البارت 49
ضحيه لمن لايرحم
بقلم زهراء الحسناوي
،،،،،،،،،،،،،،،،،،،،
توضيح
السانيه معناها قانون ماشي بكل العشاير واحد هاي السناين هي (الجلوه) انتقال اهل القاتل لغير محافضه مده 7سنوات
العادات والتقاليد،، هي بعض شيوخ العشائر ماشين على مبدئ اخذ الفصليه وهدر الدم وهاي تقاليد قديمه البعض مطبقها لهذا يومنا
تحياتي 🌹
،،،،،،،،،،،،،،،،
لن يصل صوتك المنهك لمسامعهم
وحده الله
يسمعك دون أن تنطق
وحده فقط
حين تذهب اليه مكسور الجناحين
تعود محلقا
انا صامت دائما لكن قلبي كثير البكاء
يبكي الناس أحياناً ليس لأنهم ضعفاء
بل لأنهم بقو أقوياء أكثر مما يجب
تبكي الطيور ليلا فقط
الشمس لاترئ دموعها ولا الناس
وأني أخشى هذا الصمت
أخشى أن يفهم تبلدا
عظم الله ثبات صدري
على جميع الكلمات المعلقه فيه
على هيئة صمت طويل
رفقا بي فأنا منهك 💔
لاتغرك عينياي وانا اضحك بشده
اتظن الضحوك لايحتويه حزن؟
رفقا بقلبي لاتغريك صلابته
فهو اشد هشاشه من ورقة خريف بائسه 💔
،،،،،،،،،،،،،،،
زينب،، من شافو احمد وگع حرگو الدنيا بالرمي
لواء نزل سلاحه ورجع اتلگيته اركض الصوب احمد وامي تركض مفرفحه جدامي
ماانتبهتله ولاشفته لان عقلي يم اخوي
احس الدرب صار شطوله اركض حافيه ويادوب عباتي براسي
شفت امي گعدت يمه شمرت روحها لمن وصلتله لگيت راسه بحضنها بس صافن للسما
هدومه بس دم صافن مايحجي اي شي
مديت ايدي ترجف اريد الزم ايده
ماحسيت غير امي دفعتني وطوقته بحضنها لمته الصدرها
ام احمد،، ميلللي عننه ميللوو ماالكم غررض بيي
زينب،، ابجي وترجف موقف مايتحمله العقل ولايستوعبه امي فقدت لامته الصدرها دنگت تبوس بحلگه من صفنته مايتحرك عرفته ميت
ام احمد،، اگعد وليدي
اگعد يمه
اگعد حبيب
شو اگعد امشي وياي نرد الحوشنه
زينب،، عمي اجه يركض يلطم على راسه هو ومثنئ والزلم من بعيد تهوس فرحانين اخذو ثارهم
ولاكان الچتلو بشر
امي فصلت عنه نهائيا مدت ايدها جرت شيلتها مامنتبها الروحها الشيله كلها دم مسحت وجه احمد بيها اندمر وجها من دمه
امي جرت شيلتها نزعتها وشمرتها لفوگ
ام احمد،، ررررربي وليدددي اجااااك مخضب بدمممه ررربيييييي
زينب،، شعرها ابيض مدت ايدها ملخت راسها
وتصيح حنييت شيبااتي بددمك بدل الحنننه دددم
مصيبه مفجعه النه اخوي مضلوم بس ماعرف ياخذ حگه ضيع روحه وضيعنه
كلها التمت يردون يسحبون احمد من حضن امي مايكدرون لازمته حاضنته تبوس بحلگه
گوه عمتي ام مثنئ والنسوان لزمنها اني مااگدر اكوم رجليه احسهن مشلولات
شالو احمد دمه يجري وراه كلنه متاكدين بي مات بنفس اللحضه بس اخذو بسياره عمي والوادم الخيره فزعو وياه للمستشفى
اجتني غصون تركض صافنه بوجها اسمع بس مااكدر احجي لزمتني گومتني اسمعها تبجي وتصيح بس الصدمه شلت عقلي
امشي وياها صافنه وعيون احمد كدامي
احس اني بكابوس موحقيقه
وصلت الحوشنه امي كاعده بنص الحوش
والنسوان داير مدايرها لازماتها شعرها واديها واهدومها كلهن دم
ام احمد،، ولكم بس خلوني الحگه وليدي خذوو وحده ميلييين عنني
زينب،، كلها تبجي بس امي مابجت عيونها تحسهن جامده تفرفح بدون دموع
اباوع للنسوان وابجي بس مامصدگه
ولا احس الصار حقيقه موحلم وعلى لحضه اصحه منه
وره ثلث ساعات اتصلو كالو وصل للمستشفى ميت الطلقه ضاربته بضهره وطالعه من گلبه
كملنه شهادة الوفاة وطالعين للمغيسل
غصون،، زيينب ززينب باوعيلي اصحي
اخوج راح يجيبو وابوي خابر كال حضرو رواحكم
زينب،، تحجي وياي بس مااكدر اجاوبها بس اباوع بعيوني
تركتني وكامت اباوع المريم لازمتها النسوان تملخ بشعرها اختي الزغيره بجت الوادم عليها
واني بس اباوع بالعيون
للساعه ب12الضهر سمعنه صوت سيارات كالو اجو
طفرت امي وحده من النسوان جرت حجاب من الحبل مال ملابسنه خلته على راس امي
ركضت امي للباب وگفت ورفعت طرف الحجاب تهوس بي
ام احمد،، عرريس وربعه يزفوونه عرريس وربعه يزفوونه
زينب،، زلم ونسوان تبجي على حال امي
نزلو للبيت حطو بالگاع احنه اخواته وامي وعمي داير مدايره مو اهواي عالم لان الوادم تخاف كلها تگول ثار نبعد لايلوحنه من الطلابه
امي شنو اكتب ماينشرح حالها ساعه اتمد طولها ويه طول التابوت وساعه تريد اطلعه واتحطه بحضنها
بجت المابگلبه رحم على حالها
گوه اخذوه وره الصلاه يزورو ويدفنو قبل الليل لان عمي گال لفو بالمغيسل بنايلون لان ينزف بعده
اخذو احمد يالله صحيت على حالي مثل النايم وفز مرعوب ركضت املخ براسي واصيح بعلو صوتي
بس شيفيد الصايح ع الراح؟؟
امي انتهت كلساع توگع ونشيلها
الطم وبراسي ترن احجايته
(بريني الذمه بعد اخوج)
اصير املخ بروحي اكثر لان لاحضنته ولاسامحته ولاخليته يموت مرتاح وهاي الغصه تضل بگلبي للموت تندفن وياي
ثلاث ايام احنه مانايمين بس نبجي
اول يوم من اندفن احمد عمي جاب محفضته وفلوسه بيهن كلهن دم
ثلاث ايام الفاتحه امي لازمتهن اتنام تنيم المحفضه بحضنها تشم بيهن
كل شويه وسولفت للنسوان اتكلهن هذني افوسه تعبان بيهن
ثالث يوم الفاتحه امي خلت المله تقرالها عن وفاة القاسم العريس
عمي جاب غراض الصينيه وغصون رتبتها خطيه كل الشغل وگع براسها لان احنه منتهين من الصايح واللطم والقهر والتعب
وهي هم اطلگت قبل چتل احمد بيوم هم الدنيا تكفخ بيها مثلي
صوتي اختفه حتئ من احجي محد يفهمني كلمه تطلع وكلمه لا
رابع يوم عمي اجه يمنه كاعدين ابيتنه ودمعتنه بخدنه امي لاتاكل ولا تبجي ردناها بس تبجي
حتى ترتاح دمعتها شايطه ماتنزل
شگد حاولت وياها مرت عمي بس ماخلت لكمه بحلگها بس تشرب ماي
اتخبلت على امي وفقدت گتله عمييي
احمد انجتل مضلووم وابن الشيخ هو المتجاوز واحمد دافع عن عرضه وبس
عمي صفن على كلامي
گتله ورووح ابوي احمد حجه كلشي قبل لايموت حتئ سالفه الابنيه الرادها اخو هو الجان يدفع فلوس حتئ يشوهوون سمعتهاا
احجي وافرفح
ابو مثنئ،، بويه المن نحجي والمن نگول؟؟
ذاك مات واخوج مات وضاعت السالفه
اذا رحنه وحجينه هذاا الحجي الهم راح نفتح على روحنه باب مانگدر نسده
ومنو الراح يعترف على روحه ويجي يكول اني جنت اخرب سمعةالابنيه؟؟
بيوم الاخذنه احمد للمستشفى اجت الشرطه وفتحت محضر بس من عرفو السالفه سالفة ثار كالو حلوها بيناتكم لان قانون العشاير اقوه
بنيتي الفقير اله الله
زينب،، عمي خاف على ولده لان عمي الجبير حتى بفاتحة احمد ماوصل لاهو ولااولاده يخافون
حتئ سمعنا مشردهم مدري وين
اجت الشرطه ب اول يوم وعمي حجه وياهم ماعرفنه شنو گاللهم لان بيت الشيخ صار يهددون اليحجي ينهدر دمه
كرهت لواء اتمنيت اذبحه بيدي ومايبرد گلبي ولاتنطفي ناري
امي صرنه نوكلها كوه نحلفها يالله تاكل
من توشفنه نبجي ونگللها محد النه غيرج يالله تغصب روحها تاكللها لگمه
بيوم السابع رحنه للمقبره اخذنه عمي بسياره جبيره استاركس
احنه وعياله
نزلنه للمقبره امي طول الطريق قبل لانوصل تصيح
ام احمد،، رايحين نشوف الاعزاز
زينب،، من وصلنه امي نزلت تصيح فرفح گلبها
احنه نمشي وراها ونبجي
وصلنه يم القبر
دافني بصف ابوي تذكرت حلمي صدك تحقق
واندفن اخوي بهذا القبر
بس بعده مامبني بعده تراب مومثل قبر ابوي باني
امي نامت فوك التراب تريد تحفر واطلع احمد
نسيت اخوي وصرت ابجي على امي
مااصيح غير دخيلج يازينب ياام المصايب
ربي بجاه كللمن اله جااه عندك برد گلبي امي
انطيها من صبررر زينب دخيلك ياارب
اهواي ضلينه من ردنه نرجع امي ماقبلت تصيح انام اهنا يمهم بين ابوج واخوج يامحلئ النومه بين الاعزاز
عمي دنگ كعد جدامها راد يقنعها تكوم حتى نرجع ماقبلت كالتله قبل جنت اخاف افوت للكبور
هسه افرش وانام مااخاف ويمي اثنين زلم امددين
تمنيت امي تبجي وترتاح بس ولادمعه طلعت منها
كوه مرت عمي واني وغصون رفعناها من فوگ التراب
احسها راح تتخبل صارت تسولف وحدها وتهذي بااسم احمد
من رجعنه دخلناها الغرفتها لبست عباتي وطلعت اريد اركض للمجرمين الدمرونه دمار اريد افضحهم اتلگاني مثنئ من شافني لزمني مايقبل
اريد يهدني ماخلاني
دخلني للبيت افرفح عمي طلع يركض على صوتي عباله امي تخربطت
گتله عمي اذا ماكو دددوله تنصر المظلووم اني اريد اروح اخذ حگي منهم
اخذوونه فصلياات واخذوو كاعنه
بعدد لييش يهدوَرون دمه؟؟
لوحاجين من البدايه جان مارحنه وهمه بالنهايه يجتلون اخوي وتفض الساالفه
لييشش دمررونه وتاالي انجتل احمددد
عمي جرني دخلني للبيت
واني روحي مفرفحه ابجي
احس كلبي كوه يدگ
ابو مثنئ،، بويه وادم لاتخاف الله ولا تحسب احساب العقابه
اذا رحتي هسه شتستفادين؟؟
احَمد وراح
بروحتج تفتحين علينه باب مانگدر نسده
راح يستمر الثار وناس تكتل ناس
والدوله الصالحهم محد يحجي
يگلك ذوله عشاير بينهم نارهم تاكل حطبهم
استري علينه بنيتي بين مااعرض كاعي وكاع امج للبيع ونشيل منا ونحافض على اولادنه
مابينه حيل بعد الله ينتقم منهم
زينب،، عميي بروح ابوي خليني ارووح بس جلمه احطها بااذن حسن وهو ياخذ حگي منهم
جلمه وحده وروح ابوي وخلي يحرگهم وهممه عدلين
ابو مثنئ،، احنه رااح نحترگ وياهم اكعدي بويه
جفينه شرهم وادم صارت تشتري الطلابه بفلووس
بنيتي خل احجيلج عن التقاليد العشائريه
بااكثر العشاير اذا واحد قتل واحد قتل متعمد
حتى لو يدفع ديه القتل وحتى لويدفع فصليات نسوان وحتى لويدفع ماله وحلاله يضل دمه مهدور الا اذا تم التراضي بين الطرفين وجدام الوادم تتعهد عشيره المقتول انو ترضه بالفلوس والفصل هيج يوگع الحكم بقتل القاتل
الفصليه مذكوره بتقاليد بعض العشاير التفكيرهم قديم
بس بالسناين مامذكوره
لان السانيه تمشي على كل العشاير
اما التقاليد ذاك من ذاك اليطبقها لان ناس تفكيرها اختلف اكثر العشاير صارو يقبلون بالفصل وينهون الخلاف
بس الناس التفكيرها قديم ياخذون الفصليه
بس الناس الخيره حطو السانيه الي هي الجلوه
(الجلوه معناها انتقال اهل القاتل لغير محافضه
مدة 7سنوات ممنوع منعاً باتاً يدخلون لمحافضتهم
طول هاي السنين واذا دخلو قبل اكمل ال 7سنوات
راح يهدرون دم القاتل وهاي السانيه بكل العاشير معترف بيها واخوج قتل ابنهم متعمد مهما كان سبب الخلاف يبقى قتل متعمد وماتم التراضي رغم دفعنه افلوس وفصليه وفوگ كلشي رجع قبل انتهاء المده وهو دمه مهدور
واحنه هم ماجلينه بقينه ببيوتنه
بس خل ابيع الكيعان ونشيل منا نسلم برواحنه
لايكبر الثار وتروح ولدنه ضحيه
غصون،،ابوي يحاول يخلي زينب تهدئ اشوفها تفرفح ابجي وياها
دمرونه وتالي اخذو ثارهم
كرهتم مثل مااكره دم سنوني
وبست ايدي وجه وگفه لان اطلگت واتخلصت منهم
يمكن لو مامطلگه جان صارت هوسه
اخذت زينب ورجعتها لبيتهم بعد ماابوي كوه قنعها تريد تروح تهد عليهم
ابوي يدري بيهم ناس مايخافون الله وراح يدمرونه اذا وكفنه بوجوهم كال همه وربهم ياخذ حقنه منهم
مارجعت لهلي لمن شفت زينب هدئت بسبب موت احمد حتى نست بتها اباوعلها منتهيه شبه انسان
بالفاتحه كل شويه وهبط ضغطها اكلها قليل
وصايره جلد وعظم
ماادري نحتار بمنو بيها لو بعمتي المصيبتها مصيبه
اسبوع اني ابات يم زينب مااكدر اخليها وحدها
عمتي ام احمد كل شويه وشردت وركضنه وراها نلزمها
تريد تروح للمقبره نص الليل تصيح اني نايمه بفراش واحمد جوه التراب
الله يساعدها دمرتنه دمار
حاطه محفظته وتفتر كل شويه وجابتها وكالت ذني فلوسه تعب بيهن
مرات تنعئ
ام احمد،، يمه اذكريني
من تمر زفة شباب
من العرس محروم
حنيتي دم المصاب
غصون،، طول الايام هي هيج تنعئ
ليل مع نهار هي تردد لطميه يمه ذكريني
السالفه انسدت والعشائر صارت اجر طول وعرض
ناس اتكول هذا حگ واحمد دمه مهدور من البدايه حتى لو اخذو فصليات
واحد من الشيوخ گال
حتى لو ماخذين فصليات وماخذين فلوس يبقى الثار ويبقى ابنهم مهدور دمه وممنوع يرجع للمنطقه مدة 7سنوات
لان المايخذ ثاره يتعير من الناس
كل شخص راح يهينه يگله انت ساكت وذاك جتال اخوك يفتر كدام عينك
حتى اذا همه سكتو الناس الخبيثه راح تخلي حطب للنار تهيجها حتى ينوخذ الثار
ابوي حجالنه كلشي لان يوميه كعدات وناس رايحه وناس جايه
اخر شي واحد من الساده كالهم حرام انتو اخذتو بناتهم وانطوكم كاعهم مايصير اتممون القتل لازم تعفون عن ابنهم
لو ماماخذين نسوان وافلوس من البدايه وخاصمين السالفه بقتل الولد احسن
لان انتو هسه اخذتو الفصل واخذتو ثاركم ومايصير هذا الحجي الله مايرضه بي
ومادام اخذتو ثاركم اعتقو بناتهم خلهن يردن لهلهن
ابوي كايله بنتي طلگتها بس اريد يعتقون بنت اخوي
خل يطلگوها لان لو يصير دمها للرجاب مااردها اله
بيومها متعارك لواء ويه ابوي وصايره هوسه ولواء حالف مايطلگ
عشر ايام احنه لاليلنه ليل ولانهارنه نهار
مشاكل وعرك وطلايب وناس رايحه وناس جايه
اجي البيتنه ابوي يفرفح على سالفه الثار وعلى الشيوخ والعادات والتقاليد الماترحم الضعيف
اروح البيت عمي اموت الف موته من اشوفهم كانه كل واحد بيهم يمشي بدون روح لا ياكلون مثل البشر ولاينامون مثل البشر
اروحلهم اني اطبخ اصبلهم واحط الصينيه محد ياكل حتى امير يبجي يضل يضرب بيده بالكاع
يصيح مد مد لان مايكدر يحجي بس يعرف اسم اخو ينطق بس اخر حرفين
ابوي عرض قطعته للبيع وقطعة مرت عمي كذلك
وصار يدور على بيوت بالولايه كال نبعد عن المشاكل احسن
شنريد نسوي؟؟
بيوم كاعده بليل بغرفتي توني رجعت من عمامي ذبيت عباتي واتمددت بفراشي
اجتني رساله ع الماسنجر اصلا ماالزم موبايلي ملتهيه ويه زينب اهواي دازتلي رسائل ساره بس ماشفتهن
فتحت الرساله اتصلت بيها
ضلت تبجي اتكلي اذا جان قبل اكو امل ترجعين لخوي هسه بعد الصار من سابع المستحيلات ترجعون سوه
كتلها اخوج صفحه طويتها وشگگتها
منو يدري يمكن جان موجود من ابن عمه قتل ابن عمي
ساره،، وروح ابوي ماموجود وتعارك وياهم راد لواء يغير رأيه وهسه اثنينهم مايتحاجون
لتضلمي غصون تره خطيه ومو ذنبه اذا لواء اخذ بثار اخو
غصون،، انتو عشيره واحنه عشيره ثانيه
وبيناتنه دم وثارات
وانتي گلتيها اذا قبل اكو امل هسه انتهينه
جاي نحجي سمعت صوته يمها غمضت عيوني حيل
موبيدي بس اكو احساس بداخلي من اسمع صوته
مااعرف شنو يصير
اسمعه يگلها انطينياها احجي وياها
بسرعه نهيت المكالمه
وطفيت الجهاز
من ينشر اخذ سكرينات للنشر واحتفض بي مرات ارجع اقراهن
هلمره احتاجيت اقره صرت اقره وابجي
مو علي وانما على روحي
شنو ذنبي بعدني بدايه ال19ومطلگه؟؟
يرضاها الدين؟
الاسلام؟؟
العقل؟؟
اشفت من حياتي حتى اطلگ بهيج عمر؟؟
زينب،، اقسئ ايام مرت بينه هي ايام وفاة احمد
من الصبح لليل اواسي امي بمصيبتها
ومن الليل للصبح اواسي روحي على مصيبتي بغياب بنيتي
احط اهدومها اشم بيهن واگول الله يساعد گلبج يايمه
انه بنيتي عايشه وعد ابوها وغيابها دمرني
اشلون بحال امي الدفنته بيدها وبعد من سابع المستحيلات ترجع تشوفه
ع الاقل فطومه يجي يوم وربي يردها الحضني
تذكرت مقوله للامام عليه السلام
سألو ياامير المؤمنين ما اشد من الموت؟؟
قال لهم(فراق من نحبهم اشد من الموت)
وفعلا صدق امير المؤمنين عليه السلام
فراگ النحبهم صعب شگد تريد تواسي روحك ماتكدر كلشي فوگ طاقتك
مااذكر يوم نمت مثل البشر اذا انام دقايق كل شويه افز لو اشوف احمد جدامي من ينجتل لو اسمع صوت فاطمه تبجي اكعد مرعوبه
مرتين اتصلت بحسن مايجاوب اعرف يستحي مني
بسبب الصار
ردت بس اطمن على بنيتي بس ماجاوب
اسبوعين مرن على موت اخوي
كتله عمي خل ناخذ امي نزورها السيده شريفه عليها السلام
بلكت امي تبجي وترتاح بدل ماتفتر بالحوش
تصيح انه المضيعه ولدها انه الفاگده
عمي كال ميخالف بلكت ترتاح باجر من الصبح نروح
وفعلا من الليل حضرت عبايتها غسلتها وغسلت شيلتها
كتلها يمه الصبح ناخذج للسيده شريفه
ماحجت بس تباوعلي عيونها قطرة دمع مابيهن
ثاني يوم الساعه ب7لبستها ولبست حجابي وعباتي وطلعت
مريم ضلت يم امير وزينه
رحنه بس اني وعمي وامي ومرت عمي
طول الطريق امي صافنه تباوع تحسها ضايعه
وصلنه للعلويه
خلينه السياره بمكان ونزلنه نمشي
اول مادخلنه من الباب امي عبالك شايفه امها وجاي تشكيلها
من الباب صاحت
ام احمد،، اااام هااادي
زينب،، قشعر بدني من صوتها عافتنه ومشت سريع جدامنه
الوادم تباوعلنه
ام احمد،، ااام هاااادي جاايتج انه
وليدددي ياام هاااادي
لو تبرردين گلبي لوبجاهج عد ربج ياخذني وراااه
زينب،، امي دموعها نزلن عشره عشره
ردت اقترب منها عمتي لزمتني گالت عوفيها تبرد گلبها وفعلا تركتها تبجي براحتها كل النسوان تصيح الله يبرد گلبج
كل هذا البجي وامي ماسكتت تحسها تريد تبجي دموع مخزونات مال اسبوعين
عمي گال خلوها ترتاح اهنا مانطلع لمن هي تريدنه نرجع وفعلا تركناها نامت على صفحه راسها بحضني
اول مره اشوفها هيج هادئه بعد موت احمد بس النفس يصعد وينزل عبالك ماخذه مهدئ
رغم ضجة الناس والصوت العالي بس هي مسكنه وغافيه ماكعدت غير ويه صلاة الضهر
كالت اريد اتوضه وصلي ل احمد توه جان يمي
كزبر جلدي عمتي سالتها كالتلها وين جان يمج؟؟
ام احمد،، هسه جان كاعد يم راسي يگلي يمه لاتبجين اني يمكم جنت مامرتاح هسه ارتاحيت خليني انام برغد لاتبجين دموعج يقهرني
زينب،، باوعت لشباج العلويه بگلبي گلت دخيلج ياام هاادي صدك اذا كالو تنطين مرادج بالايد
امي جبناها منتهيه فد مره وهسه وكفت ويه الزوار تصلي ل احمد ولبوي
بعدها رجعنه للبيت امي صح تبجي بس الحمدالله احسن ماتضل دافنه حزنها وتالي تنجلط
هي عدها سكر خلصنه ايام الفاتحه تضرب انسولين لان سكرها كلش ارتفع
واكل ماكو وتاخذ حب سكر قبل جانت تاخذ نص حبايه مال سكر لان مره ارتفع عدها والدكتور كال خل تاخذ نص حتى يستقر
بس من مات احمد صار يعلگ كوه ينزل
مرت الايام وگلبي نار على فاطمه لازمه الموبايل بيدي كل شويه افز خاف واحد يتصل اريد بس اسمع صوتها تناغي احس گلبي بعد مايتحمل صار اكثر من شهر ماشايفتها
اتصلت بحسن اندعي كون يجاوب
ماصدكت من فتح خط
جاوبته ملهوفه ابجي وافتر بالغرفه
حسن،، اهدي زينب
زينب،، خيي بنيتي بنيتي حسن وينها؟؟
حسن،، هاي يمي والله لتخافين
اهلج اشلونهم؟؟
زينب،، كعدت ابجي كتله شتتوقع يكون لونهم بعد مااخوك نفذ كلامه واخذ بثاره؟؟
حسن،، ورسول الله مووياهم اني زينب وحتى ماادري تفاجئت بالهوسه وتعاركت اني وذياب ويه منهل ولواء
والله لوما فاطمه جان اخذت جوازي وسافرت
زينب،، امانة الله ورسوله بنيتي حسن اني مامنه لان انت يمها
حسن،، امني زينب اصلا حتئ من اطلع احطها بحضني بالسياره تفتر يالله تنام اتعودت حتى بليل افرها يالله تغفه
زينب،، ضحكت من بين دموعي كتله انطينياها اسمعها
حط الجهاز يمها يحاول ياخذ الممه منها تعيط بي
وهو يضحك وياها
كلبي ارتاح
حسن،، زينب شتحتاجين بس اتصلي مالي غرض بيهم ذوله الكفره انعل ابهاتهم من منهل الاثول وانت حاط ايدك
زينب،، مااريد بس سلامتك وبنيتي امانه
سالته منو يلبسها منو يوكلها؟؟
حسن،، زينب تره فاطمه بنت لواء مهما يكون مايقبل عليها وغصب على حنان تلبسها وتسويلها اكل
واصلا هي حتى كاروكها يمي اتعلمت عليها
لتخافين والله مابيها شي
زينب امنت من كلامه وارتاح گلبي
سديته ونمت
يوم يجر يوم والحياة مالها اي طعم
تجي غصون يمي وحده تحجي للثانيه مصايبها
شويه نذب من الحمل الموجود بصدورنه
غصون اتخلصت منهم من اطلگت بعد اني
مااصدك شوكت اتحرر منهم ويتركوني بحال سبيلي
بس خايفه ياخذون فاطمه للابد
بيوم الاربعين مال احمد رجعت كانه نفس اول يوم انقتل تعبت نفسيتنه كلش
امي وگعت وارتفع سكرها واني احس گلبي تعبان
امشي بدون وعي مالي خلگ الكلشي
هم رحنه للمقبره وكان قبر احمد مبني وعمي حاطله صوره امي شافتها لوتخبلت
لازمه الصوره وتصيح
ام احمد،، اكعد وليدددي
ماجيت اشوفن صورره جيييت اشوف طوولك الحلوو يممه
زينب،، كوه رجعناها للبيت لاخلت خدود ماملختهن لاخلت شعر مامعشته
اسبوع وره الاربعين امي متخربطه كل شويه عمي يجيب المضمد يقيس سكرها وضغطها وعلاجات كومه
اجن كم وحده من جاراتنه يشوفنها
من رادن يرحن طلعت وياهن اوصلهن للباب وحده منهن گالت
المره،، يايخاله جا اشلون ببنيتج تبقه يمهم؟؟
زينب،، الها الله خاله وذولاك هم اهلها
المره،، بلكت مرت ابوها تحن عليها وتعاملها مثل ماتعامل جهالها
امس سمعت بيها توها حامل
زينب،، احس الگاع افترت بيه صح اكرها واموت منه بس مااعرف الخبر خله غصه بداخلي
ماحجيت والنسوان راحن وصدمه من وره صدمه
خلتني اكره لواء كره العمه
طول عمري منضره وهو شايل سلاحه على اخوي مايروح من بالي
وره ثلاث اشهر تقريبا واني ماشايفه فاطمه وصارلها يمهم 6شهور احس روحي على ساعه اتخبل واشرد
من الصبح لليل تشوفني محتاره بمصيبة امي ومن يجي الليل احتار بااشتياقي لبنتي
مرات اتعجبت اشلون ام تگدر تتخلى عن اطفالها؟؟
اني وحده واخذت من حيلي حيل تعبني فراگها
المصبرني هدومها اشم بيهن كل شويه
ام سجاد شكد خابرتها يطلع مغلق ردت بلكت تحنن گلوبهم وتجيبها الي حتى لو يوم بالاسبوع ميخالف بس اريد اكحل عيني بشوفتها
حسن كم مره اتصل بي جوابه بسرعه احسه ضايج وبس يريد يروح مدري شبي حسيت اكو شي صاير
كتله حسن فاطمه خو مابيها شي عليك الله؟؟
حسن،، والله ماببها شي
يالله انه رايح
زينب،، هاي صار كم مره كلمتين ويروح اكو شي وحسن مايكدر يحجي
كلت المهم فطومه كلشي مابيها نارهم تاكل حطبهم
وره كم يوم كعدت من الصبح اني ومريم اتحزمنه احزام بعباياتنه
ونضفنه البيت طلعنه الغراض بالشمس
وغسلنه الفراش قبل لايجي الشته لان ع الابواب
من الساعه ب7الصبح للساعه 12الضهر قبل الصلاة ياالله خلصنه
كتلها مريم اني راح اكمل تعزيل الحوش وانتي فوتي سويلنه غده
مريم دخلت واني شريت الفراش وعزلت الهوسه
كملت ودخلت بااحزامي عبالك طالعه من الحرب هدومي مبلله
وكلي اتراب توني گعدت بالكاع وسمعت صوت موبايلي بيد زينه يرن
كتلها كومي انطينيا جابته واجت
اخذته منها وفتحنه شفت جايتني رساله ع الواتساب
باوعت رقم غريب
فتحت الرساله اعاين الها
بقيت صافنه واني اشوف الصوره جنسية فاطمه
بالوجه مكتوب فاطمه لواء منهل
دگات گلبي زادت فتحت الرساله الثانيه دازيلي الجها الثانيه من ضهر الجنسيه فتحت عيوني واحس كلشي بيه جمد من قريت اسم الام
حنان
احس حراره صعدت الراسي وصدري ضاگ
ماعدت اشوف بعيوني
مالگيت روحي غير شمرت الموبايل وطلعت اركض حافيه محزمه بعباتي البيت الشيخ
گلبي وروحي احسهن شاطن ويفرفحن موبس صوتي
وصلتلهم دفترت الباب دفعته بقوه ودخلت وگفت بنص حوشهم وصحت
لواااااااء
لوااااااء وللك للليش هييج ذبحتنيي لواااااء
على صوتي كلهم طلعو يركضون
منهل
ونذيره
ولواء
وحنان
وام لواء بعربانتها
واخرهم طلع حسن
كلهم واكفين بمكانهم بس حسن اجاني يركض
ولواء يم السياره مكتف ادي ومنتجي على ظهر السياره
ردت اتقدم عليهم احس نار شابه بروحي لزمني حسن
حسن،، كافي ززينب عوفيهم ذووله شيااطين
زينب،، التفتت الصوب لواء احجي وروحي تفرفح كتله للييش لييش هيييج
حررام علليك
بنيتتي هاااي بنتتي انييي مووبتهااا
حجه لواء بكل هدوء
لواء،، اذا هيج بنتج تهمج مارجعتيلهاا؟
زينب،، اررجعلهااا؟؟
ارجعلهاا بعد مااچتللت اخووي جداامي وهوو برريي
نذيره،، اننجبي ولج واطللعي برره اخووها بريئ
من كتل اخووي عاادي عدكم بس من اخذنه ثاارنه طلع اخوج برريئ مووو؟؟
زيينب، التفتت الحسن وناويه كلشي احجيله خل يحرگهم وهمه عدلين مثل ماحرگو گلبي على بنتي
گتله حسسن وروووح اخووي يااحسن احمدد جتتل اخووك لان فشرر عللينه
وقبلل لايمووت حجالنه حجاايه
اباوعلهم كلهم سكتو حسن يباوعلي
كتله اسأل امك واختك مننوو جان يطللب من اخووك الماات يدفع افلووس للشبااب حتى يشوهوون سمعة العلوويه؟؟
حسن جمد يباوعلي مصدوم
احس عقلي راح ينفجر جسمي ماعاد يشيلني غير گلبي الاحس على سرعه دگاته راح يسكت
طلعت غفران شايله فاطمه صحتت فطوومه
اجه عمي راد يضربني حسن صار جدامي دفع ابو
تحس حسن مصدوم من كلامي
منهل،، كاافي وللج فضحتينه وخززيتينه جداام الوادم
هسه اسحگ رااسج اهنااا وبنتتج بعمرج ماتشوفيها
زينب،، رفعت راسي لله عز وجل وصحت بصوت عالي
يااااللله
الللهم كككل مننن أذقني مرارة الظلم
اذقه ررربي مرارة العيشش
واجري عليه صنوووف العذاب في الدنيا والاخرة وووشتت شمله وفرق جمعه
وافطر قلبه على وووولده
وبلغه رررربي حرقة القلب والروح واجعله من الحائرين التائهين في الارض
واجمع على جسده جميع الاسقاااام
وضيق الرزق
والنفوور من العبااد
وافضحه رررربي بين الخلائق فضائح لا يقام لها الرأس عاجلا غير اجل
ياااللله
اللهم اضررب الظاللللمين بالظاالللمين يااااارب
اختل توازني احس گلبي انعصر ونفسي ظاگ
افترت الگاع بيه وطحت ماادري بروحي
يتتبع
اولا اعتذر على كميه القهر بالبارت بس كان لازم اسرد كلشي
وثانيا عندي طلب منكم
الكاتبه زهراء امجد نشرت قصتها الحاليه
الشقاء في صراط الثأر
Zahra_Amjed12