Jannat Ke Pattey Fanfiction

Seven

Airport. Jab wo pehli baar yaha aayi thi toh uske sath uski sabse achi saheli Khadija Rana thi. DJ ka pehla hawai safar uska aakhri hoga ye uss waqt kisi ke gumaan me bhi nahi tha. Uss din apne ghar walo se bicharte DJ ka itna rona aaj usey samajh araha tha. Par ye sari cheeze insaan ke hath me hoti hi nahi. Insaan ke hath me toh bas Sabr aur Shukr hai. Haya ne yehi toh apni Khadija ko sikhaya tha. Ab iss baat par khud bhi amal karne ka waqt tha.

Haya ne airport jaane se pehle 2 rakah shukr ki namaz parhi. Iss namaz me usne Allah se dua maanga ki Allah uske dil ko sabr ata kare aur uski beti ki hifazat kare. Khadija Gul ek achi ladki bane.

Namaz mukammal karke usne apni beti se kuch der baat ki. Uske tawakkaw me nahi tha ki Khadija ye sab itne sanjeedgi se samajh payegi. Khadija behad zaheen bacchi thi, Haya ne dil me socha aur fakhr mehsus kiya. Mann me Alhumdulillah kaha aur apni beti pe ayatal kursi aur 4 qul parhke phooka aur inn ayato ko parhne ki takeed ki. Khadije Gul ne adab se ji kaha. Haya ne kabhi nahi socha tha ke uski beti waqt aane par itni ba-adab aur samajdaar hojayegi. Akhir thi woh ek choti si bacchi hi na. Alhumdulillah, uske dil ne phirse cheekha, "Allah tera shukr hai, Tune banaya; Tu hi hifazat karna meri beti ki".

"Chalein Madame?" Jihan ne prayer room ke darwaze pe aake kaha. Prayer room ek chota sa kamra tha jisme 6 se 10 afraad namaz wa ibadat karsakte the. Iss kamre me ek olive green colour qaleen bichi thi. Deewarein kafoori rang ki thi. Aur saamme ki deewar par ek sunehre rang ka Book shelf tha jis pe Quran shareef aur hadith ki kitabon ka collection tha. Kayi arse pehle Haya ke ek Turk me bane dost ne usse tanz kardiya tha kehkar ki "Aap kitaabein nahi parhti kya Haya?". Haya ne iss tanz ko apni ana pe lelia aur uss din se dheron kitaabein collect karne lag gayi.

Haya ne muskura kar kaha, "bilkul" aur apna abaya pehenne chali gayi.

"Baba, kab aaoge?" Haya ke jaane ke baad Khadija Gul ne aakho me nami liye pucha.

Uski aakhein namm dekh kar Jihan ka dil jese kat sa jata ho. Dunya me koi shay itni takleefdeh nahi lagti jitna apni beti ki aakhon me ashq. Par inn saari takleefon ko peejana parta hai apne watan ki mohabbat mein. Apne watan se wafadaari ka sukoon bhi toh kisi shay se nahi milta?
Jihan apne ghutno pe baith kar sargoshi se poocha,
"Khadija Gul, Kya tumhe raaz rakhne aate hain?"

Khadija ki aakhon me chamak aai aur muskurate hue isbaat me sar hilaya. Haya jo ab tayar hoke darwaze pe khadi thi baap-beti ko dekh ke muskurai aur sar ko kham diya.

Apni beti ke rukhsar se aasu ki boondein saaf karte hue Jihan ne usey ek raaz bataya. Khadija Gul muskurai aur phir Haya aur Jihan ko alvida karne Khadija apni Mummy (Sabeel phuppo) ke sath Airport gayi.

Airport. Jaha se ye safar shuru hua tha. Airport. Kya hoga aage? Kab milege hum sab? Uffh. Haya ke khayal shor kar rahe the. Par wo khush thi kyunki wo apne shohar ko support karne jarahi thi. Wo bhi toh iss qurbani me shareek horahi thi. Airport.