عشقهُ خنجر في خاصرتي

البارت الرابع والثلاثون

_٣٤_

#عشقه_خنجر_في_خاصرتي

#بقلم_أسماء_ديمير_مع_Roro_Rose

فتره واتصلت بيه مياده ، لمن افتهمت منها انو هيه محتاجه فلوس ، 

شكد محتاجه ، تدللي ..

اريد ٢٠ ورقه عندج ..

سكتت شوي وصفنت ، شوكت ترديهم ..

- أاااا هذا باجر  تكدرين ..

- ماكدر والله باجر مموجود بيدي هيج مبلغ ، بس اسمعي على بدايه شهر من استلم راتب انطيهم الج ..

- يعني معقوله ماعندج هذا المبلغ صدك تحجين كلهن ٢٠ ورقه ..

- صدك ماعندي والله قابل اضمهم عليج ..

- سكتت تتافف  .

- حجيت شسوين بيهن اذا ضروريات بالنسبه للج وسالفه خطره مستعده ادين الج من رعد …

- حجت اي فدوه لكلبج والله ميته عليهن اريدهن كلش ضروري ..

- تمام ادللي ، انطيني صبر يومين و اجيبهم الج ..

اتفقت وياها وسديته منها ، ثاني يوم من التقيت برعد على ريوك كتله اريد ٢٠ ورقه ..

اول شي صفن بعدين حجه هاا شسويت بيهن بس لا ناويه تشردين مني ومن امج لتركيا .

ضحكت لا صدك احجي والله اكو ناس محتاجه وطلبوهن مني وماعندي فكلت اخذ منك واردهم بعدين ..

- منو هالناس ..

- صديقه الي ..

- غير اعرف ..

- مياده تعرفها كالت محتاجه واتصلت بيه تتوسل ..

رجع ضهره على الكرسي ، ورفع حواجبه ،  وحجه هااا مياده كلتيلي  ماسالتيها للست شسوي بيهن ..

- عقدت حواجبي بنت تكول ضروري يعني خما اكعد احقق وياها ..

- مو راح تنطيها فلوس غير تعرفين فليساتج وين يولن ، وشنو هالشغله مطيه الها فلوس لو حجار مو هامج ..

سكتت ، بعدين كتله :- البنت ثقه ، قابل تاكلهن علي وثاني شي اشوف سالفه خاصه بيها ..

- هاي تريد تشتري سياره ورجلها ماراضي و جتج تطلب منج وتداين ، من طاح حظها اي والله غركت نفسها وغركت رجلها بالدين ..

- ياسياره ماكالت سياره كالت شغله ضروري ..

ا- ي هيه عدها شغلات ماديه حياه او موت لا تنطيها ممنوع افتهمني ..

- ماعندي انطيها اصلا كلت اخذ منك واطيها ..

- هاي العايزه انطيها لمياده دتشتري سياره واني البيت ذاك وينه ، يسمع حسج لحد هسه ماكملته ، بسبب ضيق المادي ، والله يالله انطيها قندره احسن ..

- ههههه لا صدك فشله عود كتلها تدللين ..

- خلي تولي ام افليس والله لو من رجلها الا الزمها الباب ، بدل ماتكعد تسند رجلها وتكون بيت وتخلف طفل كاعده تبذر وتداين وتكسر ظهره لرجلها ..

- عود على سالفه خلفه جهالك شلونهم ..

- عايشين ..

- ما تجيبهم يمك ..

- اكيد اجيلهم واطلعهم هم وياي سفرات نتونس سوه ..

- هم تحلم تخلف بعد اكثر ..

- لا عوذه كتلج واكررها ،  اكره جهال اصلا همه هذول اثنين و اشوفهم اهواي ..

- صدك تحجي  جهال نعمه ..

- جهال نعمه بزمن خوش زمن ، مو هذا الوكت وهذا الوضع ، خلفه بهذا الوقت غلط وكارثه هم ..

درت وجهي ، يمكن كلامك صح ، 

- كال صبا صدك حامل و باسل عزمني ونسيت اكلج ترحين الهم وياي اليوم ..

وره دوام يعني ..

اي ..

اشوف ..

تافف هم راح تكول امي ..

ابتسمت ، صدك خابرت امي ونطيتها خبر ، بالاول حلفتني انو صدك رايحين لصبا ..

كتلها والله رايحين لصبا ، واذا تردين هناك اتصل بيج واحجي وياها ، يله قنعت ، وره دوام.طلعت اني وياه الهم  ..

مرينه يم محل مال حلويات كتله خلي ننزل ناخذ الهم شي ، عيب نروح وادينه فارغه ،  نزلت وياه اخذنه حلويات وهديه وطلعنه الهم كبل ..

جانت عماره الي ساكنه بيها صبا ورجلها مقابل العماره ساكن بيها رعد بشكل مؤقت ..

شقتهم جانت طابق ال٥ و المصعد مايشتغل ، انداريت علي نوب اني لابسه كعب ، حجيت دبرني رعد ، 

هو انتي حظلين طول عمرج هيج ، دبرني ودبرني ، هو اني مبتلي بيج مبتلي ،

بعدني داحجي واضحك هو شالني على ظهره شيل ، ماكلت لا وعيب جلبت بي مثل طفل وصعدني ..

احس بي كوه يجررر نفس ويهمس يااابوياااا ياالله ياامعين طك ظهري ياامره انزلي حتى كلبي نزل بين رجليه من ثكلج ..

مدري اضحك مادري اجلب بالزايد ومكيفه ، وخطيه هو عود سايرني ، اصعد كم بايه والبقيه اصعد فوك ظهره واكله انطلق يله ..

لمن وصلني للطابق الثالث وجهه صار طماطيه وكف يلهث ،

كال دورج يله تنحي ،

ضربته على جتفه شنوو هالالفاض والله انته سخيف ..

اقصد يله داصعد ..

والقران نيتك ادب سزز ، دفعته وصعدت قبله ، انداريت علي لكيته يحك بركبته مبتسم .

حجه هااي فوك زينتتي وياج ، ماحاجيته عفت الفراض عليه هو يشيلهم ، وكفت كبال باب الشقه ودكيتها ..

وصل ليمي يعدل بملابسه ..

فتح الباب النه بسام ، كيف من شافنه ، سلمت ودخل لصبا ، اخواتها موجودات يمها ..

هنه ضيفنه ، وقامن بالواجب ، كعدت يمها نسولف على الحمل ، تحجي عن تعب الوحام ، وهنه اخذهن الحجي عن جهال ..

اني رغم ماهنه لطيفات وياي ، بس ماعرف ليش كلبي اذاني ونغثيت ، ماعرف احجي بمساله جهال ، مامريت بالوحام ، هنه يحجن تجاربهن و ومعناتهن ويه جهال ..

اني كعدت على صفحه وجهي باهت وفشلانه ، شي اذاني ماعرف شنو دمعتي لاحب بعيوني ، ابتسمت بحزن دنجت راسي افرك باصابعي ،

اسمع تكلها يلبط بطني مثل سمجه وتلعب نفسي ،
لزمت بطني تلمستها ، شلون يلبط يعني ، معقوله اكو هيج شي و تحسي يتحرك لو تبالغ هاي ، شلون تحس ماتخاف او تخترع ، زين ماياذيها ..

حجت عكسه مردني لمعدتي مرد ، ابتسمت ، اخذهن الحجي وجن نسني ، واني هم مابادرت وحجيت ، لان ماعرف شنو الي ينكال بهيج مواقف وهيج مواضيع ..

درت وجهي على رعد لكيته صافن علي ، ابتسمت كوه رغم مادمعه واكفه بطرف رمشي ..

هو وجه رخه ، اشر بعيونه .. شكوو ..

همست بهدوء مبتسمه ماكو ..

دار وجه على صبا لازمه بطنها دنج راسه صافن ، اندار علي اشر على بطنه ياشرلي ، بطنج تنفخ و تزوعين ويطلع الجاهل ترى شي مقرف ..

ضحكت ، ابتسم ، حجه اني ترى طفل واكبر زعطوط ربيني عود ودلليني حتى حفاظه لبسيني راضي بس لا تنقهرين ..

مسحت طرف رمشي اضحك ، احطك بعيوني والله ..

تسلم عيونج وكلبج انشالله ..

انتبهو علينه نتهامس ، كالو الله يثخن لبنكم ،

دنجت خجلانه ، كملنه زيارتنه لصبا وتحمدنالها  بالسلامه و رجعنه المغرب ،

برغم جانت كعده حلوه ، وناس راقيه بالكلام وتعامل  ، بس فتحت عيوني على شغله جنت غافله عنها ، الاحساس بالامومه ، معقوله لهل درجه مزعج وياذي ،

درت وجهي على جامه ، هم يجي يوم واسمع كامه ماما ، لو راح تكون حلم من احلامي وبس ...

وصلت ونزلت للبيت واني صافنه بهل موظوع ، دخلت شفت امي ، سلمت وجهي باهت ، امي حجت شبيج ..

رغم مازعلانه علي صار فتره بس من شافت وجهي خافت ، حجت شكوو رعد وياج ..

جريت نفس ، يماا شنو الامومه شنو احساسج من صرت اني ..

رفعت حواجبها متفاجئه ، حجت رعد كلج اريد خلفه شنوو ..

لا يماا كلشي وكلتي رعد ، صبا حامل وشفت بعيني شنو الامومه يعني ..

ابتسمت بوجهي ، الامومه ؟؟!!  نعمه من نعم ربج ، احساس حلو ومر بنفس الوقت ، فرح و خوف ، زعل و سعاده ..

مثل من تكصين اظافر ابنج اول مره ، تعيشين بلحظات مرعبه بشعه ، تخافين لا تاذي ، وتعورين اصابعه ،  وبنفس الوقت الحلو  ، ماتكدرين تلزمين  نفسج انو تبوسين اديه الناعمه ، وتشمين اصابعه الورديه الدافيه ..

لو من يروح ابنج للمدرسه باول يوم اله ، تفرحين لان كبر وراح يتعلم ويصير شي بهل مجتمع ويجيب الج دفتر الاملاء ودرجاته العاليه ..

وبنفس الوقت تعيشين رعب انو راح يكبر ودنيا تاخذه منج ، وراح يتعرض للوجع للالم لسلبيات الحياه و قهرها ..

الامومه شي حلوو ومو حلو ياايمه ، نفس ماهيه نعمه احيانا تكون نقمه ..

ديربالج تتحسرين عليها ، الله اله حكمه من خلاج بله خلفه ، جوز تخلفين وجهالج كلهم امراض لو يطلعون عاقين بيج ..

لا تخلين عينج على نقص بس ، خلي عينج على العطيا الي الله خلاها بيدج ..

صحه عافيه ، اهل يحبوج ، عائله تسندج ، شهاده وظيفه راتب ، حريه ، كلشي متوفر الج ..

رديت اني ورعد .

ردت يبوو هم جابت سيره هالجلب وغثتني ..

ابتسمت ، صدك اني حياتي كامله والكمال لله ، عوض الله حلوو ،  تركتها وكملت دربي افكر بكلامها ، ليش افكر بسلبيات دائما ، اعيش وافرح بالي عندي ..

عندي شغلات ماموجوده عند هوااي بنات ، عندي هواي امور البنات يحلمون بيها ..

الحمدلله على الي عندي والي مو عندي ؛ بالاخر لايكلف الله نفسا الا وسعها ، افكر بأيجابيه ..

ثاني يوم تعذرت لمياده وكتلها ماعندي المبلغ والله ، وصدك جان ماعندي ..

وكالت زين مو كتي اداين من رعد ..

رعد هو اصلا حاليا محتاج لان عدنا بناء ، يعني لو عندي تدللين بس ماكو جوه ايدها ..

شو هاي حتى بلا اي كلمه كامت ومشت زعلانه ، صحت وراها ردت افهمها اكثر ماردت ..

بعدها بايام صادف عيد ميلادي ، عزمت الي اعرفهم وهيه منهم هم عزمتها بس ماجت ، رغم راسلتها اكثر من مره ..

سويت حفله بسيطه بيتنه وعزمت كل الي اعرفهم ، فدوه لعينهم جدي وامي كل واحد جابلي اسواره ذهب ..

ساعه بال٧ المغرب و دك علي ، رعد كلي اطلعي بره جايبلج هديه ..

طلعت اله ركض ، بس فتحت الباب شفت واحد خال باقع ورد على وجهه مغطي بيها ..

ضحكت جريتها منه ..

حجه كل عام وانتي حبيبي العمر الطويل انشالله ونقضي سوه ..

حظنته حيل وجريته للحديقه ، هو جلب بيه ، رفعت راسي علي ، عود صدك تريد عمرنه يطول واضل وياك ومتمل مني ..

غير انتي بنتي ايو حببيي اكو شخص يمل من جزء منه ..

خليت راسي على صدره ربي لا يحرمني منك عوض الله انته اله تدري لو لا ..

وانتي سعاده الابديه بالنسبه الي ..

سمعت صوت عيوني العشااق  ماكاافي محاظن ..

وخرت من صدره اضحك فشلانه صباا واكفه بالباب حجت شنو هذا الي بيدك ..

حجه ماعندج شي يمي ، هاي مالات ايمان ..

تقدمت علينه ، دنشووف دجيب جرت الغلاف وتشوف شنو الهديه .. جانت ساعه رولاكس ، مذهبه ..

جريتها منها البسها ابتسمت عاشت ايدك حبيبي ..

كال ادخل لو امج تهججمي ..

حفله نسوان ..

اهااا معناها طرده بادب هااي ..

ضحكت حظنته مره ثانيه باس كصتي و مشه ، ضليت واكفه لازمه باقه الورد هو وصل للباب حجه الزميها لا توكع ..

همست شنوو ..

شمرلي بوسه سويت نفسي لزمتها وخليتها على صدري ..

حجه لااا بحلكج خليها ..

هههه سخيف ..

سلم وطلع ، عطره تخلخل بهدومي ، لزمت وباقه الورد الطبيعي ، حجت صبا الله يسعدكم ..

رديت :-  اناا مغرمه تدرين لو لاا ..

حجت امبين عليكم ..

دخلت كملت حفلتي بهدوء ، اخذت كم صوره اني وامي و جدي وكل شخص عزمته ، كل شخص جاب هديه شكل ..

منهم حبيتهم ومنهم لاا ، بعضهم عطور ، مرت خالي جابتلي عطر مجرد ماشميته جزت نفسي جيت اتقيئ ..

ماعرف ليش ماحبيته برغم هو سعره غالي ، بس قووي حيل يذبح واني ماحب هيج نوعيه عطور ..

خليته على صفحه ..

لمن داومت تريكت ويه رعد و مشيت لدوامي مياده نفس شي هم كالبه وجها علي ..

ضجت حيل بس شسوي والله رعد مايقبل انطيها والا هنه رادتهن دين خطيه ، ثاني يوم اخذت وياي علبه العطر الي جابتها الي مرت خالي وكلت انطيها الها عربون صلح ..

دخلت لغرفتها تشتغل بيها دارت وجها عني ..

حجيت زعلان ياازعلان شلون نرضيك ..

حجت نكتي بيه وانتي صاحبتي عود ..

تقربت احظنه لو اكرصها واكللها والله ماعندي شبيج ..

سكتت مدنجه ، مديت ايدي نطيتها العطر كتلها هااج دشوفي شلون هديه اتحده واحد جايبج مثلها ..

جرتها تشوفها ، ابتسمت من شافت العطر ، فتحته ورشت منه ، وووواو يمااا ولج يجنن ..

وخرت عنها شوي اختنكت منه ..

ردت عاشت ايدج والله يجنن ، بيش اخذتي ..

رفعت حواجبي هااا والله مادري ماذكر مو بالي ..

لا لا رضيت نزول عليج كل مازعل عود راضيني هيج ..

وعاد احنه يوميه نزاعل موو خوش شغله هاي والله ..

احب الهدايه شسوي ..

راضيتها وخلصت جان ضميري يانبني لان ماوكفت وياها واخذت بحجي رعد ، بس فضت الحمدلله …

مرام ...

جدتي وعمتي صابرين كاعدات يحسبن بفلوسهن ، مطشراتهن بغرفة عمتي ، وقافلات الباب علينا ويعدن بيهن ..

ورق على عراقي كله حاطاته ومدخراتهن اثنينهن اني حاطه ايدي جوه خدي وصافنة عليهن حايرات ..

محمد محتاج مبلغ جبير ، لعملية لزوجته ومتداين  من اصدقائه ، وهم جاي لجدتي وهو من تضيق وياه ما يروح لاحد غيرها ...

العلاقة بينهم مو حفيد وجده ابد لا ..جدتي تعتبر محمد باقي اولادها وهو من صغير رابي بحضنها لحد ما واصل اعدادية يلا طالعين من بيتها وعزلنا كل ناس وحد...هي وياه ضلوا علاقتهم قوية ..

شافت فلوسها قليلات وداخت ..

الجدة:يااا يالهني  ما يكفن ..

صابرين :لا يمه وين يكفن يا دوب ربع فلوس اللي مطلوبهن ..

خل يتداين من صاحبه ،  وعود  يسده بعدين هي هاي مرته ، ما تخاف الله بي الفلس ولا عانه مخليه عنده الجهال،  اهلي وهي صالونات ولبس وين يلحك

الجدة:غير حظه هذا مو راد هالبومه (اشرت علي بلا اهتمام ولا صدت الي)....ما رادته راح ذب روحه هناك على  گرايب امك يحميد وهنه محيلات جماعة عفوف

صابرين :يبووو المره وين وانت وين يمه كل مصيبة وعفاف بالنص  .

ااجدة:كون الله يفرفحها مثل ما مفرفحتني عالبنية اريد ايمان يمي ..

صابرين:مو اجتي شحصلت ؟؟

الجدة:غير فهيمة الفاهية وولدها

مرام:بقت بس امي جدة دحجي عليها هم وارتاحي
اندارت الي

-العرمة انت تسكتين ما اسمع الج حس اكوم اجسر العوجية على ضلوعج ...

رجعت شالت فليساتها وتحجي
-يعني ما اكدر اساعده عوينتي سودة عااعدو راح يحير

حجيت من يمي
-جدةاكملهن اني ؟؟

سكتت ما ردت مدنكه ما تلتفت الي بس عمتي صابرين صفنت بحجايتي

-دخل ناخذ منها يمه مو كلت الج

-مانريد منيتها عالولد اسكتي هي هاي واحد يورط روحه وياها زعطوط جاهلة لو بيها خير ما جان وكعتنا بمصيبة بكد راسها وتسوى عمرها

حجايتها ضوجتني وكفت لحيلي وشمرت الريموت من ايدي وحجيت وياها
-جدة شبيج وياي كارهتني ؟؟

- وسم ما اكره احد اني

-لا تكرهيني ودوم تهينيني لو كل الدنيا كاعدين تره ..حتى الله يغفر شبيكم انتو ...اموت وتخلصون مني

زعلت منها وكعدت بعيد عنهن دمعت عيني امسحها بعصبية هالنوب محبوسة يمهن وين اولي وابجي متندمة بكد شعر راسي بس الندم ما بي فايدة ...

ثاني يوم جريت فلوس من العندي اكمل العدهن ورحت لعمتي صابرين حاجيتها ..

-عمه هاي باقي الفلوس خل يفك ضيجه محمد ويسوي عملية مرته خطيه ..

لا تحجين لجدتي كولي الها طلعن يكفن شي ...هي شمعرفها ..

-والله من البارحه لليوم كاتلها القهر عليه تكول ما عندي وتفكر تبيع ملوي ..

-لا حرامات ذهبها يروح هاي فلوس وعود وين يرحن يردهن بعدين الي من يتمكن

حضنتني وباست كصتي وحجت.

-حنينة وما خاب راي ابوج من كال اكتب باسمها يعرفج زين تشبهين گلبه

-لو ما منطيني شي احسن الله يرحمه

-يولي جدتج هسه تكيف

-ادري دا اشوفها حتى اكل كوه تاكل لا تروح توكع تتمرض ...

ما حجيت ويه جدتي لمدة يومين كاملات ، بعد ما هيج جرحتني ..

.ثاني يوم اجا محمد للبيت وذاك الاستقبال اله والاكل ،  ما لذ وطاب ووره العشا مكعدته كبالها ، حتى لعمامي ما تحن هيج ، وتحب تسولف وياهم وتسمع منهم الا هو كل شي اله خاص ..

اخذته وفاتوا بغرفتها..يمشيها هو كامش ايدها ويسولف وياها ، كالت اله وديني بفراشي وهو يضحك ، ويكول ااها وافرك رجلج واغطيج ..

مثل من جنت صغير وهي تضحك  تكوله اي وامك تجي تهد علينا من تبات يمي مو بفراشك

...بهاللحظة اني زعططت نفسي كل مشاعر الغيرة القديمة وحب الاهتمام طلعن براسي شنو هذا مدلل عندها لعد اني شنو بنت البطة السودة بس ترزل بيه

..لحكتهم للغرفة وهو صدك كعد يمها جاب الها سواكها ،  وسبحتها وراح جاب الها من كنتورها عصابة بيضة ،  تلفها على راسها ،

وكفت يم الباب ولفيت ايديه لصدري متجاهلة اي انطباعات لو اهتمام لاحد ولا لشي ..

.شنو والله يجي يوم بالشهر هيج تعامله واني وعمتي صابرين ليل ونهار نخدم بيها وياها تدوس ويانا بالحجي ...

اندار الي وجفل من شاف نظراتي الهم وغابت ضحكته بساع...

حجيت ويه جدتي

-اجيب الج شي جدة قبل لا انام؟؟عيوني خازرته واحجي هي شلون تفوتها الي

-لا ولي ولي عود صارت حنينة

بقى محمد فترة يجي وجيته بهموم ويطلع ذابهن يم جدتي ..

تكول يشكيلي من زوجته وهي تجيب وتعد عليهن ما خلت واول الركب عفاف اكيد ....

وبعدها كطع حيل واللي فهمته منهن مسوي عملية لزوجته ،  كلش خطرة بضهرها ،  عدها مشكلة ويداري بيها وحاير بجهاله ..

.راحن اله ورجعن وهو بعد ما اجانا ....وبدا يسدد بفلوس عمليتها شويه شويه النا ...

...

اني انشغلت بين امي اللي كمت اروح اشوفها كل شكم يوم لان غدير واخيرا بدا يطلع للشغل ويعوف البيت فترات بالنهار اروح اساعد واشتغل ...كانت شدن متأملة ذاك الشهر حمل لان غابت عليها ....

اروح اساعدها واشتغل الثكيل عنها وهي خطيه مكيفة باستقرار حياتها ..

بعد اشهر من خطبته وصار عرس فراس وجاب عروسته كانت حليوة وبنت اوادم حيل بصراحة كلنا كلنا حرامات بي لان مبينة البنية حيل تعبانة على نفسها ...

اهلها خوش عائلة وتوررطوا بعمي وابنه ..

اني رحت بالسبعه ما رحت بعرسهم لان ممنوعة من الطلعة ...

بوقتها قضيت الوقت ويه غصن بالمطبخ ، نشتغل  شدن ماكو مريضة ، مدري شجرالها واللي فهمته نزف وشغلات نسائية ..

وما حجت وياي مدري شبيها صعدت شويه يمها ونزلتني غصن اللي ما تعرف اختها ليش هيج متأذيه

ومن صار وقت سلمت عالعروس كعدت يمها سالتني ببسمة

-انت مرام؟؟

-اي

-خطيبة فراس

بقيت باهتة التفتت للبنات كاعدات يمي واختها لمحتها وهي تكرصها ..ابتسمت وجاوبتها

-لا وين منو كال الج هالحجي اصلا ابن عمي وحاله حال اخواني فراس ..

-هااا مو هو كال لاخوي بوقتها خطبت من بنات عمي وما صارت قسمه

-اي حجي بس وما صارت ...من رخصتج عيني عروستنا...رحت عنها وغصن لحكتني بالمطبخ حجت غصن بحرقة

-غير باردة خرب

-ههههه صدمتني

بهالحجي فات فراس بالمطبخ وتقابلت وجوهنا بعد هالمدة كلها ...

صار شكد ما شايفته ..ضحك ضحكه بصوت وحاجاني

-هلو ولج وين صرتي ...ما تكولين ابن عمي اتشكره بيوم ساعدني لو انت طبعج بس نكران ..

-هلو الف مبروك

-شفتي بالله حلو ذوقي مو ..غمز الي بعينه وتقرب يمي كعد..شفتيها لمرتي ..

-الف مبروك عليك بالف خير ان شاء الله بس البنية مبينة خوش بنية مو تخسرها ..

-لا راح تموت عليه اني اكولج ..

-اي ادري كلك ثقة انت

ضربني كفخه خفيفة براسي

-يولي عقلانة

-اي الحمد لله

-تدرين عادل وين؟؟

خفت من سؤاله وفتحت عيني بجفلة عبالي راح يتهمني بشي كمت اخاف من سيرته جاوبته

-لا شعليه بي اني

-شبيج جفلتي يولي دا اكولج عليه وين !!...سافر تهريب

ما جاوبت ورجعت اعزل بالصواني ويه شدن المكابلتنا

وكف يمي عكس وكفتي ..كمش ايدي جرها عصبي
-شو ما رديتي

-شنو احجي يعني

-لسانج وينه

جاوبته غصن
-عوفها فراس

-اشش معليج انت اطلعي

فاتت امه لكته يمي وهيج كامش ايدي ..ركضت عليه جرتني وراها

-شبيك ويه البنية فراس

فراس:شكو شبيجن ذبحتها دنسولف

الام:روح جوه فراس لا مرتك تحس لو احد من الخطار

عافنا وراح واني جريت نفس حجت ويايه امه
-انت شكو جايه؟؟

رفعت عيني بعينها بصدمه وغصن حجت وياها
-شنو هالحجي يمه

-لا خل تسمع شكو جايه الولد تزوج عاد عوفيه بحاله لو هسه حلى بعينج مرام احنا مو بحال مشاكل ...

فرقد هججتنه مني عوفنه لهذا الي
غصن:هي شعليها

ام فراس:منو هزمت مرة اخوج ؟؟مو هي ...حتى انت ما تحجين وياها ما ارضى اني واختج هم لازم ما تحاجيها بعد اشو زوجها ما راضي تريد يطيح حظها يلا ترتاح

عفتهن وطلعت بعيوني غواش ابجي وغصن تصيح ورايه واسمعها تعارك بامها ...

طريقي من بيت اهلي يلا اوصل لبيت جدي ، مريت خطف من حديقة لحديقة وانصدم بغدير بالدرب بوجهي ...

عيونه ما رحمتني وزادت عليه عتب فوك عتب ولوم ما ينتهي ، وهم وجهه بي هواي تعابير ثانيه ،  ما فهمتها حسيوعينه مشغولة ببيت عمي ،  اكثر مني ..

وكأنه ما مهتم لوجودي..تعديته اركض لا الي راحه ولا عزة بعد واني اشوف روحي وحدي ، ما الي الا عمتي صابرين اللي تهون عليه كل كلام اسمعه وتهون عليه ايامي الكاعدة اعدها عبث ...

....

شدن:

عرس فراس اخويه وفرحانة ...كاعدة احضر بهدوم الحنه والعرس واكوي واعدل ...

فات بالغرفة بساع اخفيت اي ملامح فرح بخلقتي اخاف منه ، يزهك من يشوفني فرحانة ويعرف على عرس فراس هالنوب يمنع روحتي  ..

لو يتحجج عليه وخاصه توه راجع من الشغل وتعبان ...ضميت ملابسي بساع وطلعت قميص اله اكوي بي ودشداشته ...

-تعاي يمي عوفي هالكوي..

طفيت بلا نقاش ورحت اله تمدد وجرني وجر غطا علينا .......

كمت من يمه البس بهدومي بسكتة هيج هو يحب !!لازم هدوء صح ماكو رومانسية فول  بس عادي هو هذ الرجل العراقي ..

قايل شاريد منه اكثر قايم بواجبه بالبيت ووياي وهم هو خطيه اكيد يتحرج مني لان اصابات وعينه اللي ابد ما يحطها بعيني ابد !!
حاجاني بنعس

-باجر ما اطلع للشغل مو تكعديني من غبشة
هزيت راسي ..

وسكتت بس اريد اخذ منه موافقة اروح ويه امي نحنيها للعروس امي رادت تاخذنا واني الا اكوله

حجيت وياه وهو مدد على بطنه
-باجر اروح للحنة
-اي روحي شوكت مانعج من بيت اهلج  براحتج وهم اكيد عمتي تحتاجكم
-لا قصدي نحني ااعروس ببيتهم

جفلت من نهض بساع ورد بشدة لاااا....؟؟؟؟؟

-ليش عفيه غدير

-لا تحجين اصلا كافي لغوة ضال عليه تفرفرين ببيوت

-قابل رايحه وحدي كلهن يرحن

-عجايز يرحن انتن شكو وتعاي يلا طفي الاضوية اريد انخمد

-ما كملت كوي

-والقران اضربج بالاوتي براسج شدن يولي صيري ادمية مو عود زعلتي

تشجعت وحجيت بوجهه رغم ابد ما سويتها قبل
-اريد اروح غدير !!

اندار مضيق عينه مستفسر
-شنو ؟؟

-تلعثمت بس شجعت نفسي
-اروح

-وحق هو الحق اخليج تزحفين يولي ناطيج عين الظاهر اني..دروحي وشوفي شسوي شنو مدا احجي وياج اشو انت مصختيها حيل

نام واني تلفلفت بالغطا وعيني ما شافت نوم افكر ؟؟

لا طلعه ولا ونسه ولا حجايه حلوة صح مدا ياذيني هالايام وعايشين بس لا حب ولا اي مشاعر مدري شلونها الحياة همه كل المتزوجين هيج ..اني احبه !!...

....
ثاني يوم هو ضل بالبيت ويباوع الي من صبغت اضافري ومن جهزت نفسي مكابلني بالغرفة لا طلع ولا راح لمكان حتى بالحديقة ما طلع  بنهارها اكثر من مره رادني واني ما اكول اله لا ابد لو كل ااخبصة وياي بالعكس افرح من اشوفه هيج متلهف الي ...اكول هي شكم طاسة ماي ما راح اموت ...

صليت الظهر وغديتهم هو وعمتي ودا ابدل دكت باب الغرفة فتحتها ...شاف ملابسي وسكت بس عيوني تحجي غير شي

-ما ترحين لبيت العروس شدن

-لا .

-هاي هدومج للحفلة

-اي

-مو تلبسين غيرهم

-لا هنه ذني الاخذتهن

-اي حلوات عليج

سكت ما مرتاح وكف يمي

-انت ليش ما تبقين وياي الاسبوع كله اشتغل بس اليوم اجازتي

بطلت اعدل بهدومي والتفتت اله متعجبة

-ارجع بالليل ما بات

-هم عوزج..وتباتين

تقربت يمه واضحك

-تشتاق الي

-اكو رجال ما يشتاق لمرته

-صدك؟؟

-هاي شبيج شدن ؟؟

-عفيه غدير احجيلي هيج دوم ...تدري بيه احبك واحب هالحجي...اقصد كل مره تحبه

-ما مقصر وياج اني

-لا الله يشهد من يوم زعلنا وانت ما مأذيني ابد بس اريد اكثر اني احبك ..

حضنته وهو واكف وتجيت جسمي عليه بالكامل مديت ايدي اتلمس لحيته واباوع لملامحه الباردة

دك موبايلي وقطع كل تركيزي وهو هم ابتعد من شافها غصن...رديت وهي تصيح

-وينج راح نروح

-روحوا

-ولج شنو ما تجين صدك تحجين

-عود ترجعون اني بالبيت اجي تلكوني

-كبر خبلة هو شكم مره عدنا عرس ضلي بومه

-مع السلامه

تجاهلت رزالتها وسديته عنها وتبعته اله وهو مستغرب ردي عليها
-ما ترحين

-لا ما دام انت ضال نطلع سويه وحنة الولد المغرب

نزعت ثوبي ورحت اله .......

لحظات حلوة عشناها اني وياه نايمه بحضنه وهو غفى تعبان حبيبي اليوم تعبته اني بشقاوتي كنت عن ايده خطيه راسي ثكيل بسته قريب شفته وهو بين نايم وكاعد يهذي باسمها ..مريم كابوس عمري ونغصة بحياتي ما اعرف شوكت ينساها ...

اختفت ابتسامتي ، احس كلبي تحجر من الالم ..

المغرب سبحنا وصلينا ووصلني مثل ما طلبت منه الامور طيبة بينا ...وبدت حفلتهم واحنا نركض للخطار وللطلبات ما شفت شي ابد من عرس اخويه ..

وبالليل يمكن حس بيه كال ضلي بايته وراح فدوة رحت اني اله ...بس كلت ما اعوفه اكمل شغل هنا والحكه ...

وبالليل بعد الساعة ١٢ كلت اسويله مفاجاة لبست عباتي ورحت للبيت ...

فتت من بيت اهلي على بيتنا من الحديقة الخلفية ...

واني امشي سمعت همس بالحديقة الثانية او تكمبة حدايقنا ..

تعديت مكاني والبيت عابرة للجهة الثانية ...وانصدم يغدير وبحضنه مريم ...

مريم:يعني تكدر تسوي الي الاريده

غدير:شايفة العين الضلت هاي ...ما تغلى لعيونج كل اللي تتمنيه اسويه الج اكعدج ببغداد وافتح الج الصيدلية وسيارة وشنو بعد ..

-واريد اهمهم ..اريد قلبك وتأشر باصبعها على مكانه
وهو يرد فرحان منتشي ويضحك ..

-والقران ما سكنته غيرج ...

ضحكت بدلع وارتمت لايديه المفتوحه الها ...

عيوني جمدت حسيت نفسي تلعب حيل ...ما اكدر اوكف ورغم لا اكو برودة ولا اي هوا بردت ... تراجعت بسكون تام لمكاني ومنين ما اجيت..ما كدرو اكمل كعدت على دجة الحديقة وبديت اتوع بالم بصدري ...

عيوني تجري بغزارة دمع حزن وكتلة غضب استقرت بروحي ...

وكفت رجعت لبيت اهلي اجر بروحي كوه حسيت شي يجري على رجليه كوه اريد اوصل بيت اهلي ...اول ما خطيت بيت اهلي شافوني جفلوا بشكلي كلهم واولهم فرقد ركض الي ..وكعت ما اعرف الدنيا وين لو شصار واستقريت بظلام تام!!!

# يتبع .....

البارحه صار خطأ بالبارت فانشر نصه بس ، اذا ماتشوفون كلمه يتبع .. معناها البارت حشاكم بي نقص ..

حساباتنه ، على فيس بس تكتبون ، ، صفحه roro roes .. او كتابات اسماء ديمير تطلع الكم ..

حساب الانستا ... asmaa _demer