عشقهُ خنجر في خاصرتي

البارت الثامن والعشرون

_٢٨_

#عشقه_خنجر_في_خاصرتي

#بقلم_أسماء_ديمير_مع_Roro_Rose

ماكدرت اشيلها ثكيله ، كابلتها ابجي وهيه سوده عليه تون  ، جدي يصيح عفااف بابا شبيج تقرب علينه شافها خربت نوب ..

عافنه ومشه بسرعه ويتعثر ، يخابر ولد خالي ..

حاولت اجرها من حمام ثكيله نوب لا حس ولا شي ، رفعتها اعيط ولج يوووم شبيج ..

رجلها نخوف كسر قوي كلش ، مبين زالكه و اكعه على تخته الحمام ، ملابسها منكعه ماي ، امي مو صغيره جبيره ، شوي سمينه ، كلش صعب احركها وجدي جبير مابي كوه شايل رجليه ..

حسيت بضعف وهيه بحظني بلا اي حركه ضلت الطم يمااا عيوني انتي شبيج ..

دخلو ولد خالي يتراكضون نوب شافوها تخبلو ، شالوها كوه واني اركض وراها ..

يادوب لبست صايتي وذبيج شال على راسي وطلعت اركض وراهم للسياره ..

جان مغمى عليها ، لمن وصلت للمستشفى اني من يمي انتهيت ، اخذوها منه بالطوارى ، تتلعوج بيدهم ورجلها وراها تروح يمنه ويسره ..

دخت من يمي دخت من الالم ، ساعه ونص اشعه ومفراز وفحص طلع عدها كسر بالفخذ نوب زاد الموظوع سوء وسببها نزف ..

كمت ماكدر اوكف ، اول مره اضعف بهل شي ، طول عمري اخذ قوتي من امي فكره انو امي بيها شي خبلتني ..
.
جدو كاعد كال اخابر برهان يتبرعلها دم ، اجه خالي ..

ولده ، دكاتره حجو دم انريد دم ..

مالكينه احد مثل فصيله دمها نوب تحتاج اقل شي بطلين ولازم تروح لمصرف الدم ..

راح خالي وتاخر ، جدي داخ وكعد مابي بعد ، ركضت للاستعلامات ، وخابرت موظفه ام سعدون الي وياي اتوسل الها اذا تعرف اي شخص او اي موظف مثل زمره دم امي لان محتاجي وخالي راح يتاخر ولازم تدخل عمليه ..

ساعه وكالو لازم تدخل عمليه يله ماكو دم ..

كعدت ابجي عديمه حيله سهلها يالله ، انداريت على جدي وجه خرط ، هو منا صاحب ضغط ..

رجعت دكيت على خالي كال بعدني مالكيت ، احس دنيا خلص قفلت بوبها بوجهي ..

اجاني صوت ايمااان ..

رفعت راسي ابجي ،  لان رعد وراه  دخلت ام سعدون ، خليت اديه على وجهي ابجي ، رفعت  راسي اكرر بالجمله ..

امي تريد دم ، امي يرادلها عمليه عفيه محتاجه دم ..

رد كولي يالله سهله ، هسه رايح للمختبر ، جلبت بام سعدون عيوني خاله امي والله حالتها حرجه ..

ردت اطبطب عليه ، مابيها شي انشالله ، الولد مايقصر بس كتله والله اجه ركض اكعدي امي وجهج مصفر شبيج ..

كعدت همه ركضو للمختبر نوب للدكتور ، كعدت بصف جدي مابيدي شي ، هو اشوفه يركض منا ومنا وشايل دم بيده ..

راح نوب للكافتريا ..

اجت ام سعد كعدت بصفي حجت خلص عيوني عدت سلامات دم وصار عدهم ، شلون صار بيها هيج شنو مدعومه ..

رديت بتعب لا والله وكعت بالحمام هيج ..

خطيه ياايمه ، ما عليها غير العافيه انشالله ..

جدي حاجها اشكرج جدا ، 

مابينه انشالله احنه اهل حجي و ايمان بحسبه بنتي الله يشهد ..

اجه رعد من بعيد ، رفعت نظري علي ، ابتسمت اله من بعيد بممنونيه ، شايل بيده حافظه مال كلاصات كهوه ..

تقدم علينه بنطرونه جينز و تيشيرت الاسود ربع رد ، لون شعره مطابق لون ملابسه و لزكه الجروح بمعصمه ..

وكف سلم على جدي وقدم النه كهوه ..

كال حاولت اجيب عصير بس مالكيت ..

اخذنه منه حجيت بهدوء شكرا ..

ابتسم وكف على صفحه يشرب بكلاصه وكل شوي يندار علي ..

لاحظت روحي جايه بتراك البيت و نعال ، ابتسمت فشلانه نوب نعال عليه ميكي ماوس ، جريت صايه على نعال خجلانه ..

ضليت عيوني على باب مال صاله العمليات وعين عليه هو ..

خالي اجه متاخر ، يس جايب وياه دم ، كالوله ممحتاجين بعد ..

ورد رجعهم ، ضل يركض هيج وهيج هو ولده ..

لحد ماطلعو الاطباء من يم امي كالو عدت على خير بس خليها تحت المراقبه ، لان حالتها مو شي نوب عدها ضغط ..

ام سعدون تطمنت ومشت ، رعد ضل للمغرب و احسه شافها صعبه بعد يضل اكثر من هيج ..

وكفت كباله تشكرته .. تعبناك ويانه ..

لايابه واجبي ..

رحم الله والديك ..

سكت لزم شعره يرده ليوره ، نزل عيونه على صايتي ..

حجه مالكيتي غير هذني ملابس اطلعين بيهن ..

جنت مستعجله مالحكت شسوي ..

هز راسه  حجه عود طمنيني اذا احتاجيتي شي دكي علي لا دكين على احد ثاني ..

هزيت راسي تمام ..

صدك احجي ..

اي والله ماشي ..

تردين شي ..

سلامتك ..

رفع ايده وسلم وطلعت ، انداريت اباوعله لحد ماختفه عن نظري ، انداريت على جدي لكيته صافن علي ، شافني ابتسم حجه منو هذاا ماعرفناه ..

بلعت ريك وكعدت بصفه رديت ، بعدم اهميه موظف ..

رفع حواجبه موظف كتيلي ؟؟! 

ما باوعت علي ولا خليت عيوني بعينه ..

حجه خوش ولد مبين ، عنده غيره ويركض بالشدات ..

شربت شوي كهوه اتهرب واكوله اممم اي ..

امج تعرفه ..

رديت بساع لااا ..

ضحك ..خوش كلها كم يوم وتكب العيطه معناها ..

ضحكت خلي تكوم لو تكتلني بالنعال هم راضيه ..

رد عود اذكرج ..

خليت راسي على جتفه اضحك ..

بتت بيومها اني وجدو يمها ، ثاني يوم يله صحت وفكت عيونها ، حالتها شبه استقرت ، اجت مرت خالي واني رجعت سبحت و غيرت ملابسي ورجعت يمها ..

اخذت اجازه فتره ، اجت ام سعدون هيه ورعد وره كم يوم للمستشفى يطمنون ..

امي للحظات عبالها رعد ابن ام سعدون ، لان ماعرفت بيا صفه جاي ومنو ، كوه نطقتها هذا موظف تبرعلج بالدم ..

تشكرت منه هو اخذه الحجي وياها ، رعد اجتماعي درجه اولى ..

يفرض نفسا فرض ، ماعنده شي اسمه تردد ، خلق موضوع ويه امي وكعد عادي يحجي  .

نوب كعد يسولف لامي ويصنف عليه يكللها بنتج ، بالمستشفى جانت مثل الخبله ..

شايفه المجديه من يبوكون فلوسها واضل تركض بالشارع يمنه يسرى ، وشعرها طالع من شال ، ونعالها طافر من رجلها .. ايمان هيج بالضبط ، 

حتى اني ضحكني على نفسي ، كعدت كباله ، انتبهت على تعابيره ، صاحب عيون نرجسيه وبشره حنطيه ..

شعر خفيف و اسود سواد اليل ، كظاها ساعه من ضحك و المجاملات وطلع ، 

وهيج مشت الايام ويه امي ونكستها  ، لحد ما قبطت اسبوع .. 

طلعناها ، مشيتها جانت معدومه واصلا مننوع تمشي ، كسر من فخذ يعني خطر بشكل .

وهيه هم مو صغيره  ، ويلتأم الكسر بسرعه ، تناوبنه عليها كلنه ..

اني وجدي ومرت خالي و بناتها وحتى خالي ، تعبنه وياها بشكل ..

رجعت داومت ،  اجازاتي كثرت حيل ، الموضوع بده يزعج المدير ، 

سوالي استدعاء بسبب كثره غيابي واجازاتي ..

اخذت تقرير مال امي على اامل مايحجي ويشوفه عذر مقنع ..

سمعت واحد يكلي صباح الخير ، التفتت علي ابتسمت ..

صباح نور رعد ..
.
وين متوجهه ..

اشرت اله بالاوراق للمدير مبين عصبي بسبب اجازاتي ..

ليش ..

نص هذا شهر ماداومته كضيه اجازات و غياب ..

ابتسم ، امج شلونها ..

الحمدلله طيبه ..

كوويه امبينه امج ..

لا يمعود من اهل الله ترى ..

والله اني من اهل الله ، ماتحنين عليه ترى غلبان ..

ضحكت ..

جر نفس ضايج دمشي يله ..

وين ؟!

دتعاي دشوفه شبي هذا بغل المدير وياج  ..

ههه لا تورطني وياه يمعود ..

افااا تتورطين وانا وياج ، دكسر ظهره اذا حاجاج ..

ونعم منك مجرب بوكفاتك انته ..

اني كريم بوكفاتي بس انتي بخيله ..

سكتت متجاهله كلامه صعدنه بالمصعد توجهنه للغرفه مدير ..

اول شي حظرت تقرير وكفت ارتب بي ، مالكينه سكرتيره بمكتبها كلنه ندخل كبل ..

بس وصلت قريب المكتب واسمع صوت غريب ..

عقدت حواجبي شنو هاي ..

يكرم الله صوت غير اخلاقي ..

فكيت عيني انداريت على رعد فاتح عيونه ومبتسمه ، ركص حواجبه ،  تقرب من الباب كلي شنو هذا ..

اني رجعت ليوره اريد انهزم طلمت على خدي ياا عزاا ..

عكس رعد كال هلا هلاا عالكه جوه صايره فلم اجنبي شوو دنشوف ..

غمضت يااا عززز ولك ..

حط راسه على باب يسمع ..

همست بنتره ولك شسووي وخرر ..

اندار علي وياشر بيده ،  صايره ملحمه والله جوه ..

نطيته ظهري وركضت انهزم .

ركض وراي يضحك ، حجه فلك طرجن نسوان ماتنكضن حتى بنص دوائر تتحرشن بينه احنه الفقره ..

خليت فايل على وجهي اضم فشلتي وجهي دعه احمر دم ..

نوب المصعد شكل مايرضه بفتح هجمت الدكمه وماكو نزلت اركض هو وراي يصيح شبيه يبااا ترة عادي ..

نترت بي بدون مابوعله تأدب رعد والله عيب اسكت ..

انتي شعليج ،  ناس بالعه بالعسل واحنه نترزل ..

نزلت على درج كل شوي اعثر ..

رد هو كال اعتبري نفسج مجازه شهر ثاني راح ابتز المدير على سالفه ..

ضحكت هو هم ضحك ، كال شفتي ..

ماشفت شي انته مو مؤدب وشفت ..

الا سمعتي شي ..

هذا اسمه فسق وفجور ..

اكعدي راحه رابعه العدوويه ..

خليت فايل على وجهي واضحك ، توجهت لغرفتي هو وكف بنص القاعه خال اديه بجيوبه يباوعلي .

صدك المدير ماحجه على سالفه غياباتي بعد ، ماعرفت جان منو يمه بالغرفه ، ماريد اكول سكرتيره استغفرالله ماريد ادخل بخطيتها ..

بس رعد جان يكول هيه ، خاصه من تصعد بالخط ويانه يكول صعدت هااي ام اااه …

كوه اكتم ضحكتي برغم سالفه قله ادب وتفشل ، بس الموقف والله يضحك نوب يكول نوب طلعت من غرفته مثل الفرس ادري مره لو جنيه ..

كوه اكتم ضحكه واعض بشفتي ماريد اطكها ضحكه واخرع العالم ..

تقربت منه احسه صديقي او رفيق الي ، يعرف كل حياتي بس ماتجرات بيوم احجيله شي ، جنت اتجنب الماضي ، عكسه هو ، برغم ماعرف عنه شي بس هو جان مثل كتاب المفتوح ..

يحجي كلشي ، عن اطفاله عن مرته الي انفصلت عنه .

ماتجرأت وسالت ليش ، خفت لايجي يوم وهم يسالني ليش تطلكتي من فرقد ..

الطلاك من يصير بين اثنين ، مو لان واحد بيهم مو خوش ادمي ، احيانا يصير بسبب عدم تفاهم ، او تدخل من طرف ثالث ، او تفاوت بسبب الثقافه او مستوى الفكري ..

تعددت اسباب الطلاك ، بس نتيجه وحده ، ماريد ادخل بنقاشات لخاطر مواضيع صارت ماضي وقفلت عليها ..

بالدوام يعاملني كرفيقه او صديقه ..

بس من يخابر احسه غير ، حتى نبره صوت تختلف ، كانو لكه شخص يحجيله عن شي بداخله ماحاجي لاي شخص ..

اشوفه بالنهار يضحك ويصنف و اكف بطوله وهيئته جميله بنص موظفين وحمايه ..

بينما باليل يكضيها يتأفف وضايج ، 

عرض زواج تكرر ، ورفضي تكرر ..

مو كرها بي ، كرها بالارتباط ،مرت ايام طويله ، وعلاج امي واملنه بكومتها مره ثانيه ضعيف ..

الا احد يسندها ويكومها ، من عدا الالم ومراجعات ، الحمدلله الحاله ماديه مالتنه مو قاصره ، بس عمرها مايسمح بعلاج القاسي او متكرر هواي  ..

رغم نقلناها لافضل دكاتره ، نفسيتي تعبت بتعبها ، ماجنت الكه احد غير رعد يهون ويضحك اصلا على همي ..

يكلي جنج جاهل واذا امج مريضه عادي الكبر اله حوبه ..

فد مره جنت طالعه بطلعه بمطعم ، واشوف شيماء هيه زوجها واطفالها من بعد فراق سنين ، بعد مانقلت شبه انقطعت علاقتي بيها ..

استحيت اتقدم واسلم هيه شافتني تفاجئت اجت تركض تسلم عليه ..

من بعد سلام و الاطمأنان ، حجت حجايه مازوجتي بعدج ..

شسوي بالزواج ..

تكملين حياتج ، قابل اتضلين ولج بس بعدج على ذكره حسام ..

ضحكت ياحسان ماعرفه ..

احسن الج والله ؛ تدرين رغم صارله هواي من تزوج بس لحد هسه ماكو خلفه يكولون صوج بمرته ، حتى سحب قرض حتى يسفرها للاردن علمود الخلفه ..

الله يسعده ويهني شرايد منه ..

امورج طيبه موو ايمان ..

ابتسمت الحمدلله ..

شبي وجهج ذبلان لعد ..

امي مريضه اسم الله عليج ..

الله يكومها بسلامه يارب ..

اشكرج ..

اروح اني بس بروح اعزازج اتصلي عليه وتواصلي لاتكطعين ، لخاطر العشره ولج ..

انشالله سلمت وراحت كملت مشوارها ويه اطفالها وزوجها ، جانت عيوني تراقبهم ، شكد حلو هيج ، اني وياها نفس العمر بس مو نفس الحظ ..

كملت دربي ، فكرت برعد وبطلبه ..

بس جنت خاايفه ، خايفه من الحب ، خايفه لا ارجع انخذل وانلجم ..

داومت وبنص الدرب وكف رعد الي بعيونه ذيج نظرات ..

حجه هاا نزوج ..

ابتسمت خجلانه وخر من دربي ..

جيت امشي اعترض دربي دنسولف شبيج ..

بنص الدرب وخر ..

تعاي وياي للحديقه لعد ..

لا لازم ابصم ..

دتعااي جرني كوه من معصمي وخرت ايده ومشيت وياه ..

وكفنه على صفحه كال انطيني فرصه …

مامستعده والله …

جربي وياي والله اسعدج ..

ضليت ساكته ..

جر نفس ضايج دار وجه وتخصر ، حجه انتي ماتجين بالسياسه ايمان ابد ..

رديت قبل جنت اجي بس هسه لا تغيرت ..

هز راسه ، والي مايجي بالسياسه شيسوله ..

رفعت حاجبي شسوون ؟! 

يحتلون اراضي وبعدين يتفاوضون وياه ..

ضحكت اكعد راحه جورج بوش  ..

شو هذا تقرب علي يكلي نحتل لو نتأدب شتكولين ..

اكول تادب رعد لا تخليني اندم جيت هنا وياك ..

تزوجيني وافك عنج ..

رجع مرتك ..

تغيرت ملامحه من ضحوكه الى خنزره :- خرا على مرتي ، لا جبيبها بالطاريها ايمان ..

سكتت ابتعدت عن وجهه شوي ..

حجه عندي املاك وعندي سياره وعندي بيت ، وعندي ورث ..

باوعتله ابتسمت ، ترى احنه ناس ميسورين فلا تحاول تغريني بهل سوالف …

رفع حواجبه بتكبر واني شاب حلو ورياضي لا تفلتيني من اديج ..

باوعت على من فوك ليجوه وين الحلا باله مداشوفه ..

لان حوله ماشفتيني زين والا نسوان تتاكل عليه انا .. ضحك ..

ضحكت حوله وكل شوي تكلي تزوجيني ..

عبن انا هم احول  ..

ابتسمت شارده بي وبتصرفاته ، اصراره يخلي الواحد.يخضع اله كوه  ..

دك جهازه و شاله يرد ، هو الته يرد واني اراقب بي ، شلون لازم الموبايل ، شلون يحجي شلون يرفع بحواجبه لو يدير وجهه ..

سمعته يكول اي صار ، باجر ادزهم ..

التهه باتصاله واني كتله اروح تاخرت ..

مانتظرت يرد عفته ومشيت ..

وراها بايام قليله ، اندكت بابنه بدون سابق انذار ، من فتحتها شفت نسوان اثنين كبار وبنت شابه وياها طفل ..

استغربت وجودهن بس استقبلتهم سالو امج هنا ..

اي نعم تفضلو ، توقعت كرايب امي وجاين يسالون عليها ..

دخلتهم للصاله والابتسامه مرافقتني ، كحسن نيه ، واستقبال حسن ، سالت مره جبيره الي بينهم انتي ايمان لو غيرج ..

قدمت الها الماي وحجيت اي نعم خاله ..

اندارت على نسوان البقيه بابتسامه وتهز براسها ..

حجت والدتج وين ..

هسه تجي بس اروح اسندها ..

دخلت لامي وكتلها كالت انطيني العكازه ، لبست حجابها وطلعت ..

خليتها يمهم وطلعت اسوي ضيافه ، دزيت جدي يجيب شغلات من محلات ..

وانتظرته ، مادخلت من بين كلامهم سمعت تكوللها احنه جااين والله نتعرف مثل منكول و ناخذ موافقه الاولى لان ابنه رايد يخطب بتكم ..

ردت امي نتشرف بس منو الولد ..

ردت المره ابنه رعد حجيه ، يشتغل ويه بنتج بنفس دائره ..

غمضت عيوني ياامجنون !!!

#يتبع ....

اعتذر على تاخير بس تعويضا الكم راح ينزل بارت ٢ اليوم ..