******ليساء تحكي*****
وصلت لباب الدار بعدما قطعت الجاردان قاع جري و انا راح نطيح من الخوف...اول حاجة قابلتني هوما خوالي لي كان باين في عينيهم الحزن..حسيت من وجوهم بلي صرات حاجة ماراحش تعجبني و زدت تأكدت كي قريت الشفقة في الخزرات تاعهم ليا..خليتهم ورايا بلا مانقولهم حتى كلمة و كملت طريقي دخلت للدار و انا نكدب في كل احساس جاني و نجرب قد مانقدر نتفائل...غير حطيت رجلي لداخل لقيت نسا خوالي قاعدين في الكولوار يتبكاوا مع بناتهم...حوست بعينيا على ماما وسطهم و كي مالقيتهاش هزيت يدي زيرت بيه على قلبي و انا ندعي باش تكون هي بخير برك الباقي مايهمنيش...
دخلت نمشي غير بالعقل جيهة بيتها و انا حاسة قاع النسا عينهم عليا..كنت نرجف و خايفة من واش راح نقابل...وصلت فتحت الباب و دخلت...كانت بلاصتها فارغة و مافيها حتى واحد و حسيت البيت بارد مافيه حتى روح..رجعت من وين جيت و مشيت لعند ام جمال و انا مافاهماش علاش من بينهم قاع خيرتها هي...حبست قدامها و انا حاسة روحي واقفة بسيف ...دمعتي شادتها بطلوع الروح و قلبي مزير عليا...سقسيتها و انا خايفة من جوابها...
ليساء:وين رآها ماما؟
انا سقسيتها و هي قوات في البكا و رجعت تبكي بالصوت... أنا هنا خلاص حسيت روحي خرجت من عقلي و رميت يديا شديتها من قشها نحرك فيها بالقاوي و قلت...
ليساء:راني نسقسيك جاوبيني وين رآها ماما؟
كملت تبكي كيما كانت رجعت طلقتها و بديت ندور على قاع لي كانوا قاعدين كل مرة نشد وحدة و انا نعيط و نبكي و في نفس الوقت ندعي في ربي باش يكون تخمامي غالط..
ليساء:انطقوا جاوبوني...وين رآها ماما؟ واش كاين ؟واش صرا علاش راكم تبكيوا؟ جنازة شكون لي رآها عندنا في الدار؟
كنت ندور وسطهم كي المهبولة و انا نسقسي نستنى وحدة فيهم برك ترحمني و تجاوبني و تفهمني مي وحدة مافتحت فمها ..قاع كانوا يخزروا بشوفة تاع شفقة و يبكيوا و نسمع فيهم يقولوا غير كلمة الله يصبرها...وقفت وسطهم و انا حاسة روحي خلاص راح نهبل و عيطت بقاع واش نقدر بلاك ناثر في وحدة فيهم و طفي ناري...
ليساء:يصبرني على واش؟ انطقوااااا...جنازة شكوووون هادي؟
حسيت بيد نحطت على كتفي دُرت نشوف شكون لقيتوا جمال و عينيه راح يخرجوا من بلاصتهم من البكا و الحمورية و النفخ...شديت فيه بزوج يديا و انا نترجاه بعينيا باش يقولي جواب من غير لي راني متوقعاتو...
ليساء:الله يخليك يا جمال قولي واش كاين؟ ياك ماما رآها بخير؟
هبطت عينيه باش مايواجهنيش و قال...
جمال:أن لله و انا اليه راجعون...ربي حبها و داها و ربي يصبرك على فراقها
يديا طاحوا و طلقتوا...حسيت ودنيا صوناو من قوة الشي لي سمعتو...حاجة فيا لداخل تكسرت و كسرتني معاها...عقلي ماحبش يستوعب واش سمعت و لقيت لساني يقول بصوت ضعيف و دموعي مازال في عينيا ماهبطوش...
YOU ARE READING
صراع إمرأتان
Romanceيقولو ناس زمان همك يجيك من دمك و انا نقول قادر الرحمة لي تلقاها في الغريب ماتلقاهاش في لقريب... لكرونيك تحكي على زوج بنات تجمعهم الصدفة في وقت تكون فيه ظروفهم حطمتهم و تعبتهم..زعما يلقاو الخير في بعضاهم؟و زعما يكون كاين حب في حياتهم؟
