بالرغم من اجواء الفرح لكن وجود حلقات مفقودة لدى الجميع كانت هى الاهتمام الأكبر
بداخل كل شخص ألغاز ولكن لا يعلمون أن فك اللغز هو بداية لتحويل مسار الحياة لا يعلمون أن العاصفة قادمة وبقوة ستنل منهم جميعا لن ترحم أحد والثمن سيكون باهظا ، لا يعلمون أن اليوم هو بداية لعنة جديدة من نوعها لعنة رسمت منذ زمن بعيد والآن وقت الجحيم الممزوج بلهيب العشق .
تمت الفرحة مع الجهر بكتب الكتاب واكتملت فرحة عاشقان او بالأحرى اكتملت اكتمال مؤقت
الكل سعيد الكل يهنئ الكل يتعامل بشخصيته بلا مظاهر بلا أقنعة زائفة ، استمرت الاجواء حتى الفجر ليستيقظ الجميع مع ظهر هذا اليوم الجديد
عائشة براحة ... الحمدلله يافضل ابننا كتب كتابه وهيستقر ان شاء الله ، عقبال سماح يارب
فضل... نحمد الله يا ام فارس ، وسماح عريسها موجود بس هى اللى منشفة دماغها
عائشة بعدم رضا ...انت عارف ان سماح عايزة تكمل دراستها وان هى ومحمود ابن اخوك مختلفين عن بعض ولو انت موافق يبقى بتظلمها يافضل
فضل بحدة ... بزياداكى كلام ياعيشه، ومحمود ولد اخوى زين ومايتعايبش ،بنتك اللى دماغها كيف الحجر
عائشة بحزن ....انت اللى بتقول كده يافضل انت نسيت اتجوزنا ازاى واهلى واهلك حاولوا يمنعوا جوازنا وإحنا اتحدينا الكل دلوقتى بنتى غلطانة عشان بتقول اللى فى قلبها على كده انا كنت فى نظرك اى؟!
فضل بهدوء...ايه الحديت الماسخ ده يابت الناس ، إحنا عشرة عمر وفهمانى غلط كيف ، انا مستحيل اجبر حد من عيالى على حاجة ، والقصد من حديتى انك توعى سماح زين ، هى لسه بينته صغيرة ومهياش دريانه بمصلحتها لكن مستحيل اغصبها على حاجة
عائشة فى محاولة لقطع الحديث ... خلاص يافضل الكلام سابق لأوانه خلينا فى فرحتنا ، انا هروح اشوف الأكل جهز ولا لسه عشان الضيوف قبل ما يسافروا يأكلوا لقمة تسندهم
فضل.... كلك واجب يا ام فارس
بعد مرور فترة قصيرة كان الأكل تم تجهيزه فى قاعة الطعام كان يجلس فضل وابنه وابن أخيه وياسين وهيثم
وفى غرفة آخرى كانت تجلس الفتيات وتتوسطهم عائشة بمحبة الأم
بدأ الجميع بتناول الطعام والثناء على مذاق الطعم حتى انتهوا جميعا
و بعد فترة
فى قاعة المنزل الخارجية الجميع فى حالة تأهب للسفر
عائشة بحزن... كان نفسى تقعدوا شوية كمان
سماح... معلشي يا ماما انتى عارفة الدراسة والشغل مش هينفع نتأخر اكتر من كده
فضل وهو يواسيها... بكفياكى عاد يا ام فارس ، هيتأخروا على مصالحهم
ياسين بمحبة ... انا مش عارف اشكركم ازاى على الضيافة والكرم واكيد هنتقابل تانى ان شاء الله
فضل... إحنا معملناش غير الواجب يابنى وانتم على دماغنا من فوق
هيثم... كلك ذوق يا حج فضل، وإحنا فى انتظاركم فى مصر
فضل... اكيد ياابنى هنيجى
ياسين لعائشة بصوت منخفض... انا هستناكى نشرب القهوة مع بعض المرة دى وإحنا بنسمع الست وبنتفرج على الغروب
عائشة بتوتر... اكيد ياابنى بس....
ياسين بخبث قبل أن تكمل حديثها....يالا يا جماعة هنتأخر
ثم رحل قبل ان تكمل الحديث
و ودع الشباب الكل وانطلقوا ولكن يزيدهم جنا وفارس
فى غرفة عائشة
فضل بحب ... لساتك زعلانة يا ام فارس
عائشة ... ابدا يافضل بس فى حاجة غريبة فى اللى اسمه ياسين مش عارفة هى اى حاجة بتحيرنى
فضل باستغراب... قصدك انه عفش
عائشة ...لأ مش كده بس كأنه يعرفنى ويعرف بحب اى وبكره اى ويعرف تفاصيل عنى كأنه يعرفنى يافضل انت فاهمني
فضل... واه واه ليه كل ده عشان قهوته عجبتك
عائشة... انا احساسي انه يعرف انا مين وبنت مين
فضل ضم عائشة وقال بهدوء... لساتك فاكرة الماضي وفاكرة ان حد بيلاحقك بعد العمر ده يا عيشة الماض راح واللى بيروح مبيعودش يا عيشة خلى حديتى فى دماغك عشان تنسي لساتك على عهدك القديم
عائشة بحزن ... مش عارفة انسى يافضل حاولت بس صعب اللى راح مش مجرد ذكرى وانتهت كان عمر و حياة عشتها انا لسه بحلم بكل لحظة ومش قادرة اتخيل ان خلاص الماض بقى سراب
فضل... انسى يا بت الناس لأجل عيالك ابنك بقى شب واتجوز وبتك عروسة و انا محتاجك اكتر من الاول محتاج ونيسة عمرى اللى تكمل معايا لآخر لحظة فى حياتى
عائشة بحب.... ربنا يخليك ليا يافضل وانت اللى هونت عليا الصعب كله بعد ربنا يا حبيب عمرى
☆☆☆☆☆☆☆☆☆☆☆☆
بعد عدة ساعات
وصلت الفتيات للسكن ، والشباب إلى منازلهم
فى السكن
سماح... من دلوقتى انتى شريكة معانا فى السكن وبكرة هننزل مع بعض واعرفك جامعتك فين ونشوف جدول المحاضرات بتاعك
جنا... شكرا ياسماح ،بس انتم بتغيروا خلاجتكم فين وبتتسبحوا فين
همس... انا مش فاهمة حاجة
سماح... اسمعى يا جنا إحنا هنا فى مصر حاولى تتكلمى باللهجة بتاعتنا عشان محدش يفهم لغة الصعيد
أميرة... سماح عندها حق يا جنا عشان محدش يتنمر عليكى هنا الناس غير فى الصعيد
سماح...وبالنسبة لما تبقى عايزة تغيرى هدومك اسحبى الستارة والحمام فى آخر الطرقة بتاعت الدور فى وقت محدد للشاور عشان الحمام مشترك وفى حمام تانى عشان الوضوء وكده يعنى
جنا بضيق ... العيشة دى صعبة اوى
همس.. انا كنت بقول زيك بس الوقت مع الصحبة الحلوة بعدى بسرعة
أميرة بمحبة ...بكرة تتعودى،
جنا... ان شاء الله
أميرة..... ودلوقتى غيروا وريحوا من السفر وبكرة نرجع لحياتنا تانى
بعد مرور شهر الوضع كما هو ولكن التقارب فى العلاقات يزداد
فى مكتب ياسين نصار
ياسين... انتى كده هتبقى معانا فى الشغل على طول وتقدرى تمضى العقد
سماح بسعادة... شكرا لحضرتك
ياسين بهدوء ...سماح انا عايز اتكلم معاكى شوية
سماح بتوتر... اتفضل يا فندم
ياسين... ممكن اعزمك على قهوة فى اى مكان
سماح... بس حضرتك مش هينفع عشان....
ياسين... بلاش ترفضي انا لازم اكلمك فى موضوع ضرورى وبعد كده انتى احكمى
سماح... بس بشرط
ياسين... اتفضلى
سماح... مكان عام ودى هتبقى اول وآخر مرة
ياسين بخبث... موافق بس آخر مرة انتى اللى هتحكمى
كلماته كانت كفيلة بتوترها فهى لا تعلم لماذا توافق وتكسر قواعد حياتها أو بالأحرى هى من كانت تتمنى أن يتحدث معاها وبداخلها صراع بين الحدود وبين مشاعر تنمو لا تعلم مسارها كانت تظن أن ملحمة حبها ستبدأ ولكن الحمقاء لا تعلم أن النيران ستلحقها فهل سيكون هو النيران ام هو من سيطفئها لمعرفة الإجابة على السؤال سنكمل الأحداث
☆☆☆☆☆☆☆
فى مكتب هيثم الزيات
أميرة بجدية ... عند حضرتك اجتماع الساعة ٧
هيثم ... تمام يا اميرة تقدرى تروحى انتى وادهم هيبقى معايا
أميرة... تمام يا فندم عن إذنك
كادت بالرحيل ولكن صوته اوقفها وهو يقترب منها أغمضت عيناها فى محاولة لعدم فقدان القوة ولكن هيهات بعد أن تخلخل عطره لأنفاسها
هيثم بمحبة ... انا كنت عايز اشكرك واعتذر منك
فتحت عينها بصدمة وقالت... انا!
ابتسم بسمة ساحرة جعلتها تذهب لعالم آخر
هيثم... انا عارف انى ظلمتك فى البداية بس انا كنت فاهم غلط وفى حاجات كانت لها تأثير و...
هيثم صفق بيديه لتنتبه له وقال... انتى روحتى فين وسامعتى انا قلت اى
أميرة بخجل وتوتر... لأ اه اصل مش عارفة، هو حضرتك بتكلمنى انا اصل....
الصمت هو الخيار الوحيد عندما استقرت الأعين بلغة لا يفهمها إلا من هم فى طريق الهلاك لا يعلمون كم مر من الوقت على هذا الحال حتى جاء ادهم فتحمحم ليرجعهم إلى الواقع تحت أنظار أدهم فى تعجب من حالهم
أميرة بخجل استأذنت ورحلت مسرعة
أدهم بفضول ... هو فى أى
هيثم بهيام ... مش عارف البنت دى غريبة وعيونها فيهم حاجة بتخلينى بنسى الكلام وببقى حاسس انى مش أنا كأن هيثم تانى قصادها غريبة فى لمعة فى عيونها بحس ببراءة الدنيا جواها احيانا بحس كأنها ملاك وفى نفس الوقت عندها كبرياء وعنيدة مش عارف هى مزيج حلو اوى
ادهم بغمزة... شكلك غرقان ووقعت يامعلم
هيثم باستنكار .... انت اتجننت يا ادهم وقعت اى وكلام فاضي مستحيل طبعا هى عشان محترمة بس عجبتنى غير كده لأ ومش عايز اسمع كلام تانى فى الموضوع ده
أدهم... انت بتضحك على نفسك يا هيثم ومش هتفهم غير لما تضيع الفرصة من إيدك
هيثم... انت اكيد حصل حاجة فى نفوخك انا هيثم بن الزيات مستحيل أقع بالطريقة الخيبة دى
☆☆☆☆☆☆☆☆☆☆
فى أحد المطاعم
كان يجلسان سويا ولكن كانت تنظر من حولها بخوف
ياسين... ممكن تهدى شوية و بلاش حضرتك وفندم وتقولى ياسين على طول
سماح بتوتر ... بس الألقاب لازمة عشان الحدود
ياسين... اسمعى ياسماح انتى عارفة ومتأكدة انى معجب بيكى من اول مرة شفتك زى ما انا متأكد انك معجبة بيا
سماح بانفعال ...لا طبعا الكلام ده مش مظبوط وانا اسفة لازم امشي حالا عشان اتأخرت وانا اسفة انى جيت هنا معاك واضح انك فهمت الموضوع غلط وانا غلطت فى الحكم عليك من الاول عن إذنك يا ياسين بيه
كادت بالرحيل ولكن تصنمت فى محلها بعد أن قال لها...اسمعى كلامى يا بنت عمتى
سماح استدارت إليه بثقل وقالت... افندم بنت عمتك؟! مين دى ؟! انا ؟!
ياسين... اقعدى وانا هشرحلك كل حاجة يا سماح عشان تعرفى ازاى اتجرأت اكلمك واطلب انى اقابلك برا وانا عارف انك صعيدية ومستحيل توافقى على اى حاجة
☆☆☆☆☆☆☆☆
فى السكن
جنا وهى تتحدث فى الهاتف... انا زهقت يافارس على طول لوحدى
فارس... معلشي ياجنا استحملى وانا هفسحك آخر الاسبوع
جنا بطفولة... بجد ياحبيبي
فارس... بجد ياقلبى
همس وهى تدلف... الله يسهله ناس بتحب وناس بتتنفخ
جنا... قل أعوذ برب الفلق اقفل دلوقتى لما اشوف بت البندر
همس... بقولك اى سماح مش هنا تترجم فبلاش صعيدى
جنا... ماشي ياهمس بس تعالى هنا هو انتى ليه ساكنه هنا وانتم اغنياء
همس وهى تزفر...حكاية طويلة بس مش مهم هحكيلك بدل مااحنا قاعدين كده
جنا... وعلى كده بقى اخوكى هو كمان قاعد فى سكن لوحده
همس وهى تضحك... لأ يا اختى اخويا عنده فيلا بتاعته قاعد فيها لوحده
جنا... طيب ماتروحى تقعدى معه بدل السكن هنا
همس... اروح اقعد مع نفسي قصدك ، حبيبتى هيثم مش فاضي على طول مشغول فى الشغل وساعات بيكون مسافر إنما هنا انا لقيت نفسي مع أميرة وسماح وكمان انتى مش احنا صحاب ولا اى
جنا... اكيد طبعا صحاب انت طيبة وحلوة
فى شركة هيثم الزيات
هيثم... انا همشي يا ادهم وانت خليك عايش فى الحلم
أدهم وهو يلحقه... طيب والشغل ياعم
هيثم... يتحرق يا أدهم سلام
ثم رحل ليهرب من اصطدامه بالواقع وأثناء عودته لاحظ وجود هذه الحورية على ضفاف النهر تابعها من بعيد ليسرح فى شرودها
ولكن قاطع هذا الشرود عندما رحلت بعد ان حاول أحدهما التعرض لها ولكن بلا إرادة تدخل بطريقة غريبة اقترب منها قائلا... اى يا قلبى اتأخرت عليكى
أميرة بتلعثم... لأ اه هو....
غمز لها هيثم وقال... فى حد مضايقك
أميرة فهمت قصده ثم نظرت إلى هذا الشخص وقالت... لأ ابدا ده كان واحد تايه يالا بينا إحنا
ثم رحلت معه وصعدت مع بسيارته الخاصة ولكن لم تستطع الاحتمال اكثر لتدخل فى نوبة ضحك من تذكرها الموقف ولكن كان يتابع ضحكتها بصمت وإعجاب
أميرة وهى تضحك... كان شكله مرعوب اوى وانا حسيت انى هبلة بس شفت لما فهمت قصدك على طول
هيثم... انتى هتقولى ماشاء الله ناصحة
أميرة ... بس انت عرفت انا فين ازاى
هيثم... صدفة كنت فى الطريق وشفتك
أميرة... عموما شكرا لحضرتك
هيثم... اظن إحنا مش فى المكتب عشان تقولى حضرتك
أميرة بخجل... تعبتك معايا انا مضطرة انزل وشكرا تانى مرة
هيثم... خليكى يا أميرة انا هوصلك وبالمرة اشوف همس
أميرة.... بس انا مش هروح على طول فى حاجات هشتريها الاول ومش عايزة اعطلك معايا
هيثم.. مفيش مشكلة نجيب اللى انتى عايزاه من الطريق
أميرة بتوتر... لأ اصل الطريق مختلف والصراحة الناس كلامها كتير وانا مش عايزة اتعبك
هيثم بحده... مين يقدر يتكلم عليكى؟!
أميرة وهى تنظر إليه بتعجب... انت مين ؟!
هيثم بعدم وعى... مش عارف بس انتى مين؟! وازاى ببقى كده قصادك؟!
أميرة بتوتر وخوف... انا لازم انزل دلوقتى حالا انا اسفة يا هيثم
ثم هبطت من السيارة وركضت إلى الطريق الآخر فى حالة يُرثى لها لاحظ هيثم حالتها فشعر بنغسة تتوسط قلبه فقرر ان يتابعها من بعيد حتى أطمئن انها وصلت بخير
فى السكن
كانت تصعد الدرج بسرعة ولم تدلف إلى غرفتها بل إلى المرحاض الخاص بالاستحمام لتجعل الماء تنساب عليها وعلى ملابسها ظنا بأنها ستطفئ هذه النيران التى تكبر بداخلها جلست فى الأرض وضمت ركبتيها إلى صدرها فى محاولة لتهدئة نفسها ولكن قطع صمتها صوت طرق الباب وصوت همس
همس بخوف.... أميرة افتحى انتى كويسة أميرة ردى عليا
أميرة اغلقت المياه وفتحت الباب لتجدها همس فى حالة يُرثى لها
همس بقلق..اى إللى حصل يا أميرة وليه بتعملى كده
أميرة برعشة .. عايزة انام يا همس عايزة انام
همس ساعدتها هى وجنا لتغيير ملابسها و من ثم النوم فى فراشها
خارج الغرفة
كانت همس تتحدث مع أخيها فى الهاتف
همس بضيق... عملت اى لأميرة ياهيثم
هيثم... والله ما عملت حاجة
همس بحزن... البنت شكلها مصدوم وبتتنفض ياهيثم
هيثم بخوف... انا مش فاهم هى مالها إحنا بالعكس علاقتنا اتغيرت للأفضل وانا بتعامل معاها بأحترم
همس باستغراب... امال فى اى يمكن حد ضايقها فى الطريق
هيثم بثقة... لأ
همس... وانت عرفت ازاى
هيثم .... لأن انا كنت متابعها وهى فى الطريق
همس.. ليه؟!
هيثم فى محاولة لغلق الموضوع.... صدفه ياهمس عادى مش تحقيق هو ، خليكى جنبها ولو فى حاجة كلميني على طول وابقى طمنينى سلام
همس اغلقت الهاتف وبداخلها تقول انا متأكدة ان فى حاجة غلط بس مش عارفة هى حاجة حلوة ولا لأ المهم دلوقتى اطمن على أميرة ثم دلفت إلى الغرفة وجلست بجانب أميرة كى تطمئن عليها
جنا... شكلها مصدوم ياترى مالها
همس... مش عارفة يا جنا ربنا يستر بس أميرة حساسة اوى وانا بخاف عليها اوى ربنا يقومها بالسلامة
جنا..... ان شاء الله تقوم بسلامه بس لازم تتغطى حلو غشان تعرق وتصحصح
همس.. ماشى يا جنا نغطيها حلو
يتبع....
محدش ينسي التصويت والمتابعة
الكاتبة علياء عادل أبوالعزم