الجزء الثالث
-صباح الخير يا منى
*صباح النور يا أحمد
-مالك يا منى
*مالى انا كويسه مفيش حاجه
-ازاى مفيش حاجه انتى الدموع فى عنيكى
*لا مفيش حاجه متضايقه شويه بس
-ايوه بقى ايه الى مضايقك
*مفيش
-رخم انا صح
*لا أبداً يا احمد
-يبقى لازم اعرف ايه الى مضايقك
*انا عندى شغل فى الصاله بره كمان شويه
-خلاص احنا نخلص شغل ونقعد فى أى مكان و تحكيلى ايه الى مضايقك
*انت جرئ اوى .. انت شايف اننا عادى كده نقعد مع بعض بره الشغل
-هو انتى قصدك جرئ ولا بجح
*انا قولت جرئ
-انا قولت أقعد معاكى هتبقى اول مره اقعد مع بنت حلوه زيك كده
*ليه هو انت مقعدتش مع بنت قبل كده
-لا قعدت بس مقعدتش مع بنات حلوه
*ههههه يعنى كلهم كانوا وحشين
-ايوه كده اضحكى ..لا كان فيهم حلوين بس مكنش فيهم حد فى جمالك
*احمر وجه منى من الكسوف .. ايه اه شكراً
-ايه ده شكلك بقى اجمل وانتى مكسوفه
*بس بقى يا احمد مش بحب ابقى محرجه
-طيب احنا زمايل ومفيش حاجه لما نسمع بعض او نفضفض لبعض الا لو شيفانى مش اهل ثقه
*لا بس مش متعوده اقعد مع حد بره
-متقلقيش انا الى هدفع الحساب
*ابتسمت منى
-يبقى اتفقنا
انتهى يوم العمل وخرج احمد ومنى وجلسوا فى كافيه
-ها تشربى ايه يا منى
*اشرب شاى
-نظر احمد الى النادل .. يبقى شاى و قهوه مظبوط ..
مش عارف اقولك ايه
*عليه ايه مش فاهمه
-على انك طلبتى شاى عشان توفريلى
*ههه لا عادى يعنى
-طيب قوليلى بقى ايه الى مضايقك بقى
*انا عايشه مع بابا واختى الصغيره ماما متوفيه وبابا عنده القلب ومحتاج يعمل عمليه
-والمشكله فى مبلغ العمليه
*بالظبط
-وهى العمليه هتتكلف كام
*50 الف وزيهم للمستشفى بس الموضوع مش بس فى المبلغ الموضوع ان العمليه المفروض تتعمل فى اقرب وقت
-طيب وانتى معاكى من المبلغ ده أد أيه يا منى
*حاليا معيش حاجه الفلوس بتروح على علاج بابًا ودراسة مريم أختى ومصاريف البيت ولو عملت سلفه فى الشغل مش هتعدى 30 الف جنيه
-طيب انا ممكن اعمل سلفه انا كمان
*متشكره على مشاعرك دى يا احمد .. بس انا مش بحكيلك عشان تقولى كده
-انا بتكلم بجد على فكره
*انت لسه جديد فى الشغل يا احمد ومينفعش تعمل سلفه قبل 6 شهور
-ايه ده فعلاً .. طيب سبيها على الله وهتتحل
*يا رب
-منى هو انا ممكن اسألك سؤال
*اتفضل
-انتى ليه متجوزتيش لحد دلوقتى .. يعنى انتى جميله و محترمه ومتهيألى كتير يتمنوا يتجوزوا واحده زيك
*انا مبفكرش فى الجواز خصوصاً مع ظروفى واتقدملى كذا حد بس رفضت لأنى بعد موت ماما مينفعش اسيل بابا ومريم لوحدهم
-الى هيحبك اكيد هيشيلك انتى وبابا فى عينه .. يلا عشان تروحى ومتتأخريش
*****************************
-فى ايه يا بابا صوتكوا عالى ليه انت وماما
*تعالى يا عم احمد شوف
-فى ايه
*امك عوزانى اعمل قناه على اليوتيوب
•وفيها ايه لما تعمل قناه على اليوتيوب انت مش شايف حجازى بقى بيلعب بالفلوس لعب
*والله حجازى واختك دول مفيش أسخف منهم
•بقولك ايه يا محسن ملكش دعوه بأختى
-اهدى يا ماما بس .. هيعمل قناه يعمل فيها ايه
•يعمل أى حاجه المهم تجيب فلوس
-يا امى المواضيع دى بتاخد وقت عشان تجيب فلوس وبعدين لازم يبقى عنده محتوى
•محتوى ايه وزفت ايه هو يعنى حجازى وولاده عندهم محتوى
-اختك وجوزها عالم فاضيه احنا كل واحد فى شغله
•بقولك ابهرينا احمد لو معملتوش انتوا هتصرف وتعمل انا
*تعملى ايه يا وليه انتى عقلك خف ولا ايه
•ايه عادى هعمل قناة طبخ
*قناة طبخ ايه انتى فاكره نفسك الشيف الشربينى ده احنا بنرجع بعد ما بناكل اكلك بس مش عاوزين نصارحك
•مش عاجبك أحلى يا محسن .. طيب ابقى اطبخ انت عشان مش هعمل اكل تانى
-طيب هو مش عاجبه انا مالى يا حاجه
•ما انت شبه ابوك وش فقر زيه
-يا حاجه ده بيهزر
•انا مش عارفه انا وافقت عليه ازاى ده كان جايب العفش قسط
*فى ايه يا تهانى مش كفايه انى مستحملك بقالى اكتر من 30 سنه
-خلاص بقى يا حاج
*اسكت يا احمد عشان شكلى هرمى اليمين على امك النهارده
•اخرى يا محسن .. انت فاكرنى هزعل فاكر نفسك حسين فاهمى ولا ايه
-خلاص بقى يا بابا لم الدور مش كل يوم هرجع على المواويل دى
*يا بنى هى من وقت ما راحة عند خالتك وهى الشيطان لاعب فى عقلها
-طيب بس وحد الله
*لا إله إلا الله
-انتى عوزاه يعمل قناه يا ماما
•انت هو اى حد
-طيب ادينا وقت وسبينا نفكر الحاجات دى مش عاوزه استعجال
•ماشى اقعد يا خويا مع ابوك وحط راسكوا فى راس بعض انا داخله المطبخ اعمل الاكل الى بترجعوا بعد ما بتاكلوه
-هزار يا حاجه هزار
*انت ايه الى بتقوله ده انت عبيط قناة ايه الى هنعملها
-يا حاج كبر دماغك .. هاودها متعرفش تهاودها ؟
*اهاود ايه انت متعرفش امك دى مش هتبطل زن
-يا عم اهو نكسب وقت بدل ما تفضل تنكد علينا
*انت هتقولى عليها دى خميرة عكننه .. منه لله خالك كانت معرفه زفت
-انت جاى تندم دلوقت بعد كل السنين دى
*مهو انت السبب يا بوز الاخس انت كمان اولا خلفتك كنت سبتها وطفشت من زمان
-ايه ده يا حاج فى ايه انت هتلبسهالى انا فى الاخر
*انا قرفت من عيشتكوا .. انا هاكل وانتم شويه وانزل اقعد على القهوه
-يبقى هنسمع الموال بتاع كل يوم ( اهو ده الى انت فالح فيه تنزل تقعد على القهوه مفيش مصلحه بتتعمل)
*هنعمل ايه يابى قدر ومكتوب علينا
**********************************
بتلبس ورايح فين يا عبده
-رايح عند تهانى شويه الواد احمد وحشنى عاوز اقعد معاه شويه
•بتحب تقعد مع احمد انت يا عبده مع انه من دور عيالك
-وهو فى حد يكره يقعد مع عياله يا عفاف و بعدين احمد ده بعتبره ابنى فعلاً
•مش بتقعد يعنى مع ولاد سناء
-وانا مجنون عشان اقعد مع ولاد سناء وحجازى هى نقصه سخافه دول تحسى ان سناء كانت بترضعهم سخافه
•هههههه ماشى يا عبده .. على فكره انا دخلت جمعيه هتساعدنا فى موضوع العمليه
-جمعية ايه دى يا عفاف انا عمرى ما عملت جمعيات وبعدين قولتلك انا هعمل سلفه من الشغل
•وايه المشكله يعنى اكيد هنحتاج فلوس كتير عشان العمليه واهى حاجه تسند جنب السلفه الى هتعملها
-مليش دعوه انا هديكى المصروف وانتى بقى تتصرفي فى موضوع الجمعيه ده
•ماشى يا عبده ادينى انت المصروف وملكش دعوه
-طيب انا هنزل بقى
•تروح وترجع بالسلامه
وصل عبده لبيت اخته وطرق الباب ففتحت له
-سلاموا عليكوا يا تهانى
~عليكم السلام يا اخويا ادخل
-عامله ايه
~اهو ماشيه
-مالك فى ايه
~قرفانه يا عبده اخر قرف ان كان محسن ولا الواد احمد الاتنين مجنني
-ليه كده مالهم فى ايه
~اقولهم نعمل قناه يتريقوا عليه
-يعملوا قناه ..! وهتعملوا قناة مسلسلات ولا افلام
~انت بتتريق يا عبده انت كمان
-لا بس مش فاهم
~قناه يا عبده على البتاع الى اسمه اليوتيوب ده ولا التوك توك ده
-توكتوك ..! انتى عاوزه تشتغلى على توكتوك يا تهانى
~بقولك ايه يا عبده متتعبنيش انت كمان
-انتى زيارتك لسناء جننتك شكلها
~مدام حاجه نقدر نكسب منها ليه لا
-بلاش قلة قيمه يا شيخه
~اه طبعا ما انت صاحب محسن ونفس الدماغ وانت السبب فى الجوازه دى
-انتى هتقلبى عليه ولا ايه .. احمد فين
~اهو متلقح فى اوضته ادخله يا عبده ادخله يا خويا حط خبتك على خبته
-طيب اعمليلنا كوبيتين شاى صحيح هو محسن فين
~نزل القهوه كالعاده .. هعملك الشاى
قام عبده وذهب الى غرفة احمد
*تعالى يا خال
-انت قاعد هنا ومش حاسس انى قاعد مع امك بره
*لا حاسس ما انا سامعكوا
-سامعنا وسايبنى معاها
*وانا عبيط عشان اخرج تسيبك انت وتقفش فيه .. انت اخوها تستحمل
-اخوها ايه ياد انا ضيف مدخلونيش فى مشاكلكوا
*بقولك ايه يا خال انت السبب فى الجوازة دى يعنى لازم تكفر عن ذنبك
-انا كنت عاوز اعمل جميل فى ابوك واجوزه قولت احنا اصحاب ولازم نناسب بعض
*وابويا عمره ما نسيلك الجميل ده كل يوم لازم يقول منك لله يا عبده
-اتلم ياد بقى .. عامل ايه فى الشغل
*تمام الحمد لله .. الشغل كويس والناس كويسه
-اى خدمه عشان تعرف انى كنت بأمنلك مستقبلك
*فى ايه يا خال انت هتذلنى
-وكنت قاعد لوحدك بتعمل ايه بقى
*كنت بفكر
-وبتفكر فى ايه
*بفكر فى الكنز
-كنز ..! انتوا فى آثار تحت البيت بتاعكوا ولا ايه
*يا ريت يا خال كان زمانى بحفر من زمان
-امال ايه
*فى خريطه فى المتحف الخريطه دى بتاعة كنز
-خريطة ايه دى
*بيتقال ان المماليك جمعوا اموالهم مع دخول الحمله الفرنسيه وفضلت الفلوس مستخبية لحد حكم محمد على وبعدين محمد على عمل مذبحة القلعه والفلوس فضلت مستخبية ومحدش لقاها احد النهارده
-طيب ولما الخريطه فى المتحف محدش دور عن الكنز ده ليه
*عشان التوقع الاكبر انها مجرد حكايه وانت الخريطه دى مجرد حكايه من الحكايات الشعبيه كده
-ولما الخريطه مش حقيقيه حطينها فى المتحف ليه
*عشان هى من عصر المماليك فعلاً فحتى لو مش بتدل على كنز فهى اثر وحكايه مثيره وبعدين كمان دى خريطه بتوصل لخريطه تانيه مش للكنز علطول
-وانت بتفهم اكتر من الخبراء يعنى
*اكيد لا بس فى احتمال تكون حقيقيه و بعدين ليه حد هيعمل خريطه لحاجه مش حقيقيه اصلاً مش عارف بس ليه مندورش
-دور يا فلحوس
*خلى بالك لو فى حفر انت اول واحد هتحفر معايا
-طيب كويس انك قولتلى عشان اجهز الفاس بتاعى
•الشاى
-تسلم ايدك يا تهانى
******************************
-صباح الخير يا احمد
*صباح الخير يا منى .. عندك شغل بره ..؟
-اه بس كمان ساعتين
*طيب كويس نشرب كوبيتين شاى بقى قبل ما تخرجى تشتغلى بره
-ماشى يا احمد
*رفع احمد سماعة التليفون وهو يقول .. كوبيتين شاى والنبى يا عم عاطف .. ايه بابا عامل ايه
-الحمد لله بس مفيش جديد
*ان شاء الله هيبقى كويس وكل حاجه هتتحل
-هو ليه زمان كان احلى يا احمد ليه واحنا صغيرين كنا حاسين بالسعاده ودلوقتى لا
*طبيعى يا منى زمان واحنا صغيرين مكنش عندنا مسئوليات اكبر مسئوليه عندنا كانت المذاكره كمان اكتر حاجه بتخلينا منحسش بالسعاده هو بكره
-بكره ازاى يعنى
*عشان نحس بالسعاده لازم نحس بالامان وعشان نحس بالامان لازم منخفش من بكره واحنا بنخاف من بكره يا منى عشان كده مش عارفين نحس بالامان .. لكن واحنا صغيرين مكناش بنفكر فى بكره او مكناش فاهمين بكره كل الى كنا نعرفه عن بكره هو الامل .. الامل ان بكره هيبقى احسن من النهارده لكن اما كبرنا اكتشفنا ان كل يوم بتزيد مسئولياتنا عن الى قبله وفهمنا فبقينا نخاف وفقدنا السعاده
-ايه ده ما انت بتقول كلام عميق اهو
*هو انتى فكرانى بطيخه ولا ايه
-هههههه .. عارف يا احمد انا بابا ده احن اب فى الدنيا وانا صغيره كنت شقيه ولما ماما كانت تحب تعاقبنى كانت تمنع عنى المصروف .. بابا بقى كان يقولها عندك حق عشان تتعلم بس مكنتش اهون عليه وكان يجى من وراها ويحطلى مصروفى فى شنطة المدرسه
*فى مواقف بسيطه عمرنا ما بننساها .. تعرفى انا طول عمرى من وانا صغير كنت قريب خالى وهو حتى الى جابلى الشغل هنا .. ولما كنت فى ابتدائى كنت شاطر فى الدراسه وكنت معجب ببنت كانت معايا فى الفصل كان اسمها ألاء كنت معجب بيها من بعيد لبعيد كده بقعد اتفرج عليها واسرح فيها وهى كانت شايفه نفسها كانت اجمل واحده وكان كل الى فى الفصل نفسهم يصحبوها بس هى مكنتش شاطره فى الدراسه او ومكنتش مركزه اوى فيها .. وفجأه قبل الامتحانات لقيتها جت واعترفت عليا وبقت مصحبانى وانا كنت باخد مصروفى واجبلها حلويات عشان تحبنى كنت العاشق الولهان بقى وبعدين جت امتحانات نص السنه وقعدت ورايا وطلبت منى اغششها وفعلاً غششتها وخلصت الامتحانات وبعد الامتحانات اتغيرت جداً بعدت عنى ورجعت لأصحابها وبقت تتجاهلنى .. انا فاكر انى رجعت البيت وفضلت اعيط حسيت ان الحب ضاع وحسيت انى مغفل محدش حس بحاجه غير خالى الى حس انى مضايق طول الوقت خدنى وسألني مالك حكيتله .. قالى وزعلان عليها يا عبيط عموما هى هتيجى قبل امتحانات اخر السنه وتقرب منك تانى وتصاحبك قولتله وانا مش هكلمها تانى يا خال قالى لا بالعكس لما تقرب منك كلمها عادى وكمان هديك فلوس تجبلها حلويات اكتر .. وفعلاً قبل الامتحانات قربت منى ورجعت تصاحبنى وخالى بقى يدينى فلوس اجبلها حلويات لحد ما جت امتحانات اخر السنه وطلبت منى تانى ان اغششها ووقتها رفضت ولما وقت الامتحان بقى يعدى بقت تعيط متتصوريش كنت حاسس ازاى بالانتصار وانا شايف دموعها
-هههههه ده انت كنت امير الانتقام بقى
*الخال هو الى خطط مع انه غلبان بس مبنساش الموقف ده لانه مخلنيش احس بالانكسار
•الشاى يا بيه
*تسلم يا عم عاطف
•يا ريت تشتغل بقى وتبطل رغى
*تعالى ادينى قلمين يا عم عاطف
-هههههههه
•يا عم انا بنصحك وخلاص
*ماشى يا عم عاطف تسلم على النصيحه
•طيب عن اذنكوا
*اتفضل يا عم عاطف .. نظر احمد الى منى وهو يقول .. مش عارف عم عاطف مش طايقني ليه
-هو بينكشك ومدام بيعمل كده يبقى بيحبك
*مش مهم هو الى يحبنى
-احمر وجه منى .. طيب انا هخرج اشوف شغلى بقى
********************************
يتبع