عشقهُ خنجر في خاصرتي

البارت السابع عشر

_١٧_

#عشقه_خنجر_في_خاصرتي

#بقلم_أسماء_ديمير_مع_Roro_Rose

مرام:

مرت فترة وترخصوا بيت عمي ابو محمد ، يردون  يزوجون محمد ، بس  ما يسوون حفلة  ، بس العروس تسوي ببيتهم ببغداد...

وهو وياها يسافرون فترة بره محافظه ، واللي عرفته راح يسكن ببغداد لان هي اقاربه من جهة امه ...

اشوف حماس امه وفرحتها بي ، وخواته ، صح مو هامني بس بعد سالفه عمي ثامر وعمي مضفر صارت عائله كئيبه ، وكلها مشاكل ..

بس بيت عمي ابو محمد شوي نفهه وبي فرح لان عرس محمد قرب  ، لذلك اكعد اراقب بيهم ، غصن الي كعدت تنوح وتبجي ..

اعرف عليمن هالدموع بس غلست ، تبجي على محمد ، والي يشوفها يكول على ابوها ، اياام مكابله حديقه وتباوع عليهم بدموع شلون يجهزون ..

مرات اروح اواسيها ومرات اضل اراقب بيها من بعيد ، شبيدي عليها ، صوجها حبت الي مو الها ، هو مو الها من الاول شكو تتامل علي ، بس كله صوج هاي العضله بنت جلب الي اسمها ، كلب مشابه لاسم جلب سبحان الله ..

محمد يفوت من يمنه لو يلمحني يوكف يصفن بوجهي ، لو يجر نفس كوه ، عيونه بيهن نظرات ، ماعرف شنو هنه ، نظرات تحجي حجي جبير مافهمته ..

مره شافني بالحديقه دانطي اكل للدجاج ، هو جان مار للحجيه ، حجه شلونج مرام ..

بخير الحمدلله عود بالخير عليج ..

ابتسمت بستهزاء، هز راسه اشكرج ، يوم الالج ..

بهت وجهي ذبيت نعمه للدجاج وجيت ادخل صاح ماكلتي امين لو يسمع منك ..

رديت منطيته ظهري :- تراب ابوي اخضر لساع ..

اكو من عنده امل ينتظر ترى ..

مايفيد الانتظار ابن عمي توكل الله يسعدك مافيدك ..

دخل ليم حجيه بلا مايباوعلي واني هم ماهتميت ،

من يومها وعلى عهد ذيج الايام ما شفته لمحمد ...لحد هسه واني اشوف هذا الاحسن ويوم اللي اخلص من فراس الغثيث ..

اللي بدت مشاكله تزيد وتكبر ، عمي ثامر يشجعه ويجلبه فوك ما هو مجلوب على العالم ...

اخر انجازاتهم هجروا ناس ونهبوا بيوتهم بحجة الطائفية، بوقتها دخل سيارة لبيتهم متروسه اغراض منهوبة ، من بيوت عالم عامرة ..

هججهم تحت تهديد السلاح ، لا يخاف ولا يكول حرام ؟؟امه ما رضت على سوايته وابوه سكتها بكلامه المثل السم...

اليكول شلون ووين الدولة واشو بكيفهم ، اي همه هذوله اللي عايشين بكل وكت وكل موجة ..

.خل نصفن شويه لوضعنا الزين يموت ، والسبع يموت ، واليبقى منو لو مغلوب على امره لو مجرم لو متلون بالوان ، المد السياسي المتطرف ،  من كل الاطراف  اللي ضرب العراق  ...

كل فترة تلفنا وحده نكول خلصت تجينا الاسوء والوجوه المجرمة هي هي نفسها ...جنت انتظر موته بس سبحان الله ما تصير ، مدري هو لان عار ما يموت ؟؟مدري حظي هذا حتى الله يسلطه عليه اكثر؟؟

اخواني الحمد لله ما مشوا حيل وياه ، وعدهم شغلهم الخاص ، بس هم مرات من تجي مشكلة جبيرة يساندوه ،  وهالشي كلفهم او بالاصح كلف غدير هواي ؟؟؟

....

بعد كل هالفترة علاقتي بعادل مستمرة بس اكيد مو مثل اولها يعني نتواصل بس اقل وهو هم مل من التأجيل وكل ما سالني كلت اله بعد مو هسه ....

بدت اتصالاتنا تقل اني هم ما اريد اكون بلا كرامة والزك نفسي بي ..

اكطع كل وين يلا اتصل بطل هو من سالفة الخطبة واني بطلت اذكر الموضوع ،  هوايه صارت هواي منغصات ،  وعراقيل بس اني بكل خاطري تمنيت صدك تصير ، ونصير نصيب بعض ،

عالاقل احسن من المستنقع اللي اني بي ...اهله ناس معروفين وعائلته كلش محترمة ...

هو هم ما كان رافض لفكرة زواجنا ، ولا شكيت بي لحظه ممكن يغدر لو يلعب بمشاعري بيوم!!!! بس بقينا هيج لا لسما ولا لكاع ...اخاف يكون تالي حياتي مثل ايمان لو مثل البقية من بنات عمامي !!!!

اتصلت بي بعد انقطاع دام اشهر زعل لان كال اخطب واجلت  ...اول ما شاله بعتب يحجي
-هلا بالكاطعه..

-ههه شسوي انت زعلان؟؟

-شتسوين هاي التالي مرام زعلان حتى ما تكلفين
خاطرج بسؤال عني

-مو هيج والله بس كلت ناخذ فترة وانت تعرف الظروف اللي امر بيهايعني لا وكت خطبة ولا الي واهس هسه!!ابويه بعده  

..اريد اشوفج لازم شوفي النا حل ...زوجة اخوج هاي ما تجي لبيتنا انت اطلعي لمكان مشتاق والله حبيبتي

-هاي الخبيثة قصدك ههه...ما تدري الصار خليني اسكت احسن لو بيدها تثرد بدمي هسه اذا شي سوته خير الي عرفتني عليك وبس ..

-دياذوج مرام؟؟

-مو اذية بس حيل تغيرت حياتي بهالسنة ...عادل تعبت ....قهر على ابويه وقهر من الحال كنت مدللة بجال ابوي واليوم راح الغطا اللي جنت احتمي بي منهم

-اصبري عمري كلها شكم يوم واجيب عمامي ونجيكم

-منو يوافق واخاف النوب ترجع عليه العكس لا نتورط

-مرام انت لو قابلة اخطب بحياة ابوج ما نوصل هالمواصيل عالاقل جنا نكدر نأثر عليه هو

-ما تعرف انت عمامي ما اريد اعاندهم ويشدون اكثر وحتى ابويه ما جان يكدر عليهم

سكت وسكتت ما عدنا حل رجع سألني

-ترجعين للمدرسة هالسنة

-ما يقبلون بلكت السنة التجي

-مرام ما اكدر اتحمل باوعي اريدج...اريد اشوفج

-احاول اطلع للسوك ويه امي وانطيك خبر بيومها

-عفيه اي هيج كولي اجيك بردي كلبي مو اني احبج
يولي ليش تعذبيني

-قابل هو بكيفي

-بكيف من اذا مو بكيفنا ...بكيفنا نحب وبكيفنا نتصرف وبكيفي يجي يوم اخذ حق هاي الايام

-تهديد هذا

-دتعاي لحضني وتعرفين التهديد شلونه

ضحكت خجلانة وهو منطلق زاد كلامه جرأة لحد ما هددته اسد الموبايل يلا سكت وخف بالغزل

بين ما كنت مندمجة اسولف وياه اندكت الباب بقوة وصوت غافر اجاني ...همزين قافلة بابي

خربطت شعري وسويت عيوني عود نايمات وفتحت اله الباب وسألته بصوت ناصي

-هاا شبيكم واتثاوب اخلي ايدي على حلكي بفهاوة

باوع وراي بغرفتي وراح علياء وراه تهف من يوم ضرب غسان الي متجنبتهم حيل وما احجي ويه احد وخاصه غسان اللي طيح حظه فراس لان ضربني
.....

طبعا بيوم هذيج المشكلة تمرضت حيل وكلياتي ضلت توجعني وراجعت طبيب عليها العدو ما يضرب هيج ضرب ...كمت اتجنبهم هالايام عالاقل لما استرجع عافيتي ...

.....

مر اسبوع واني ما كدرت اشوف عادل للاخير  وبيوم الجمعة كل اهلنا ملتمين اتصل سالني اذا موجودين الولد واحد من العمام ..

.ما افتهمت قصد سؤاله جاوبته اي موجودين وره ساعه انترس بيت جدي زلم وناس معكلين ما فهمت اول شي لحد ما اجتني رسالته وهو يكول جبت العمام وجيت ...

عزااا سواها صدك!!!
فرحت شلون جايب مشية تسد الشارع بس فرحتي بهالعائلة منين وتطول ؟؟

شويه وطلعوا وعمي ثامر وراهم يصيح مو راضي وجع فوك وجع
دخل غسان لبيتنا يحجي على عادل واهله ويسبون بيهم شلون يخطبون منهم وشلون يتجرأون ...ديلا على اساس خاطبين من بيت النبي !!!

دخل يصيح عصبيته ما الها كل داعي او هيج ظنيت لحد ما فات وراه عمي ثامر تبعه عمي مضفر وعمي ابو محمد وبقية العائلة يتفرجون!!

عمي ثامر اول كلمتين وجههن الي هدمن كل امل الي بحياة مثل الاوادم ويه هالحشر ذول...

ثامر:باوعي يا بنت اخويه الج حلين لو تاخذين ابن عمج وياشر على ابنه ، اللي واكف بصفحة وشكله معصب نار صاير لوو؟؟؟

_تتنازلين النا بالمحكمة حجاها غسان وعمي ثامر سكت ورجع حاجاني

-ما اكولج عالفلوس بينا ماكو فلوس ولا ملك ، بس من اول ما هيج سواها ابوج شرط كان تاخذين من ولد عمامج وفراس اللي قبل بيج وكال اله اخذها ...لو تبقين بدون زواج شرط هاي مقابل هاي

بقيت ما مفتهمة شكو سالته مستفسرة
-قبل بيه؟؟؟ليش شنو المسويه ابويه حتى فراس ديقبل بيه ..

-ابوج سجل باسمج البيت وبستان ومحلات اربعه ...

اخوانج يشتغلون بيهن وهذا رزقهم ورزق عوائلهم ..وانت بالاخير اذا تزوجتي منا ماراح نداعيج بيهن شمدرينا الغريب شيسوي؟؟

-كلت بنفسي عاد هسه شلون خوش اوادم وشلون امان انت وابنك ...سكتت ما جاوبته وسكوتي بعد تفكير مو اني الانطيهم لزمه عليه ....جاوبته بثقة

-عمو اني ما جبت الناس لخطبتي لا طلعة ولاطبه وانت تعرف !!زواج مو ببالي اتزوج وفراس حاله حال اخواني

صاح من يمه متنرفز

-منين اخوج اني؟؟

-ابن عمي وحالك حال اخواني ..اعذرني ...والله ابقى بدون زواج ولا اكدر على هاي مو قصور بيك بس اني ما انفع لزواج...واكفة ام مظهر بساع تداخلت

-مو اني دوم احجيها تزعلن انت وامج هو انت مال زواج ورجال ..

دنكت عود فقيرة وعمي رزلها ويكول الها احسن البنات مرومه ...عوجت حلكي باوعت عليهم بكل خاطري صرت مرومه سبحان الله!!

عاد كلت بصوت ناصي
-بعدني صغيرة؟؟

صفنوا كلهم ساكتين يباوعون الي امي تريد تصلح الوضع وتكول لعمي بعدها صغيرة وتقنع بعدين ..كل عقلهم اخذ هذا الجلب الا اذا مخبلة!!

غسان اشوفه ارتاحت ملامحه وردت اشتغلهم ببغير اسلوب ...

-اني مستعدة اتنازل بكل شي لاخواني حتى لو ما اتزوج وشلون اكدر بعد اضرهم لو احارب رزقهم ...انداريت لغسان وكمشت راس علول احجي وياه..

-مستعدة اتنازل لهذا اصغر واحد بيهم بكل شي  بس اذا باسمي او باسم اي واحد بيكم مو كلنا واحد ويجوز ابوي يعرف وعنده اسباب كافية خلته هيج يسوي ..

ولمحت لنسوانهم اللي رغم اخوات بس حقارتهن حتى بينهم وعلى بعضهن ، اشرت هذا ابني وذاك ابني وحتى غافر وغدير شعندي الا انتو...

غافر كال بساع
-لا مو عاد باسمه شنو هالزعطوط هالنوب تصير ركابنا بايدة
عمي ثامر حاجاني وهو هم بباله موال اعرفه ؟؟
-لا عادمحد يجبرج على شي ..

فضت السالفة كلها بس فراس وجهه انطعن ...اباوع اله واعرفه ما راح يبطل ولا يجوز مني بس المهم ما اتزوجه مو ايمان اني ويستفردون بيه ؟؟

...

فات يومين كمشني بالحديقة يريد يجبرني عليه، جنت طالعه من يم جدتي وراجعه لبيتنا ،  اتفاجأت بي من طلع من الممشى المشبوه القديم نفسه ..

جرني لاخره وجتفني بحضنه

-شتريدين اطيح حظج وخذج هسه
ساد حلكي ويحجي بعصبية يملخ بشعري قاومته ضربني ومددني عالكاع ويجر بملابسي وملابسه ...

تخبلت اريد اخلص نفسي ما اكدر فراس ضخم واني رغم طولي بس ضعيفة حيل ..خنكني بجسمه...
بديت اطلع وحشيتي عليه واضربه وهو يضربني اقوى ...

خلصت نفسي بالقوة من ايده كمت دفرته برجلي قوي واخيرا انفك حلكي من كفه الخانكني جان
-كل...ب حقيي....والله لا اكول لاخواني عليك ...

تقدم تجاهي بساع كمش ركبتي خانكني
-بعمري ما عاندني احد ادفنج ...توافقين ورجلج على راسج...تريدين تاخذين هذا الكو...

-ما اريد ...ما ارييييد عوفني ..من عليت صوتي شفته ارتبك حيل ويباوع للممر سد حلكي دفعته رفع ايده بساع وخطف ضربني راشدي قوي وكعني على جهة من قوته

-عبالي ادمية؟؟اني اشوفج ؟؟

تركني وراح خشمي طك دم وبجيت لاول مره اوصل لمكان مسدود ما عندي خلاص ...شسويله الا اذا مات يلا الله يخلصني منه ....

......
ما مر هواي وقت وسبحان الله طلعن مالات الحرام من جلدهم عمي مسجون وهمه مهجولين بالمحاكم والمخافر ....ما ضل ولا فلس حرام ما طلع منهم هالنوب رجعوا عالمسكينة ايمان يريدون ياخذون فليساتها منها .....

اني اخواني تجنبا للاحراج وحتى لا ينطون فلوسهم لعمي خلوا كل شي باسمي ...بس حبسوني اكثر وصرت بالضبط الدجاج  التي تبيض ذهبا ...

يخافون من عمي وولده ، وخايفين لا ينجبرون يخسرون فلس لقضية عمامي ..

ورغم عمهم ابو نسوانهم هم مسجون ابد ما ساعدوا ...

وكل ما ينسالون منين نجيب وقابل شنو عدنا ؟؟

ضل فراس لاحك ايمان لان هي الحلقة الاضعف بيناتنا ،  ولكن الاقوى من ناحية الورث وقيمته ويريد بكل الطرق ياخذ من اي مكان ...خسر فليساته وكام يريد يلمهن مره ثانية وبأي شكل...

رجع يدور يستولي على حق كل ضعيف تطوله ايده او يكدر عليه ....

وبليلة كنت سهرانة اتابع فيلم اجنبي بعد ما خلصت مكالمه ويه عدولتي ... ويه الفجر تقريبا  واني مو جايني ابد نوم ...طلعت رحت للمطبخ اجيب الي شي اكله جعت !!

من شباك المطبخ لمحتها تركض وتتخبط خايفة براسها عباية ...رغم الضلام بس ميزتها او بالاحرى جنت متوقعه وخاصه بعد ما شفتها شلون خافت من نبهتها لمخططهم ...

طلعت حجيت وياها ...خايفة وتختض من راسها لرجلها انقهرت على حالها بالله شلون بيها هاي ...

.كلت بنفسي وعدتي انج تساعديها يا مرام ..رجعت للبيت بسر عه جريت من كاونتر المطبخ نسخة الاحتياط للباب الخارجي ...هي شافتني انفرجت ملامحها بعد ما كانت باجية ...

حضنتني واني افتح بالباب
شفت حالها كلت هاي شلون تطلع هيج واعرفها اني شكد جبانه نزعت كلادتي من ركبتي وحطيتها بايدها عسى تفيدها ...

بجت وتحضن بيه ممتنه ...واني هم دمعت عيني ..
-روحي ايمان ..روحي لاهلج !!

طلعت تركض واني زقفلت الباب وراها وقفلتها بالمفتاح لا من شاف ولا من درى او هيج جنت اظن ...لحد ما صار الصبح وكبت العيطة مالتهم  ؟؟؟؟؟

يتبع ...

البارت صح قصير لذلك باجر نشر يكون الصبح تعويض منخليكم تنتظرون لليل ...

تفاعلكم يروحي ..