#توبة_قاصره
(10)
كانت الساعه 6 فجر لما كانت هناء في المطبخ اتدير في قهوه .. قعمزت ع الكرسي و بدت تشرب فيها ..
النوم غايب على عيونها و بالها مشغول و فكرها متلخبط ..
تفكر في خطوتها الاولى بعد يونس شنو .. و تفكر في اكرم و أملها في انه الحياه تجمعهم من جديد .. و ترجع تستبعد الفكره لما تتذكر انه متزوج ..
و في جيهة تانيه من البلاد كان أكرم واقف في الجنان وايديه في جيبه و يفكر في هناء ..
يبي يمحيها من دماغه بس شي .. مع كل محاوله منه تزيد تحتل تفكيره اكتر ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في الصبح .. كانت ندى تشرف على العمل في المركز لما نادتها دكتورة الجلديه اللي تخدم في المركز .. جت ندى لعندها و قعمزت في قسمها ..
ندى : تفضلي دكتوره سناء ..
سناء : عندي ليك موضوع ..
ندى : موضوع شنو؟..
سناء : الحق احني اندورو لخونا فراس و اني من فتره انتي عاجبتني ..
ندى قعدت تشبحلها و مصدومه ..
سناء: خوي فراس عمره 30 وبحوشه وبسيارته ..و هوا مهندس اتصالات و ما شاء الله عليه اخلاق و صلاه و عباده ..
ندى قعدت ساكته و مزال متفاجئه ..
سناء : بالله عليك يا ندى .. فكري و ردي عليا .. هوا بعدين بيجي عشان يشبحك و تشبحيه .. شنو رايك ؟..
ندى : اححم .. آآ..خلاص نشوفه من بعيد و .. و نرد عليك بعدها ..
سناء : تمام ..
وقفت ندى و مشت طول لمكتب هناء ..
ندى سكرت الباب وراها و قعدت تخبط على خدودها و قالت : حي حي .. يانهاري المبارك ..
هناء: شنو فيه ..
ندى قعمزت : جايني عريس ..
هناء بفرحه : احلفي .. و شنو مواصفاته ..
ندى : مواصفاته ممتازه و بعدين بنشوف خليقته .. حي بنتزوج و اخيراااا ...
هناء : هههه و اخيرا ...
ندى: خايفه .. خايفه يسألو عني ..
هناء : ايه عاد انتي تاريخك مشرف هلباااا ..
ندى : اي والله .. خايفه الحق .. مانبيه يطير مني ..
هناء : علاش هالفرحه كلها .. الزواج يدره الكبد..
ندى: مش كل زواج زي زيجتك هنوو .. هدا شبوب و و حلو و طرف ..
هناء: من قالك طرف ..
ندى : كل المهندسين طروف ..
هناء مبتسمه : ربي يسعدك على قد ما تعدبتي . عقبالي حتى اني ..
ندى : لا انتي نصيبك من السعاده فلوس ...
هناء : مانبيهم غير يجيبولي اكرم بس ..
ندى: سبحان الله طول عمري كنت ندور في الزواج من العلاقات .. من قال بننخطب بزواج تقليدي ..
هناء : هكي الحياة .. تفاجئك .. ديما حطي في بالك ان بصيرلك عكس توقعك ..
ندى : يمكن .. غير خلينا توا من الحياه .. و قوليلي نروح نبدل ولا شنو اندير ..
هناء : خليك بنفس لبسك حلو .. خففي ميك اب بس ..
ندى طلعت مزيل مكياج من شنطتها و بدت تمسح ..
هناء : راك تمسحيه كله تقعدي جعفر بعدين ..
ندى طلعت لسانها بغيض: عينك اني حلوه حتى من غير مكياج ..
ضحكت هناء و رجعت للاوراق اللي بين ايديها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في نهاية الدوام جت سناء طلّعت ندى عشان تشوف فراس .. وقفت ندى قدام الباب القت شاب طويل عريض .. لحيته سوده و عيونه ع العسلي واقف قدام سيارته ...
