#توبة_قاصره
#حقيقية
(17)
جي الصبح و ناضت هناء غيرت حوايجها و اتصل بيها اكرم اطمن عليها .. و مشت للعمل ..
هناء مقعمزه في مكتبها و تتكلم مع نفسها : مستاحشه ندى .. زعما نتصل بيها ولا عيب .. لالا مش حنتصل تو هي تنوض و تكلمني ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بينما ندى ما قدرتش ترقد قعدت مقعمزه ع الكرسي و تخطط و تفكر ... و فراس يرقد و ينوض يشبحلها و يرجع يرقد ..
و ندى تشبحله و ترجع تلف وجهها عنه بغيض .. لعند ما ناضت غسلت و طلعت فونها و قعمزت في الصاله عشان تتراسل مع هناء ع الواتس .. اطمنت عليها و حكتلها كل شي ..
هناء : حححي معقوله هكي صار 😳
ندى : اايه شفتي بختي الاسود
هناء: باهي شنو امقرره
ندى : راسي دايخ مش عارفه شنو اندير
هناء: ردي بالك تفرطي في فراس
لانك حتندمي و ترجعي لحياتك الاولى
ندى : مستحيييييل
امالا تحسابيني عبيطه نخليه ليها
هناء: هوا دامنه قالك انه يحبك
و يبيك انتي و رضى بشروطك
معناها صاادق
ندى : حتى اني قلت هكي
بس نبي نأدبه و نتأكد من حبه
هناء: ايه قلبي معاك ياوخيتي 💔
ندى : متعوووووداااا ع الشقى من صغري
هناء: كيف حتتصرفي معاه
ندى : حنتدلع عليه و على قولة الشراقه نخليه يحق و ما ايطق
هناء: 😂 يا قوي انت
ندى : 💪
يلا باي شكله ناض
هناء : باي
حطت ندى فونها و خشت للدار القاته نايض و خاش للحمام ..مشت قعمزت مكيجت و لبست روب حلو و تعطرت و طلقت شعرها و قعمزت ع التلفزيون ..
دقايق و طلع فراس من الحمام ينشف في شعره بالفوطه .. و اول ماشافها قعد واقف يشبحلها .. بينما ندى دارت روحها مش معدله و تهز في رجلها بنعومه ..
فراس حط الفوطه و قعمز جنبها : صباح الحب لعيونك يا احلى ما شافت عيني ..
ندى لفت وجهها عنه ولا كأنه موجود ..
فراس قرب منها و قال : ندووو حبيبتي خلاص .. حني علينا بنظره بس ..
ندى : اوفففف ..
وقفت و سيباته بروحه و خشت للدار .. و هوا قعد يتبع فيها بعيونه لين خشت ..
فراس: ضيعت ع روحك هلباا يا فراس .. شنو اللي بنديرا بس بيش ترضى ..
طلعت ندى من الدار و وقفت فم الباب و قالت : اطلبلي فطور .. جعت ..
وقف فراس مشالها و قال : حاضر يا قلبي من عيوني ..
ندى شبحتله فعيونه لحظات و رجعت خشت للدار ..
فراس في خاطره : نظرااتها يقتلووو ..
دقايق و وصل الفطور اللي طلبه فراس .. قعمزو ندى و فراس و بدو يفطرو .. و فراس عيونه ما قامهم عن ندى .. لين ندى انتبهتله و قعدت كل شوي تشبحله و تعطيلا في نظرات و هوا يزيد قلبه يدوب فيها ..
فراس: امتى يا ندوش ..
ندى : شنو اللي امتى ..
فراس : انتي فاهمه قصدي ..
ندى : قلنا لاا .. لين نتأكد من كلامك غير هكي لا ..
فراس : يعني لو ما اتأكدتيش حتسيبيني ..
ندى : ايه ..
فراس : باهي شنو اللي يخليك تتأكدي ..
ندى : مش حنقولك .. حنخليك تتصرف بطبيعتك و اني نفهم ..
فراس سكت و قعد يخمم ..
ندى : توا حنطلعو عشان تغير رقمك ..
فراس : كسرتها الشفره من امس ..
ندى ابتسمت : كويس ..
فراس : ايوا هكي ابتسمي .. انتي قوليلي شنو ندير بس و اني حاضر ..
ندى : يلا توا نغير حوايجي و نطلعو ..
فراس : تمام ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
جت العشيه و كانت هناء مقعمزه في المطعم مع اكرم يشربو في قهوه ..
اكرم : اختاري فيلو عشان نحجزلك فيه ..
هناء تذكرت شعرها و قالت : لالا ..مانبي فيلو .. ماخاطري في شي .. انت لو اتأجل الفرح لبعد ما انكمل العلاج احسن ..
اكرم : مستحييل ..
هناء سكتت ..
اكرم : ياقلبي .. افهميني بس نبي نكون جنبك و معاك .. نبي نمشي معاك العلاج خطوه بخطوه .. نسهر معاك و عليك و مانبيك تحتاجي حد ..
هناء بعصبيه : تمام ..
وقفت هناء و قالت : يلا توا نبي نمشي ..
اكرم وقف : زعلتي مني ؟ .. قلت شي ضايقك ..
هناء ابتسمت بشكل مصطنع : لا حبيبي بس عندي كدا مشوار بمنشيه قبل ما نروح ..
اكرم : تمام .. عينك من روحك ..
هناء : ان شاء الله ..
طلعت هناء من المطعم .. بينما اكرم قعد يشبحلها من بعيد و قلبه يوجع فيه عليها .. فاهمها و فاهم ليش تبي اتأجل الفرح .. بس ما يبي يطاوعها و يبي يكون جنبها ..
بينما هناء ركبت في السياره و قعدت تفكر شنو بتدير و كيف بتتصرف في شكلها اللي قعد يتغير في وقت كانت تتمنى فيه تكون بكامل اناقتها عشان تكون حلوه فعيون اكرم ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
روحت ندى و فراس لجناحهم في الفندق .. خشت ندى غيرت و حوايجها و فراس قعمز ع الصالون متضايق و مهموم .. لبست ندى بيجاما خفيفه و مكيجت و تعطرت و طلعت قعمز ع الكرسي .. وقعد فراس يشبحلها بهيام ..
ندى : مش حتغير حوايجك؟ ..
فراس : متضايق ..
ندى فهماته بس دارت روحها عبيطه : ليش .. شنو فيه ؟..
فراس: عاجبتك هكي حياتنا ..
ندى : لو كانت معايا نيتك سليمه من البدايه راهو مش هكي وضعنا ..
فراس : اني غلطت .. و ندمت و اعترفتلك ..
ندى : الااا صحح كلامك .. انت ما اعترفتلي اني كشفتك .. يعني لو كنت ما كشفتك كنت كملت باقي لعبتك ..
فراس : و ربي لااا .. كنت بنسكر صفحتها و بنبدا حياتي معاك ..
ندى لفت وجهها و قالت : خليني نشوف الشي هدا في تصرفاتك .. و بعدين ساهل ..
فراس في داخله : ربي يصبرني و خلاص ..
غيرت ندى الموضوع و قعدو يهدرزو في امور تانيه .. لعند ما جاهم النوم .. و خشت ندى رقدت ع السرير .. جي فراس رقد جنبها كان يبي يحضنها .. بس هي باعدت عنه و رقدت في طرف السرير .. اتضايق فراس من حركتها بس سكت عشان مايبيش يزعلها .. يبي يصبر عليها و يكسب ثقتها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مرو ايام متشابهات على هناء و ندى .. هناء بين علاجها و المركز و فرحها .. و ندى مازلت تعامل في فراس نفس المعامله و دايره حدود بينهم .. لعند ما جي اليوم اللي بتتزوج فيه هناء و اكرم ..
كانت هناء مقعمزه قدام المرايا و ندى تمكيج فيها و تهدرز معاها ..
هناء: خلاص مزال مش ناويه تحني عليه فراس ..
ندى : يؤبش ألبي فوفااا .. لالا مزال ..
هناء : هههه شنو هالتناقض ..
ندى : الله غالب ضروري بنتحمل في روحي بيش يقعدلي طول العمر ..
هناء : قلبي معاك ..
ندى : قداش خاطري نحضنه و نقوله نحبك .. بس يلا .. الله غالب نتعب شوي بيش نرتاح لقدام ..
كملت من المكياج و قعدت هناء تشبح لروحها .. شوي و نزلت الايشارب اللي كانت حاطاته على راسها .. ندى قعدت تشبح لشعرها كيف قعد خفيف هلبااا و اللون الابيض غالب عليه ..
ندى لما شافت الحزن فعيونها حاولت تخفف عنها : شنو التسريحه اللي بتديريها ..
هناء بحزن : اما تسريحه .. اني ميته من داخلي الف موته .. كيف في احلى ايام عمري بنقعد هكي قدامه .. كل يوم نرقد و انقول غدوه بنمشيلا و بنقوله خلاص بنفسخ انت ماتستاهل هكي .. بس لما نشوف عيونه و نشوف حبه الكبير ليا نتراجع ..
ندى : هنوو ياعمري .. هانت .. خلاص توا كل شي يقعد كويس .. و بعدين اكرم يحبك و زي ما كنتي بتعجبيه .. و بلعكس هدا لمصلحتك عشان تعرفي قدرك عنده و كمبة حبك ليه ..
هناء : اااه يا ندى .. الحمدلله و خلاص ..
ندى : يلا خلينا نكملو .. اكرم قريب يوصل و يرفعك للصوار ..
هناء بعصبيه : لالا مانبيش انصور .. مانبيش .. هالايام هما مانبي حتى نتذكرهم ..
ندى : خلاص خلاص .. زي ماتبي ياعمري ..
وقفت هناء و قعدت تلبس في قفطانها و الدمعه محبوسه فعيونها .. بعد ما كملت طلعت كيسه من دولابها و وقفت ع المرايا ..
ندى: هدا شنو ..
هناء : باروكه .. شريتها عشان اليوم هدا ..
ندى تنفست بوجع و حاولت تكون قويه قدامها ..
هناء طلعتها من الكيس و قعدت تساوي فيها و ايديها يرعشو .. قربت منها ندى و قعدت تساعد فيها و حتى هي ايديها يرعشو تتمنى تحضنها و تبكي .. بس دايره روحها قويه عشان ما تزيد عليها ..
دقايق و سمعت صوت سيارات و كلاكسيات .. عرفت انه اكرم وصل .. لبست عبايتها و وشاحها و نزلت هي و ندى .. طلعو برا و لمحت بوها من بين غطاء راسها .. تلفتت يمين و يسار تمنت امها تكون موجوده بس خاب ظنها .. ماكانش فيه الا هي و ندى و شوي من صاحباتهم في المركز .. و في السيارات كان فيه اكرم و صحابه و اقاربه .. ركبت جنب اكرم و دارو بيها لفه في البلاد و بعدها روحت للفندق اللي حاجزين فيه ..
اول ماوصلو كان اكرم بيطير من الفرحه كان يلقى يفتح البلاكونه و يعيط ب اعلى حسه ... و هي كانت فرحتها باينه على ملامح وجهها و صوتها ..
اول ما خشو تقدمت هناء خطوات و هي عاطيتلا بظهرها تفرك في يدها و ابتسامتها واسعه .. و هوا سكر الباب و يشبحلها و دمعة الفرح فعيونه .. ثواني و تلفتت هناء و قعدت تشبحله .. و هوا يشبحلها .. لحظات و بخطوات سريعه كل واحد فيهم قرب للثاني و حضنه بكل قوته .. بكل ما حملت سنواتهم الفايته من فراق و عذاب و هموم و شوق و حب .. حسو و كأنها استراحة محارب لكل واحد فيهم على قد ما حاربو و عانو عشان يكونو لبعضهم .. حسو و كأنه عظامهم بتلتحم في بعضها و كانهم بيقعدو جسد واحد زي ماهما روح وحده ..
غلبوهم دموعهم و بكو هما الزوز .. دموع حب و شوق و فرح .. دموع فرغو فيها عذاباتهم و شقاهم في هالحياه ..
الحب اللي ما مر عليه عقبات و مشاكل مش حب .. الحب اللي ماصارش فيه فراق و لوعه و شوق مش حب .. الحب الحقيقي عمره ماكان راحه و روتين و هدوء و خلو من المشاكل .. الحب الحقيقي مواقف تثبت فيها انها بنت أصل و يثبت فيها انه راجل ..❤
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
جت القايله و هناء و اكرم مزال راقدين .. لانهم ما ذاقوش طعم النوم لعند الصبح ..
هناء راقده في حضن اكرم و اكرم حاضنها بقوه .. و كأنه خايفها تهرب منه .. فاقت هناء قبله شبحتله و ابتسمت .. قعدت تتأمل في ملامح وجهه و تبتسم .. لعند ما تذكرت شعرها .. مدت يدها و لمست الباروكه اذا كان تابته او لا .. عدلتها و انسحبت من بين دراع اكرم و خشت للحمام غسلت و حطت باروكتها على جنب و بدت تتوضى للصلاه .. في اللحظات هادي حس اكرم بغيابها عن حضنه ناض من السرير و سمع صوت في الحمام ابتسم وعرف انها فيه .. فتح باب الحمام و تفاجأ و قعد واقف يشبحلها .. بينما هناء قامت راسها شافت صورته معكوسه ع المرايا .. تلفتت فيه بفزع و حطت يدها على راسها و قعدت تشبحله و دمعه ساخته نزلت من عينها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
