#كحل_عرب
(فوضى )
((( بقلم زينب ماجد )))
الحلقة_42
( ضياع المحبين )
طشت اسنيــن المحبــة ومن بگاياهـن شلــم
مـرة تغفـه جروحي بيه ومـره احــنن وانلچم
لـ عريان سيد خلف
النجف_ مقبرة وادي السلام
عام ٢٠٠٢
هدية: فجر و الدنيا صيف والجو صافي وبقايا هدوة ليل بالمكبرة و الحس هامد ... سيارتنا طرت اكبور الوادم ، بس الغرابيب نعيس حسهن .. عيوني شاردة و كلبي خفك و الروح حنت لأهلها لجن ما ادري ياهو الامش عده اول ... اخيتي ونظر عيني يو اخوي الشهيد .
نطق سرحان و هو يقتل حاجز الصمت اللي ساد بالسيارة : ياهو النزور من اهلنا بالأول
حجت كواغد: الواه يو تمشيلنا اعلى جمارة كلبي موجر ييمة اعليها .
سرحان : وانا هاذ رايي منها ازور اخيي
امي جويعدة بالصدر يم سرحان وانا ورا .. اعاينن للكبور واكولن (هم يجيلنا يوم ونصبح من اهل هل الكاع )
حطت السيارة غاد عن كبور اهلنا .. وصف سرحان نزل الماي من السيارة عاونيته وشلت وياه وامي تمش جدامنا، ليما وصلنا لكبر خنجر وجمارة .
هديت الماي وطحت اعلى كبر اخيتي ابجي وامي تنوح وتنعى : ااااااخ واعتابنهم ترا يحكلي العتب لو اعتبنهم
... وين الأحباب وووووين الأحباب انا يا دار انشدج وين الأحباب ... سدوا الباب شالوا اهلنا وسدوا الباب
ااااااخ وبطلي الأعتاب بطلي الأعتاب بسج يروحي وبطلي الأعتاب ... ولج يا جميرة يا يمة
محنية ظهر و هي مدنجة اعلى الكبر تنعى ، كمت انا من الكبر خاطر اجيبن المية ، لجن درت ظهري وعاينيتلهم ، سرحان حاط راسه اعلى كبر خنجر وبس جلمة (اليا خوووية ) تنسمع منه .
كل واحد بيهم محني الظهر اعلى عزازه .. ظليت اعينلهم وابجي موش اعلى الموته .. اعلى حالهم .
شلت الماي ، كام سرحان شاله عني وغسل كبر جمارة بالاول احتراما لامي .. و رد غسل كبر خنجر ذب الماي اعلى صفحة وكعد يحاجي ( كل عمرك ادورلك اعلى مستقر تستقر بيه بلايا ما احد يضايكك وتاليتك خذت اليهواها كلبك وابنك و نمت مرتاح وياهم بكبرك ؟ )
وامي تمسح على الكبر وتحجي (انا الكلت تكبر وتشيل عني هديتيني لضيمي ييمة ونمتي بكبرج ما كلتي امي هاي متنها هدل من الضيم عليش يجميرة يمه عليش )
ظلينا اعلى كبورهم انوح ونعتب ليما طلعت الشمس واحتر الجو مشينا لكبور اهل سرحان و بعدها رحنا لستار .. ليما كفينا وطلعنا لأهلنا بس أمي حيل تعبت مت عيني ، ردت الدرب كله حاطة ارويسها وتون .. اذوها اخوتي وصوابهم بكلبها ما برى ...
جذب الكال العزيز ينسي .. كلما يمر الوكت الكلب يزيد بشوكه ليهم ، ويحتام اعلى شوفتهم.
بغداد_الأورفلي
الساعة ٩ الصبح
وسن: شلت راسي من الفراش ، نور بتي تحوس بالغرفة تريد تنزل ، عاينت وراي مروان نايم غاط بنومته .. كمت بساع خذتها لا يفز من نومته خطية .
نزلت ، طلع بوجهي علي : امي وابوي يمتى يجون ؟
- تلاكيهم اعلى جية ، معتاز شي
- لا ، راح اطلع لبيت جدي اشوفن عباس
- جا تريك
- ما اريدن
نزل كدامي وانا وراه ، الباب يندك حطيت نويرة بالكاع و مشيت ورا علي ، فك الباب حسبالي عمي و عمتي اجو من النجف بس طلعت نوسة ، حبت علي وكالتله : ها خوية اصباح الخير ، وين
-صباح النور، رايح لعباس
- نايم تلاكيه
- اكعده
- عليوي بيك شي
- لا بس اذا امي مو بالبيت اضوجن
حجاها وطلع اندارت على وسن : هلا خية اصباح الخير
- صباح النور الله جابج كضي بتي خل اطبن للحمام
- توج ياله كعدتن يالمسعدات ، مت عين كلبي من ٦ فكيت عيوني خلصت شغلي و حتى غدا لابوي طبخت واجيت فتحت المخزن مال حبوبتي مشيتلي جم واحد واجيت عليجن كلت خاف تحتاجن شي وامي ماهي .. اثاريجن متوثات نوم .
- هههههه اي شنسوي وين نروح راح انظف ونكعد .
- ددطيني البت خل اروح اجيبلجن ريوك ، ذيج وينها بطيطة ؟
- بعدها نايم
- خايبات وعلي مسعدات وبيتجن على الشط
خذت بتي حطتها على خصرها ومشت واني صعدت جبتلي هدوم ودخلت للمطبخ حطيت قوري الجاي على نار هادية وطبيت اسبح ، طلعت مأمون كاعد ومكعد ابنه يمه و هو يشغل التلفزيون، اندار علي : جا نويرة ما كاعدة
- لا كعدت بس خذتها نوسة
جاي نحجي طبت نوسة : حطت البيض وماعون الجبن والصمون كهربائي .. ضحكلها مأمون و هو يكلها : لا هله ولا مرحبا جا من الصبح لفيتينا ؟
- دطلع فلوس الريوك لا ابنك هاذ المصيول اكطمنه
- وانا الحسبالي صايرة معدلة و ذاكرتنا بريوك
- اي مو صرة ابيك عدي واجيبلك اريوك على حسابي
خليتهم يتداهرون ويضحكون وانا صعدت فوك مشطت على السريع كحلت عيوني وحمرة سحرية وعطر ونزلت اغسل البتي ، لكيت نوسة بالمطبخ مخلصة الريوك : يا هدي من ايدج خية هسه انا اسوي
- وشعلي خية طاح نصي هنه اريوكات لفت ايد فضت راحت .. غسلي البت وتعاي تريكي .
خذت الصينية حطتها بالهول و راحت ادك الباب على بطة : يلا عيني يالمسعدة اكعدي
مأمون : بالله عنج مرتي ما اسمح لاحد يزعجها من نومتها
- خب دكوم انت ومرتك، كووووووومي يا البطة
ضل يضحك كعد كدام صينية الريوك وجر ابنه بحظنه يشمشم بيه ، فتحت الباب بطة : هلا نوسة ، بيش الساعة
- راح تصير بالعشرة .. كعدي يله تريكي
- اكبر كاعد لعد ليش ما كعدتني مأمون
- اني كاعدله بوية ، روحي غسلي وتعاي ريكيه
وسن كعدنا كلنا على الريوك نسولف ونضحك ، لحد ما كامت نوسة كالت : اني اروحن لمحل حبوبتي خاف احد يجي .
لمينا الريوك وكمنا للتنظيف وكمنا نسولف ونتلهى بالشغل ...اندكت الباب طلع مأمون فك الباب طلع شيخ ال منعم : السلام عليكم
مأمون : اهلا وعليكم السلام ورحمة الله وبركاته ، اهلا وسهلا زارتنا البركة
- شلونكم شلون الأحوال
- الحمد لله ، كل الهلا تفضل تفضل
- هلا بيك بوية ، جا الشيخ سرحان ما هو ؟
- تفضل، لا والله ما موجود من امس هو و الوالدة راحوا زيارة للنجف يزورون الأمير ويغبشون للكبور .
نزع قندرته اباب الدوانية ودخل وهو يكول : ها خير ان شالله يرد بالسلامة
- الله يسلمك ..
دخله و راح للبيت حجه : صوتجن خطار ، ترا الشيخ ال منعم اجا ، اطوني الماي و حضروا الجاي بساع وزيدوا الهيل .
ركضت بطة اطته سراحية ماي باردة وكلاص كزاز ، ووسن حطت الجاي ، خذه الماي ودخل : الله بالخير
وصب الماي
الشيخ : الله بالخير و الرحمة
شرب الماي وكعد ينشد مامون : انا جاي اعلى ابوك بسالفة تعبتني كالولي ابغداد بس ما لكيته
- اي والله طلع ، خير شني السالفة تخص تمار ؟
- اعلى عينك نور ، تعباني هالولد
- وهو هم تعب الله يعينه .. جم مرة خطب بس عمي فلاح ما راضي يطي بته
- ولا احنه النرضى ياخذها بويه وانا كايله يو خذتها اتبرى منك وعلي .. شنهي اگليل الاجانا من ال ثجيل ونرضى ابتهم ؟
- والله يا عمي ان جان اعلى ال ثجيل محد طفح كلبه غيض منهم بكثر ابوي مامش مجان بكلبه ما لجموه وحطوا رماحهم بيه ، بس الكلب يا عمي وما يهوى وال ثجيل بخويطهم ما وكفوا بعين ابوي وخذاها من عيونهم؛ وهل الله موفقهم وعلى حب الله عايشين .
- ان جان ابوك رضاها انا ما ارضاها ، البت مطلكة ورجله دايسة الشارع يا طالعة يا طابة ، شعايزه ابنه وياخذ المثلها .
- لا عمي كدرك على راسي بس اعذرني ما ارضاها البت ربيبت ابوي و بحسبة اختي والحجي بسمعتها ما ارضاه ، البت من ضيم عمامها وابوها طلعت تكد .. بس مو معناتها مو خوش ولا كل بت تطلع مو زينة ولا كل محبوسة شريفة ..
تلاكي احديثة محبوسة بقفص ولبطن القفص ادخل الزلمة وتخون اهلها ، وتلاكي وحدة ادك دروب من العوز بس فنه اليكض اطراف عباتها.
- انت رابي وياها هل ما تطي بيها
- احجيلك عن معرفة عمي مو وحدة شايفها بالشارع واظن بيها خير .
بطة : مأمون الجاي
- اي بوية
كام جابلة الجاي شرب استكانة وكام : يالة اودعناكم
- ماكو غداك على الطباخ شيخنا
- دايمة وعامر البيت ان شاءالله بهله بس انشدنك ، تعرف وين بيت فليح ؟
- اي عبور الشارع
- رايد اروحله والله
- اصعد احطنك بالباب
- لالة بس دليني
وكف علي و عباس يم مأمون طك على جتف علي وكاله : عليوي امشي دلي الشيخ بيت فليح
علي : خاف ابوي ما يرضى
- امشيييي مالك غرض
عباس : تعال اندلي اثنينه
صعدوا ويا الشيخ ودلوه البيت بس فليح ما جان بالبيت ، فالشيخ حط اباله بالليل يمرله .
وسن : ليغاد كبل الظهر انفكت الباب ودخلت سيارة عمي ، طلع اله مأمون و انا وكفت على باب الهول ، نزل عمي وحدة ، وهو ينزع عكاله و خاجيته سلم على مأمون و اجا : ها بوية كواج الله
- هلا عمي زيارة مقبولة ، جا عمتي وين
- نزلت ويا الحجية امها تعبت غاد اعلى كبور اهلها .
- خطية الله يعين كلبها، متريك عمي ؟
- شبعان بعد عمج بس اتلاحكيلي وطلعيلي دشداشة وخاولي غادي نار من الحر
-من عيوني
ركضت لغرفة عمتي بسرعة وطلعت بطة من المطبخ تنشف بديه وتسلم عليه ، وانا خذت الدشداشة و الخاولي حطيتهن بالحمام و شغلت البوري وصحت على عمي ، طبت عمتي هدوة تلكتها بطة
بطة :- ها الله يساعدج
- هلا بيج دية .. رجلية اموتاتني يماااي
كعدت بالهول ومددت رجليها وفكت حجابها ، ومامون بغرفته دنكت بطة وهي تفرج برجلين هدوة
- ااااااي والله يا يمه
- الحجية امي شلونها
- شلونها نومتها بالبيت ورديت حيل تعبت
- الله يعينها
-- غداجن جاهز يمة ؟
- كملت المركة بعد بس التمن كلت شوية واركبه .
- لا كومي عمج بس تصير الصلاة يريد غداه خاطر ينام ، ياله احبيبة .
كامت بطة طلع مأمون دنك اعلى جتاف هدوة ضكاهن بديه : ها يمه شلونج
-ااااخ يا يمة شلوني انهد حيلي بالعباس ، جا اخيك اعليوي وين
- يم عباس راحوا يدلون الشيخ ال منعم على بيت فليح
- يا ستار سلامات ، شنهي
- ماكو شي بس اجا ينشد
- حاجاك عن سالفة نويسة ؟
- ما راضي بيها
- جا هو يمتى رضى الله لا يطي اثنين مترايدين واكف حجرة بدربهم شنهي .
طلع سرحان من الحمام الخاولي على راسه و هو يحجي : دشي خضي روحج خاطر تستراحين تراب النجف ما تنحمل
- رجلية اموتاتني ما بيه ، شوي واكومن
كعد يمها و هي اندارت تكمل حجي ويا مأمون وسرحان يصيح على اكبر ( تعال جدي خل احبنك ) شمر روحه الطفل بحضن جده و هو يردفه (يبعد جدك وكلبه ) وكفت نور بت مروان ، اخذها يحبحب بيها انتبه لمأمون يكللها يمكن يرجع العصر يزور ابوي ، كعد احفاده على رجليه واندار لمأمون : ياهو هاذ
سولفله مأمون ، سرحان كاله : صك السالفة ، انا الشغلة البيها فليح ما ادشن بيها ، اغم وكلبي ما يحمله يفيض غيضي واطكنه و اتكاوم ويا ثجيل .. مالنا غرض .
هدوة : بس ليمتها تظل البت هاذ حالها
سرحان : الله كريم تعبان هسه .
نزل مروان على الدرج و هو يكول : يا هلا ومرحبا بالشيخ سرحان
دار سرحان وجهه عنه ، حجه مروان : كضيت عمرك بوية داير وجهك عني
حب راسه ورد حجه (احبنك يالضايج )
سرحان : كعدة هاي بوية راح يوذن الظهر وانت توك تفج عينك
- شسوي اكعد بوية باجر عدي تدريب اسبوع ما تشوفيني
- خير ؟
- عدنا لعبة بالبصرة وطالع .
تنهد وهو يكله : الله يوفقك جا شكول .
اندار مروان وهو يصيح : وووووسن
اجته : ها عيوني
- سالمات عيونج .. عازم صديقي سعد هو ومرته على عشا .. اكتبي شتحتاجن حتى مأمون يجيبه .
مأمون : تعزم براسي انت شني ؟
مروان : وراسك فوك جدمك
- خاب دنجب وعلي ما اتحرك اصلا راح انام والعصر طالع عدي شغل
سرحان : شمالكم بوية كولوا ياله انا اجيب
مروان : اتشاقى بوية بس هاذ غثة ما يتحمل احب اغثنه
- لإنك خايس
- اذا ما اطلع على اخوي الجبير جا عليمن اطلع ؟
ضحكت وسن ومروان عاين لبته كاعدة بحظن جدها صاح : تعاي لج بربوك جا اني ابوج لو حجارة هنا غير تتلكيني .
سرحان : شايفة منك شي وتتلكاك كاضيها دياحة ونوم .
راحت تحبه .. وكعدوا يسولفون
صار الغدا .. تغدوا وكلمن دخل لغرفته .
بطة : مأمون خلي اكبر يمك بس اسبح
- جيبي
مدداه بحضنه وهو يبوس بيه ويلاعبه ، لحد ما غفى بحضنه و هو غفى وياه ورا ساعة دخلت بطة ، فز على فتحت الباب : هاي هستوج يلا خلصتي
- مو دخلت لكيتكم نايمين فسبحت ساعة على راحتي اطربش بالمي .
- شيلي الولد لفراشة وتعالي يمي
- بس امشط
- اتركي وشيلي الولد
دنكت تشيل الطفل ، هو تحارش بشعرها ... ضحكت ، حطته بفراشه وهو عدل كعدته الها ، اجت بصفه : تحبني ؟
- ميت بيج
ودنك يشم بركبتها ... ردفته :
- والهام ؟
ابتعد وهو عاكد حاجبه : الطام شبيها ؟
- امممم سوالفك علينا ممخلي ابالك تاخذها
- ليش ما تنجبين حبيبتي ؟
- عليك الله تحبني
- انت مسودنة بوية ؟
- اني احبك حيل وما اتحمل وحدة واخاف لا فد يوم تشيخ وتكول اني ابن شيخ والشرع مدري شحلل
- الشرع حلل ٤ وانت اربعتهن
- قصدك اني سمينة ؟
- بعلي مسودنة
وكام يملخ بشعرها وهي ، تضحك سحبها لصدره وهو يكللها : وعلي و السماه علي هسه لو اجمل نثاية الدنية توكف كبالي كلبي ما يحب ولا يهوى غيرج .
- الله لا يحرمني ولا من شوفتك .
تقرب منها وهو يبوسها ....
مروان متمدد يباوع بالجرايد ويقرأ الاخبار الرياضية ، ووسن كاعدة يمه تمشط بشعر نور بتها ، حجت : مروان ما طولك كاعد اليوم والاسبوع الجاي رايح للبصرة ، اخذنا للامام الكاظم .
- مو عازم صديقي شبيج
- ما نطول ساعة ونرد وهذا الإمام وسيارتك موجودة
- خليها هسه عود من ارجع من البصرة اخذكم
- الحجي هذا سمعته كبل سنتين وصالي سنتين ما واصلة الإمام الله يطي عمتي هدوة من تروح لكربلة تاخذني وياها الا انت وين ماخذني ، دشوف مأمون كل جمعة ياخذ بطة وابنه ويزورهم ويتغدون هناك ويردون .
- اهووووو شبيج مو جاي اكلج الاسبوع الجاي اليوم عزيمة ، لا تلحين .
دنكت منقهرة وهي تعدل كصيبة بتها : صالي يومين من صبغت شعري وظنيتك تنتبه .
مدنك يقرأ الجريدة ومركز بيها ما رد ، كامت من عندة ، ونزلت جوا شغلت التلفزيون وكعدت لحد ما كعدت هدوة :
- ها يمة شو جويعدة لوحيدتج
- وين اروحن عمة
- جا مريوان وينه
- فوك يقرا بهالجرايد و المجلات ويدور اخبار الطوبة .
- ميخالف عمة مروان يحبج بس هو مسودن بهالطوبة
- طلبت من عده يزورنا الإمام كبل لا يروح للبصرة بس هم ما رضى
- ولا يرضى ييمه شنهي تريدين الإمام من عين باجر نسويلنا جدير مالت برياني وناخذنا جرجف ونروح غادي من الصبح للعصر لين ما تشبعين ، جا غريبة يمة انت عليش ما اطلبين مني .
- ريتج سالمة يعمة بس ليا وكت انت تاخذيني وهو ما داري عنه .
- خلي سالم ييمه وخففي حمولج والسوالف الما تنفع لا تكدرين روحج بيها .
طلع سرحان وهو يكللها : جا شبساع نمتي وشبساع كمتي ؟
- نمت بالسيارة هواي
عاين عليهن : اوديلجن شي، مشتهيات شي ؟
هدوة : موش جبنا كعك ابو الدهن ، كومي بتي سويلنا اجوية نغمس بيها .
كامت وسرحان كعد بصف هدوة يسولفون هو وياها ، حطت وسن صينية الجاي و الكعك .. طلعت بطة من الغرفة وبيدها ملابس مأمون خذتهن للحمام ومأمون طلع كعد ، حجت وسن : اصبلك خوية
- اي والله بعد اخوج
طبت نانة من الشارع كعدت بصف هدوة ، حبتها هدوة وطلعتلها كعك خلته كبالها ودنت استكانها الها وصبتلها ، ونانة تكله : شجبتيلي من الامام
- والله يحبيبة ما جبت شي طلعتنا من الامام جانت فجر للكبور .
نزل مروان وهو يكلل لوسن : حضرتيلي ورقة التحتاجنة
- لا مو عمري راح يتسوك
مروان : دكومي اني وصيت لو ما وصيت كوووومي
سرحان : هاااه مروان شمالك بوية
- مو كدامك بوية وصيت
- مو هيج
كام مامون دخل للحمام .. وهو يصيح على بطة : بطوط الحذاء صبغيها زين على ما اطلع .
على صوت مأمون وصياح مروان كعد اكبر يبجي صاحت بطة بنانة : امشي شيلي أكبر بساااع ، خل اروح اسوي حذاء مأمون .
ركضت نانة وهي فرحانة وتبوس باكبر وطلعته للشارع كعدته ، و مروان منتظر مأمون يطلع حتى يطب يسبح ويطلع، صعد فوك على ما يطلع مأمون ، ويا ما طلع ، بطة كالتله : حذائك وكلشي حضرتلكياه بالغرفة تريد شي
- لا عمري ارتاحي
طبت للحمام ، نزل مروان : شني يا مأمون دياااااله نممممت لخاطر الله .
مأمون : هيوووو شمالك
مروان : جا ياهو الدخل ؟
مأمون : ابعد من الحمام شوية .
اندار على وسن وهو يصرخ : ما تكولين هالقرة عده طلعة ماااا تكومين تحضريلي الحمام ... الا احجي يعني .
فزت البنية من صوت ابوها وركضت لحضن جدها ، سرحان سكت بس حواجبه اطابكن ضوجه من صياح مروان .
كامت وسن بساع صعدت ليفوك ، اندار سرحان : المرة انعادت مرت الاخرى يا مروان..... قاطعه مروان بعصبية
- بوية عنك ترا اني ومرتي لا طاكها ولا كاتلها بس هي ثولة
- حسك ما تعلي بوجهي وتقاطعني طااااايح الحظ مرتك عدك غرفة تصعد تصيحلها وبيناتكم تطابخون بالغرفة موش جدامنا .
طلع مأمون : كولوا يا الله يمعودين
مروان هد الهول وصعد وبس صياحه ينسمع من فوك ، كام يكسر ويعربد فوك راس مرته ، سرحان كاعد على اعصابه ، ومأمون رايد يطلع وواكف خايف ابوه يصعد يتعارك وياه مأمون ، وهدوة طلعت الطفلة وصاحت على نانة ادير بالها على بت مروان وتكعدها يم اكبر .
طلعت بطة من الحمام : شكو شصاير
خزرها مأمون : طبي للغرفة مالج غرض
سرحان : دخل اصعدله الا اربي لهالحيوان
- بوية دخيل الله هدة وامشينا خل نكعد بالدوانية
- ما تسمع صياحة
- هو ومرته بويه ياهو مالتنا
- شني فصلية عده ابن الكلب انعل والديه
- محشوم بويه جا تسب روحك على مود عالاغم .. دكعد اكعد .
نزل مروان عصبي طب للحمام وضرب الباب وراه بقوة وقفله ، نزلت وسن بكل هدوء العيون حمر ، حطت الهدوم قريب من الباب ووكفت ، حاجاها سرحان : هدي هل يولي يخدم روحه هالجلب .. الا اعلمنه
- ميخالف عمي هو عصبي ، جا اذا انا ما اتحمله ياهي التتحملة .. حجت بس غصت بالحجي ودارت وجهي تحس بعيونها .
كام سرحان من مكانه : انا لو ظليت هنا لاون ارتكب جريمة واحط جيلة براس هالردي .
طلع يوكف بالشارع و هدوة مشت تهدي بوسن و تقوي بيها ومأمون فات لبطة : لتجرحين وسن ولا تسألينها على شي ، وخليج يمها وشتحتاج كليلي .
- هو شبي ؟
- طايح حظه
طلع فلوس من جيبه و خلاه على الميز : اذا اشتهيتي شي دزي علاوي يجيبلج .
- ترجعلي بالسلامة حبيبي .
طلع كن البيت يوصي ابوه ما يتعارك ويا مروان وخله يولي وكام يهدي بوالده ، طلع مروان من الحمام بدل وعطر على سابع حباية ونزل سابح بالعطر ، كعد على الكرويته و باوع لوسن : كتبتي شتحتاجون
هدوة : بسك يمه الثلاجة خير من الله عازم صويحبك لا تخاف نبيض وجهك بس فضنا ترا هرجتنا يمه .
- يعني ما تحتاجون شي ؟
- يو احتاجينا ابوك موجود بس فكنا
- بكيفكم
دخلت نانة شايلة اكبر و نور بصفها ، فتح اديه لبته اجته تركض ، حبها واطاها فلوس : هاج روح اشتري انت و علي الأكبر يلا بابا .
ركضت نور وأكبر نزل يركض وراها
وكفتله نانة متخصرة : هلووو واني شنو هنا عيني
ضحك وضيع ضحكته : شو قربي ، تقربت من عنده وهي متخصرة وتهز بحصرها : يلا عيني طلع .
ضربها راشدي صاحت : اخخخخ اريد فلوس مو راشدي
- انجبي لج .. تعاي بوسيني
تقربت جراها اله : تتخصريلي مو طايحة الحظ
- ايييي هدوة
- بوسيني
- والله ما ابوسك الا تطيني فلوس
هدوة : ولج كبرتي وخري عيب ، شكبرج تصيرين
مروان : كلها تكبر الا هاي جنها كعم بانية ، بوسسسسي
- عيب ميصير ماما متقبل
- ولج بربوك علييييه
وكام يجعص بيها ويضحك وهي تصيح ، الى ان طلع ١٠٠ دينار من جيبه واطاها الها وكام .
اجا الشيخ ال منعم على سرحان وكعد يحجي وياه ، سرحان ما رضى يدخل بسالفة بيها فليح ، بس مدح بالبت وكاله ( دامهم مترايدين لا تظلم بختهم ) بس الشيخ ما عجبه الحجي، راد يروح بس سرحان حلف ما يطلع الا يتعشا ، وظل على العشا
مأمون : ها تمار السلام عليكم
- هلا بيك ابو الأكبر وعليكم السلام ورحمة الله ، تفضل
- والله اجيت عليك اشوفنك
- يا هلا وكل الهلا
- الوالد اليوم مر علينا
- من امس عدي وما احجيلك موع اذني على كثر ما حجه
- بسالفة زواجك
- اكو غيرها ؟
- والحل شنهو ؟
- وانا دايخ وعلي البت احبنها لا اكدر اعلى فراكها واهدنها تشوف حالها ولا ابوها يطيها واخذنها وهي ما ترضى نتزوج بلا رضا ابوها
- وانت شلون ترضاها ؟
- مامون جزعت صالي سبع سنين احبنها ترا، وما يطونها، شسوي ؟
- حكك بس مو مال تعرس بلايا علم ابوها غير ال ثجيل يسوولك شدة يا ورد وجيب اليفكك منهم ، حتى ابوك يتبرى منهم ... ولا تظن تخلص منهم لو غلطت وياهم و خلي بعمي خنجر عبرة الك .
- والله طكت روحي بعلي مليت .
- الله كريم ، بس هو ما كالك شيريد من ابوها
- ابوها شني ؟
- طلب مني ادلي على بيت فليح ، اني لو كايلي بيت البت جا عديتها بس من كالي وين بيت فليح حسيت ييه يريد ابوها بسالفة
- شتظن ؟
- ما اعرف والله
- هيج هيج ابوها ما يطيها .
- الله كريم امشيلنا خل نفترلنا شوية وربك يحلها
- والنعم بالله، يلا.
سرحان : الشيخ ال منعم عشاه هنا ، حضروا بوية كون عكب اوذان المغرب العشا جاهز
هدوة : احنا بكل الاحوال جاي نطبخ عشا عزومة مروان بس دزلنا على سمجتين خلنا نشويهن ، زيادة الخير خيرنا .
- اي ، هسه ، وين عليوي .
طلع نده لعليوي ماكو ، صاح على نانة: اخوج وعليوي وينهم ؟
- مشوا للساحة عمو ديلعبون طوبة
- هاذ اعلى درب اخية المسكط ... امشي شوفيلي مؤيد موجود خل يجيني بساع .
صف مروان بسيارته : ها بوية
- الله جابك امش جيبلنا سمجتين الشيخ كاعد خل اطبن
- جا مو كتلهن شتحتاجن ما حجن شنو بحلكهن عظم .. وين يلحك السمج بعد
- امش بلا دوخة راس يااااله .
حجاها وطب للبيت ، مروان كام ينفخ و عاكد حاجبه، باوع لنانة كاعدة ، حجه : اصعدي وياي خل نروح نجيب سمج .
- خل اكلل لماما
-عوفي هسه نجي
اخذها وراح جاب سمجتين و ذبهن على ابو الفرن كالة اشويهن بساع بالعجل ، ووكف ينتظر لحد ما صارن ، اخذهن ورد للبيت .
مؤيد واكف بالباب وايمان ، يدورون على نانة نزلت من السيارة .. صرخ مؤيد بيها : انت وين رايحة ولج
مروان : اني خذتها شبيييك
- صار الغروب وهي ماكو بس اطلعين بعد والله اكسر رجليج فووووتي يلا .
ركضت تبجي ليجوا وايمان تبعتها : اشون تمشين بلا متكليلي ميصير ماما تخبلتي
ركضت لحضن ابوها حاكم وظلت تبجي يمه جراها لحضنه و هو يصيح : ياهو وياها ؟
- مؤيد صاح بيها وحيل وابو زايد طالعة بسيارة مروان بلا علم احد
مؤيد ؛ بس اطلعين بعد والله اطيح حظج ادب سزززز
حاكم : على كيفك وياهاااااا ، تعاي بوية تعاي ، ليش اطلعين بوية ما يصير
يحجي و يحبحب بيها ، وهي تكله : بابا والله كتله وكال هسه نرجع ما ادري يتأخر
مؤيد : لج بتي كبرتي ما عدتي جاهلة ميصير اطلعين بعد
- غير رحت لبطة هي دوم تكلي تعاليلي على مود اشيللها اكبر يشلع كلبها .
حاكم: سودة علية يا بوية رايحة تعاونين اخيتج
مشت ايمان للمطبخ و هي تكله ما مخلف بس نانة ، محد ميبس راسها غيرك .. هاي الاء الباب متوصلة و نانة جيب اليكمشها .
لالة : تضكره بالمرحومة ، عمي حنين رغم ما يمش لكبر جمارة ولا يذكرها على السانة بس ما ناسي صوابها ، ونانة ملسونة تذكرة بجمارة من جانت كبل هيج .
- وانا هذا الخايفة منه يلالة .. جرح جمارة بكلب حاكم ما طاب .. يقسي مرة ويحن مرة وتعب بناتي وياه ، بس هاي ام السان ما يحاجيها .
- بعدها زغيرة
- مو الاء وياها لا يكربها ولا يسألها شلونج شنو الفرق ثنينهن بناته
-الاء جبيرة
- بيناتهن ١٠ اشهر يمعودة
- الاء ضخمة نانة ناعمة اليكول بيناتهن ٥سنين مو ١٠ اشهر .
- الله يحفظهن من التايهات بس وكلشي ما اريد ، كل وحدة همها على كلبي شكبره .
- عشى عمتي حاضر خل اكعدنها للصلاة مسيجينة
- اي كعديها على ما تصلي احط العشا .
طب مروان للبيت ، صديقه بعده ما جاي ، دخل صواني السمج وكاللهن : هاااجن انتن جرن صفح واني ابتلي
هدوة : ما صار شي يمة .
-وسن ما اجا سعد
وسن دايرة وجها و تحضر بالحشو، ما ردت جاوبت هدوة : لا والله بعدهم ما اجو
حجه مروان : مو احاجيج
حجت بلا ما ادير وجهه : جاوبتك عمتي
- تستنكفين تردين
هدوة : سني يمه انت ادورلك عركه امش اكعد يم ابوك كاعد ويا الشيخ وحدة دمش .
هز راسه وهو يباوعلها مخنزر ، و بطة تشتغل و اكبر يبجي مدلل الا تشيله ، شالته هدوة ما رضى بيها ، حجت بطة : ما يرضى لو بيه لو بنانة هي وين راحت هاي ام عصاجيل مو كتلها ظلي يمي .
- ودي عليها احد
طبت نوسة : هلا يمة شلونج
وكربت حبت راس امها وهدوة تجاوبها : هلا يبعد كلبي يايمة شلونج ، شلونج زينة
- الحمد لله
حجت ونزعت عباتها و كالت البطة : اخذي افريخج هاذ الينغوص وانكلعي شو بالله .. دوختي امي ترا تعبانة .
ظلت تضحك وهي تكللها : دشيلي واني اطبخ
- دروحي سكتي ابنج احبيبة
ووكفت تعاون وسن بالطبخ وهدوة تعاونهن وهي كاعدة رجليه يوجعنها ما بيها اعلى الكومة .
اندكت الباب اجا سعد و مرته لمياء .. طلع مروان والشيخ سرحان يتلكون الزلمة ، و طبت مرته جوه اتلكنها البنات ، رادت تاخذها هدوة داخل بس البنية أجتماعية بساع نبتهن : شني قابل تعاملني معاملة الغرب خلني وياجن بالمطبخ ، شعدي كاعدة هناك
ووكفن يطبخن ويحضرن بالعشا كبل لا يوذن .. بطة بغرفتها ابنها علعلها ، يصرخ اريد بابا ، ونوسة اخذت انجانة مالت العجين وهدوة راحت وياها تنشنك الها وهي تخبز ، وظلت لمياه و وسن بالمطبخ يسولفن ويحجن .
لمياء فتحت كلبها وظلت تحجيلها على رجلها سعد ، هم يشرب و يدور بنات و شالع كلبها ، وظلت وحدة تشكي للخ ، واتوالمن .
اجا مروان ساعة الهيس المرة بالمطبخ صاح : هااااه
عدلت المرة حجابها ووسن صاحت : تعال ابو نور
مروان : عشاكم جهز .. الاذان اذن بس يكملون صلاة نمد السفرة
وسن : ما عدي شي ، كلشي خلص جاي نثرم بالزلاطة بس يكملن عمتي ووسن .
- تعاي احاجيج
مشت يم الدرج كال الها: زعلانة مني
- لا عليمن
- ادري صيحت هواي عديها الي .
- هزت راسها ، مد وباسها براسها وكاللها : لا تزعلين واتحمليني .
- الله يحفظك ان شاءالله .
- ويحفظج ، يلا روحي ودزيلي نور خاف تعذبج
- لا ممعذبتني بالعكس حاطة روحها الا تشتغل .
- خوش لعد امش خل اروح اشوفن ابوي خاف معتاز شي .
اندار شاف ابوه يباوعله من ابعيد من صد بوجهه ابتسمله سرحان ، فات مأمون للبيت وكت الصلاة: ها الله يساعدهم .
طلعت هدوة شافت مأمون صاحت : يمة لبطيطة انشلع كلبها بابنك لا هو شايلته ساكت ولا هي حاطته مرتاحة .. بس يلوع .
دخل عليها : ها عمري
بس حجه فز اكبر : باباااااااااااا
- صالي ساعة انوم والله تعبني ومدا يرضى يسكت
شاله عنها حباه سكت : مو هاذ ساكت شبيج وياه
- اني الشبية وياه ؟ والله عمي صوجي دخذ ابنك ووخر مني
ضحك وهو يحبحب بعلي الاكبر .. وخذاه للدوانية وكفة يم جده ويعلمه شلون يصلي ويحطلة التربة
لمياء : ميخالف تحمليه هي المرة شعدها غير الزلمة ، ترا الاهل ما ينفعون عكبة
وسن : يا اهل فدوة العينج هو انا الله كاتبلي اهل عشت عمري مكفخة بيد هاذ وذاك ، تهون اذا على مروان يصيح ساعة ويرد يعتذر .
- اعتذر هو
- اي من صاحلي كبل شوي صالحاني
- يا يمة الله يحفظكم ان شاءالله جا بعد شتريدين ولج وين لاكيتها وعلي خشومهم يابسة ما يطخونها مو زين وحاجاج ليني وياه
- الله كريم جا شعدي
- تهون وتكضي والله وتصير سوالف
- الله كريم ، انت لا تكطعين كل فترة وتعاي ليجاي
- يا علواه هذا وياه بيتنا كلش قريب عليكم اجينا مشي
- صدك؟
- اي والله
- جا تعاليلنه عصريات احنه هنا يومية هجي نسويلنة لمة اعلى صينية جاي وكعك ونتعلل ، تعاي عدنا
- والله اجي ما اكولن لا
هدوة : كضيتن يمه
وسن : صبيت كامل بس يمدون السفرة عمة
بطة : واني شأسوي ؟
هدوة : شلع كلبج هالاكبر مو ، مت عيني
- كوا*** يريد ابوه واني صارلي ساعة شايلته و مهدود حيلي تالي بس كضه مأمون سكت
- هم ذوله الفروخ ، عليوي جان هجي سرحان يمش ايام وانا كلشي ويو رد سرحان اصبحت صفر على الشمال بس من كبر وفهم لا الولد يود امه ويميللها ويلوب لو ما لكاها بالبيت .
وسن : يا عمة لو تشوفينه عمت عيني من الصبح كاعد يكول انا اضوجن اذا امي مو بالبيت
- مت عيني كون
صاح مروان : يلا عشاكم يابه .
كامت تطيه وسن صواني ينكل بيها الأكل، طب علي من برا مترب سابح بتراب الساحة مالت الطوبة ، شافه سرحان صاح : بوية عليوي امش بعد ابوك غسل زحمة لا يشوفك الشيخ ، امش
باوعله مروان واتخوصرله : بووووويه عليوي ، الله يرحم من جنت تشوفني جاي مترب من الساحة تلبوج عكالك على متني .
- هي ردي تقارن روحك بهالزغير
- جا ليش ما اقارن روحي ، ذاك البعير و هاذ الزغير انا شنهي
ضربه مأمون من وره : حمييييير اي بمعنى مطي يا زمال ياهو البعير شو انت ما تحترمني
- والله تريد الصدك ما احترمك
- بالنعال والله
ضحك مروان وفات جوا و هو يصيح : عليوي بوية لا تغسل حيل اخافن عليك لا يزلغك المااااي بهداي بوية بهداي
ظل يضحك سرحان من بعيد : ولكم والله كاولي هالزلمة هاذ
الشيخ : الله يحفظهم الك ان شاءالله
- ويحفظ وليداتك .
صبوا سفرة للزلم وسفرة للنسوان و الكل كعد يتعشى ، بس وسن وكفت ع الجاي جيف تعرف ، بس يشيلون ايدهم من الزاد يصيحون جاي .
ظلت تحضر لحد ما كملوا ، اطوها السفرة اطتهم صينية الجاي ومشت كعدت تاكل على راحتها يم النسوان ويسولفن .
الشيخ شرب جاية و تعذر لازم يطلع ، ودعه سرحان على الباب ، ودش كال للولد : اهذوا راحتكم بوية انا داش داخل اتمدد جاي من زيارة وراسي دايخ
سعد : احذ راحتك عمي
- كل الهلا بوية
فات سرحان للغرفة ، كامت هدوة من العشا : يمة انتن هنا يم البت انا خل اطبن يم الحجي
راحت طبت يمه ، حجت لمياء : فدوة بس شافت الرجال فات لغرفتها مشتله
وسن : اييييي اشايفة من عشك عمي و عمتي ، يشيب الراس عشكهم
- ماخذها على حب
نوسة : يا حب .. غير عشك من ذاك العشك الاولي اليلاكيها ع الشط واهلها يمنعونها ويغصبونها على ابن عمها لحد ما يطلكها من رجلها وياخذها
- رجلها البي هو ابوج ؟
- اي نعم
- وعادي ترضين
- خر*** بابوي ارضى شني هي لو ظالة عد ابوي غير شابعة ضيم .
- وتحبين رجل امج
- لو اكلج ما تصدكين بس والله اودنه ازود من ابوي ، ابوي تعب بلا فايدة يشتغل وشغله بجيبه وشغلي ماخذة مني بحجة البت ما يصير يظل بيدها فلوس ، ومانع قسمتي ولاعب بحالي جولة .
- شهالابوه هاذ
- دكولي عمت عين ايران جا عسه انت اسرتي دكتلي رديتي علينا خيط وخيط شني
- ياااااا هههههههههههههههه
وظل صوتهن بالضحك يعلى وهن يصنفن و السفرة ممدوة ساعتين ما مشيولة ، لحد ما سعد صاح على مرته خاطر يمشون فزن كلهن، ودعن لمياء وكاللها : عليج للعباس مري بينا عصرية السوالف وياج حلوة
- يا من عين باجر وعلي اجيبن عمتي واجيجن ، عمتي هم مثلي تموت على السوالف .
وسن : خايبة جيبيها وتعاي نتونس عصرية بلايا ما ظالين نصفن
- بس انتن هم تعالن مو بس احنا
- نجي ليش لا عمتي ما تكول لا .
صاح سعد.: شطلعت يابة ديلا سوالفجن نا تطلع الا على الباب مو صارلجن بالساعات .
ضلن يضحكن ، سلمت عليهن .. ومشت ، اندارت نوسة : تمي يمكنها نامت يم عمي ما اريدن ازعجنها ، خل اروحن .
وسن : اصبري خل احطلج اكل
- والله كا اكولن لا بس بالعجل تاخرت حيل ، وابني يم عبدالله ابن خالي ستار .
خذت الأكل وطلعت.... وصلت لبيت ابوها ، شافت سيارة اباب البيت ، ركض ابنها كدامها وطبت هي ، لكت شيخ ال منعم كاعد بالبيت ، ساعة الاجت كام الشيخ وهو يكله : اعلى اتفاقنا يفليح
- امرك يثيخ
استغربت شعده الشيخ ابو تمار يم ابوي ؟
وشنهو الأمرك ، معقول ابوي رضى يطيني وبرضاة ابو تمار .. وينك يالحسين وتنحل مصيبتي بجاهك يالحسن .
طلع ابوي و انا ظليت واكفة انتظر يدخل، فات حجيت : ها بوية شني شعده الشيخ جاينه ؟
- مالج غلض
- لا بس هيج كلت انشدنك
- مشى شعل التلفزيون وكعد ما جاوبني ، طالع اجتماع للريس وابوي مو عادته يديرة على القناة الاولى ويباوع الاخبار واهيس باله مو يم التلفزيون اصلا ...
كمت حتى اتاكد ودرته على تلفزيون الشباب ... اصلا ما انتبهلي ولا حجه ، باوعتله : بوية هكو شي
- معليييييج انت عيب اثتحيييي
- يابة شكتلك بس ردت استفسر على جية الشيخ
- دار وجهه ونام وانا كعدت اضرب صفنات تالي طلع مسلسل (مناوي باشا ) وانا متابعته احبنه ، التهيت بيه وعفت سالفة الشيخ ، يا خبر اليوم بفلوس باجر بلاش .
ثاني يوم ردت اطلع ، كالي ابوي : لا اطلعين اليوم ظلي بالبيت
كعدت ما طلعت ... للظهر اجونا اثنين زلم ، سويتلهم جاي ، وكملوا وظلوا يسولفون بس ما اسمع سوالفهم شني ، لي ما اجاني ابوي كالي ( البثي عباتج وتعاي )
لبست و طبيت ، الا يكله ( هاي البت ، كعدي بوية )
ظلوا يعاينون علي ، وسألوني : اشتشتغلين ؟
- بصالون حلاقة
- شكثر يوميتج ؟
- ٧٠٠ دينار
- اي بس اجار البيت عليك و عليها ، خو ما تكعد عده لو هو يكعد عدك خاطر بالنص .
فليح : اي هو هذا الثحيح
درت لابوي : شنهو الصحيح بوية
خزرني وكوماني ، كمت للبيت بس روحي احتامت جني عرفت عليش جاي يتفق ... طلعوا الزلم و طب ابوي وهو يكلي ( قرينا الفاتحة و عكب باجر عرسج )
لطمت خدي : عرس شنو بوية
- مالث جلمة وياي تكولين اي وما تفجين حلكج ، خوووووث ؟
- بوية زوجتني لهاذ الاكرع القزم .. احاجيك بوية ، ما اريدن عرس ياهو الكالك انا رايدة عرس ، بووووية
هدني وطلع وقفل الباب خاف اهد البيت واروح لامي ، كمت الوب وابجي واصرخ : بوية افتح الباب حرام عليك تظلمني بوووووية ، ليش تسوي بحالي هجييي ، بوووووويه اسمعني دخيلك بووووووية.....يتبع
☆☆☆☆☆☆
عدنا و العودة احمدوا
تتوقعون شنو راح تكون ردة نوسة ، ترضى لو تنتفض؟
شاركوني رأيكم بالبارت و توقعاتكم للقادم
ولا تنسوا التصويت ☆
#زينب_ماجد