محمد : ايه بس هم مالهم شغل فيه هم اللي سلموه لشرطه اصلا
اماني : اكشن ذا العايله
محمد ببتسامه: الحين بيصير اكشن عندنا بعد
اماني : كيف!!!
محمد لف لأمه : المهم يمه دق علي اليوم وعزمني للغداء والرجال ماشاء الله عليه قمه في كل شي
ام محمد .":ايوه وش يبي
محمد ابتسم : والله يمه تركي طلبني اماني على سنة الله ورسوله وانا ماعندي اي اعتراض اعرفه رجال ماشاء الله عليه والقرار لك ولأماني انا ماعطيته اي كلمه لما اشوف رايكم
اماني اللي كانت تقلب بجوالها جمدت لما سمعت الخبر ابدا ما حطت ببالها مثل هالموضوع ووقفت اصابعها ورفعت راسها بصدمه
ام محمد : والله اني ما توقعت ي محمد فجأتني
محمد: والله بيني وبينكم الرجال ماشاء الله اخلاق و وسامه و وظيفته وسيره بين الناس معروفه كامل والكامل الله
ام محمد : والله ونعم فيه اعرف امه واهله ماشاء الله عليهم بس سالفة جده هاذي موب زينه
محمد : ي يمه هو ماله دخل بجده وبعدين تركي هو بنفسه اللي سلم جده لشرطه وكان شاهد على كل شي
ام محمد : مادام كذا انا ماعندي مانع ودامك تشوفه مناسب الله يكتب اللي فيه الخير بس شوف اماني
اماني كانت جامده بكل ما تعنيه الكلمه ماقدرت حتى تقوم
محمد: أماني سمعتي الكلام وش تقولين
اماني ماردت وبالقوه تحركت ام محمد : صلي استخاره واتركي الباقي على ربي
قامت أماني بإحراج وطلعت .
ومحمد مبتسم لف لأمه : والله يمه اني اتمناها لتركي والله اني بتطمن عليها عنده اكثر من وجودها عندي
ام محمد : والله ي محمد اماني اغلى من عيوني واخاف عليها من واحد ظالم ما يقدرها ارجع اسأل معرفتك ما تكفي لازم نتطمن
محمد: ولو اني واثق من تركي بس بسأل
قطع الكلام دخول زوجة تركي وعياله : سلام
الجده: هلا هلا
ركضوا العيال على جدتهم وسلموا عليها وبعدها راحوا لأبوهم
مشاعل: كيفك ي خاله
ام محمد : بخير انتي كيفك
مشاعل: بخير الحمدلله وين اماني توها مهزأتني بالجوال تقول تعالوا
ام محمد : اماني فوق توها طلعت
محمد : اااوووووه اماني خلاص بتسحب عليكم
مشاعل: ليش
محمد : متقدم لها تركي عرفتيه
مشاعل ضحكت:تركي ماغيره صاحبك
محمد : ايوه
مشاعل: ماشاء الله زين قلتوا لي خلوني اطلع العب فيها شوي
ام محمد: هههههه لا تحرجينها
مشاعل : لا لا ماعليكم
طلعت مشاعل شبه تركض محمد بصراخ: بشويش ي بنت الناس في بطنك نفس ترا
ام محمد :ههههههه فرحانه اتركها
محمد: ايه بس بشويش بكره تسقط وتقلبها مناحه
٠٠٠
عند عزام وصلو البيت ونزلت سمر وحور ونزل عزام اما نور اخذت نفس عميق وهي تحاول تهدي نزلت وهي تمشي بهدوء شافت عزام واقف يناظرها مشت من جنبه وهي ساكته
مشى عزام وهو يتنهد اتجهوا لبيت الجده وسمر وحور راحوا بيتهم دخلوا وقبل مايطلعون مسك عزام نور وهو يوقفها على جنبك : اشبك وش صار عشان قلبتي وجهك كذا
نور : عزام ابعد خليني ساكته مالي خلق مشاكل هنا
عزام: مشاكل ايش انهبلتي مافيه اي شي يحتاج مشاكل
نور: لا والله زين زين دام مافيه شي اتركني اقلب وجهي براحتي
عزام توه بيتكلم بس دخل تركي : سلام
ابتعد عزام : وعليكم السلام
طلعت نور ولا ردت قرب تركي : اشبكم وش صاير
عزام:ولا شي سالفه بسيطه من وين جاي انت
تركي: كنت مع محمد وطلبت منه اخته وقال ان شاء الله خير
عزام :الحمدلله الله يكتب اللي فيه الخير بس من الظهر معاه
تركي : ايه من زمان عنه طلعنا تمشينا تذكرنا ايام زمان يعني تقدر تقول ارتحت وراح عني نص همي بشوفته
عزام ابتسم: الله يسعدك دوم ي تركش اقولك ما تدري وين العيال
تركي: تو من ساعه ادق عليهم اللي مايرد. واللي مغلق يجون الحين
عزام : زين تعال تعال نطلع
طلعوا فوق وراحوا لجدتهم سلمو وجلسوا وعزام يراقب نور اللي باين ضيقها وتوترها
ابو ماجد : مابغيتوا تجون ي ابوي
عزام: والله يبه انشغلنا تو من جد فضيت
ابو تركي :زين والله شفناك قمنا نشتاق لك
ابو يزن: انا اقول اسكن هنا احسن
عزام:هههههه خلاص مايمديكم استقريت خلاص
الجده: والله لو تطيعني وتسكن معي توسعون صدري كان ارحم لك
عزام: لا تخافين ي جده بأذن الله بنجي كل يوم ونوسع خاطرك
الجده: الله يسعدكم
ابو ماجد : اشبها نور اليوم مالها صوت
ابو يزن : اي والله وش فيها بنتي وش مسوي ي عزام
عزام ناظر نور وابتسم بهدوء : ولا شي شوي تعبانه
ام يزن: وش فيها وش صاير معها
نور بهدوء: ولا شي يمه بس عزام يكبر الامور
الجده: وش تشتكين منه
رد عزام بنفس طريقتها رد مبطن لها : دايخه ي جده ومو مركزه
ام عزام: بسم الله عليها شفيها
ابو ماجد بفرحه : لا يكون بس جاي طفل في الطريق
الكل التفت لعزام اللي ما توقع هذا الشي وقال: لا لا بس خافت من منظر شفناه بالمول
تركي : خافت من منظر اتحداك لكن ماتبي تقول لنا
عزام: اقول ابلع العافيه بس
الكل ضحك ولفوا على نور اللي كانت ودها تقوم تتوطى بطن عزام
حنان : والله ما ألومها تخاف ومصيرها مجهول
تدخلت ام يزن بسرعه: بسم الله عليك ي حبيبتي مافيه شي ينخاف منه وعزام معك
عزام: علميها ي خاله هالشي وعلمي غيرها يلمون أنفسهم
حنان جات بتتكلم وقطع عليها ابو يزن اللي ماحب تكبر الامور
ابو يزن: تدري تدري بس تدلع عليك وش فيك انت
تركي تكلم وهو متجاهل وجود حنان : على طاري الدلع يبه تعرف محمد عامر ال يحيى
ابو تركي : ايه وش فيه
تركي : خطبت منه اخته اليوم
الكل التفت على الخبر المفاجئ واولهم حنان اللي ما توقعته يخطب بها السرعه: ايييييييش
تركي : ايه خطبت اخته وش فيه وش صار ناس ملتزمين ومحترمين واخلاقهم عايله وانا مابحصل احسن من نسبهم
ابو تركي : اقل شي قلنا
تركي : ما حصل وقت وهذا انا قلت
ابو ماجد : وانت هاذي عادتك تمشي وتخبط على عماك ولا تدري وش اللي بيصير معك
ابو يزن: ولا تدري عن البنت شي
تركي بدقه: مهما كان في البنت الشي الوحيد اللي متأكد منه انها محترمه ومتربيه كويس ورزينه
ام تركي : ولا شفتها ولا تدري وش فيها وش ما فيها
ام يزن: غلط كذا ي تركي
تركي : المهم انا قلت لكم والبنت مقتنع فيها واذا لي نصيب فيها باخذها
الكل سكت لما حسوه تضايق وحنان ولعت جمر وقامت وهي معصبه
٠٠٠
عند الشباب اللي تقلبت بهم السياره وتجمهر الناس عليهم بشكل مو طبيعي وقف يزن وهو جبينه ينزف ويدور على يزن وثامر شاف ثامر صرخ وركض له : ثااامر ثااامر انت بخير ثامر
ثامر كان دايخ بس الحمدلله ما جاتهم اصابات خطيره ومجرد جروح سطحيه تركه حس انه بخير وراح يدور على ماجد برعب وقلبه يدق وخايف انه صار له شي : ماااااجد مااااااااااجد مااااجد تسمعني ماجد
انتبه لصوت على جنب ركض وشاف ماجد طايح وهو مغمى عليه رفعه وهو يصرخ: مااااجد ماجد انته بخير تكفى قول انك بخير ماجد ررررد مااااااجد
جاء الاسعاف وركضوا لثامر اسعفوه ورجعوا لماجد اللي آلى الان مغمى عليه اخذوه من يزن وركبوه الاسعاف واخذوا يزن وبسرعه على المستشفى يزن كان منجن تماما خاف انه يفقد ماجد اللي كان بقمة حماسه للملكه وفرحان ومبسوط تخيل بس وش ممكن يصير وما تقبل الفكره
ثامر كان مفجوع من كل اللي صار بدون استثناء وباقي دايخ وخايف على ماجد اللي جات الضربه فيه كلها
وصلو المستشفى ونزلوا بسرعه يزن وثامر مو مهتمين لإصاباتهم كثر ماهم مهتمين لماجد ركضوا معه لطوارئ وحاولوا ياخذونهم يعالجون اصابتهم بس رفضوا لما يتطمنون على ماجد
ماجد مسكوه الفريق الطبي وابتدوا يسعفونه وبعد تقريبا ساعه ابتعدوا واسرع يزن اللي كان جبينه مخيوط وعليه شاش
الدكتور: لا تخافون مافيه شي خطير مجرد اغماء بسيط وكسر باليد وجرح بسيط جدا بجبينه والحمدلله على سلامته وسلامتكم
يزن: متى بيصحى
الدكتور: خلال نص ساعه مابيطول
يزن ارتاح وجلس : استغفر الله العظيم نشف دمي والله نشف
ثامر: وانا بعد ي الله ي بشاعة اللي تخيلته
يزن : حتى انا يمه للحظه تخيلت ان فرحنا صار عزا
ثامر: بسم الله الرحمن الرحيم الله لا يقوله
يزن: مابنقول لاحد طيب بنسكت لين تعدي السالفه مابي افجع احد
ثامر: ايوه اسكت وكلها اصابات خفيفه
يزن : ايوه
٠٠٠
عند عزام اللي كان يجامل وهو ضايق من ضيق نور وقلبه معها
تركي : وش صاار وش السالفه اشوفك مو على بعضك
عزام : مافيه شي ي تركش بس جات ام رعد تبي رعد ونور شبت نارها
تركي : بس رعد مات الله يرحمه
عزام: المشكله مو في رعد المشكله ان كلنا عارفين انها ما رجعت عشان رعد
تركي :عشانك
عزام: ايه
تركي: وعشان ايش بالضبط رجعت
عزام: اكيد وصل خبر اني رجعت لابوي عبالها اني غرقان بالفلوس وتبيها
تركي : طيب وش بتسوي
عزام : اكيد ما راح اسوي شي غير اني امحيها من حياتي مستحيل ي تركي اخاطر بنور عشانها
تركي: انت ما بتخاطر بس على شكل نور اللي شفته باين ان مصيبتك مصيبه
عزام : هذا هو دامها حطت براسها عناد بتعاند
تركي : انتبه تغلط
عزام : لا ما بغلط ان شاء الله انا لو انفرد فيها بتنحل اكيد
تركي : دام كذا خذها وروحوا لبيتكم
عزام : مشكلتي مقدر امي حالفه للعشاء ولا لي خلق شي
تركي : مدري وش اقولك بس الله يعينك
عزام : ابي اعرف العيال وين غاطين
تركي : اي والله دقيقه ادق على يزن
اخذ جواله وهو يدق على يزن اللي رد بصوت طبيعي :هلا تركي
تركي : يزن وينكم غاطين
يزن: ابد في المستشفى
تركي :ليش
يزن: ولا شي صدمنا صدمه بسيطه وكل شي بخير لا تخاف
تركي :وشو تستهبل من جدك انت
يزن: تركي روق كلنا بخير مالها ذكر اصلا
عزام: وش صار
يزن: مين جنبك
تركي : عزام ..
ام عزام: اووووف ي حور اوووف سكري السالفه مابيصير له شي ان شاء الله
دخلت نور بهدوء :سلام
الكل : عليكم السلام
نور: خالتي شفتوا عزام
ام عزام: لا والله ماشفته
حور: ولا انا
نور ( زين ي عزام ): اها تحتاجون شي اساعدكم بشي
ام عزام: لا يمه ارتاحي
نور: زين يلا
طلعت نور ورجعت تدق عليه ومارد بعد عصبت هي تصرخ: طيب ي عزام
سميه من بعيد : نور وش فيك وش صاير معك
نور لفت : ولا شي ادور على عزام ماشفتيه
سميه ابتسمت :لا اتوقع مع تركي
نور: مو وقته تركي صراحه
سميه : ليش
نور: ولا شي ابيه ضروري ولا حصلته
سميه : ههههه نور من جد تغيرتي شوفي كيف صايره عصبيه
نور:ههههه احلى حاجه سويتيها انك ما حبيتي
سميه:هههههه الحمدلله
نور: تبين شي بكمل ادور عليه
سميه : سلامتك
كملت نور تدور عليهم بكل مكان بالقصور ولا حصلتهم وزادت غيرتها وجلست برا تستناهم
٠٠٠٠
عند الشباب وصلوا ثامر ويزن للبيت وهم ماكان فيهم شي مجرد جروح خفيفه
تركي : خلوني انزل معاكم
يزن: تركي انعديت من ماجد قلنا مافينا شي وبعدين لو بتنزل معانا بيشكون ان فينا شي روح معهم وماجد بحاجتك اكثر
ماجد : انا بخير
ثامر: انت خلك حاله خاصه
يزن: عزام وش بك
تركي: خله خله يفكر بالمصايب اللي بتجيه
يزن: انا بيني وبينك اشوف نور معها حق تعصب
عزام لف عليها: انتم ناوين تجننوني انت واختك وش سويت انا تكلمت معها بعيد عشان مابي ادخل نور في مشاكل وجاي تقول بحقها تزعل
ثامر: هي ماتدري اكيد بتعصب
ماجد : صادقين وزين انك مارديت عليها اذا رحتوا بيتكم كلمها زين وفهمها
تركي : اقولكم ترا خطبت وباقي بيوافقون
ثامر: مبرووووك ولو انك استعجلت
تركي:مابي اجلس اكثر من كذا فارغ والا بتجنن
يزن : معك ربك ي تركش
ماجد : اقول تزوج تزوج بس
تركي ضربه بشويش على راسه : انت اكثر واحد مأيد
ماجد:ههههه ياخي والله حلو
يزن: ترا دوبك على الابواب ماشفت شي لا تحكم من راسك
ماجد: لاااازم ينكد والا يموت انا احس حياتي حلوه انت وش دخلك
يزن: حس حس اصلا المجانين دايم حياتهم حلوه
عزام : يلا نمشي
يزن: روح روح الله معك مع اني احس بتصير كارثه معك
ماجد : وانا بعد
تركي :أنا أأكد لك
ثامر: انا اقول الله معك
ضحك عزام اللي شايل هم نور : يلا بس مالي خلق ترا
تركي : يلا
طلعوا ثامر ويزن لشقتهم وهم مفجوعين اما الشباب راحوا البيت
٠٠٠٠
عند نور اللي كان كل شوي يطري على بالها تخيلت بس انه راح لساره وانجنت وقفت وهي ناويه تكسر الدنيا اذا جاء سمر طلت من بيتهم: باقي ما قامت الحرب
نور: ماقامت بس اذا قامت بتقوم حرب البسوس
سمر: ههههههه اذا تبين فزعه انا بالخدمه
نور: ابعدي بس
دخلت سمر وهي تضحك على نور
فزت نور لما شافت السياره داخله ووقفت تناظر
في السياره شافها عزام واقفه وتنهد تركي وهو يقول : هيا خوذ لك قلت لك بتحترق
ماجد : اوووف ي لطيف الله يرحمك ي عزام شوف شوف كيف متكتفه
عزام : الله يستر انزلوا انزلو
نزل عزام واتجه لنور وقف قبالها وهو يحاوط كتفها بيده : تعالي تعالي
نور ما تحركت : شيل يدك
عزام بهمس : ماعليه خلي غضبك جوا وادخلي العيال جايين ماله داعي يشوفون اللي جالس يصير
نور : لا ي شيخ الحين انتبهت ان فيه احد يشوف اللي يصير وقبل شوي لما هزاتني قبال البنات ماكان فيه احد صح
عزام مشى وهو يمشيها غصب عليها: نور مو وقتك الجكاره
نور مشت وهي معصبه ومشى معها عزام راحوا لبيت ابو ماجد
حصلو ام عزام مجهزه العشاء واخذته لبيت الجده وقالت لهم يجون هناك
وقف عزام وهو يشرب مويه بالمطبخ ونور واقفه تنتظر ام عزام تطلع واول ما طلعت لفت وهي تقول : وين كنت
نزل عزام الكوب: مع تركي
نور: ايه زين وين
عزام اللي ابد ما يحب اسلوب الاستجواب هذا : نور انا لا تكلميني كذا
نور: وانا لا تكلمني كذا
سكت عزام اللي حس انه لو طول معها الجدال بتصير مصيبه تركها وطلع وهو متوجه لبيت الجده ونور وراه بقمة عصبيتها من تطنيشه لها وحركاته اللي ابد مالها داعي
٠٠٠٠
عند ماجد اللي طلع للغرفه بدون ما يحس عليه احد ولا يبي يخوف احد انسدح بتعب وهو يتحسس الجرح اللي براسه
مسك جيبه يدور لجواله ما حصله تنهد بضيق لما ماحصله :مو معقول نسيته مع يزن اووووف وش ذا الحظ
انقلب للجهه الثانيه وهو ويراقب الساعه وينتظر متى تصير ١٢
وبدون ما يحس غفى ..
عند تركي اللي توجه لبيتهم دخل وهو يتمنى ما يطلع له احد ويناقشه وهو ماله خلق وفيه نوم الدنيا وصل غرفته بسلام دخل بشويش مايبي احد يدري انه جاء خصوصا سمر اللي بتجي تتفلسف على راسه نزل تيشيرته ورمى نفسه على الكرسي لف يطالع الغرفه لفت إنتباه البلكونه اللي ما عمره فكر يوقف عليها دايما ياطاير مثل المجنون ابتسم ووقف وهو يفكر بقراره اللي ما يدري صح غلط مايقدر يحكم على شي سوا انه يبي ينهي كل شي لغلا بقلبه اتجه للبلكونه وقف وهو يناظر بيت حنان قطب حواجبه لما شاف غلا اللي كانت مبسوطه وتكلم وتضحك وباين انها اصلا ما تأثرت لطلاقهم صد بسرعه قبل ما تشوفه وتعرف انه حبها دخل وسكر الباب واتجه لسرير رمى نفسه وهو يحاول ما يفكر وينام
٠٠٠٠
عند الجده اللي كانوا متجمعين على السفره حولها ابو ماجد وابو تركي وابو يزن وحنان وعزام وياسر وسامر
اما الحريم بسفره ثانيه وفي المجلس الثاني
الجده: وين ماجد ما جاء
ابو تركي : وتركي وينه
سامر: تركي اتوقع انه بالبيت نايم
عزام بهدوء وعلى طريقة سوالف : وماجد بعد نايم
ابو ماجد : غريبه شهالنوم
ياسر:هههههه مافيه شي غريب طول عمرهم نوامين الاثنين ذول
ابو تركي : وهو صاادق
ابو ماجد : عزام ترا من شوي كانت نور تدور عليك ضروري شفتها
عزام ( اوووف يانور ضروري تفضحينا عند الكل ): ايه ايه شفتها
ابو ماجد : وين كنت
عزام بهدوء عشان ما يفجعهم : كنت بالمستشفى
ابو ماجد: ليش فيك شي تعبان
عزام: لا بس العيال ماجد ويزن وثامر سوو حادث بسيط ورحنا ناخذهم
ابويزن وابو ماجد :وشووووو
الجده : يمممه وش صار فيهم
ابو تركي : وينهم
عزام بسرعه: لا تخافون بخير كلهم ماصار لهم شي مجرد جروح بسيطه وكلهم بخير يزن وثامر بشقتهم وماجد بغرفته ناايم
ابو ماجد : عزام اذا فيه شي قول لا تفجعني
عزام: والله مافيه شي يعني لو فيه شي بجي وبتركهم
ابو ماجد تركهم وركضوا لغرفة ماجد لحقهم عزام اللي كان مضطر يقول لهم احسن مايسمعون من احد ويخافون
الحريم حسوا فيهم يركضون وطلعوا
ام يزن: ياسر وش فيكم
ياسر : ولا شي
نور: ياسر لا تستهبل وش فيه
ياسر : ولا شي بس العيال مسوين حادث وهم بخير لا تخافون
ام يزن :اييييش
نور بخوف : مين هم
ياسر: يزن وثامر وماجد
ام يزن: يمه ي ولدي وينه
ياسر: يمه يزن بخير وفي شقته ولا فيه شي
ام عزام بخوف : ماجد صار له شي
ياسر : كلهم بخير وماجد هنا بالبيت
راح ياسر وتركهم وطبعا انتشروا الحريم بخوف وام يزن تبكي بخوف على يزن والباقين خايفين وام عزام خايفه على ماجد اللي تعده مثل عيالها
٠٠٠٠
عند ماجد اللي كان غاطس بنوم ولا هو حاس بالدنيا فتح الباب ابو ماجد وانفجع اول ماشاف يده وصرخ على عزام : تقول مافيه شي هذا هو متكسر
عزام : خلع يبه مو كسر وبعدين انا متأكد ان مافيه شي
ابو يزن: عزام اذا في يزن شي قولي تكفى
عزام: والله والله انه مافيه شي بس ضربه في جبينه بس
ابو تركي : وثامر
عزام: مثلهم هو بس حادث بسيط في صبه بس
ابو ماجد راح لماجد ناداه بشويش عشان يتأكد انه بخير تحرك ماجد اللي كان بعز نومه فعلا ولا هو باللي حوله هو من غير شي نومه ثقيل
عزام: يبه والله بخير بس نايم عادي
ابو ماجد :وكيف ما تقولي عنه كيف
عزام : انرعبت ورحت على ملا وجهي ما انتبهت ولما شفته بخير جبته وجيت
ابو تركي : تعالوا نطلع برا عشان لا نزعجه
طلعوا وجلس ابو يزن وهو يقول : ياسر دق على يزن بسرعه
ياسر: حاضر يبه
دق ياسر على يزن اللي رد وهو يضحك على ثامر اللي كان يعبر عن شعوره وكيف بيسوي بملكته : هههههه هلا ياسر
ياسر : يزن انت بخير
يزن: بسم الله وشفيك
الكل ارتاح لما سمعوه يضحك وصوت ثامر وراء يضحك بعد
ابو يزن سحب الجوال : يزن انت بخير وش صار فيك
يزن عرف ان عزام قالهم: لا تخاف يبه كلنا بخير
ابو يزن: وش يوجعك وش صار وكيف صار
يزن: ولا شي يبه بس صدمنا بصبه وجات سليمه الحمدلله
ايو يزن : الحمدلله على سلامتكم ي ابوي قلت لكم السرعه ما منها فود
يزن: ههههه والله ي يبه اني منزل ماجد وتركت ثامر يسوق عشان سرعته لكن مكتوب ومقدر
ابو ماجد : الحمدلله جت سليمه
يزن: الحمدلله ي عمي والحمدلله على سلامتنا كلنا
ابو تركي : اي والله وثامر كيفه
يزن :هههههه ثامر شكله انجن من رجعنا بس يضحك
عزام:ههههه اقراء عليييه
يزن: ما قصرت بس مافيه فايده
ياسر: اجي امسكه
يزن: اي دخيلك تعال
ياسر: يلا ترا جاي من جد
يزن: تعال
ابو يزن : يلا ي ابوي ما اطول عليك وانتبه لنفسك
يزن: على خشمي
سكر يزن وهو يضحك : ثامر ياسر جاي ترا
ثامر: وش اسوي له
يزن: مالت عليك اي ي راسي زين جاء يخدمنا
ثامر : اي والله ماعاد فيني حيل
دق جوال يزن وكانت امه : هلا يمه ..
ام يزن ببكى: يمه يزن انت بخير
يزن: بخير ي عيني بخير والله بخير لا تبكين
ام يزن: وش اللي صاير معك
يزن: حادث بسيط وانا بخير والله
ام يزن: وماجد وصاحبكم صار لهم شي
يزن: لا يمه كلهم بخير
ام يزن: انتبه يمه على نفسك لا تخوفني عليك وانتبه لصاحبك
يزن: ابشري يمه من عيوني
ام يزن: لو تجي عندنا مو احسن لك
يزن: لا يمه انا بخير وهذا هو ياسر جاي بالطريق لي وثامر عندي والحمدلله
ام يزن : انتبه لنفسك دخيلك وسلم على صاحبك وتحمد له بالسلامه
يزن : ابشري
الكل استلموا يزن اسئله ويتطمنون عليه سكر يزن بعد تعب : اووف ي كثر. مايسألون
ثامر: ماينلامون ولله
يزن: على الطاري الكل يسلمون عليك ويتحمدون لك بالسلامه
ثامر ابتسم : الله يسعدهم
٠٠٠٠
في بيت ابو ماجد جلس عزام وهو يقول : هاه عسى ارتحتوا
ابو ماجد :لا تلومنا الموضوع يخوف
عزام: قلت لكم بخير
ابو ماجد : تعالوا نرجع نتعشى
عزام : انتوا تعشوا انا خلاص بروح تعبت اليوم خلاص
ابو ماجد : ما تعشيت ي عزام
عزام: والله الحمدلله اكرم
ابو يزن: ي بن الحلال اجلس بس بنسهر ونتعشى ونروق
عزام: والله خلاص انتهيت اصلا
ابو ماجد : براحتك
طلع عزام اللي يدق على نور تجهز وراح ينتظرها بالسياره
٠٠٠
عند سمر اللي كانت جايه لبيت جدتها وهي ما درت عن حادث الشباب قابلت نور وهي تضحك: هاه وش صار معك
نور: ولا شي للحين
سمر: وش بك
نور: انتي ومن وين جايه
سمر: من غرفتي ليش
نور: ولا شي
سمر: نور خير
نور : ولا شي بس يزن وماجد صار لهم حادث بس لا تخافين بخير هم
سمر: وشو ماجد صار له شي
نور : لا ي بنت الحلال وهذا هو في بيتهم بخير
سمر دمعت عيونها: انا مستغربه ادق ولا يرد اثاريه مسوي حادث ي عمري عليه
نور استغربت دموع سمر بس نسبتها للحب :لا تخافين والله مافيه شي
تركتها سمر اللي ركضت من الجهه الخلفيه بتروح تشوف ماجد وهي مرعوبه ودموعها متجمعه بعينها
اما نور اللي راحت لعزام وهي خلاص انتهت يومها كان جدا سيء ركبت وهي ساكته ولا نطقت ولا حرف عزام ما دقق بذا الموضوع وتركها لانه هو بعد تعب
٠٠٠
عند سمر اللي ركضت لغرفة ماجد بعد ما تأكدت ان الكل راحوا لبيت الجده ولا عاد فيه احد فتحت الباب وشافته نايم بهدوء سكرت الباب وراحت بسرعه جلست بجنبه وهي تقول بصوت متذبذب : ماااجد ماااجد قوم
مارد ماجد اللي ماكان حاس بأحد حطت سمر يدها على كتفه وهي تهزه بشويش وبصوت باكي : ماااجد
ماجد فتح عباله في حلم رجع سكر عيونه بس فز اول ما حس احد جنبه قال وهو مفجوع : سمر وش فيك
سمر وهي عيونها مغورقه: وش فيك وش صار لك
ماجد اعتدل وهو مفجوع من شكلها ودموعها وصوتها : سمر حبيبي شفيك
سمر تأكدت انها مستحيل تكون بدون ماجد لو صار له شي ممكن تنتهي ماجد صار الاساسي في حياتها ومستعده تكسر كل القواعد عشانه
ماجد : سمر لا تخافين انا بخير حادث بسيط وعدى
سمر ببكى: اي بسيط وانت مكسر
ماجد : والله بخير والله بس يدي مخلوعه بس وجرح براسي بسيطه لا تخافين وانا بخير
سمر : انت لو تشكك شوكه بنجن ماجد دخيلك انتبه لنفسك
دخيلك
ماجد : سمر خلاص هدي مافيه شي يستاهل كل ذا وربي
سمر : والله خفت عليك
ماجد ضحك وهو وده يغير الجو : ماعرفتك لو داري من زمان صكيت بالصبه
سمر : عمى بعينك شايفني
ماجد :ههههههه بيني وبينك زين اني ما اشوفك بهالحاله دايم والا والله يحصلوني أكلتك
سمر وهي تضحك: بلا سماجه وقولي كيف صار الحادث
ماجد ابتسم : زين بحكي عشان بس تاخذين عبره وعظه اني ما انكشم ولا احد يشكك في مهاراتي
سمر: لا والله زين قول قول ي ابو العبر
جلس ماجد يحكي لسمر وهو كل دقيقه تمر يزيد حبها في قلبه مليون مره وسمر اللي كانت خايفه من فقده وتحاول قد ما تقدر تشبع عينها وقلبها فيه كانت علاقاتهم عفويه بس كل واحد يشيل في قلبه لثاني كمية حب بحجم السماء
٠٠٠٠
عند عزام ونور وصلو البيت وهم كلهم ساكتين فتح عزام الباب ودخل دخلت نور وراه بهدوء اتجهت للغرفه ونزلت عبايتها وهي مصره ما تكلمه وقف عزام وهو يناظرها بضيق : وبعدين
نور : وش فيه
عزام: وش صاير معك وش ذا الحال اللي انتي فيه قولي وش في قلبك
نور : ابدا مافيني شي
عزام: نور العناد ماينفع ولا تفكرين انك الليله بتنامين بهالحال
نور : عناد ايش
عزام : لا تستهبلين انا ابي افهم وشو له كل هالعصبيه ..
نور انفجرت : لا ولله ما تدري ليش العصبيه هاه انا اقولك ليش لما تصرخ علي قبال زوجتك الاولى والبنات وكأني بزر هذا شي ما يعصب ولما تنزل وتروح لزوجتك الاولى وتتكلم معها كل هالفتره وهي خمس دقايق وتدخل بروحك من كثر ماهي لازقه فيك هذا شي ما يعصب لما ادق عليك مره ومرتين ومليون ولا ترد هذا شي ما يعصب لما فجاءه تختفي ولا عاد احصلك هذا شي ما يعصب وفوق كل ذا تحط السالفه علي وتقول مريضه وما تركز كل هذا ما يعصب
عزام وهو يحاول يكون هادي قد ما يقدر : اول شي ي نور ارجع واكرر صوتك ما يرتفع علي سوا لوحدنا او او معنا احد طيب وهذا اتوقع تبرير واضح لسببك الاول اللي هو اني اصرخ عليك قبالهم وانا ماصرخت طيب وثاني شي لما نزلت معها نزلت لاني مابي المشاكل توصل لك وانتي مالك شغل وانا ادري ومتأكد ان كل اللي تسويه ساره عشان توصل لك وتوصلك لهالمرحله وتكبر بيني وبينك اما مسألة انك تدقين ولا ارد واختفيت لاني كنت مع ماجد بالمستشفى والشباب ماكنت فاضي وحتى لو اني فاضي مابي ارد عشان ما تكبر السالفه وانا اكره اني اتفاهم بالجوال طيب اما سالفة اني حطيت كل شي عليك هذا كله من عصبيتك انا قلت فعلا انك دايخه من اللي شفتيه بالمول وصل كل شي لك والا باقي فيه شي
نور : ماشاء الله حليتها بسرعه
عزام: نور لا تسوين من الحبه قبه
نور : يعني راضي عن اللي ساره تسويه
عزام : انا مو شعلي بساره ولعنت ساره انا علي منك وانا وضحت كل شي ي نور لا تصيرين كذا وتعقدين الامور اعتقد اني سابق وضحت لك علاقتي فيها فلا تعيدي وتزيدي وافهمي وخليكي عاقلة ..
نور: واذا رجعت بكره
ابتسم عزام وهو يقرب سحبها وضمها بشويش وهو يقول بأذنها : ولو ترجع بكره وبعده وبعده لا تهتمين لها انا ما احب الا انتي ولا يلفتني الا انتي وكل هذا اللي هي تسويه تبي تفرقنا بس وانتي كذا تساعدينها
نور نزلت راسه وهي تضمه : اول شي انا اسفه اني رفعت صوتي بس ارتفع ضغطي تخيل ي عزام لو انك مكاني وش بيصير فيك
ابتعد عزام وهو يجلس وابتسم بغمازاته الحلوه : هههههه انا ممكن اتجنن
نور تخصرت : شفت كيف وتلموني
عزام ضحك: هههههه ما ألومك بس اركدي شوي وتعرفين ان ما في احد يسواك وخليكي واثقة من نفسك وحبي لك ..
نور ضحكت وهي تناظر بيده وكملوا ليلهم سوالف
٠٠٠٠٠
عند ماجد وسمر اللي كانو يسولفون وجوهم عليل
سمر : ماجد جد بسألك عن شي
ماجد وهو مبتسم : وشو ي بيبي
سمر : لا تقولها تكفى ما احبها
ماجد :هههههه انتي اللي بديتي
سمر: خلاص عاد
ماجد : طيب قولي وشو
سمر : تعرف زوجة عزام ام رعد
ماجد : ما اعرفها بس سمعت عنها وش بها
سمر : تخيل اليوم واحنا راجعين من المول جات بكل وقاحه وتدق على عزام الشباك وتطالب برعد تخيل
ماجد : قالنا عزام انا مدري وش تبي بعد كل ذا
سمر: لو تشوف ي ماجد كيف كانت تناظره ولما نزل كلمها كانت شوي وتدخل فيه من قوة ماهي قريبه
ماجد رفع حواجبه : مو من جدك
سمر : وربي
ماجد : وعزام اش سوى
سمر: عزام كان يتكلم وهي كل شوي تقرب
ماجد: عشان كذا نور ولعت
سمر: الله لا يلومها انا لو مكانها اقطعها بأسناني
ماجد ببتسامه: انتي مافيه مثلك
سمر : معلوم ي حبيبي ليه بمين ناوي تقارني
ماجد : بسم الله اشبك
سمر: ولا شي بس قولي تعرف ليش طلقها عزام
ماجد : لا بس اتوقع ما اتفقوا
سمر : ماجد اسمع ترا ما اتفقنا هاذي وراها مصايب يعني اكيد فيه مصيبه
ماجد: واذا كان وراهم مصيبه وش لك فيهم اتركيهم في حالهم واحنا بحالنا
سمر : ايه بس لازم اعرف
ماجد : يالله ي سمر وش تبين
سمر: ما عليك انت خلك وانا اجيب لك كل الخلطه اصبر بس
ماجد كان يناظرها بفجعه مو معقول حب الفضول اللي عندها
سمر: ماعلينا المهم قولي بنأجل الملكه
ماجد : لا ليش نأجلها
سمر: شلون وانت هذا حالك
ماجد : انا كويس كذا ولا فيني شي ولا بنأجل ولا شي انا لو بيدي اسويها اليوم ما قصرت
سمر: بس بتتعب
ماجد :انا لو اني مشلول بسويها بسويها ي بنت الحلال خلاص طلعت روحي
سمر : زين زين اشتريت الملابس
ماجد : لا
سمر : اييه زييين زييين
ماجد : وش فيك
سمر: لا تشتري وبس
ماجد : ليش
سمر: بجيبها انا بس هاه لا تشتري
ماجد : سمر وش بتسوين
سمر ضحكت وهي توقف رجعت ماجد ينسدح وهي تقول : هههههه ما بسوي شي يخوف ارتاح انت
ماجد : والله انتي كل شي تسوينه
سمر: نام بس
طلعت سمر وهي تضحك وتركته اما ماجد اللي تنهد وهو مبتسم : يالله ي ذا السمر مجنونه ..
من بكره الصبح في بيت الجده الكل كان مجتمع ووناسه وفطور وكل شي كان ماجد ويزن بالنص والكل حلوهم والجو رهيب
ياسر جاء وهو بيده صحن كنافه جلس بجنب ماجد وهو يقول وهو يعطيه لقمه : والله المفروض اللي يعطيك يزن مو انا بس مثلك شايف خملان مثلك عشان كذا بضطر انا بجلالة قدري اعطيك بس عشان يدك والا انت ما تنعطى وجه
ماجد : اسمع عاد احترم نفسك والا انقلع ذليتنا ياخي ذليتنا
يزن: ماعليك منه مجبور انه يخدمنا
ياسر: ايه انت بس خلك على خط الدفاع لكن يسرني ويسعدني اني اقولك ي ماجد ان كل ذا مو عشان سواد عيونك لا عشان مدام المستقبل
ابو ماجد : انت وراء ما تشتغل وانت ساكت قرقر ٢٤ ساعه
ياسر : والله ناس ما تقدر هذا وانا جالس اعطي ولدك ومتكفل ومتحفل فيه لكن ماعليه مثل ماقال القايل أعمل خير وارميه بالبحر
تركي وهو جالس بالزوايه : شوف من ناحية خير خير وجزاك الله ألف خير بس ي حبيبي ترا المنه مب زينه والله سويت شي انكتم عليه
ابو يزن: وهو صادق الحين عشان اعطيته كم ملعقه ذليته
ياسر قام وهو ياخذ الصحن وحطه على الطاوله : والله عاد اكل والا عمري ما اكل كليتوني بقشوري
ابو ماجد : خلنا من ذا كله متى بتصير رجال وتشتغل
ياسر : الحين ما اصير رجال لما ما اشتغل
ابو تركي : ايه انت قاضي ماعندك ولا شغله
الجده: وهم صادقين ما عمرك كلفت نفسك شي الا مناقز بين الطيارات احد قايلك ان بيتنا فندق اعتدل وشوف نفسك
ياسر: بسم الله الرحمن الرحيم شفيكم علي وش سويت انا
ماجد : عشان ثاني مره تبلع لسانك وتسكت
ياسر : ي شيخ بالناقص منك
تركي:ههههههه اجلس بس باقي ما شفت شي
الجده: ليه وش سوينا لك عشان تقول ما شفت شي
تركي : ولا شي ي حبي
ابو تركي : انت وش بتسوي بخطبتك
تركي : لسى باقي ما عطوني خبر
ابو ماجد : زين الله يوفقك الا ي ماجد انا اقول خلونا نأجل الملكه
ماجد صرخ لا إرادي :لااااا
الكل انفجع تركي رمى عليه الملعقه : عمى بعينك وش فيك
ابو ماجد : شبلاك تصارخ
يزن بضحك: مايبي الملكه تتأجل
ابو تركي : وليش
ابو يزن: ان شاء الله ناوي تملك بيدك المخلوعه
ماجد : ايوه وش فيها هااه وهذاك قلتها مخلوعه مو مشلولة وبعدين خير البر عاجله والموضوع كله ملكه
الجده: وش انت مستعجل عليه ابي افهم طاير وكإنك اذا ما ملكت بدري بتطير البنت هذا هي مجنونة مثلك محد بيأخذها غيرك
تركي:هههههه نتف جامد ي وجه الله
ياسر : هههههه تستاهل
ماجد : وش بلاك ي جده علي ما سويت لك شي وبعدين المفروض انكم تفرحون ما تقولون بنأجل لكن من النهايه تأجيل ما انا بمأجل لو املك مشنوق من الاخر
ابو تركي : والله اني كنت ادعي في كل صلاه ان سمر تتزوج عاقل وتعقل معه لكن مدري وش صار
تركي بضحك:ههههههه شكلك ما انت متوضي يبه
يزن: على الارجح تركي صادق ههههه
ماجد : اقول استريحوا انا شزيني ملح وقبله
سمر كانت تضحك وهي ودها تشاركهم بس تصنعها للحياء يمنعها
ابو تركي : والله مدري اللي تشوفونه سووه
تركي : ياخي املكوا له وريحونا وريحوه
ابو ماجد : زين زين الله يتمم على خير
ابو يزن : انا بروح الشركه وانتم يلا كل واحد لشغله
ابو تركي : خذني معك
ابو ماجد : يلا يلا كلنا وانت يا ماجد لغرفتك لا يمين ولا يسار ماني ناقص مصايب
ماجد : من عيوني ي عيوني
تركي : من زين عيونك والله لو هي عيوني
ماجد : لا عاد ي شيخ استريح انا عيوني ملونين
تركي : ي شيخ انقلع ملونين بس مو حلوين
ماجد : اللي تبيه ي تركي اللي تبيه
تركي انصدم انه ما رد : الله الهادي
طلعوا كل الرجال لدواماتهم والحريم بدت جلستهم وحشهم اما سمر اللي شالت نفسها وراحت تنام لانها مواصله و ماجد اللي مات وهو يحاول فيها تجي تسولف معه لما ينام بس سحبت عليه
....
في بيت عزام صحى على صوت المنبه انقلب وهو يتأفف شاف الساعه وفز اول ماشافها تذكر انه بيداوم مع تركي وقف واتجه للحمام تروش وحلق وكل شي واستعد ليوم جديد ووقف وهو يمشط شعره لف لنور يصحيها : نور نووور
نور : همممم
عزام : ترا رايح الدوام طيب
نور : ما فطرت
عزام: مالي نفس بس قلت ابلغك قبل اروح
نور: زين
لفوا على صوت الجرس وراح عزام يشوف مين ونور قامت غسلت ورتبت نفسها وطلعت تشوف مين على الباب
عند عزام اللي وقف بصدمه من اللي شافه كان بوكيه ورد كبير وهديه لكن لف بصدمه لما شاف ساره واقفه بعيد وتقدمت وهي تدخل :وااااو بيتكم مره جميل يليق لك عزو
عزام انصدم ما توقع انها بتجي للبيت : وش جابك
ساره قربت وهي تقول : بصراحه ي عزام انا اسفه على كل شي صار وانا جايه اقولك ان المسامح كريم ابيك تسامحني ونفتح مع بعض صفحه جديده ي عزام انا مستعده احبك عمري كله بس ترجع لي وما يحتاج اعلمك عن مدى حبي لانه مبين من عيوني
تو عزام بيتكلم بس سكته صرخت نور اللي فقدت عقلها من اللي شافته وجات ركض وهي تنط على ساره وسحبتها بشعرها وهي تصرخ: علمت العصي بجنابك يا قليلة الادب مين انتي عشان تجين بييتي وتتكلمين بذا الطريقه مع زوجي هااااه
ساره كانت تصارخ وعزام اللي حاول قد مايقدر انه يبعدها بس نور نزلت عليها قوه مو طبيعيه وهي شاده بشعر ساره وتعض فيها وتسحب فيها وتضربها وهي تصارخ عليها
عزام كاان مصدوم من نور وفي نفس الوقت بردت قلبه وغير كذا فيه ضحكه على شكلها
سحبت نور ساره وهي ترميها عند الباب بصراخ : لما تفكرين تجين هنا لازم تفكرين وش بيصير فيك اقسم بالله لو تفكرين تعيدينها وتعتبين باب العماره لاينزل عليك غضب ربك بساعه سامعه
اخذت الورد وهي تدعس عليه ورمت عليها هديتها ووردتها وهي ترفسها وساره مصدومه مو معقوله هالنتفه يطلع كل ذا منها
وقفت وهي تبكي وماسكه شعرها اللي تنتف :عزام يرضيك اللي تسويه
عزام ما قدر يرد لان نور انقضت عليها من جديد : لااا انتي باقي جلدك يحكك تعالي اوريك كيف يرضى عزام
ركضت ساره وهي تصرخ وعزام ركض ومسك نور وهو منفجر ضحك دخلها بالقوه والبيت وهو يضحك : هههههههه مو معقول اللي صار مو معقول
نور وهي تضربه على يده :اتركني اعجبك اللي صار هاه اعجبك مره استانست
عزام مارد وهو يضحك: يمه ي ربي كيف زبطت معك بس من وين جبتي كل هالقوه قسم بالله ماقدرت لك وش صار عليك
نور بصراخ : لا والله عساه اعجبك التلزق والحب والورد
عزام :هههههه يعني كان ظريف
نور: عزااااام لا تستهبل
عزام بالقوه وقف ضحك : وش بك وش قلت انا الحين
نور: عزام اقسم بالله لو ترجع لااذبحها لو انك مخليني اوقفها عند حدها من زمان ما كان تجرأت وجات لهنا ولا جايبه ورد وبطيخ معها ليش انا رجل كرسي بهالبيت والله ولله لأنتفها
عزام :هههههه هوب هووب هدي دخيلك ما تستاهل كل ذا
نور: وش اللي ما تستاهل وش اللي ما تستاهل مو من جدك عزام الهانم جات هنا وتتلزق فيك وخمس دقايق وتنط تبوسك وتقول ماتستاهل
عزام ضحك وهو يقرب ويضمها : الله يهب لك الرضا ي نور ماذا عبيتي بي
نور فغرت:وشو
ضحك عزام وهو مروق للاخر: ماعليك بس تعالي تعالي ضميني انتي واتركيها تولي
نور وهي تضربه على صدره :مو وقتك ي عزام ابعد وقولي وش قلت من قبل شوي شغل الشعوذه هذا فكني منه
ضحك عزام وقال: قلت الله يعطيك الرضا ي نور يعني يرضى عليك وش سويتي فيني بس
نور: وهذا هي شزينها ليش قلبتها بكل الكلام اللي من شوي
ابتسم عزام: عشان تماشى مع شياطينك اللي قامت
نور : قسم بالله انك ثقيل دم وخر بس الموضوع ترا جدي اذا فكرت
عزام رفع يده بأستسلام: انا افوض لك كامل الحريه في التعامل معها كل ما جات اجلديها رنيها رن مع اني ما اعتقد انها بتعيدها
نور : وباقي ما انشفى غلي فيها
عزام مسك كفوفها وهو يبوسها :الله يسلم يدينك صراحه بردتي قلبي فيها لكن بسألك
نور وقفت وهي تشمر : وشو
عزام :هههههه على طول تقمصت الدور
نور:هههههه والله قهر
عزام : يحق لك صراحه
نور: وشو سؤالك
عزام: اللي صار كله ذا وش دافعه يعني وش اللي دفعك تسوينه
نور : هههههه والله م اكذب عليك الدافع هو حبي غيرتي تخيل تخيل تجي وتلاقي طليقي يتلزق فيني وجايب ورد وهدايا وش بتسوي فيه
عزام :موت من دون كلام
نور: عليك نور هذا الكلام
عزام : اي عشان كذا اقول لك الحريه
نور: لا توصي حريص
لف عزام وهو يضحك اخذ اغراضه وطلع وهو مبسوط على الاخر
اما نور اللي بعد ما لعنت خير خير ساره ارتاحت نفسيا ورجعت تنام وخصوصا ان عزام ما عصب ولا زعل
...
عند ثامر اللي على عزم على اساس يروح ويملك ملكه بسيطه مجرد كتب كتاب وشبكه بس التكلف بيخليه في العرس
رد عليه عزام : ي هلا ي ثامر هلا
ثامر: اهلين فيك وش ذا الروقان وش ذا الرضا
عزام: هههههه صارت معي شغله ي ثامر ابد مو طبيعيه
ثامر: وشو
عزام : اقولك اذا تقابلنا قول وش عندك انت
ثامر: اقولك وش رايك نروح ونملك الليله
عزام: اشبك اعداك ماجد
ثامر: لا بس يعني عشان ما نماطل خلاص يعني
عزام: زين زين خليني اكلم ابو ضاري وناخذ موعد اصلا بروح لهم انا عشان اشوفهم
ثامر: ايوه دخيلك وبلغني وش يصير معك
عزام : زين ابشر تبي شي ثاني
ثامر: انت مداوم
عزام: ايوه
ثامر : زين اصلا كنت بوصيك على تركي نفسيته زباله ترا
عزام : لا توصي اصلا ما داومت الا عشانه
ثامر: زين يلا فمان الله
عزام: فمان الله ..
سكر عزام منه واتصل على ماجد بيتطمن عليه بس مارد ماجد سكر واخذ اغراضه ونزل للمستشفى ويحاول انه ما يواجه اي شي ممكن يوتره او يضايقه
٠٠٠
عند تركي كان ماسك دوام بين حالات المرضى ومن مريض لمريض وهو يحاول يتجنب الاحتكاك بأي شي ممكن يزعجه او يوتره خلص اخر حاله وطلع بضيق جلس في مكانه المعتاد وبيده قهوته ويفكر ( اوف ي تركي وش سويت بنفسك افرض هاذي اخت محمد تطلع مثل غلا او انها ترفضك في النهايه هي صغيره وقبالها مستقبل اااااخ ي ربي والله خايف اني حكمت على مشاعري ونفسي بالانغلاق وقتها مقدر اتحرر مهما وصل معي من المشاكل ولا اقدر اضيع ثقة محمد آخ ي ربي الله يكتب اللي فيه الخيره ويجعلها بداية خير ونهاية شر ) حس بأحد وراه يهمس له بصوت ضخم وغريب : هاه على مين ناوي مين اللي وقع عليه مصيره وقررت تقتله مثل جدك
التفت تركي بسرعه وهو مستعد انه يتهاوش معه بس جمد اول ماشاف عزام وزفر بضيق : وبعدين معك قسم نكدت علي
ضحك عزام وجلس : ماذا بك فاغر هنيه
تركي : وشو وش تقول انت
عزام: وش فيك سرحان هنا وش بك
تركي : ابد خلصت وجلست متى جيت انت
عزام : من شوي وصلت وش صار معك عسى بس يومك فل
تركي: للحين فل
عزام : الحمدلله
تركي: تأخرت وش صار معك
عزام : الله ي تركي لو تعرف وش اللي صار معي لكن الحين اجلس اشوف
تركي : وش صار
ضحك عزام وجلس يسولف له عن اللي صار وتركي طول الوقت يضحك : ياخي من حقها وربي الله لا يلومها وش قوة العين هاذي
عزام : يارجل قوة عين بشكل طلعت والله وهي معلنه الطوارئ
تركي : هههههه معها حق والله
عزام : المهم هلم معايا بنفلح بسرعه نخلص شغلنا احسن ما تيلس منقعر هنيه تعيت مذا تعبى . .
تركي ارمش بسرعه وهو يحاول يلقط كلمه يفهمها ماقدر وقال بصدمه: وش قلت وش تخربط انت عزام اتكلم زين مو فاهم حاجه
عزام : هههههه يالله اقول تعال معي بنروح نخلص شغلنا بسرعه احسن من انك تجلس منسدح هنا ماتدري وش تسوي
تركي : كل هالطلاسم يعني هالكلام
عزام: ههههه ايوه
تركي مشى معاه: من وين جايبه
عزام : امي هذا كلامها عشان كذا لما اروق احب احكي فيه يعجبني
تركي : جنوبي
عزام: ايوه
تركي :هههه زين زين اجل عشان تعلمني لان محمد اللي خطبت اخته جنوبي مستقر هنا تلمزمي بعدين عشان اعرف وش تقول
ضحك عزام : على نخرتي ي تركش تعال بس
راح عزام وتركي وكملوا يومهم بسعاده ولا احد قدر يضايقهم لانهم في النهايه انتشر انهم هم اللي سلموا جابر لشرطة
٠٠٠٠
عند أماني كانت جالسه تفطر مع امها وهي جاهزه تروح لجامعتها
ام محمد : أماني يمه فكرتي بالموضوع اللي قالك محمد
أماني نزلت كوب الشاهي وهي منحرجه : فكرت يمه استخرت امس بالليل وتبين الصراحه ارتحت لكن خايفه يمنعني من دراستي وانت تعرفين اني احب الطب
ام محمد : لا يمه لا ما راح يمنعك بنحط عليه شرط كله الا دراستك وانتي ما تعبتي كل هالسنين عشان يمنعك اكلم محمد واقوله والله يكتب اللي فيه الخير
قطع الكلام دخول محمد اللي مستحيل يكمل يومه بدون ما يشوف امه : سلاااام
الكل :عليكم السلام
ام محمد : الطيب عند ذكره تونا نتكلم فيك
محمد : عسى ماهي مؤامره
ام محمد :هههههه لا يمه ارتاح ما نتأمر عليك احنا
محمد : امري يمه وش كنتوا تقولون
ام محمد : والله يمه كنا نتكلم بموضوع تركي
محمد : الحمدلله اني جيت قولوا لي وش قررتوا
ام محمد تتكلم عن اماني اللي ميته إحراج : اماني ي امي استخارت وشافت انها ارتاحت لتركي بس انها متخوفه انه يمنعها من دراستها وانت عارف وش كثر هي تحب انها تصير دكتوره
محمد ابتسم : الحمدلله الحمدلله دامها موافقه وماعندها مشكله الا بالدراسه والقبول هاذي محلوله تركي دكتور ويحب الطب واكيد انه بيساعدك ويوقف معك اذا على كذا لا تخافين
اماني ابتسمت بنعومه وهي تقوم : انا تأخرت
محمد :الله معك ي عروسه
نزلت اماني باست راس امها وباست خد محمد وطلعت وهي فيها شعور فرحه وناسه تحس ان حياتها أنضاف لها شي حلو شي جديد تحس انها استجدت فيها الطاقه
محمد وقف وهو يقول : دامها وافقت خليني اروح لتركي وابشره
ام محمد : الله معك ي امي ويفتح دربك ويسعدك
محمد طلع وهو متوجه للمستشفى وهو مبسوط لأماني وتركي
٠
٠
عند نور كانت حايسه بنفسها وهي ما تدري اش تلبش في الملكه طلعت كل الملابس وهي محتاره رمتها على السرير وسحبت جوالها واتصلت على يارا : سلام يارا
يارا: اهلين ي نور كيفك وحشتيني
نور: تمام وانتوا بعد كيفكم
يارا: الحمدلله كيف عزام العيال هنا مجننيني كل يوم يقولون بنروح لعمو عزام
نور: ههههه يمه والله وحشوني تعالوا عندي طيب فاضيه ماعندي شي
يارا : وين الظهر
نور: هههههه اي عادي تعالي ذوقي طبخي بسوي لك غدا تاكلين اصابعك معاه
يارا: لا ي بنت فشله يجي عزام يحصلني مسنتره عندك
نور: ي بنتي عادي وتعالي اصلا شوفي بيتي الجديد وابيك تساعديني وش ألبس بالملكه طلعت اكثر من فستان وماني عارفه اش البس وبعدين عزام مابيجي الا ٣ ٣ ونص
يارا : والله ماني عارفه خليني اشوف احمد وارد لك
نور: ايوه دخيلك تعالي بس
يارا : زين خليني اكلمه
نور : يلا
سكرت نور وراحت تركض بحماس تسوي قهوه وحلا وتجهز الاغراض وهي مبسوطه
٠٠٠٠
عند تركي خلص كل شغله وابتسم وهو يرد على محمد : هلا محمد
محمد : هلابك كيفك اليوم
تركي : عال العال كيفك انت
محمد : كويس وينك مداوم
تركي : ايوه ليش
محمد : زين تعال انا هذاني عند الكفتيريا
تركي : وش فيه
محمد : ولا شي تعال
سكر تركي واسرع للكفتيريا شاف محمد واقف وبيده شاهي اتجه له :محمد وش صاير
محمد : ولا شي اشبك خايف
تركي : خوفتني انت
محمد : ارتاح مافيه شي تعال نجلس هنا
جلسوا وتركي مرتبك لف محمد : انا جيت بقولك ان أماني وافقت ومرحبا زوج اخت واخو
تركي ابتسم بفرح : الله يبشرك بالخير والله يقدرني اكون قد الثقه
محمد ابتسم وهو يطبطب على يد تركي : اللهم امين ويوفقكم ويبلغنا فيكم لكن ي تركي بقولك شغله. واتوقع انها ما بتسبب مشاكل عندك
تركي : امر قول وش فيه
محمد : أماني طالبة طب وتحب هالمهنه ومستحيل تتنازل عنها وباقي لها ٣ سنوات بالطب ولها شرط انها تكمل عندك اعتراض
تركي ضحك :هههههه الله يهديك ي محمد جمدت قلبي وش ذا السؤال اكيد اني برضا لا تنسى اني دكتور واحب المهنه وبساعدها بعيوني بعد اذا هذا موضوعك ارقد وامن
محمد :هههههه قلت اعرض عليك مهما كان ومادام كذا الله معك ويوفقك ومتى ما حبيت تملك دق علي وابشر
تركي : بيني وبينك بعد يومين في ملكة يزن وماجد بالعايله كنت افكر لو نخليها معها اذا فيه مجال طبعا
محمد : ماشاء الله الله يوفقهم ماجد وش اخباره سمعت انه تاب واعتدل
تركي : اي والله الحمدلله تاب وتاب الله عليه وهذا هو بيتزوج اختي ويزن بيتزوج بنت عمي سعود
محمد : عمك سعود عنده عيال غير ماجد
تركي : ايه عنده ولدين وبنت وكلهم كبار
محمد : كيف كذا اخبره ماعنده احد
تركي: سالفه عريضه طويله احكي لك بعدين
محمد: زين زين اذا على الملكه تعال الليله انت والاهل عندنا خلنا نقول تعارف وتجديد علاقات ومنها بعد تشوف البنت وتشوفك وتتخذون قرار بالملكه واللي تبون
تركي ابتسم برضا : ان شاء الله
محمد :زين انا بترخص اروح اشوف شغلي
جاء عزام من بعيد ينادي لتركي : تركش
تركي لف له : هاه تعال تعال
محمد : مين ذا
تركي : هذا عزام اخو ماجد الكبير
محمد : اها دكتور
تركي : ايوه
عزام ابتسم: سلام
محمد وتركي :عليكم السلام
تركي : عزام هذا محمد كلمتكم عنه قبل
محمد ببتسامه : اهلا فيك
عزام : يا هلا والله تشرفت بمعرفتك
محمد : لي الشرف كيفك وش اخبارك
عزام : الحمدلله وانت
محمد : تمام والله يلا عن اذنكم بروح
عزام: جالسين
محمد : والله عندي شغل
عزام: الله يستر عليك
محمد : وياك يلا تبون شي
تركي وعزام : سلامتك
راح محمد واول ما طلع لف تركي على عزام وضمه وهو يقول : وافقوا ي عزو وافقوا
عزام: ههههه مبروك الله يوفقك
تركي: اسمع اليوم كل العايله بنروح لهم ونضبط امورنا معهم وانت بتجي
عزام: زين المهم تجي معي نروح بيت ابو ضاري نشقر عليهم ونشوف وضعهم
تركي : ودي لكن والله وراي شغل
عزام: زين بروح انا وثامر تبي شي
تركي : فمان الله
افترقوا تركي راح للبيت عشان يبلغهم بالزياره وعزام راح هو وثامر لبيت ابو ضاري
٠٠٠٠
عند نور اتصلت عليها يارا وقالت انها جايه وابتدت نور تجهز ضيافتها بحماس دخلت لبست وتجهزت رتبت حوستها بالغرفه وراحت لثوب عزام اللي كان مرمي على الارض شالته وهي تشمه ببتسامه وريحة عطره المميزه حست في جيبه شي دخلت يدها بجيبه طلعت كل شي فيه كان اغراض كثير منها مفتاح ومنها اوراق ومنها محفظه ومنها بطاقات ومنها مسبحه واشياء كثير جلست نور تفتش وهي مبتسمه شافت فلاش استغربت وش ممكن يكون راحت للابتوبها دخلت الفلاش فتحته وهي تتوقعه اشياء وذكريات لعزام كانت مبتسمه بس قطبت حواجبها وهي تشوف محادثات واشياء ابتدت تتصفحها وهي كل ما دخلت شي تنصدم اكثر بعدت اللابتوب بصدمه وهي مو مستوعبه اللي شايفته مو معقوله ان ضاري كان يحبها وأذى عزام عشانها وعشان كذا ضاري اذا شافها يصارخ ما حست الا بدموعها مغرقه وجهها طلعت الفلاشه ورجعتها بصدمه وهي مو مستوعبه اللي صار قفلت اللابتوب وهي تمسح دموعها وقفت بضيق ( يالله ي ربي اش اسوي بنفسي يالله مو معقوله اني فرقت بين اصحاب وجننت واحد والثاني على الطريق ي الله )
فزت على صوت الباب عدلت شكلها وهي تحاول تهدي وتتجاهل اللي صار ابتسمت بهدوء وفتحت الباب شافت يارا وعيالها وضمتها وهي تسلم عليها نزلت على خالد وماجد وهي تبوسهم : وحشتوني
خالد: وانتي وحشتيني ي خاله وينه عمو عزام
ماجد : خاله نور ماما قالت بنحصل عمو هنا
نور : عمو بيجي شوي كذا بس اشوفكم ما تبوني
ماجد :الا نبيك خاله
نور: ادخلو ادخلو
دخلوا وجلست نور تفرجهم على شقتها
يارا: بصراحه ابداع ما قصروا فيها الشباب
نور: مره استانست عليها ما تصدقين قد ايش فرحت حتى عزام اعجبته حيل
يارا: الله يهنيكم
نور: امين تعالي نتقهوى
جلسوا يتقهوون وانبسطت نور مره على جيتهم ونست سالفة ضاري
٠٠٠
عند عزام وثامر وصلو بيت ابو ضاري وعزام عادي بلبسه تبع المستشفى وثامر في الدقيقه يضبط شماغه مليون مره
عزام : يوه ي ثااامر عجل ي ابن الحلال صرت زبده من الحر
ثامر: عزام بلا سماجه خلني اكشخ تخيل ادخل عليهم مبهذل
عزام: تراك جاي بالظهر ماحد بيشوفك من الحر اسألني انا
ثامر: معليش خلاص بخلص
خلص ثامر بعد طلعة الروح ودق الباب وعزام صار احمر من الحر فتح سامي الباب وبفرح: عزااام
نزل عزام يضمه : كيفك ي بطل
سامي : الحمدلله
عزام : وين ضاري
سامي : ضاري نايم تعبان
عزام بفجعه : اشبه
سامي : راسه يوجعه
دخل عزام ودخل ثامر وراه جاء ابو ضاري : هلا ي عزام
عزام اقبل يسلم عليه : كيفك ي عمي
ابو ضاري : الحمدلله وانت
عزام: كويس وين ضاري وش فيه
ابو ضاري : مافيه شي تطمن بس كان يشتكي من صداع براسه واخذ فيفادول ونام
عزام : اشوى انخلعت عليه
ابو ضاري : لا لا مافيه الا العافيه تعال بس
عزام لف لثامر اللي واقف وهو منحرج: تعال ثامر عمي هذا ثامر خطيب ريما
ابو ضاري ابتسم له : هلا ي ابوي تفضل تفضل
ثامر: زاد فضلك ي عمي
اقبل عليه ثامر وهو يسلم عليه دخلو المجلس وجلسوا
عزام: انا اسف ي عمي ادري مو وقت زياره بس والله ما عندنا وقت
ابو ضاري : لا ي ابوي البيت بيتكم كيفك ي ثامر
ثامر: الحمدلله انت كيفك
ابو ضاري : الحمدلله وش مسوي كيف الدنيا بك
ثامر: الحمدلله ماشيه كويسه
عزام : والله ي عمي احنا جايين وناوين نحدد يوم الملكه اللي انتم ودكم فيه
ابو ضاري : والله ي ابوي الشور شور ثامر اللي يبي حنا نسويه
ثامر: لا والله محشوم ي عمي اللي تبيه انت يصير
ابو ضاري ببتسامه: انا ماعندي اعتراض لو اليوم
عزام: مادام كذا خلوني انا اقرر انتم بتجلسون تعازمون
ابو ضاري :ههههه زين البنت اختك وانت ادرى
عزام : اي والله المهم شرايكم بكره الليل
ثامر: على رايك
ابو ضاري : اي والله على رايك
عزام: توكلنا على الله
ابو ضاري : ونعم التوكل ي ابوي
انتبهوا لدقة الباب وقف عزام وهو ياخذ القهوه من ريما وهو صاد جابها وابتدى يصبها وهم يسولفون ويضحكون وسعوا صدر ابو ضاري اللي حب ثامر وثامر حبه
اما ريما اللي كانت تناظرهم من الشباك وهي مفتونه بثامر اللي حسته منقذ لها من هالحياه
٠٠٠٠
عند تركي اللي وصل القصر بفرحه نزل وهو مبتسم اتجه لبيت الجده وهو شبه يركض فتح الباب وطلع فوق بحماس الدنيا دق الباب : ي هوه انا تركي فيه احد غريب
الكل جوى التفتوا لغلا اللي غطت وبعدها قالوا : تعال ي تركي
دخل تركي واللي انتبه لغلا وحاول انه يثبت ابتسامه رغم وجع قلبه وقال: من حظي انكم مجتمعين
الجده: وش فيك
تركي : اول شي ابوي واعمامي جو من الشركات والا لا
ام تركي: لا ما جوا على وصول ليش
تركي :زين زين بما انكم كلكم ي الحريم فيه اسمعوني كويس كلكم اكيد تعرفون ام محمد اللي انا خطبت من عندهم
غلا انصدمت ( مو معقوله خطب امداه يفكر يخطب معقوله كان فراقي سهل )
ام تركي : وش فيهم ي تركي
تركي : أماني وافقت على الخطبه ومحمد اليوم مسوي جمعه او عشاء في بيتهم تعارف يعني او تجديد علاقات زي ما تسمونها المهم انكم كلكم بتحضرون وتتعرفون عليهم واحتمال كبير تكون ملكتي مع يزن وماجد فهمتوا
الجده تزغرط :كلووووووش مبروك ي امي تستاهل كل خير ي حبيبي
تركي قرب وهو يبوسها : الله يبارك فيك ي عيون تركي
ام تركي : مبروك يمه
راح لها تركي اللي كان باين مبسوط بس ( داخليا يتعذب بوجود غلا) باس راسها :الله يبارك فيك
الكل :مبروك تركي الله يتمم لك
تركي : يبارك فيكم ويبلغكم بأحبابكم
ام تركي : وش بتسوي طيب
تركي : ولا شي كلكم تجهزون كذا وترتبون تصيرون شحلوكم العشاء نروح كلنا
الجده: نروح لناس كذا وش نقول لهم
تركي : سولفوا خذوا واعطوا تذكروا الماضي سوو اللي تبون
ام تركي : والملكه
تركي : مالكم شغل بشي الملكه بتفاهم انا واماني عليها
ام يزن:ههههه ماشاء الله زبطت كل شي وقضيت
سميه : جلست مع ماجد شكلك انعديت
تركي: هههههه شكله على الطاري هو وينه ..
ام عزام: نايم
تركي : خلوني اروح اصحيه واخبره
ام تركي : تركي نأخذ معانا شي
تركي : ايه اكيد خذو شي حق الزياره وقولوا ليارا تجي معكم
الجده: زين زين .
حنان وغلا كانو مصدومين من تركي وكل اللي صار معقوله كان يبي الفكه وقفوا وطلعوا بدون صوت اما الباقين انتشروا بحماس وفرح وكل واحد يجهز نفسه
٠٠٠٠
عند ماجد اللي كان نايم نومه اليمه صحى على صراخ تركي فز بخوف وهو يتمسك باللحاف : وش فيك
تركي : ههههه قوم قوم علم الصبح ايش البارحه قلنا
ماجد رفسه وطاح تركي : جايي تصارخ عشان تسيمج على راسي
تركي:الله ياخذك ي غبي تبي تكسرني
ماجد: تستاهل خير وش فيك
تركي: ايي اوجعتني المهم قوم وافقوا علي والليل رايحين لهم زياره واحتمال كبير املك معكم
ماجد بفغره: مين هم
تركي بطرف عيين: اماني اخت محمد زوجة المستقبل
ماجد : ايوه مبروك
تركي : يبارك فيك قوم يلا معي بنروح الحلاق بنكشخ وتضبط
ماجد : كم الساعه
تركي :٣
ماجد :ايش حلاق بهالقوايل ما تحس انت اعنبوا دارك ضب انت ضب
تركي: الله يجعل حنجرتك بالفك ي ماجد لا تصيح لا تصيح على ما تجهز انت وعلى ما نصلي وعلى ما نلف وعلى ماندور بتجي الساعه ٥ كذا ونروح اصلا مافيه وقت العشاء ماشين قوم يلا
ماجد : يالله ي ربي انا ما سويتها
تركي : اقول لا تسوي نفسك مدرك كل شي يعني كنت صايع ومابقيت علي شي ما سويته انكتم وقوم
ماجد: والله لو اني ما بتزوج اختك لشوتك شوت الكلاب بس للاسف
تركي : معليش معليش بعديها هالمره بس قوم عجل
ماجد : خلاص انقلع فهمت
طلع تركي وترك ماجد يتمغط ويتلوى شوي لما سمع الاذان وقام يجهز
٠٠٠
عند نور اللي كانت تقيس كل الملابس عشان تختار شي للملكه
يارا: كلهم حلوين احترت
نور: يالله وش اسوي الحين
يارا : مدري بس سوي قرعه احسن حل
نور : يالله ما احب اوصل لهالمرحله
سمعت صوت الباب : اكيد عزام
يارا: يوه قولي له اني فيه لا يدرعم
راحت نور وهي تركض بفستانها : جيت
عزام كان يسلم على ماجد وخالد ويسولف معهم رفع راسه لما سمع صوت ريم لا شعوريا تنح ودقها تصفيرة اعجاب وقف وترك العيال وراح لنور: اوب اوب اوب وش ذا الزين
نور عضت شفايفها وغمضت عيونها وهي تقول : اشش يارا فيه والعيال فيه مو وقته
عزام بهيمان: وقت ايش اجل
نور: وقت الغداء ههههه اصبر شوي تطلع يارا من الغرفه وتدخل تبدل عشان تتغداء
عزام : اخ ي قلبي
نور :ههههه عزام ترا خالد وماجد مره مشتاقين لك مره لدرجه انهم اول ما جو سحبوا علي ويدورون عليك
لف عزام وهو يضحك : اي جعلني فدا ابدل بس وارجع لهم
ماجد : عمو عزام عندك بلاستيشن
عزام: لا والله
خالد: اش عندك طيب
عزام بتفكير. عندي لعبه احلى اصبروا شوي
نور راحت ليارا وطلعتها للغرفه الثانيه ورجعت: عزو يلا
اتجهه عزام للغرفه ببتسامه دخل ودخلت نور وراه وهي تعطيه ملابسه : عزام ابيك تساعدني بشغله
لف عزام وهو ينزل تيشيرته :وشو
نور: ابي اختار فستان للملكه ومحتاره حتى يارا احتارت معي
عزام : وينها طيب
نور : هاذي هي
عزام لف يناظرها وقال : نظريا كلها حلوه بس ماشفتها عليك عشان اختار
نور: زين اجل بتجلس معي عشان تقول اش رايك
عزام: ايوه ايوه وباقي عندك اليوم فيه عزيمه عند الناس اللي خطب منهم تركي وكلنا معزومين بنروح
نور: لااااا
عزام: شفيك
نور: برجع احوس بالملابس
عزام : لا تفكرين اساعدك انا بس الحين روحي لضيوفك لا تخلينهم وحدهم
نور: زين
دخل وسكر الباب عليه اما نور رجعت ليارا اللي كانت تكلم امها وقالت لها عن العزيمه وانربشت يارا
نور: اشبك
يارا: ابي اروح البيت في عزيمه عند اهل خطيبة تركي وانا مادري اش البس مدري اذا عندي شي اصلا او لا
نور: يالله طيب اجلسي شوي لما يجلسون العيال مع عزام
يارا: والله صعبه ي دوب الحق والعيال اصلا هم المشكله باقي ملابسهم واغراضهم
نور: ما شبعت منكم
يارا: يا بنتي الايام كثير
نور: عزام يبيهم طيب اتركيهم وعزام يجيبهم
يارا : فشله والله ما اقدر
عجزت نور في يارا وراحت يارا طلع عزام وهو يقول :نور طريق
نور: تعال مافيه احد
عزام: اشبك وين الناس
نور: راحو
عزام :كيف يعني توني كنت بجلس مع العيال
نور: لما عرفت بالعزيمه وهي مو مجهزه شي وبتروح تجهز مامعاها وقت
عزام: بدري تونا ٣ ونص
نور: عجزت فيها تعال بس اتغداء
عزام : خساره وربي كان تركت عيالها وانا ارجعهم
نور: ما رضت تقول فشله
عزام: الله يسامحها بس فشلت ايش
نور: ماعليه الايام كثير
عزام : يلا على قولك
نزلت نور الغداء لعزام ووقفت عزام: اشبك تعالي كلي معي
نور: مو قادره اكلت مع يارا وعيالها
عزام: اقل شي نقنقي ما باكل لوحدي
نور جلست وهي تفكر بموضوع الفلاشه: عزام
عزام : لبيه
نور: لبية حاج ي حبيبي بس بسألك الفلاشه اللي بثوبك وش فيها
عزام لف بسرعه وبصدمه: فتحتيها
نور بخوف :لا بس احتاج فلاشه قلت يمكن فاضيه واخذها