#كحل_عرب
(بيت بيوت )
((( بقلم زينب ماجد)))
الحلقة_25
( تمار )
ماتت ضحكة ايامي
وچفن حسرات لف روحي ولياليها
(لكاظم اسماعيل گاطع)
كضوه ازلامي وكعدوا اعلى اديه و هو يرافس ويصيح .. دنج ليه فالح وحط راسه بين رجليه خاطر يسيطر عليه .. ودنج عليه سالم بالمنجل كض السانه و كصه .
الدم كام يطافر من حلكه ..
حط الليان بيدي ، عاينت ليه .. خذيته و مشيت ورحت للشط بمسية غروب .. كعدت وانا حيلي مهدود اعلى صويحبي الهدني وكسر ظهري .
من اصك اعيوني چلماته تترادف بذاني جنه حذاي .
اعاين للشط و اضكر ساعة الجنت اجي ليجاي شايل هموم الدنيا بفكد ولفي ، يلحكني ويكعد بصفي ساعة يغلط علي بشقاه و ساعة يواسيني ويشد اعلى ايدي .
جنت اتكوى بيه اعلى ايامي
اااااخ يصويحبي
بهالمجان دكيت صدري وانت تحذرني من ال ثجيل ساعة الاحاجيك بتحدي وانا اكلك ( ما تخوفني بحجيك هاذ انا احبن لعب النار )
واعاين نظرات الخوف بعيونك علي وتكلي ( وهاي النار ما راح تحرك غيرك، اتذكر هالجلمة عدل و راح تتذكرها هوااااي وكت التلعب بالنار هاذ البصدرك يتحول جمرة وتكوم تصيح الغوث منه) حذرتني خوية وخفت علي وما خفت اعلى روحك ... هديت اخيك بنص الدرب اوحيد ماله صاحب .
اااااخ يا غربتي بفركاك يا خوية .
دفن لسان حيدرة بالمجان الجان يكعد بيه خنجر
وخذه عيونه من سالم وراح لكبر خنجر دفنهن يم راسه .. وكعد ينوح اعلى كبر صويحبه .
لبس الاسود من دفنت خنجر وما نزع و ذب كل هدومه الملونه و لزم السواد على روح اخيه .. حتى لحيته ما زينها ولا جاسها .
بفترة قصيرة اشتعل الشيب براسه وبلحيته اتحولن بيض و شيب اعلى حزنه الضامه بكلبه ... فترة شهور طويلة ما شافوه يضحك ، ولا كعد بمجلس لاشى وجارى الوادم .. الكل عرفت سرحان محزن .
وبان الحزن بلملامحه و هدومه اعلى خيه .
مضت الأيام ..
وكلمن سار اعلى مسعاه
وعاشت الوادم عيشة الشلون ما جان .. بس جانت عيشة عائلة حاكم صعبة وهم يشتغلون خاطر يامنون علاج حاكم و عيشتهم .
بس سالفة جمارة وغسل العار ما مر مرور الكرام على خواتها ... بطة الجان كل واحد يشوفها يتخطبها ، كفت الرجل وماكو احد دك بابها بعد ... بطلاهن مؤيد كلهن و خلاهن الباب ما يوصلنه .
حتى الاء الصغيرة منع تسجل بالمدرسة ، رغم محاولات ايمان خاطر بس يخلونها تسجل مدرسة وتعرف تقرأ و تكتب ..
بس ما خلوها .
وصلت ايمان بحملها للشهر السابع
ومن كثر التعب و الحزن البيها ... طلكت بشهرها السابع ،خابرت على اخوها خاطر تسوي عملية عقد ما تريد جهال بعد ، وتكفلها جلال و تكفل عمليتها ودز الها فلوس العملية .
راحت وياها لالة ومؤيد ..
جابت بنية سمتها (زهراء )
ظلت بالمستشفى يومين ولالة وياها .. ليما طلعت .
بطة : بهالفترة حمل امي طاح فوك راسي
اني اللي انظف عنها واني الاراعي خواتي .. بنات اخوي ستار مريضات زمن عدها حول و نجوى عدها عرج برجلها فما الهن دور بالبيت ، بس ريحانة صحتها زينة بس ما تساعد بشي ، اسمهن بالغرفة فوك ما ينزلن ، اما اني و نهاد طاح علينا شغل البيت كله ، غير ابوي و طلباته كعدوني جروني ودوني رجعوني .
والاهم مدرستي
كلش كرهت الدنيا من بطلت بمدرستي ، لا يرضى مؤيد اصعد فوك ولا يرضى نكعد بالحوش وبس يشوف الباب مفتوح واني واكفة بالهول يركض عليه يزوركني تزورك و يعيرني بجمارة ويقيسني بيها عود تاليتي اصيير مثلها .
وعلى كثر ما تعقدت من البيت و سيطرتهم عليه اتمنيت اصير مثلهم واشرد منهم و اخلص حتى لو اموت ، لإن شنو عيشتي ؟
اداري اخواني
لو اداري ابوي
اطبخ انظف
ولو قصرت بشي انطك .
مرات اسمع لالة وامي يحجن : هسه لو يجيها احد و تنطينها المسكينة شنهي ظلتها و مؤيد يكفخ اعلى راسها
وامي تجاوبها : هو اكو احد شايفهن يا عيني ويتخطبها ، اذا محبوسه بهالبيت ، ادري جمارة غلطت البنيات ذني شلهن علاقة وهيج يصير بيهن .. وج راح اطك واموت من قهري عليهن شذنب نهاد صف ثالث ابتدائي ويبطلوها ؟
بطة شذنبها
الاء حتى ما مسجلة تعيش عمرها ما تقرا وتكتب ليش كليلي شسووون ؟
- جا هاي قسمتهن خية شتسوين الله كريم
- حتى اهلي كشوا منهن وما عاد يرغبون جيتي ويعتبروهن مثل جمارة .. لؤي جان رايد بطة لابنه تراجع ويكلي ( لا خوية التلدغه الحيه يخاف من جرة الحبل لا ننطي ولا ناخذ بنات حاكم ما نتقربلهن بعد )
من اسمع امي هيجي كلش انقهر واحس بروحي عنست رغم عمري بس ١٥ سنة !!
يظل ابالي حلم واحد .. وهو ياسر
من انام بالليل اتخيله هو يجي يخطبني ويخلصني من العوز و الفقر العايشة بيه اني .
بس هو لا اجا بعد ولا شفته بس ظل عايش ابالي و اذكر مغازله و حجاياته الحجاهن اليه .
واتامل بعده يحبني و يجي يخطبني.
....
نوسة : من وصلت ال٩ اشهور ... وزاد حملي و ما كمت اكدر اوفق بشغل البيت .. عمتي وحسن و الشغل .. كوم يحسن ورد هناء على راسي وانا حبلى بالتاسع .
شطت ربي
كمت اخلص الليل دموع من اشوف فرحته بيها لما ردها للبيت ، لا يعايني ولا يجي يمي ، ورحم الله والديه لو دار وجهه باليوم وكال : ها شلونج .
انا من الاول اعرفه يحبها ، وانا الحطيت روحي وككت اواميه خاطر يعاينلي انا هم بس طلع حجي امي صحيح من جانت رافضة زواجتي منه وما رضالي غشكه ، بس انا جنت مغترة بعشك خالتي جمارة الله يرحمها و هي تحجيلي على خنجر وجنت اعشم روحي فد يوم حسن يحبني مثل ما خنجر يحب خالتي .
بس هاي جانت احلامي المتوهمه بيها انا
اكتشفت روحي انا الحاشكة نفسي برجال ساعة عصبية راد يقهر اليحبها و لكاني حاطه روحي تزوجني وحرك كلبها لي ما رداها اله .
من اكعد واكابل روحي ابجي هواي ، ورطت روحي بهالزواج .. وكشت روحي منه ساعة الاشوفنه يضحك وياها ويلاشيها وانا ناسيني .
هاي فوك العوز و الفكر العايشة بيه عده و بيت امي خير من الله.
طلكت الفجر خذاني و ذباني على امي خاطر تاخذني .. ظل عمي سرحان يلوف بالمستشفيات بيه هو وامي خاطر اولد .. والحمد لله رب العالمين جبت ولد سماه عمي سرحان ( سجاد )
بس حسن ما رضى شلون عمي سماه .. تعارك وياي ويريد يسمي ( سعدون ) على اسم ابوه .. بس انا ما رضيت وكلت اله ( اسم قديم شني اسمي ابني سعدون بعد سماه عمي سجاد واسم حلو وعلى اسم الإمام السجاد ياهو احسن ابوك يو الإمام ؟ )
ظل يتعارك وياي الا يغيره و يسمي سعدون ، وانا طنكرت ما اريدن هالاسم ، عمتي صفت وياه وكامت تغلط علي جيف ما اريد اسمي بسم رجلها المفقود
غيروا الاسم بالجنسية و سموه سعدون بس انا هم عناد وياهم كله اصيحله سجودي و سجودي ، وامي و خوالي كلهم يصيحون سجاد .
مشى عليه اسم سجاد مو سعدون .
ضاجو مني .. بس ضوجتهم انا طكت روحي منهم ، بس اخدم بيهم واحط بحلوكهم ولو خالفتهم بشغلة اطلع انا كطعية وخبيثة .
مرت الأيام وسجودي يكبر وانا عرضت عن حسن و بدلت حبه بابني ... حتى هجرني وكل لياليه صلرن يم هناء وانا ما يجي يمي .
اول شي جنت اهتم و ابجي بس بعدها حسيت سجاد كافي عليه ، انسي روحي وانا اهتم بابني .
بس هناء ما وكفت عدها ليجاي
كامت تحوص على طلعتي من البيت .. تعاركت وياي كم مرة على شغلات بسيطة بالبيت ما اذكرهن بالضبط شني هنه .. بس ما يسون تروح تحشد بحسن علي ، بس هو يتجاهل ما يدخل روحه بعركاتنه .
كامت تزيد بالمشاكل وتروح يمه تشكيله عني .. خلته يكره طاريي .. الى ان فد يوم
اجا ابو النفط يبيع نفط بعربانة يجرها حصان واحنا ما جان عدنا وحسن ما موجود وانا متعودة من حبوبتي ما اخافن ولا اختشي من احد، فكيت الباب و صحتله .
- ابو النفط تعال تعال
رجع عربانته ووكف بالباب .. يترس النا .. صحت عليه : بيش التنكة مالت النفط ؟
- ب٩٠٠ دينار
- ب٩٠٠ شني هو كله ب٦٠٠ دينار
- لا وعلي ب٩٠٠
- والله انا ما عدي بس ٦٠٠ بالبيت جا شلون نموت من البرد
ضحك و كاله : لعيونج واكعات احسبيهن بلاش
- لا تسلم يطيك العافية خوية ، اطيك ال٦٠٠ و من يجي ابونا اخذ منه واطيك
- ابوج
- لا مو ابوي يعني قصدي رجلي احنا انسمي ابونه جيف هو جبير البيت و المسؤل عنه .
-انت متزوجة صدك
- يا ابني ذاك شمالك خوية
- شني اهلج ما عدهم خبز و مطينج بعدج زغيرة
- بعد هاي قسمتي ، يطيك العافية مر باجر اذا تكدر خاطر اطيك باقي الفلوس .
- لا طايحات .. هاج هاي التنكة ب٦٠٠ بس فرغيها الي و تعاي .
برميل النفط برا بالحوش و هو حوشنه ها كداته بس ادير تنطك ... كمت افتح بالغلك مالت البرميل واصبن تنكة النفط بيها .
هناء واكفة بالباب تعاين شلون اترس ..
الصوبة بصف البرميل فارغة ، درت ليه و كتله : ما قصرت بس لو تترسلنا هالصوبة و تكمل جميلك ويانا .
ضحك و كال : جيبيها جا ظلت عليها انت ناهبتني ناهبتني .
ترس الصوبة الي ودخلتها جوا علكتها ودفيت البيت عبن سجودي ابني من يلاعب ادياته يكشف روحه و الجو بارد .
ليل ونعل حسن هاد عليه و كاضني من راسي و يصرخ علي : ياهو هاذ اليوم تتمضحكين وياه بالباب ولج .
- يا شمالك حسن هد راسي
- ياااااهو هاذ احجي
- هو اندري ياهو فهمني شني السالفة
جراني من فراشي واخذني لهنا ، كال الها : اشفتي احجي
- لا تظلمها عيوني يمكن ما عدها شي وياها
نوسة - ياهو هو
هناء: والله ما اعرف انا استغربت انت شلون توكفين وياه بالباب هجي و يطيج نفط بلاش
- بلاش شني وعلي اطيته ٦٠٠ دينار
- لا انا سمعته كالج طايحات لعيونج
- وانا ما رضيت اطيته الفلوس
طكاني على راسي و هو يكلي : تطينه الفلوس لو تركعين الباب بوجهه وتنعلين الخلفة .. بس ثلثين الولد ع الخال و انت الظاهر ربيبة خالتج .
انا من كالي هيج تسودنت نفرته عني وكلتله : خايبين تروحولها فدوة بت ماتت و خلصت من حلوككم و انت ما فاكين منها شايفتلي اطلع عليها ، ما رضت بذلة احد وخذت التريدة على عنادكم و عناد الخلفوكم .
شلون كلت هيج و انهد علي وهو يطكني ..
ظليت اصرخ و دفعته عني و كلتله : ما اظلن عدك و علي متحملة عيشتك و فكرك عليش ، شنهي تلحك عيشة امي انت .
لبست عباتي وانا اشيلن ابني و اصيح و اغلط عليهم . و هو يصيح علي ، ردت اطلع ما رضالي اروحن وحدي دفعني ليجوا راح جاب تكسي ووصلاني لبيت امي و هدني .
دخلت لبيت امي ، جان عمي سرحان ما موجود ، دخلت عليها ابجي ، تسودنت خذت سجاد من ايدي و حضنتني : ها ولج شمالج
حجيتهن وحدة اثنين تلاثة ..مروان ومامون كاعدين و هي غمتني : تظلين غمه تطين من روحج و فوك عطيتج تنطكين مصيرف انا اطيه الج يو للبيت خاطر تشترين بيه نفط .
مامون : يمه السالفة مو مالت فلوس الزلمه تاهمها و جاية ليجاي وهي متهومة
- اروحن انعل والديهم والله .
مامون : البسي عباتج و خل نمشي .
نوسة : مامون انت يو رحت يعتبرها من ال ثجيل
- يعتبر الي اعلى باله انا شلي غرض بيه ، من ذاب مرته ابيتنا شني اشاف ماله رداد يوكفه عد حده ، رجلي احطها بحلكه و اشكنها بعلي ، لبسي عباتج يمه .
من شفت مامون مسويها صدك انا خفت ، امي ما جذبت خبر ، لبست عبايتها و طلعت وياه ، مامون راح على بيت جدي حاكم ، صاح على مؤيد .
امي ومؤيد ما يتحاجون ، حاجته : شلك بمؤيد وتاخذه خل نمش وحدنا .
- لازم اخذ واحد من كرايبه يمون عليه ، يروح يحكني وانا خلكي بطرف خشمي اطيح بيه واسحكه .
طلع مؤيد : هلا مامون
- البس وتعال و ياي
- اكو شي
حجاله السالفة ، هز راسه و طلع وياهم ، راح لبيته دك الباب طلع اله حسن ، صرخت بيه هدوة : ولك انت ما استحي اعلى روحك ، يمتى تحس اعلى دمك فوك فكرك و عوزك اطكها .
جريت امي و كتلها : يمه بس شوي
كام حسن يصيح و يعلي بصوته على امي هدوة ويكلها : بتج لو مترباية ما ترد على رجلها وتفك بابة و هو ما موجود .
مامون : الحجاية هاي احكك بيها خوية ...
رادده وهو يكله ( انت لا اخوها ولا تكربها مالك غرض )
رده مامون (اسمعني خااالي البت ذبيتها ابيتنا وبيتنا بيت شيخ و بغياب ابوي انا ردادك .. مو تحط مرة على بابنا وتكلي مالك غرض حجليتك هاي مرجوعها عليك .. بس انا جاي ليجاي اريد اعرف تهمة البنية شني ؟
ظل مؤيد يهدي بيناتهم ويجر واحد عن الاخر .. طلع جيرانهم و هو يهدي بيهم واستقبلهم ابيته خاطر يحل الوضع .. كعد حسن شرح الوضع كله .
حجه مامون : الحك عليك و الحجي هاذ والله عيب تكوله وتحجي مو اطك مره عليه .. ولك هي مرة واطكها .. زلمه و جدها بذراعها وتكدر ترد عليك وتستكوي عليها .. انت ما تستحي على روحك فوك ما هاد البيت مثلج بلا نفط و هي الطالعة اباب بيتك وتطي من جيبها خاطر ادفي بيتك .. تكعد تتهمها.. شني ما تعرفها ما متعرف اخلاقها لو ما اطوها الك وهي بت ٩ سنين .
هدوة : كضاه مرادد ما خللاله مجال يحجي كلمه فشلاه كدام جيرانه برد كلبي بحجاياته .. ابن ابوه .. حطيت الحجي اعلى ذراعة وتكترت استمع و لابسه عباتي وواكفة ويا المرة ليغاد واسولف الها .
طلع حسن معصب من البيت وابو البيت يهدي بمامون و مؤيد ، اندار على مامون و هو يكله : حجيك غالب عمرك انت منين
- انا من السماوة .. وابوي الشيخ سرحان ، شيخ عام ال جلوب .
- والنعم اعلى راسي ، تربات الشيوخ ما ضاعت .. المرجلة منكم وبيكم يالاجاوايد .
- على راسي عمي
وكف وياه خاطر يحاجي ابوه بمشكلة عده .
وانا طلعت ومؤيد داير وجهه عني ما يحجي وياي ولا انا الاحاجي، طلع مامون كذالنا سيارة وردانه للبيت .
فرحت ابتي ردتلي وكعدت كبالي ولا يظل بالي عليها شكلت واشربت ، اقلها جدام عين ومستريحة ولا عد.زلمه واشيلن همهه .
والله يومين ولن ورقة طلاك نوسة تنطي لامي بالمخزن و امي اتجيبها النا .. اغتاضيت بت عمرها ١٥ سنة وتطلك اشافت من عمرها وبركبتها فرخ .
بس اعاينلها .. ما اهتمت ساعة الطيتها الورقة لنها تكلي : اييييي يمه افتكيت شني عيشتي غاد هم عوز و هم خدمه خليني اكابلج و اخدمج اقلها اجري عد الله ما ضايع مو اخير من ذولاك الاخدم بيهم وما يصير بعينهم .
مدري صدك حجيها مدري تواسي روحها انا انقهرت عليها كلش ، حاجيت سرحان رممالها الغرفة الفوك واطاها الها وانا جبت الها هديمات الها و لابنها وتاكل اكلتنا وتشرب شربتنا .
بس بتي بيها طفكة ما تعرف الكعدة
اذا يوم ما هجولتلي البيت من فوك ليجوا عمل شعبي .. تروح على بيت جدها تغسله .
عليش ما شافت حبوبتها تكعد من الصبح تاخذ المخضر من العلوة و تودي عمتها لالة للسوك و ترد تكعد بالمحل مالت الحصة .. كالت الها : حبوبة انا اريد افتحلي بسطية زغيرة هنا ابيعن حلويات واكعد يمج هم اشيل عنه و اسد مكانج و هم اعين روحي .
خب كتلها يمه : عمج سرحان مو جاي يطيج مصيرفج عليش بعد تتعبين عمرج و تشتغلين .
- يمه انا ما اريد اصيرن عالة اعلى احد .. شنهي انطر عمي سرحان يطيني لو ما يطيني خاطر اصرف على روحي و على ابني ، اني اريد بجد اذراعي اعيش ابني .
وامي تردني عنها : هدي البت لا تكسرينها هلي تشتغل .
كامت تشتغل .. بس هاي ما تكعد راحة
كامت تتفق ويا واحد خياط بالسوك يخيط ملابس نسوان .. تشتري من عده و تجيبهن تعرضهن بالمحل ، كامت النسوان تاخذ منها وصارت عليها رجل .
عاونتها امي وكامت تجيبلها ملابس داخلية شلحات مالت نوم بفلس ونص من الشورجة وتخليهن بعلاكة ياهي التجي من النسوان تراويهن الها .. ومشت شغلتها وواردها ازود منهم كلهم .
وامي تكلها : عفية بعد جدتج ولج بس انت وريثتي .
مرت الايام و الشهور
والحال من بعضه .. حاكم مقعد
و ايمان حايرة بيه و بخدمته ، و كواغد حايرة بعيشتهم و كل واحد منهم يسعى بجهة .
اما بيت سرحان
فالبيت ملتزم الحزن على خنجر بوجود سرحان ساعة اليجي تلفزيون ما ينعلك ولا حس غنى ينسمع .
جانت بعادات كبل اذا مات احد
التلفزيوم ما ينعلك للاربعين .. حتى من تبدي لعبة يروحون يشوفونها بالكهاوي ، بالبيت ما ينفك التلفزيون وللميت احترامه .
لحد ما خلص مامون امتحانات السادس اعدادي .. وطلعت نتيجته معدل ٩٢ .. يا فرحة سرحان بيه وبمعدله .. جان ناذر اذا مامون يطلع معدل فوك ال٩٠ يذبح ١٠ ذبايح لوجه الله تعالى .
قرر يذبح بالديرة واباب مضيفة خاطر يتباهى بابنى ويعرف ازلام عشيرته عليه .. سوا عزيمة جبيرة و عزم بيها بيت حاكم بخويطهم و حكم عليهم بت وولد يجون ماكو احد يتعذر ، واجرالهم كوستر للسماوة .
ثاني يوم من الصبح ..
حضر الذبايح اباب مضيفة ... راد يستعرض جدام العشاير ويتباها بيهم، اجا للمضيف اعلى حصان اسود وولده اثنينهم وياسر وياهم راكبين على حصنهم ومستعرضين وراه .
تكدم للمضيف لاكوا ازلامه بالاهازيج و الهوسات ( اها اليوم الحر يستعرض بصدور النيبه اليوم الحر يستعرض )
سرحان : نزلت من حصاني وانا اسلم الزام السرج بيد سالم .. نزل مامون وياسر و مروان وراي ، وازلامنا تهوس .
حطيت ايدي اعلى متن مامون ومشيته ليما وصلته للذبايح و كلت الهم : بمناسبة نجاح وليدي و زلمتي وعكالي انا نذرت اذبح هالذبايح تجراي دم لوجه الله تعالى
دنج الكصاب وذبح الذبيحة يم رجل مامون و الزلم الخيرة كامت تباركلي .. كمت اعاين خنيجر وجنه حذاي بنص هالهوسة .. روحه ما فاركتني منين ما اديرن اتخايله ... وسوادي اعليه ما ذبيته ... وان جانت فرحتي بنجاح ابني جبيرة لجن حزني اعلى صويحبي اكبر .
اسمع الوادم تنشد عن الولد الزغير ياهو .. مامون نصهم يعرفونه وياسر معروف عدهم .. بس مروان ما يعرفونه .. درت ليهم و صحت : مروان تعال بويه
- الله يخليه هاذ مروان
- اي هاذ زلمتي الاخر مريوان .
لاشاه واحد من المعكلين وحجه : خايب مطلع ابوك كسر شنهي الحلاة هاي ولك ياهو هاذ البيكم هجي حلو .. بيت مطر ملحين .
ضحك سرحان و هو يحط ايده على جتفه : لامهن وليدي ماخذ الحلاة من خواله .. و الشهامة من عمامه .
مروان ظل مرتبك كدامهم ما متعود على حجي العشاير ، مال راسه مامون و هو يكله : الله على الشهامة الله .
مروان طكه عكس ، مامون بلع الضحكة و هو يدير وجهه ، وياسر واكف يمهم يعاين عليهم .
اندار عليه سرحان وكاله : ها مامون بوية راضي لو بعد ؟
فز مامون على حجايته واندارله : البركة بيك بويه وجودك بيناتنا اعظم نعمة الله مان بيها علينا .
تبسمله وحاجاه : دام هيج ..جا عاين اعلى يمنتك .
اندار ولن سيارة راكبها واحد من زلامه .. ضحك مأمون : شني هاي ؟
سرحان : مو بالحيف ابن الشيخ سرحان يطب كلية هندسه و هو بلايا سيارة .. چمل هيبتك بيها يبوي.
وكطفله سويجها
صرخ مروان : اااااااااالعب لك ياااابه
وركض للسيارة كبل مامون وصعدها .. جر مامون سويجها وشغلها وانطلق بيها هو ومروان .
سرحان اندار على ياسر : عليش موجف بويه جا مشيت ويا اخوتك .
- لا عمي انا لازم اردن .
- اوچب ... احچي البعبك .. شمالك
- ابنك عمي هاذ وانا اظلن ابن اخوك .
- شنهي معناته الحجي هاذ .
عاف سرحان ورد للبيت، لكه مامون مدخل السيارة بالبيت ومروان فرحان بيها ازود من مامون جنه مطيها اله مو لاخوه .
وبطة ووسن و هدوة وايمان ولالة كلهن طالعات فرحانات لمامون بسيارته ، حجت بطة : عليك الله مامون طلعنا بيها .
- اصعدن اليوم افركم بالسماوة كلها وعلي .
مؤيد : لا ناكو طلعه
مامون : اسمع لك خالي تتمرجل ع الكل مو علي اشك خلكك بعلي ... فهمت لو لا .
ضحك مؤيد : لا والله ما الهن طلعة
- مو تنحرم منها تره احترم نفسك
- لا جا اذا الي حك بالسيارة واطلع بيها ، اخذهن واذا تريد اخذ امي وياهن .
ضحك و هو يطك على جتفه .. وصعدت بطة و خواتها ووسن وخوات مامون من فخرية ، انملت السيارة كامت تصيح الغوث .
طلعها من البيت و مشى بيهن وهن مكيفات اليوم مطلهن مامون بسيارته .. والراديو بعلو حسه يغني ( لزرعلك بستان ورود ) وفرحانات .
ركضت وراهم نوسة خاطر تلحك بيهم .. بس راحت السيارة : يااا و انا عفت ابني وركضت تالي عافوني امداني .
رديت للبيت وانا افر باطراف عباتي .. عاينت اعلى يمنتي البستان و اشجاره جثيرة .. نزلت اتمشى بيه و اتفكده .. صالي شكثر ما طارة بستان ، مدري احن للبساتين مدري اضكر ضيم عمامي وتجز روحي .
ظليت امشي امشي امشي ولني تيهت .. فلك الصابني هالبستان شكبره ؟ انا عدالي بكبر بستان عمامي زغير بس هاذ كاعة وسيعة
وصلت الكاع خضرة مسطحة مزروع بيها خس بس بعده ما كلش طالع ... ظليت امشي واتنوع .. تضايكت من عباتي توزرت بيها و انا اتفكد الزرعات وادنج الهن .
اربي لبعيد ولني اشوفن واحد بسيارته لابس نظارات وداير وجهه يعاين علي .. درت عنه وردت ارد ، نزل من سيارته و حجه : منين يبت الأجواد
- من هالكاع انت ياهو
- انا ابن الشيخ ال منعم انت بت الشيخ سرحان اذا مو انا غلطان .
جذبت و كلت اله : اي انا بته ، وامش من كاع ابوي ياله فارج .
تبسم و هو يكلي : عد سرحان هجي بت عيونها حلوة واحنه ماندري .
- اكلك خوية عليش ما تتوكل موش اخيرلك
- شنهو اسمج
- امنية
- امنية !! اسم غريب و حيل حلو
- جا شعبالك ، وروح منا لا تكرب بعد .
ظل يمشي وهو يطلع من البستان، ويعاين وراه ويرد يتبسم ، انا هم رديت لا احد يلكفني يكسر اعضيماتي .
بس شما امشي بالبستان اتيه ازود ، كلت خل اطلع على الشارع العام على الاقل يجيبني صبابة ما يلوف بيه الدرب .
طلعت ولني الاكي الزلمه هاذ جدامي ؛ شني خوية ناطرني
- وعلي ما ناطرج طلعتي بوجهي صدفة
- الله يطي الصدف خوية كض اكلاواتك عني وامش خوية .
ضحك بحس عالي و هو يكلي : و علي اسمي تمار مو خوية .
هزيت ايدي وانا امشي ..
وهو يمشي وراي بسيارته ضايكني كلش ، ردت احجي سبقني وهو يكلي : اكو بنية ما تندل اهلها ؟
- اكلك انت تكول انا ابن الشيخ ال منعم .. جا هو ابوك الشيخ من اطاك اكل ما اطاك تربية و كالك عيب تلحك مرة بنص ديرة عرب استحي اعلى دمك و فارك .
شو هاذ فور السيارة وكامت ترن و داس بيها خله بس الثعواله وراه .... شوف حظي يربي
رد مامون بالسيارة للبيت ، ونزلن كلهن فرحات وياهي التمر منه تكله : شكرا سايقنا و مروان يرد عنه : بالخدمه بالخدمه .
مرت بطة وهي تكله بضحكة : شكرا سايقنا
كض ايدها : وكت ما تغتاضين واضوجين بس كليلي انا اطلعج بيه .
- عليك الله صدك
ذتبسم بوجهه وركضت للبيت تكللهن بحجاية مامون ، ياسر يعاين ليه ، دارله مامون : حقد اخوة يوسف ما نفعهم بشي .
ياسر: وياهو الكالك انت اخوي ؟
مامون : انا هم اكولن هجي بس ابوي حاشكك غصب
مروان : بطلوا هالحجي ترا والله عيب .
حط مامون ايده على جتف مروان و اطاه السويج : اقفلها يبن امي والحكني المضيف الوالد .
مشى ولحكه ياسر وهو يمشي للمضيف : انا اكولن لا تفرح بسيارتك وانا ماخذ الاعز منها .
مامون : بالعافية
- اي هيج صير اخوي وباركلي لو خطبت
مامون : ما حاقد عليك اخطب التعجبك
- التعجبني وحدة وانا حاطها ابالي من زمان، تصدك عمي سرحان مطيني عهد لو حب كلبي بت يجيبها الي لو جانت بت صدام .
- ليش جاي تحجيلي هاذ الحجي انا شخصني بعرس و التريدها انت
-حقدك علي من انت زغير انا اعرفه و دوم تكره ابوك يطيني ويحن علي ويفضلني غليك و جاي تفرض روحك وتثكلها خاطر تثبتله انت الجبير مو انا .
- وهذا الصدك .. انا جبير ابوي وانت تظل ربيب .
- يشوفك هالربيب هاذ شراح يعمل .
تجاهله مامون و هو يمشي للمضيف ، حضروا الغدا و خلصوا العزيمة و هم راجعين ... جان سرحان يمشي ووراه مروان و مأمون و ياسر ... حجه ياسر
- عمي سؤال
سرحان : هلا بويه
- تفرح لو كلتلك اريدن استقر واعرس ؟
- يوم المنى هاذ بويه .. يوم التعرس بيه وازفك بيدي
- انا قررت اعرس واخليك تفرح بيه
- من باجر زينة السلف اجيبنها الك
- لا عمي انا مختار البت
- ياهي ؟
- هند بت عمي حاكم
التفتله مأمون بساع و هو مخنزر .... يتبع
☆☆☆☆☆
#زينب_ ماجد