عشقهُ خنجر في خاصرتي

البارت الاول

_١_

#عشقه_خنجر_في_خاصرتي

#بقلم_أسماء_ديمير_مع_Roro_Rose

فرحانه بفستان التخرج والقبعه ، وكل شوي اشوف نفسي بروب والطاقيه ..

اي جامه اي شباك اي مرايه اركض لعندها اعدل نفسي ارتب حمرتي.
كذلتي ..
طبكه الفستان من يم الصدر 
ترجيتي .
كلادتي .

كلهن ، هوس الرتابه والاناقه ، الي اجاني بذاك اليوم غريب ، امي تمشي وراي مدمعه فرحانه بيه ، وجدو بعكازته ساند على امي يمشي واني اركض جدامهم مثل الفراشه ..
وصلت لقاعه الاحتفال بجيت بفرحه التفتت على امي ،  مااماااا ..

حجت امشي الله ينور دربج ويفرح كلبج ويسعدج ، يله ، روحي احنه نكعد هناا نصورج ، التفتت على جدو يكلي امشي ولج شوفيهم المهندسه ايمان بهيبتها يله يارفعه راسي ..

مشيت مرتبكه واتبسم ، اباوعليهم مدمعه من الفرح ،  وكفت حالي حال البقيه متحمسه للدخوليه ، اديه ترجف فرح مو خوف ابد ، فتحو الباب وبدينه ندخل ..

تلكونه الاهل هلاهل وجكليت وهوسات وتصفك ، بجيت حيل من فرحتي ، جان اقوى حلم عندي واعلى امل بذاك الوقت ..

حظنت ماما جانت هيه الايد الي دفعتني اكمل حياتي ، بست جدو الجان الاب والجد والاخ وكلشي ، بعد استشهاد بابا هو صار ابويا ، احن رجل بالدنيا ممكن اصادفه والحب النقي الوحيد  ..

كملت الحفله اغني واتمايل وفرحانه باسمي المهندسه ايمان ، بلشو يركصون ويصفكون ..

دفعني جدو عليهم يريدني اختلط وافرح ،  يله ايمان يله هلا هلاا ويصفكلي  ..

وكفت بصف امي اميل بجسمي يمنه ويسره اغني وياهم واصفك اغنيه حاتم العراقي ، سمعت واحد صاح قريب منه ..

ام ايمان  ..

التفتت على مصدر الصوت ، امي التفتت قبلي عفست وجها وضاجت دارت جسمي ليكدام حجت غلسي يمعوووده غلسي ..

تكرر الصوت ونفس النداء ، ام ايماااان ..

جدو اندار وكف ، درت وجهي عليهم ..

شكلهم مو غريب ، اثنين زلم يطلع عمرهم مو صغير كبار وياهم مره بعبا ، تمشي و تهف بالعبا ، استغربت هذول منوو ..

ركزت بيهم زين وجهم يوحي بقربهم النه ، تقربو علينه للميز ، والمره بسرعه اجت،  حظنتني وتضحك :-  بالمبااارك ام ايمان بالمبااارك ، كرت عينج فرحتج هاي ، بوست امي ، امي بلا ملامح سلمت من وره خشمها ..

امي كاعده ماكامت ، عكس جدو كام فشلان وجهه خرط ، حاجو امي حجه واحد منهم عاشت ايدج عفاف على هالتربيه ، وصلتيها والله عمي ..

اني ضليت واكفه مستغربه امي عوجت حاكها ، اشرت الي بضوجه عافسه وجها ..

- عمامج عود هذول ..

التفتت بسرعه عليهم اضحك يااهلا ، المره تضحك وتبوس بيه ، بس الزلم ماتقربو بس يكولون بالخير عود صرتي مهندسه وبعدين ؟ ..

- امي نترت تتعين وتشتغل وماتمد ايدها لاحد ..

- حجه هذا واحد بيهم ، جنه كاره امي من نظراته ، هاا هيج الحجي صار ..

امي كامت ، جيتكم لهنا ثامر شنو وراها ، غبيتو فرد غبه شتغير ..

-حجه وحاط اديه بجيوبه بنت اخووي وكلنه نشوفها ونجي نبارك الها ، 

-رد الثاني وحتى تعرف عدها عمام ، يحبوها وهاي شوفت عينج جبنه صابرين واجينه ، غير بت الغالي هاي ..

امي ضحكت ودارت وجها عليه مستهزئه ،  ياابت الغالي عيوني صار فوك ال ١١ سنه ماشايفتكم ، لو ما اختي تخابر وتسال ، و تكول عيالج بعدهم عايشين اضن انتو انتقلتو لرحمه الله لذلك قطعتو عنه ..

المره  الي اسمها صابرين حجت يااا وكتها ياعفاف على بختج جاين نفرح على فرحج هيج تتلكينه ..

جدو نط اكعدو يمعودين اكعدوو انتو اهلنا انشالله ، اكعد ثامر يابه اكعد مضفر ابني ليش واكفين، وليداتكم شلونهم ..

كعدو ضايجين من امي بس جدو شوي فك وياهم ..

اني جيتهم وعدمها عدي نفس الشي ، مامعتازه شي بحياتي الحمدلله وماقاصر علي ، خوالي وخالاتي مغركيني بحنيه ودلال ، امي ضلت كعده كلها ساكته وجها جامد مغثوثه ..

المره الي هيه عمتي صابرين تقربت مني تحجي وتهمس ، يبوو جديتج ام ابوج ميته على شوفتج ، نوب عمج مضفر كللها بت قاسم تخرجت وراح تتعين تخبلت كالت جيبوها اشوفها ..

سكتت مبتسمه ، امي عينها علينه ضايجه وجها مكلوب ، رجعت تقربت مني عمتي صابرين حجت تعاي يمنه شوفينه وتعاي شوفي بنات عمج ولد عمج ..

سكتت اباوع بوجهه مبتسمه،  جريت نفس متوتره ، الرجالي الي اسمه مضفر وثامر التهو يحجون ويه جدي ..

الي اعرفه واحد من عمامي ماخذ خالتي اخت امي ، بس ماشايفته ..

بس شايفه ولده وبناتهم يجون يمنه نوبات ، يجون ويه خالتي يشوفون جدي ، صح موهواي بس المهم يجون واعرفهم ، الا بقيه لاا ..

جدي اشوفه مسايسهم ويسولف عادي بس امي لاا ، عمتي صابرين لطشت يم اذني وتسولف الي بيبتج وعمج فلان وابن عمج فلان ..

وعمتج فلانه ماخلت دوختني وحرام اذا افتهمت ، الحفله راحت وانتهت واني مسطوره ..

نوب مدت ايدها على رجليه ونزلت فستان القصير وحجت عيييب عمه عيببب شنو ماكو حياا شهل رجلين ليش مزرزره ..

فهه وجهي عليها ، باوعت لامي ، امي كامت بنتره ، حجت يله ياابه يله ايمان هم يله نرجع الحفله وهم راح تخلص كاافي عاد ..

بلشت تلم بجنطتها بسرعه  ، كمت وياها جدو هم شال العكازه وكام ..

تسالم ويه عمامي حجه تفضلو ويانه على العشه يابه ..

حجه عمي ثامر ماتقصر مشكور على جايات انشالله …
عمتي صابرين باستني ، وخلت بيدي ورقه ، حجت هذا رقمنه دكي علينه ، عود شدينه توه تلفون ارضي ،  حتى تحجين ويه بيتج تحاجيج ..

اخذتها بايدي فشلانه هزيت راسي صار ..

امي جرتني من بينهم  جر وطلعت بسرعه وراها جدي يمشي ..

طلعنه من الكليه وصلنه للكراج وامي عصبيه تحجي وتدردم نوب التفتت علي ، نترت بيه شنطتج جرت ايدي ، فتحتها ورقه بيها رقم ..

عتتها من ايدي بسرعه مردتها وشمرتها بالارض ، حجت  بعد وكت عليش تذكرو هسه ، والله يالله ، شهل عين الصلفه ، جدو صاح ولج عفاف على كيفج شبيج طرتي يابابا ..

اندارت علي نووب انته تكللهم تعشو يمنه موو؟؟! ياكلون سمم تعزمهم ليييش ، فرضا قبلو عزومتك شسوي اني الطم املخ نفسي ..

- افاا بابا شبيج شجاج نسيتي اختج عدهم ، وعيال اختج هذول ، ليش هيج لخاطر اختج على الاقل ..

- اختي عاجبيها ، اني عن نفسي لوو اموت هذول ناس لو يصبوهم ذهب ماتقبلهم ..

- عمام بنتج بابا لاسوين هيج ، وتتمردين وتعلميها الزعل ..

، كملت مشي وجرتني وراها ، نسيت شسوو بيه وبابو ايمان لو اذكرك بابا ، نسيت دمع عيوني بسببهم ، نسيت بذيج اليله من اليالي اجيت حتى ايمان افقدهاا ، جاين هسه ليش ..

- يكول الحجيه مريضه ، بابا خلي تروح ايمان تشوف جدتها خاف تموت المره ..

امي تمشي بسرعه وضحكت تمووت ؟؟! ياهو هاي تموت ، تموت عشيره وماعليها شي مو ام ثامر هااي مو نفسها الي تفرق بين ولدها وعلمتهم على حقد ..

ضل جدو يستغفر وويتعوذ من شيطان…

اني مثل الهبله ساكته وخانسه ، صعدنه بالسياره وامي مزنبره وتتهنتر بينه هم اني وهم جدو المسكين ، جدو ياشرلي امج طك عدها فيوز مالج شغل بيها عيب عمامج هذول ..

هزيت راسي اي مبتسمه وخانسه بحظنه ..
نوب ضلت امي تجيب وتكرر وتصقل لاا نووب يكوللهم تعالو تعشوو ياكلون مرض ..

اندارت علي انتي شجانت تحاجيج عمتج صبيره .هاي .

ضحك جدوو صبيره شنوو عفاف عيب بابا ماكبرتي ..

نترت بابا رجأء بطل تصنف علي …
همست الها تكلي ماكو حياا ليش لابسه قصر ..

شهكت امي عزااااااا  لا يا قليله تربيها ياصبيره يام دلعه وستيان دبل اسفنج وحمره سحري  ..

جدو خرب ضحك وياشرلها سااايق يمعوده فضحتينه .  

اني فاكه عيني يااا شبيها امي علينه ..

لمن وصلنه هيه هدأت وابتسمت نزلت من سياره حجت بهدوء فضيع ، من طكهم وجع غثووني شووي يله عاادي ماخرب فرحتي ..

جدو يهز بيده ، مادري شلون عمرج ٤٨ سنه ومخلفه ، وهو عقلج بكد عقل التفت يمنه يسره شاف بزون بكد عقل البزون اقصد ..

كملت دربها للبيت ممهتمه ، هو وراها ، يكللها بس ثامر كبران ومشيب ..

ردت امي والسانها فالت خطيه اكيد كبران مو حتى شيب طلع من طي** 

ضحكت اني لا اراديا بصووت ،  امي صاحت ولي بدلي لج ..

جدي حجه الساانج عفاااف ..

حجت شحجيت هسه ياابابا هم كول جذب ،

عفتهم ودخلت غيرت ملابسي ، المكياج ماشلته ولا حتى اغسلت شعري عفتهم يجننون ..

بس غيرت ملابسي ، بعدني توه طلعت ودخل خالي برهان يضحك ويكول هلااا هلاا بالست المهندسه ..

حظنته بوسني وبوست مرته اشر لمرته العلبه ام  علي ..

طلعت من جنطتها علبه ، من فتحتها اسوار ذهب ، يااعيني ياخالو ليش مكلف نفسك  .

فدوه الج خالو فدوه رفعه راس انتي ..

امي حجت برهان وجودك على راسنه كاافي عيوني ..

-نظر العين هاي ..

امي حاجته لو تدري منو شفنه اليوم ، 

رفعه راسه منوو ..

عوجت حلكها وتقربت علينه تحجي ، اجه ثامر ومضفر وصابرين ..

خالو حجه صابريين اقصد ثامر و مضفر شجابهم ..

امي عوجت حلكهاا وباوعت لمرت خالي رفعت تك حاجب لخالي ، امي ردت بهمس اي صابرين ام دبل اسفنج ..

اجو اليوم يباركون عووود لايمان لو اني ادري بيهم جيتهم بيها سم ..

-دنج راسه صافن يبوو شوده شجاب شذكرهم ..

-ردت امي مو اكول لبابا بس هو ماعاجبه كلامي ..

-حجه جدو عيال اختك برهان ، لو نسيت اختك يمهم ، هم مايصير نقطع وياها ويه جهالها ..

حجه خالو صافن لاياابه بيوتنه مفتوحه الها ولجهالها والله ،

ضلو يحجون بطاريهم ، تغدو يمنه ومشو العصر ، خابرت خالتي ام محمد الي مزوجه واحد من عمامي وباركت لامي ، مشت ايامي هيج ، عمامي سبوع وجابو خالتي ام محمد ونطو علينه ..

امي عادي وياهم تحجي ونوبات اشوفها تتنرفز ..

كلولها جيبي البنت وتعاي ، الحجيه مريضه تريد تشوف حفيدتها وتشم ريحه المرحوم عفاف ..

امي حجت الله كريم اجيب الحجي واجي يوم وارجع ماكدر ابات بره البيت ..

سكتو وماحجو ، جان جاي بوقتها عمي ثامر وعمي ابو محمد وخالتي الي هيه مرته .. 

طلعو للباب واني وراهم ، خالتي بوست امي وحجت عفاف يوم واحد مايضر ، ابري ذمتج جدام ربج حتى لايكولون كطعيه ، واذا على بيته باتي يمي ..

امي همست ام محمد انتي اعرف بيهم مايحبوني ..

خالتي ردت وحجت بهمس : حفيدتهم عفااف مو بكيفج ، انتي وحد وحفيتهم وحد ..

امي سكتت ، بوستني خالتي وطلعت وراهم ..

دخل محمد ابن خالتي من بعيد سلم ، وبوس جدي وبارك النه وطلع بسرعه يسوق السياره ..

ضل جدي يومين يحجي ويه امي ، وخالتي رجعت اتصلت هيه وعمتي صاابرين يلحن على ابو الحجيه مريضه مرولها ..

هذا الحجي كله ٢٠٠٢ ، شهر ال٦ ، لحد ماامي كالت لخاطر الله مو لخاطرهم ..

والا اني حلفت مادخل ذيج المنطقه لو اموت ، حاجت خالي ايدها وكللها اخذي ابويا وروحي ، احنه نحجي واني كاعده اتفرج كعدت بصفي بنت خالي برهان  ولاء حجت شبيها امج هيج قاسيه ..

- انجبي ولاء مارضه ترى ، 

- اووي عشتوو ، عمامج هذول عزوتج ، جن دوب اضلين ماقطعتهم لخاطر امج ..

جريت وجهي ماعاجبني و سكتت درت وجهي عنها على امي ، صفنت ، اتفقو انروح يوم الجمعه ..

نبات يم خالتي ونرجع من الصبح ، ويانه جدو ..

مرام ..

كاعدة واتمضحك وعيوني عليه هو لوحده  ،  كاعدات يمي بنات عمي كلنا ناصبات عليه ، وعلى شكله ،  محمد سمين ومكرش ، رغم عمره بعد مو كلش جبير ، بس مع هذا عنده كرش ..

ركزت بي وبنظراته ، الي مفهومه مضمونها بلا حجي ، حبني وهاي من سوء حظه...

ابتسمت بمكر ، حجيت وياهن ...

-باوعوا شراح اسوي بمحمد ..

ضحكن وشجعني ،

اي بالله عليج الله ضحكينه ، اي سباعيه مرام ..

عدا غصن وشدن بنات عمي ثامر ما قبلن الي هيج اسوي ، مو اني اعرف عينهن عليه خطيه ، وهو ما معبر ولا وحدة الا اني!!

كمت لحيلي وعدلت ثوبي اجرجر بي ، مدري شلون لبسته ودخل بيه ضيك ، كوه لبسته مو قياسي وغسان منعني البسه وكلت لبابا وهو وافق ...

عود اجيت اتباهه بي ، مشيت ليم جدة لبيت عمي ويم البنات نلتم هنا ..

بعد ماسمعت اليوم محمد جاي يشتغل الها غرفتها كهربائيات ،  هو شاطر بهالشغلة ،  تعلمها من عمي ابوه ..

وكفت صفح يم الباب سندت نفسي عليها ..

ووالف بشعري على اصبعي وناديته بدلع..

-حمودي ؟؟

اندار باوع الي وابتسم مكيف صاعد عالدرج يشد بالقاعدة مالت الاضوية

-هاا عيني...همس الي بحب وعود اني سويت نفسي خجلت ..

-اكولك اكو درس بالرياضيات ما مفتهمته

نزل ايده وبطل يشتغل منتظر اكمل كلامي ، وابتسامته من هالاذن لهاي الاذن ، سوه الدرج كمزة وحدة ووصل يمي ..

-اي ما عدي شي امشي افهمه الج ..

-اكولك مو هسه كمل شغل جدة ما تقبل ..

-انعلج ابو الشغل..

-لا كمل ..

-صار تدللين..

ضحكت بمياعه واتمايل بوكفتي وهو سحل روحه سحل ..

-حمودي ؟؟

سرح بخياله : -هممم

-اكولك اريدك تشتريلي هاي الميدالية الكلت الك عليها ..

-تؤمرين .

-واريد القلم المذهب الشفناه بالمكتبة ذاك اليوم

هز راسه :-من بطن عيني

-حمودي ...اذا اكولك تسوي شي تسوي اليه هسه
ضحك بقوة باوع بعيني هايم

-بالشط اذبها لروحي اذا ردتي

-بوسني؟؟

فه بوجهي متفاجى :- هاا شنو؟!!!

استغرب الطلب وضل صافن بوجهي من رفعت نفسي اله اشجعه ..
-بوسني كدامهن ،  يلا قاهراتني تقبل يكولن جذابة محمد ما يحبج  ، ومو بحالج يحب من خواله شوفهن يلا ..

يرتعش خليته واني بمكاني ولا مهتمة ،  ناطيته خدي توه يريد يدنك يسويها ، ابتعدت وضحكت
-عزاا محمد هاي شبيك عيب تخبلت ، ضربته على صدره بجف ايدي ، وعليت صوتي حتى يسمعن ..

بالصدفة دخلت عمتي صابرين شافتني يمه واتمضحك ،  تخبلت غيارة تغار مني!! ...

اجتي تركض علي
-شبيج هنا ولي عوفي الولد يشتغل ..

دفعتني من يمه ..هو عينه تنتقل بيني وبين البنات اللي كامن يضحكن برعونة …

عفته بعد ما شمرت اله بوسه بالجو من وره عمتي خليته يتلعثم كلام وفعل …

ديصعد الدرج انجبح راد يوكع والكل يضحكن واني مركزة عيوني عليه لحد ما رجعت يمهن….

غصن:تره عيب هيج تسوين بطول القند...رة بعدج ..

-اوو تغارين العانس البايرة ،  لان اني يباوعون عليه وانت محد معبرج  ، خطية كلتها برفعة حاجب واستصغار الها ..

كامت هي تركض تهف بطولها ، عابت شكولج شكد اضوج منها ..

شدن بقت تنقنق ودافع لاختها اللي زعلت…. بنت عمي مضفر ضمياء سكتتها بزجر اكبرنا جانت ضمياء ..
واني ،  وشدن ، وعلياء ، الاصغر ،  وبيناننا غصن وافياء اخت محمد هذا التسلسل ببنات العمام ..

وعدنا بعد بس هاي لمتنا احنا لان عايشين بنفس المكان بيناتنا بيبان صغار تجمعنا الحدايق الخلفية بالبيوت ….

شويه ورجعت لبيتنا ...اخواني مسطرين لا شغل ولا عمل بالبيت ، مسوين نركيلة بحديقتنا وياهم فرقد و مظهر ابن عمي مضفر  ….

دخلت اتلفت ، درت وجهي لان ، شافني غسان بالثوب المنعني عنه ،  اجاني جفت يريد يكفخني ، صاح ولج نذله مرام تعاال ليجاي شكلت اني  ،  انهزمت من جوة ايديه وطكيتها ركضه ..

-طايحة الحظ اني الج مو كلت لا تطلعين هيج ..

-بابا يقبل

-اني الج ... هد يريد يضربني واني وكفت اله عين بعين

-تضربني وتشوف شسوي

-طايحة حظ

طلعت لساني عيبت عليه ووكفت بالمدخل مالت البيت
-دروح روح ابو الرسايل عود تعال توسل بيه اودي رسايلك
تعمدت اذكر هالكلام  لان مضفر كاعد ، وما يدري اخواني الزود ، لاعبين باعدادات خواته ، لعب ولو هذا هم دثو واذا عرف!!

تركني غسان خاف مني لا انطلق ...دخلت للبيت امي كاعدة تحظر للعشا شافتني صاحت

-تعاي ولج عاونيني اكمل بساع ..

-افففف كل ما شفتيني شغلتيني وين اهج منج واخلص  ..

-والله اخلي اخوانج يطيحون حظج ، ولا افزع الج بعد ، تعاي الدايحة ، هو انت تكعدين ، شوط يم عمتج ، شوط يم بنات عمامج ، اليسمعج يكول مشرمتها من الشغل ..

تخوصرت
-والله عاد اني بكيفي ما يعجبج جيبي لولدج خدامات يخدمنهم مو اني ...لويت شفافي واني احجي وياها

اني دا اسولف انجر شعري وعطت
-اخخخخ كسر كون

غسان:ولج اطيح حظج اذا عدتيها..

-اي ميخالف والله ما اعيدها حبيبي اخويه انت الجبير ...اسمع كلامك والله ….. .خنست بابا ماكو يدافع الي وغسان نذل يلوف السالفة ...دفعني ودخل للبيت واني عدلت روحي ولا عبالك ..

رجع ابويه من الشغل انكلبت عليهم طيحت حظهم محد يكدر يفك حلكه وياي يم بابا ..

بعدها الايام عادية اودي رسايل غرام بين غسان وضمياء وغافر وعلياء ..اراقب الهم الدرب وارتب مواعيد غرامية لعبوا لعب واني شهدت كل شي ..

ادري بكل شي بينهم ، وحتى لوين واصله علاقتهم وخاصة غسان وضمياء عود الكبار هذول  .

الحق ينكال ، كنت اريد اخواني ياخذوهن لبنات عمي ، لان صديقاتي ذني ، واني وياهن ربع وصحبة ومكيفه للسالفة ، واني اللي حطيتهن براسهم ، مو بس هيج اني رتبت كل شي الهن ..

والا اخواني بالاول جانوا مو شايفيهن ، اصلا لا حلوات ولا بيهن شوفة ، بس مكارات وعدهن دروب ، وعلمني اني هم مثلهن ، بس بعدني ما لكيت من اطبق براسه هاي سوالف ، بس مرات اجربهن براس محمد المسكين ،  وكلش يفرح بباله من صدك راح احبه هذا ههههه ..

…
ثاني يوم كعدت من الصبح ، كالوا راح يجن عفاف وبنتها هاي الانسانة جدتي تكرهها كره العمى ،  ودوم تدعي عليها اخذت بنتها وربتها عند اهلها ،  وما شفناها  بعد وفاة عمي قاسم ...اعرف اسمها ايمان اي شي ثاني ما نعرف عنهن …

رحت قبل بيوم لبيت عمي مضفر يم جدة والبنات ولكيت عمتي صابرين كاعدة ، وتمدح بيها هيج حلوة ..هيج شهادتها...هيج لبسها ..

.لاول مره احس نفسي غيرانة من صدك ...ضجت وانافخ كاعدة يمهن وذيج منطلقة وجدتي تسمع وتهز براسها ، ببالها الف والف فكرة ، اعرفها من تفكر تكوم تلف باي قماش يمها ثوبها ، او جرجف او اي شي قريب …..التفتت الي وحجت

-تعالي يولي رويمة

-هاا جدة

-اركضي لبيت عمج ثامر صيحي فراس وفرقد ليجاي هنا  ..

صابرين:اي خل يسوون السنك مسدود ..

الجدة:دكافي صبيرة تجرشين بهالحجي دوختي راسي ،  عاد ببنت اخوج ، يلا كومي اخبزي الخبزات واربطي الدجاجات اذا نسيتيهن وكلاهم الجلب اهججچ ..

گامت عمتی قبلی واني غلست ، عادت السالفة ٣ مرات وتكلي كومي امشي سوي كتلج علي ماكمت ، تالي هججتني يلا كمت ، ما احب اروح لبيت عمي ثامر ، واشوف فراس وهالنوب خواته الغثيثات عووع ..

طلعت امشي وادردم ..

-ما عدها اصغر من صخيمه تروح تصيحهم ما تدزين من حبايبج ، علياء ، ضمياء ، صخماء ...الا مرام تروح

مريت من بيت عمو ابو محمد واني ادردم ...فجأة انجريت من جتفي حيل ، محمد واكف عيونه عليه تاكلني اكل، دفعته عني وهو ثكيل وجبير ..

-دوخر انت الثاني

همس سرحان :-يولي وين رايحه

-لبيت عمو ابو فراس دزتني جدة تريد الولد ..

-لا ترحين اني اروح لجدتج ، اشوف شعدها لا توصلين ..

مانطيته مجال يكمل : -ليش يمه اسمك فراس لو فرقد انت ، دروح بالك من دربي لا تمشكلني بجدة …

ردت امشي وهو ساد دربي ، متوتر ويدير براسه كل شوي  ..

-شتريد ؟؟! عيونه بيها نظرة غريبة وجاوبني ..

بفعل ..تقدم ولف ايده حوالين جسمي وثبتني لجسمه وباسني بقوة ،  من وقع الصدمة لا اراديا  دفعته وضربته بكفخه لزك على وجه ، وامسح بحلكي لعبانة نفسي ... ووويع طاح حظك . مصدك روحه ..

ايمان ...

 وره جيه خالتي ام محمد بايام  وصدك مشينه لبيت عمامي ، اني وامي و جدي ، ومشت ولاء بنت خالي برهان ويانه ..

عبالك ماخذيها تعلاكه لو ميداليه ، بس ام عيون طايره حشرت روحها ، اجرلنه خالي سياره وطلعه الهم ..

همه مو بعيدين علينه ، بس احنه بالمركز وهمه بالاطراف ، لمن وصلنه ساعه وونص ، نطينه خبر لخالتي جااين احنه ..

طلعت تضحك فرحانه بجيتنه وطايره وتبوس بجدو تكله نورت بيتي ياابه هلا بيك ااي كون من زمان منورني ليش هيج ..

دخلنه للبيت سلمت على بناتها وابنها بخجل ، محمد ابنها كال انطي خبر لعمامي فات من يمي خطف مدنج  ..

كعدنه شوي ودخلت عمتي صابرين كالت امشي هناك شنو قله بيوتنه كاعدين هناا ، امي حجت ماكو فرق خيه ..

مشينه وراها ، امي وكفت يم خالتي تحجي اشرت امشي هسه جايه وراج ..

رحت وراها امشي وافرك باديه ..  بيت عمي صايرين ثلاث ابيوت واحد لزك بالثاني وبينهم بوب فاصله ..

حالها حال البيوت العراقيه للعايشين بالارياف ..

نظامهم واحد بالبناء ، بيت بصف بيت وبينهم بوب صغار ناس تدخل على ناس منها ..

فتنه لواحد من البيوت ، شفت بنت واكفه بابهم ومخصره ، تباوع علينه رافعه تك حاجب ، بلعت ريك يااا ليش هيج تباوعلي هاي ..

درت وجهي عنها ، حجت عمتي صابرين ولج مرام صيحي امج خلي تجي يم الحجيه ..

عوجت حلكها البت ودخلت للبيت ضايجه ، مشيت وره عمتي الي ضلت دردم ، عرمه ام عين كويه ..

- حجيت هااا ..

- مو ويااج جايبه سيرتج اني ، اندارت علي انضبي انتي شبيج مايعه بمشيتج وبكلامج ، صفنت بوجها اوك ماشي ..

- فرت ايدهاا خرب اي والله .. اكوول خالج شلونه ..

- منوو ..

- برهان ابو طول المهيوب ، اكو غيره جرت نفس بحسره ،  سياده المفوض ..

فكين حلكي ياااا ، هذا خالي برهان تحجي عنه موو ، عزااا ليش هيج تحجي عنه  ..

- نترت مو وياااج شلونه شخباره هو ومرته ..

سؤالها ضوجني ، مرت خالي احبها حيل ، مارضه احد يسيئ الها ، كعدت اجذب وانفخ ، حجيت الها :- الحمدلله بخير ونعمه ذاك الشهر  اخذ الها تخم ذهب هديه عيد ميلاد زواجهم وباسها من كصتها جدامنه كلنه  ..

وكفت فجأه وصفنت حجت ، عيد زواجهم ، اندارت علي يااعيد زواج يالمطفيه ، اذكر عيد صخامهم كلش زين يصادف بشهر ال١٠ وهسه ال٦ ، جن عشرته ويه السعلوه مرته خلته يخرف لخالج ..

سطرتني هاي شبيها ويه خالي ، حجيت اي مو هو ياخذلها هدايه قبل اشهر يفاجئها ،

عوجت حلكها يلوك لام اشلوك ..

دخلنه لبيت عمي مضفر جانت بيبي عايشه يمه ،  دخلنه كبل لغرفتها جانت مدده ومغطايه بطانيه رغم ماالجو هو جو شهر ال٦ ..

فتحت الباب عمتي صابرين وحجت بصوت عالي ، يمااا اجتج بت قااسم ..

الحجيه وخرت بطنيه وصاحت منهييييي ؟؟

-بت قاااسم بت عفاااف  يماا .

هاا خوش وينها كعدت تلف بالفوطاا وتباوع بالوجوه ، اشرت علي عمتي وجرتني دفعتني من جافي هااي شوفيها شكبرها صارت عروس ..

- تعااي جاي دحبج وينج جرتني باستني ، اني مبنده ، اسوي الي يكولو وبس، امي دخلت وراه وسوت صوت كحت  ..

-حجت السلام عليكم ..

الحجيه حجت هاا عفاف وانتي هم جايه ، عليش هالكطع يالظالمه ..

كعدت امي كبالها عوجت حلكها ،  ياكطع هذا حجيه ..

- حارمتنه من بت المرحوم ليش بالله ماتخافين ربج انتي  ..

ردا امي بضوجه ، لازمتها عنكم ياعيني انتي كطعتو ، قابل طاردتكم لو ضيعتو عنواني ..

دارت وجها الحجيه عن امي ،  حجت وتدردم ، السنين ماعلمتج الادب لحد هسه ياعفاف ، جرتني تقربني تكعدني بصفها وتتلمس بجتفي ..

امي حجت لو السنين تغير ، جان غيرت كلوب ونفوس بني ادم ..

جرت شعري الحجيه تتلمسه كبرتي ولج صايره شكبرج ماعدج السان وتسالين امج ، على عمامي وين ولج لو بس لشه هالكبر ماكو عكل ومحنه  ..

ضحكت لا حجه انتو الخير والبركه ..

صفنت بوجهي ركزت بيه ، جن رس عفاف بيج والله ..

امي حجت نترخص احنه  ، وكامت تكول سويت الواجب واجيت بعد ..

نترت الحجيه دكعدي تكعدي لابارك الله بيج يالنحسه ، اكعدي ياولي ..

امي باوعتلي رايحه يم خالتج سلمي عليهم والحكيني خزرتني فاااهمه ..

هزيت راسي اي ..

عافتنه وطلعت ، حجت الحجيه شلون اكوم اجسر حلكها لهل عايقه سنين وبعدها على السانها ..

عمتي صابرين حجت دعوفيها يمعوده مكيفه و متباهيه باخوها وابوها عايشه بعزهم الله كريم دور دنيا خما اضل الهم ..

اني كاعده ما خجلن مني ولا كالن بتها كاعده ..

التفتت علي الحجيه حجت خما تفتنين يم امج انتي دجسر عظامج والله ..

فتحت عيوني ، ضحكت بخووف ، لا حجيه شنوو ..

هزت راسها عفيه عليج شاطره شوو تعاي دحبج مره الثانيه شوو حبتج حلو انتي ، جن عدج خدود ..

كمت بستها مره ثانيه وكعدت خايفه بصفها ..

اشرت لعمتي تكللها جيبي الغده وصيحي فرقد هناا جاي يمي ..

ربع ساعه وصبت الغده عمتي وخلته كبالنه ، حجت مدي ايدج واكلي لاتستحين احنه اهلج ، مديت ايدي اكل وياهم عادي ، شالت  راس الفجل هالكبر ، وخلته بماعوني وتكلي اكلي يالله تكوي ،،

شوي وانفتحت الباب رفعت راسي . .

دخل ولد مربوع ،  حجت الحجيه هلاا يما فرقد تعال جااي تعااي شوف هالفختاايه بت عمك ..

ولد حنطاوي ،  بزيان خفيف ، وعيون كبار ، باوع بوجهي ، مركز بيه ، ابتسم يااهلا نور البيت ..

حجت تعال اكل ويانه مد ايدك جده ..

وكف صافن علي ، حجه عافيات تغدو تغديت اني ..

كعد كبالنه ، يباوع بوجهي ..

اني دنجت على الاكل ، عود عليش كعدته بوجهنه مو جاي اكل والله عيب ، شلت الخاشوكه اكل بيها ، رفعت راسي بخجل شفت هذا صافن علي بابتسامه ..

درت وجهي على الحجيه رفعه نظرها مبتسمه عليه وعلى الولد .. هزت راسها تضحك هذا ابن عمج فرقد ابن عمج ثاامر ..

هالتشوفي زلمه هالعرض  وعنده شهاده ويشتغل ، ماشالله علي وابن عمج بعد  ..

ابتسمت بريبه اباوع بوجها ، معرف ارد عليها ، شنو المطلوب يعني ،  شبيهم هذول ، زين شلون اكل وهمه يباوعولي هالشكل ،  ابتعدت وحجيت الحمدلله ..

عاطت اكلي ولج ، شنو تردين الزاد .. 

فزيت ، تقدمت بسرعه على صينيه ، شلت خاشوكه اكل ، وعيني عليها اكوللها اي اي صارر ..

هو ضحك حجه جوزي منها حجيه ، 

اندارت علي هيه بابتسامه مكاره ، والله ماتطلع مناا هاي بت اذا ماتخلي بيها نيشاانك افتهمت  . .،

باوعلي حك لحيته هز راسه تم حجيه بلا ماتكولين .. 

  

#يتبع ....

لا تبخلون علينه بتفاعلكم الجميل 💜

النشر انشالله يومين بيوم استراحه .. وساعه بال١٠ باليل ،