38
..بلسان جود...
لمن فهد قال لي انو منن جايه انبسطت شديد لانو كنت شايلة هم قعدتي براي سبحان الله كأنو حس بي
بعد فهد طلع مشيت المطبخ عملت شاي و شلت من كيكة الشوكلاته العامله فهد و قعدت احضر و اكل اثناء ما انا باكل الباب دق مشيت فتحتو لقيتها منن
منن و هي بتضحك:ده شنو العاملاه في روحك يا بت بقيت كلك شوكلت الله يعين فهد عندو بدل البيبي اتنين
ضحكت و دخلتها
غسلت وشي و قعدت معاها
اتونسنا و انبسطنا
المغرب كده منن قالت حتاخد غفوة لمن نامت فهد جا داخل و جفنو مورم و جضمو اليمين فيه اثار و يدو اليسار ملفوفه بشاش مليان دم و هدومو مغبرة و فيها بقع دم حسيت قلبي وقع من منظرو ده مشيت و قفلت باب الصالة بعد دخل عاينت ليه عمل لي هشش و دخل الغرفة شال هدومو و دخل الحمام بقيت بنوم في نبيل و راسي يودي و يجيب ومخي كبس من الافكار رقدت نبيل في سريرو و غطيتو و قعدت في الصالة منتظر السيد فهد يطلع من الحمام .. جا طالع و لافي يدو بشاش نظيف جا و قعد جمبي قبلت عليه و بقيت صارة وشي و بعاين ليه
قلت ليه: ممكن تفهمني ده شنو المنظر الجيت بيهو ده و العمل كده منو و كنت و وين و ليه اصلا
فهد: هشششش اهدي و حاحكي ليك الحصل من طق طق للسلام عليكم
..عدلت قعدتي و قبلت عليه و ربعت يديني و منتظراه يتكلم
فهد: الحصل يا ستي كالآتي مشيت مطعم قريب من المستشفى لقيت علي قاعد مع فنن و هي لابسة لبس شاذ شاذ قمة الشذوذ استغفر الله و متكل في كتفها و بلعب بي شعرها زي الكأنو قاعدين براهم ما اشتغلت بيهم كتير شلت طلبي و قعدت في اقرب تربيزة و بديت اكل فجأة القاه واقف قدامي و مبتسم ابتسامه جانبية و قعد و انا لحدي هنا ماسك اعصابي بالعافية لحدي ما فتح خشمو و بكل بجاحه و بقى يتلفظ و يقول كلام عنك و هو ما فيك و جايب ليهو صور مفبركه في قمة القرف و انا ما قدرت استحملو اكتر من كده و بقيت بتضارب معاهو و شال السكين من الطاولة داير يطعني بيها في كتفي بس لقى كفي قدامو داير اكفتو جرحني فيهو و فنن جات ساقتو و طلعو..
عاينت ليه و انا ما مستغربة لانو علي ما ناوي على خير اخدت نفس و قلت لفهد: عمري ما اتوقعت انو حيجي يوم زي ده علي طول عمرو كان معاي كويس و كان بقول لي انو هو ندمان انو خلاني و انا بصدو و بستفزو لحدي ما انت خطبتني بقى بحاول يعمل اي شي عشان ما يشوفني مبسوطه يعني خسارة يكون اخو نبيل
فهد و هو صاري وشو: ورب الكعبة اتعدل اتعدل ما اتعدل اقطعو بي يدي دي و اخد اعدام فيهو😠
بقيت بهدي في فهد و فكيت الجرح بتاعو لقيتو عميق شديد عقمتو ليهو و كبيت ليهو بن مسحون و لفيتها ليهو بالشاش
فهد عاين ليدو و عاين لي: تتذكري لمن جرحتي اصبعك في حنة نبيل
ضحكت و قلت ليهو: كييف ياااخ دي جرحه بتتنسي كلو من طاطا السغيل ده😂💔
فهد عاين لي في عيوني: نفس الموقف اتعاد تاني بس المرة دي اتعكست الادوار💘
ابتسمت ليه: عايزة اسألك المرة الفاتت لمن كبيت البن في اصبعي قلت يا ريت لو جرحي بتداوى و ما حبيت اسألك و اتحشر بس هسي عايزة اعرف
فهد جراني من انفي: من ننو عيوني تعرفي طوالي💘 الجرح الكنت قاصدو هو الجرح الكان بيتجدد لي كل مرة بسمع فيها منك '' مالك و مالي ..انت منو اصلا..دخلك شنو'' و كنت كل مرة بعاتب نفسي ليه ما قادر اعترف ليك كنت بحس انو حتضيعي مني و كل مرة بحاول اجي و اعترف برجع و انا خايف من انو حتى صداقتنا تنتهي .. رفع راسو عاين لي لقى عيوني مدمعه قشى دموعي و باس يدي و كمل كلامو: ما كنت متوقع انو حيجي اليوم الحنكون فيه في نفس الحتة دي كنت مفتكرك حترفضي و حتعارضي زي كل مرة بس اهو اتجمعنا و عندنا الحلو النايم جوه ده 💙
عاينت ليه و دنقرت راسي: انا اسفه😔💔
فهد رفع راسي: على شنو بتتأسفي
واصلت كلامي: على اني جرحتك من غير اعرف و سببت ليك وجع و بعد اي شي عملتو ما خليتني انا... انا كنت طالعه من علاقة تافهه بمفهوم لا بحب لا بنحب بس انت قلبت كل الموازيين
فهد و هو بضحك: بحمد ربنا الف مرة انو طقشتك يوم امتحان الرياضيات و اتناقرنا و الا ما كنا عرفنا بعض💘
عاينت ليه في عيونو الكانت بتبرق: الله يخليك لي
فهد باسني في راسي: و يخليك لي انتي و نيبو الصغنن💘
.....
عدت الايام و فهد بيطلع و بيجي العصر او المغرب و منن عدت معانا تلاته اسابيع و رجعت ..
....بعد 3 سنين بلسان جود.....
كنت في المطبخ بجهز الشاي دخلت اصحيهم لقيتهم صاحيين و بعملو رياضة سوا شكلهم حلو شديد و هم سوا فهد لابس شورت اسود و تشيرت ابيض و نبيل برضو بعد انتهو لاحظ لي نبيل جاني جاري و حضني رفعتو و قلت لفهد يلا الشاي ..مشينا قعدنا شربنا الشاي و قعدنا نتفرج الليله فهد ما شغال
.. العصر ...
عاينت لفهد مسافة و جيت قعدت جمبو بقيت بلعب بدقنو و انا راقده في كتفو
رفعت راسي: امممم فووودي!!
فهد: عيون فوودي
عاينت ليه: ااا ممكن توديني انا و نيبو لامي نقعد لحد العشاء و نجي
فهد ابتسم: ممكن دي شنو؟؟!! هاا العويرة دي امشي البسي و انا بلبس نبيل
ابتسمت ليهو و مشيت
....بلسان فهد...
اخترت لنبيل زي ما انا لابس بس بدل البنطلون شورت جينز و تشيرت ابيض و زبطت ليهو شعرو الكتير انتظرت جود جات طالعه لابسة فستان عنابي ساادة واسع و طرحه اوف وايت و شبط اوف وايت متأنقة كعادتها قعدت اعاين لبها مسافة و سرحت فيها طقطقت لي اصبعينها : ههي ههي الزمن و ضحكت ..وقفت و جيت ليها دنقرت بستها في راسها و حصنتها هي و نبيل و طلعنا
جود : عارف يا فوود حاسة نبيل ده حيطلع نسخه مصغرة منك💙
ضحكت و قلت ليها: و مالو يبقى عندك اتنين بنفس الطبع
جود و هي مبتسمه: احلى اتنين والله
.. وصلنا و قعدنا و اتونسنا و خالتو سلمى ..ام جود.. تشيل و تلعب في نبيل و مبسوطين بيه شديد اثناء ما نحن طالعين جو نبيل و ريمان و منار''بتهم''
نبيل شال نبيل الصغير: حبيب خالوو ده 💘...
و احنا طالعين نبيل الصغير بكى و حلف ما يقوم من نبيل
نبيل طلع حلاوة من جيبو اداها ليهو وباسو في خدو: يلا يا بطل امسك الحلاوه دي و المرة الجاية بجيك و بجيب ليك تمام
نبيل الصغير حضنو و جا نازل منه
نبيل قعد يضحك: البطل الصغنن ده شايل طبع جود واااضح زكرني لمن كنتي بتبكي كل ما اقول انا مسافر
جود ضحكت: جينات متوارثه
.. ركبنا العربيه و نحن راجعين غيرت الاتجاه..
جود: فهد ده ما شارع بيتنا
ابتسمت و قلت ليها: عارف عارف عايز اخطفكم في مشكله
جود: ما عندنا مشكلةوالله
..مشيت بيهم لحدي ما وقفنا في محل كده ابوابو خشب و مكتوب عليه في اللافته'' انستي💘''
...بلسان جود...
التفت عليه بعاين ليه مستغربة ضحك علي و شداني من يدي فتح الباب و دخلنا المحل مظلم فتح النور
كلهم: سبرااااااايز💘
اتخلعت و بقيت بعاين ليهم كلهم فهد و نبيل الصغنن و نبيل و ريمان و منار و نور و زياد و رنيم''بتهم'' و طلال و نصرالدين و منن و جنات و خالتو ندى ام فهد و مبارك اخو فهد و مرتو فدوى و دنيا و وهج انبسطت شديد ما كنت متزكرة عيدميلادي حنضتهم و شكرتهم و اثناء ما نحن قاعدين و بنتونس فهد مشى جاب مايك و جيتار و قعد
طلال عاين لي : اوووبااا ما كبرتو على الحاجات دي يا شباب خلوها لينا نحن السناقل
فهد: نكبر و يكبر حبنا و لا ما كده و غمز لي.. شغلوها ليهو شديد و ضحكنا ضحك مبالغه بعدها فهد بدا يعزف و يغني
'' قلبي الحقيقة ماخان لياليك انا في الماضي متروك ناجيك
مابدا الحب ابد بتنكر ليك لكن الاشواق والناس حواليك
كلنا:
يانور العين انت انت وينك وين
اللون الاسمر ودرت شبابي
وعشقت الجنة وفي الجنة عذابي
ماقدرت اتالم والمرداشرابي
ياحليل الراحو ياحليل احبابي
الشعر الناعم ليكو اسرني
والوجه الناعم بنوره غمرني
وعيون نعسانة وبرموش تجرحني
خلتني متيم للراحة جتني
يانور العين انا والانغام والعود في ايدي بحكيلو حكايتي ويعيد
تربيتي''
صفرو و صفقو ليهو و عجبتني الاغنية شديد لانو كنت بسمعها كتير بس المرة دي سمعتها منو عجبتني اكتر💘
بعدها طلال جا لفهد و اتهامسو و مشو اوضه كده و جو طالعين شايلين بيانو طبعا كلنا اتخلعنا
طلال : حابي اهدي حاجه بسيطه ليكم و لصديقة الطفولة خصيصا
انبسطت كتير لانو طلال نادرا يعزف و عزفو فظيع شديد
فهد جا وقف جمبي
طلال بدا بعزف
'' البنت الشلبية عيونا لوزية
بحبك من قلبي يا قلبي إنتي عينيا
حد القناطر
محبوبي ناطر
كسر الخواطر
يا ولفي ما هان عليا
بتطل بتلوح و القلب مجروح
و أيام عالبال بتعن و تروح
تحت الرمانة حبي حاكاني
و سمعني غناني يا عيوني
و أتغزل فيا💘''
صوتو فظيع فظيع شديد
بعد انتهى صفقنا ليهو و شكرنا صوتو
..نبيل الصغنن قال الا يعزف بيانو 😂😂 فهد شال في رجليه و قعد يعزف معاهو و نبيل مبسووط و يضحك😂💛
..اتونسنا و ضحكنا و انبسطنا ادوني هداياهم و ودعنا بعض
مشينا البيت.. بعد نومت نبيل
قعدنا انا و فهد في الصالة
عاينت ليه: كل يوم بحبك اكتر و في السنه ال28 من عمري احبك دوما و دائما و ابدا💘
فهد باسني في راسي: ال28 سنه المرو من عمرك ديل انا محظوظ اني نلت 8 سنين من عمرك معاك💘
فهد مد لي كيس اسود : كل عام و انتي نورالعين💘
ابتسمت ليهو و شلت الكيس لقيت فيه صندوقين الاول لونو ابيض فتحتو لقيتو ملان شوكلت التاني لونو بنفسج و ملصوق عليه ورده لافندر 💘 فتحتو لقيت جواه كتاب مكتوب في غلافو '' سهران لياليك'' التفت على فهد وانا مندهشه
فهد هز راسو بمعنى ايوة
دي روايتي الاولى و اول نسخه مطبوعه منها💘
عيونو دمعو من الفرح فهد قش دموعي
فهد: طبعت الف نسخه نشرت 500 و في 500 جوا في الاوضه شوفي عايزة توزعيهم وين و لازم تديني نسخه❤❤
عاينت ليه: انا احسنت ياتو احسان في دنيتي عشان ربنا يجازيني بيك💘💘
..يتبع...
