The Scent Of Savage

Mystery

Tumayo siya at pinigilan sa muling pag-alis nito. "Auntie, these all are enough."

Hindi mapakali na hindi maintindihan ito. Taliwas sa kilala niyang mahinahon at puno ng awtoridad niyang tiyahin noon. "Maupo kayo, Zedrick. Tikman ninyo iyang gawa kong Spanish bread."

Kinuha niya ang plato at inalok sa dalawa niyang kasama. Kumuha si Caesar, habang si Zedrick ay nananatiling titig na titig sa kanya.

"Si Auntie ang nag-bake niyan. Tiyak na masarap," pagmamalaki niya kahit pa hindi natitikman.

Awa at lungkot ang nakita niya sa mga titig ni Zedrick. Mukhang nababasa ang nasa isip niya.

"Ang ganda-ganda mo na, Hija. Talagang fashionista ka. Anong tawag sa ganyang buhok?"

Ibinalik niya ang plato sa mesa para maharap ito. "Wala akong specific na tawag dito. Pero kung gusto mo, puwede kitang ayusan."

"Talaga. Sige ba." Sumulyap ito sa mga kasama niya. "Mabuti at kasa-kasama mo itong si Zedrick. Sabi ko na nga ba at sa huli ay kayo ang magkakatuluyan. Kasal na ba kayo?"

"Hindi po," sagot niya.

"Hindi pa po," sagot naman ng binata.

Humagikgik ang ginang at hinawakan siya sa kamay. Pasensiya ka na kung hindi ka na namin nahanap. Sinubukan naman namin, kaso na-comatose ang papa mo matapos ng gabing iyon. Ginawa namin ang lahat pero hindi kaya rito ang paggagamot. Dinala siya ng mama mo sa States para mas matutukan. Ang kaso mas mahal kaya wala kaming naging choice kung hindi ibenta ang mansion at ilan pang lupain ng daddy at mommy mo.

Kaya pala. Pero sino ang nakabili? "Kamusta po si Dad?"

"Awa ng Diyos. Naging maayos na ang lagay niya, pero hindi na siya nakakalakad. Dahil sa sakit niya, naapektuhan ang kanyang mga binti. Nanatili sila roon dahil binabantayan ang kalusugan ng daddy mo. Doon na rin nakahanap ng trabaho ang mommy mo."

"Si Eury po? Nasaan po ang kapatid ko?"

Naitikom nito ang bibig. Tila nag-aalangan kung dapat pa bang sabihin o may hindi ito gustong ibahagi sa kanila. Iyon ang kanyang misyon para matuloy na ang paghihiganti niya. Sabihin lang kung saan inilibing ay matatahimik na ang kaluluwa ng kanyang kapatid.

Nilingon niya si Zedrick. "Please, give us some time."

Tumango ito at sinama si Caesar para lumabas.

Naghintay siya ng ilang saglit bago nagsaita, "Ano pong naging resulta ng imbestigasyon sa nangyari sa kapatid ko?"

"Anak, sa totoo lang ang bilis nang pangyayari. Narinig namin ang sigaw mo, kaya hinanap ka namin sa buong mansion sa pag-aakalang baka napaano ka na. Nagkagulo ang mga dumalo at nataranta ang mommy mo. Tapos nakita ng daddy mo ang kapatid mo kaya inatake ito. Gusto kong makita ang kapatid mo, kung bakit nagkaganoon si Gregery pero maging ako ay nalito. Takot na takot ako at hindi alam kung sino ang uunahin. Sa huli ako ang nagdala sa ama mo sa Hospital. Dalawang araw ako roon at naiwan ang mommy mo sa mansion.

"Wala akong ideya kung anong nangyari buhat ng pag-alis ko. Basta ang alam ko lang ay ang mommy mo ang nag-asikaso. Sa ikatlong araw ay lumipad pa Amerika sila para matingnan ng espesyalista ang daddy mo."

Hindi niya maintindihan. Paanong sa dalawang araw na iyon ay nagawang ilihim ng kanyang ina ang tungkol sa ate niya?

"Nakita ng dalawa kong mata na patay na si Ate. Hindi po kaya ay inilibing agad?"

"Sa tuwing tinatanong ko ang mommy mo ay nagagalit siya. Anak, nag-aalala ako sa inyong magkapatid, pero kung iyon ang pasya ng kapatid ko sa anak niya ay gagalangin ko. Basta ang ipinangako ko ay mananatili ako rito at maghihintay sa milagrong pagbabalik mo."