*****ليساء تحكي******
دورت وجهي نخزر وين كانو يخزرو قاع الناس..لقيت جان يبان شوية كبير هابط مع الدروج...الناس قاع كانو قاعدين على بيها هو جا باين وسطنا و جبد كامل الانظار ليه..ماركزتش معاه بزاف و دورت وجهي..جبدت كراس و حطيت ستيلو بين صباعي نلعب بيه و قعدت مركزة في الطابلو نستنى الاستاذ يحن علينا و يجي...حتى لعبد هاداك لي دخل جاز عليا...البارفان تاعو كان بزاااف قوي لدرجة حكمتني الدوخة و بلا مانفطن هزيت يدي و قعدت نحرك فيه قدام نيفي باش نبعد عليا الريحة..باينة فيه دوش بقرعة ريحة قبل مايخرج من الدار...
كي حسيت الريحة خفت هبطت يدي و رجعت نلعب بستيلو كيما كنت حتى شفت السيد هاداك وقف اون فاص ليا في الطابلو...تشوكيت كي شفتو تما و الشوك تاعي كبر كتر كي شفتو يحط الطباشير و لابروس فوق الطابلة الطوييييلة لي كانت حداه...
خزرت في باقي الناس نشوفهم واش راهم مشوكيين كيفي لقيت لبنات كامل طايرين بالفرحة و عينيهم يخرجو في لقلوب و هوما يخزرو فيه و الاولاد مساكن و لا على بالهم...يعني غير انا لي راني مشوكية باسكو العبد هادا ظهر استاذ...ياك يقولو اساتذة الجامعة كامل كبار و شايبين تسما الهم هدا من وين خرج...و لا هو استثناء...
خرجت من الصدمة تاعي كي سمعتو يحكي...يا يما لافوا تاعو تخلع من قوة ما خشينة...
........:السلام عليكم..جاسبار راكم كامل بيان؟
لبنات كامل جاوبوه و هوما يتبسمو و الاولاد رماوه في الثقيل و انا معاهم...يعني قلت مع روحي استوعبي بلي هدا استاذ قبل و من بعد عاد افتحي فمك و جاوبيه...
هو كي سمع الرد تاعهم تبسم و كمل يحكي...
..........:انا حمزة ****** لبروف لي راح يقريكم لفرنسي السنة ان شاء الله..جاسبار نفوتو يامات شابين بلا مشاكل
غير كمل كلامو لبنات قاع طرطقو في خطرة يجاوبو فيه و قالو ان شاء الله..لدرجة انا شعرة و نغلق على ودنيا من قوة ماكان صوتهم قاوي...والله مافهمت واش بيهم يديرو هاكدا تحسب جامي شافو راجل...و هو خلاهم كملو كلامهم و حط يديه في الجيوب و قعد رايح جاي اون فاص لينا و هو يخزر فينا و يحكي...
الاستاذ حمزة: بون نبداو بالقوانين لي نحب انا نمشي عليهم و نخدم بيهم و نكره لي يكسرهم و لا يلعبها حاجة كبيرة و يرميهم ورا ظهرو و راح نقولهم بالدارجة باش كامل تفهمو و دخلوهم لراسكم ملييح(هز يدو هاكا 🖒 في السما و راسو في الارض ) الحاجة الاولى كي ندخل مكلاه تدخلو موراي ياك الكور ماشي اوبليجي تسما ماديرونجيوني ماتسيفو عليا ننشعكم و نرجعكم من الباب... القانون الثاني التلفون مكلاه نشوفو اون فاص ليا و لا نسمع حسو..ثالثا كي نحكي مع واحد فيكم مكلاه يواجبني باسكو راح يصرا مالا يحمد عقباه...رابعا لبنات شدو قدركم باش مانغلط مع حتى وحدة منكم...و اخر حاجة علبالي بيكم راكم جايين لهنا و نتوما حاطين في بالكم بلي اساتذة الجامعة معلبلهم بحتى واحد و ماكانش فيهم السيريو مي انا ماشي كيما الباقي...انا(و هو ينعت لروحو) راني هنا باش نحلل دراهمي و نخدم من نيتي و خدمتي تقول بلي نتوما راكم هنا باش تقراو تسما لازم نقريكم بسيف عليكم..فهمتو و لا نعاود؟
YOU ARE READING
صراع إمرأتان
Romanceيقولو ناس زمان همك يجيك من دمك و انا نقول قادر الرحمة لي تلقاها في الغريب ماتلقاهاش في لقريب... لكرونيك تحكي على زوج بنات تجمعهم الصدفة في وقت تكون فيه ظروفهم حطمتهم و تعبتهم..زعما يلقاو الخير في بعضاهم؟و زعما يكون كاين حب في حياتهم؟
