالمحت شعره هو مدنجه يرتب بمقعده حجه العفو رفع راسه ، صغر عيونه مستغرب ..

ثواني هو واكف بوجهي جن يريد يتاكد ، حجه  ايمان ؟؟!

ابتسمت شلونك طلال ..

اووو ايمان والله هاي انتي ، شلونج يابه ..

هزيت راسي بخير الحمدلله ..

نزل نظره على شكلي  مصدوم من منظري ، جنت لابسه بنطرون قماش اسود و قميص اسود عريض وحالتي حال الارمله التعيسه ..

لا مكياج والوجه باهت ، يعني وضعي صخام وعزا ، رفع نظره يباوعلي بأسف وزعل ..

حنه راسه ، شبيج ليش لابسه اسود…

جريت نفس امي توفت قبل فتره ..

لااا اله الا الله .. انا لله وانا اليه لراجعون ..

سمعت صوت صباح ست ايمان و ينج ..

فزيت هاا اي ، عن اذنك ….

هو ارتبك ايمان ايماان تعاي اكلج ..

انداريت على تفضل استاذ…

حجه بتلعثم تعاي هنا يمي هذا مقعد فارغ ، دنحجي و ين اخذتج الدنيا ..

ضحكت من جذب :- لا ودتني ولا جابتني ، سعيده بشوفتك استاذ ..

كملت دربي لدرجه المخصصه النه ، كعدت ساكته سالوني الموظفين الي وياي منو هذا ..

رديت موظف قديم اعرفه من جنت قبل بوازره ال…..

اقلعت الطياره بينه ، ابتسمت علي صورته ولا كانو مرت فوك العشر سنوات على فراقنه ، هو هو اصلا راجع شباب ..

دنجت على حالتي ، عكسي اني من زعل ابين بيه الكبر ، صح بعدني رشيقه و البشره محافظه على رونقها ، بس تعب باين عليه ..

حسيت على المضيفه الطيران فوك راسي حجت ست ايمان ؟؟!

-رفعت نظري عليها اي نعم ..

-ابتسمت تقربت مني العفو بس اكو شخص دز عليج ..

عقدت حواجبي .

-حجت استاذ طلال بدرجه رجال الاعمال طلب انو ينقل معقدج هناك  ، اذا تحبين تفضلي وياي ..

اريد اطلع الحجايه ماتطلع ، انداريت بفشله على الموظفين وياي عينهم عليه و مركزين بكل كلمه ..

وجهي خرط والله اريد اكول الها لا اعذريني او ارفض ماعرف احجي  .

-حجت ست تفضلي يله ..

-هزيت راسي بفشله لااا افضل ابقى هنا ..

حجو همه روحي ست باين دعوه مخصصه الج .. 

انداريت عليهم صباح عينه علي وجهي حومر ، تعلثمت لا مرتاحه هناا ..

عافتني وراحت ، رجعو كررو سؤال منو هذا شلون يدز عليج ..

كررت جواب نفسه موظف قديم وياي وهسه شفته ..

-رجعت المضيفه وحجت يكول الاستاذ لو اكو مجال يمهم جان اجيت بس خلي تتفضل ست يمي هيه  وزملائها اذا ممكن ..

-كالو روحي بالاخر هو داز عليج ، الاخ مصر عليج ..

كمت لحيلي اتمنى اختفي على هالموقف ، انداريت عليهم عيونهم تباوعلي بستفهام عرفت راح اصير سالفه بحلكهم اليوم ..

مشيت توجهت عليه ، وكفت كباله هو مدنج يقرء كتاب من شافني ذب الكتاب وكف لحيله مبتسم ..

-تفضلي هنا اشر على مقعد كباله ..

-ضليت واكفه جتفت اديه لصدري تفضل ؟؟؟

-ضحك شبيج ايمان ، مرت سنوات من كل عقلج تردين انطيج مجال تختفين ، تدرين شكد دورت عليج لو لا ..

-استاذ طلال ، قاطعني من شوكت تكولين الي استاذ طول عمري اسمي طلال ..

-شرايد ..

-فقدتج والله  و من شفتج حاليا تذكرت صحبتنه اكعدي دنحجي شبيج ..

-ترددت بالاول بس كعدت كباله صافنه عليه..

كعد كبالي مبتسم ، حجه ، وجهج تعبان بسبب وفاه والدتج لو اكو سبب ثاني ..

-لا بسبب وفاه امي وجدي بنفس السنه جانت سنه سيئه عليه ..

-وين حاليا عايشه ..

-عند خالي ..

-مرتاحه ..

-ابتسمت شلون شكل الراحه يصير طلال ..

-دورت عليج تدرين لو لاا حتى حسابج ضاع مني ، لكيته مغلق ، ليش هيج سويتي ..

-ماسويت شي دنيا ضيعتني مو متعمده يعني ..

سكت ، دنج راسه ، اني هم درت وجهي عنه ، حجه بدون مايباوعلي ،  تزوجتي …

سكتت اراقب بي ..

ابتسم نزل راسه على ايدي شاف بيدي محبس ، مكان الحلقه ..
سالته وانته ..

همس لا .. شنو تشربين داطلب ..

-ماريد ..

-وين تشتغلين حاليا ..

-بمركز الوزاره ..

-جيد ..

-وانت ..

-بالسفاره ، 

هزيت راسي ..

-ماجاوبتي تزوجتي ..

-لا ..

-خله ايده على خده مركز  :- شعجب ..

-مالكيت رجال بي خير ..

-ههههههه ….

-من صدك احجي ..

-خلفه عليج ، تكوليها بوجهي ..

-شكو اخذت على نفسك ..

-اسلوبج خشن ليش هيج ..

سكتت ودنجت ، اتهرب ..

من تقدمت الج جانت نيتي وياج زواج والله ، انسانه راقيه ورقيقه و ماصدكت لكيتج بس حظرتج هنتيني ورفضتي بلا سبب مقنع ..
.
-عضيت شفتي احاول  اتهرب من الاجابه ..

درت نظري عليه لكيته يباوعلي ، عيونه على حلكي ، رفعت كمامه على وجهي ..

رجع ظهره على مقعد.، هالمره راح انطيج رقمي و حساباتي ولا تغلسين عليهم رجاءا ..

-الله كريم ..

-بقائي بالعراق مامطول مجرد ايام وارجع اسافر ، باذن الله  ارجع للامارات ، اتمنى نتواصل سوه كاصدقاء اذا يعجبج ..

هزيت راسي ، اخذتنه السوالف عن حاله و عن حياته و شغله ..

عرفت مامستقر بالعراق ، صارله سنوات عايش بالامارات و يجي زياره و هالمره الصدفه جمعتنه بالطياره ..

ودعته بمجرد مانزلت طياره ، فعلا اتصلت بي و نطيته رقمي ، رجع طلال وصحبته الجميله ..

رغم ماجنت جافه وياه واسلوبي شبه ميت ..

هو لاحظ هالشي ، بس ماجان يطالب اكثر من الحديث وبس ..

كال اني وحيد ، بس اريد احجي ، طبعه لطلال طبع راقي ، من صدق يعني والله ..

الحلو بي متدين ، ابد ابد ماتجاوز وياي لو بحرف واحد ، حتى من كال اريد ارتبط بيج كال اتفضل اتقدم للاهل و الموافقه بيدج ..

عنده اسلوب مقنع ، اسلوب اجتماعي و سياسي ، وينطي حجج واثباتات من يريد يقنع المقابل ..

شخص متمكن ، باول لقائي  وياه ماجان عندي ذره استعداد انو انطي مجال لاي جنس بشر او ابادل بالحديث ..

كارهه البشر كلها ، قطعت عن صديقات عن زملاء هيج ، ردت اعيش بالوحده وبهدوء ..

الا غزوو طلال جان غير ، دخل على حياتي بهدوء و بطلب مهذب ، و بتردد خوفا من رفضي ..

وبنفس الوقت اقتحم حياتي وكان صديق ودود ، سمع شكوتي  وزعلي و حزني على امي ، جان عنده قابليه يسمعني ابجي  لساعات واشكي من صارلي ..

هو ساكت ..

طلال متدين ، يحب يزور يحب يقره قران ، يحب الاحاديث يحب يقراء الكتب ..

امنت وياه لان ماذاني ابد ، مجرد ماسكت هو يبطل يحجي يعرف انزعجت ، حذر حيل ..

تحمل اتهاماتي اله انته كذاب طلال ، انتو الزلم غدارين و يسكت ويسكت ومتحمل ..

.......... مرام ...

ثاني يوم عرسنا كعدت من الفجر افرفر بالبيت ، اني متعودة على هالوقت اكعد واحبها ومحمد ضال نايم دنيا بعدها ضلام ...

وكفت ما مصدكه اتفلت شجابني هنا شكد عارضت ورفضت قبل ..صدك هي القسمة ونصيب واني نصيبه وهو نصيبي ...

ابتسمت من تذكرت ليلتنا المرت شكد كان اسلوب جنتل وحباب وحنين ..

اشتعلت خدودي خجل واني اباوع لتفاصيل جسمي واتذكر شلون تعامل ويايه برومانسية مفرطة ..

.حضنت جسمي بايديه اوكف تأثره الشديد ..رجعت للغرفة وشمرت نفسي بالفراش يمه واحاور نفسي حلالج يلا مرام وينها وكاحتج ؟؟يلا!!

مديت ايدي اريد المس طرف حاجبه وقبل لا تصير فتح عينه بعيني ..تراجعت وابتسمت بوجهه ..

صباح الخير
تمطى ورد بهدوء

-صباح النور
-شعندج من هسه كاعدة

ما عندي كعدت للصلاة سبحت وصليت

-هاي منو الكسولة مرام تكعد للفجر وتصليها بوقتها

ااحمد لله هههه

-خل اكوم اني هم اسبح واصليها

مددت وهو راح ورجعت النومة بعيني كمت ما اريد افتح عيني من النعاس ...

بعد مدة حسيت البيت بي اصواتهم  هاي شكد نمت شلت راسي للساعه لكيتها بالتسعة الصبح

وكفت طلعت لكيت عمي وزوجته بالبيت ..اول ما شافتني سكتت حتى ما جاوبت سلامي وصدت ومحمد جابني يمها كوه سلمت عليها ...

ولان مره جبيرة ولان ما اريد مشكلة بوستها رغم هي ما رايدتني وصدت عني ...عمي بارك النا وكام طلع ولحكه محمد وبقيت وياها اندارت الي

-لا عبالج اخليج تتهنين يولي هذا بيتي كشاية ما تحطين ولا تشيلين فاهمة ومحمد اذا منعتيه عن ولده اصخم عيشتج ...وشوكت ما يريد يرجع زوجته انت ما  تفتحين حلكج

-ما باقية ببيتج تره فترة واذا تحبين ادفع اجار

-وجع كون منو اليخليج تطلعين اخاف عبالج محمد رايدج تره لو ما جدته وتقنعه بنعاله ما يبدلج ..لا تنسين انت شسويتي وسمعتج شنو ؟؟

-اجيت ارد واستغفرت ربي وسكتت كوه عليه

وكفت اروح وهي مستمرة بالغلط ما حبيت ارد بهاليوم بالذات لان اعرف مو بصالحي هالشغلة

وره ساعه اجني امي والبنات ونسولن عمامي وجدتي يباركون والتهيت للعصر وياهن ما سألت باحد ...

للمغرب من طلعن واجيت لغرفتي والكاه منتظرني بعركه وامه السبب ...

سكتت اله والها مو ضعف وانما عروس ولسه مطوله خلك وادري هي ما ضاله يمي ...

صدك لثاني يوم وراحت بس محمد لا يحجي وياي ولا يباوع بوجهي كنت متوقعة بعد ليلةالبارحه يختلف كل شي بيناتنا وترجع مشاعره القديمه !!

البرود غلف ايامنا التالية وهو داوم من ثاني يوم زواج ومن سألته ليش داومت انصدمت برده شكو يوميه مسوي اجازة زواج واصلا اني ما كلت لاحد عرست !!!

ابقى وحدي بالبيت اكابل حيطان لما يرجع ومن يجي يلف راسه وينام ومر اسبوع زواج وهو ما مقاربني الا مرتين ...ومن شمرت نلسي عليه زادهن مره بالاسبوع البعده !!

لا اكدر احجي ولا اكدر اساله هو وشيكول عني اشو استحي منه حيل واخاف يكول  موتت نفسها لو هو يريد يذلني هيج حسيت؟؟؟

مشيت اليوم  لاهلي العصريات.. فتت ابن غدير يبجي بوحده بالهول امي ماكو وامه وين هذا؟؟؟

شلته امشي بالبيت ادورهن ..مريت من يم باب الحمام واسمع همس وحياة المتزوجين الحقيقية!!

تنهدت واخذت الطفل وكعدت بالحديقة اسكته ...طلعت شدن وره مده تركض هابطة ..خلت ايدها فوك صدرها
-ولج عيني شلون جفلت من ما لكيته غير تكولين تحجين شوكت اجيتي

-صحت وما سمعتيني ملنهية ..ابتسمت بسمرتها

-احمم هاا مو غدير اجا من شغلة وفات يسبح وهو نايم

اي ديلا شبيج قابل شكو ناس ادبسزية ومن حقكم ...حجيتها وعيني على بيتنا وهي ضحكت

يولي بعد تزوجتي وتعرفين الزلم من يجي ملهوف وهيج لازم بعد لو تنكلب الدنيا

الله يسعدكم يا رب

ويسعدج يولي شلونه الزواج حلو مو بالله ..يوميه اكول لاخوج وين جنا عايشين وين هسه ..حلو الزواج مو صح

ما ادري
-ههه تطرد عيون مروم خانم مسويه روحها ما شايفة
ولا تعرف شي

لا والله ولا عرفت

ليش؟؟هاي شبيج مرام؟؟

اني ما اشتكيت ابد لاحد بس طكت روحي بهاليوم وشدن قريبة مني حيل اكدر اسألها

غابت ضحكتها وكعدت يمي

اخاف يستحي بعده منج لو مريض مو هو سكر !!

قابل اول زواجه ويستحي لا ولا بسبب مرضه لا تكولين الشغلة بيه اني

لا شنو شبيج انت ورد تخبلين شكو بيج؟؟

-ما ادري وضايجة ولا اكدر احجي لاحد وهو هم مغلس

اخاف مريض بي شي

لا ابد دا اكولج ..بس حظي هذا الما كعد بيوم

يمعودة دكولي يا الله توكم تزوجتوا لعد اني شاكول ولج من تزوجنا مريض وبالضيم ندبر امورنا كوه وهم اخوج شلون جان عليه ..شوفي هي اول الزواج خربطه

ما ادري

يعني زين هو من ...شلون اشرح الج فاهمتني اكيد من تصير الشغلة بي حيل لو كوه

اي ماكو شي ولا اني بيه شي ...شمدريني ..لا باوعي هو شنو اكولج مثل الفرض ويأديه

ميخالف تحملي يا عيني هاي اكيد مشاكله ماثره عليه

هاا تكولين هيج يعني غدير هم جان ما يجي يمج الا انت تروحين عليه

-هااا اي هم مرات

لا جذابة بكل يوم ... شنو زعطوط كدامج مريض وشحاله ويوميه وشعرج ما ينشف واتذكر شلون عمتي وجدتي من تجينا تتلمس بشعرج ...اني بيه شي ...مو حلوة لو ناقصني شي ليش هيج

-مرام ميخالف تحملي ؟؟

سكتت وفعلا تحملت وانتظرت ومر الشهر واحنا نفس الحال برود فضيع ؟؟كوه يباوع بوجهي

اجتنا غصونه وياها عمتي صابرين وياها جهال رجلها وذيج ابنها بحضنها بيومها قضيت الوقت وياهن وكل شويه واحد من ازواجهم متصل يسال واشوف حياتهن ماشية الا اني الحدية والبرود بحياتي وياه ....

عزمتهن على العشا والتعلولة يمي ..

والتمينا ومحمد ماكو اصلا اليوم رايح لاهله ويبات ...

بقن يمي ويسولفن بحياتهن وازواجهن واني بالنص اقارن واجمع ..

شدن ما طولت وره ابنها شكم شهر حبلت بثاني والنصبه عليها وعلى عمتي صابرين اللي زوجها حرك الموبايل عليها يريد يرجعها ما تبات ...

حزن بنفسي واني لو اضل شهر ما يفكر يتصل ويسأل ؟؟

طلعن ورجع السكون لحياتي لنص الليل كاعدة وحدي بالظلام اتفرج فيلم رومانسي وادور حياتي بي ماكو شي اي شي ما عندي ؟؟؟؟طفيته زاد تفكيري ...

اي واهس ما الي بشي ولا جايني نوم  ...شلت موبايلي كلت ما يسويها اني ابادر دكيت ورد بهدوء

هلو محمد

هلا مرام بيج شي

-لا احححم ...بس اتصلت عليك اسال عنك؟؟
سكتت شكد صعب اضل اتوسل اهتمام
اثنينا ساكتين وره وقت كال

باجر ارجع محتاجة شي

هاا لا سلامتك

ديلا تصبحين على خير عبالي بيج شي ساعه بيش تدرين؟؟

لا

ليش ما نايمه

ما ادري

عود اجي ونسولف

ليش مو هسه

مرام كعدتيني من عز نومي ساعه ثلاث بالليل روحي نامي

ما جايني نوم ؟؟

سمعته جر نفس ومبين نهض من الفراش

شبيج
ما اعرف ؟؟

مرام نامي!!كالها بصوت ناصي
واني عطت بي

ما اريد جلبت نامي؟؟؟روح انخمد انت ....
سديته بوجهه ومددت وعيوني دمعت
ضل يدك الموبايل سويته صامت ورجعت رفضته دز رساله

هاي منو ينخمد ولج؟؟
شمرت الموبايل بعيد وضل يدك ويدك واني اباوع للموبايل من بعد لحد ماغفيت باجية!!هيج هذا الحب هو ..

انعل ابو گلبي ما جان هسه اني نايمة من المغرب واحلم بفارس احلامي الاثول ..صدك طلع اثول؟؟

فتحت عيني الصبح جفلت محمد كدامي ..كمت لحيلي كعدت وسالته بجفلة

شجابك

منو ينخمد؟؟
باوعت للساعة ستة ...شنو هاي عصر ؟؟صبح ؟؟

شنو عصر هذا؟؟
كمت اروح للشباك اشوف الوقت جرني ليمه بقوة اذاني عيونه غاضبة

شبيج؟؟

عفيه هاي شكد نمت هاي عصر ؟؟

ولج شخبصتيني عصريش سته الصبح !!

صبح؟؟ليش جيت ..اقصد الدوام ؟؟شجابك انت هسه؟؟

اجيت انخمد !!

بدا ينزع واني حايرة وما ادري عقلي مشوش وكل شويه اكوله شجابك وهو يسكتني ياخذ شفافي ...باخر المطاف استوعبت الصار !!بفراشنا اني وياه وساكته وعيوني تايهات بوجهه

اجيت اكوم جلب بايدي

وين

اسبح واصلي واسويلك ريوك تروح لدوامك

ماخذ اجازة

ليش ؟؟

شنو ليش ...تعاي يولي هنا ما ترديني انت ؟؟
-هاا لا شنو ما اريدك بس متعجبة

حضني قوي وجرني اله

تعبتيني مرام؟؟

شسويت

ما ادري ؟؟كلج متعبة

والله مو مرام قبل اني

ادري هذا المتعبني ...تحبيني ؟؟

هاا

جاوبيني

-اي

-كولي احبك لعد ليش ما كلتيها ابد
انتفضت ورديت بعصيية

لااا كلت!!انت جنت نايم

ههههههه
ضحك وضل يضحك ويرجع يسكت
-
ما سمعتها كوليها هسه

هااا ..هو اني احبك

وشبيج كوه عليج تكوليها

-لا مو كوه احبك اني

-وين اكو

والله هاي شبيك محمد شنو تضحك شبيك..اني ادري انت تريد تذلني
سكت ورجع غندب وجهه وعيونه صد عني ...جريت وجهه رجعتهن باوعلي ...اني هالمره احبك

ساكت ويباوع بوجهي ..سألته بصوت ناصي
وانت محمد

اني جنت احبج!

سكت ويباوع لعيني اللي بدت تمطر ...

دفعت ايده عازمة اطلع من البيت وما ارجع انهزمت منه من غرفتنا حاول يوكفني بس بعد هجت ....

كمشني قيدني من وره واني ادفر بي وادفع

عوفني ؟

وين ترحين خبلة

اهج منك

ولج دشوفي روحج
وكفني كدام بوفية عدهم بيها مرايا بمدخل البيت

انتبهت لروحي لابسة شي كلش قليل مو بس قصير ..

.ضميت جسمي الظاهر بشكل عشوائي وهو عيونه تفتر وتعاين وتتفحص ..دفعته عني مقيدني بايديه كليا وواكف خلفي

اريد اروح لاهلي

ماكو روحه زعلانه
باس رقبتي برقة خفت اتنازل

مو بكيفك رفست رجله برجلي
وهو استغلها حجة ورفعني عن الارض مرجعني للغرفة غصب وما تركني الا لما رضيت !!

....
ومرت الايام ورجعنا عاديه حياتنا واقل من العادي والبرود مستمر ..

عدا ايام تجي حلوة بس ما احسه يحبني مثل قبل ..

ولا ذيج ايام الشباب ولا لهفتها واهون على نفسي  واني عقلت ..

وهو ملتهي بهالدنيا الصعبة وعاذرته ،  بس من تتصل زوجته الاولى اشتعل وما اطفى...

وخاصة من يحاجيها بكل احترام ومحبه ومن اكوله طليقتك وحرام يغلس ما يرد واني اتخبل وعنري نصه ينكضي من تجي سيرتها؟؟

مرت ايام تعاركنا وتصالحنا ووصلت بي يمد ايده عليه ..

ومن اجي ازعل يوكف الي ويحبسني ويرجع يراضيني ..

وفوك الرضى ما كنت مرتاحه مثل العايش بين عالمين ..

واحد كله حب وواحد كله كره مره يكرهني حد العمى ومره يحبني حد كطع النفس ...وما كدرت افهم مشاعره ولا مره؟؟

ومرت سنه بزواجنا

........
...اجته فروقات على راتبه وذكر بوقتها جهاله بهدايا وملابس واخذني اني هم لبغداد اشترى اليه كل اللي بنفسي وونسني ووداني مطعم ومول ..

ومرينه على اهله لاول مره واني لخاطره راعيت موقفه وهو طلب اروح وياه ،  واطيح الزعل ويه امه لخاطره ..

ورحت وهي بهالمره شويه خفت وياي ..مريم اصلا ما طلعت ولا شافتنا بس البقية كانوا مرحبين وخاصة عمي ...

عافني يمهم وراح لبيت اهل زوجته الاولى ...اني ضليت كاعده يم عمي والكل راحوا ؟؟
سالني عمي

شلونج يابه

الحمد لله عمو!

محمد زين وياج

الحمد لله اي زين
-باوعي يابه ..اني قبل زواجكم ما رضيت ياخذج
فتحت عيني بقوة بوجهه وهو كمل

اي ردته يرجع مرته وجهاله ولحد قبل اسبوع رحنا اني ومحمد عليهم يريدها ترجع

اختنكت وعبالك واحد طفى شكو فرح شفته سكتت ودنكت ما اكدر احجي دموعي وكعت ،  واني اكول ليش اهله رضوا يستقبلوني ..

واجي وعمتي تلكتني ببيتها هيج السالفة سألته بكسرة خاطر

هسه راح يرجعها اليوم يعني ..رجعها هو؟؟؟

ابتسم عمي على كلامي السريع وخبصتي ووكفتي بشوغة روح عليه

اكعدي بويه شفهمتي منو يرجع ...زوجته عقدت محكمه

شنو ؟؟

بويه انت زوجته وحدج هسه ...وان شاء الله تعوضين عليه ..محمد تعب وصار سنة متبهذل بس الله اليدري ...

وجهاله

الحضانة للام ربج يعوض ..ولج بويه محمد خسر عمر وهسه بدا من الصفر ومن اول خطوة ...
بقى يسولف الي شكد عنده مشاكل طول هالفترة وشكد وراه ضغط وفهمت كل يوم مر وليش وشلون تصرف وياي هيج ؟؟

....

بالليل متأخر رجعنا واني وياه بالسيارة سألته عالجهال

شفتهم

اي خالهم جابهم الي بالمطعم

هاا ..اي وشلونهم
سكت واخذ تنهيدة

زينين

يصير تاخذهم ..جيبهم يمنا

لا ما ترهم ..الحضانة للام

حتى لو تزوجت؟؟
التفت الي وعصب من سؤالي

شمدريج انت

عمي كال الي

سكت ما جاوبني ....

ومرت ايام وهو اشوفه ميت بالحياة ويلوب ولا اكدر اسويله شي ولا اكدر اسكت واتفرج على قهرته على زواجها ؟؟هنيالها هلكد يحبها !!

سكره كل شويه معلك ويتخربط وابر انسولين يلا ينزل وجسمه رجفة ملازمته وتمرض ووكع بالفراش واني مكابلته وابجي وكل شويه واكول راح تضربه جلطه ...لحد ما تخربط بالليل عليه طلعت مثل المخبلة ابجي من البيت

صحت لغافر وغسان اخذوه للمستشفى وشويه طلعوه متحسن ..

.جدتي من خوفها عليه اجتي يمنا بقت واني منخبصة بي وفوك راسه واكفه ما اعوفه ولا لحظه ...

بيومها اجانا فراس يشوفه وعفتهم ورحت بالمطبخ اسوي اله سم يشربه ...

التفتت لكيته مرتجي بالباب ويباوع عليه
هااا بنت عمي ؟؟

شجابك هنا ...فراس ؟؟

يولي يمكن راح تترملين هههه

اسم الله ..عوذة منك فال الله احسن من فالك ..ولي بالك افوت اطلع ؟؟

يولي مو كلت الج نتزوج ما جنتي هسه متونسة وياي ولا هالعيشة ويه شايب بي سكر وجه الفكر ما يلوك الج دلال

شلت كلاص واهدده اضربه بي واني جاده بكلامي اريده يولي يطلع من بيتي راح يهجمه .

.ما اشوف الا محمد متكوم فوكاه ويضوب بي بوكسات خلص عليه كمت اعيط وجدتي تعيط نريد نفكه منه ماكو ...

كوه جدتي فاككتهم بعصاتها وطردت فراس خطيه تبهذلت ...

اندار عليه محمد وما اشوفه الا ساطرني على عيني احسها طفت ...عطت ابجي ...

وهو يعيط ويكسر بالبيت وجدتي كوه جرته ...خفت اطلع من البيت وخفت تطلع السالفة وانفضح ومتت قهر من ضربة محمد ....

يومين وجدتي بيناتنا ما يكدر يحجي وياي واني اداري بي من بعيد ولا احجي ولا اناقشه ...

بعد اسبوع يلا وكف لحيله من مرضته ذيج ورجع لشغله وعافني وسكت عني بالاخير اني ما الي اي ذنب وكلها تعرف فراس وسوالفه العوجه ..

.سمعت من جدتي اخواني مطيحين حظه ومتضاربين بينهم مره ثانية اني جلبت بيها ما اقبل تتركني...

.اجاني متخبل ويصيح عليه

ما نضل هنا

وين نروح

اخذج للكبور وتنجبين

راح طلع فلوس من كنتوره ويصيح على جدتي
-اخذيهن ذني من تطلبيني اريد اولي منا عاد جدة تعبت

الجدة:دكعد ماكو طلعة نزلني بكبري وعود دير ضهرك وروح يا حيف سهري عليك وتربيتي

جدة بروح عمامي وبروح جدي خليني اطلع راح اموت
-ولك تعوف المن بيت اهلك ...فراس يطلع انت تضل هنا

جدة هاج فلوسج
جرتهن منه وشمرتهن بحضني
اني خنست بينهم

الجدة:خلص سديت دينك

ضل يتلفت بيناتنا ما مفتهم شي كال الي انطيهن الها واني دفعتهن

محمد:جدة والله ما محتاج ودا اكولج سددت كل ربعي وهاي فليساتج

الجدة:رجعهن الها

شنو الها

مرتك هي صاحبتهن

اندار عليه مضيق عيونه سألني
-اني تداينت منج؟؟

سكتت وجدتي جاوبت
-الاوليات الجبتهن واخذناهن ذيج صدك منا والباقي كله منها ....

شنو هالحجي جدة

-ومنين الي اني وعمتك هلكد وهاي مو من غريب صارت قسمتك

-حتى فلوس مهرها ونيشانها تداينتهن منها؟؟
الجدة :لا يول الكلادة من عمتك

-تاأسأل جاوبني  ... اني اجيت انهزم كمش كفي فركه بقوة اذاني ورجعني يمها

-احجن مهرج انت دفعتيه
حجيت بسرعة بلا تردد

-اي ما سويت غلط ابن عمي واريدك

-ولج مشتريتني منها ..اشر لجدة وهي كالت اله

-عاد سواها قصة اي شتريد تكول كول

وكفني كلت راح يطيح حظي صار اله كوكه بس يكفخ بيه غمضت عيني وخليت ايديه حاجز بيني وبينه ....

ما لكيت الا نفسي غركانه بحضنه ويبوس بيه بغل وتعنيف ويكرصني كل شويه وكلهم ذني كدام جدتنا وهي تضحك

-يول عيب استحوا ...هاااا ولك محمد ....عيب!!!عاد انتظروا اروح
اندار الها وحاجاها

-وين ترحين انت بعد تبقين يمنا
-شعندي

-تربين وليداتي ......

......

شدن:
اني وبطني شايله ماعون كبه ورايحه لمرام خطيه حامل تتنسى ووحامها صعب ...

فتت لبيتها جفت ادري رجلها بدوامه صرت بالهول وصحت مرام!!

سمعت شهكه واثنين طفروا من القنفة على يميني .

.فزيت واني اشوف محمد بس بالداخليات غمضت وما ركزت بمرام ..

عاطت بيه
-شجابج بهالساعة المباركة

جبو الج كبة

-انعل ابوج لابو كبتج تونا كلنا حلال منين طلعتي النا  انت حتى الرجال من الهبطة مدري وين راح ما تكولين ناس بيهم سكر

-ولج هو هنا

-بيتنا ونلعب بي داده عالاقل لا بممر ولا بحديقة مثل بعض الناس

-شاكدر للسانج دهاج فوك زينيتي

دروحي يلا وسدي الباب بايدج وبعد لا تجين الا تتصلين واذا ما رديت لا تلحين ..ناس بلا ذوق ...كامت شايله الماعون مني وتاكل وتحجي

انداريت اطلع

لج وين موليه

اروح لبيتنا

دتعاي تعاي بعد خربتيها

لا اروح ولج شكد عيب الرجال ماخذ راحته واني جفتت

لا يمهودة ليكون صدكتي تره هاي احماء بعد يومين يلا تصير

شنو

معلينا تعاي سولفي الي غدير شاف المقاول

اي وان شاء الله بعد شهر يبلش يبني

كعدت تاكل وتسال بيه احنا وهمه تقاسمنا كاعنا ودنبني بيوت تونز نفس الخريطة بالعكس !!

كانت فكرتها رادت نسوي مكان النا ولاولادنا قريب لاخوانها البقية ...

وحتى نكمل الحياة سويه ....احنا عائلة كبيرة ونبقى ماشين بهذا اانظام مهما ابتعدنا نرجع نلتم ..

.ما نعرف نعيش خارج هالمكان ولا نفارقه ...عمي ابو محمد بعد هالعمر راجع ....

زوج بناته وبقى بس ابنه الصغير ..

اني خلصت من كابوس كان معكر صفو حياتي اسمه مريم ... واستقريت ويه حبيبي واطفالي!!

غصن مرتاحه حيل ويه رياض وعائلته وعمتي صابرين مكملة مسيرة حياة امرأة اخرى .

..مرام ...لهسه ما نعرف طبيعة حياتها هي ومحمد حسب قربي منهم هي تموت عليه وتعشق تراب اليمشي عليه محمد وتقدس سيرته وتعزه والمقابل محمد جامد ما عرفنا الصار بس النعرفه هو متأذي هواي وما عنده ثقة؟؟

ملتهي بين شغل وبين اهل وبين اطفال ومرام تجي فاصل بنهاية يوم متعب يمكن يحبها بس ابد ما يعترف وهاي ضمن اعترافات وخبايا ما كان احد يعرفها الا اني والا هي متكتمه كليا على حياتها.......

ايمان .....

فد يوم جانت داحجي ويه طلال  ، كلي بس ثواني اصبري دقيقه .. 

سكتت ..

-اسمعه يحجي ويه احد بصفه ويكله لاا ، ماكدر باجر .

-ليش ، لا والله عندي طلعه ..

-لا اجيب ابني من كربلاء لازم ..

غمضت بهدوء ، ممصدومه بس ابتسمت حظرت نفسي لجذبه رجال ثاني بحياتي …

جنت متحظره و مستعده على اهب الاستعداد لاي غدر ، بحيث لو اشوفه يعبدني و بعدين يخوني ما انصدم والله عادي مستعده و اعرف راح يصير هيج ..

رجع يحجي وياي طبيعي ، كملت كلامي و ياه برسميه مثل المعتاد…

 يوم رحت لمكان شغله بعد ماعرفت جاي للدائرته عنده شغل ، كلت اروح اشوفه هيج جفت ، 

استغربت من سالت عليه ،  سالتني ام الاستعلامات حظرتج زوجته .

-وكفت عفوا زوجه منو ..

-استاذ طلال ..

-منو كلج زوجته ..

-خمنت ست ..

-حجيت ااا عفوا بس طلعت الي شغله ثواني وارجع ،عفتها وكملت دربي طلعت بره الدائره كلها ، بنفس اليوم دكيت علي ، هو رد …

-كتله اريد اشوفك  …

-كال حاظر تدللي وين ..

-نطيته العنوان لمطعم ،  اجه بسرعه ماتاخر ..

-لكاني كاعده انتظره ..

-شافني من بعيد اجه مبتسم شلونج ..

-زينه  …

-كعد كبالي ، خما اكو شي ..

-لا ليش ..

-غريب اول مره دزين علي كل مره اني ابادر ..

دنجت ، حبيت انسولف شوي ..

نسولف ليش لا ..

-شكد مطول بالعراق ..

-كم شهر بس ..

-ليش ..

عندي شغله اريد افضها وارجع والحمدلله شفتج ولكيتج مره ثانيه ..

ا-بتسمت تك خد مستهزئه ، 

ربع ساعه جان لقائنه ، كمت لحيلي جنت ناويه يكون اخر لقاء وياه ، بس حبيت اشوف يكولي او يحجي هو مزوج بس ماحجه ولا نطاني سبب الحقيقي لوجوده بالعراق ..

سلمت ونطيته ظهري بعد ماكتله ، اتمنالك حياه سعيده انشالله ، بس لقائنه راح يكون الاخير ، لان لقائنه بعد مال داعي  ..

وكف لحيله مستغرب ، سمعت جمله ..

-ايمان ترى اعرف انتي مرتبطه قبل كم سنه ، و ماكانت علاقه ناجحه و عاذر الي انتي بي ، جربي وياي  اني وياج نفس الشي ..

ابتسمت واني منطيته ظهري ، التفتت علي بهدوء ..

-حجه اسمعيني اني رايدج من زمان ومن اسنين ، ضيعتج مره ماراح اكررها ، انطين..

-توه يكمل قاطعته اني هم اعرف انو انته مزوج وعندك ولد هم ..

بهت وجه متفاجئ ..

ابتسمت ترى كلكم نفس الشي مو كتلك  ، وكلكم تجذبون او الاصح تضمون عني حقيقتكم ، بس بالاخر ربك هو حافظني ويطلع كذبكم وخداعكم جدامي قبل لا يفوت الاوان ..

توه يحجي ، رديت اني ابتعد عني ، احسن ماعندي اي طاقه للحب و للاكاذيب بعد ..

نطيته ظهري ومشيت بسلام ، سلام خارجي فقط ، بس داخلي حروب وانتفاضات اصواتها عاليه ..

ضعت بيني وبين الدنيا ، مالكيت درب عدل امشي علي ، وين مااخلي رجلي اعثر واوكع ، بعد ماكو مجال للعثرات لان امي ماكو توكف وياي ، ولا جدي الي يمسد على راسي ..

اذا وكعت راح انكسر وعمر الكسر ماتجبر ، حفاظا على طيبيتي واخلاقي راح احاول ماانكسر ، اذا انكسرت معناها راح اتشوهه من داخل ، ماراح ابقه نفس نقاء والصفاء ..

صدقا وبعد مرور كل هاي سنوات ، تعلمت درس وين ماروح اكوله ..

الرجل ، شكد ماكان عمره ، 

شنو ما كان منصبه ،

 شنو ما كانت شهادته او تعليمه ، 

شنو كان عسكري او مدني ،

فاهو تفكيره واحد ، وملازم تثقين بي وتنطي كلبج ..

كلهم تفكيرهم منطقي و محدود ماراح يفكر باحساسج وعواطفج ابد ، كل الي صادفتهم عاملتهم بالحسنى كنت صادقه وياهم ، وعاملتهم بطيبه ، بس ولا واحد حبني لنفسي ، ولا واحد صدق وياه ، ولا واحد كانت نفسه نقيه وياي ..

حبهم الي او اعجابهم بس سجينه خاصره دمرتني و دمرت سنيني وضيعت عمري .. 

عمري الي وصل ودك الاربعين ، ضيعو عشريني وثلاثيني سوه ..

مرت ايام واسابيع ، رجع طلال كرر محاولته وياي ، طلب الزواج رفضت ..

اجاني للشغل وكال ، انطيني فرصه احجي لا بكيفج تحكمين عليه خليج منصفه واسمعيني نفس ماسمعتج …

-نترت بي تتفضل بره لا اجيب الك الامن ..

-توقعت اسلوبج ارقه من هيج ايمان ..

جريت نفس الاسلوب الحسن مافادني كلت اجرب غيره .

-جاي اريد افهمج واذا ماحبيتي قسم بالله اطلع وبعد ماتشوفيني ، اجيت وكررت ولحيت عليج لان اعزج بس اذا انتي رافضتني اروح ..

سكتت ..

-مزوج اي وعندي ولد اي .. بس منفصل من زمان ترى والله .

-الله يسعدك اني شكوو ..

-ليش تتهميني بالكذب والخداع واني مو هيج ، سكتت وحاولت اتفاهم وياج بالحسنى بس انتي كلش صايره متوحشه وهجوميه ..

-اشكرك ..

-لا تكلبيها علي وسوين نفسج الضحيه ، مالج حق تحجين وياي هيج ولا الج حق تتهميني باطل ، فوكاها مانطيتني مال افهمج متعجرفه ..

درت وجهي ..

-حبيت احافظ على علاقتي بيج شكد ماكدر ، حاولت ابني طريق امن لعلاقتنه بوقت انتي جنتي متردده وكاره جنس ادم ، بعدت كلشي ممكن يبعدج عني وماحجيت بي بس في سبيل احافظ عليج ..

-باوعت علي بطرف عيني ضايجه ممامنه بي ممصدكته ..

- مد ايده بجيب الي بصدره ، وسحب منه الجنسيه مالته،  و ذبها على الميز هاج هاي اخذي الجنسيه و تفضلي شوفي رجال مطلق مصخم اني شبيج وياي ..

-مالي شغل ماتهمني ..

-ليش تنترين ..

-شكو جاي ..

-لا تحجين وياي هيج ايمان لا تعصبيني عيب هالاسلوب ..

كعدت على كرسي اهدي نفسي ..

-فهمتج وضعي وكتلج اني ماكذب ، مو خايف منج واكذب افتهمتي بس شفت كلامي عن زواجي او ابني ماله داعي ، يكفي لكيتج من بعد سنوات اي موضوع ثاني غيرج ماحب افتحه ، كلشي مو مهم ، كلشي بالماضي ماله داعي ينفتح ، ماردت تبتعدين بسبب زواجي وابني ، خليتج بعيده عنه و بقيتج انتي بالدائره لوحدج وكعدت اتفرج عليج ماسويت شي غلط ..

ضليت ساكته افرك باديه ، متحيره مو قانعه بي و بكلامه ..

خله اديه بجيوبه واكف منتظر مني كلمه ، 

ماعندي شي غير بس الشك بكلامه و عدم القناعه ، 

جر نفس بضوجه جازع مني ،  راد يطلع مد ايده ياخذ الجنسيه ، مديت ايدي خطف ، وجلبت بيها ..

رفعت نظري علي رافعه تك حاجب ، 

ابتسم ثواني وحجه ، هلاا بيج بحياه طلال ….

عافني وطلع  وبقه جنسيه يمي ..

ورها بايام تعنيت لدائره الجنسبه والاحوال ، اكو شخص اعرفه هناك من كرايب امي نطيته رقم الجنسيه و كتله طلعلي القضى والمضي ..

كال اي فعلا مزوج ومطلك ، مزوج مرتين ..

رخه وجهي ..

- اي بالله ..

نطاني اسم زوجه الاولى زوجه ثانيه والاثنين مطلقات ، وعنده طفل واحد …

اتصلت بي اكلته رزاله معدله و نطيته اسماء نسوانه ، صايرلي حجي متولي ولك ، تضحك علي لا ياابه غلطاان كلبي مفركس منكم انتوو تعال احذ جنسبتك و لاتشوفني وجهك . شنو عبالك تضحك علي لاا عيني بت عفاف اني .  

تعال يله اخذ الجنسيه ، والا اكلك الجنسيه راح اشمرها بالزباله  عود طلع بدل ضايع ولا تلفي يمي لا والله اكلب دنيا ..

هو ماطلع منه صوت ..

-حجيت مو وياك ..

-همس ماجنتي هيج ابد للاسف .

-باوع اسلوب راقي ، والطيبه ماتمشي عدكم اغلبكم ماتخافون الله  ، 

-قاطعني اشكرج ..

-لا توصل يمي بعد افتهمت ..

-يجرالج بس اريد الجنسيه محتاجها عيب تشمريها بزباله …

-تعال اخذها جذاب مزوج اثنين مايستحي يريدني ثالثه ..

-اعتذر بس قصدج مطلق للتصحيح ست ، ومزوج مره وحده وليس لمرتين ، والي كلج هاي المعلومات غبي احول للاسف ، لان ماشاف شاشه الي تقره معلومات بصوره صحيحه ، ياريت يتاكد مره ثانيه و حظرتج صايره ذات اسلوب مسموم معقد ..

رزلني بادب و بثقافه عارمه و سد.جهاز ..

لا يادب سزز سد جهاز بوجهي .. 

اجه ثاني يوم لشغلي اخذ الجنسيه بهدوء بلا كلام و عافني و طلع ..

بعدها بفتره دزلي صوره لشاشه تقرء معلوماته الشخصيه ، انو ممزوج بس مره وحده و تشابه اسماء ، واسم زوجه ثانيه هيه اصلا اكبر منه بسنوات ..

فكيف زوجته بس صار اخلاط اسماء ..

 ردت اتصل بهذا الي سالته و ارزله على هالموقف ، كعدت وخنست من الفشله ..

ردت اعتذر و خفت ، دزيت اله بعد ايام من تفكير كلمه  وحده ، لا غير ..  اسفه 

وبس اصلا زين طلعت مني ، مو خلفه عليه والله يالله ..

هو ورها بساعات اتصل ..

حجه كبل ، اشتاقيت الج ..

-اعتذر ..

-ضلمتيني والله ..

-كذبت علي وماكتلي مزوج ولا عندك ولد.طبعا ما يضل عندي ثقه بيك…

-كتلج شفت الموضوع مو مهم وماحبيت افتحه وياج ..

-سالتك مزوج كلت لاا ..

-لقائنه جان قصير بالطياره ، ساعتين مو هواي ترى ، وصدفه كان ممكن اخسرج طول العمر لو كتلج اي ، حبيت احصل منج اي شي رقم او عنوان داتوصل وياج و بعدين اكلج ..

-متصافين ايمان ..

-زوجتك وين ..

-مطلقه والله بكربلاء حاليا ..

-ليش جيت للعراق ..

-بسبب القضيه عندي ..

-شنو هي ..

-حظانه ابني داحاول اخذها ..

-ليش ماتبقي يم امه .

-هو مو صغير جبير ، وحياته كله وياي ، مايكدر يعيش بكربلاء مدرسته حياته اصدقاىه اقاربنه كلها بغداد ماكدر اضيعه بكربلاء ..

-ناوي تاخذه وياك للامارات ..

لا اني جنت اسافر بس هو وامه يضلون بغداد ، وهسه هم ناوي ابقي بغداد يم بيت جدي و يمي ، سالفه روحته لكربلاء و تغير حياته بشكل جذري مرفوض بالنسبه الي ياثر علي وعلى دراسته ومستقبله ..

-شكد عمره ..

-راح يدخل ال ١٠ سنوات.

الله يحفظه الك ..

سديته منه شوي مطمئنه ، مطمئنه انو صادق مو لان رضيت بي و بطلبه متكرر بالارتباط ..

مره اني توه راجعه من السفر جنت طالعه سفره لسليمانيه اني و خالي وعايلته ، لكيته دازلي بصمه ..

تعاي وياي لكربلاء ، نحظر جلسه مال حضانه ابني و شوفي وتاكدي من كلشي بنفسج  ..

ماحبيت ارد ، بيني وبين نفسي ردت امشي واتاكد بس بعدين فكرت ليش اروح صفتي شنو ، ليش اروح وياه اصلا شنو السبب ..

جنت بدوامه ومازلت بدوامه ، ثقه صفر وعانيت من هاي سالفه هواي ، داىما اكرر عليه كلمه جذاب ، واتهمه بالكذب ….

لان فعلا نوبات يضم عليه بحجه ماريد اخسرج ..

يزعل يومين ، والثالث يراسلني او يخابر ..

اضحك من يغيب يومين اكول توجعه كرامته هسه وباليوم الثالث اطيب ، فعلا مايطول و يدك يسال على احوالي ..

الحلو بي كلامه و صوته المميز …

يمكن البعض عبالهم تزوجته او خلفت منه ، لا ماصارت ، لحد هاي الحظه ٢٠٢٢ اني ما عندي ثقه باي رجل ، عندي علاقه بي اي اعترف ، واكو فكره زواج بالي ، بس مادام ماحاسم سالفه الحظانه ويه زوجته وبعد كلبي ماتطمن منه ماراح يتم ...

فكره الزواج فكره مشتته وغير واضحه عندي ..

بسبب الصدمات صارت عندي رده فعل ، بس بقه طلال مثل الشمعه اشتغلت بيدي و ضوت درب المظلم جنت امشي بي لوحدي ..

تبقى هالشمعه مشتعله لاخر حد ؟؟! ،و تحرك نفسها لخاطري حتى اكمل مشي بالنور ، لو يفضل نفسه عليه و يطفى بنص الدرب ويخليني اتيهه درب و اتعثر واوكع ..

مادري لحد هسه ممتاكده منه رغم ماهو ديصر على حسن نيته وياي …

ماريد اتفلسف بس صدقا ، ماكو ثقه ، وكلشي ممكن يهدك بثواني وانته ماواعي الا بعد ماتلكه نفسك محطم ، وحيدد !!!

كلشي بهل دنيا سجين بخاصرتنه ، عمرنه ، شخصيتنه ، اهلنه ، حبنا ، اصدقاىنه ، ماضينه وحاظرنه ومستقبلنا ، وحتى طيبتنه وضنه الحسن بالناس ، هو كلشي سجين بالخاصره ..

اذا ماعرفت تتصرف وتسيطر عليهن معناها راح تشوف اشياء عمرك ماتتمنى تشوفها او تعيشها ..

لو متعامله صح ويه الي حبيتهم و حكمت عقلي ، وجنت صارمه وحازمه وياهم ، ماجان اكو احد بيهم كدر او تجراء يخدعني او يخوني  ..

ولو متصرفه صح ونسيت الماضي جان عشت حاظر جميل ، وكدرت ابني مستقبل احلى واهدء واسعد ..

لو متعلمه درس من كل الصار جان كلبي قسى وتعلم درس بهل حياه ، درس يعلمني شلون اكمل مشوار الحياه بسعاده وامان ..

 بس ماتعلمت ولا سويت ولا وحده منهم ..

ولااااا وحده وعيت بعد ماضاع العمر ، لو مطبقه وحده من هذول جان ماحبيت بصدق مره ثانيه وكعت بواحد مثل رعد  ، وماخليت طيببتي تعمه عيوني عن حقيقه ناس ، جانت تصرفت صح ، 

رعد دك عليه من ارقام غريبه ، بس اوقات اتصالاته تعرفني بي ، واعرف مزاجه ، صفحه سوده وطويتها للابد ، بنات عمي الي علاقتي بيهن شبه معدومه الا مرام ، الي كانت صديقه ، وتنقل اخبارها واخبار البقيه الي ،

اتمنى الهم سعاده من كل كلبي ، الي اسعدني او الي اذاني ، بالاخر الحساب عند الله سبحانه وتعالى ...

‏"اللهم لا تجعلني أطرقُ بابًا ليس لي، ولا تجعلني أحاول فتح قُفلاً لا أملك لهُ مُفتاح،

 ولا تسمح لحُبًا ناقصًا أن يدخُل قلبي، ولا تُعلّق روحي بما ليس لها، وأرضني بأجمل مما أتمنى وأُريد،

 وارزقني بأمانٍ وسلامٍ من عندك ليس لهُ حد، ولا تجعلني بحاجة أحدٍ سواك يا رحمٰن يا رحيم."

لهنا تنتهي قصه ايمان ، بس ايمان بعدها موجوده ، ادعولي بالراحه والطمانينه  ادعو لجدي وامي ولحسام بالرحمه ..

الله يرحمهم و يجعل مثواهم جنه الفردوس الاعلى ، 

ادعولي حياتي ترسي على البر ، وتوكف امواج حياتي العاتيه ، والكه نهايه ترضيني لقصتي ويه طلال ...
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

نودع بطلاتنه ، الي بيهم المشاغبه والي بيهم الطيوبه والي بيهم الصبوره والي بيهم ماعدها حظ ابد ..

بس رغم كل هذا كلمن اخذت نصيبها من الدنياا ، والله سبحانه وتعالى بعد.عنده هواي شغلات الهم ضامها ، الحلوه والمره هم ..

نبقي عباده و هو ارحم بينه ، من كل البشر ، ومايهون عليه يكون عبده مظلوم لو حزين …

ندعيلهم بالراحه البال ، الدعاء هو وحده يصارع القدر وقادر على تغير مصير الانسان فعليكم بالدعاء و الدعاء والدعاء  ..

تم ختم القصه في يوم الاربعاء  .. ١٩/ ١ / ٢٠٢٢ في يوم بارد ودرجه حرارته في ديالى -٤ 😅

شكر جزيل للست الكاتبه الي شاركتني رحله شهرين ونص ، RoroRose2  ذات طابع فكاهي لطيف على القلب ..

شكر لام عبدالله الاخت راقيه ، الي تحملت تاخيري عليها برحابه صدر ..

شكر لست شيماء الي نقلت القصه في احد الكروبات النسائيه، شكرا لكل شخص ساهم في نقل القصه ، 

شكرا للمتابعات الراقيات ، الي رافقوني بالقصص الثلاثه ، انتظروني بالقصه الرابعه انشالله .. 

ختامكم ورد الياسمين انشالله .. 

اختكم #أسماء_ديمير