#توبة_قاصره
#حقيقية
(16)
بعد ايام كانت هناء و ندى في السياره متجهين للمصحه عشان يديرو تحاليل ..
ندى : فرحي الاسبوع الجاي .. كنت خايفه انك تكوني مسافره او تعبانه و ماتقدري تحضريه ..
هناء : الحمدلله اهو نقدر نوقف و نتحرك ..
ندى : خف الوجع ؟..
هناء: الحمدلله .. مع المسكنات كويس ..
ندى : تو نشوفو شن يقوللنا الدكتور ..
رن تليفون ندى و ردت ..
ندى : الوو فوفا ..
فراس بعصبيه : هكي يا ندى لين نتصل اني ..
ندى : والله يا فوفتي وحده فرحها الاسبوع الجاي .. و تبي تهتم بصحة صاحبتها .. و تهتم بالمركز .. طبيعي مش حتلقى وقت ليك ..
فراس: شنووو ؟؟..يعني اني في اخر القائمه ..
ندى : تي لااا يا فوفا مش هكي ..
فراس بعصبيه : انتي وين توا ؟؟
ندى : علاااش؟؟..
فراس بصوت عالي : انتي .. وين ؟؟
ندى : في السريع .. بنمشي للمصحه اللي تعالج فيها هناء .. عندها تحاليل ..
فراس : اني ماشي غادي توا .. و يا ويلك مانلقاك ..
ندى ببرود : اووك.. يلا تشاووو..
يكرت ندى و قعدت تضحك ..
هناء: مسكين ليش هكي تعصبي فيه .. راهو تجيبيله السكر ..
ندى : مايجوش الا بالعين الحمرا ..
هناء: بس مره مره حني ..
ندى : لا حني لا اصبغي .. قبل كنت اني اللي نجري وراه و توا لما فوتته و انشغلت عنه و وريته انه عندي اولويات غيره قعد هوا اللي يجري و مايدري ..
هناء غمزت: قدعه ..
ندى قامت حاجبها : نعجبك ..
لما وصلو للمصحه خشت هناء دارت تحاليلها و قعمزت هي و ندى يراجو في النتايج .. لحظات و شافت هناء فراس يدور في المصحه يدوِّر في ندى ..
هناء: الحب وصل ..
ندى تلفتت : يييي علينا .. نبي نشوف النتايج معاك ..
هناء: بري بري اشقي بروحك .. اني توا ناخد النتايج و نراجيك لين تكملي و نركبو للدكتور مع بعض ..
ندى : تمام ..
وقفت ندى و مشت لجيهة فراس القاته واقف على ممرضه و يسأل فيها ..
ندى وقف و حطت يدها في وسطها و قالت : يا سلااام ..
تلفت فراس و قال بسرعه : كنت نسأل فيها عن مكان المختبر ..
ندى قربت منه و عيونها مفتوحات على وسعهم : دايرني دروج باش تكلم الممرضات ع اساس تسأل عني ..
فراس تلفت جيهة الممرضه اللي مشت و رجع شاف لندى و قال : والله لا .. و ربي لا .. مالقيتش ممرض نسأله ..
ندى : انت اصلا مادورت .. و بلعاني مشيت للطرف فيهم و كلمتها ..
فراس : اقسم بالله لا ..
ندى لفت وجهها بعصبيه ..
فراس : ندوشه بالله عليك .. حد عنده هالورده هادي و يشبح للاوراق ..
ندى : لا ورقه لا غصن .. نحسابكش هكي خفيف ..
فراس : هيييه .. اعرفي شنو تطلعي من فمك ..
ندى : توا كان اني القيتني واقفه مع ممرض راك ..
قاطعها: قلبت المصحه ع راسك و راسه ..
ندى : ها شفت .. اني زعلانه و مش حنرضى الا بهديه ..
فراس : قولي هكي من الاول ..
ندى : امالا خلاص حتى بهديه لااا ..
فراس نفخ : خلاص خلاص تدللي شنو تبي ..
ندى : خلاص معاش نبي .. تقول فيها فوق من نفسك ..
فراس بصوت حنون : من قلبي يا قلبي ..
ندى شبحتله : يا لهووي .. اول مره تقول كليمه حليوه ..
فراس ابتسم وقام حاجبه : مزال ماشوفتي شي ..
ندى : يؤبشني يا نااس ..
ضحك فراس و قعدو يهدرزو مع بعضهم..
بينما هناء كانت واقفه تراجي في النتيجه لعند ما اتصل بيها اكرم ..
اكرم : شنو طمنيني ؟؟..
هناء: اهو قاعده نراجي ..
اكرم : هيا قريب بنوصل ..
هناء : حبيبي علاش متعب روحك .. تو نطمنك ع الفون ..
اكرم : ابدااا .. ضروري نكون معاك .. هما لحظات مهمه مش حنخليك بروحك .. يدي على يدك ..
هناء بعفويه : مش بروحي اهو معايا ندى ..
اكرم : واااااك .. بالله عليك هنو معاش تجيبي اسمها قدامي ..
هناء : ههههه تغار منها ..
اكرم : اايه نغار منها لانها مشاركتني في قلبك .. و نغار عليك من اي شي ..
هناء : باهي خلاص حبيبي .. انتبه للطريق توا ..
اكرم : تمام ..
سكرت هناء و تنفست براحه .. فرحانه انه ربي رجع جمعها بيه بعد ما كان مستحيل .. اصبح شي محال و واقع .. قعد خطيبها و بعد اقل من اسبوعين حيكون زوجها ..
قطع حبل افكار هناء صوت الممرضه اللي سلمتلها نتائج التحاليل ..وقفت شدتهم بيدها و انحبسو انفاسها .. ما سألت الممرضه عن النتيجه .. استعمرها الخوف و قعمزت تراجي في ندى ترجع زي ما وعدتها .. دقايق و جت ندى و وراها اكرم ..
ندى بقلق : ها .. شنو قالتلك الممرضه ..
اكرم : طمنيني ..
هناء: شي .. ماسألتها .. هي نمشو نركبو للدكتور ..
ندى : يلا ..
ركبو هناء و ندى و اكرم للدكتور .. و اول ما خشو لاحظ الدكتور الخوف على ملامح هناء .. حطت هناء التحاليل قدام الدكتور و قعمزت هي و جنبها ندى .. و اكرم قعد واقف يسبح للدكتور بترقب ..
الدكتور فتح مغلف التحاليل و قعد يقرا ... لحظات و ابتسم ..
ندى : طمنا يا دكتور ؟؟..
الدكتور : الحمدلله التحاليل كويسه .. الخلايا السرطانيه انتشارها وقف ..
هناء دموعها نزلو و قعدت اتمتم ب " الحمدلله" .. و اكرم الفرحه ملت عيونه .. بينما ندى حطت يدها على هناء و قالت ..
ندى : يعني خلاص .. شفت ..
الدكتور : توقف انتشار الخلايا مش معناها الشفاء .. لا .. معناها خشينا اول مرحله من مراحل الشفاء .. حنبدو العلاج بالكيماوي ..
هناء شهقت بصوت واطي .. قرب اكرم منها .. و ندى شدت يدها ..
الدكتور : ماتخافيش .. باذن الله كل شي حيكون كويس .. العلاج فعال و ب اذن الله حتشفي بالكامل ..
هناء نزلت راسها و قالت : بسس .. قصدي شعري و شكلي .. هدا كله بيطيح ..
اكرم نزل على ركبيه و حط عيونه فعيونها : هنوو .. شن قلنا احني .. مش قلنا فتره و تمشي ..
ندى : هناء حبيبتي .. خليك قويه.. كل شي بيرجع ره ..
هناء : فرحت لما نتايج التحليل طلعو كويسات .. كنت خايفه من الكيماوي .. نخساب خلاص معاد بنحتاجولا ..
الدكتور : يا بنتي الكيماوي ماهو شي يخوف ولا هو اخر الدنيا .. فترة علاج بتاخديها و بترجي افضل من قبل .. اهم شي تكوني قويه و معنوياتك مرتفعه و تحافظي على صحتك و اكلك و مناعتك ..
هناء مسحت دموعها و قالت : ممكن نأجلوها لبعد اسبوعين .. فرح صديقتي .. و فرحي اني ..
ندى : تبصري ولا ؟؟
اكرم : مستحيل ..
الدكتور : صحتك اهم من اللي ذكرتيهم .. العلاج حتبديه بعد يومين .. تاخدي جرعتك و ترجعي للحوش .. صح اول جرعتين حتتعبي فيهم .. بس باقي الجرعات لا ..
ندى : حنأجل فرحي ..
هناء هزت راسها : لالا .. خلي كل شي زي ماهوا .. اني قويه .. مر عليا اللي اكبر من هكي ..
اكرم : حتمشي للفرح و انتي بكامل اناقتك .. و حنمشو اني وياك نشرو احلى قفطان ..
ندى شبحت لاكرم : شريناه اني وياها القفطان .. سبقناك..
اكرم : اوففف .. الحمدلله اهو بتعرسي الاسبوع الجاي ..
ندى : حتى كان .. صاحبتي مابنخليها ..
هناء وقفت بملل : اوففف .. شايفين انه هدا وقت مشاكلكم ..
الدكتور : شنو فيه .. وسعو بالكم .. انتم بتساندوها ولا بتزيدوها ..
ندى : عاجبك هكي ..
اكرم شبحلها بطرف عينه و فاتها ..
الدكتور : خليك جاهزه يا هناء بعد يومين حنبدو اول جرعه ..
هناء : تمام شكرا يادكتور ..
طلعت هناء و لحقوها اكرم و ندى ..
هناء : ممكن تخلوني بروحي ..
اكرم : نبي نقعد معاك ..
ندى : خلاص روح انت و اني تو انروح بيها ..
اكرم عض على سنونه و كور يده .. يتحمل في ندى عشان خاطر هناء ..
اكرم : هنو حبيبي يلا ننزلو نتمشو ..
هناء بعصبيه : خلوني بروحي قلتلكم اني ..
ندى : تمام حبيبتي انتي اهدي بس ..
اكرم : خودي وقتك هنو .. اني نراجي فيك ..
مشت هناء بعدت عنهم و نزلت للحديقه .. القت مقعد قعمزت عليه و قعدت شارده تفكر في نفسها ..
هناء في داخلها : زعما بنقدر نتحمل نشوف وجهي في المرايا .. شعري رموشي حواجبي .. بشرتي .. كل شي فيا بيتغير .. اكرم بيقدر يتقبلني .. اني بنقدر نتقبل نظرته و نظرة الناس ليا .. بنقدر نتحمل الالم الجسدي و الوجع .. و التعب النفسي ..اخخخ ياربي .. نبي منك تعطيني القوه بس و تكون معاي .. زي ماكنت معايا قبل .. كون معايا نواجه مصيري .. ياربي اني رضيت بقضائك راضيني بشفائك يارب ..
قعدت هناء تدعي لربي و شارده في وجوه الماره .. من غير ما تلاحظ اكرم اللي يشبحلها من بعيد و قلبه نار عليها .. خايف عليها من اللي جاي .. خايف على نفسيتها و خايف عليها من الوجع .. يتمنى لو يكون مكانها و ياخد عنها كل الالم اللي حست و اللي بتحس بيه ..
لحظات و قطعت ندى لحظات الشرود على هناء و قعمزت جنبها .. تلفتت هناء لندى و ابتسمت ..
ندى حطت يدها على يد هناء و قالت : ماتخافيش حنتغلبو حتى على المحنه هادي .. زي ما تغلبنا على اللي قبلها ..
هناء : اتاري اللي صارلي كله في الماضي .. كان ربي يهيأ فيا لشي أكبر .. كان يقويلي في عودي عشان نتحمل اللي جاي ..
ندى : و الحمدلله انتي قدها هنوو .. تو تشوفي كل شي بيمشي و بيقعد ذكرى ..
هناء تنهدت و تلفتت ورا تدور في اكرم .. القاته واقف يشبحلها ابتسمتله .. و هوا رد الابتسامه ..
ندى : وووه بالله ما تتبسميلا تو يجي يجري ..
هناء ضحكت و قالت : يلا نوضي محتاجه لشخص جنبي ..
ندى شهقت : و اني .. اهو جنبك ..
هناء : شخص تكون عنده لحيه و كتوف عراض ..
ندى : خززززي يا خاينه .. توا كتفي معاد يعجبك..
هناء ضحكت و اشرت لاكرم من بعيد ..
ندى : ووووه جي جي ..
ناضت ندى و هي بارمه وجهها عن جيهة اكرم .. و اكرم جاي و يشبح لهناء و هوا مبتسم .. قعمز جنبها و قعد يتلفت يمين و يسار ..
هناء: خيرك؟..
اكرم : بنشد يدك ..
هناء ضحكت .. اكرم شد يدها و قال ..
اكرم : ربي مايحرمني من هالضحكه .. نبيها ديما على وجهك ..
هناء : ان شاء الله ..
اكرم : كل مُر سيمُر .. ديما تذكري هالجمله ..
زاد ضغط على يدها و قال : اني معااك .. ع الحلوه و المره .. وعد مني مش حنسيب يدك طول ما اني عايش ..
هناء شبحتله بحب : نحبك ..
اكرم بصوت زي الهمس : نموت فيك ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مرو اليومين و جي موعد اول جرعه لهناء ..
كانت مقعمزه ع الكرسي و تاخد في الجرعه .. و جنبها ندى ماسكه يدها التانيه .. و اكرم مقعمز في الكرسي اللي مقابلها و يبتسلمها و يعطيها في طاقه ايجابيه ..
قعدو هما الزوز يهدرزو عليها و هي تسمعلهم و تضحكلهم من برا و من الداخل حاسه زي النار تمشي فعروقها .. حرارتها ترقى و تنزل تحاول تكون قويه عشانهم .. حاسه بخوفهم عليها و انهم يحاولو يتماسكو على خاطرها ..
تمت الجرعه جت الممرضه اطمنت عليها .. حاولت هناء توقف بس حست الارض تدور بيها سندوها اكرم و ندى و حاولو يوقفوها ..
اكرم : ارتاحي ..
ندى قامت حاجبها : حطي راسك على كتفي .. طبعا انت مش حتقدر تحط راسها ع كتفك .. مهما كان مش زوجتك هي ..
اكرم شبحلها بغيظ و سكت ..
هناء بصوت مبحوح : نبي نروح .. تعبانه .. جسمي كله يوجع ..
اكرم : الدكتور قال طبيعي .. اني سألته عن اللي بيصيرلك قالي نفس اللي انتي حاسه بيه توا ..
ندى : يلا نروحو ..
ركبت هناء جنب كرسي ندى .. و اكرم اطمن عليها و ركب في سيارته و قعد وراهم لين وصلو للحوش .. اطمن عليها و روح و هوا يتمنى يكون معاها في كل اوقاتها ..
ركبت هناء لدارها و رقدت .. اتكت جنبها ندى تدير في بالها عليها و ترعى فيها بعيونها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
جي الصبح كانت هناء مزال في سريرها متغطيه و حاسه بالصقع .. وجنبها ندى تفطر فيها بيدها ..
هناء : اكرم اتصل ..
ندى : ايه اتصل و قلتله انك راقده ..
هناء: علاش مانوضتيني
ندى : ياسلام انتي راقده .. كيف تبيني انوضك .. قال الدكتور اهم شي الراحه ..
هناء هزت راسها ماعندها نيه تتناقش او تتكلم ..
مر الوقت و اتصل اكرم فيديو .. و قعد يهدرز هوا و هناء و يطمن عليها ..
مرت الايام و جي فرح ندى .. خشت هناء للحمام تدوش عشان تلبس و تمشي للحفله .. وقفت تحت الدوش و بدت تفسل في شعرها .. حركت يدها ولاحظت الشعر يطيح في يدها ... فزعت من المنظر .. و قعدت كل ماتحرك شعرها يطيح اكتر .. قعدت ترعش كله منها .. قعمزت على حافة الحوض و قعدت تتنفس بسرعه و خايفه .. ركزت القت جذور الشعر بيضا زي الشيب .. حطت يدها على وجهها و قعدت تبكي .. انهارت و قعدت تصرخ بصوت مسموع .. وقتها ماكانش معاها حد .. ندى في المركز يمكيجو فيها .. و اكرم مقعمز في سيارته قدام باب حوشها يراجي فيها تنزل بيش يوصلها للمركز عشان تمكيج و نلبس غادي ..
ما كان معاها حد .. بس كان معاها الله .. زي ما يكون ديما و في كل لحظه معانا و يشوف فينا في كل لحظات شدتنا و رخائنا .. يراقب فينا يعينه التي لا تنام .. يخفف ذنوبنا بصبرنا على البلاء .. يرحم فينا .. و يمهلنا و يعطينا الفرص للرجوع ليه ولا يهملنا ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بعد ساعه لبست هناء ملابسها و وقفت قدام المرايا .. حاسه بالوهن و بالتعب و جسمها كله منهار و نفسيتها تعبانه .. حاولت تقاوم عشان تكون مع صاحبتها في يوم فرحها .. نزلت لوطه و قعمزت جنب اكرم ..
اكرم : نورتي ياقلبي يا احلى بنت شافتها عيني ..
هناء ابتسمت بوهن و سكتت .. لاحظ اكرم انها مش تمام .. ولع السياره و فتحلها اغنيه ..
اكرم : تعرفي الاغنيه هادي كل مانسمعها تخطري انتي عليا ..
هناء تساير فيه : شنو هي ..
اكرم : نفسي اقوله لي اليسا ..
هناء هزت راسها بتعب و تلفتت للروشن .. و قعدت تسمع للاغنيه .. حست انه عندها رغبه قويه للبكى .. حاولت تشد روحها بس ما قدرت .. بكت و انهارت ..درس اكرم سيارته ع جنب شدها من يدها و حاول يهديها ...
اكرم : هنو حبيبتي .. اهدي ..
هناء : معاش قارده يا اكرم ..
اكرم : اتبتي هناء .. فتره و تمشي ..
هناء قعدت تشبحله : اليوم شعري بدا يطيح ..
اكرم : طبيعي هدا يا عمري .. بس بعدها حيرجع زي قبل و احسن .. و حنتزوجو .. و نجيبو بيبيات حلوين ..
هناء هدت و قعدت تسمعله ..
اكرم : نبي ولد و بنت توأم .. و انتي تسمي البنت و اني نسمي الولد .. شنو رايك ..
هناء ابتسمت و هزت راسها : يعني بنرجع كويسه و بنجيب حتى صغار ..
اكرم ابتسم : ااايه .. و هلبا صغار ره .. نبي كل سنه تجيبي نظام ارانب ره ..
هناء ضحكت ..
اكرم : ايوا هكي اضحكي ياقلبي .. مافي شي يستاهل .. تو تشوفي حنرجعو زي قبل و احسن و حنسافرو شهر عسل ..
هناء : وين ؟..
اكرم : انتي تختاري المكان .. اني بالنسبه ليا اي مكان معاك جنه ..
هناء مسحت العاقب من دموعها و قعدت تشبحله بحب .. كيف قدر يهديها و يطلعها من حالة الحزن و يعطيها دفعة أمل ..
اكرم : يلا توا نمشو للمركز .. تمكيجي و تأنقي و تتألقي و تلبسي قفطانك و تبهريهم بجمالك الساحر ..
هناء ابتسمت : يلا حبيبي ..
ولع السياره و رفعها للمركز .. خشت القت ندى يمكيجو فيها .. وقفت عليها حضنتها من وراها ..
ندى : نبيش دموعي ينزلو ..
هناء : حتى اني .. اليوم فرح و بس ..
ندى : فرح و بس .. حتى بعدين مانبوش بكى ره ..
هناء : هههه نحاول ..
مر الوقت و كملو ندى و هناء زينتهم و لبست ندى فيلوها و قعدت هناء تبكي لما شافتها ..
ندى مسكت يدها : اششش .. مانبو نبكو و مكياجنا يخرب ..
هناء مسحت دموعها و قعدت تمروح على وجهها ..
ندى : يهون عليك فوفا يشوفني و اني مكياجي سايح يمشي يهرب مني ..
هناء : ههههه .. هيا خلاص ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في الصاله كانت ندى مقعمزه و هناء كل شوي تتحرك .. تسلم ع الضيوف و لما تحس بالتعب ترجع تقعمز .. لحظات و جوها الموظفات اللي معاها في المركز و نوضوها عشان ترقص .. ناضت رقصت شوي و تعبت ماقدرت تكمل .. حست بالضعف و انها مافرحت و رقصت في عرس صاحبتها زي ما كانت تحلم ..
بعد ساعتين من الحفله جي الوقت اللي بيخش فيه فراس عشان يروح بي ندى .. خش الصاله و قعد يشبحلها ب اعجاب .. و هي تشبحله بحب و فرح .. و كل شوي تتلفت لهناء تتطمن عليها ..
جي فراس وقف جنبها و همسلها في ودنها ..
فراس : محلاااااك .. تهبلي .. الجمال هدا كله ليا اني ..
ندى ابتسمت بخجل ..
فراس : يلا امتا يخلونا نروحو .. متحمس لي دخلتنا هلبااا..
ندى من صوت الموسيقى العالي ماسمعاته كويس تحسابه قاللها نحبك ..
ندى : حتى اني ..
فراس فتح عيونه و قال : شنو ؟..
ندى مبتسمه بثقه تعاود فيها : حتى اني ..
فراس سكت مستغرب و قعد يشبح قدامه ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مرت الدقايق و ركبت ندى مع فراس في طريقهم للفندق .. فاتحين اغنيه معليينها و يغنو و يرقصو .. لعند وصلو لجناحهم و ندى مبتسمه و فرحانه .. و اول ماتسكر عليهم الباب ندى سكتت و قعدت ترعش ..
فراس قلع جاكته و قال بلهفه : يلااا .. مش قلتي متشوقه لدخلتنا اهو جي الوقت اللي توريني شوقك ..
ندى : اني .. ااامتى قلته ..
فراس : ندوووشه .. بلا خوف ياقلبي .. خليك ريلاكس ..
قرب منها شد يدها و قعد يشبحلها ..
فراس: محلااااك .. عيونك حلوااات ..
ندى مرتبكه و تحاول تبتسم ..
فراس : ماتقول نفسها اللي لسانها طويل ..
ندى : باهي .. نبي ..
قطع عليها و قال : حتى اني نبي ..
ندى سحبت يدها بخوف و قالت : لالالا .. قصدي نبي نرقد ..
فراس : شششنو .. تبصري ولا ؟
ندى : لالا .. نحكي من جدي ..
فراس : اني فاهم انك مرتبكه و خايفه .. تعالي قعمزي نهدرزو شوي ..
ندى سكتت و قعمزت جنبه .. شد فراس يدها و باسها ..
فراس : تبي نطلبو عشى ..
ندى : لا ..
فراس : باهي يلا نغيرو حوايجنا ..
ندى : انت اطلع نغير اني و ..
فراس : عينك الحوله .. تي اني هرمت من اجل هذه اللحظه و دافع دم كبدي ع خاطر اليوم هدا و تقوليلي اطلع .. تي انا بتقطع من جوايااا ..
ندى ابتسمت ..
فراس : ايوا هكي .. تعالي لحضني ..
لف دراعه عليها و قربها ليه و حضنها .. بدت ندى تحس بالراحه و تهدى .. بس اللي قطع عليهم صوت مسج وصل لفون فراس المحطوط ع الطاوله جنب فون ندى ..
فراس : اوففف هدا انسيت ما سكرته ..
ندى : حتى فوني ماسكرته .. توا انوض انسكرهم هما الزوز ..
فراس : واني بنغير حوايجي .. سكريهم و تعالي نساعدك تغيري قفطانك ..
هزت ندى راسها و وقفت سكرت فونها و مسكت تليفون فراس بتسكره .. بس جاها فضول تقرا المسج اللي وصله .. فتحاته القاته مكتوب فيه ..
المسج " فراس حبيبي ماتنساش وعدك ليا انك مش حتلمسها و انك بعد شهرين بالتمام حتجيبني ضره "
حست ندى انه قلبها وقف .. عاودت قرت المسج و تلفتت لفراس .. فراس سكر بطم بيجامته و قعد يشبحلها ب استغراب .. ركز في فونه اللي في يدها .. و رعش قلبه خاف انه تكون امل باعتتله مسج و ندى قراته .. قرب لعندها بسرعه خدا الفون و قرا المسج ..
ندى بصوت عالي : هادي منووو ..
فراس حط الفون و شد دراعها يبي يهديها ..
ندى سحبت دراعها بالقوه و قالت : تكلم هادي منوو ..
فراس : اهدي حيااتي .. اهدي ..
ندى بصوت عالي و دموعها ينزلو : مانبيش نهدى .. قول هادي منو..
فراس : قعمزي بس بيش نتكلمو و نفهمك ..
ندى قامت فيلوها و اتجهت لباب الجناح : نبي نروح ..
فراس لحقها و شدها من دراعها : وين بتروحي .. ندى اهدي تربحي .. قعمزي وخلينا نتفاهمو ..
ندى تبكي : سيبني نبي نمشي لهناء ..
فراس : هناء شنو يا ندى .. هناء مريضه بتزيدي اتعبيها .. ارجوك قعمزي و اسمعي مني ..
ندى مسحت دموعها و رجعت قعمزت ع السرير ..
فراس : اهدي بس و اسمعيني كوويس ..
ندى سكتت و ماتبيش تحط عينها في عينه ..
فراس : هادي بنت كنت نحبها و نبيها بس اماليا ما وافقوش لانها مطلقه و عندها صغار ..
ندى رفعت راسها ليه و هي مصدومه و دموعها ينزلو ..
فراس كمل بسرعه : بس .. بس والله اني حبيتك انتي .. و نبيك انتي .. سيبتها و قلتلها معاش نبيك و بنشوف حياتي مع خطيبتي .. و درتلها حظر بس هي قعدت تبعتلي و اني حظرتها من اكتر من رقم .. و اخر مسج بعتاته اللي انتي قريتيه ..
ندى حطت يدها ع وجهها و قعدت تبكي ..
فراس حط يده عليها يبي يقربها ليه .. بس هي دفاته و وقفت ..
فراس وقف : ندى و ربي نحبك .. و هي خلاص نسيتها .. كانت نزوه وبس .. يمكن عسان اماليا عنادوني حطيتها في راسي ..بس والله لما تعرفت عليك حبيتك ..
ندى بصوت مجروح ودموعها ينزلو : علاش هكي .. علاش مانفرحش فرحه كامله .. من يومي و اني في الهم و التشرد بين بوي و امي و بين خوالي و عمامي و بين حناي .. ما رتحت بككل .. مارقدت و اني مرتاحه بكككل .. ولا عمري حسيت بالامان .. و توا لما تزوجت و فرحت و قلت و اخيرااا بنتهنى و بنبات في حضن زوجي اللي حبيته و بنحس بالامان .. تطلع حتى انت زيهم .. حتى انت من ضمن الناس اللي ربي سخرهم عشان يعدبوني و بس ..
فراس قرب منها و قال بنبرة ترجي : حبيبتي والله نحبك .. والله نبي نعيش معاك العمر كله و نعوضك عن كل شي شوفتيه .. والله ما نيتي تعذبك .. ولا ناوي نسيبك و نبدلك ب اي مخلوقه ع وجه الارض ..
ندى بعدت عنه و قالت بصوت عالي : ما تلمسنيش ..
فراس : خلاص خلاص .. اهدي مش حنقربك .. اهدي بس ياعمري ..
ندى تبكي : نبي هناء ..
فراس : ياقلبي مايجيش تمشي توا لاي مكان شن تبيهم يقولو عنا .. انتي اهدي بس و خليك معايا ..
ندى : معادش نبيك .. طلقني ..
فراس : مستحيل ياندى .. مانقدرش نفرط فيك اني نحبك .. و ربي نحبك ..
ندى بعصبيه و صوت اعلى : انت كدااب .. تبي توصل لهدفك و بعدها بتسيبني و تمشي لحبيبتك الاولى ..
فراس : لالا .. والله لا .. الهدف اللي تحكي عنه لو نبي وصلتله مع غيرك .. بس اني نبيك انتي .. انتي حلالي و قلبي ..
ندى قعمزت و قعدت تبكي .. قعمز فراس جنبها و قال ..
فراس : ندوش قلبي .. اهدي و الله دمي يغلي لما نشوفك تبكي ..ارجوك ما تسيبيني .. اي شي تبيه اني حاضر بس ماتخليني ..
ندى سكت قريب ربع ساعه تفكر .. ماتبيش ترجع لحياتها اللي قبل ولا تبي تفرط في فراس و حبه ليها اللي واضح من عيونه و صدق كلامه .. سكتت فتره و بعدها مسحت دموعها و تكلمت ..
ندى : حنقعد بس بشرط ..
فراس : موافق قبل حتى ما تقولي .. اي شي غير فراقك اني راضي بيه ..
ندى : مش حتلمسني لين اني نرضى و يرتاح قلبي و نحس بالامان .. و نحس فعلا انك تحبني اني وبس ..
فراس هز راسه : موافق .. ان شاء الله حتحسي بالحب و الامان و حيرتاح قلبك .. اني واثق ..
ندى شبحتله شوي و بعدها وقفت .. يلا اطلع بنغير حوايجي ..
فراس وقف بملل : يييي ماتقولي عاد حتى السراير كل حد فينا في دار ..
ندى ميلت فمها ع الجنب و قامت حاجبها : على حسب مزاجي .. نفكر .. يلا توا اطلع ..
تنهد فراس بعصبيه و طلع من الدار ..
بينما ندى قعدت تغير في حوايجها و هي خايفه من الايام الجايه شنو داستلها اكتر ...
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
وصل اكرم هناء لعند باب حوشها و قبل ماتنزل نزل معاها من السياره و وقف قدامها و قال ..
اكرم : جبنالك ممرضه اني و ندى ضرتي .. عشان تهتم بيك بما انه ندى تزوجت ..
هناء مبتسمه : اي شفتها بكري و تعرفت عليها ..
اكرم : تليفوني جنب راسي اي شي اي شي تحتاجيه حتى في نص الليل كلميني ..
هناء : حاضر ..
اكرم : يلا هانت كلها اسبوع و نكون معاك ..
هناء ابتسمت : يلا حبيبي تو الجيران يشوفوك ..
اكرم : يلا .. اسبوع بس و مايقدر حد يفتح فمه ..
هناء : هههه يلا باي ..
مشت هناء خطوات و شاورتلا من بعيد و خشت .. و اكرم ابتسم ومشى ركب في سيارته روح لحوشه بعد ما اطمن عليها خشت للحوش .. غيرت حوايجها و تغطت في بطانيتها و هي تفكر في ندى و في ليلتها قعدت تدعيلها انه ربي يهنيها فحياتها و يعوضها عن الايام اللي شافتهم ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
