عشقهُ خنجر في خاصرتي

بارت التاسع عشر

_١٩_

#عشقه_خنجر_في_خاصرتي

#بقلم_أسماء_ديمير_مع_Roro_Rose

مجلبه بفرقد ابجي واتوسل عوووفني لخاطر الله ، مااريد جوزو مني ، شتردون مني بعد ..

هو يرد مرتي عرضي شنوو طالعه بنص اليل شارده مني ليش ، ليش خليني عمامي يحجون علي ويعيروني بيج ليييش ..

فتح باب السياره ويريد يدفعني بيها جلبت بالباب مارضه امي لزمته من وره تجر بي ، وفراس لزمها يجرها ويصيح صعدها ولك شبيك صعبت علبك ..

ولد عمه البقيه لازمين جدي و خالي ، على الاصوات وصراخ امي ..

اجو ولد خالي يركضون شايلين تواثي ، وامي لمت شارع بالصراخ تكول مليشات الحكوو علينه ..

هددونا راح يكتلونه ، طائفييين راح يموتونااا  ..

خطفوو بتي راح يذبحوها ..

الناس طلعت تتراكض ، ولد خالي هجمو عليهم ، كوه فكوني ولد خالي من ايد فرقد ، دفعوني على امي ودخلنه نركض للبيت ، عالم التمت هدت عليهم ..

جانت بوقتها الحرب طائفيه ، والمناطق مو ياهو جاي يدخلها ، اكو مناطق بغداد ضل معلم عليها لهاي الطائفه ، امي استغلت هالشي وضلت تصرخ مليشات راح نموت راح يكتلونه ..

هذول ارهابيه ، عالم شالتهم غيره وتدخلو ولد خالي هم تكامشو وياهم ..

ملخوهم تملخ ، بس اسمع صوت ربد والصياح والعياط بالشارع ، فكيت نفسي كوه ، صعدو سياراتهم يتحلفون و يتوعدون ، نوب فراس دمه صار بطوله ..

وفرقد صفحه وجهه مدمايه ..

ابجي منهاره وامي واكفه تعدد عليهم ..

خالي ايده مدري شبيها لازمها ..

جدي ضغطه نزل وكعد بالارض ، العالم دخلو لبيتنه يفتهمون السالفه ويسالون ، امي ردت بتي زعلانه اجه رجلها جايب جماعته وعصابته يريد يردها كوه وهيه رايده الطلاك متريه ..

سكتو وطلعو ، وناس كالو ، رديها خطيه ليش تهجمون بيتها .

وناس تكول باين الولد مستقتل عليها ، بالكت فتره وينصلح حالهم ..

وين يله صفه بيتنه من الناس الغربه ،  ضل خالي يمنه هو ولده خاف هم يردون..

يوم ويومين احنه لازمين كلبنه ، العالم تجي تطمن خما بيكم شي ، خما هددومم مره ثانيه ، 

خالتي ام محمد دكت تعتب تحجي على امي ، تكللها شلون رضيتي بت تنهزم لو تعرفين الحجي الي طلع عليها ..

كالو انهزمت ويه صاحبها ، سمعتها صارت بالخيسه ، ليش ايدتي بتج على الغلط ياعفاف خما هيج كالوها ..

ردت امي بناتج بحظنج خيه ماضايكه لوعه من بتج بعيده عليج وشوفتها حسره عليج حقج مالومج ابد ، بس نصيحه لا تحجين بشي انتي ما شايفته ولا ماره بي كبل ..

ردت خالتي رايده مصلحه بنتج ، حسابها بحساب بناتي ترى ، واذا بينها وبين رجلها مشاكل مو فد غلط هذا ..

مصلحه بنتي عندي خيه ، كثر الله خيرج لا تدخلين ، مادخلتي بالزين لا تدخلين بشين ..

لزمت وسدت جهاز بوجه خالتي وسكتتها ، 

جدي هز راسه بعتب حجه لامي يلومها ، اختج عفاف ليش هيج بابا غير خايفه على بنتج ، ليش غثيتيها ..

يباااا لخاطر الاسلام ، انا اعز لو عيالها ، بدل ماتكلي على شنو ناوين ذولاك الله يلعنهم ، لا نوب ادك تعاتبني وتلوم بيه ..

حقها بنتها ولدها عدها ، ماشافت دمع العين مانهانت وانضربت وانطردت ، تحجي وتعاتب بيه وهيه ماخلت نفسها بمكاني كلامها مو منطقي ترديني انطيها الحق ليش باله وهيه ماعذرتني ولا عاذره بتي ..

جدي رد اختج خايفه من الحجي الي راح يطلع على بتج ، خايفه على سمعتها ..

ليش عمامها خلو الها سمعه ، شو جانت من دوام للبيت وتالي هم اتهموها وزوجوها كوه مروه عبالك ناهيه ، دوامها كعدوها منه ، شوفوها المر ...

سكت جدي ،  وعافها بحركه دمها ، اني وراها ضليت حابسه روحي بالغرفه  .

بين فرحانه خلصت منهم وبين خايفه لا يسون لخالي برهان ولولده شي ..

حتى همه ضلو قلقين ، بس جان هدوء ، هدوء مرعب  ، نفس ماتوقعنه الهدوء الي يسبق العاصفه ..

مرام حاولت اوصل الها ، بس ماكدرت ، ولا اكدر احاجي خالتي واطلب منها رقم مرام ، انتظرت وتاملت هيه تتواصل وياي ..

مرام ...

رجعت اريد انام ما اجاني نوم وره ما طلعتها ..تدبرها ايمان لو لاا ؟؟

طلع الصبح وكعدت البيوت كلها على صياحهم فزعهم من مالكوها ..

اباوعهم شلون طلعوا يركضون يدورن عليها ،  ركبوا سياراتهم وطلعوا لبغداد طايرين ...

فراس يتهدد بيها يشرب من دمها لو لگفها ، واني ادعي الله يوفقها ويعمي عيونهم ويبعد اذاهم عنها ...

خنست بغرفتي ما طلعت ما خايفة قبل بس اليوم اشو خفت!

ساعتين ورجعوا للبيت فراس ،  ويصيح بعلو صوته ، طلعت اركض اشوف خما جابوها ، بس الحمدلله اديهم فارغه ..

اخواني يصحجون ويردون ، فراس طلع حركه دمه باخو ، جر فرقد وضربه بنصنا كلنا ملتمين ويهين بي وهذا مثل الطلي مدنك ومنخي اله...

ام مظهر ما قصرت بالحجي على ايمان وشرفها وتهيج بي ، وتكله اكيد واعدت صاحبها وشردت وياه  ، شلون طلعت محد حس عليها ، منو صلها لبيت اهلها ، وتحجي وتزيد  اكثر وهذا هاج عالكل ...

عزااا اذا عرفوا الي ايد بالموضوع يمكن يكطعوني ، بعدني بفكرتي هاي ، وحجت المنافقة بالعائلة حظي اسود شايفتنا ...

كالت الهم كل شي ، حجت ترى مرام طلعتي والله شفتها بعيني ، بس ماعبالي ايمان ،  عبالي فتحت الباب لوحده من بنات عمي ثامر حتى تروح لبيت عمي ابو محمد ..

عيوني تشخصت عليهم وبعد ما حسيت من انسحلت ...كل بالي محد درى ولا يدرون كلت تطلع ايمان منا وتموت السالفة بيني وبينها؟؟
....

انجريت حيل من شعري ودنجني للارض يرفس بيه ، خليت اديه على وجهي احمي نفسي ، عيوني مغوشات مدا اشوف بيهن من الدمع ، 

انهضمت حيل من وكعت بايده يضرب بيه كدام اخواني ، وبنص اهلنا كلهم والكل ساكت ويتفرج عبالك يشوفون فيلم  ...

وامي الوحيده تتوسل بيه يتركني وهو ولا يسمع

-يمه عوفها اروح فدوة لايدك راح تموت شعليها هي ..

غسان :عوفيها يمه خل يربيها الادب سز هزمت ذيج السا....

عاطت امي بي بقوة ..تريد تفكني من هذا الخبل اللي عبالك دينتقم مني ...

-ولك هاي اختك صخم الله وجهك ، بمكان ما تحاميلها

عاط فوك راسنا ومستمر يكفخ براسي ايده ثكيلة عساها كسر بلا جبر ..

-هاي الك...لبة ما تشوف الحوش بعد ، ولجن احنا هيج تسون بينا تنزلن روسنا ..وين راحت احجي ويامن طلعت ..

كمت اروح واجي بايده واستنجد باخواني ، مسطرين كدامي اليشوفهم يحسدني عليهم ..

محد يكدر يدافع الي لو يوكف بوجهه قابل جديدة واتاملهم لا والله ...وغسان بالعكس كان يشجعه...

نسوان اخواني واكفات يتفرجن بشماتة ، وجهن يضحك كل اللي اني بي هنه سببه ، ولو يرجع الوقت ابد ما اوصل هالمرحلة ابد ..

من يوم وفاة ابويه واني بايدهم ، لا اكدر اطلع ولا ادرس ، نهيت على كل حياتي ،  وحتى احلامي اللي صار اعظمها انام بلا ما عضامي تون من الشغل ، والركض وره خلفتهم ،  البيت وصخ وهنه حايرات يتغالبن بالخلفة ، لا تربية ولا عزاا براسهم ..

وينك يابه تشوف بنتك شصاير بيها وراك .وعاني من ذكرياتي صفعته الحارة لوجهي ،  نزلتني للكاع بقوتها ..

امي شمرت نفسها فوكايه وتتوسله
-ولك يمه فراس دخيلك راح تموت البنية ..

فراس:اذا شفتج يولي كبالي انهي عمرج فاهمه منا لما الله يكول كافي لو الكي ذيج ..

ساكتة كلمه ما نطقت مو خوف وانما احتقار لهذا الشخص ، علياء شايفتني اني اسد الباب وراها وكل كلامنا متطلعة عليه ..

حتى شلون كلادتي حطيتها بايدها خاف تحتاج فلوس كل شي حجت وهذا يزيد ما يقل ....

اي اهزمها ولو الف مره هم اسويها، حرامات تعيش بنص هالوحوش مو كافي عذابي اشوفها تتعذب واسكت ...

هزمتها ولو ينعاد الوكت الف مره هم اساعدها همه ذول هم بشر ومحسوب ابن العم على راسها رجال ؟؟
بعد الوقت انسدت باب المخزن وانشمرت عالصبة انكردت ايدي من خشونتها  ..

رفعت نفسي وكعدت تلمست وجهي كصتي شوي تأذت من انركعت بالحايط ...

انحبست بالمخزن وهاي مو اول مره تصير وياي ...قبل فترة قريبة سواها ابن امي وابويه وضربني وحبسني لان سمع بحبيبته انتقلت تعيش ببغداد ويه اخوها!!

زين اني شذنبي هالحياة اعيشها مجبرة لا اخذت اللي كان يحبني ولا حصلت اللي احبه وهسه انجبرت على فراس!!!!

اووف لو بس مدبرتها لو بس كنت بحياة ابويه قنعته ينطيني لا اريد فلوسهم ولا املاكهم هاي نقمة واجتي الي ؟؟

راح اضل طول عمري ادفع ثمنها لا اكدر اتنازل عنهن لاخواني ، لان اعرفهم شنو ولا اكدر ابقيهن باسمي ، لان معناها عمري كله اضل هيج معلكه ..

.حيرتي بهاليوم زادت كنت افكر بالتنازل بس من شفت ضهري مكسور باخواني عرفت ما الي لا سند ولا الي حجة ...وبديت من يومها افكر صح؟؟؟
....

ايماان ...

مر اسبوع و حاجيت امي على دوام ، كتلها اريد ارجع ..

سكتت متحيره ، خلت ايدها وصفنت حجت وهاي مصايب شلون ..

وديني انتي لو خط ..

سكتت وجرتها صفنه ..

حجيت يما طك كلبي والله ، خلص كافي ، اريد اتنفس اشوف بشر ..

صفنت بوجهي سااكته ..

حجيت والله لخاطر نفسي ، اريد ارجع ايمان القديمه ، اجت عيونها على شعري الصار كصير ، جرت نفس هزت راسها ، حجت هم يصير على الاقل تلتهين شلج بكعده البيت وتفكير ..

حاجت جدي ، تردد بالاول ، كاللها لاجيبين العين للبنت وهسه الحديده حاميه ،

بس امي قنعته ، على خلي ترجع كبل لايفوت الاوان ومايرجعوها للدائره وتنفصل ..

كاللها اشوف كرايبنه يشتغل هناك واخلي يسويلها واسطه وترجع لشغلها ..

اخذت منهم فتره قصيره ، جان شخص من جهه عمام امي ، مدير احد الاقسام ، كدر يسويها ،  ورجعوني للدوام وللدائره نفسها القديمه ..

سواها عود اني ماخذه اجازه بدون راتب ورتبوها ، اول يوم امي وصلتني للباب وكالت اني اجي اخذج لو خالج ..

بعد زواجي من فرقد لبست الحجاب وهسه التزمت بي ، مو حباً لو طاعه الهم لا ، بس ستر الي الله وصى بي ..

حبيت احصن نفسي ، من عيون الناس ومن الحجيهم ..

داومت اول يوم امشي واعدل بشالي ، مرتبكه اي ،  متوتره هواي ..

صعدت للطابق الثاني بدون محد يعرفني ابد ، لان تحجبت وضعفت ..

فاتو من يمي موظفين قديمين دنجت راسي ، توقعت يسلمون بس انصدمت من فاتو بدون مينتبهون علي ..

التفتت عليهم وهمه ينزلون الدرج ، استغربت روحي هواي ، معقوله لهل درجه تغيرت ملامحج يايمان ..

ذاب رسم وجهج ، عدلت بدايه شالي ، الي جان شبهه ممضبوط ، وطالع منه كم خصله ، تمشيت بهدوء للغرفه القديمه الي جنت اشتغل بيها ..

تمنيت عيوني تشوف شيماء ، يس خابت اضنوني من شفت موظفات اثنين جدد ..

كحيت ودخلت ..

السلام عليكم ..

ردو مستغربين وعليكم سلام ..

باوعولي مركزين وياي .  .

حجيت اني المهندسه ايمان ، كالو الي هنا شغلج ..

اثنينهم ابتسمو بوجهي ورحبو بيه ترحيب حار وياا اهلا ويااسهلا وفرحنه كلش دزولنه موظفه لان عنده لود مدنلحك وتفضلي وهذا مكتبج ..

كعدت مرتبكه ، حجو تردين جاي ..

دكت نبضه غلط بصدري ، رفعت راسي عليهم بهدوء .. عفوا ..

جاي تردين ، ماتقاومين النهار وتعبه اذا ماكو جاي يهدي الراس ..

بلعت ريك ، دمعت عيوني ، هزيت راسي لا شكرا الج ..

دنجت راسي اكلب بالاوراق الهي روحي ، طلعن هنه واني رفعت راسي اجر نفس كوه ..

البجيه بلعومي مجلبه ، كمت دوام بهدوء ، حاصره روحي بالغرفه ماطلعت ابد ..

كمت ونهايه دوام طلعت ركض منهزمه من الكل ، من كل شخص يعرفني مجنبه الاسئله والملامه وليش كطعتي عنه ..

رجعت ويه امي ، عيوني ادور على الكراج وعلى طيف وجهه ، واتلفت ، امي حست علي بس غلست ..

مشت كدامي واني وراها اتعثر بخطواتي ، ماعرف شبيه ممرتاحه قلقه ضايجه مخنوكه ، صدري متألم  كلهن ..

لحد ماامي احجت وتالي ..

رفعت راسي عليها هاا ..

شبيج صافنه ..

جريت نفس ، ماكو تعبانه من دوام ..

باوعت بعيوني ، حجت وراج حصبه وجدر يايمان ، كوي كلبج يماا وتذكري ترى انتي بعدج على ذمه رجال ..

حجيت ماريده كافي ضاع من سنيني بسببه  ..

رمشت بعيونها ودارت وجها تكمل دربها ، حجت وهيه تمشي بسرعه ، الي بالج شيلي ياايمان .. شيلي لاتفتحين بواب جهنم عليج فوك ما هيه موجره ..

همست ممسويه شي ، ..

رجعت للبيت افكر بكلام امي ، بعدني على ذمه فرقد اني ..

الى متى يعني اضل على ذمته ، معقوله مايقبل يطلكني ، واذا طلبت طلاك احصله ، ماتوقع احصله ، وحتى امي اعرف ماراح توكف وياي وتايدني وراح ترفض ..

مو محبتا بفرقد ، بس مثل منكول ما نتحرش بالجلب حتى لاينبح ويعض  …

ثاني يوم كعدت من صبح ، حظرت كوب الجاي و البيتفور ، اشوف احسن ما بالدوام ،  اطلع من غرفه وانزل اكل جوه بالكافتريا  ، افضل اتجنب الكل ..

وضعي مايسمحلي التقي بالذكريات الي راحت ،

كملت اكل ، ومشيت بدلت ملابسي ، ملابس رسميه ، ستره وبنطرون وشال شمرته على راسي ، ومشيت داومت خالي وصلني بسيارته ورجع ، نفس الحاله بسرعه دخلت لغرفه شغلي ماطلعت منها ، اخذت اوراق استنسخهم ..

كلبي حسني راح اشوفه لو التقي بي ، اصلا جنت متوقعه على اي لحظه اشوفه فوك راسي ..

باي مكان ، امشي اتلفت ، احس بي قريب حيل بس وين مادري ، درت وجهي ليكدام ، فجأه تلكاني بالمرر هو وموظف وياه ، رغم مدنج ويحجي بس عرفته ..

من طوله ، من طريقه لبسه ، والاهم من صوته ، وكلامه السلس ..

دار وجه عني ماعرفني رجع لف راسه بسرعه اني كملت دربي للغرفه منهزمه ..

صاح بستغرااب ،  ايماان ؟؟!

مارديت ..

كملت مشي ، ركض وراي حجه اااايماان ؟؟! 

التفتت علي كلبي يرجف ، رفعت حواجبي حجيت برسميه تفضل ..

فك عيونه  ، هاي انتي اي والله ايمان ، وجهه احمر ممصدك ، حجه متفاجئ شجابج هنا رجعتي للشغل شنو ..

ابتعدت شوي عنه ورديت اي ، وكفت ثواني سكوت ، هو احسه ممصدك او الكلام طار منه ، ترخصت ومشيت  وعفته بدهشته ..

دخلت للغرفه جسمي يرجف ، حتى اديه ثلجت ، كوه لازم الاوراق اخليهم بالطابعه ..

وكعن مني بسبب الرجفه دنجت الم بيهم ودمعتي وكعت وياهن ليش مادري ..

يمكن حنيت الايمان القديمه ، يمكن حسيت ضاع عمري على خالي بلاش ..

شلتهم كوه ورجعت اكمل استنساخ ..

حسيت خطوات وراي هادئ غمضت عيوني بتعب ..

اجاني صوته ، شلونج ايمان ..

ماحجيت ، مو لان ماريد ارد ، لااا لان ماكدر احس الكلمه واكفه بلعومي ماترضه تطلع ..

رد كرر ، اشتاقيتلج والله ..

وكفت اديه عن الشغل ،  خليت اديه على الطابعه اسند نفسي ، ماردت اكعد ابجي وانهار جدامه ..

حجيت كوه ، بعديش ، بعد ماضاعت احلامنه ، 

جريت الاوراق الي ماكملن بعدهن وطلعت بدون ماباوع بوجهه نهائيا ، رجعت لغرفتي المم اشتات روحي ..

احس بس جسم يمشي ، وروح تبعثرت بالطريق ..

كعدت على ميزي تعبانه ، لزمت راسي مصدعه ..

انتبهو علي زميلاتي ، حجو بيج شي  ، دايخه شي تردين نجيب مي تغسلين ..

لا اشكركم .. 

كملت دوام شلون ماجان ، حتى شغل مو شي ، وطلعت بسرعه ، بعدها سجلت بخط ، خط ياخذني ويوديني ، اكو بعض موظفات نصحوني بخط قريب منطقتنه ، استمريت بالدوام ..

شيماء اجت وشافتني طلعت موجوده نفس دائره بس غير قسم ..

حجت بعد مامشيتي ، شفت الغرفه خنكه وماتحملت اضل ، فغيرت قسمي ، وتركت الغرفه والقسم كله ..

حظنتها مشتاقتلها حيل ، كالت حسام كال ايمان رجعت للشغل تعاي شوفيها ..

هزيت راسي اي شفته ..

رادت تحجي بس متحيره من عيونها تفتر وتبلعم ..

ماسالت شبيج ولا كتلها احجي لان مالي خلك ، الي بيه مكفيني ..

ترخصت وكامت ، حسام ضليت كل فتره اشوفه ، لو صدفه لو احسه متعمد يوكف هنا حتى التقي بي ..

يوم بالكراج ، يوم يم سجل الحظور ، يوم بالمرر ..

جان بينه كلمات بسيطه صباح الخير ، وبس ..

اني تجاهلته بالكامل ماجذب واكون ما يرجف كلبي علي لا يرجف ..

واحبه حيل ، بس مزوجه وكلمه جبيره حيل هااي ، ردت اتخلص من رابط زواج هذا بس امي رافضه بحجه ناويه تفتحين نار علينه ..

لحد بيوم اني بالدوام ، طلعت انتفس شوي من ضغط الشغل ، ومن كلام الموظفات وزن بالراس ،

كاعده بالحديقه صافنه ولازمه كوب الكهوه بيدي ، حسيت بخطوات قريبه مني التفتت باتجاها ، شفت شيماء جاره حسام من معصمه ودفعته علي ..

حجت ويه حسام بنتر :- هااااي ايمان ، حجت بوجهي ،  وهذا حسام يله احجو عاد فضونه ..

عافتنه ومشت بهمه معصبه  ، هو وكف متخصر مبتسم وجهه فشلان ..

باوعت اله بخيبه ، ضايجه منه لحد هسه على خذلانه الي ..

حجه وهو يدير بوجهه ، شما تحجين حقج ..

سكت اباوع علي ..

اندار باوع بوجهي ، حجه ماكدرت اخاطر باهلي لخاطر نفسي ، ماكدرت اتهور واتصرف بجنون ..

هزيت راسي متفهمه ، دنجت راسي على كوب ، 

حجه كولي اي شي ايمان حاجيني ردي علي ..

همست معاتب مااعاتبك ، لان كلشي تغير ، لان اني مو  ايمان القديمه الي تبني احلامها على احد .. 

كعد بصفي حجه بعدني احبج والله مانسيتج بلحظه ، انتي تعرفين وضع شلون جان وزواجج صار بسرعه حتى مالحكت اتصرف لو افكر ..

مدنجه واحجي ..

ماسألت علي ..

شلون ماسالت لو دائره كلها عرفت حسام انجن بسبب ايمان ، كلها تحجي ايمان عافت حسام وضل حسام يفتر ويسال على اخبارها ..

هزيت راسي ممقتنعه ، فلتت ايدي بنص درب وما حاولت ابد..

جنت مجبور كتلج الله يشهد ماجان بيدي حيله ..

درت وجهي ، مزوجه بعدني ، 

اطلكي واخذج ، اخذج لو عندج عشر جهال ..

طلاك مو سهل ، اصلا امي مموافقه اطلك ولا فرقد راح يرضه ..

جر نفس مختنك ، حاولي انتي مو صغيره ، كولي اريد اطلك وخلص ..

ليش ماحاولت انته ، ليش نسيتني بساع مجرد مازوجت..

ركن شارعكم لو عنده السان جان حجه وكال تعال لم كطوف جكايرك استاذ حسام ..

ابتسمت درت وجهي علي تشرب جكاير ..

شصبر راسي على الفراك لو ماطحن جكاير بركن بيتكم ..

اخذ كوب الكهوه من ايده واخذ شربه منه ، بلعت ريك اباوع علي وعلى شعره الي غزاه شيب ..

حجيت مشيب حسام ..

التفت علي مبتسم بعده شعرج اسود وطويل  لو تغير ..

جريت نفس بحسره ماكو شي يضل على حاله ..

ليش تحجبتي ، طالعه حلوه بالحجاب بس مستغرب ..

كبرناا ..

ضحك بهدوء وين ايمان القديمه ..

كمت لحيلي ، رديت بهدوء ، نثرتها السنين ..

صفن بوجهي مو فاهم ،  حجيت عندي شغل اترخص ..

كام وكف كبالي ولازم كوب بيده ، حجه عندج موبايل موو ، 

هزيت راسي لا تتوقع انطيك رقمي ابد ..

تطلكي ايمان اخذج هالمره والله ..

ابتسمت بداخلي شي ممرتاح ، عفته ورجعت اكمل شغلي .. 

مشت ايامي هيج ، رجعت احجي وياه ، كلام رسمي ، بس المهم رجع لساني يطخ بالسانه  ، رجعت فراشه تحلق بداخل قفصي صدري ، وتورد زهوري مره لخ ..

رجعت الابتسامه ، رجعت مرتاحه ، نسيت فرقد وعيشته وعيشه اهله كلها ..

صح احجي وياه بس بخوف وبحدود كون بعدني مزوجه ومربوطه ربط ، اكو هواي موظفين تغيرو ، الي اعرفهم علاقتي بيهم حسنه ..

والي جدد اني ما اختلطت بيهم ، الي توه متعين والي هو اصلا جاي اهنا بعقوبه ، مره من المرات تعثرت من دون قصد بوحده و انكلب كوب الكهوه عليها   .
ردت بتار وجع ماشوفين ..

انصدمت من لهجتها وياي ، ركزت وياها غريبه ماعرفها ، رديت العفوو..

نترت بعد شنو العفو تلفتي قميصي ماشوفين ..

كلت العفو ماقصد ماله داعي التهنتر ، جريت نفسي ومشيت عفتها واكفه وتنفض بملابسها معصبيه  ..

بعد فتره انتقل حسام لغرفه الي بصف غرفتنه ، جنه نتلقي بسرعه ثواني لو دقايق بسيطه ونفترق كلمن لغرفته ..

هو يخاف من نظره الموظفين واني خايفه لا يطلع حجي عليه ، بس سلام وكلمه اشلونج وابتسامه ..

رجعنه لنقطه بدايه ، كانو توه تعارفنه وخايفين ..

مره دخلت للغرفته جان عندي شغل بيها ، وراحت ايده غصب عني لحاسبته اشوف بعدها صورتي موجوده لاا ..

كتبت رمز وفتحت حاسبه ، شفت صورتي متغيره والخلفيه عباره عن منظر طبيعي بحر وطيور اثنين طايره بالسما ، 

سديته وكمت خلص شغلي وطلعت منها ، رجعت بيومها للبيت ، بس دخلت حجت امي وياي منو مرام ؟؟!

نزعت ملابسي ورديت منوو ..

مرام منو دكت بت كالت اني مرام ، اريد احجي ويه ايمان ..

رفعت حواجبي بت عمي ابو غسان هاي ..

تفاجئت امي ردت وشرايده هاي ..

مادري ماسالتي شبيها شكوو ..

شدراني ماحجت ، بس كالت خلي ادك علي ضروري ..

غيرت ملابسي واكلت شوي ومشيت اخذت جهاز امي ادك عليها ..

دكيت على رقم طلعت الي صوت غريب ، صوت رجالي ، سديته كبل ، خفت ادز رساله ويطلع موبايل احد من اخوتها واعم عليها ..

ضليت انتظر اتصالها ماكوو ..

دكيت على خالتي وخفت اسالها على مرام ، هيه تموت منها ، سالتها بخجل خاله مرام ماسامعه عليها شي ..

ردت ليش اسألين على هاي صلفه بلا تربيه ..

بلعت ريك ، لاا بس شسمه حلمت بيها مو زينه وحبيت اطمن ..

عرج ميدكها هاي جنها صل حيه ..

سكتت رديت كتلها زين غصن لو شدن شلونهم ..

شدراني مايوصلن يمناا كطعت رجلهن كلش ..

سلمت وسديته منها ، مماخذه حق ولا باطل .

ثاني يوم بدلت ردت اطلع ، شفت جهاز امي ، عليه رساله ..

فتحته لان مكتوب ..

هاي اني مرام ، ايمان ديري بالج ترى عمي ثامر طلع من السجن وسمع انتي منهزمه ، توقعي كلشي منه …

فكيت عيوني على وسعهم اسم الله هذا شطلعه ..

صحت لامي اكوللها ..

كالت شيطان هذا ماينخاف علي ، اكيد بواسطه لو انطه جم فلس وطلع ..

رديت عليها شراح يسوو هذا ..

بس ربج الستار و لله على ظالم ، قابل ادوم اله ..

ضليت بقلق انوب ، داومت خايفه وكل شوي اجفل ،  طلعه عمي من سجن ،  نخرت راسي ، بس افكر حتى تركيز ماكوو ..

بس الي مطمني ، اني عند اهلي شيريد يسوي يعني ، واصلا هو علي سوابق ..

ضليت انتظر على لحظه الكاه بيت اهلي ينتظرني ، امي طمنتني لو يطخ راسه بالحايط مالج رده ، رجلج يريدج يجي يسكن هنا ، يريد اهله يضل يمهم ويفكنه منهم ..

نوب اجت موظفه جديده بنفس طابق ويانه بس غرفتهم اخر الممر  ، من انتبهت عليها ، عرفت هاي الصلفه الي تجاوزت علي لان انكلب عليها كوب الكهوه دون قصد ..

وبس تتهنتر شدت وياي من اول يوم ، اني عايزه الها باله ..

على اخطاء املائيه تناكرنه سويه ، وهيه تكلي منج هذا الخطاء واني ارد مو شغلي هذا شغلج..

واكفه واتجادل وياها ، هيه سليطه السان ، واني هم تغيرت وكمت ماسكت ، يمكن العشره يم عمامي فادتني شوي .

نترت بيها كتلج مو شغلي ماشوفين انتي شنوو ، بنص جدالنه ، اجه واحد من الاستعلامات حجه اكو شخص جوه ايريدج ..

شنوو ..

نزلت وياه مستغربه .

لان اشوف شخص لازم اوراق بيده ..

اني بعد شكد عنه ، واحد من موظفي الاستعلامات اشرله و حاجاه هاي ست ايمان ذيج على درج . .

بعدني ما واصلته ..

حجت حظرتج ست ايمان ، اجاج تبليغ من محكمه ، وكفت متصنمه هااا شنو ..

رد اي ست متهمه بجريمه قتل …

#يتبع ....

كثرونه تفاعلات 💜

شنو تتوقعون مصير الاثنين بعدها ..

منو تتوقعون الابطال الرجال .. لان طال غيابهم موو بس هذا هو الحلو بالقصه ..