طليت عليها براسي لقيت عينيها مغمضين...عرفتها من التعب تغاشات...وقفت بالزربة و بديت نحاول نديها لبلاصتها حتى نجحت...عاوضتها فيها و رحت نجري جبت شوية ما حتى جيت راح نرشها نفيقها و تفكرت بلي اذا فيقتها درك معنتها راح ترجع تبكي كيما كانت و تهرد روحها و صحتها...مالا خليتها هاكك و قلت حتى تفيق وحدها و نحكي معاها هاكا اوموا تريح شوية...
بقيت مريحة قدامها و نخزرلها و دموع مازال مخليين العلامات تاعهم على وجهها...التعب محفور فيه و لوجيعة باينة من لبعيد...سبحان الله الحياة هادي شحال صعيبة و واعرة...قد ماكاين ناس عايشين فيها مهنيين شوية قد ماكاين ناس نكتبلهم غير لعذاب...و قد ماكاين ناس حبابهم و اهلهم هوما سبة راحتهم و ضحكتهم قد ماكاين ناس لقراب ليهم هوما لي حطموهم و دمروهم...
حركت راسي باش نقدر نخرج من الحالة لي كنت فيها و وقفت نحيتلها لباسكات تاعها و غطيتها مليح...و فكيتلها حتى حجابها باش تكون الاز...من بعد رحت غسلت وجهي و شربت دوا تاع راس باسكو لوجع كان راح يقتلني..حتى نقول توالفتو و نعاود نستعرف بلي هو اقوى مني و مانقدرولوش و لازمو دوا...
موراها رحت وجدت القهوة و ريحت على الكرسي نشرب في كاسي و نخزر لليساء بعدما قررت مانروحش للخدمة و نبقى معاها...نفسيتها راها مدمرة و لازمها لي يوقف معاها و هنا ماعندها حتى واحد من غيري...
جوزت سوايع لي كانت راقدة فيهم مابين نخزرلها و نخمم فيها و مابين نتفكر في ماضيا و في عذابي و في النهارات لي جوزتهم كيما راها ليساء درك...مانرقدش حتى ينشفوا دموعي و زيد غير نغلق عينيا نتفكر كلش حتى رجعت نكره الرقاد...اليامات هادوك كي نتفكرهم نحير في روحي كيفاش مازالني حية و مامتش...
كي حسيتها طولت و ماحبتش تفيق بديت نتوسوس و خفت يكون كاشما صرالها...دونك بلا مانفطن لقيت روحي وقفت بالزربة و جريت لعندها نشوفها واش بيها...انا هزيت يدي باش نحطو عليها و نبدا نحركها لقيتها تحركت وحدها و بدات تفيق...قعدت نخزر فيها حتى فطنت مليح و ناضت قعدت...خزرت فيا من بعد حطت راسها بين يديها باينة فيها موجوعة...خليتها على راحتها و رحت هزيت كاس ما مع الدوا و رجعت لعندها...
شجن:هاكي شربي حبة تريحي شوية
حكمتهم عليا و يديها يرجفوا...كانت ماقادراش تحكم مامبا الكاس دونك رجعت ريحت حداها و عاونتها انا تشرب...
شجن:تكاي كيما كنتي مازالكي تعبانة
سمعتلي لكلام و رجعت كيما كانت...انا وقفت رجعت لكاس لبلاصتو من بعد رجعت نريح حداها...لقيتها هزت عينيها لي كانوا معمرين دموع و خزرتلي و قالت...
ليساء:تمنيت نفيق و نلقى كلش منام في منام و ماكانش منو بصح امنيتي ماتحققتش و ظهر واش عشت كلو صح
كي سمعتها واش قالت بلا مانفطن حطيت يدي على يدها و زيرت عليها...
شجن:واش رايك تحكيلي واش صرا بلاك نقدر نعاونك
أنت تقرأ
صراع إمرأتان
Romanceيقولو ناس زمان همك يجيك من دمك و انا نقول قادر الرحمة لي تلقاها في الغريب ماتلقاهاش في لقريب... لكرونيك تحكي على زوج بنات تجمعهم الصدفة في وقت تكون فيه ظروفهم حطمتهم و تعبتهم..زعما يلقاو الخير في بعضاهم؟و زعما يكون كاين حب في حياتهم؟
