الجزء الثامن
كانت المستشفى فى حالة فوضى كل العاملين من اطباء وممرضين بيجروا فى كل مكان بيحاولوا انقاذ المرضى .. كانوا العاملين فى المستشفى باين عليهم الارهاق وباين ان كان عندهم نقص فى الكمامات وادوات الوقايه
كان احمد ومنى والخال واقفين بيتفرجوا على كل الى بيحصل فى المستشفى .. لكن منى كانت حاسه بأحاسيس كتير احاسيس من الخوف والقلق .. كانت خايفه على والدها وخايفه من الى ممكن يحصل خايفه تفقده خايفه تعيش من غيره وكمان كانت خايفه على مريم
خرج عليهم الدكتور و قرب منهم وقالهم يا جماعه احنا عملنا الى علينا حاولنا على قد ما نقدر .. انا أسف .. البقاء لله
صرخت منى واترمت فى حضن أحمد .. كانت منى بتعيط بصوت عالى كانت منهاره لدرجة انها فقدت الوعى
انتقلت منى لغرفه فى المستشفى وتم تعليق محاليل لها واداها الدكتور حقنه مهدئه و كان احمد والخال جنبها
*الصدمه كانت صعبه عليها أوى يا أحمد
-أكبر من ما كنت متوقع يا خال
*لا حول و لا قوة الا بالله ده قضاء الله
-ربنا يستر عليها يا خال الصدمه صعبه
*طيب انت سألت المستشفى الاجراءات هتبقى ايه
-اه يا خال عادى هيتغسل ويتكفن عادى بس هيتحط فى كيس غير قابل للتحلل وبعدين هناخده ندفنه
*طيب هو مفيش حد نكلمه من قرايبها
-تقريبا ليها عم عايش فى الامارات .. لما تفوق هى تبقى تكلمه
*البنت دى صعبانه عليه اوى واختها التعبانه دى .. انا كلمت عفاف قولتلها بس قولتلها ماتقولش لمريم دلوقت
-ايوه يا خال مش لازم تعرف دلوقت
•فتحت مريم عنيها وهى بتقول .. اه اه بابا .. كانت دموعها على خدها وهى بتقول .. هتوحشنى اوى يا بابا
*لا حول ولا قوة الا بالله .. ده قضاء ربنا يا منى يا بنتى
-هو فى مكان احسن دلوقت يا منى .. اكيد شايفك واكيد ميحبش يشوفك فى الحاله دى
•بابا مات يا احمد .. مش عارفه هعيش ازاى من غيره
-انا مش هسيبك يا منى هفضل جنبك علطول
*كلنا جنبك يا منى يا بنتى
•مريم عامله ايه يا خال سألت عليها ؟
*متقلقيش عفاف جنبها وانا كل شويه بتصل بيها اطمن
•مريم عرفت ان بابا مات ؟ لو عرفت ممكن تموت فيها
-لا لسه معرفتش يا منى احنا قولنا بلاش اعرف دلوقتى
•ايوه احسن خليها تعرف لمًا اكون موجوده
-طيب لازم تبقى اقوى من كده .. مريم لو شافتك وانتى تعبانه كده هتنهار .. متنسيش انك بقيتى المسئوله عنها
•نزلت دموع منى وهى بتقول .. طيب احنا هنعمل ايه
-بابا هيتغسل هنا ويتكفن و الجثه هتتحط فى كيس بلاستيك عشان الكرونا وبعدين هناخده تدفنه
•كيس بلاستيك يعنى ايه .. يعنى ايه نحطه فى كيس بلاستك
*ده اجراء عادى بسبب الكرونا يا منى يا بنتى
•يا حبيبى يا بابا .. ربنا يرحمك
نفذت المستشفى الاجراءات المطلوبه تم تغسيل الجثه وتكفينها ووضعت فى الكيس بلاستيك و فى الصباح استلم احمد والخال ومنى الجثه وراحو على المدافن .. ووقف على مراسم الدفن منى واحمد والخال وعم عاطف و حسن
وبعد دفنه وقف احد الشيوخ وبدأ يدعو له
اللَّهُمَّ، اغْفِرْ له وَارْحَمْهُ، وَاعْفُ عنْه وَعَافِهِ، وَأَكْرِمْ نُزُلَهُ، وَوَسِّعْ مُدْخَلَهُ، وَاغْسِلْهُ بمَاءٍ وَثَلْجٍ وَبَرَدٍ، وَنَقِّهِ مِنَ الخَطَايَا كما يُنَقَّى الثَّوْبُ الأبْيَضُ مِنَ الدَّنَسِ، وَأَبْدِلْهُ دَارًا خَيْرًا مِن دَارِهِ، وَأَهْلًا خَيْرًا مِن أَهْلِهِ، وَزَوْجًا خَيْرًا مِن زَوْجِهِ، وَقِهِ فِتْنَةَ القَبْرِ وَعَذَابَ النَّارِ
اللَّهمَّ اغْفِرْ لحيِّنا وميِّتِنا وشاهدنا وغائِبنا وصَغيرنا وَكبيرنا وذَكرِنا وأُنثانا اللَّهمَّ مَنْ أحييتَه مِنَّا فأحيِه علَى الإسلامِ ومن تَوَفَّيتَه مِنَّا فتَوفَّهُ علَى الإيمانِ اللَّهمَّ لا تحرمنا أجرَه ولا تُضلَّنا بعدَه
اللهم أنت رب هذه الروح، وأنت خلقتها، وأنت هديتها للإسلام، وأنت قبضت روحها، وأنت أعلم بسرها وعلانيتها، جئنا شفعاء فاغفر له
اللهمّ أبدله داراً خيراً من داره، وأهلاً خيراً من أهله، وأدخله الجنّة، وأعذه من عذاب القبر، ومن عذاب النّار. اللهمّ عامله بما أنت أهله، ولا تعامله بما هو أهله
اللهمّ اجزه عن الإحسان إحساناً، وعن الإساءة عفواً وغفراناً، اللهمّ إن كان محسناً فزد من حسناته، وإن كان مسيئاً فتجاوز عن سيّئاته، اللهمّ أدخله الجنّة من غير مناقشة حساب، ولا سابقة عذاب، اللهمّ آنسه في وحدته، وفي وحشته، وفي غربته
اللهمّ ارحمه فإنّه كان مسلماً، واغفر له فإنّه كان مؤمناً، وأدخله الجنّة فإنّه كان بنبيّك مصدّقاً، وسامحه فإنّه كان لكتابك مرتّلاً. اللهمّ ارحمنا إذا أتانا اليقين، وعرق منّا الجبين، وكثر الأنين والحنين
ووقف الشيخ يقول العزاء على القبر
انتهت مراسم العزاء وغادروا جميعاً المقابر
*************************************
*مالك يا احمد اول مره تجينى السطح وانت حزين اوى كده
-منى يا حسن فى حاله صعبه أوى
*طبيعى يا احمد ده ابوها و بعدين هو الى كان باقيلها بعد موت امها
-ربنا يرحمه
*بس انت حزين اوى يا احمد مع انك متعرفوش وتقريباً عمرك ما شوفته
-انا زعلان عشان خاطر منى يا حسن .. انت ما شوفتش كمان لما اختها مريم عرفت تقريباً الاتنين انهاروا وكانوا فى حاله صعبه جدا
*ربنا يكون فى عونهم الموضوع صعب .. صحيح هى مريم عامله ايه دلوقت
-مبتخرجش من الاوضه وبتاخد الادويه زى ما الدكتور قال .. بس لسه حالتها ملحقتش تتحسن
*صحيح هى منى ملهاش حد اصل ما شوفتش حد منى اهلها
-ليها عم عايش هو واولاده فى الامارات كلمها وقالها انه عاوز يجيلها بس مش عارف عشان حظر السفر الموجود
*طيب واهل والدتها
-اهل والدتها بردوا عزوها فى التليفون محدش جه اكيد خايفين من موضوع الكرونا
*لا حول ولا قوة الا بالله .. معذروين بردوا يا احمد الكرونا مخليه الناس فى حالة رعب
-ملعون ابو الكرونا الى متخلناش نقف جنب بعض
*الحمد لله ان كلنا كنا حواليها يا احمد .. بس بقولك ايه اول مره اعرف انك حساس وانك بتعرف احب
-ده وقت هزار يا حسن
*انا مش بهزر انا بتكلم جد .. انت بتحبها يا معلم
-اه بحبها وكل يوم بيعدى معاها بحس انى بحبها اكتر .. كمان انا حاسس انها مسئوله مني
*خليك جنبها اليومين دول يا احمد هى محتجالك
-طبعا يا حسن مش هسيبها او اتخلى عنها
*وهى لوحدها دلوقت
-احنا سبناها هى ومريم من شويه يرتاحوا .. بس بكره الصبح هروحلها وانا وخالى ومراته
*ربنا معاكوا
-انا همشى دلوقت عشان ألحق أنام شويه قبل ما نروحلها الصبح
*ماشى يا احمد
-سلام يا حسن
*سلام يا أحمد
**************************
-عامله ايه دلوقت يا مريم
*تعبانه اوى يا مريم .. سبينى لوحدى عشان متتعديش
-انا فداكى يا حبيبتى
*طيب بس متقلعيش الكمامه والجوانتى
-انا لبساهم اهو يا مريم
*ولما تخرجى من الاوضه عقمى نفسك مش معاكى كحول
-اه يا مريم معايا متقلقيش
*قالت مريم ودموعها بتنزل من عينها .. عارفه يا منى .. انا السبب فى موت بابا
-بس يا مريم متقوليش كده .. ده قضاء ربنا كل واحد بيموت فى وقته
*ايوه بس انا السبب ان بابا يتعب ويموت من الكرونا
-أديكى قولتى السبب .. يعنى كلها اسباب لو مكنتيش انتى صدقينى كان هيكون فيه سبب تانى لأن عمره انتهى
•انا مش قادره اسامح نفسى يا منى
-ادعيله يا مريم ادعيله يا حبيبتى
*ربنا يرحمك يا بابا
-هو اكيد شايفنا واكيد كل الى هو عاوزه انك تقومى بالسلامه .. عشان كده لازم تخلى بالك من نفسك وتقومى بالسلامه يا حبيبتى
*حاضر يا منى حاضر .. يلا قومى انتى عشان انتى تعبانه من الصبح
-ماشى يا مريم هسيبك ترتاحى
خرجت منى من اوضة مريم خلعت الكمامه والجوانتى ووضعتهم فى كيس بلاستك وربطته كويس وحطته فى باسكت الكمامه وبعدين طهرت ايدها وملابسها بالكحول .. لبست منى كمامه جديده و جوانتى ودخلت اوضة والدها وبدأت تحط الكلور والكحول فى كل مكان .. و هى بتعقم المكان وقعت عنيها على اوراق والدها وبدأت تقلب فيهم .. لقت منى رساله مكتوب عليها الى ابنتى منى .. فتحت منى الرساله وبدأت تقرأ
" ابنتى الحبيبه منى
اذا قرأتى هذه الرساله ، فهذا يعنى اننى غادرت هذا العالم .. اعلم كم الحزن الذى تشعرى به يا حبيبتى ولا أريدك ان تبكى او تحزنى .. أتمنى ان اكون قد قمت بدورى معك ومع اختك الحبيبه مريم على اكمل وجه .
اعتنى بأختك مريم جيداً فهى امانه قد تركتها لكى .. اعلم جيداً انكى ستحافظين على تلك الامانه .
ابنتى الحبيبه لقد فارقت الحياه وانا راضىٍ عنك فقد كنتى دائماً خير أبنه .. فقد كنتى يا حبيتى دائما تعوضينى عن غياب والدتك .. فقد كانت اتعس لحظات حياتى واكثرها حزناً عندما فارقت والدتك الحياه .. ولكن وجودك ووجود اختك قد عوضنى عن غيابها
سأشتاق إليكى يا منى ولا اعرف كيف اعبر لكى عن حجم هذا الشوق .. واعلم انكى ستشتاقين الي كثيراً .. لكن لا تخافى سأكون حولك دائماً سيظل طيفى يحرسك دائماً
ابنتى الحبيبه .. أدعى لى فى صلاتك وعندما تشتاقين لى قومى بزيارة قبرى وضعى فوق قبرى ورده
اخبرى مريم انى احبها
احبك يا منى
والدك "
اغلقت منى الرساله وهى تبكى
******************************
احمد : صباح الخير يا منى
منى : أهلاً صباح الخير يا احمد اتفضل ، اتفضل يا خال ، اتفضلى يا طنط عفاف
الخال : عامله ايه دلوقت يا بنتى
منى : الحمد لله يا خال بس مكنش المفروض تيجوا الوضع خطر وممكن تتعدوا ولا حاجه
عفاف : يا منى يا حبيبتى لازم نقف جنب بعض وخليها على الله
الخال : احنا ناس اتعودنا نبقى على الحلوه والمره مع بعض
منى : ربنا يخليكوا يا رب
احمد : مريم عامله ايه دلوقت يا منى
منى : والله يا أحمد لسه تعبانه بس ماشين على العلاج
احمد : اهم حاجه انك تحافظى على نفسك وانتى بتتعاملى معاها .. لازم تلبسى الكمامه وتطهرى ديماً بالكحول والكلور
منى : بعمل كده والله يا احمد
عفاف : ولازم تبقى اقوى من كده يا منى عشان نفسك وعشان دلوقت مريم بقت مسئوله منك
منى : بحاول يا طنط عفاف والله
عفاف :عارفه يا منى انا اول ما شوفتك حبيتك انتى ومريم .. انا وعبده ربنا مرزقناش بأولاد ، فأسمحيلى بقى اعتبرك انتى ومريم زى أولادى
منى : دى حاجه تشرفنى يا طنط عفاف طبعا
عفاف : تسلمى يا حبيبتى
رن جرس الباب
منى : عن اذنكوا هفتح الباب اشوف مين
فتحت منى الباب فوجدت امامها استاذ عصام جارهم و كان لابس كمامه وجوانتى و غطاء بلاستك شفاف على الوجه بالكامل للوقايه
الجار : صباح الخير يا أنسه منى
منى : صباح الخير يا أستاذ عصام
الجار : البقاء لله
منى : ونعم بالله
الجار : كنت عاوزك بس فى موضوع كده
منى : طيب اتفضل
الجار : لا معلش عشان بس الكرونا وكده انتى عارفه
قام احمد وقف ورا منى وهى بتكلم جارها
منى : طيب اتفضل حضرتك قول الى انت عاوزه
الجار : هو انا و السكان اتكلمنا مع بعض وزى ما انتى عارفه العماره فيها أطفال وناس كبيره فى السن وكده
منى : ايوه يعنى ايه المطلوب منى يا أستاذ عصام
الجار : يعنى تاخدى اختك وتقعدى فى اي مكان لحد ما ربنا يشفيها وترجعوا
منى : اروح فين يعنى
احمد : منى ادخلى جوه
منى : ثوانى بس يا احمد
احمد : انفعل احمد .. بقولك ادخلى جوه
منى : حاضر
احمد : نعم عاوز ايه بقى ؟
الجار : هو حضرتك مين
احمد : مش شغلك .. قولى بقى عاوز ايه
الجار : حضرتك سمعت احنا خايفين على الناس الى فى العماره
احمد : انت انسان سخيف وسمج وقليل الذوق
الجار : انا مسمحلكش
احمد : اسكت واسمعنى بدل ما اقلعك القناع والكمامة والجوانتى الى انت لابسهم وألففك حتى حتى فى الشقه الى انت خايف منها دى
الجار : طيب حاضر
احمد : عرف بقى سكان العماره ان اى حد هيفكر بس ايده تتمد على الشقه دى ويفكر بس يخبط على الباب هقطعله ايده .. فاهم
الجار : فاهم فاهم
احمد : اه .. من باب العلم بالشئ احنا قرايبها وانا خاطيبها .. يلا من غير مع السلامه .. وقفل احمد الباب فى وش الجار
احمد : قعد احمد .. انا اسف انى زعقتلك يا منى وانى قولتله انى خطيبك
هزت منى رأسها انها متفهمه .. مكنتش عارفه تتكلم من الموقف حست بسعاده وبإعجاب بأحمد .. حست ان فى وراها حد تقدر تتسند عليه
****************************
•احمد ..
-نعم يا عم عاطف
•أستاذ فوزى عاوزك
-أستاذ فوزى المدير
•ايوه
-وده عاوزنى فى ايه
•اكيد هيلعب معاك عشرتين طاوله .. وانا اعرف منين انا
-خلاص يا عم عاطف انا اسف لسعادتك هقوم اروحله
قام احمد وراح للمدير
-صباح الخير يا فندم
*أهلاً صباح الخير يا احمد .. اتفضل اقعد .. ها عامل ايه
-الحمد لله يا فندم
*والشغل عامل ايه
-والله زى ما حضرتك عارف مفيش شغل اوى وقت الكرونا
*اه طبعاً طبعاً .. ربنا يعديها على خير
-يا رب
*تشرب ايه
-لا متشكر جداً يا فندم
*لا لازم تشرب حاجه
-طيب قهوه مظبوط
*رفع المدير سماعة الهاتف .. اتنين قهوه مظبوط يا عم فوزى .. قولى يا احمد انا عرفت انك كنت واقف مع منى فترة مرت والدها
-اه طبعا
*الحقيقه دى حاجه لازم تتشكر عليها .. هى عامله ايه دلوقت
-كويسه الحمد لله طبعا لسه حزينه بس احسن شويه
*ربنا يصبرها الموضوع صعب بالنسبالها اكيد
•دخل عم عاطف .. القهوه
*شكراً يا عم عاطف .. من فضلك ابعتلى استاذ عوض بعد ما احمد يخرج من المكتب
•حاضر يا فندم
*اشرب يا احمد القهوه .. انا كلمتها فى التليفون بس قولت اسألك عليها بردو
-حضرتك كلك واجب
*المهم انا فضلت افكر ايه الى ممكن يخرجها من حزنها ده .. اكتر حاجه بتلهى الواحد وتنسيه احزانه هى الشغل
-اكيد طبعا يا فندم
*بس انت عارف ايام الكرونا دى مفيهاش شغل .. بس هى كانت قالتلى انكوا فكرتوا تعملوا جزء مصور فى المتحف بيعرض الاثار الاسلاميه الموجوده فى مصر
-اه فعلا يا فندم
*وكانت طلبت ان اول مكان تروحوه بيت السحيمى .. وانا كلمت هيئة الاثار وضغطت عليهم جدا احد ما وافقوا
-بجد يا افندم
*اه بس هيبقى معاكوا استاذ عوض المسئول عن المخازن هنا
-مفيش مشكله يا فندم
*خلاص ترجع منى ونحدد الميعاد الى تروحه فيه
-انا متشكر جدا جدا لحضرتك .. هستأذن انا
*اتفضل يا استاذ احمد
دخل احمد مكتبه ودخل وراه عم عاطف
•ها كان عاوزك في ايه
-ايه يا عم عاطف خضتنى انت لازق فى ديلى
•ايه ده انت عندك ديل .. كنت شاكك بس مكنتش متوقع انك هتعترف
-اعترف بأيه يا عم عاطف ارحمنى .. وبعدين هو مش قالك اندهلى استاذ عوض اول ما يخرج احمد
•طيب ما انا نادتله هو انا هستناك تفكرنى
-الله عليك يا عم عاطف مثال للموظف المتفاني فى عمله
•طبعا يا بنى امال انت فاكر ايه .. المهم كان عاوزك فى ايه
-كان بيقولى انه وافق على موضوع بيت السحيمى وهيخلينى اروح انا ومنى
•بجد كويس اوى
-بس هيبعت معانا استاذ عوض .. هو مين استاذ عوض ده
•ده الى ماسك المخزن ومعاه اتنين موظفين تحت ايده
.. انت مشفتوش قبل كده
-لا
•عوض ده اسخف من السخافه واكتر موظف بيحبه المدير
-اشمعنى يعنى
•عشان اكتر واحد بيطبل
-اه مطبلاتى يعنى
•وكمان الى سمعته انه هو والمدير بيتاجرو فى الاثار
-ازاى يعنى يا عم عاطف ميقدرش يتصرف فى اثار المتحف
•ومين قال اثار المتحف .. المهم انت ومنى تخلوا بالكوا منه
-ربنا يستر بقى .. بس ترجع منى الاول
•هترجع بالسلامه ان شاء الله
******************************
يتبع