عشقهُ خنجر في خاصرتي

البارت التاسع والاربعون

_٤٩_

#عشقه_خنجر_في_خاصرتي

#بقلم_أسماء_ديمير_مع_Roro_Rose

مرام:
وكفت ارتب بملابسي بمراية الممر ، واشوف اخدودي مورده ، يماا فدوه لمروته ، يماا فدوه لجمالها ، نطيت روحي بوسه مغتره بروحي ..

وطلعت من باب مطبخنا ، شايله الصينية بيها شكم قطعة لحم بعجين ،

وفطائر جبن سويتهم للعشا وكلت اوديله يتعشى بيهم اليوم ، تعبان حيل من رجع من الدوام شفته يم الجدة ...

دكيت بابهم هوايه حتى عبالي طالع ،  بس اني متأكده موجود شفته العصر من فات لبيتهم ،  وبعد ما طلع ..

اجيت ارجع سمعت قفل ااباب انفتح انداريت لكيته هو واكف بطوله ..

لازم الباب وساكت ..لابس فانيلا سودة نص ردن وبرمودة ..بعيونه النوم بعده ، توسعت ابتسامتي ،  كون نومة العافية ...

ابتسمت بوجهه ومديت ايدي وانطيته الماعون ...

هاك هذا عشا جبت الك ..

نتر بضوجه وعيونه مطفيه ، ما اريد روحي ...اجا يسد الباب حطيت ايدي عليها

خليت رجلي معترضه ، لا تسد الباب هالمره اريد احجي وياك محمد ..

رجع التفت الي بعصبية وهم طردني

مرام روحي لبيتكم وابد لا تجين بعد مو بحال مشاكل اني البيه مكفيني

وقابل شنو المشكلة من اجيب الك عشاك ياعيني . 

ما اريد ..عاط بعصبية ورجع يتلفت عالحدايق خاف احد يشوفه واكفه يمه ...

روحي مرام لخاطر الله ، باوعي اني فاهمج زين وهاي السوالف ما تعبر بعد عندي ، تردين تلفقين علي تهمه مثل الي قبلها ...

شنو اللي فاهمه انت؟؟

كافي ولج انت ما تملين، ابويه مو بحالج اني روحي كافي مصايبي المرن قبلج مو حمل مصيبة بعد

هاي اني المصيبة؟؟محمد؟؟

-انت طاعون ،بلاء وينزل المصيبة رحمة يمج!

تدري وهم ما ازعل منك ابن عمي حقك الصار مو شويه وقبل جان عدنا موقف ..

فتح عينه متعجب ، تره دا اطردج واسمعج حجي سم !!روحي يلا بعد لا تجين ،  انسي اخاف ببالج شي من القديم ، كل شي ما ضال الله وكيلج .

.كرهتج قبلهن كلهن انت ،روحي مرام!!انت اول مره كرهتني بجنس كامل واجيت اصلح بس الظاهر كلجن نفس ال.....

دكافي عاد راح اروح وما اجي بعد والله ، شنو اضل اتوسل هاي شكم مره صار تطردني

اي خلي عندج احساس وروحي اذا صدك

براحتك رجعت خطوة واني اراهن نفسي ما يسد الباب واصبر بنفسي لا ما تصير ما يسويها ..

. بس سدها !!...صفنت هيج صعب صاير طبعه ؟؟الصبر يا رب ما متعودة اتوسل باحد اهتمام!! ولو هو يستاهل بعد كل هالسنين يلا توصلت لهذا الشي

من اجا لليوم واني حاطته ببالي يوم اتعمد اوكف بدربه ،  من يروح لجدتي ،  يوم اسوي اكل واوديه اله.

.واتحجج للسوالف وياه ، بس كان مطفي فد مره ، اي واهس لاي شي ما اله ، بالاول جان اوك ياخذ الاكل ،  ومن اوكفه ينطيني مجال بس من حس بتقربي اله بي غاية ..

صار يتهزم او بالاحرى يصدني وباخر شي كام يطردني !!

..كسرة اخته وزوجهه ، ودكاتهن بي خلنه دايخ بزمانه ، وادري بي الدين فوك راسه ، نوب محمد لهسه ما يدري اني ناطيته مبلغ وعباله من جدتنا

رجعت لبيتنا واني شايله الماعون ،  خليته عالسنك وكابلت الشباك اتفرج عالحديقة ، شلت قطعة فطائر اكلها وواحجي عليه بيني وبين نفسي ما منتبه لصوت افكاري كان مسموع ؟؟

غبي !!اصلا شكد طيب عاشت ايدي والله هو منو المحصل مني شي اني ..غبي!!

تداخلت بافكاري شدن وهي تجر قطعه ثانيه من الماعون وتاكلها هي تجاوبني

اي والله غبي ولا يفتهم ، وانت هم اثكلي تره الثكل زينة ..

.كلش مستخفة يولي وهو مو بحال سوالف ، هنه مطيحات حظه جنس حواء ، وانت جايه هسه تدورين وياه قصص حب

اريده شسويله الغبي اكوله راح ازعل يسد الباب بوجهي  !!

هاا وقبل منو جانت ما راضية وهججته تره انت اول وحده

معليه بقبل هسه اني تغيرت ما تشوفيني تغيرت؟؟

لا والله العناد نفسه وهسه لان بي عناد تريديه

لاااا هو مدا يفتهم مني ولا يريد اصلا يفتهم ديطردني ؟؟

اي عادي شتريدين رجال غركان بدين وطلاك ونفقة جهاله ومتعارك ويه امه وابوه

واخته والديانة ديركضون وراهوانت لاحكته هسه انطي صبر

لا

هي شنو لا شبيج مرام صدك تحجين اجبار خما اجبار ..

-اي والله اجبار ، احجي صدك ما اعوفه ..

عزاا بعين صلافتج والله ولج ديكولج جوزي مني

سكتت ما جاوبتها طلعت لبيت جدتي هو بالعشا يروح يمهن ياكل قابل بكيفه وما ياكل من ايدي ... واخذت ماعوني وياي مصممه ياكله  ...

فتت يم جدة وعمتي كاعدات مكملات صلاة ، عمتي صابرين تقرا قرأن وجدتي دتسبح بسبحتها الحجر ...

اجيت يمها جريت سبحتها وبستها من طرفها وبست ايدها هم وهي ضحكت

هاا ولج يولي شجايبه

جده سويت شلون لحم بعجين وذكرتج

ابتسمت ودنكت تكمل تسبيح وحجت

هاااا ..اي عاشت ايدج بس ولج لو تمشيهن عالكل عليه ما يمشن هذني

هههه جدة بروح الاعزاز غلسي وعود شنو كولي طيب ..كلش طيب

اي وبعد

الخير وما مدت ايده شتكدرين تساعدين

مو هسه بعد الولد طالع من مشاكل وما عنده

جدة احل مشاكله نصهن

ولج ولج شنو راح تدفعين مهره

يصير؟؟

-يبوووصخام ..خلت ايدها على خدها ..ولج مرام استحي

والله اذا استحيت تسوون بيه سواية الما صارت ما اعرفكم هاي عمتي هالجانت ساكتة الكم شحصلت؟؟

والله لو ما عزيزات لا اخليهم يجسرون عضامجن

ميخالفةهسه شتكولين

شكو
مبتسمة احاجيني وفاهمتني هي  بعد كلت

اريد ابن عمي

هههه ما يصير لغيرج

ضحكت واني بوستها ، حبيبتي الله لا يحرمني منج رجعت بست ايدها ، اني كاعدة يمها وحضنتها من كتفها ، اني ضخمه وجدتي ناعمه وملامح الكبر ماكلتها ، اني من عشت وياها تعلقت بيها...

صرت احبها اضعاف ، لان شفتها شكد تحبنا وگلبها على كل واحد بينا ، حتى ايمان شكد جانت تتمناها تضل كدامها وتتطمن عليها..بس ما كدروا عمامي وولدهم يحافظون عليها ...

بهاللحظة وفات هو من شافني صدك عبالك شايفله سعلوة ، سعلوه  التاكله وتخلصني منه ومن حبه وين جانت الي اتوسل وهو يجر بضهره ويتعزز عليه... ضجت بيومها واني اشوفه يثكل وياي لا وبعد يطردني !!

سلم وكعد على عالارض وارتجى للحايط بتعب ، وحط ايده فوك كصته عمتي صابرين صدقت والتفتت اله،  وتقدمت ليمه وتحاجيه عبالك دتحجي ويه طفل ، يا الله وين بعد يفرق عنده دلالي اله وهو عنده من يحبوه هواي ..

صابرين:عيون عمتك شنو مشتهي تتعشى ببالك شي اسويه الك

محمد:اي شي عمه لا تعذبين نفسج

الجدة:سوي جاي وجيبي شوربه ،  وهاي مرومه جايبه النا العشا ، يفدوة لادياتها شكد طيبات مسويتهن ..

اني عود مكيفه بحجيها وهي ما ضايكتهن بعدها ههه يلا المهم بعناده غصب عنه ياكل بكيفه ما ياكل من ايدي ...
الف عافية

وكفت وحاجيتها ، اترخص جدة ارجع لاهلي هسه امي تكول وين رحتي ..

ما تاكلين ويانا

لا الف عافية جدة
كامت عمتي صابرين طلعت واني لحكتها يم الباب وعينه صارت بعيني والتفت والله ما اعوفك بحالك يا ابن عمي!!

........

شدن:
تمددت على ضهري توه اريد انام ،  وحسيت بدفرة خفيفة بجانب بطني ،  ابتسمت وثبتت نفسي حتى احس بوحدة ثانيه شويه وتكررت ...

ضحكت بصوت ..غدير كاعد يتفرج اللعبة التفت الي باوع الي باستغراب ...

شكو
يتحرك النونو
عاف اللعبة وصار يمي عالسرير

وين ؟؟شلون شتحسين؟؟

هنا شويه مثل الرجفة شي بسيط هيج دفرات خفيفة

حط ايده عالمكان ويكول ماكو وين ، هاي تتخيلين انت... بعده توه يشيلها صارت حركه ثالثة واثنينا ضحكنا ما مصدكه حس بيها وهو هم

شنسميه اذا ولد وشنسميها لو بنية

اريدها اذا بنية اسميها اني

اي

اسميها لينا

واذا ولد عدنان ههه

لا صدك ما اتشاقى اريدها لينا

براحتج واذا ولد منو يسميه

انت !

هههه كلت هسه تصير نحسة وياي بعد الصار... والله انت ذهب شدن واني حظي شكبره والله شكد موفقني

اممم والذهب ما مرغوب جان قبل صفر..عوجت حلكي مو عاجبني كلامه ..خمط بوسه من شفتي وهو يضحك

اموت عليج والله ...يولي جنت معمي والا لا هي احلى منج ولا احسن بس نزوة وربنا غفور رحيم بعباده بعدها عنا

لا والله هو هذا الحظ دنكت وايديه تشابكت بحزن

يولي ذكرتج شنو ؟؟؟

والله مو ذكرتني اني ما ناسية اصلا

ديلا لا تزعلين ما يلوك عليج الزعل سولفي يا عيني شتردين تسمين وليدج

ما اعرف باسماء الاولاد اني

لعد من يجي راح يجي اسمه وياه باذن الله

ما مفكر لازم وما مهتم؟؟

ليش تزعليني يولي؟؟

مو هذا اليجي ببالي

لا بالله مو هاي السالفة بالشغل جماعتي يسموني ابو مكي تقبلين تصيرين ام مكي

يبووو شنو هاللقب

والله عاد القابنا ما نختارها احنا ..هاي جماعتي ههه

لا عيني نسميه اسم حلو شنو ابوه غدير وهو مكي ؟؟

غير تفضها وتنطي بديل لا اسميه مكي اني متعود عالاسم

لااا عيني ..اسمه ادم لو يزن

يبووو شأكره اسماء الطشة ..يولي خل نسميه حارث

عووع شنو هاي ..نسميه اسد

ليش مو جلب يولي ما اريد اسم حيوان

يبوو دوختني

شبيه اسم مكي

عفيه تحجي صدك انت ضربته ببطنه ضايجة شكله جاد

هههههه ..لج بعده توه تحرك يجي والله كريم

معليه تسميه مكي؟؟؟

ضل يضحك واني الح وياه ، لا صدك يسويها بالاخير من كثر ما تعاند وياي،  وجادلني صعدت وكعدت فوك بطنه ، واخنك بي بالشقى انتبهت لكعدتي كلش خجلت ..

من سكت ونظراته تباوع الي تفترس ملامحي جرني اله فوك صدره وقربني لشفافه وباسني بقوة

ابقي يولي هيج

لا ثكيلة شأبقى
ثبتني وحضني بقوة ضمني لصدره ورجليه منل ومنا حوالين بطنه..

اووف لو مو الحمل وتعبانة؟؟

ضحكت وعيني بعينه سالته

شنو تسوي؟؟

يابه اعوض على الفات

سالته بفهاوة واني ذايبه

شنو فاتنا؟؟شتسوي غدير اشتعل وجهي خجل واني اقرب بروحي اكثر

ولج لا تلحين وياي كوه لازم روحي

تحبني يعني

هاي لسؤالج الاول ...باسني بعنف وطول وبعدها قطعها ورجع همس باذني

وهاي عن الثاني
رجعت تحضرت بس تفاجأت بي عضني من رقبتي بقوة وفرك وجهه بمنحري

وهاي عن الثالث ... دغدغني وضحكت بقوة
دفعني منزلني عنه وهو يسب

هسه يجونا وتوكع براسي يكولك اني الاتحرش بيها وهي فقيرة دشوف الضحكه العايقة

ههههه اي هو هذا الصدك

صدك بعينج اولدي واعلمج

بعدنا مندمجين واندكت الباب انهجمت ومرام تصيح

شدن تعاي امي تصيحج؟؟؟شدن اطلعي

هااا شكلنا يابه

هههه خل اكوم اطلع ...وكفت عنه وهو انتبه لشي بيه وانفتحت عينه بخبصة

ولج هاي شصاير بيج ؟؟

شنو

لا تطلعين هيج اشر الي على ركبتي لما اشوفها بمرايه كلها خرمشة واثار حرب عشاق توها انقضت

عزااا هاي شنو ههههه شراح يخلصني

اني معليه ؟؟رفع ايده مسوي نفسه برئ وخايف ....اندكت الباب مره ثانيه والخبيث فتحها وانهزم وفاتت مرام هاده عليه شهكت اول ما شافتني وطبت صدرها

-ايا گو......دين هاي شنو ؟؟عزااا ولج شوو هاي شلون تسووها اقصد امداكم هاي شنو شكد حلوة اوووه اقصد انت غبية ولج مو الجاهل يوكع من سوالفكم

اسم الله فال الله احسن من فالج ...يمعودة ما عليه شي وما مسوين شي

اممم ما مسوين يا دادة وهاي شنو لعد تدريب لو احماء

ولج دبريني عزاا شلون اروحها

ششايفتني ولج اني روحي اسالي ذوي الاختصاص اني خطيه فتاة سنكل حديقة بريئة شمعرفني بسوالفكم وفوكاها ولا واحد يستحي مني لو يكول عيب منها

ولج قابل البس حجاب بالبيت ، شكد عيب من عمه

واني لعد شنو تنكة دهن خلصانة ، رايح لونها تارسيها نفط ، ما تراعون مشاعري الله والاكبر عليكم ، ولكم زوجوني خرب باالحظ العمر طار نصه والباقي راح اكضيه اون من مفاصلي شوكت اخش دنيا الله يساعد كلبج عمه صابرين

طلعت دردم ،تمشي وتحجي

كون جدة لو عمتج تشوفها دا تعرفج العيب شلونه ..عااا معليه والله اريده لهذا الجيران !!مدت راسها تسالني

اكولج شدن هو كل الزلم ادب يوك مثل زوجج
ضحكت من خاطري على سوالفها

وهي تحجي مستمرة

لا يولي دكولي اخاف اتزوج ويطلع الزواج مو هيج ويطلع اارجال لا يفوخ ولا يدوخ ...واكفه وتسولف بعلو صوتها ما نشوف غير نعال اجانا يهف وكع ترس براسها

ام غسان:يمصخمة تخزيتي منين متعلمة هالسوالف
مرام:اووف يمه دعوفيني دشوف دربي

عساج لا شفتيه يا عرمه اني ادري يردج علينا ..شياخذ عوذة

تخوصرت ووكفت وتدافع

لا عيني لا ...اصلا يشكر ربه صبح ومسية عنده مثلي

يبوووو هم كالت يشكر ربه عليش على عرامتج داده

مع الاسف محد منكم معترف بيه اهل جيس حب انتو ....

مرت هذيج الايام مرتاحة ويه زوجي بس ضلت عندي خوفة من مريم وما مأمنة من ينكسر حد الثقة بين الزوجين بعد كلش صعب يرجع ..

مرن افكر يجاريني لحين ولادتي ، ومره اكول يجوز متزاعلين هسه وبعدين يتراضون واشكال افكار تلوج ببالي واكيد تأثر على حياتنا لو شكد ما احاول اخفيها

.....

مرام:
واكفة واغني لامي بعد ما كامت تحاسبني عالطلعة والوكفة بالحديقة كل ما فات وتهدد بيه باخواني واني شكد فقيرة عاد ...اغنيلها

جيران نزلوا بالطرف يا يمه احبهم .....
هي تهز بايدها وتحجي عليه

صار الهم عمر جيران وكبل جان خطيبها هسه عند الشاب،  وطلك حنت اله گبور مو هذا الطلعتيه من الكلجية من رادج وخليتي ابوج يفسخ خطبتج

-جنت ما افتهم يمه ...فدوة يمه لا تكعيني عنه قابل شعندج هو بس اني هالبنية

اي والله شعندي الا انت بس يمه شيورطج  بي هسه وبعد ما طلكنا اخته ولج يمه غاوية شلاع گلب انت دبطلي

-لا والله ما ابطل باوعي يمه اني فشلة احجي ويه غدير بالسالفة هو مو يطلبه

اييي

واني اطلب اخويه اكثر من طلبه

اي

اي فك بفك خل لا يحط سالفته بسالفتي يمه

يعني شلون

يعني حلال زلال على غدير الفلوس ، بس يجوز من محمد هسه ، يمه خل ينطيه مهلة ما تشوفوه معلول والله السكر ديرتفع اخاف يصير اله شي ويطير عريسي ..

الجلبة اخوج نهبوها لفلوسه ، وغدا ها كدوته من القهر ، وانت دتضميلهم فلوس وتخافين عليه ..

لا مو هيج بس محمد خطيه قابل هو الاخذهن اشو همه بالاخير طاحن براسه وعمي مغلس ولا جن بنته هي

واخوج؟؟

شبي اخويه

مو خطيه

اووف محد غيري الراح ينسحل بينكم هسه كلها تطلع خطيه

دنجبي واكعدي لا احطج بيد اخوانج

هو انت هذا التكدرين عليه روحي شوفي جدة شلون تحاجيني وانت شلون اابنية وين تروح اذا مو لامها

وانت جايتني سائلتني اشو من حمد الله انت التقررين عني..وبعدين استحي شويه الخجل تاج للبنية

يمه شكو بيها محمد قابل ما نعرفه ابن عمي وقبل جنتوا كلكم مكيفين بي

وهسه انت عميتي من رجع مطلك وبالضيم

يمه حتى ابو المثل شيكول

اي بالله شيكول

خيعونج يالجارج نسيبج

هههه يولي لا تاخذيني بلسانج مو ابوج الله يرحمه اني

لا والله مو مثله ابد
باوعت الي بطرف عينها واني سويت نفسي زعلانه مدا ترضى ام غسان عالنسيب مدري شعدها وياي

فات بهالحجي هو واني كومه صار منتظرته ..امي معاندة اطلع
-اكعدي اكسر  رجليج اذا لمحتج بره ...مراااام !!

هزيت راسي ودنكت عود مقهورة فتت من يمها عود رايحه لغرفتي وهي تكلي لمصلحتج احجي يمه انقهرت هي امي عدها گلب سمجة حجايتين تلين ...

وصلت الممر لفت وطلعت من باب الاستقبال والله شمرت نعالي كبلي بالطرمة وطلعت مطيرة مدري شافتني مدري لا ....

خل الحك اشوفه هي هالسويعة اشوفه بالنهار واني واكفة الي عالطلعة ...

وصلت لبيت عمي اول ما فتت لغرفة جدتي تلكتني تضحك ومحمد عصبي صاير

وهاي هي اجت
انعكد لساني من شفته مدنك يمها وكاعد وهي تأشر الي

تعالي بنيتي

هاا جدة

تعالي هنا جاري
رحت وكعدت عااجهة الثانية منها اجا يكوم جلبت بيده

مو دنسولف اكعد

ما اريد هالسالفة تسديها

لا تكعد وتسمع

جدة لا تلحين عليه لخاطر الله بيا حال

شيي حالك او اخر رجال يطلك وهي بنت عمك وراضية

احمر وجهي من وصل الحجي كدامه وهو رافض وعصبي ....اني كمت من يمهم مرتبكة وانقهرت

اروح اني

شبيكم تعالوا اثنينكم هنا لا اكوم الكم بهالعوجية

محمد:اعذريني جده على عيني وراسي امرج بس هالشغلة مو راهمة

مرام:اني اروح

الجدة:وين موليه اكعدي اكولج .. خزرتني ..

رجعت يمها من صاحت بيه وخنست وهو وياها اشتعل بينهم الحديث وكله دار مقابيلي تقنع بي وترغبه وهو رافضني اصعب موقف ممكن بنية تنحط بي ..

طلع من يمها بعد زعل صار بينهم واني بس راح بجيت

ااجدة:شكو تبجين يولي

ما سمعتيه شيكول

صدكتي ولج..يحبج محمد

شيحبني يموت مني والله

اني اتصرف دكومي روحي

جده اذا ما ياخذني هالمره ما ياخذ غيري !!
كلتها اني عصبية واهدد وهي طكتها ضحكه

يااا وشتسوين عود

ما ادري شسوي ..لطمت على رجلي وهي تسكت بيه وتلوم

وين جان عقلج

جنت مخبلة ..هسه عقلت ..ارتاحوا

كمت طلعتمن يمها اركض للحديقة وصلت بيتنا لكيته واكف بحديقتهم وعينه عالدرب شافني وكف بمكانه صافن عليه..

. شفته اني قويت نفسي ولا كأني مهتمة عيني بعينه خزرته لما طبيت بيتنا بسيطة محمد اني الك؟؟

....

مرت ايام كطعت رجلي عن الطلعة كلش وامي مكيفة عبالها عقلت وشدن تكول شنو بطلتي واني ما ارد لاحد دزت جدة عليه ما رحت

وهناك واندكت الباب بليلة من الليالي ...محد يكوم للباب كلهم عطلات غدير توه يغفي منو يجينا هسه اكيد من ولد اخواني بس ذوله ااقرودة ما يدكون باب !!

كمت فتحتها والكي هو ...وكفت ساكتة ما ادري شأكول اله

شجابك

هاي هيج تتلكون ااخطار..جاي على غدير موجود

هاا لا تفض...اوكف وين تتفضل خل اسويلك درب ..شتريد ؟؟

شعليج انت
عفته افوت اصيح لغدير حاجاني مره ثانية

اشو ما تطلعين صايرة
خزرته ما جاوبت ...

طلع اله غدير وفاتوا بالصاله واني بقيت بالهول كاعدة وشدن راحت تسوي ضيافتهم
وهيج صار محمد كل يومين جاي بحجة شكل ..

صارت عزيمة يم بيت غسان اخويه طهر ابنه الصغير ورحنا كلنا هناك وعزموا كل عمامنا ...

بعد العشا وكاعدين غافر اقترح يطلعون الجهال سفرة هو وزوجته ومنو بعد يريد يروح  ...اني كيفت وين طالعه اني وعمتي صابرين اكيد نريد نطلع ..صاح بينا غسان

وين رايحات جهال شنو ..لا اخذوا بس الجهال وامهاتهم وكل وحده تحير بزعطها ...عمتي صابرين خل تروح مرام ما تطلع

مرام :يعني ليش ما اروح ...كلتها بواهس مكسور وجاوبني بكل تجبر

ما عدنا بنات يطلعن  انت بالذات ما تطلعين غير لگبرج بعد ...كل الكاعدين سكتوا محد رده فراس بعينه شماته ضمياء تشاور بغسان وتاشر اله بمعني لا...

...سكتت وانهضمت حيل بس استاهل اني الوصلت روحي لهنا ...جدتي حجت وياه بامر وزمخ

اني اروح واخذها وياي

غسان:كافي تقويها جدة

ام غسان:هي اصلا شلها بالطلعة ما تريد

محمد:اني رايح ويه جدة وعمتي بسيارتي نلحكهم خل تجي ويانا

الجدة:اي محمد يوصلنا
سكتوه لغسان غصب عنه رغم استمر برفضة وبالاخير غافر تدخل وقنعه...

طلعت من بيته عفتهم ..مختنكة ومقهورة ...لحكني فراس ويسولف وياي يريد يقنعني بالزواج .

.وكفني واني تخبلت عليه واتعارك وياه ..وارزل بي وهو يهدد يهدم حياتي اذا ما اوافق ، دفعته بكل قوتي وانهزمت ابجي لبيتنا .

ثاني يوم وبالكوة قنعوني ابدل اروح وياهم عمتي صابرين دازتها جدتي عليه لان دروا ما اروح بعد ...

كومه انتظروني.طلعت حتى مو بواهس ، صعدت وياه وكان هاليوم فعلا مختلف .......

غصن ..

مرت اشهر على زواجي ولا من حمل ولا من اكو امل ، مشيت لامي اشكيلها الحال ، جانت نوبات تاخذني للدكتوره لان تنقهر علي ، ونوبات اطك حوصلتها ، ترد عليه رزايل وحجي وتكلي كاافي عاد ادري مايصير هسه شلحيتي …

 وصلت مرحله بلشت اشك برياض خاف الكبر مايخلي يخلف ..

نوبات اصفن ابجي هو مخلف جوز السبب بيه اني ، زين شلون اضل هيج طول عمري بلا ضنى ..

رياض يضحك علي وماخذ السالفه دلال نسوان ، بس اني تحفر بكلبي وراي وراي وحبلن وخلفن ..

كملت سنه زواج وماكوو شي ، دوره تغط وترد تنزل ،  عشت بقلق ، عليش تغط اذا ماكو حمل ..

رغم عمري ثلاثينات بس خفت لا تنكطع دوره طول العمر ، وهنا من صدك افقد الامل ..

كطعت شهرين وردت نزلت ، ضليت هيج معلعله …

رحت لامي وحجيت الها ، يماا سنه و نص وماكوو شي ، حبيبه دنروح نكشف عد دكتوره مره ثانيه  ..

كالت ياامره الثانيه ولج كولي مره الالف شجاااج لحيتي ياامي .. مو كالت الج دكتوره مابيج شي ليش تلعبين بنفسج انتي ..

بجيت صار فوك السنه يمااا فوك السنه …

بعد وكت واذا صار سنه شنو يعني ..

اني ، هذا الحجي ماصرف الي ..

مشيت للحجيه شكت وبجيت ، انقهرت علي كالت اكو وحده جده قديمه ، تسوي اعشاب دكومي دنروح الها تكشف عليج ..

ركضت لبست عباتها بهمه ، امي مارضت و عمتي صابرين حجت وماقبلت بس اني جلبت ..

الغركان يجلب بكشايه ، اخذتني الحجيه و مشيت درب كله ابجي ، وادعي ربي يفرجها كون ..

وصلنه قريب بيتها ، بيتها جان بسيط حيل لدرجه باب ماكوو ، وخالين برده ..

صاحت جديتي عطيييه ياااخيه عطيه وينج ..

ماكو رد…

دفعت برده جديتي ودخلت واني وراها عيوني تفتر بستغراب ..

صاحت مره ثانيه قريب شباك و طلعت بنت صغيره ، الشعر لونه برتقالي ودشداشه مجربه وكفت تحك براسها الماكله وصخ صاحت منووو ..

صاحت الحجيه ، جديتج هنا ولج .

ردت ذيج وانتي منوو ..

كوليلها ام ثامر اجتج يله امشي ..

هااا .. وكفت  تباوع ..

نترت جديتي امشي ولج ..

عافنته تفر بديها ماعاجبها ، شوي وطلعت مخصره جديتي تكول دشي يله بس انطيني خمسه الاف اجيب الجن  ببسي بيها و كعك ..

رفعت حواجبي اني ..

جديتي ردت لابارك الله بيج و بجديتج ، مدت ايدها لجيب دشداشتها صاير جنه كونيه واصل لركبتها من طوله ..

طلعت الها الالاف الكلهن ريحه مسك وعنبر وخلتهم بيدها تحسبهم الف الف وربع ربع خاف يطفر ربع زايد ..

حجت وياي غصين جده هذني خمسه موو احسبي وياي ..

خليت راسي احسب بيهن كتلها خمسه حجيه خمسه ..

دخلنه للبيت كله تراب وصخ ، جديتي جن تندل الدرب دخلت كبل لغرفه صايره على صفحه ..

النسوان اكو واكفات على صفحه بس سلمت جديتي و دخلت واني ركضت وراها بخوف  ..

بس دخلت واشوف ، لان عجوز نايمه على فراش وجها تعبان ومصفر ، 

جديتي حاجتها هاا يعطيه جن العمر اخذ حيلج..

حجت ذيج وهيه مدده وانتي العمر اخذ منج هواي يام ثامر ..

كعدت جديتي كبالها مبتسمه شلونج خيه شلون حالج ..

هذا حالي بعد مدده حالي حال الميت انتظر رحمه الله وشوكت ياخذ امانته دارتاح ..

اسم الله عليج بيش طالبه روحج ..

عظم البشر ثكيل يام ثامر صفيت تحت رحمه الجنايم الموت راحه الي ..

سكتت جديتي ، العجوز اندارت علي حجت منو هالحليوه ..

ردت جديتي حفيدتي هاا بنت ثامر ..

وشبلاهاا ..

ماتخلف ..

ضحكت لا عين الله تحرسهاا حباله هاي لاتخافين ..

وين ياخيه بت صارلها صيفيتين بلا حبل ..

حجت تاشرلي شو تعاي جاي دشوفج..

تقربت بريبه خايفه ..

حجت عينيني داكعد عدل ، مديت ايدي اعينها ، جريتها وخليت وراها المخاد ..

جلبت بزندي حيل وجرتني عليها ..

مدري شقرت بحلكها وهفته بوجهي ..

رجعت ليوره خايفه كلبي يدك حيل ..

صاحت ولج فردوس وينج تعاي ..

اجت طفله نفسها تركض هاا جده ..

فجي الكنتور هذا وطلعيني الصره مالتي ، مشت طفله تفتح واطلع بالغراض ، كالت ذيج العلاكه سوده جوه ايده انطيها الي ..

شالتها وخلتها بحظنها دنجت الحجيه تفتح بيها ، طلعت منها اعشاب وخرز ..

صاحت لحفيدتها فوريلي هذني بالعجل وجيبهم الي ..

ركضت طفله تسوي الي كالت عليه الحجيه ..

اني لبدت بصف جديتي الي اخذها الحجي وياها على اخر الاخبار ..

بين ماجابت الطفله الاعشاب مفوره ، نطتهم لجدتها كعدت تقره عليهم ، وتلوط باصبعها رفعت نظرها علي وحجت تعالي جاي …

عيوني تفتر على جديتي خايفه و خجلانه .

جديتي دفعتني عليها ، تقربت الها ، مدت الكلاص بي الاعشاب حجت اشربيهم بالعجل قبل لايبردون …

جريت الكلاص وشربت منه شوي ، حجت كله بالعجل يله ..

جريته و صكيته بسرعه رغم مروره الي بي رغم بشااعه الطعم بس كحمته اجبار …

عفست وجهي لعبانه نفسي ..

حجت الله كريم باذن الله مايفوت هذا صيف اذا مو حبله ..

جديتي ابتسمت برضى ، وحجت يله ولج كومينه ..

كمت لحيلي حجت جديتي وياها الله يكويج ياعطيه ، ماعليج غير العافيه ..

بوستها وطلعت ..

توه نطلع صاحت مره من المطبخ وين جااي ماشربتوو ..

ماردت جديتي عفاهن وطلعنه ..

درب كله جديتي تذم بيهن وبجناين العجوز وشلون ماذياتها ، 

رجعت للبيت معدتي تكلب ، مروره بحلكي حتى دخت طعم زفررر ومر مر بشكل ..

لنص درب وزوعت ، كعدت على صفحه فدوه لعينج جده هاي شنطتني ..

شنطتج قابل هنه اعشاب كومي ولج فشلتينه بنص درب ازوعين …

جرتني كوه واني دعيت خركه الاعشاب كلبت معدتي نار وجمر ، نوب انحصرت اريد امشي للتواليت …

لمن وصلت لبيت اهلي متت ، دخلت ركض للتواليت معدتي خرطت ، نوب ازوع واركض للتواليت حرت بينهم الاثنين .. 

امي تخبلت على جديتي وشسويتي الها وبت راح تموت غضب الله سممت البت .. 

اني مااحجي احس معدتي انسعرت سعرر..

لليل واني لا معدتي كضت ولا حلكي بطل ، حتى لو ماتقيى بس اهوع ..

لثاني يوم صرت خركه وكعت متخربطه ..

شالوني للمستشفى شيل ، بس اسمع عرك. جديتي وامي تمالخن و صوت رياض مفزوع شبيهاا ولجن شبلاهاا دزيتها الكم صاحيه شبيها جنها ميت …

للمغرب واني بالمستشفى الالم بالمعده خف ، والحروره اختفت ارتاحيت شوي ، احس جسمي هود ..

اسمعهم يحجون على انو تسممت من الاعشاب الي اخذتها ..

وامي تلوم بالحجيه ، والاعشاب فاسده هاي جان موتتني ، جديتي ضلت تغلط وطلعت زعلانه ..

فتحت عيوني رياض فوكي وجهه احمر عصبي ..

بلعت ريك فوك مرضي نوب وجهه ميبشر بالخير .. 

امي على صفحه شافتني فتحت شالت اديها وغمتني ، ياااا عزاا شبيهم ..

دخلت الدكتوره تشيك عليه واني مافكيت حلكي ، خاف لا يلتمون علي ويطبنوني ، دخلت تشوف المغذي شافته خلصان ..
ابتسمت بوجهي ، شالت بطل عصير قريب مني ، وحجت اشربي السوائل زينه عليج ..

اني جريته خايفه ملا جاره ، وجهي باهت ومرعوب منهم ، شربت منه ، وعيوني عليهم …

حجت يرادلج راحه ماما ، الطفل نازل مو زين هالشي .. 

 هيه حجت هيج وابز العصير بوجهاا ، بعفطه …

عطت حااامل منووو ؟؟؟!

هيه انرعب ورجعت ليوره تعيط ييييع قرررف وتنكت بروحها من العصير  …

امي كامت لابارك الله بيج اي والله شوو دكتوره مابيج شي عيوني اعذريني وكفت امي تمسح بعباها الصدريه مال دكتوره وبوجها وذيج تصيح ويييع خرب وخري …

رياض دار وجهه وسوه نفسه ماشاف يتلافه الفشله ..

كعدت على حيلي منوو حاامل اني جذاابه ..

رفعت نظرها علي دكتوره جذاابه شنو احترمي نفسج ..

امي نترت بيه ولج غصن وجع ، انلصمي ، خليت اديه على حلكي ساكته ..

وخرت دكتوره مزعوجه وطلعت بره دردم ، رياض اندار علي يضحك لازم اطلعج مناا انتي ما تتامنين ، ردات فعلج ماتنظمن ..

ضحكت عليك بكل عزيز صدك حبله اناا ..

هز راسه اي والله تبشري تبشري ..

امي واكفه مزنبره بعدين ابتسمت حجت عود بالمبارك ..

ضحكت عود صدك حبله اني يمااا  ، 

امي حجت لعد شبيج شناقصج تكومين بالسلامه ..

انشالله يما من هسه اكلج اني متبريه منكم لحد مااجيب اي لعد شلون ، اجيتكم خطار  ، واجيت اموت اليوم بسببكم هو اني شايفه منكم بس الظم ..

فكت عينها لا يابنت الجلب هااي منوو ماشافت منه بس الظيم ..

اي انتوو والله يالله وينك زلمتي ياازلمتي وين رحت تعاي حبله لاتخلي احد يغثني فدوه لعينك ..

هو يضحك اي يله تعاي دنمشي لبيتنه وادللج  .. 

كمت لحيلي البس عباتي ولازمه ظهري واكوله جااهل جااهل لايوكع فدوه ..

امي فاكه عينها ، تكول ياناكر المعروف يابنت ثامر …

رياض يدافع الي يكللها حجيه بلا زعل المره دزيتها الكم شحلاتها ذبلتوها عليش يابه بيش طالبيها للمسكينه جان ماتت هيه وطفل ..

اامي  ردت يااطفل فدوه لعينك كله على بعضه عمره اسبوع ..

رديت اني ااي زلمه لو مو زلمه ..

وشدراج هذا ولد ..

مو ابن رياض معناها ولد انشالله يله عيوني ابو هاشم يله امشينه تعبت من وكفه ..

امي صفكت ايد بايد ، اثاري الله يعرف المن ينطي توج يالله سويتي نفسج حبله بولد لااا نوب سمبتي اكول مالت عليج وعلى ابنج ..

جرت عباتها ورجعت للبيت واني هم درت ظهري وكملت لبيتي اني وابو هاشم ..

صدك ماوصلت لاهلي الا جبت الولد ، هاشم فدوه لعين امه .

تسعه اشهر تعب وهلاك بس على كلبي عسل ، ادللت دلال بيت ابوي ماشايفته كلها تركض علي من اكوم ..

من رياض لولده لبناته لجناينه ..

جهاز كله من ولد رياض هم جهزو ، بناته ينضفون ويركبون ، عشت براحه بجال رياض ولده رحمه من الله هذول ..

بيوم ولادتي مشت وياي عمتي صابرين ، شافتني اعيط من الطلك وتصيح فدوه غصن بعد عمتج ادعيلج اخذ يكولون دعاء الولده مجاب ..

اني اطلك واصيح ررررربي عريس لعمتي رررربي كون قسمه زينه لعمتي صابرين ..

نص ساعه ولدت هاشم ، دنيا فرحت بي مو بس اني ، مشت حياتي براحه ، تعويض عن شفته بحياتي ، عوض الله حلو لو بعد سنين ..

حتى لو مايبقه شي بالعمر هم من تتعوض تسوه عندك العمر كله الي راح  ..

شفت حياتي بلشت من ازوجت رياض ومن خلفت هاشم ، اما ثلاثيني الي راح بيت ابوي هذا مو عمر ولا حياه ..

الحمدلله على كلشي ..

اهم شي انو عمتي صابرين وره فتره انخطبت ، وخطبها واحد من كرايب رياض ، مزوج اثنين و عمتي صابرين الثالثه ، مشيت وحجيت الهم عليه ..

ناس كبت وناس كالو شكو بيها ، جديتي اعترضت وعمتي صابرين سوت انقلاب و مشت زعلانه لبيت عمي ابو غسان ..وضلت سالفه تجر اسابيع محد.كدر يحلها ..

#يتبع ....

البارت اكثر من اربعه الاف كلمه بربعو بي ، والبارت خفيف دم دنحاول نكف الحزن مال البارحه ..