#كحل_عرب
(بيت بيوت)
(((بقلم زينب ماجد )))
الحلقة_24
(خاينة رفيج )
انه بلا صبر
والضيم مد الشوف
ومحمل هضيمه وما بگالي معين
تبعد معتمد
وتوز عليه الشيب !!
يطفه اسود ربيعي ويشعل التلوين
لـ عريان السيد خلف||🖤
السماوة_ديرة ال جلوب
الساعة ٧ مساءا
صوت محسن و هو يتحلف و يتوعد لخنجر جيف بت نهب بت عمه امس وما ردت لاهلها و هو الناهي عليها .
كرب حيدرة وهو يسمعهم يحجون بخنجر ويتوعدوله ، بعد ما فضت الهوسة تعنى حيدرة لبيت محسن و دك الباب ، طلب محسن اجاه : السلام عليكم
- وعليكم السلام ياهو انت
- انا حيدرة من ربع خنجر كبل بالجول واعرفنه و اعرف اوكارة .
- انت شعدك جاي ليجاي وشرايد منا ؟
- انا الي ثار ويا خنجر لاسباب رايد اضمنها بكلبي ، بس انا صالي ٦ سنوات كوام وياه وانطر اليوم الاشوفنه مذبح جدامي .
- تندله؟
- انا اندل بيته البالكوت
- وصلنا لبيته بالكوت ودورناه ومامش بيه ، امش عني الله يطيك العافية .
- انت رايدني افيدك يو لا
- وبشنهو تكدر تفيدني انت ؟
- البيت البالكوت بايعة يو بس هاجره ؟
- ما نعرف البيت دكيناه و ما طلع النا احد .
- جا خوش خلها عدي
- وشتسوي
- مجان خنجر تاخذه مني
- ويمتى هاي ؟
- يوم يومين شهر سنتين خنجر يجيك عنوانه ... صافين
- حجايتك مبين تحجيها بزود و انت تعرف شلون اطلع اخباره.
- محد يعرف خنجر بكثري
- جا انا اعتمد عليك .. وناطر منك الجلمة
- جا خوش .
مشى حيدرة وهو يتوعد لرفيجه العاشرة سنين و اختلف وياه اعلى جمارة الرادها حيدرة وتصداله خنجر ورده وما تكابلوا عكبها .
محسن خبر اهله ان مكان خنجر راح يجيه .. ما كال للنسوان ، بس حجه لابوه .. وابوه كال لناصر واحد اسمه حيدرة من ربع خنجر تكفل يطلعنا مجان خنجر .
الظهر ناصر لاكى حاكم وحجه وياه و كاله : البت مغسول عارها وين ما نكضها
حاكم : ما عدي بت ولا تردولي بخبرها .. وانا بري منها
- جا خوش ايام وتجيك البشارة .
- عرفتو مجان هال**** خنجر ؟
- واحد من ربعه الجريبين عليه اسمه حيدرة تكفل يومين ويطينا مجان خنجر ، ساعتها نغسل عارهم اثنينهم .
تغيرت ملامح حاكم ساعة العرف بته كربوا يعرفون مجانها ، ما حجه بس مشى وهو مختنك ما يعرف يلوم روحه عبن ما اطاها وستر عليها وخلاها تتجازه وياه مدري يعتب عليها عبن دور مصلحتها وهي جازته بفضيحة وطيان راس .
بس الصعب عليه بته الزغيرونه اليحبها شلون راح يسمع خبر جتلتها ؟ .. وصار يلوم بروحه (شمالني ما اطيتها و جزيتها وجزت روحي هالفضيحة)
وعلى هالتفكير السمم روحه و اغتاض دم ... ما تحمل من ساعتها طاح من طوله وانجلط .
دك الباب حيدرة على جار خنجر و كاله (عمي خنجر شال يو شنهي )
- والله يابوية ما نعرف
- موش انا كالولي انت رفيج وسره عدك بالمنطقة وانا جاي ليه عبن انا رفيجه وادورنه ومعتازه بشغلة
- هو ماله رفجه هنا بس بشغله
- لا انا رفيجه من اسنين يو كتله اسمي يعرفني حيدرة ، صالي سنين انا وياه ما متشاوفين لجن يو طاح يطيح اعلى اخوه .. موش يو لا
- اي والله حجيك صحيح بس هو مو هنا وما عرف وين راح ويرد لو لا
- البيت باعه يو لا ؟
- لا والله بعده ما بايعة بس هاجره
- دامه ما بايعه يرد وانا اريدنك يو رد تكله اخيك معتازة و الشغلة جايدة كلش .
- وشلون يوصلك يا خوية هو يعرف بيتك
- اطيه هاذ العنوان يو اجاك والله كريم هلبت يكدر يعاوني .
اطاه مجان يشتغل بيه .. فرن مالت صمون
من بعد ايام مدري شكثرها . خنجر رد للبيت خاطر يوصي الزلمه على بيعة البيت عبن يعتاز فلوسه يريد يكمل للجوازات و يطلع.
الزلمه حاجاه على رفيجه وكاله اسمه حيدرة و معتازك كلش واطاني هللعنوان .. خنجر رغم شقاوته و عربدته بس الغيرة تشيله بساع و ينسى روحه يو احد تنخاه يو لاذ بيه.
خذه العنوان وراح للسماوة متخفي خاطر ينشد على حيدرة ، من وصل الفرن كال الهم ( هاذ رقم التليفون مال بيتي يو اجا خل يخابرني)
ايام و حيدرة خابر على خنجر .. اول ايام ما حصلاه ..
عكبها بفترة كدر يدك على التليفون وخنجر رد .
كاله (انا اخيك ومتورط بجتلة واحد والامن يفتر وراي واذا كضوني يعدموني .. واريدك تساعدني)
خنجر كايله (وانا بيش اعاونك هو انا شارد ، والبيت الكاعد بيه انا موش الي وايجار فترة واطلع منه )
كايله ( ما عرف انت اخيي و دبرني انا لزوم اطلع من السماوة والاكي مجان امن و ياريت لو اكدر ازور جنسيتي خاطر اعيش )
خنجر كايله ( تعال لبغداد و الله كريم )
خنجر ما اطه عنوان البيت بس عنوان كهوة ابغداد يلتقون بيها ، واجا حيدره و خذاه لواحد يعرفه بسوك مريدي يدبرله جنسية تزوير وشغل يشتغله ... وامنه عد جماعة صحبانه اباب الشرجي يكعد وياهم .
عليش ما هاذ من هاده ومامنه .. كوم يحيدرة واتبع خنجر لمكان بيته واندله .
ظل يراقبه جم يوم حتى يتاكد هاذ البيت صدك اله
لو لا ؟ ولما تأكد منه خبر بيت اهل محسن بالعنوان و اطاهم عنوان بيت خنجر .
اجا محسن وابوه واخوته على حيدرة لبغداد ، خذاهم ومشى على البيت البيه خنجر .
كعدوا بيناتهم محسن وابوه واخوته يتشاورون ياهو اليكتلهم ؟ عبن هاي جريمة و عليها عقاب بالقانون بس عقابها مخفف كونها غسل عار ...
نشدهم ابوهم : ياهو اليغسل عارها و يبيض وجوهنا بجتلها هي و النهبها .
محسن تصدى للامر وكال الهم (اجتلنهم واسلم روحي للشرطة خاطر الوادم تعرف غسلنا عارنا بزودنا لا متخفين ولا خايفين )
وبالفعل سطى عليهم ليلية و هم نايمين و جتلهم هم و الجنين البطن الام بدون رفت جفن .
اعلى صوت الرمي الشرطة بساع حضرت للبيت .. طلع الهم محسن و هو شايل سلاحه و يصيح : رايتك بيضة بويه غسلت عارها و عار النهبها
كضوه الامن وكلبجوه .
واطو بلاغ للضابط الخفر المسؤل عن امن المنطقة، بجريمة قتل غسل عار بهذا المكان ... حضر النقيب و الشرطة وصوروا المجني عليهم ومكان الجريمة ..
حضرت الجيران و الناس كلها تتفقد شنهي الصار .
سأل النقيب اذا جان احد يعرفهم كلها نكرت .. دور بقائمة سجل الهاتف عن ارقام عسى ولعل يعرفونهم .. اول اسم بالقائمة ( سرحان مطر ضاحي )
اتصل عليه النقيب و بلغاه بقتل خنجر و زوجته جمارة .
سرحان سمع الخبر من النقيب ...
صرخ و هو يكله : شلووووون ... ويين وين
هدية : فزيت اعلى صريخه ، كفيت الغطا وركضت ، لكيته يكطف السماعة من ايدة بقوة و يدك اعلى راسه و يصيح : ياااااااخوية .
فز مامون: شني يمه شكو
- سرحان شصاير كلي شنهو العلم
- ولج كتلوهم يهدوة كتلوووووهم
- دخيلك ربي ياهم ذول الكتلوهم سرحان شمالك عاين علي ، ياهمه
- خنجر و جمارة كتلوهممممممم
ودك على راسه ... صفكت اعلى وجهي : يمه .. يمممممممه اخيتي ... يممممممممه
كامت تصفك اعلى روحه و تبجي و تصرخ ... مأمون رد راسه للحايط و هو يبجي ، كعد مروان يفرك بعينه : شني ياهو المات
- عمي خنجر و جمارة كتلوهم
- لا عليك العباس ؟
- اي والله
- لاااااااا
كام يصرخ ويبجي ويضرب بالحايط و يصيح : بيش كتلوهم ليش والله حرام عليهممممم ليش .
كعد علي يبجي ، و سرحان ينوح ويثغب كام من مكانه و صاح : مامون بدل خلنا نمش
فز نامون بسرعة للغرفة يبدل و هدية كامت : اروحن وياك سرحان اريد اشوفنهم ، ادخيلتك لا تخليني .
- وين اخذنج الشرطة غاد بالبيت هديني يهدوة خلن امش ، يااااااله يا مأمون .
يحجي ويحس بدموعه ، دار راسه و هو يعاتب الهوى : ليش ياخوية عملت بحالك هيج ، مو كلت الك خوية ما يخلونك ولك خوية خاف الله بروحك ... ليش خوية خنجر هديتني
حط راسه اعلى الحايط واجتافه تهتز اعلى زود البجي البجي و هو يصرخ : يا صويحبي يا خووووووووويه.
طلع اله مامون وراح وياه وانا الطم و ابجي واصيحن : وبج دكتورة وشهادتج بكدج شنهي الجنيتي بعملتج هااااي ديييييه ليش ضيعتي روحج وحياتج لييييش ، اخ يا كلبي اعليكم يخوووووتي ، خليتوني وحيدة عكبكم لييييييش يا ستار يا خوية .
ظليت انوح وابجي لنص ساعة و علي ومروان كاعدين ليغاد ، كمت من مجاني خاطر امش لاهلي اكللهم ... ردت البس الاسود بس خفت على امي وهي مريضة ، ظليت بثيابي و غسلت وجهي.
طلعت من البيت ومروان كض علي واجا ورلي، فكيت الباب مالت الحوش ودخلت ، لكيت لالة كاعدة على البريمز تسوي ريوك .
التفتت علي مستغربة : ها ديه خيرج
رحبت بيه و حضنتني : امي وين
- هاي جويعدة يم عمي جاي اريد اسويلهم اريوك
هزيت راسي وردت ادش ، كضتني : صاير شي
تنهدت و انا اكللها : خايبة جابليني وكليلي شكلل لامي وابوي جتلوهم
- ءءءء دخيلك ربي ياهمه ذول
- جميرة و خنيجر جتلوهم
صفكت اعلى وجهه ، ندستها : هشششش خل اشوفن شلون اكلل لامي ولبوي ولج وعلي اخافن اعليهم يموتون كليلي
- ولج لحد امس عمتي تنوح اعليها وتعاتب بيها يو درت ميته تتسودن .
صاحت امي : ولج لالي ويامن جلي تحجين
هدية : انا يمه انا
دخلت حبيت راسها ظلت تعاين بوجهي : ها ولج فالك لا كبلنا الوجه ما يبشر بخير شمالج .
- يمه مدري شكللج
-شتكليلي
- دواج وينه
- خذيته كبل شوية فزيت من النوم حشيشة كلبي ذايبة مدري شمالني .
انحسرت البجية بيه ما كدرت اكضنها وانا احس بدموعي ، عاين علي ابوي : شصاير هدية هكو شي
ظليت اعاين لامي ، نترنتي : دحجي شجاج يا يمه
- يمه جمارة
دار ابوي وجهه وامي ردتني : ما عدي بت بهالاسم ولا تجيبيلي طرواها ..
- جمارة هساع معتازتج يمه
جرت ادموعي اعلى خدي ، ولالة واكفة وكاضة بوصلة للمطبخ ، وتعلين وتبجي ، وامي دايره عنه .
- مالي عونه للما صانت بعهدي .
ابوي صك عيونه و كال : كضوهم ؟
فزت امي اعلى حجايته وانا كضيت عباتي وكمت ابجي واثغب، دارت علي : شمالها اخيتج ولج
- جتلوها الزغيرونة ولج يمممممه .
نشغت و فزت من حيلها : اخذيني ليها
كمت بساع ليها وكضيناها انا ولالة ، درت لابوي ولنه يون و ادموعه اتجارى ... صرخت امي ولطمت : بتي جميررررررة يمه .
نشغت و فزت من حيلها : اخذيني ليها
كمت بساع ليها وكضيناها انا ولالة ، درت لابوي ولنه يون و ادموعه اتجارى ... صرخت امي ولطمت : بتي جميررررررة يمه .
وكامت تصفك اعلى وجهه و تلطم .
فز البالبيت كلهم اعلى صريخ كواغد و بجيها ( بنيتي جمااااارة يممممه اخذوني بيها ما ميته بتي ماااا ميته )
بطة : شنو
مروان : عمي خنجر مااااااات
وينحب ويبجي
ايمان وكفت تبجي و البنات و الكل ظل يبجي ، ومؤيد يكلهم : هاذ الجنته بديها يطبها مرض .
دارت عليه هدوة : ايا النذل ولك ما جانت تصيحك الا اميدي تهون اعليك اخيتك و تكول اعليها ساعة موتها يطبها مرض
- اي ويطبها مرض مو هي العيشتنا بذل ، مو هي العيشتنا بفضيحة .. خلها تموت اقلها نكول ما رضينا بالعار و كتلناها .
تعاركت هدية ومؤيد و هي تكله : خايب انجب امس تشطفلك هي و جاي تعوج حلكك و تحج عليها يطايح الحظ .
مؤيد : اي وانعلها وانعل الساعة الاجت بيها للدنيا .. بت مو شريفه وبلا تربية ويا حيف كتلوها ومو اني كتالها جان برد دمي بيها الهالناهبة .
ارتفع الصياح بالبيت ، و كواغد تلطم و حاكم يصيح على ابنه و يكله : كف هالحجي و دخل النسوان جوا وكف بجيهن لا يفضحنا بهالساعة .
صفت سيارة بالباب و نزل اخوة حاكم ودكوا الباب .. فتح الهم مؤيد و النسوان تتباجى .. دخل عليهم همهم و هو يزمخ : اشششش حسه عينه الاسمعنه يبجي يو ينوح اعلى العار الا اجتلنه وياااااه
واندار على حاكم يكله : رايتك بيضة يبو ستار محسن غسل عارك وجتلها هي و البطنها .
هدية : انتفضت من مجان وانا اصرخ بكل حسي ( الله لا ينطيكمممممممم ان شاءالله حوبتها ما تتعداكم بجاه الحسين الشهيد .. شسوت ولكم و تكتلونها لييييييش ، كل الرادته بس توافكون اعلى الراده كلبها يا زلاااااام الله يطلع حركة كلوبنا بيكم )
حجيتها وتفلت عليهم وانا اكبهم : تف على هالرس الما له اصل.
وعمها انتفض كضها من راسها و دكاها و النسوان تكابلن عليها يكتلنها و مؤيد يصيح اعلى عمه : حيل وياها .
وايمان اطك بيه : ولك يالنذل هاي اختك نذذل
صرخ على امه و هو يكله :كضي بناتج و ستري عليهن ومالج غرض ابنات غيرج ، طرف من هدوم بناتج لو شفته بالحوش الا اكتلهن وعلي .
كامت تضرب بيه و اطرده ..
هدوة فكت روحها منهم وهي تكلهم : جتلتكم هاي الا ازوعنكم عليها دم يالحفاااااي .
درت وانا ادور امي ولنها مامش
كضيت مروان و طلعت من البيت : امي وينها ؟
- ما ادري عنها .
طلعت هليمة لبشارع ادورنها بلهفة واركض الشمس توها طالعة .. ومروان و علي يركضون بغير جيهة يدورونها .
ولني الاكياه اعلى الشارع العام تمش وفاجة اديها وتبجي فاكده و الوادم تمش وراها وبين اليعاين عليها ، ركضت ليها كضيتها و هي تدفع بيه و تكلي : وديني ابها خايبة اريد اشوفنها .
- يمه بس تعاي وانا اخذج الها
اجرن وهي تدفع بدي وتصيح : اريد بنيتي يمممممه، عمت عيني عليج جمارة يمه ضيعيتج ، الموت خذه امج ييمه ... ولج اخذيني ليها اخذيني .
جريتها وانا ابجي وياها ، صعدتها بسياره ورديتها لبيتي ، فكدت كلش هي تلطم و تبجي عليها ، وانا مكابلتها وانوح وانعى .
دش سرحان للبيت مسرع و انا كمت ليه كضيت بردانه : ما اهدنك تاخذني لاخيتي اشوفنها عليك العباس
- بس خليني اخذ المستمسكات ميلي عني
- بس تاخذني سرحان لا تهدني
- دهي ايديييي
نفضها عني وانا ركضت وراه ابجي وانوح .. طاح علي حط راسه اعلى راسي و يثغب ويصيح : ولج صويحبي وعزيز كلبي انجتل يهدوة اانجتل مال لحكيت اطلعنهم يااااااابوية
مأمون واكف يعاين ليهم بعيون مدمعه .. تذكر الرسالة الكتبتها لاهلها ، بس هو ما وصلها ابد خاف احد يزلك بكلمه وابوه ينضر بسبب هالسالفة
دخل لغرفته هو واخوته طلع الرسالة فتحها مكتوب بيها ( سلامي لساكنة قلبي امي .. ادري مالي عين احاجيج لو ادزلج مكتوب و اتمنيت اكتل روحي كبل لا احطكم بهالموقف بس يمه و الامام علي الجاي اعيشنه اصعب علي من الموت .. يمه اذا باقيلي ذرة محبة بكلبج ادعيلي امووت وانت والدة و دعوتج عد الله واصلة ، يمه عليج الله ادعيلي اموتن واذا صار عدي جاهل امانة الله هدية تربية خاف يصير عليه شي ... وابروني الذمة ومحوللين واموهبين من كل كلبي )
مامون : قريت الرسالة قشعر جلدي منها، خذيتها وابوي يمسح بعيونه و هو يطلع المستمسكات ، كضيت ايده و كتله : رايدك بويه شوية
عاين علي وبيدي ورقة : شني هاي
- هاي رسالة كتبتها جمارة واطتها الي لما وديتني عليهم بس انا ما وصلتها خفت لا يمسك منهم شي وتنضر انت ومضيفك .
قراها وصاح : ام عليييييي
اجت امي و هي تكلي : امي تروح وياي
اطاه الورقة و كايل الها : المرحومة كاتبتلكم وصيتها
صفنت امي بوجه ابوي وخذت الورقة منه عايمت عليها و كالت : مامون اقراها ليه شو
وكفت حبوبتي كواغد و هي تكله : شنهي راح تخلونها غاد خايبين احترك افادي عليش ما بيك وحيد بكلبه رحم .. اريد بنيتي .
اشرالها ابوي و هو يكللها ( اقري مكتوبها الكم و الحكوني خاطر اوديكم للمستشفى )
قريت ليهم المكتوب و هن تسودنن جرت المكتوب حبوبتي و هي تعاين و تكلها ( ولج يمه حسيتي بروحج تموتين جميررررة يمه )
جريناها انا ومامون و الدرب كله تعاين بالرسالة وتحطها اعلى افادها و تنوح و تصيح ( عمت عين امج الضيعتج يمه )
وصلنا للمستشفى واحنا افرد بجيه لا سكتنه ولا هدت كلوبنه وامي تصيح ( ستار يمه اخيتك جت ليك ييمه عينك عليها يالشهيد يوليدي ... ولكم يمه وعلي كطعتوا افدي بضيكم .. المن ربيت و المن سهرت ... يل ما تطني ضناي اطني ربايييي يمه )
لهناك ...
وكال النا سرحان : تشوفونهم بالطب العدلي يو ما تكدرون
امي فزت وهي تكله : اي اريد اشوفنها لا تخليها حسرة بفادي شوفتها خلوني اباري بنيتي واودعنها .
هز راسه سرحان و عيونه مورمه ، خذانا وياه و دخلانا اعلى ثلاجات الموتى ، راد يطلع الجثتين سوا .. ما رضوا كالوله : واحد ورى الثاني .
قدم امي على شوفته لخنجر و دخلانه ، جرو باب الثلاجة وسحبوها ولن امي تنشغ واطيح اعليها ، ملفلفه بس الوجه طالع .. ابيض وجنها نايمه و الجيلة بنص كصتها .
طاحت عليها امي ناحت بجت حبت شفايفها حبت كصتها وانا واكفه و الدموع تتجارى واصرخ : ليش ولج سويتي بروحج هجي لييييش ، ولج وعلي لجمتي كلوبنه .. ااااخ يا فركاج يا خية .
انا التهيت اعاينلها وابجي ونسيت امي ، ما اهيس امي ابا اطيح من طولها ، ركضت ليها وانا اصرخ .. لحكني سرحان و هو يصيح على الممرضين .
شالوها بساع و حطوها اعلى سديه و نقلوها وانا اركض وراها ، ركبولها ذن بديها وكامو يفحصون بيها ليما صحوها واطوها مهدى ونامت .. وانا حذاها كاضة بيدها واعاين لحالها اردى من حالها اعلى ستار .
ذاك شهيد و اله بنيات وعده ولد تحضنه وتشم ريحة ابوه بيه ... وتسمع الالف رحمه اعلى روحه .
لجن موش مثل صواب جمارة ... ماتت و هم يغطون ويشتمونها واسمها عار اعلى كصص العارات .
ترخص سرحان من هدوة و خلاها يم امها ومشه لثلاجات الموت .. لابس دشداشه وحركجينه اعلى راسه و الغترة اعلى متنه ويحس بيها دموع اعلى اخيه .
فتحوله باب الثلاجة و جروه و كشفو وجهه و دنك ليه و حط راسه اعلى راس اخيه وينحب : وعلي كسرت ظهري بنوومتك هاي يا خوية .. عليش هيج هديت صويحبك يصويحبي ، تضكر من كلت الي انا وياك للموت يسرحان .. تظكر ساعة الهدوني اخوتي وانكسرت بجتلة كريم شكلتلي .. تذكر يو ما تذكر
كلتلي انا اخيك وانا احزام ظهرك و اعوينة ابو اصلي يو هديتك لوحيدتك .. عليش فكيت حزامك عني يخوي
ولك ما لحكت اطلعك واحميك منهم خنجر خوية .
ظل يبجي على راسه وينحب واخيه مسلم روحه لله .
هدية : اعلى كثر الون و النوح وكعدت بمجان هدوة خوى راسي وغفن عيوني وانا مجابله امي .. ولن طيف اخيتي يمر علي .. مثل الخيال هيستها و هي تمر مثل الطيف من بين عيونه .
فزيت ولن امي اعلى نومتها .. ونيت بونين مسموع ،اعلى حس وني فزت امي .. علينت علي و كالتلي : مرتني اخيتج وشفتها
ظليت اعاين ليها و ادموعي يصبن : انا هم شفتها يمه .. المرحومة كلبها عدنا وتفتر علينا .
امي اعلى كثر المهدات الماخذتها ظلت بس دموعها تصب .. وانا انوح بعلو حسي .
لليل اجو عمامي وهم يتعاركون ويا سرحان ويكلوله ( شيل اديك من الجثث احنا نستلمهن و احنا النعرف وين ندفنهم )
سرحان جان رده ( غسلتوا عاركم وشفيتوا كلوبكم رايتكم بيضة بويه و هدوا المجتولين يندفنون )
- لا عارنا تدفنه انت احنه الندفنه
- خنجر و الجنين ما اطيهم و انا ادفنهم ...
- خنجر عار وان جنت تحسبه اخيك .. حسابنا وياك غير
- البيه زود بويه لا يكصر بحسابي ، حدي اخوي ميت وادورلي وحيد انومي همومي بنص افاده .
تعاركوا حجي لسان اعلى ياهو اليستلم الجثث .
اتفق سرحان ويا المدير مال المستشفى وفهمه الحاله و استلم جثة جمارة و خنجر و الجنين و طلعهم بنص الليل تعنى بيهم للنجف ، وبس انا وياه و مامون وسالم و امي .. مامش غيرنه .
خذيناهم للنجف و اتفق ويا دفان يدفنهم بقطعة غاد عن موتاهم حتى يظلون جريبين شما ردنا نجي نزور موتى نزورهم و هم عمامنا ما يوصلون لكبورهم
خلصنا الدفن ودفناهم .. عاينت عليهم و ظلت تطرى اعلى بالي ايامها و هي تكل لامي
(- يمه شني تزينيني كرعه الناس كلها تصيحلي جلجول وما يعرفون انا بت
- انا اريدنج كوية عبن الرجيج ييمه بهالدنيا ما يعيش .
- جا انا كويه وما اخافن من اكبر واحد بس يمه لا تزينين شعري لريد يصير عدي شعر مثل البنات عمي خنجر يضحك علي جيف راسي اكرع
- مالج غرض بحجي الوادم ييمه انا اريدنج تجتهدين وادرسين وما تصيرين حالج مثل اخيتج .. ساعة الطيتها لفليح و شافت الضيم انا اريدن كون تصيرين دكتورة واكللهم شوفوا هاي بت كواغد الدكتورة ، وتعايني واديرين بالج علي من اكبر خوما تخلين الدكاترة ذول يلعبون بيه
- يمه اصيرن دكتورة
- تصيرين بس خلي ايدج بيدي ومالج غرض بحجي الناس ويو اعرف ابيع الثوب العلي واوصلج يجميرة وما اخليج تعيشين مذلولة )
ظليت اعاين لمي وهي تنوح على كبرها واتضكر احجاياتها .. وين جان فكرها ووين وصلت جمارة وشصار بنهايتها !!
تاليتها كبر مخفي من الناس !
الرادت تتباها بسها جدام الناس
يحركة كلبج وخيبة افادج يا يمه .
خذيت امي من كبرها كوة شلناها ..
تونه جاي نطلع من المكبرة و لن عمامي يطلعون جدامنا ، تسبكوا لسرحان و تعاركو وياه والا ادلينا كبورهم
سرحان : المكبرة هاي جدامكم احفروا كبورها و طلعوهم وحلالكم .
حجه هالحجاية و هدهم و هو يرد لسيارته يلوفها ويطلع بيها من مكبرة النجف .
حجه : اردكم للامير يو نطلع للبيت .
حاجته امي : ردني للامير خلني افك افدي يمه واشكي همي .
لاف السيارة ودار بينا لمرقد الامام علي ، حطينا جولاتنا بالامانات و دخلنا للحضرة و امي ناحت ( يااااااعلي كلب فاكدة اجيتك والكلب لهفان ... بنيتي ضاعت مني واجيتك ياااااعلي )
فكت اديها وهي تكابل الحضرة .. الكل ظل يبجي اعلى ونينها .. ظلت تلطم وانا ونسوان جابلناها ولطمنا وياها بالحضرة .
انهد حيلنا ليما صاح سرحان و هو يطلبنا ، كامت امي والظهر محني ، شكت العلك بالنص واحد شدته بيده والاخر شدته بشباج الامام علي و تكله : ها يابو الصبر اريد الصبر منك فاكدة وحيلي مهدوم وعدي ايتام مالهم احد عكبي .. رايدة الصبر منك يا علي بجاهك عد الله .
ظلت تشد بالعلك بشباجة وهي تنوح و تسجب الدمعه وتحاجيه وجنه كبالها واهو يسمعلها .
طلعت وهي كوة تجر رجليها من الضيم العليها وتنوح.
راد يوكلنا بس محد اله نفس يضوك الزاد .
خذانا ورد بينا للبيت .
لا فاتحة ولا احد يجيب سيرة الماتو وما تهيس بس الهسسس و اسكت ولا تجيب طاريهم .
نامت عدي امي الليلة وكضت الليل كله تون .
كعدت الصبح فجرية و كتلها : ها يمه
- النومة موش الي ييمه ابوج مشلول والاهل عكبي بلايا والي
- يمه بحال شغل انت تحجين صدك تجذبين امس دافنه بتج و هسه جاية تريدين تروحين تشتغلين .
- السيارة تجي اعلى لالة بسته ييمه تذبلها المسواك ، مكيريدة لزوم اكومن وياها
طلعت مني وهي جاتلة روحها اعلى هالعيشة وما لاكية غير الجلمات التخشن كلبها .
سرحان تمرض عكب دفنة خنجر ، رد من الدفنة اتراب الليل ذاك المر ما غمضت عينه ونام بس يون اعلى فراك خنجر ويصيح : يا صويحبي يا خوية .
كعدت وياه وانا اكلله : منين اندلوا مجانهم من كون انت اللكيتلهم البيت شعجب محد جابك بسيرة .
كعد و هو يعاينلي : فركاه ما خلال عكل افرزن بيه يهدوة موته هد حيلي
- ومحسن شنهو امره تهده هجي
- سلم نفسه للشرطة
- هلبت يعدمونه و يريحون افادي
- غسل عار هاذ يهدوة وادمنا تتفاخر بيه .. حكمه بالزايد ٥ سنوات سجن ويطلع .
- الله لا يطيه بجاه علي .
بعدني جاي احجي وطبت بتي نوسة للبيت تبجي وتنوح و تكلي ( يمه عليش خليتني اخر الوادم يعرف بالسالفة عليش ما كلتيلي )
- شحجيلج ييمه وانت بطنج ها علواتها
ظلت كاعدة وياي ومجابلتي وانوح اعلى جميرة وصوابها البلكلب يدوي .
طلع سرحان و هو يكلي : انا رايح لابوج اشوفنه تمشين وياي .
-اي جايه
لبست وطلعت وياه وجن سرحان بفادة سالفة ..
كعدنا والبنيات جابلني ويبجن وانا هم ما اعول اعلى الله الاكيلي وحيد ابجي وياه .
حجه سرحان ويا ابوي : تعرف ياهو الدلى بمجانهم ما كالولك .
حاكم : واحد من ربعه الشقاوجيه مطي بيه
- يا ربع ذول صاروا شياب حتى كعدة الجول جازو منها
- ناصر كلالي على واحد اسمه حيدرة .
هدية : حيدرة الجان رايد جمارة يو غيره .
اندار علي سرحان : خاطبها ؟
حجيت انا : اي خطبها مرة وامي نهرته وما رضت
سرحان : الاعرفنه المرحوم متعارك ويا حيدرة من سنين ما يتحاجون شنهو الصار
ظلوا ساكتين وانا اصفك اعلى زري وانوحن اعلى خيتي وابجي ، كام من مجانه وصاح : ام علي
فزيت : ها
وكمت وراه
حجه : انا الزوم امش للسلف وجتال خنجر ما اهدنه لو بعد مية عام
- وشنهو التريد تعمله
- الاريدنه منج اديرين بالج على الوليدات و البيت وانا ماشي للسماوة
حجاها وطلع للبيت اخذ غريضاته ، عرضله مامون : بويه تريدني امش وياك انت مريض ومالك حيل الدرب واخافن عليك .
دك اعلى جتفه : دير بالك اعلى امك واخوتك وليدي ، صير عيوني واذاني بمجاني هنا .. فهمت .
- على امرك بويه
اخذ سيارته و تعنى للسلف وصل ظهرية ، نزل على واحد يعرفه من الربع قديم بلغاه بالصار تسودن ساعة العرف خنجر انجتل وحيدره اله ايد بجتلته .
سرحان : دم خنجر ما يروح هدر ولزوم ناخذه يفالح
- ايام واحسب حيدرة عدك لاطلعه الك من حدر الكاع .
كلها اسبوع ولن فالح كاض حيدره و جارة لبستان ضاحي ، ذباه بكاع بعيده .. وصاح لسرحان .
لم زلامه سرحان اليثق بيهم و طلع ليه .
وصل ليه .. وكف اعلى صفحه و ازلام سرحان زوعوه العافية .. خلوه يكتهن كلهن ويعترف بكلشي سواه خاطر يدلي على خنجر .
اطوا السلاح لسرحان وكالوله : شيخنا اخذ بثارك هاذ النذل جدامك .
عاين ليه سرحان طرى اعلى باله موقف ساعة الجتل فليح ووكف بظهر سرحان وخذاله ثار ولفه و الجاتله .. ويذكر جلمته من شال سنون فليح و كاله ( انت كلتلي ٦ بس بالغلط صارن ٩ يخوي )
- الموت ما يطفي جمرة افادي اعلى اخوي ... فااااالح
- امر يشيخ
- اطني السانة بيدي و عيونه تدفنهن عد راس خنجر ... نفذ .... يتبع
☆☆☆☆☆
#زينب_ماجد