#توبه_قاصره
#حقيقية
(15)
اكرم : بس مش هذا سبب تأخري ..
هناء : شنو امالا ؟؟..
اكرم : كنت عند بوك ..
هناء تفاجئت : شنو ؟؟؟ .. و علاش ؟..
اكرم قعمز ع الكرسي المقابل و قال : خطبتك منه ..
هناء حطت يدها ع فمها : شنوو؟؟..
اكرم : ايه .. وهدا الطبيعي ..
هناء ملامحها تغيرو و بانت عليها العصبيه : علاش خطبتني منه اني موافقه .. و مش محتاجه موافقته ..
اكرم : هبله انتي ؟؟ .. يعني متوقعه تنخطبي و تتزوجي بدون بوك ..
هناء: ايه عادي ..
اكرم دغدغ خشمها بصبعه و قال : لا يجوز شرعااا ..
هناء بعدت عنه و مزال معصبه ..
اكرم : ياعمري كله انتي .. اني عارف الظروف اللي مريتي بيهم و عارف اللي داروه فيك اماليك .. بس اني نبيك حلالي مضطر غصباً عني نقعمز معاه و نخطبك منه و نحط ايدي في ايده و نعقد عليك .. هدا كله مايجيش بلاه يا هنوو..
هناء حطت يدها ع راسها بضيق و قالت : خلاص خلاص .. خليني بروحي توا .. حاسه خلوقي في شيشه ..
اكرم نزل راسه و سكت حاس بيها و عارف نفسيتها تعبانه عشان مرضها و عشان اللي شافاته من عيلتها ..
هناء لفت وجهها للروشن .. و اكرم وقف و قام الورد حطه ع الطاوله و طلع العطر و قرب منها و بخ منه عليها ..
هناء مادارت اي ردت فعل .. و اكرم نزل على ركبيه و شد يدها و قال : قلبي ؟..
هناء مابت تشبحله ..
اكرم : عشان خاطري شبحه وحده بسس .. شبوحه صغنونه بس ..
هناء شبحتله و نزلو دموعها ..
اكرم بصوت حنون : علاش الدموع باهي ..
هناء: مش عارفه .. حاسه الدنيا ضايقه بيا .. جسمي كله يوجع فيا .. مرات نفكر مانبيش نظلمك و نتزوجو .. شنو دنبك تاخد وحده مريضه ..
اكرم : اشششش .. اني معاك .. و الدنيا اللي ضايقه بيك اني هني عشان نكون معاك و نوسعها ليك بحبي ليك .. و جسمك اللي يوجع فيك هادي مرحله و حتمشي و اني يدي في يدك حنمشوها مع بعضنا .. و معادش تقولي شنو دنبك .. دنبك انتي لانك حبيتي واحد لصقه كيفي مش حيخليك بكلل ..
هناء ابتسمت : احلى لصقه .. ياريت الدنيا كلها انت و ندى ..
اكرم ب انزعاج : ييييي من ندى هادي .. قريب بنلوحها من فوق سطح المصحه و نفتك منها ..
هناء تضحك : بعيد السو عنها وخيتي توأم روحي..
اكرم : ااخخخ .. الصبر و خلاص ..
هناء وقفت : خاطري نطلع نتمشى برا ..
اكرم : تحملي هاليومين برا الجو صقع .. ضروري نحافظو مانبيش تمرضي توا ..
هناء : اوفف مليت ..
اكرم : توا نمشي نجيب لابتوبي معبى افلام و نتفرجو اني وياك ..
هناء هزت راسها و سكتت ..
اكرم : ندى اكيد مشت تمشي امور المركز .. خليك هني راجيني لين انجي ..
هناء: اوك .. ماتتأخرش ..
ودعها اكرم و كان بيطلع بس سؤال هناء وقفه ..
هناء: بابا .. سألك عني و عن حالي ؟.. قصدي حكيتله عن مرضي ؟؟..
اكرم : ايه ..
هناء ب اهتمام : شنو قال ..
اكرم: متحشم منك .. متحشم يجي و يشوفك .. مش قادر يقابلك ..
هناء نزلت راسها و سكتت ..
اكرم : توقعي في اي لحظه يجي .. خليك جاهزه ..
هناء : تمام ..
مشى اكرم يجيب لابتوبه .. بينما ندى مشت للمركز تشوف الشغل و تطمن على اموره ..و هي خاشه القت فراس منزل سناء و بيمشي .. لما شافها رجع درس سيارته و نزل ..
فراس بعد ما سلم عليها قال : علاش ماتردي على تليفونك ..
ندى : اسفه والله معادش نفضى .. كل وقتي مع هناء في المصحه ..
فراس: اوك نعرف انها صاحبتك و مريضه .. بس مهما كان دقيقه ما بتديرلك شي ..
ندى : اوك .. مره تانيه انرد ..
فراس: علاش هالبرود هدا ..
ندى : لاني تعبانه هلباااا .. ليا ايام مارقدتش ..
فراس : تمام ..
ندى : مش مصدقني .. شوف لوجهي كيف مولي من قلة النوم و التعب ..
فراس : حق .. مولي زي العنزه الوالده ..
ندى فتحت عيونها مصدومه من كلامه ..
فراس قعد يضحك و قال : نبصر والله زي القمر ..
ندى لفت وجهها و قالت : اضحك عليا توا ..
فراس : خلاص ندووشه والله نبصر ..
ندى بسرعه ابتسمت و رضت : حبيتها ندوشه هادي ..
فراس : سلمها اللي قلبها ابيض و بسرعه ماترضى ..
ندى : يلا توا بنمشي ورايا شغل هلبا و بعدها بنرجع لهناء اكيده قاعده بروحها ..
فراس : ربي يعاونك .. اهم شي لما نتصل تردي ..
ندى : اوووك.. يلا باي ..
خشت ندى للمركز و قعد فراس يشبحلها لين اختفت .. رجع لسيارته و قال في خاطره : شكلها البنت قعدت تخش لخاطرك يا فراس .. هدا كله و مزال ما تزوجتها امالا كان تزوجتها كيف ..
قطع عليه حبل افكاره اتصال من امل حبيبته .. سكر عليها و ولع السياره و تحرك من قدام المركز ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بعد وقت كانت هناء مقعمزه ع الكرسي لما خبط باب دارها .. تلفتت القت بوها واقف ع الباب .. لما شافاته وقفت و قعدت تشبح فيه و الدموع في عيونها .. بينما هوا قرب منها بخطوات بطيئه و عيونها مكسورات مش عارف كيف يبدا الكلام معاها او كيف يبدا اعتذاره .. و هل اعتذاره كافي او لا ..
عبدالله و نظرته في الارض : كيف حالك يا بنتي ؟..
هناء بصوت خافت و العبره خانقتها: بنتك ؟..
لفت وجهها للروشن و هي تحاول تشد دموعها ..
استجمع عبدالله قوته و قرب منها حضنها وقعد يبكي ..
عبدالله : سامحيني يابنيتي .. سامحيني ..
قعد يطلب في السماح منها .. و هي قعدت تبكي و بس .. مش قادره حتى تنطق و ترضى انها تسامحه .. بعدت عنه و كان جسمها كله يرعش ..
عبدالله : عارف روحي غلطت معاك هلبا .. و قصرت في حقك .. عارف روحي رميتك ع الشقى و انتي مزال صغيره .. سامحيني يابنتي ..
هناء حطت يديها على ودانها و قالت : معادش تقول بنتي .. معاش تقولها ..
سكت عبدالله و حط يده على وجهه وقعد يبكي ..
هناء بصوت مجروح و دموعها ينزلو : دمرتوني انت و ماما .. جبتوني للحياه و خليتوها تربيني بقسوتها .. و لما مليتو مني زوجتوني لواحد اكبر منكم .. زهرة عمري قضيتها و اني نموت الف موته معاه .. ذل و اهانه و قلة قيمه .. كان يخون فيا و يقول فيها ليا و اني ساكته خايفه نتكلم يلزني .. خليتوني من غير سند لوحتوني ليه و معاش سئلتو عني ولا دورتوني .. اخر شي بعد ما اطلقت بدال مانرتاح ربي يبليني بمرض .. مرض كسر اخر شعره للتحمل عندي ..
عبدالله كان بيقرب منها و بيواسيها .. بس هي بصوت عالي قالت : اطلع براا .. براااا
على كلمتها خشت ندى تجري .. تشبح لي عبدالله و هي مش عارفه هدا منو ..
ندى بصوت عالي : من انت ؟؟.. شن درتلها .. هناء خيرك شنو فيه ..
شبحلها عبدالله و طلع و الدمعه في عينه .. بينما ندى حضنت هناء و قعدت تهدي فيها ..
هناء : هدا اللي مفروض يكون بوي .. هدا اللي مفروض يكون معايا في اقسى لحظات حياتي اللي عايشتهم توا .. هدا السند و الدم .. هذا بابا ..
ندى : اششش خلاص .. خلاص اهو طلع .. اهدي توا انوصيهم معاد يدخلولك حد الا اني و اكرم .. هدا كله منه اكرم البارد.. اني ماشيه و مخليتك معاه كيف يسيبك بروحك و يمشي ..
هناء قامت راسها من حضن ندى و قعدت تمسح في دموعها ..
خش عليهم اكرم القى هناء تبكي .. قرب منها يبي يكلمها و يسألها "خيرك" بس ندى بعدت عنه هناء و وقفت قدامها ..
اكرم يشبح لندى : شنو فيه ؟.. خيرها هناء ..
ندى بنظرات ناريه قامت اصبعها و قالت : انت كيف تمشي و تخلي هناء بروحها .. اني مش مأمنتك عليها .. لكن الحق فيا اني .. معاش نعبى عليك ..
اكرم نزّل اصبعها و قال بعصبيه : اصبعك هدا ما ينحطش في وجهي تسمعي فيا... يلا بعدي عن قدامي خليني نكلم خطيبتي .. انت مش حتخافي عليها اكتر مني ..
ندى بنبرة استفزاز : هاهاها ..خطيبتك ضحكتني .. كان هناء خطيبتك و بس .. اني هناء دنيتي كلها .. و حط في بالك دامنك بتتزوجها حتلقاني في وجهك ديما ..
اكرم عروقه برزو و عيونه قعدو حمر .. تمناها شاب و عطاها طريحه فش غله فيها .. قعدو يشبحو لبعضهم نظرات فيهم نار و شرار .. لين سمعو صوت ضحكة هناء .. شبحولها هما الزوز و القوها من الضحك لين مطبسه و حاطه ايديها على ركبيها ..
هناء شبحتلهم و من بين ضحكاتها قالت: محلاكم و انتم تتعاركو عليا .. ههههه .. ربي خدا مني بابا وماما .. و عوضني ب بابا و ماما تانيين ..
اكرم بمجرد ماشاف ضحكتها و سمع كلامها تغيرو ملامحه للابتسامه و الهدوء و قعد يشبحلها بحب ..
و ندى شبحت لاكرم بطرف عينها و قالت في داخلها : ربي يصبرني على هالشكل توا بنتحمله غصبا عني غير شنو عجبك فيه يا صاحبتي بس ..
اكرم : شنو اللي صار و علاش كنتي تبكي ؟؟..
ندى كانت بتولع و بتتكلم .. بس اكرم سكتها بحركة يده✋..
اكرم : هناااء .. نبي نسمع منك ..
ندى سكتت بغيض .. خلتهم و مشت وقفت ع الروشن ..
هناء قعمزت ع الكرسي : بابا كان هني ..
اكرم : قلتلك انه في اي لحظه بيجي ..
هناء: ايه ..
اكرم : وشنو صار ؟..
هناء : طلب مني السماح و اني تأثرت قعدت نبكي .. فشيت فيه غل السنين اللي فاتو كلهم ..
اكرم : معليش حبيبتي .. توا بعد قلتي اللي فخاطرك حترتاحي و تسامحيه ..
هناء : خلاص اكرم غيّر الموضوع ..
اكرم : حااضر غيرناه .. تعالي شوفي .. جبتلك البوم صوري من لما كنت بيبي .. و جبتلك لابتوبي مليان افلام اكشن و مغامرات و رومنسي و فنتازيا .. كله كله ..
هناء ابتسمت و خدت منه الالبوم و بدت تتفرج ..
هناء اشرت على صوره : هدا انت لما كنت صغير .. محلااااك صغنون و مشدق ..
قربت ندى و شافت للصوره و ضحكت بصوت عالي .. شبحلها اكرم بعصبيه و خدا نفس يهدي في روحه باش مايدير مشكله ..
ندى : هههههه ووووه مشناه .. تقول دورايمون ..
هناء غطت وجهها و قعدت تخض من الضحك .. و اكرم شبح لندى بي غل بس لما شاف ضحكة هناء قعد يضحك معاهم ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بعد ايام روحت هناء لحوشها و كانت فرحانه لأنه في اللحظات هادي اكرم ماشي هوا و امه وعمه يخطبو في هناء من بوها ..
ندى : توا في اي لحظه توقعي يتصل بيك سي السيد و يقولك خلاص خطبتك رسمي ..
هناء : اني نراجي في اليوم اللي بيتصل بيا و يقولي خلاص عقدت عليك.. وقتها نبي نحضنه من قلب قلبي ..
ندى بطرف عينها : مش ع اساس تبنا و تحجبنا و قعدنا نصلوو ..
هناء : ههههه .. ركزي ياحوله قلتلك لما يعقد عليا ..
ندى : حتى كان .. مزال لين تديرو عرس ..
هناء: عينك يقعد حلالي خلاص .. و بعدين مابنديرو عرس .. كله دوه فاضيه اهم شي اني وياه يجمعنا سقف واحد ..
ندى : وين بتسكنو ..
هناء : مش عارفه .. مش حنفكر في الامور هادي .. اساسا عندي رحلة علاج بعد الزواج و هوا بيسافر معايا .. اخخ قلبي واجعني عليه .. اول ايام زواجنا بنقضوهم بين الدكاتره و المصحات .. بدال مايكون شهر عسل حيكون شهر علاج ..
ندى باستها : قدامك العمر كله معاه .. حتمشو شهور عسل لين تملو من وجوه بعض ..
هناء: حبيبي هدا مستحيل نمل منه ..
ندى : وععع مشناه .. شنو جابه لي فوفا حبيبي ..
هناء : علاش ماتحبيه كرومتي ..
ندى : نغار منه .. بياخدك مني ..
هناء : ندوو انتي مستحيل حد ياخدني منك .. انتي في كفه و الكون كللله في كفه ..
ندى حضنتها : وووينك يا اكرم تجي تسمع هالكلام ..
ضحكت هناء ... و قلبها فرحان انه ربي عوضها ب ندى و اكرم يحبوها و يغارو عليها من بعضهم 😄..
بعد لحظات اتصل بيها اكرم و قاللها انه الخطوبه تمت على خير و انهم بعد اسبوعين حيعقدو و يديرو حفله صغيره .. عشان يقدر يسافر معاها للعلاج ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
