الذنب 13
رواية...ذنب عينيك...سلالة العنفوان
بقلمي...نور سمو العراق
💔💔💔💔💔💔💔💔💔
ياعازف الناي صوت الناي أبكاني
كأنك تعزف من أوجاع حرماني
ياناي مهلا إن الدمع يحرقني
كأنه جمرا يسكن بين أجفاني
عف على الأضلاع بكل مهارة
وأمسحلى الأوجاع برقة وحنان
يا إن الحزن يسكنني
وصوتك المجروح اوجعني فأبكاني
............................
صدمه الجمت كل حواسي ما جنت اتوقع هيج يصير ولا جنت اتوقع هيج يكسرني هاي مو مساعده هاي مذله
لاااا والف لااا مو بنت ابو سليم الي تتزوج بالسر مثل الي مسويتلها عمله لا والله مستحيل
امي الشكت وتعبت حتئ تربيني احسن تربية وتفتخر بيه مو اني الي اجي وادنس تربيتها...واتزوج مثل العاهره ياخذ حاجته مني وبعدها يطردني مثل الكلبه ...
كلبي احترك ونار توجرت بداخلي احس من الصدمه رجعت الي لكنة التاتا واني ما عولت اخلص منها...
باوعت البيبي ودمعتي علئ خدي كلتلها هذا شيكول شيحجي اصلا شديخربط شنووو اتزوج بسر هذا حل بله يريد يكسر ظهري لو شنو
حطت ايدها علئ شفايفي كالت...اششش اشش اسكتي ولج هذا نغيب لا يعدمنه
دفعت ايدها بغضب وابجي...خلي يعدمنه نموت ولا نعيش بعار...
طلع خالو علئ صوتي كال بغضب...شبيج صوتج يانه للقرفه...« اجانه للغرفه »
جاوبته بحده ومن بين اسناني...گله مو لحم رخيص قربى حتئ تطلبها خلسه وبالسر مو عاهره وما تشرفك حتئ ما تفتخر بيها كدام اهلك ...
دفعني بقوه انضربت بصدر بيبي كال.. كصري حسج الله ينتقم منج ولج انتي تردين يعدمونه اي شعليج انتي شرايحلج...انه الفغير الطيح بيها...
احتدت ملامحي بغضب كتله...روح كله ما موافقه
ما حسيت غير براشدي شوهه معالم وجهي وانركعت بالحايط حطيت ايدي علئ خدي واني اكتم عبرتي
لزمني من ثوبي بقوه كال...ولج ادبسز اشتقل عندج انه شني روح گله والله علئ هاي سالفتج اله ازوجج اله قصبا عنج...
بيبي لزمته بقلق...شبيك يمه بهداي بهداي بعدها ياهل ما تفهم
صاح بيها...هاي ياهل هاااي لسانها شطوووله...
شفته طلع بطوله الفارع وهو يباوع بجمود كال...خيير صاير شئ؟
خالي باوعلي بعصبية...روحي يله
درت وجهي دا اروح سمعت صوته كال...انتظري
وكفت بدون ما ادير وجهي جان الجوو اضلم وضوءالقمر ضارب علئ النخل والمنظر مرعب وحزين وكئيب
كال...شبيج قربان انتي ما راضيه بهذا الزواج
رد عليه خالي بضحكه...لا راضيه احنه من شوكت نشور النسوان راضيه بس هي تدلل
رد عليه...لا اريد اسمعها منها ؟
مكدرت احجي الغصه بصدري وگلبي ياذيني ومخنوكه بس احجي افضح كلشي وادخل بنوبة بكاء فضيعه
ما شاف مني اجابه تنهد كال...انه الي جاي اسوي لخاطرج انتي ما عندي وياج فاينه اصلا انه معرض روحي للخطر بهذا الزواج
بس هذا اقرب حل تا احميج من البقيه
همست بوجع...ليش بالسر
رد عليه...لان انه ضابط وما يصير اله بطلب واذا قدمت طلب اكيد ينرفض
ضحكت...ما شاء الله تعرف الاسباب زين خلي بالسر كدام لحكومه بس ليش تخليني هنا وليش اصلا هل شئ سر عن اهلك ؟ شنو متتشرف بيه لو ما استاهل تجيني عراضة خطابه من الغربيه؟
رد عليه بجمود...مو هيج بس كوو اسباب انه بس اامن عليج ويرجع سليم صدكيني ينتهي كلشي انتي امانه عندي...
درت وجهي عليه و وجهي كله دموع...امااانه!!! منو امني عندك وهيج تصون الامانه تريد يحجون بشرفي ويكولون تتزوج بسر لان عايبه
صاح بيه بصووت عالي...قرباااااااان تجاوزتي چثير وانه ساكت
ابتسمت بقهر...ليش شنو الحجيته الحقيقه تجرح موو ؟
رد عليه...لسانج طووويل
تجاوزت كلامه كتله...منو امني عندك سليم ؟
صفن بوجهي وتنهد كال...لا يوسف
باوعتله استغربت...يوسف يوسف شلووون وين يعرفك ؟
رد عليه بارتباك...بعدين احجيلج هساع انه كتلج لاسوي المصلحتج
ضحكت...لا والله المصلحتك
رفع حاجب...وشنو مصلحتي وياج بله ...شفتي روحج چثير يا قربان ما عندي اي مصلحه وياج بس دامج عاندتي ان شاء الله اليوم اليوم اعقد وارجع للغربية...شرايج؟
ضحكت..ههههههههه الي رأي تسأل شنو رأيي انت تقرر وخالي يوافق واني كبش فداء لو ادري هيج ما طلبت مساعدتك...
تركته ومشيت واني ابجي والدمعه بعيني كرهته متت منه شلون حقير شلون استغلوني
حطيت اديه علئ شفايفي اخاف اصرخ والم اهل السيبه كلهم ...وييج يممممه
شهكت الكلام يطلع متكطع عندي ...وينك ابو سليم شووف شسوو بيه شلون دمروني وكرهوني بروحي عبالك عاهره عندهم...
ياربي ليش هيج كلبي راح يوكف والله لو معدومه ولا هيج يسوون بيه ضليت ما اشوف من البجي...
مصيري وياه شنووو ياخذ الي يريده ويعوفني مثل شرهان وانكس...
يزوجني بالسر حتئ يغطي عن افعاله وجريمة البشعه بحقي اي هاي اعتبرها جريمه بحقي...
امي ما ترضه علئ هذا الشئ ولو موجوده مستحيل تزوجني هيج زواج ...
كل الطرق مسدوده كدامي وكدامه هل زواج بس مصلحه اله مو الي ادري بي يريد يتزوجني بس حتئ يحصل علئ حاجته...
دخل خالي كال...شبيج غربه شبييج انه اكدر احجي لو ارفض هذا نغيب تعرفين شني نغيب وبعدين واذا تزوجتي لا هو عيب ولا هو حرام
تنهدت بقهر...خالي انت مدا تفهمني ابببد هو ديعرض نفسه للخطر هاي اولا واني راح اتبهذل وياه اولا هو ضابط واني سجينه ما ترهم...
تقرب مني وحضن وجهي بحنان...انتي طلعتي براءه يا خالي يعني ما عليج تهمه لو انتي صدك متهمه جااا هسه عدموج بس مدام طلعتي براءه يعني ما عليج تهمه
ضحكت...وابوي وسليم وتميم...ترئ ذول اخواني تعرف شنو اخواني واهلي اذا واحد منهم عليه تهمه ما يتم الزواج...
اني اعرف غايته والله هو من زمان نظراته قذره مثله مثل غيره يريد يشبع نزواته ما اريده ما اريد اتزوج كوه يعني...
لزمني من ايدي حييل ودفعني...اي كووووه تتزوجينه وغصبا عنج ولج انه لو بيدي جااا زوجته عسيله بس هو رايدج انتي...
كعدت ابجي وانوح وهو ولا يمه ثاني يوم الصبح ما اشوف اله خالي اجه يركض كلي...كومي كومي باعي الشيخ راح ياخذ موافغتج كليله موافغه راح يعقد علئ المذهب الجعفري موش علئ مذهب النغيب...
باوعتله بحده وهو رد عليه بحزن...خالي بعد خالج والله ما بيدي شئ هذا من جماعة الريس واحنه مو كدهم انتي تعرفينهم اذا رادو شئ يسوونه
وكمل بخوف...انه سامع من الوادم يكولون هناك ببقداد هم ذول الضباط يفترون البكليات وياخذون وين الحلوه ومحد يفك حلكه وياهم...
مسحت دموعي...واني لهذا السبب اكرهم ما اريده فدوه خالي
رد عليه..شوفي خالي اذا زين الله كون يقربه منج واذا مو زين ان شاء الله ربج موجود ويزيحه عنج...
باس راسي بتوسل...بعد خالج يله والله انه اخافن علئ روحي انه اذا يعدموني ذن البنيات منهو ليهن منو يعيشهن يتبهذلن...
ضحكت...وتريدني اضحي بروحي خالي؟
رد بغضب...موش انتي الرحتي خابرتي وجبتي هاي تحملي نتايج افعالج...
راح للشيخ والشيخ من وره الباب حجه ويايه وطلب موافقتي ...انطيت الموافقه تحت ضغط كبير من خالي...
خله وراح وهو فرحان واني احس نار تسعر بصدري حاولت اصبر نفسي وما ابجي...
اجت بيبي باركت اليه هي ومرة خالو وعسيله مطنكره وضايجه مدري شبيها...
شويه وطلعن كعدت علئ السرير وروحي طالعه...
شفته دخل واني الموت دخل بعضامي عصرت اديه بخوف وقلقل وما باوعتله نزلت راسي
سد الباب ومشه خطوات باوعتله وفتح الشباك وحط ايده علئ الحايط وارتجه كال...زعلانه
سكتت مجاوبته
تنهد ورد عليه...يابه لا تعتبري زواج اعتبري خطوبه
رفعت عيوني مصدومه...يعني شنووو ؟
باوعلي وضحك كال...لا تخافين مني اعتبريني صديق ولا تتحسسين مني انه السويته يوول الخاطرج
وكفت وبلعت ريكي...سيدي انت دتعرض نفسك للخطر وانت متدري بروحك ما اعتقد اله داعي هل زواج
تقرب مني خطوات واني رجعت خطوات مهزومه منه
جر نفس و وكف بمكانه كال...انتي اكو هواي امور خافيه عنج ما تعرفين بيها وانه هذا السويته الخاطرج
ضحكت باستهزاء...محد يجازف بنفسه اذا ما عنده غايه
صفن عليه وابتسم كال...ما عندي غايه وياج وبس اشوفلج رجل بي حظ انه ازوجج اله بعد شتردين
رمشت بعيوني...شنو قصدك ؟
مسح علئ شواربه وضحك كال...يعني مثلا انه هساع مجرد خطيب الج والعقد قابل للفسخ
فتحت شفايفي مذهوله...يعني سيدي متتقرب مني وتطالب بحقوق زوجيه
ضحك...لا اتطمني ما اطالبج كتلج مجرد عقد قابل للفسخ
تنهدت بخوف...زين شنو الغايه
رد عليه...اولا حتئ ما يطمع بيج الحقراء والانذال وتكونين فريسة سهلة الصيد مثل سليمان وابن عمو
ثانيا حتئ فياض من يرجع هنا ويطالب ببنت اخو الي من دمو ولحمو ولازم تعيش ويه عمامها مو ويه خوالها نكدر نكول هي متزوجه مو من حقك تاخذها من زوجها...
شهكت...عمي فياض هم طردوني اصلا يخافون علئ نفسهم شنو بعد ياخذني زين واذا كلت هي متزوجه ومو من حقك تاخذها من زوجها حتفتح علئ نفسك باب يعني حيعرفون انت العقدت وبهاي السالفه انت الي حتتورط لان الزواج ما يتم بدون موافقه من الرئاسه...
ر
د عليه...عمج فياض ما يندك بيه يعرف وراي ضهر قووي وانه لازم عليه مستمسك ومع كل هذا ما اريده يعرف انه العقدت نكول لبنيه تزوجت وراحت
شهكت...بس لهذا الشئ حيتحره ويعرف وانت واني نروح بيها...
ضحك...شيصر مثلا اكثر من انو نفسخ العقد ثانيا اذا تجرئ فياض وسوه شئ ضدي انه اعرف شلون اتصرف واطيرو وره الشمس
تقربت منه خايفه...سيدي انت منين تعرف عمي فياض ومنين تعرف يوسف
رد عليه بجمود...فياض اعرفو من زمان جلاد مجرم واكثر الاعدامات هو يتكفل بيها بس يوسف عرفتو من دخلتي السجن...
رمشت بعيوني...شلون سيدي يعني فياض صاحبك ؟
ضحك...لا مو صاحي هو مركزو حساس بالدوله ومره من المرات انعدم عدنه شخص مهم وانه صار عندي فضول اعرف منو العدمو...
هو جان متخفي وبعد عملية البحث ومساعده من زوج عمتي عرفتو ...هو عدم شخص مهم وعدم سبع نفرات من عائلة ساده متهمين بالانضمام لحزب الدعوه
حطيت ايدي علئ صدري...سيدي اسكت لحد يسمعك ويكتلوك اسكت سيدي لا تحجي بهاي الأشياء
تقرب مني ولزم اكتافي ركز بعيوني ورد عليه...عمج مجرم مجرررررم...
رجفت شفايفي بخوف وانفاسه تضرب بوجهي كتله...زين سيدي ويوسف شلون عرفته
جاوبني بهدوء...من انسجنتي هو ثاني يوم الصبح اجه انه جنت مو بنفس السجن الي انتي بي
دخلو عليه شفتو ولد صغير واشكر كعد حسيتو بي خلل حركاتو مو طبيعيه ...
حجالي شغلات انصدمت منها بصراحه ما اتوقعت ان اكو هيج بشريه رغم انه بالسلك العسكري وشايف اشكال وألوان بس هيج قضيه لا مستحيله
لزمته من قميصه واني ارجف...سيدي شنو حجالك احجيلي
عض شفته بقهر كال...ما اكدر ما اكدر اشغل بالج اكثر من هييج ..ولازم سليم يرجع تا ياكد علئ هل جرايم لانو يوسف للاسف من قدمتو للمحكمة ما اخذو باقوالو...
حسيت نفسي بدوامه...ليش سيدي؟
تنهد سحب نفس وزفره كال...لانو فياض قدم اوراق تبين ان يوسف مختل عقليا وداخل مستشفى الامراص العقليه لذلك جانت اقوالو باطله...
حط ايده علئ خدي كال...لذلك يا قربانه انه من عقدت مو تا احميج من سلمان وابن عمو لا هذا واحد فاشل وما يكدر يسوي شئ انه خطيت هل خطوه تا احميج من فياض...
يعني ان شاء الله كم شهر واشوفلج رجال معدل يتزوجج واامن عليج هااا شكلتي
بلعت ريكي...ولو كووولشي مفهمت لان تحجي بغموض بس موافقه بس كون ما تتقرب مني...
ضحك كال...لا ما اتقرب
رفعت اصبعي بتهديد...حتئ بوسه ماكووو
رفع حاجب...عليش بله يعني ترى خطيبج حاليا
جاوبته بعناد...ماكوو خطيبي احنه عدنه اليخطب ما يتقرب من خطيبته جنت مخطوبه ومن يجي اهلي كلهم يكعدون ويانه
وبعدين علئ كولتك عقد قابل للفسخ يعني اول وتالي انتي مو زوجي فما اكدر اخلي واحد يتقرب مني غير زوجي
باوعلي بنظره مستهزئة...عشتووو متريد واحد يتقرب منها غير زوجها
جاوبته...اي والله لعد شنو تاخذ مني الي تريده انوب دكول مو ذنبي ذنبج لان اني متفق وياج عقد قابل للفسخ...
رد ببرود...هم صح خوش تفكرين ..
أردف بتنهيده...هسه راضيه مووو يعني ما زعلانه فهمتج سبب هذا الزواج
هزيت راسي بأي كال...يله اعتبرج صديقتي واني صديقج يعني عادي اجيج بعد كم يوم اسولفلج عن حبيبتي .وانتي تنصحيني
رفعت حاجب...اهاا يله وان شاء الله اني هماتين من الكه واحد احبه اجي اسولفلك عنه وانت تنصحني
رد عليه...اهااا تمام هسه يله اني لازم لو ضاله ببغداد مو احسن لان تعب اروح واجي من بغداد للبصره للانبار فار العراق كله هههه
ضحكت...مشكلتلك
عض شفته...ما يجي بعينج
تقرب مني باسني بطرف شفتي دفعته بعصبية واني امسح بشفايفي...لااا خوش صداقه هذا انت صديق شاذ ليش تبوسني
رد ببراءة...غير اودعج
جاوبته...سيدي عفيه لا تسوي هييج
مد ايده بجيبه وطلع محفظه حسب بيهن فلوس وانطاهن اليه استغربت كتله...سيدي شنو هذا
كال...مصرف الج شتردين اشتري عجل شلون اخلي صديقة بعازة خوالو
ضحكت...لا سيدي ما اريد بيبي مكفيه
جاوب بعصبية...اخذي لا اكص راسج
اخذتهن منه وهو طلع طلعت وراه جنت حيل مستحيه لان قبل لا يدخل للغرفة جنت ادك والطم ومن دخل هدئت وطلعت بارده ما متعصبية...
سلم علئ بيت بيبي راد يطلع واني لزمته من ايده باوع لايدي وبعدها باوعلي كال...هااا قربان صاير شئ محتاجه شئ
ابتسمت...دير بالك علئ نفسك من سلمان ومن الكل لا تتهور تمام؟
ابتسم وجر نفس كال ...ان شاء الله انه اذا ما لكيت اقدم استقاله وگابلج هههههه
ضحكت وهو خله وراح شويه صار عندي نشاط مدرب باللحظات حسيت بشعور حلوو عكس ما جان خاطبني شرهان...
ضليت انضف بالبيت...وهاي متخبله عسيله مدري شبيها....
رحت دخلت سبحت ولبست ثوب كصير ونص ردن بي من كدام دكم وبي بالخصر حزام من نفس القماش مشطت شعري وضفرته...
باوعتلي عسوله كالت...شني هذا لبسج ماتستحين احد يشوفج قمه حتى قمه
لبسي عدل واحترمي نفسج احنه مو ابقداد عود ابقداد لبسي هيج مو هنا عيارة
جاوبتها بهدوء...انتي شدخلج شكو تتدخلين منو انتي اصلا
ردت بغضب...يمه يمه طلع اللسان عمنها خذت نغيب وضلت اتعيقل ام سعف وليف...
ضحكت...وانتي شكوو غيرانه لو شنو وبعدين شبي لبسي حلوو واني مطالعه برا بالبيت...
كالت...عيارة لبسج لمصلخ زنودج طالعة كون حرمس يكرصج يحرمسج حتى تتوبين من هالعيارة
جاوبتها ببرود...انبحي لوحدج
خلت جف ايدها على الثاني وتفتحت عيونها وترفع حواجبهه : انه انبح ولج يعني انه جلبه تغصدين ؟ جلب ركض وراج و عضج كوون بكرشاية ريلج
انه اكدر البس مثلج بس عمن انه مترباية احسن تربية مو مثل تربيتج..
عفتها ورحت تحجب الوحدها هي عندها خيط خبال ضلينه كم يوم علئ هل حال ماكو اي خبر عن النقيب مجرد عقد وراح...
العصريه جانت خالتي تحش بالزرع واني اسقي بالورد واخذت الكطعته رحت اسفطه...
شفت عسيله اجت تهف كلت خلي اصير وره النخل هاي بس تجي تسمني سم...
وكفت يم امها وصاحت...يمااا يماااا شني غربى احسن مني نهار كله مطلعة كرشات ريليها وخذت واحد لا نجمة ولا نجمتين على جتافه تلاااثة تلاااثة بعين العدوو جاا ماتخليني اطلع ريليه بلكن ييني واحد ويخطبني مثل غربوو ام زنود
امها مدنكة جاي تحش شبزي لبيت ام كريم
كطفت المنجل عليها وفردة الحذاء الجوبلس
كلتلها وقمه حتى قمه عبالي احتركنا عبالي باكو النبكة عبالي كصوا الهمباية
يايتني تردين ريل امشي طيح الله حظج وصبقج
كتفت اديها وكفت...شنهي غريبه مطلعه ريليها واخذت ريل مالي شغل اريدن اطلع ريليه...
انت بالأول صلخي ريلنج ريلين الباجة وتالي طلعيهن ودوريلج على ريل
امشي روحي چــيمي التنور وهسه بشيشة كاعد تروي حتى تخبزن اثنينجن
ظلت تضرب رجلها بالكاع عسلة وتصيح يمااااا اريد اسوي رجليه شيرة خلي بطيطة تجيم...
ركعتها امها بالفرده الثانيه مال حذاء وهي خلت ورجعت للبيت...
رجعت تعبانه واني شايله شدات الشبزي و وجهي صاير نار والحراره تفور بجسمي
لكيت عسوله دتسوي بالشيره بجدر مصخم باوعلتي وبنظرة تحدي واخذت من الشيره لفلفتها وخلتها علئ رجلها واحتارت شلون تشلعها...
دخلت امها هلكانه من التعب كلتلها..ولج عسيله بس لا خلصتي شكر الكميه « الحصه » كومي عوفي الشيره...
ولج غرب المقرب وبعدنه ماخابزين وابوج يريد العشة وكت هليوم يحطج ويصلخ مثل الباجة ما يحتاي تسوي شيرة
ردت عليها بوجع...يما لزكت بريلي شسويلها ؟
باوعتلي كالت...بعد خالتج غربه هلسي ريلينها « رجليها » وخلصيني منها...
اخذتها بالغرفه وسويتلها شيره جنت اعرف للشيره وهي تصرخ وتصيح غربوو ام السعف وليف بهداااي بهدداي موتيني
ولزمها واحمسها حمس بالشيرة طلعت القضه والمضه بيها اخذت حيفي...
........................
فاروق
رجعت للبصره وانه مشغل مسجل السياره واغني بلهفه...يا دموع العين ثبي اليوم اريد احباب كلبي اليوم اريد احباب كلبي..
صحت بصوت عالي...جايج يمه جايج يا حبيبة گلبي..
صفنت صبوحه حصار وتاكل دجاج بجطل واحنه اذا طبخنه دجاج نطلع الريش بالشارع عود نفيك
خرب يومج الناس حصار وانتقام وانتي يا جبل ما يهزج ريح لا يمر بيج حصار ولا يمر بيج احتلال
ما دام هيج خليني اشبع يم الشحروره واخلص من الحصار يوم سمجه يوم دجاجه يوم مركة لحم صفرة منا لمن يخلص الحصار...
دخلت للبصرا وكبل لنهر خوز وصلت هناك ضحكت دخلت لكيت جدي يسكي وجدتي كاعده تهفي علئ روحها
سلمت عليهم...هلا بالشياب شلونكم
رد جدي...جويدين اكلك انت علئ يوم تسوي حادث وتموت ولك هييد اكعد عوفنه من بقداد
جريت نفس...لا تخاف عتوي بسبع ارواح
رحت لكيت امي تشوي بيذنجان بستها بجتفها باوعتلي خايفه كالت...يمه فاروق سوده عليه يمه كمزتني خفت عبالي مدري ياهو
عضيت شفتي...عندي الج خبر اله بشده ؟
رمشت بعيونها...خير يمه ان شاء الله خير شصاير واختك وين ما شوفها وياك
ضحكت...عوفيني هسه من من فلفله ...ما كلتيلي شنو الخبر
بلعت ريكها بخوف...شني يمه ؟
جاوبتها بحماس وغمزتلها...الشحروره خطبتني
فتحت حلكها مصدومه كالت...ييي يمه ييمه فاروق تخبلت شبيك يمه شكوو تحجي صدك المن خطبتك هاي ام المصايب
ضحكت...خطبتني لبنتها اليابسه خخخخخخ بس يمه مالج شغل تسمن تسمن علئ هل بيتنجان الشوي والمحروك اصبعه تصير اسمن منج
حطت ايدها علئ خدي..ويمه فاروق مصخن شبيك شتحجي شتهلوس فدوه اروحلك يمه فاروق شبيك
ضحكت وبست ايدها...والله لا اهلوس ولا مصخن الشحرورة قدمتلي عرض زواج ولا بالاحلام تريد تزوجني بنتها مقابل درجتين
جاوبت بحده...لااا والف لاااا اذا ناسبت صبيحه لا اني امك ولا اعرفك
ضحكت...هههههه شبيج يمه تحجين صدك شنو ازوجها...مثل ما حرمتني من ورث ابوي وكاتله روحها وتتراجف خاف اخذ من الورث هسه راح ارجعه ما اقبل بالعرض القدمته اريد باقي الورث هه
اردفت بقهر...تدرين يمه شدكول دكول اكو مصابين هواي بس انت لا اثق بيك واخلاقك حلوه قبلت تعقد علئ سوزان...
وجانت دكول وتحشم علئ نسوان عمي ديرن بالجن من فاروق فاروق ساقط زين اذا اني ساقط شكو تورط نفسها وياي
جرت نفس...خلي تولي يمه تروحلك فدوه هاي دومها ام مصلحه
ضحكت...نويت اخلي احفاد الشحروره كلهم من فاروق الساقط واخليهم يطلعولها كرون ساقطين ما عليهم عتب علئ ابوهم ههههه
مسحت علئ جتفي كالت...تضحك من قهرك يا فاروق وانت صدرك متروس هم
غمضت عيوني بقهر...لا بالعكس اني اصلا اليوم كلش فرحان اني احس روحي اليوم صدك الي قيمه
شفتي يمه من ضربت روحي ضليتي تحجين عليه وكلتي جااا متت هاج شوفي شسويت وشلعبت هههههه شفتي فوائد صديق الريس
اذا ما اشلع كلب الشحروره ولا اطلع ابو الفوارق اله اسويها كوارث
باوعتلها بنشوه...يمه مو دكول قبل اتحارش بسوزانه هسه اريد اتحارش من صدك بس بالحلال هااا
ردت عليه...لا يمه فدوه اروح الك حتئ بالحلال ما نريدهم فدوه اروحلك..لا تباوع ليفوك اخاف تنكسر ركبت فدوه يمه
جريت نفس...انكسرت رگبتي من زمان يمه بالعكس راح اجبر رگبتي بهل سالفه
اردفت بتنهيده...والله اذا ما طيحت حظ بيت الشامخ و وفيت بوعدي ادك لافته بباب البيت واكتب طلعت مو رجال بعد لحد يطالبني بفلوس فاتحه وفصل
ضربتني وهي تضحك...ههههه والله عليك سوالف يا فاروق...
خليت و رحت واني انزع قميصي واغني باغنيتي المفضله اريد احباب كلبي...
...................
فلفله...
رجعنه علئ بغداد رجعنه اخويه حذيفه طبعا حذيفه يحب وفاء اخت فريال وهي تحبه چثييير
شخصيتها عكس فريال تماما بنيه حبوبه وطيوبه تحب الكل وما عندها غرور
جمالها بالشكل متوسط وفريال احله منها بس هي يميزها جمال روحها وهذا الي مخلي حذيفه يحبها...
حذيفه اخوي انسان مسالم وفقير واصلا بعده صغير عمره تلاثه وعشرين سنه كافي خيرو شرو...
عكس فاروق وذياب...فاروق خبل وعنودي
وذياب متسرع ودائما يكون متسرع بقرارتو واذا ما حب شخص يحاربو نفسيا ويتعامل ببرود قاتل...
كلت خل اروح للمستشفئ اشوف بلكي رجعوني للشغل
والله رحت الدكتور كال...لا ماكو ما رجعتي انتي مطروده
حلفت اله اروح للصحه واقدم شكوه ضدو ليكون مستشفى الخلفو وانه ما ادري
رجعت ضايجه ومقهوره حجيت ويه وفاء عن الي صار كالت...ليش ما تشتغلين عند وحده بصالون تصير صديقة فريال دوم تسوي شعرها عندها
ردت فريال...لاااا متقبل تشغلج لان الصالون مقبط وما تريد عمال مكتفيه
همست بداخله شكد ططوه سدتها ...بس انه لازم اشتغل
شويه واجت عمتي صبيحه كالت...بعد كم يوم خطوبة سوزان وفاروق احنه من الصدمه كل وحده فتحت حلكها شبرين
فريال...شنووو شنووو لا ممعقوله تزوجين سوزي الحلوه لفاروق وهو لا شهاده ولا مركز
اني جاوبتها...احترمي نفسج شنو مهتلف ما غيرج المهتلفه
وتصير النه گونه شكبرها هي تتهدد عليه وانه اتهدد عليها كالت...اطلعي يله اطلعي من بيتنه
جاوبته...امشي لج هذا مو بيتكم بيت جدتي واذا ما عاجبج انتي اطلعي
جدتي ضلت تحجي عليه وصعدتني فوك وهي امها رزلتها وضلت تحجي عليها....
صعدت بغرفة جدتي وانه افور منها والله اذا ما كتلتها ما اطلع فلفله شو كابله وبزه بعينه تحجي علئ اخوي لا دكول عيب لا تستحي
وكفت ردت انزل اغلط عليها بس جدتي ما رضيت ...والله صدك مو بيتهم هو البيت بيت جدتي وكاعدين بي بعد شكو تفيك فوك راسي
انوبه تزكح بوجهي هذا اسلوب محاميه هذا تفووو
بس ما عرفت ليش عمتي انطت سوزان لفاروق شنو السبب؟
سالت جدتي وجاوبت ضحكت لا والله و ورطتي نفسج يالشحروره وصرتي صيده سهله بحلك فاروق
تيشوفج نجوم الليل بعز الظهر....
مشكله ياربي انه هاي ما اكدر اتحمله واعيش هينا ببغداد ولا اكدر اروح للانبار ما احب اشوف سياف ما احبوو مو بيدي اكرهو كره العمه وهو لازك مثل العلج
بهاي روحتي كل شويه ويتردد علئ بيت جدي ويدحكلي بنظرات اعجاب وانه روحي تلعي منووو مقرف ييع...
ولا اكدر اروح للبصره لان راح اندفن هناك وما اكدر احقق شئ من الي اسعئ الووو والله حيره يارب...
..................
فاروق
اليوم العقد وانه رحت الحمزيه كشخت وبدلت وحمزيه من كل عقلها غيرانه عليه خخخخ
وكل شويه وركعت رجلها بالكاع...شعندك مبدل عندك شئ كووول انت تخوني
ضحكت...ولج شخونج اني خاينج ويه عشرة قبلج بله هو هذا هم سؤال جم مره كتلج لا تثقين لا تثقين اووف منج حمزيه تعلين الكلب ولج يبا لا تثقين
لزمتني وهي تتدلع ولازمه طرف القميص...زين وين رايح حبيبي
جريت نفس...ولج يبا وين رايح عندي صفقه ولازم اكملها
فرت شفايفها...احم لي يسمعك يكول مدير اعمال كلك سايق لاندكروزر مزنجره
دفعته...دنلصمي ولج مدير الاعمال اليوم مو نفسي بهاي الصفقه
مشيت خطوات وهي تمسح علئ ظهري كالت...خوش راح ادعيلك
رجعت الها ورفعت اصبعي بتهديد كلتلها...ديري بالج تدعيلي خلي الصفقه تعدي علئ خير
خليت ورحت و وكفت يم باب بيت الصبوحه ضحكت خوش خطبه هاي جاي الوحدي يطبعا ما احتاج اجيب واحد وياي صديق الرئيس بس الاسم كافي..
دكيت الباب ودخلت وصبوحه تهلي وترحب بيه
لكيت ابوها لسوزان كاعد لا يحل ولا يربط رجل دجاجه ما يحل مسكين صبوحه ماحية شخصية هي الزلمه وهو المرة متبادله الأدوار...
كعدت واطلع جكارتي وادخن كوه متحمليني ادري بيهم بس مجبورين خخخخخخ
شويه واجه الشيخ اليعقد كعد بعد ما سلم شايل وياه قران...
كعد اخذ موافقتي انوب صاحو علئ سوزان ياخذون موافقتها...
دخلت اليابسة لابسة فستان كصير لحد نص الساق لونه سمائي وبي ورد اسود ولابسة حذاء سوه وحاطه حجاب علئ راسي تستحرم خطيه...
لابسته كفيان شر عود لان الشيخ موجود لان اصلا هي مو محجبه
سألها الشيخ وهي ردت عليه بتنعوص...اي عمو موافقة
اعلنه زوجا وزوجه واني اضحك بخبث هلا والله هلا يبا والله واليابسه صارت الي
اجت كعدت بصفي وشمرت الحجاب بعد ما طلع الشيخ كالت...اووووه والله نعسانه اكو واحد يعقد هيج وقت كان خليتوها غير ساعه متعرفون هذا وقت قيلولتي...
امها جاوبته...سوزان كافي لا تتدلعين خلينه نعقد بسرعه حتئ ناخذ الدرجات...
حضنتها كدام الشحرورة وبستها بخدها